Azərbaycan Kubokunun yarımfinal mərhələsinin bütün iştirakçıları müəyyənləşib. Milli.Az-ın verdiyi xəbərə görə, Martın 17-də yarımfinalın son iki qarşılaşması baş tutub. Əvvəlcə "İnter"lə "Neftçi" meydana çıxıb. İlk oyunda 3:0 hesablı qələbə qazanan "İnter" bu dəfə də hesabı açan tərəf olub.
   27-ci dəqiqədə Asif Məmmədov fərqlənib. 54-cü dəqiqədə Girts Karlsons fərqi iki topa çatdırıb. Əsas vaxtın bitməsinə 6 dəqiqə qalmış Adrian Nyaqa penaltidən fərqi azaltsa da, "Neftçi" meydanı məğlubiyyətlə başa vurub.
   Bu mərhələnin ən maraqlı və qalmaqallı oyunu Lənkəranda baş tutub. "Qarabağ" evdə 2:1 hesabı ilə qalib gəldiyi "Xəzər Lənkəran"ın qonağı olub. Oyuna meydan sahibləri fəal başlayıb və 17-ci dəqiqədə Kristian Kabral fərqlənib. 64-cü dəqiqədə "Qarabağ" azlıqda qalıb. Baş hakim Vüsal Əliyev Tixxon Şişşova qarşı kobud oynayan Elnur Allahverdiyevə ikinci sarı vərəqəni göstərib. Elnur bu zaman hakimə sərt şəkildə etiraz edib və meydandan çıxmaq istəməyib. Rəşad Sadıqov Allahverdiyevə qarşı sərt davranıb, onu arxadan itələyərək, meydandan çıxardıb. 87-ci dəqiqədə "Qarabağ" daha bir üzvünü itirib. Bu dəfə Denis Kalinkova qarşı kobud oynayan Rəşad Sadiqov meydanı tərk etməli olub. Bu zaman bütün komanda baş hakimə etiraz edib. Hətta kapitan Rəşad Sadıqov meydanı tərk edərək, oyunu davam etdirmək istəməyib. Lakin Qurban Qurbanov onu meydana qaytarıb.
   Yarımfinalda "Xəzər Lənkəran" "Olimpik-Şüvəlan"la, "Bakı" isə "İnter"lə qarşılaşacaq.
   "Xəzər Lənkəran" - "Qarabağ" oyunu bitəndən sonra qonaq komandanın azarkeşlərinin qaldıqları tribunada qarışıqlıq yaranıb. Bu barədə Fanat.az-a "12-ci oyunçu" azarkeş klubundan məlumat verilib.
   Məlumatda bildirilir ki, ağdamlı fanatlarla Daxil Qoşunların əsgərləri arasında qarşıdurma yaranıb. "İlk olaraq qonaqların tribunadan aşağı tərəfə şığımaları gözə dəydi. Daha sonra isə onları əhatə edən daxili qoşunların əsgərləri ilə əlbəyaxa döyüşə atılan "Qarabağ"lı fanatlardan birnin huşunun itirməsi də nəzərdən qaçmadı. "Xəzər Lənkəran" azarkeşləri stadionu tərk etməkdə davam etdikcə daxili qoşunların əsgərləri ilə "Qarabağ" azarkeşləri arasında olan insident davam edirdi və son mərhələdə oturacaqlar havada uçmağa başladı. Əsgərlərin köməyinə gələn polislər aranı sakitləşdirmək üçün "Qarabağ"lıları mühasirəyə aldılar. Məhz polislərin sayəsində oyun bitəndən təxminən yarımsaat sonra qonaq fanatları avtobuslara mindirib yola salmaq mümkün oldu", deyə məlumatda bildirilir.

Braziliyalı hücumçu Eduardo da Silvanın tez-tez zədələnməsindən narahat olan "Arsenal" rəhbərliyi onun mövqeyinə Dortmund "Borussiya"sının misirli hücumçusu Mohammed Zidanı almaq niyyətindədir.
   Apasport.az saytının xəbərinə görə, hazırkı klubu ilə 2012-ci ilə qədər müqaviləsi olan 28 yaşlı futbolçu özü də karyerasını İngiltərədə davam etdirməyin əleyhinə deyil. Əvvəllər "Midtyulland", "Verder", "Maynts" və "Hamburq" kimi klublarda çıxış etmiş Zidan 2008-ci ildən "Borussiya"da oynayır. Misir yığmasının da formasını geyinən adıçəkilən futbolçu cari mövsüm Bundesliqada 22 oyunda 6 qol vurub.

Yaxın günlərdə hollandiyalı futbol mütəxəssisi Dik Advokat Rusiya yığmasının sükanı arxasına keçəcək.
   "Regnum" agentliyinin məlumatına görə, Rusiya Futbol İttifaqı yaxın günlərdə onun təyinatını rəsmən elan edəcək. Xatırladaq ki, hazırda Hollandiyanın "Alkmaar" klubu və Belçika yığmasına rəhbərlik edən Advokat vaxtilə Rusiyanın "Zenit" klubunu çalışdırıb. Sankt-Peterburq klubu ilə o, ölkə çempionluğunu, həmçinin UEFA Kuboku və Avropa Superkubokunu qazanıb.

İspaniya çempionatının 26-cı turunda "Valyadolid"lə qarşılaşmanın (4:1) 74-cü dəqiqəsində oyundaşı Qonzalo İquaini əvəz edən "Real"ın hücumçusu Raul Qonzales həm də Primeroda 544-cü matçına çıxmış oldu. Apasport.az saytının xəbərinə görə, Raul bununla da "Valyadolid", "Atletiko", "Barselona" və "Selta"nın keçmiş yarımmüdafiəçisi, hazırda "Selta"nı çalışdıran Eusebio Sakristanı (543 oyun) qabaqlamış oldu. İndi Raul bu göstəriciyə görə Primeroda 622 oyun keçirmiş "Barselona", "Alaves", "Atletik" və "Valensiya"nın keçmiş qapıçısı Andoni Subisarettadan geri qalır.
   

