Sosial vəziyyətin çətinliyi, ailədaxili münaqişələr, cəmiyyədə üzləşdiyimiz problemlər çox vaxt bizi çaş-baş qoyur. Bu sıxıntıdan xilas olmaq üçün hansı ünvana üz tutacağımızı əksər hallarda bilmirik. Belə halda ya ürək həkiminin, ya da nervopotoloqun qapısını döyürük.
   Amma bilmirik ki, bizim problemin həlli nə nervopotoloqluqdur, nə də kardioloqluq. Psixoloq yanına getməklə bizi narahat edən qara-qura fikirlərdən, psixoloji gərginlikdən, stresdən xilas ola bilərik. Hazırda paytaxtda bir neçə qurum var ki, orada xaricdə hazırlanmış yüksək səviyyəli psixoloqlar fəaliyyət göstərir. Məlumatlara görə, Sovet dönəmində praktik baxımdan psixoloqa elə də geniş meydan verilmirmiş. Müasir dövrümüzdə isə kifayət qədər öz sahəsini dərindən bilən psixoloqlarımız var. İş burasındadır ki, insanlar çox zaman psixoloqun həqiqi vəzifəsinin nədən ibarət olduğunu anlamır. Onlar, bir çox hallarda, psixoloqla nevropotoloqu səhv salır. Özündə bir az gərginlik hiss edən adama elə gəlir ki, onda artıq dəlilik əlaməti yaranır və bu vəziyyətdə psixoloq yanına getsə, kənardan ona pis baxarlar. Əsas problem isə stress vəziyyətində olan insanların psixoloq yanına gizlənə-gizlənə gəlməsidir. Psixoloqlar pasiyentlərin bu hərəkətini elə də təqdir etmir. Onlar hesab edir ki, artıq Azərbaycan cəmiyyətinin üzvləri psixoloqun dəli həkimi olmadığını anlamalıdır.
   Qeyd edək ki, hazırda Azərbaycanda psixoloq yanına yetkinlik yaşına çatmayan uşaqlar, ailəsində problemlər yaşanan insanlar, boşananlar, eləcə də stress keçirənlər daha çox gedir.
   Psixoloqların sözlərinə görə, istənilən insan özündə bir azca narahatlıq hiss edən kimi yüngülləşmək üçün psixoloqa getməlidir. Azərbaycanda bəzi psixoloqların müraciət edənləri dinləmək əvəzinə onlara məsləhət verməsinə gəlincə, peşəkarlar hesab edir ki, psixoloqun vəzifəsi xəstəni dinləmək, onu anlamaq və s-dir. Psixoloqun xəstəyə, daha doğrusu müştəriyə (psixoloqlar xəstələrini müştəri adlandırır) məsləhət vermək ixtiyarı yoxdur.
   Regional Psixologiya Mərkəzinin əməkdaşı, psixoloq Xatirə Səfərovanın sözlərinə görə, psixoloq yanına əsəb xəstələri deyil, həyatında gərginlik, ağırlıq olan adamlar gəlməlidir":Bizdə belədir ki, adam əvvəlcə gərək xəstələnsin, sonra psixoloq yanına getsin. Təəssüf ki, belə bir tendensiya artıq formalaşıb. Bu da düzgün deyil. Psixologiya elmi bu yanaşmanın tamamilə əleyhinədir. Çünki biz klinik xəstələrlə işləmirik. Klinik xəstələrin həkimi psixiatrdır. Psixiatr və nevropotoloqlar belə xəstələrlə işləməyə daha çox üstünlük verir. Psixologiyanın vəzifəsi isə sağlam ruhlu insanların müalicəsilə məşğul olmaqdır. Bura insanların həyat problemləri və s. daxildir. Depressiya, stress kimi hallarla qarılaşanlar psixoloqa müraciət etməlidir".
   X.Səfərovanın sözlərinə görə, müştəri məsləhət üçün onlara müraciət etdikdə əvvəlcə ona anket verilir ki, öz ailə vəziyyətilə bağlı informasiya versin, cavablarla psixoloqun təxminləri üst-üstə düşəndə o müştərilə işləyir. Digər həmkarları kimi, X.Səfərovanı da narahat edən müştərilərin psixoloq xidmətinə qorxa-qorxa müraciət etməsidir: "Psixoloqa müraciət edən insanlar sonradan çox normal vəziyyətə düşür. Hətta ən gərgin münasibətdə olduqları adamlara münasibətləri dəyişir. Bizi narahat edən məsələlər də yox deyil. Bəziləri bizə anonim şəkildə müraciət edir. Xahiş edirlər ki, mərkəzimizə müraciət etmələrilə bağlı onları tanıyanlara heç nə deməyək. Bəzən psixoloq yanına gələn adamlar dost-tanışlarını görəndə gizlənir. Qəribədir ki, tanıqları onları psixoloq yanında görürsə, onlara "xəstə" adı yapışdırır.
   Psixoloqlar da, psixologiya elmi də bu cür şeyləri qəbul etmir. Avropa və Amerikaya nəzər salsaq görərik ki, hər bir insanın öz psixoloqu var. Yeri gəlmişkən bir şeyi də deyim ki, psixoloqun vəzifəsi məsləhət vermək deyil. Bir psixoloq ki, müştəriyə, ona kömək üçün müraciət edən adama məsləhət verir, demək o psixoloq deyil, məsləhətçidir. Psixologiyanın vəzifəsi ondan ibarətdir ki, insanın davranış-düşüncə modellərini düzgün korrektə etsin. Daha doğrusu, o, davranış-düşüncə modellərini düzgün korrektə edən bir mexanizmdir. Psixoloq məsləhət vermək üçündürsə, onda ata-ana, dost da adama məsləhət verə bilər və o adamın psixoloqa ehtiyacı olmaz".
   

