Azərlotereya Açıq Səhmdar Cəmiyyətinin təşkilatçılığı ilə keçirilən və ATV-də nümayiş etdirilən oyun kampaniyalarına ölkə əhalisi böyük maraq göstərir. İnsanların müəyyən bir qismi lotereya biletləri alaraq pul, maşın, mənzil qazanmaq istəyir.

   "Tale açarı" lotereya oyununda isə əsasən mənzil oynanılır. Ötən oyunda 2 milyona yaxın lotereya satışa çıxarılmışdı. Həmin lotereyanın 9 yüz 50 mini öz alıcısını tapmışdı.

   Qeyd edək ki, keçən oyunda 25 mənzil oynanılırdı və onların hamısı da öz sahibinə qismət oldu.

   "Tale açarı"nın əhaliyə bəxş etdiyi bu şansdan indi daha çox insan yararlanmaq istəyir. Belə ki, şəhər əhalisi metrostansiyaların qarşısında, yol kənarında qoyulan köşklərdən daha çox "Tale açarı" lotereyası alır. Hətta köşklərin önündə növbə də gözə çarpır.

   Əldə elədiyimiz məlumata görə, bu dəfə "Tale açarı"nda 30 mənzil oynanılır. Bu isə insanların mənzil qazanmaq ümidini bir qədər də artırır. Odur ki, onlar bu lotereya biletini əldə etməkdən ötrü bəzən növbələrə də durur. Təki bu kampaniyaya qatıla bilsin. Deyilənə görə, "Tale açarı" lotereya biletlərinin satış faizi ötən dəfəkindən xeyli artıqdır. Əvvəllər insanlar bu oyunda mənzil udmağın əlçatmaz olduğunu düşünsə də, nəticələr onları başqa cür düşünməyə vadar edir.

   Amma təəssüf ki, lotereyanın adında səhvə yol verilib və "tale" sözü "taleh" şəklində yazılıb. Düşünürük, bundan sonra əlaqədar şəxslər buraxılan səhvə düzəliş edəcək.