Toy günündə bütün qız və oğlanlar hər kəsdən fərqli, gözəl görünmək istəyir. Odur ki, gəlin köçən qız şəhəri qarış-qarış gəzib ürəyinə yatan gəlinlik paltarı axtarır, gözəllik salonu gəzir. Bəzi ucqar qəsəbələrdə fəaliyyət göstərən gözəllik, vizaj salonlarında münasib qiymətə bəzənmək, saç düzümünə sahib olmaq mümkündür.

   Amma bu çox vaxt elə də keyfiyyətli olmadığı üçün qızlar paytaxtın mərkəzi yerlərinə üz tutur. Buralarda öz işinin ustası olan vizaj, saç ustalarına rast gəlmək olur. Amma mərkəzdə yerləşən salonlarda qiymətlər həddindən artıq bahadır. Bir gəlinin gözəllik salonuna girib çıxması ona 400-500, bəzən isə daha artıq qiymətə başa gəlir. Gəlinlik paltarlarının kirayəsinə gəlincə, bu sahədə də həddən artıq bahalıqdır. Şəhərimizin ticarət mərkəzlərində, mağazalarında gəlinlik paltarlarının bir gecəlik prokatı 500 manatdan 3000-3500-ə qədərdir. Bu gün yerli ticarət məkanlarında müxtəlif xarici ölkələrin brend şirkətləri tərəfindən tikilərək ölkəyə gətirilən gəlinliklər çeşidlidir. Gəlinin pulu olarsa ürəyi istəyən, əyninə yaraşan gəlinlik paltarını bir gecəlik kirayəyə götürə bilər. Gəlinlik paltarı və gözəllik salonlarında qiymətin bu qədər baha olmasının səbəbini hər kəs bir cür izah edir. Salonlarda gəlin bəzəyilə məşğul olan ustalar deyir ki, onlar gəlin bəzəyində ən keyfiyyətli, bahalı kosmetikadan istifadə edir, əl işi göstərir. Saç düzümünün də müasir moda tələblərinə uyğun yığıldığını deyən salon işçiləri qiymətə uyğun da yüksək səviyyəli xidmət göstərdiklərini bildirir. Gəlinlik libasının bu qədər baha qiymətə prokata verilməsini isə gənc modelyer-rəssam Gülşən Əlimirzəyeva müxtəlif amillərlə bağlayır. Onun sözlərinə görə, ölkədə gəlinlik paltarı istehsal edilmədiyi üçün bu libaslar respublikaya xaricdən gətirilir. Gəlinliklərin ölkəyə gətirilməsinin çox baha qiymətə başa gəldiyini deyən G.Əlimirzəyeva bildirdi ki, dükan sahibləri də xərclədiyi pulu çıxarmaq üçün gəlinlikləri baha qiymətə prokata verir":İndi gəlinlik paltarı bazarında dünyanın ən populyar, nüfuzlu şirkətlərinin istehsalı var. Amma mən də razılaşıram ki, onların satışı və prokatı çox bahadır. Axır illər mağazalar satışa elə də üstünlük vermir. Əsas gəliri gəlinlik paltarlarının kirayəsindən götürürlər. Bu libasların ölkəyə gətirilməsi çox baha başa gəlir. Mağaza sahibləri də bir qədər bundan sui-istifadə edərək qiyməti qaldırır. Halbuki, bir-iki prokatdan sonra gəlinliyə xərclənən pul çıxır. Mənə elə gəlir ki, bu bir qədər acgözlüyün əlamətidir. Yəni sahibkarlar vətəndaşların bu yolla cibini soymağa çalışır. Bütün qızlar gözəl görünmək istəyir. Ona görə də toyunda yaxşı bir gəlinlikdə görünməyi arzu edir.

   Qiymətlər isə çox bahadır. Belə çıxır ki, camaat evlənməli deyil. Bilirsiz, ucqar qəsəbələrdə gəlinlik paltarları ucuz qiymətə kirayəyə verilir.

   Ancaq onlar həddindən artıq köhnə olduğundan, dəblə uyğunlaşmadığından onu kirayəyə götürən olmur. Mərkəzi yerlərdə də ki, qiymətlər çox bahadır. Hesab edirəm ki, Azərbaycanda gəlinlik paltarlarının istehsalına başlansa daha məqsədəuyğun olar. Onsuz da gəlinliyin hazırlanmasında keyfiyyətli, şıq parçalardan istifadə edilir. Biz də o parçaları alıb burada gəlinlik tikə bilərik". Modelyerin dediyinə görə, yerli gəlinlik geyimləri gənc qızlara daha ucuz qiymətə kirayəyə verilər.