Azərbaycan Media Mərkəzində "Sahibsiz heyvanları məhv etmək: qəddarlıq yoxsa zərurət?" mövzusunda debat keçirilib.
   APA-nın məlumatına görə, debatda tərəf kimi İxtisaslaşdırılmış sanitariya, təmizlik və kommunal xidmətlər İdarəsinin baş nəzarətçisi Gülnarə Axundova və "Alyans" Canlı Aləm və Etika Xeyriyyə Cəmiyyətinin rəhbəri Mənsurə Rzayeva iştirak edib.
   "Alyans" sədri bildirib ki, sahibsiz heyvanlara qarşı mübarizə sahəsində Azərbaycanda qəddar və sivil olmayan üsullar tətbiq olunur. O, sahibsiz heyvanların qəddarlıqla öldürülməsinin qarşısının alınması üçün rəhbərlik etdiyi təşkilatın müxtəlif addımlar atdığını, bununla bağlı Avropa ölkələrinin təcrübəsini öyrəndiyini və bunun tətbiq olunması üçün aidiyyatı dövlət qurumlarına müraciət edildiyini qeyd edib: "Bu istiqamətdə fəaliyyət göstərən idarə heyvanlara qarşı qəddarlıq göstərir və bu qəddarlığın əleyhinəyik. Onları qəddarcasına öldürmək problemi həll etmir".
   İxtisaslaşdırılmış sanitariya, təmizlik və kommunal xidmətlər İdarəsinin baş nəzarətçisi Gülnarə Axundova bildirib ki, küçələrdəki sahibsiz itlər uşaqlara hücum edir və bunun nəticəsində çoxsaylı xəstəliklər yaranır: "Bizə yerli sakinlər müraciət edir, sahibsiz itlərin ərazidən uzaqlaşdırılmasını xahiş edirlər. Biz də çox istərdik ki, bu sivil qaydada həyata keçirilsin və bu istiqamətdə tədbirlər həyata keçirilir. Hazırda itlərin saxlanma yerlərinin təşkil olunması üçün addımlar atılır". O, idarənin Bakının 11 rayonuna xidmət etdiyini və hər gün onlara çoxlu sayda müraciətlərin daxil olduğunu vurğulayıb: "Biz müraciətləri maksimum vaxtında təmin etməyə çalışırıq".
   Tədbirdə iştirak edən kinoloqlar, baytar həkimləri, KİV və QHT nümayəndələri də mövzu barədə öz fikirlərini bildiriblər.
   

Dünən Ağır Cinayətlərə Dair İşlər üzrə Məhkəmədə Əfqanıstanda və Pakistanda NATO hərbi birləşmələrinə qarşı keçirilən əməliyyatlarda iştirakda təqsirləndirilən Azərbaycan vətəndaşı Vüqar İsayevin cinayət işi üzrə məhkəmənin hazırlıq iclası keçirilib.
   APA-nın məlumatına görə, hakim Cavid Hüseynovun sədrliyilə keçirilən iclasda məhkəmə baxışı aprelin 8-nə təyin edilib.
   Qeyd edək ki, Bakı şəhəri, Suraxanı rayonu, Yeni Günəşli qəsəbəsi sakini, 1975-ci il təvəllüdlü Vüqar Səfa oğlu İsayev Cinayət Məcəlləsinin 12.1-ci (Azərbaycan vətəndaşları respublikanın hüdudlarından kənarda törətdikləri əmələ (hərəkət və ya hərəkətsizliyə) görə, bu əməl həm Azərbaycan Respublikasının, həm də ərazisində törədildiyi xarici dövlətin qanunvericiliyinə əsasən cinayət sayılırsa və bu cinayətə görə həmin şəxslər xarici dövlətdə məhkum olunmayıbsa, bu Məcəllə əsasında cinayət məsuliyyətinə cəlb edilirlər) və 279.1-ci (qanunvericiliyi ilə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz etmə) maddələrilə ittiham olunur.
   

