Azərbaycan Baş prokuroru yanında Korrupsiyaya Qarşı Mübarizə İdarəsində hazırda 42 cinayət işinin istintaqı aparılır. Bu barədə APA-ya Baş Prokurorluğun mətbuat xidmətindən məlumat verilib.

   Məlumata görə, araşdırılan cinayət işlərindən biri Azərbaycan Respublikası Mərkəzi Bankı tərəfindən "Royal Bank" ASC-nin bir sıra filiallarının fəaliyyəti yoxlanarkən aşkar edilmiş qanun pozuntuları ilə bağlıdır. Cinayət işinin istintaqı zamanı müəyyən edilib ki, "Royal Bank" ASC-nin "Paytaxt" filialının müdiri işləmiş Anar Həşimov qulluq mövqeyindən istifadə etməklə və vəzifə saxtakarlığı yolu ilə ona etibar edilmiş özgə əmlakını külli miqdarda mənimsəyərək talayıb.

   Anar Həşimov filial müdiri işləyərkən, depozit müqaviləsinə əsasən, Yusif Abdullayev tərəfindən xəzinə mədaxil orderilə filiala əmanət qismində təhvil verilmiş pul üzrə əməliyyat aparılarkən əmanətçinin xəbəri olmadan bilə-bilə yalan məlumatlar daxil etdiyi rəsmi sənəd olan xəzinə məxaric orderində sonuncunun imzasını saxtalaşdırıb, əmanətçinin 50 min 259 manat əmanət və faiz pulunu filialın xəzinəsindən qanunsuz olaraq götürüb. Törətdiyi cinayət əməllərinə görə Anar Həşimov Cinayət Məcəlləsinin etibar edilmiş külli miqdarda özgə əmlakını talama və vəzifə saxtakarlığına görə məsuliyyət nəzərdə tutan 179.3.2-ci və 313-cü maddələrilə təqsirləndirilən şəxs qismində cəlb olunaraq məhkəmə tərəfindən barəsində həbs qətimkan tədbiri seçilib. Eyni zamanda, Mərkəzi Bank tərəfindən aparılan yoxlama zamanı depozitlərin qəbulu, kreditlərin verilməsi, müəssisələr arasında bank əməliyyatlarının həyata keçirilməsi prosesində aşkar edilmiş digər qanun pozuntuları üzrə təqsirkar şəxslərin müəyyənləşdirilərək məsuliyyətə cəlb edilməsi istiqamətində istintaq tədbirləri aparılır.

   Baş Prokurorluğun məlumatında həmçinin bildirilir ki, torpaq sahələrinin qanunsuz satılması, zəbt edilməsi kimi aktuallığı ilə seçilən torpaq üzərində mülkiyyət hüququnun pozulması cinayətlərilə mübarizə daha da gücləndirilib.

   Belə ki, Balaxanı bələdiyyəsi tərəfindən torpaq sahələrinin qanunsuz satılması barədə Ədliyyə Nazirliyi Bələdiyyələrlə İş Mərkəzindən daxil olmuş material üzrə kifayət qədər əsaslar olduğundan, Cinayət Məcəlləsinin 308.1-ci, 311.2-ci və 313-cü maddələri ilə başlanmış cinayət işinin istintaqı zamanı müəyyən edilib ki, Cavanşir Aslan oğlu Məmmədov Balaxanı bələdiyyəsinin sədri vəzifəsində işləyərkən xidməti səlahiyyətlərinin hüdudlarından açıq-aşkar surətdə kənara çıxıb. Qanunvericiliklə bələdiyyə torpaqları üzərində mülkiyyət, istifadə və ya icarə hüquqları yalnız torpaq hərracları və ya müsabiqələri vasitəsilə həyata keçirildiyi halda, o, qanunun tələblərini pozaraq, 2008-ci il yanvarın 23-dən 2009-cu il iyulun 10-dək olan müddətdə bələdiyyə torpaqlarının mülkiyyətə, istifadəyə və ya icarəyə verilməsi barədə qərarlar qəbul etməyə səlahiyyəti olmadığı halda, müvafiq icra hakimiyyəti orqanının rəyi olmadan Balaxanı bələdiyyəsinin ərazisində yaşamayan və ya həmin ərazi üzrə qeydiyyatı olmayan 122 vətəndaşın, 6 fiziki və hüquqi şəxsin adına ümumilikdə 56 min 480 kvadratmetr torpaq sahəsinin ayrılmasına və icarəyə verilməsinə dair təkbaşına qərarlar qəbul edib. C.Məmmədov həmin torpaqların alqı-satqı yolu ilə vətəndaşların mülkiyyətinə verilməsini təşkil edərək, Balaxanı bələdiyyəsinin qanunla qorunan mənafelərinə zərər vurub.

   Bundan əlavə, o, yenə həmin vəzifədə işləyərkən, mülkiyyətində olmasa da, faktiki istifadə etdiyi 850 kvadratmetr torpaq sahəsini satması və torpaq sahəsinə bələdiyyədən sənəd verilməsi üçün 2009-cu il oktyabrın sonunda ona müraciət edən Balaxanı qəsəbəsinin sakini Ədalət Əliyevdən həmin torpaq sahəsinə digər şəxsin adına köhnə tarixə, yəni 2005-ci il üçün sənəd verməsinə görə 3 min ABŞ dolları məbləğində rüşvət alıb.