Çində üç futbol hakimi həbs olunub. Apasport.az saytının məlumatına görə, ölkə polisi danışılmış oyunların təşkilində ittiham olunan Lu Tsyun, Xuan Tszyuntsze və Çjou Veysini saxlayıb.
   Bunlardan Tsyun DÇ-2002-də işləmiş hakimdir. Digər iki hakimdən Veysin 6 il öncə karyerasını başa vurub. FİFA hakimi olan Tszunyntsze ötən mövsüm milli komandamızın sabiq futbolçusu Branimir Subaşiçin çıxış etdiyi Çin Superliqasında ən yaxşı referi adını almağa namizəd olub.
   Qeyd edək ki, Çində danışılmış oyunlarla bağlı xeyli adam həbs olunub. Bu ayın 27-də startı veriləcək yüksək liqada yeni mövsüm hakimlər korpusu 20 faiz dəyişilib.
   

"Vüsal Əliyevin məni meydandan qovmasının səbəbini heç özüm də bilmirəm. O, birinci dəfə xəbərdarlıq edəndə, topa oynamışdım. 65-ci dəqiqədə isə rəqibə qəti toxunmamışdım.
   Əgər obyektiv olsaq, həmin epizodda sarı vərəqə yox idi. Rəşad Sadiqova qırmızı vərəqə göstərilməsinə gəlincə, bu lap absurd qərar idi". Apasport.az saytının məlumatına görə, bu sözləri "Qarabağ" klubunun futbolçusu Elnur Allahverdiyev deyib.
   "Xəzər-Lənkəran"la kubok matçının 65-ci dəqiqəsində meydandan qovulan ağdamlıların 27 yaşlı müdafiəçisi görüşün baş hakimi Vüsal Əliyevi tənqid edib: "O, rəqibə açıq-aşkar simpatiya göstərirdi. Belə hakimliklə Azərbaycan futbolu heç vaxt inkişaf edə bilməz. Vüsal Əliyev hər şey etdi ki, "Qarabağ" uduzsun. Ümumiyyətlə, oyunun gedişində hakim özünü həyasızcasına aparırdı".
   Allahverdiyev hakimi söyməsi ilə bağlı iddialara da münasibət bildirib: "Mən hakimə təhqiramiz heç nə deməmişəm. Eşitmişəm ki, o, mənim hərəkətlərimdən narazı qalıb və protokolda qeydlər aparıb ki, guya mən qırmızı vərəqədən sonra onu təhqir etmişəm. Vüsal Əliyev bilərəkdən belə yazıb ki, sudan quru çıxsın".
   

Türkiyənin "Qalatasaray" klubunun 47 yaşlı hollandiyalı baş məşqçisi Frank Raykardın postundan ayrılacağı xəbərləri yayılıb.
   Raykarda Avstraliya Futbol Federasiyasından bu ölkənin yığmasını çalışdırmaq təklif olunduğu bildirilir. Baş məşqçi köməkçisi Yohan Neskenslə birlikdə Avstraliya yığmasına dəvət edilib.
   "Qalatasaray"da forma geyinən avstraliyalı futbolçular Hari Kyuel və Lukas Neillin də, Frank Raykardı Avstraliya yığmasını çalışdırmaq üçün dilə tutduqları yayılan xəbərlər arasındadır. Hollandiyalı baş məşqçinin sonda hansı qərarı qəbul edəcəyi maraqla gözlənilir.
   

İspaniyanın "Real" klubu "Fənərbaxça" kollektivinin braziliyalı üzvü Andre dos Santosun transferində maraqlıdır.
   "Kral klubu" futbolçu üçün 15 milyon avrosundan keçməyə hazırdır.
   "Real" klubu rəhbərliyinin dos Santosun keçidi müqabilində növbəti mövsümdə komandadan uzaqlaşdırmağı planlaşdırdığı Drenthe, Dudek, Diarra, Metzeder və Qaqo kimi futbolçulardan birinin "Fənərbaxça"ya keçməsinə yardım edəcəyi gözlənilir.
   İstanbul klubu isə hələ ki, dos Santosun transferi ilə bağlı heç bir açıqlama verməyib.
   

UEFA Çempionlar Liqasının 1/4 final mərhələsinin püşkü bu gün atılacaq. Milli.Az-ın verdiyi xəbərə görə, UEFA-nın İsveçrənin Nyon şəhərindəki mənzil-qərargahında keçiriləcək mərasim Bakı vaxtı ilə saat 16.00-da başlayacaq. Mərasimdə 1/4 finalla yanaşı, yarımfinalın da püşkü atılacaq.
   Qeyd edək ki, Çempionlar Liqasında 1/4 finalın oyunları 30-31 mart və 6-7 apreldə, yarımfinal oyunları isə 20-21 və 27-28 apreldə oynanılacaq. Çempionlar Liqasında 2009/10 mövsümünə mayın 22-də Madriddəki "Santiaqo Bernabeu" stadionunda keçiriləcək final matçı ilə yekun vurulacaq. UEFA Çempionlar Liqası 1/4 finalın bütün iştirakçıları aşağıdakılardır: Mançester Yunayted (İngiltərə) Arsenal (İngiltərə) Olimpik (Lion, Fransa) Bordo (Fransa) Barselona (İspaniya) İnter (İtaliya) Bavariya (Almaniya) ÇSKA (Moskva).