Dünən Ağır Cinayətlərə Dair İşlər üzrə Hərbi Məhkəmədə nizamnamədən kənar hərəkətlərdə - "dedovşina"da təqsirləndirilən Müdafiə Nazirliyinin "N" saylı hərbi hissəsində xidmət edən 5 nəfərə hökm oxunub.
   APA-nın xəbərinə görə, hakim Mehdixan Abdullayevin sədrliyilə keçirilən prosesdə məhkəmə təqsirləndirilən şəxslər - David Rasimoviç Hacıyev, Azər Nazim oğlu Şamilov, Pərvin Əhliman oğlu Höccətov, Umuxan Oruc oğlu Allahverdiyev və Radiq İsməddin oğlu Qürbətovun cinayətinin sübuta yetirildiyi qənaətinə gəlib. Hökmə əsasən A.Şamilov və P.Höccətov 1 il 6 ay, U.Allahverdiyev 1 il 3 ay, D.Hacıyev 1 il müddətinə azadlıqdan məhrum edilib. R.Qürbətov isə 1 il şərti cəza alıb. İttihama görə, Müdafiə Nazirliyinin Qalada yerləşən Hərbi Hava Qüvvələrinə məxsus hərbi hissəsinin mühəndis-aviasiya bölüyündə xidmət edən hərbi qulluqçular - kiçik çavuş David Rasimoviç Hacıyev, əsgərlər Azər Nazim oğlu Şamilov, Pərvin Əhliman oğlu Höccətov, Umuxan Oruc oğlu Allahverdiyev və Radiq İsməddin oğlu Qürbətov qrup halında tabeliklərində olan və olmayan əsgərlərə qarşı nizamnamədən kənar hərəkətlər ediblər. Onlar özgə əmlakını ələ keçirmək məqsədilə gənc əsgərlərə döymə yolu ilə təzyiq göstəriblər. Qeyd edək ki, təqsirləndirilənlər Cinayət Məcəlləsinin 182-ci (hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə, onların haqqında rüsvayedici məlumatlar yayma və ya onların əmlakını tələf etmə hədəsilə özgənin əmlakını və ya əmlaka olan hüququnu və ya əmlak xarakteri daşıyan digər hərəkətlər etməsini tələb etmə), 331-ci (hərbi xidmət üzrə vəzifələrin yerinə yetirilməsi zamanı və ya belə vəzifələrin yerinə yetirilməsi ilə əlaqədar bir hərbi qulluqçunun digərini təhqir etməsi), 332-ci (tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma, zərərçəkmiş şəxsin şərəf və ləyaqətini alçaltmaqla və ya ona qarşı zor tətbiq etməklə əlaqədar olduqda) və 341-ci (rəisin və ya vəzifəli şəxsin hakimiyyətdən və ya öz qulluq mövqeyindən sui-istifadə etməsi, hakimiyyət həddini və ya qulluq səlahiyyətini aşması, hakimiyyətdən qəsdən istifadə etməməsi, bu əməllər müntəzəm, yaxud tamahkarlıq məqsədilə və ya digər şəxsi marağa görə törədildikdə, habelə bu əməllər əhəmiyyətli zərər vurduqda) maddələrlə ittiham olunub.
   

Dünən Ağır Cinayətlərə Dair İşlər üzrə Məhkəmədə "Kapital Bank" ASC-nin Şəmkir filialının əməkdaşlarına hökm oxunub.
   APA-nın xəbərinə görə, hakim Rasim Sadıxovun sədrliyilə keçirilən prosesdə məhkəmə təqsirləndirilən şəxslərin cinayətinin sübuta yetirildiyi qənaətinə gəlib. Məhkəmənin hökmü ilə filialın baş mühasibi Şahin Əliyev 10 il, bank filialının əməkdaşları - Rasim Nağıyev 7 il 6 ay müddətinə azadlıqdan məhrum edilib, Nisə Bayramovaya 3 il şərti cəza verilib. Mənzər Paşayeva və Arif Hümbətovun hər biri məhkəmənin hökmü ilə 1000 manat məbləğində cərimələnib. İttihama görə, Ş.Əliyev "Kapital Bank" ASC-nin Şəmkir filialının baş mühasibi vəzifədə işləyərkən digər təqsirləndirilənlərlə əlbir olaraq filialda fəaliyyətdə olan "Wester Union", "Privatmoney", "Miqom", "Blizko" və "Kontakt" sürətli pul köçürmələri sistemləri adı ilə müxtəlif şəxslərin adlarına kassa məxaric orderləri yazıb imzalayıb, bu sənədlər əsasında bankın xəzinəsindən banka məxsus 417 550 ABŞ dolları (335 210 manat) mənimsəyib. Təqsirləndirilən şəxslər Cinayət Məcəlləsinin 179.3.2-cu (mənimsəmə və ya israf etmə), 313-cü (vəzifə saxtakarlığı), 314-cü (səhlənkarlıq) maddələrilə ittiham olunub.
   

Türkiyə polisi Mərsin vilayətinin Kağıthane məhəlləsindəki məktəblərin ətrafında narkotik vasitə satılması barədə məlumat alıb.
   Lent.az-ın "mersinhaber.com" saytına istinadən verdiyi məlumata görə, polisin bu ərazidə keçirdiyi əməliyyat zamanı narkotik vasitə satdığı iddia olunan Azərbaycan əsilli Batırxan Babanəzərov və Şaltik Altibayev yaxalanıb.
   Şübhəlilərin üzərindən emal olunmuş 32 qram heroin tapılıb. Evlərində aparılan axtarış zamanı Batırxan Babanəzərovun qohumu olan Şöhrət Babanəzərov da saxlanıb. Ancaq 38 yaşlı Şöhrət Babanəzərovun narkotik vasitə ticarətilə əlaqəsi olmadığı üzə çıxıb.
   