   Törətdiyi cinayət əməllərinə görə Cavanşir Məmmədov Cinayət Məcəlləsinin 309.1-ci, 311.2-ci və 313-cü maddələrilə təqsirləndirilən şəxs qismində cəlb olunaraq, barəsində həbs qətimkan tədbiri seçilib.

   "Azərdəmiryolbank" ASC-nin "Gəncə-2" filialının 2008-ci il yanvarın 1-dən 2009-cu il iyulun 7-dək olan dövr ərzində fəaliyyəti bankın kredit və daxili audit departamentinin auditorları tərəfindən yoxlanarkən plastik kart vasitəsilə kreditlərin verilməsi prosesində, biznes və digər məqsədlər, eləcə də avtomobil almaq üçün kreditlərin verilməsi zamanı külli miqdarda pul vəsaitinin talanması faktları aşkar edilib. Toplanmış material hüquqi qiymət verilməsi üçün Azərbaycan Respublikasının Baş Prokurorluğuna göndərilib.

   Həmin material üzrə Baş Prokurorluqda Cinayət Məcəlləsinin 179.3.2-ci və 308.2-ci maddələrilə başlanmış cinayət işinin istintaqı zamanı müəyyən edilib ki, "Azərdəmiryolbank" ASC-nin "Gəncə-2" filialının müdiri vəzifəsində işləyən Fərid Qurbanov 2006-cı ildə dostu, sahibkarlıq fəaliyyətilə məşğul olan Malik Hüseynov ilə qabaqcadan cinayət əlaqəsinə girərək sonuncunun icarəyə götürüb işlətdiyi çoxsaylı mağaza və iaşə obyektlərinə işə götürdüyü, eləcə də qohumluq və tanışlıq münasibətində olduqları şəxslərin, yaxud əvvəllər filialın xidmətlərindən istifadə etmiş şəxslərin adlarına 2006-2009-cu illərdə kredit verilməsinə dair saxta müqavilələr və digər rəsmi sənədlər tərtib edib. Bundan əlavə, vətəndaşların qanuni şəkildə götürdüyü kredit hesabına apardıqları ödəmə pullarını uçotdan gizlədərək ələ keçirib və bununla da "Azərdəmiryolbank" ASC-yə məxsus 1 milyon 678 min 255 manat məbləğində külli miqdarda nağd pul vəsaitini talayıblar.

   Törətdikləri cinayət əməllərinə görə Fərid Qurbanov və Malik Hüseynov Cinayət Məcəlləsinin 179.3.2-ci və 313-cü maddələrilə təqsirləndirilən şəxs qismində cəlb edilərək barələrində həbs qətimkan tədbiri seçilib.

   Ayrı-ayrı şəxslərin əmlakının aldatma yolu ilə ələ keçirmələri barədə vətəndaşların çoxsaylı şikayətləri ilə başlanmış cinayət işinin istintaqı zamanı müəyyən edilib ki, Şölə Gülmalıyeva Bakının Nizami rayonundakı 61 saylı orta məktəbin direktoru vəzifəsində işləyərkən Azərbaycan Beynəlxalq Universitetinin tarix və ictimaiyyət fakültəsini bitirmiş Günel İbrahimovanı qanunsuz olaraq tarix müəllimi kimi işə qəbul etmək və xidmət üzrə ümumi himayədarlıq göstərmək müqabilində 2007-ci ilin avqust ayında sonuncunun atası Mayıl İbrahimovdan 2 min 500 manat məbləğində rüşvət alıb.

   Törətdiyi cinayət əməllərinə görə Ş.Gülmalıyeva Cinayət Məcəlləsinin 311.2-ci maddəsilə təqsirləndirilən şəxs qismində cəlb edilərək, barəsində həbs qətimkan tədbiri seçilib. İstintaqla həmçinin müəyyən edilib ki, 2006-2009-cu illərdə Ş.Gülmalıyeva tərəfindən təqdim edilmiş sənədlər əsasında "Kapitalbank"ın 1 saylı Binəqədi filialında 922 vətəndaşın adına istehlak kreditləri rəsmiləşdirilib, vətəndaşların əvəzindən saxta imzalar çəkilməklə, kredit müqavilələrinə əsasən rəsmiləşdirilmiş məbləğlər kassa məxaric orderlərinə əsasən Ş.Gülmalıyevaya verilərək sonuncu tərəfindən mənimsənilib.

   Bundan sonra bank tərəfindən Şölə Gülmalıyevadan götürdüyü kreditlər üzrə yaranmış əsas və faiz borclarının ödənilməsi tələb edildikdə, sonuncu ayrı-ayrı şəxslərin əmlaklarını girov qoymaqla bankdan 6 halda cəmi 900 min ABŞ dolları və 3 milyon 230 min manat ipoteka kreditini rəsmiləşdirərək həmin borcları ödəyib.

   İstintaqla müəyyən edilib ki, Ş.Gülmalıyeva qeyd olunan illər ərzində "Nikoil Bank"ın 2 saylı filialından da ayrı-ayrı şəxslərin əmlaklarını girov qoymaqla külli miqdarda kreditlər götürüb, eləcə də ayrı-ayrı vətəndaşları aldadaraq, onların külli miqdarda pul vəsaitlərini dələduzluq yolu ilə ələ keçirib. Hazırda həmin iş üzrə araşdırma davam etdirilir.