Dünən AFFA-nın İntizam Komitəsinin iclası keçirilib. Apasport.az saytının xəbərinə görə toplantıda ölkə çempionatının XXV turunda "Xəzər-Lənkəran" - "Neftçi" oyunundakı qalmaqala qiymət verilib. İclasda Lənkəran təmsilçisinə üst-üstə 35 min manatlıq cərimə kəsilib.
   Qarşılaşma zamanı stadionda ictimai asayiş və təhlükəsizlik təmin olunmadığı üçün meydan sahibi "Xəzər-Lənkəran" 5000 manat cərimə olunub. Oyun zamanı meydana və qaçış zolağına kənar əşyalar atıldığı üçün komanda daha 2000 manat cəriməyə məruz qalıb. Görüş zamanı məşqçiləri və nümayəndələri texniki zona qaydalarını pozduğu üçün klub əlavə 2000 manat cərimə olunub.
   Oyun zamanı stadionda kütləvi nizam-intizamsızlıq baş verdiyindən lənkəranlılara daha 8000 manat cərimə kəsilib. Bundan əlavə, matçın 90+1-ci dəqiqəsində meydan sahiblərinin futbolçusu Ruslan Poladov birbaşa qırmızı vərəqə aldığı üçün 2 oyunluq diskvalifikasiyaya, komandası isə 2000 manat cəriməyə məruz qalıb.
   Baş məşqçisi Ağasəlim Mircavadov oyunun hakimlərinə qarşı təhqiredici sözlərə yol verdiyi üçün 4 oyunluq kənarlaşdırılıb və "Xəzər-Lənkəran" 4000 manat cərimə olunub.
   Klubun mətbuat katibi Tural Əsgərov oyunun hakimlərinə qarşı təhqiredici sözlərə yol verdiyi üçün 4 oyunluq cəzaya, klub isə 4000 manat cərimə olunub. Matçda stadionun direktoru Höccət Hacıyev oyunun hakiminə hədə-qorxu gəldiyi üçün 10 oyunluq kənarlaşdırılıb və meydan sahibinə 8000 (səkkiz min) manat cərimə kəsilib.
   "Xəzər-Lənkəran"ın növbəti ev oyunlarında təhlükəsizlik tədbirlərinə riayət olunmayacağı təqdirdə, klub daha ciddi cəzalandırılacaq.
   Klubun baş məşqçisi Ağasəlim Mircavadov tərəfindən analoji hərəkətlərə yol verilərsə, ona daha ciddi sanksiyalar tətbiq olunacaq.

İspaniyanın "Barselona" klubunda çıxış edən 32 yaşlı fransız Tyeri Anri klubu tərk edəcək. O, ABŞ-ın "Nyu-York Red Bulls" klubu ilə demək olar ki, hər mənada razılığa gəlib. Anri yayda baş tutacaq dünya çempionatından sonra, yaxud da 2011-ci ilin martında yeni klubunda debüt edə bilər. Xatırladaq ki, Tyeri Anri İbrahimoviçin "Barselona"ya transfer olunmasından sonra əsas heyətdəki yerini itirib.
   

İngiltərə yığmasının baş məşqçisi Fabio Kapello bu il keçiriləcək dünya çempionatında qələbə qazanmağa əsas namizəd saydığı millilərin adını açıqlayıb. Avropa mətbuatının yazdığına görə, italiyalı mütəxəssis İspaniya, Braziliya, Argentina, Hollandiya və İngiltərə yığmalarını dünya çempionatının favoritləri hesab edir. Kapello bu gün üçün dünyanın ən güclü futbolçuları saydığı şəxslərin də adlarını dilə gətirib. Onun fikrincə, hazırda Kriştianu Ronaldu, Messi və Runiyə rəqib yoxdur. "Pato ilə Aquero da çox yaxşı oyunçulardır. Lakin onlar ilk üçlüyə məğlub olur", - deyə İngiltərə millisinin baş məşqçisi bildirib.
   

İspaniyanın "Real" klubunun və Fransa milli komandasının sabiq futbolçusu Zinəddin Zidan hələlik özünü "kral klubu"nun baş məşqçisi postunda görmədiyini açıqlayıb. Lent.az-ın məlumatına görə, Zidan gələcəkdə bu postu tutacağını istisna etməyib. Keçmiş yarımmüdafiəçi "Real"a xeyir verməyi çox istədiyini bildirib: "Hələlik "Real"ın baş məşqçisi olmağa hazır deyiləm. Baxaq, görək gələcəkdə nə olacaq. Ola bilsin, bu, gələcəkdə reallaşdı. Madrid klubuna xeyir verməyi çox istəyirəm. Lakin prezident Florentino Peresin planlarını həyata keçirmək üçün müəyyən vaxt lazımdır. Açığı, "Real"a yaxın olmaq, digər vəzifələrdən birini yerinə yetirmək istəyirəm". Qeyd edək ki, 1988-ci ilin dünya çempionu 2001-2006-cı illərdə "Real"ın şərəfini qoruyub. "Kral klubu" Zinəddin Zidanın karyerasında sonuncu olub. Hazırda Zidan Florentino Peresin məsləhətçisidir. Bundan öncə o, əslən bağlı olduğu Əlcəzair yığmasının baş məşqçisi vəzifəsindən imtina edib.