   

Son vaxtlar kirayə bazarında vəziyyət xeyli pisləşib. Belə ki, Bakının kirayə mənzil bazarında müəyyən passivlik hökm sürür. Şəhərətrafı və mərkəzdəki bir sıra evlər boşalmaqda davam edir. Boşalma davam etdikcə kirayə evlərin qiyməti də aşağı düşməkdədir. Nəticədə kirayəyə ev verənlər kirayə qiymətlərini xeyli aşağı salıb.
   Məsələ ondadır ki, əvvəl şəhərdə 200 manatdan aşağı olmayan mənzillər indi 150 manata kirayəyə verilir. Ev alqı-satqısı ilə məşğul olan "maklerlərin" sözlərinə görə, hətta bundan da aşağı qiymətə mənzil tapmaq olur. Kirayə bazarında qiymətlərin aşağı düşməsini müxtəlif faktorlarla əlaqələndirirlər. İş ondadır ki, əvvəllər tikintidə çalışan fəhlələr əsasən rayonlardan gəlirdi və onlar da daha çox şəhərətrafı evlərdə kirayə qalırdı. Səbəb o idi ki, həmin evlər mərkəzdə yerləşən mənzillərdən ucuz idi. Şəhərin mərkəzində olan mənzilləri isə daha çox xaricdən Azərbaycana işləməyə gələnlər kirayələyirdi. Bununla yanaşı, mərkəzdəki mənzillər ofis məqsədi üçün şirkətlər tərəfindən icarəyə götürülürdü.
   Qlobal maliyyə böhranı başlayandan sonra evlərə tələbat xeyli aşağı düşdü. Nəticədə şəhərin mərkəzində icarəyə götürülən mənzillər boşalmağa başladı. Hazırda ən bahalı mənzillərin yerləşdiyi Səbail və Nəsimi rayonlarında evlərin bir çoxu boşdur. Əvvəlki illərlə müqayisədə kirayə qiymətləri xeyli aşağı salınsa da, evlərə yaxın duran yoxdur.
   Kirayə bazarında yaranan ucuzlaşmanı iqtisadçı-ekspert Samir Əliyev, daha çox, mövsümi amillərlə əlaqələndirdi. Onun sözlərinə görə, tədris ilinin sona çatmaq üzrə olması qiymətlərin ucuzlaşmasına təkan verir: "Adətən kirayə bazarında qiymətlər o zaman artır ki, yeni tədris ili başlayır və ali məktəblərdə təhsil almaq üçün rayonlardan paytaxta tələbələr gəlir. Bu da, öz növbəsində, kirayə bazarında tələbatın artmasına təkan verir. Kirayə bazarında tələbatın artmasına təsir edən ikinci faktor tikinti sektorunun vəziyyətilə əlaqədardır. Bu gün tikinti sektorunda mövcud olan durğunluq kirayə evlərə olan tələbatın kəskin şəkildə aşağı düşməsinə səbəb olub. Rayonlardan xeyli sayda insan əvvəllər tikintidə işləmək üçün paytaxta üz tuturdu. Bu zaman şəhərətrafı ərazilərdə yerləşən və əsasən də ucuz olan evlərə tələbat artırdı. İndi isə vəziyyət dəyişib. Binalarda tikintinin dayanması həmin fəhlələri məcbur edib ki, rayonlara qayıtsınlar. Digər tərəfdən, icarəyə verilən mənzillərə tələbatın azalması bu gün açıq şəkildə özünü göstərir. Faktiki olaraq, bu gün tez-tez şahidi oluruq ki, Bakının mərkəzində baha qiymətə icarəyə verilən evlər boşdur. Eləcə də bir sıra obyektlər var ki, əvvəllər ofis kimi istifadə olunub və bu gün həmin obyektlər faktiki istifadə olunmur. Həmin obyektlərin sahibləri, uzun müddət kirayəçi axtarmalarına və qiymətləri xeyli aşağı salmasına baxmayaraq, bir çox hallarda kirayənişin tapa bilmir. Bütövlükdə bir sıra amillərin təsiri üzündən tələbatın azalması qiymətlərin də aşağı düşməsini diqtə edir".
   S.Əliyevin fikrincə, böhranla əlaqədar kirayə bazarında məlum vəziyyətin yaranması gözlənilən idi: "Kirayə evlər boşaldığından, bazarda təklifin sayı da artıb. Adətən, təklif tələbi üstələyəndə qiymətlər ucuzlaşır. Kirayə bazarına təsir edən amillərdən biri də mənzil bazarında qiymətlərin kəskin aşağı düşməsilə əlaqədardır. Bu da kirayə qiymətlərinə təsirsiz ötüşmür. Çünki mənzillərin alınmasına tələbat xeyli azalıb. Mənzillərə tələbatın azalması onunla bağlıdır ki, ölkədə tikinti bumu arxada qalıb. Böhrandan əvvəl Bakıda satılan mənzillərin 60 faizini Rusiyada və digər MDB ölkələrində çalışan həmyerlilərimiz alırdısa, bu gün praktiki olaraq bu rəqəm kəskin aşağı düşüb. Həmçinin, böhran nəticəsində ümumilikdə əhalinin alıcılıq qabiliyyəti aşağı düşdü. Əhalinin alıcılıq qabiliyyətinin azalması Bakıda mənzillərin qiymətinin düşməsinə və paralel olaraq icarə qiymətlərinin də enməsinə gətirib çıxardı".
   S.Əliyev kirayə bazarında yaranan ucuzlaşmanın hələ bir müddət davam edəcəyi qənaətindədir: "Çünki proseslər, hələ ki, öz təbii axarına qayıtmayıb. Bütün dünya artıq böhrandan çıxmaq üzrə olsa da, bunun təsirləri hələ də qalmaqdadır. O cümlədən Azərbaycanda da böhranın təsirləri qalmaqdadır. Belə görünür ki, Azərbaycanda bu təsir hələ uzun müddət davam edəcək. Mənə elə gəlir ki, tikinti bazarında aktivlik artmayınca, yeni iş yerləri açılmayınca kirayə evlərə tələbat aşağı olaraq qalacaq. Nəticədə kirayə bazarında ucuzlaşma hələ davam edəcək".
   

