Aşıq sənətinin bir qrup şoupərəst ifaçının əlində oyuncağa çevrildiyi çoxlarınıza məlumdur. Əlinə saz götürənlərin əksəriyyəti televiziyaya davaya çıxır, bir-birinə xoşagəlməz söz deyib sazı hörmətdən salır.

   Elə bir veriliş yoxdur ki, ora aşıq Telli Borçalı dəvət edilsin, amma aşıq Namiq Fərhadoğlu çağırılmasın. Telli hardadırsa Namiq də oradadır. Bütün proqramlara onlar dava-qalmaqal üçün çağırılır. Telli Namiqə deyir sən aşıq deyilsən, Namiq də Telliyə. Telli deyir ki, Namiq məclis apara bilmir. Namiq də "Telli yaxşı məclis aparır, amma efirə şalvar geyib çıxır" söyləyir. Namiq-Telli dueli əksər verilişlərdə davam etdirilir. Bir şeyi də bildirək ki, Telli və Namiqin yaxın ətrafının dediyinə görə, bu aşıqların əslində bir-birilə heç bir davası yoxdur. Bu insanlar məhz şou yaratmaq, gündəmdə qalmaq üçün bu yola əl atır. Yəni özlərini tamaşaçılara düşmən kimi təqdim etməklə şou yaradırlar. Təəssüf...

   Axırıncı çıxışlarından birində tərəflər bildirdi ki, respublika üzrə sorğu keçirilsin, görsünlər ki, Namiq yaxşı aşıqdır, yoxsa Telli? Hansı çox sevilir? Namiqə tələbat çoxdur, ya Telliyə?

   Hətta Telli bildirdi ki, istənilən yerdə, proqramda Namiqlə deyişməyə hazırdır. Təki bu şəraiti yaradan olsun.

   "Bakı-Xəbər" qəzeti olaraq, aşıq Telli Borçalı və aşıq Namiq Fərhadoğlunun respublikada bir aşıq kimi hansı nüfuza malik olmasını üzə çıxarmaq istədik. Qəzetimizin saytında (baki-xeber.com) "bu aşıqlardan hansını üstün bilirsiniz" sualı ilə oxucularımıza müraciət etmişik. Bir neçə həftə ərzində Tellinin, yoxsa Namiqin üstün aşıq olduğunu dəyərli oxucularımız müəyyən edəcək. Sonra isə yekun nəticəni dərc edəcəyik.

   Qeyd edək ki, artıq səsvermə başlayıb. İstəyənlər saytımıza daxil olmaqla öz seçimini edə bilər.