Lənkərandakı qalmaqallı "Xəzər-Lənkəran" - "Neftçi" görüşü Peşəkar Futbol Liqasının prezidenti Ramin Musayevə baha başa gələ bilər.
   Apasport.az saytının xəbərinə görə, AFFA prezidenti Rövnəq Abdullayevin əmri ilə Unibank Premyer Liqasının oyunlarının təşkilatçılığında yol verdiyi nöqsanlar ucbatından PFL-ə yazılı xəbərdarlıq elan olunub.
   

Türkiyə çempionatının son turunda öz meydanında "Fənərbağça"ya məğlub olaraq çempionluq şanslarını xeyli azaldan "Qalatasaray"da ara qarışıb.
   Milli.Az "Fotomaç" qəzetinə istinadən xəbər verir ki, klub rəhbərliyində təmsil olunan şəxslərin əksəriyyəti prezident Adnan Polatdan baş məşqçi Frank Raykaardın istefaya göndərilməsini tələb edir. Onlar hollandiyalı mütəxəssisin mövsümün sonunda klubdan göndərilməsini, onun əvəzinə "Qalatasaray" və Türkiyə millisinin sabiq çalışdırıcısı Fatih Termin gətirilməsini vacib sayır. Məlumata görə, "Cim Bom" rəsmiləri Raykaardla uğur əldə olunacağına inanmır, "Qalatasaray"ı türk futbolunu yaxından tanıyan məşqçinin çalışdırmasının vacibliyini söyləyirlər. Onlar Terimin keçmiş klubuna qayıtmaqdan imtina edəcəyi təqdirdə, Mirça Luçeskunun İstanbula gətirilməsini təklif edirlər.
   

Türkiyənin "Qalatasaray" klubunun vitse-prezidenti Adnan Sezgin ölkəmizdə işləyə bilər. Bu barədə Türkiyənin "Vətən" qəzeti yazıb.
   Türkiyə mətbuatı çempionatın son turunda "Fənərbaxça"ya məğlubiyyətdən sonra kəskin tənqid edilən "Qalatasaray" klubunun rəhbərliyində dəyişikliklər ediləcəyini bildirir. "Vəzət" qəzeti "Qalatasaray"ın vitse-prezidentinin artıq özünə Özbəkistan və Azərbaycanda iş axtardığını da yazıb.
   
   

"Xəzər-Lənkəran" klubunun vitse-prezidenti Tuyqun Nadirov "Neftçi"lə qalmaqallı oyundan əvvəl yaşanan bir maraqlı olay haqda məlumat verib.
   Apasport.az saytına açıqlamasında Nadirov bildirib ki, qarşılaşmadan öncə Azərbaycanın veteran futbolçusu Vəli Qasımov hakimlərin otağına daxil olub və onlarla təxminən 15 dəqiqə ərzində məxfi söhbət aparıb: "Vəli Qasımov əvvəl "Neftçi"də çalışırdı. Mənə maraqlıdır, bu gün AFFA-da seleksiya işi ilə məşğul olan bir adamın hakimlərin otağında nə işi var idi? O, hakimlərlə söhbət edəndə qapını bağlayıblar və heç kimi ora buraxmayıblar".
   

İstanbulun "Qalatasaray" klubu böyük məbləğli gəlirdən məhrum ola bilər. Apasport.az saytının məlumatına görə, ötən həftə öz meydanında "Fənərbaxça"ya minimal hesabla uduzan "Cim Bom" çempionatın yekununda ilk iki yerdən birini tutmaq şansını çətinləşdirib.
   Frank Raykaardın yetirmələri qızıl və ya gümüş medalları qazanmayacaqları təqdirdə, növbəti mövsüm Çempionlar Liqasında iştirak edə bilməyəcəklər. Bu mötəbər yarışa qatılmamaq isə "Qalatasaray"ı 10 milyon avroluq gəlirdən məhrum edəcək.
   Superliqanın başa çatmasına 7 tur qalmış "Qalatasaray" 53 xalla 4-cü yerdədir. "Sarı-qırmızılılar" lider "Bursaspor"dan 5, "Beşiktaş" və "Fənəbaxça"dan isə 2 xal geri qalırlar.