Aprelin 14-də Ali Məhkəmədə "Fatimeyi Zəhra" məscidi dini icmasının kassasiya şikayətinə baxılacaq. Dini icmanın sədri Mirtofiq Rəzizadə ümid edir ki, məhkəmə məscidin sökülməsilə bağlı qərarı ləğv edəcək, əksinə, dövlət onun tikintisinə maliyyə ayıracaq:
   "Məscidin tikintisi üçün sərəncam 1996-cı ildə rəhmətlik prezident Heydər Əliyevin xeyir-duası ilə verilib. Məscidin tikintisi üçün ilk işləri - maliyyəsini, texnikası, icazəsini, sənədlərini hamısını dövlət verib. Biz möminlər də istəyirik ki, məscidin sökülməsinin qarşısını alaq. Amma bəzi məmurlar xalqla dövləti üzə-üzə qoyur. Biz möminlər, məhkəmə sökülmə barədə qərar çıxarsa da, dövlətə qarşı heç bir addım atmayacağıq". Dini icmanın sədri dindarlara müraciət edib ki, məhkəmə qərarından asılı olmayaraq təxribata uymasınlar: "Nəsə etsək, bizə dərhal bir ad qoyulacaq. Möminlərə müraciət edirəm ki, 14-ü apreldə nə olursa-olsun təxribata getməsinlər, emosiyalarını özlərində saxlasınlar və Allaha dua etsinlər". Bakı Apelyasiya Məhkəməsi "Fatimeyi-Zəhra" məscidinin sökülməsi haqda 2 saylı Yerli İqtisad Məhkəməsinin qərarını qüvvədə saxlayıb. Dini icma bu qərardan Ali Məhkəməyə şikayət edib. Məhkəmə qərarında məscidin sökülməsi və həmin ərazinin Suraxanı Rayon İcra Hakimiyyətinin balansına verilməsi nəzərdə tutulur. "Fatimeyi-Zəhra" məscidinin tikintisinə 1996-98-ci illərdə icazə verilib. 2002-ci ildə məscidin tikintisinə verilən icazə Bakı meri Hacıbala Abutalıbov tərəfindən ləğv edilib.
   

Memarlıq və İnşaat Universitetinin tələbəsi bıçaqlanıb. Bu barədə APA-ya Yasamal rayon Polis İdarəsindən bildirilib. Hadisə dünən səhər saatlarında sözügedən universitetin qarşısında qeydə alınıb.
   Məlumata görə, memarlıq fakültəsinin 2-ci kurs tələbəsi, 1991-ci il təvəllüdlü Ramazan İbiyev sevdiyi qızla universitetə daxil olarkən naməlum şəxslərin hücumuna məruz qalıb. Onlar tələbəyə bir neçə bıçaq zərbəsi endirdikdən sonra ərazidən uzaqlaşıblar. Yaralı ağır vəziyyətdə xəstəxanaya yerləşdirilib. Hazırda polis hadisəni törədən şəxslərin müəyyən edilərək tutulması istiqamətində axtarış tədbirlərini davam etdirir.
   

Bakı Şəhər İcra Hakimiyyətinin (BŞİH) tabeliyində olan qurumlardan biri Bakı Beynəlxalq Avtovağzal Kompleksini məhkəməyə verib.
   Lent.az-ın məlumatına görə, komplekslə bağlı 1 saylı Bakı yerli İqtisad Məhkəməsinə BŞİH-in Mənzil Kommunal Təsərrüfat Departamentinin (MKTD) İxtisaslaşmış Sanitariya-Təmizlik və Kommunal Xidmət İdarəsi müraciət edib.
   Belə ki, bir müddət əvvəl Bakı Beynəlxalq Avtovağzal Kompleksinə sanitariya, təmizlik və kommunal xidməti məhz BŞİH-in adıçəkilən qurumu göstərib. Sonradan isə Kompleks rəhbərliyi xidmətlərin göstərilməsi üçün başqa bir qurumla müqavilə bağlayıb. Lakin Azərbaycan Prezidentinin müvafiq sərəncamına əsaslanan BŞİH hesab edir ki, Kompleks məhz MKTD-nin İxtisaslaşmış Sanitariya-Təmizlik və Kommunal Xidmət İdarəsilə müqavilə bağlamalı imiş. Bu səbəbdən də qurum məhkəməyə müraciət edərək, Kompleksin onlarla müqavilə bağlanmasını tələb edib.
   Məhkəmə prosesi aprelin 1-də keçiriləcək.
   

Şəkidə toy etməyə hazırlaşan Qoxmuq kənd sakini, 23 yaşlı Fazil Baba oğlu Saatov martın 18-i gecə saat 23.00 radələrində evdən çıxaraq bir daha geri qayıtmayıb.
   Qohumlarının ANS PRESS-ə verdiyi məlumata görə, F.Saatov martın 27-si sevib nişanlandığı qızla toy etməyə hazırlaşırmış. O, martın 18-də ailə üzvlərilə birlikdə evlərinə gətirilən cehiz əşyalarını yerləşdirdikdən sonra naməlum şəraitdə yoxa çıxıb. Səhərə qədər onu axtaran ailə üzvləri sonda ərizə ilə polisə müraciət ediblər. Lakin hadisənin üstündən 10 gün keçməsinə baxmayaraq, toyuna hazırlaşan gənci tapmaq mümkün deyil. Qeyd edək ki, F.Saatov əvvəllər ruhi xəstəlikdən əziyyət çəkib və Bakıda 6 aylıq müalicədən sonra normal həyata dönüb. Yaxınları onda nə müalicədən sonrakı müddətdə və nə də toy ərəfəsində xəstəlik əlamətlərinin olmadığını bildirir. Şəki Şəhər Rayon Polis Şöbəsi axtarış şöbəsinin əməliyyat müvəkkili Ərəstun Zamanov isə ANS PRESS-ə bildirib ki, hazırda həmin şəxsin axtarışları davam etdirilir. Ə.Zamanov F.Saatovun ruhi xəstə kimi qeydiyyatda olduğunu təsdiqləyib və bildirib ki, əldə edilən məlumata görə, Fazil zaman-zaman həyatından gileylənirmiş. Şəki Şəhər Polis Şöbəsindən o da bildirilib ki, F.Saatovun xalası oğlu da 1994-cü ildə itkin düşüb və bu günə qədər tapılmayıb.
   

Ağsu rayonunda üç otaqlı evdə yanğın baş verib. Ağsu rayon Dövlət Yanğından Mühafizə Hissəsindən APA-nın yerli bürosuna verilən məlumata görə, hadisə martın 29-da axşam saat 21:00 radələrində Ağsu şəhəri Həzi Aslanov küçəsindəki 5 saylı evdə baş verib.
   1965-ci il təvəllüdlü Babaxanov Namiq Azad oğluna məxsus, ümumi sahəsi 105 kvadratmetr olan 3 otaqlı evdə yanğının baş verməsi barədə məlumat dövlət yanğından mühafizə hissəsinə saat 21:07-də verilib.
   Dərhal əraziyə iki yanğınsöndürən maşın və canlı qüvvə cəlb olunub. Alovun qarşısı saat 21:46 da alınıb. Hadisə nəticəsində evin 15 kvadratmetrlik hissəsi məişət əşyaları ilə birgə yanıb. İlkin ehtimala görə, hadisəyə qaz sobasının tüstü borusunun düzgün quraşdırılmaması səbəb olub. Faktla bağlı araşdırma aparılır.
   
   

Bakı şəhəri Füzuli, Ə.Topçubaşov, Rəsul Rza və Ş.Bədəlbəyli küçələrində yaşayan, yəni Respublika Sarayı ilə Milli Dram Teatrı arasında İstirahət Parkının tikintisi üçün nəzərdə tutulan mübahisəli ərazilərin sakinləri kollektiv şəkildə redaksiyamıza məktub yazıb və onların səsini böyük dəstək verdikləri ölkə prezidentinə çatdırmağı xahiş ediblər. 20-dən artıq sakinin prezident İlham Əliyevə yazdığı açıq məktubun əsas hissələrini çap edirik.
   Sakinlər nə istəyir?
   Onların prezidentə ünvanladığı açıq müraciətdə deyilir: "Hörmətli Prezident!.. Bizim bir ay bundan əvvəl göndərdiyimiz ərizə Sizə verilmədiyi üçün biz ikinci ərizəni Sizə "açıq məktub" formasında göndərmək qərarına gəldik. Qiymətli vaxtınızı aldığımıza görə Sizdən üzr istəyərək, Bakı Şəhər İcra Hakimiyyəti tərəfindən törədilən qanunsuz hərəkətlər və Konstitusiyamız tərəfindən verilmiş hüquqlarımızın kobudcasına pozulması haqda Sizə qısa məlumat verib, yaranmış xoşagəlməz vəziyyətə son qoymanızı xahiş edirik.
   2009-cu ilin ortalarında, şəhərimizin Baş Planına əsasən, Respublika Sarayı ilə Milli Dram Teatrı binasının arasındakı sahədə istirahət parkı salınması üçün Şəhər İcra Hakimiyyəti tərəfindən həmin ərazidə olan yaşayış evləri və ticarət obyektləri sökülməyə başladı. Ancaq sökülməzdən əvvəl tikililərin vəziyyətindən və təmirlərdən asılı olaraq, onların bazar qiymətilə hər kvadrat metri üçün 3 min manatdan 5 min manata qədər ödənildi. 2-3 ay ərzində yüzdən çox tikili söküldü. Sakinlərin əksəriyyəti təyin edilmiş qiymətlə razılaşıb şikayət etmədi. Lakin nədənsə, həmin iş 5-6 ay dayandırıldı. Bir ay bundan əvvəl həmin ərazinin Yasamal rayonu hissəsində yaşayan sakinlər və ticarət obyektlərinin sahibləri rayon icra hakimiyyətindən xəbərdarlıq məktubu aldılar ki, evləriniz və obyektləriniz təcili sökülməlidir. Burada park salınacaq. Tikililərin hər kvadrat metrinə 1500 ABŞ dolları veriləcək. Şübhəsiz, vətəndaşlar həmin şərtlə razılaşmadılar və tikililərin dəyərinin bazar qiymətilə ödənilməsini tələb etdilər. Bundan əsəbiləşən Yasamal Rayon İcra Hakimiyyətinin əməkdaşları 2-3 gündən sonra oraya ağır texnika və çoxsaylı polis işçiləri gətirib, 20-25 gün ərzində tikililəri dəyərini ödəmədən sökdülər. Respublika Sarayı tərəfdən isə Nəsimi Rayon İcra Hakimiyyəti əməkdaşları təcili min nəfərdən çox vətəndaşın yaşadığı tikililəri hasara aldı və sökməyə başladı.
   Sizin 26 dekabr 2007-ci il tarixli fərmanınıza, həmin fərmana uyğun Respublika Nazirlər Kabinetinin 04 aprel 2009-cu il tarixli qərarı ilə təsdiq edilmiş "Qaydalar"a və qüvvədə olan Mülki Məcəllənin 157.9, 246.3, 246.4, 247.1 və 247.2-ci maddələrinə əsasən, belə hallarda İcra Hakimiyyətinin əməkdaşları tikililəri sökülməli olan mülkiyyətçilərə "Bildiriş" təqdim etməli (həmin bildirişin nümunəsi "Qaydalar"a əlavə edilmişdir), ondan 80 təqvim günündən tez və 120 təqvim günündən gec olmayaraq, onlara tikililərin dəyəri bazar qiymətilə hesablanıb ödənilməlidir. Lakin əfsuslar olsun ki, çox humanist və sosial ədalət prinsiplərinə əsaslanan Sizin fərmanınızda, Nazirlər Kabinetinin təsdiq etdiyi "Qaydalar"da və Mülki Məcəllənin müvafiq maddələrində göstərilənlərin heç biri Bakı İcra Hakimiyyətinin başçısı Hacıbala Abutalıbov tərəfindən yerinə yetirilmir. Bizim dəfələrlə yazılı və şifahi şikayətlərimizə isə, hələ ki, heç bir məhəl qoyulmur.
   Hacıbala Abutalıbov cənabları tərəfindən şikayətçilərin birinə göndərilən məktubda isə bu ərazidə tikililərin hər kvadrat metrinin bazar qiymətinin 1000-1200 manat olduğu bildirilir və bizə hər kvadrat metr üçün 1500 manat veriləcəyi göstərilir. Ondan soruşanda ki, nə üçün 2009-cu ildə sökülən və bizim binalardan pis vəziyyətdə olan tikililərin sahiblərinə hər kvadrat metri 3 min manatdan 5 min manata qədər pul vermisiniz, H.Abutalıbov cənabları bunu onunla izah edib ki, o vaxt dünya bazarında neftin qiyməti baha idi, indi isə ucuzlaşıb. Ona görə pul yoxdur. Halbuki, indi dünya bazarında neftin qiyməti o vaxtkından xeyli bahadır.
   Hörmətli Prezident! H.Abutalıbov Konstitusiyamız tərəfindən bizə verilən mənzil və mülkiyyət hüququmuzu tapdayır. Bu hadisə yüzlərlə ailənin göz yaşı tökməsinə və çox böyük narazılığa səbəb olub. Biz ədalətli qərar qəbul edilməsini istəyirik. Baxmayaraq ki, bizim evlər, yuxarıda qeyd edildiyi kimi, 2009-cu ildə dəyəri 3 min manatdan 5 min manata qədər ödənilib uçurulan evlərdən daha da təmirli və gözəldir. Biz də tikililərin hər kvadrat metrinə onların təmirindən, eyni ərazidə yerləşməsindən və digər vəziyyətlərindən asılı olaraq, 3 min manatdan 5 min manata qədər pul verilməsini istəyirik. Bu mümkün deyilsə, onda hər bir vətəndaşın evinin ölçüsünə, təmirinə, tavanın hündürlüyünə və yerləşdiyi əraziyə uyğun ev verilməsini xahiş edirik".
   Bu məsələnin konkret hansı mətləb üzərində ziddiyyətə çevrildiyi artıq aydındır. Sakinlər hər kvadrat metr söküntü üçün 3-5 min manat kompensasiya tələb edir. Əlbəttə, yaranmış mübahisənin qəti həll modelini müvafiq dövlət orqanları verəcək. Yəni konkret halda kvadrat metrə görə 3-5 min manat qiymətin bazar konyunkturasına nə qədər uyğun olub-olmadığını müəyyənləşdirmək bizim işimiz deyil. Ancaq razılaşaq ki, bu az məbləğ də deyil. Təsəvvür etmək olar ki, həmin ərazidə təxminən 55-60 kvadrat metrlik yaşayış sahəsinə malik neçə on ildən bəri qalmış mənzil azı 250-300 manat dəyərində olmalıdır. Razılaşaq ki, olduqca böyük məbləğdir. Söhbətin bir yox, onlarla, bəlkə də yüzlərlə sahibkardan getdiyini də əlavə etsək, fantastik həddə qədər böyüyən məbləği və bunu ödəməkdə çətinlik çəkən hökumətin də vəziyyətini başa düşmək çətin deyil.
   Məktubda Hacıbala Abutalıbovun dilindən neftin dünya qiymətilə bağlı deyilənlər də diqqəti cəlb edir. Hacıbala Abutalıbovun həqiqətən bu sözləri deyib-demədiyi məlum deyil.
   Ancaq razılaşaq ki, həqiqətən də neft bumu deyilən dövrlə müqayisədə Azərbaycanın rəsmi dövlət gəlirləri həqiqətən aşağı düşüb. Bu vəziyyətdə dövlətin maksimal məbləğdə kompensasiyalar ödəmək iqtidarında olması, təbii ki, inandırıcı görünmür. Ancaq, əlbəttə, əmlakından məhrum olan sakinləri də unutmaq olmaz. Bütün hallarda kompensasiya qaçılmazdır. Əslində, sakinlərin tələb etdiyi 5 min manatla hökumətin təklifi kimi təqdim edilən 1500 manatın arasında fərq böyükdür və razılaşaq ki, belə kəskin fərq şəraitində orta məxrəcə gəlmək çox mürəkkəb məsələdir. Ancaq ekspertlərin fikrincə, bu şəraitdə hökumətin təklif etdiyi 1500 manat həndəvərində orta məxrəc axtarışları daha real və səmərəli nəticə verə bilər. Hər halda, hökumətin qərarını gözləyək.
   

Martın 5-də Nəsimi rayon məhkəməsində hakim İkram Şirinovun sədrliyi ilə Azərbaycan Dövlət Neft Akademiyasının 4-cü kursundan xaric edilmiş tələbə Elmin Bədəlovun ADNA-dan və rektor Siyavuş Qarayevdən şikayəti üzrə məhkəmə prosesi keçirilib.
   E.Bədəlovun Hüquqlarını Müdafiə Komitəsindən "Turan"a verilən məlumata görə, prosesdə cavabdeh tərəfin nümayəndəsi keçmiş tələbəyə barışıq təklif edib. Elmin Bədəlova sentyabr ayından Akademiyada 4-cü kursdan təhsilini davam etdirmək təklif olunub.
   Lakin iddiaçı təkliflə razılaşmayıb. Bədəlovun sözlərinə görə, Akademiyadan uzaqlaşdırılandan sonra hərbi xidmətə çağırış vərəqəsi alıb. Sentyabr ayınadək hərbi xidmətə daha iki çağırış olacaq və üçüncü çağırışda o, məcburi şəkildə hərbi xidmətə aparılacaq. Bu isə o deməkdir ki, hətta barışıq olsa belə, o, Akademiyada təhsilini davam etdirə bilməyəcək. Akademiya rəhbərliyi ona hərbi xidmətdən möhlət almalıdır. Yalnız möhlət aldıqdan sonra universitetə qayıda bilər.
   Öz növbəsində, cavabdeh tərəfin nümayəndəsi bildirib ki, ali məktəb rəhbərliyi Elmin Bədəlova möhlət almaq fikrində deyil.
   Sonra Elmin Bədəlov Təhsil Nazirliyinin də məhkəmə prosesinə cəlb edilməsi barədə vəsatət qaldırıb. Məhkəmə prosesi aprelin 5-də davam edəcək.