Məlum olduğu kimi, son illər istehsalatda xəsarət alanların sayı xeyli artıb. Onların böyük əksəriyyəti özəl sektorda çalışanlardır. Müxtəlif dərəcəli xəsarət və ölüm hallarının baş verməsinə yalnız işçinin təhlükəsizlik qaydalarına əməl etməməsi səbəb olmur. Belə bədbəxt hadisələr əksər hallarda işəgötürən tərəfin təhlükəsizlik normalarının tətbiqinə fikir verməməsindən baş verir.
   İşəgötürən tərəfin məsuliyyətsiz davranması isə çox zaman işçilərin müqaviləsiz əmək fəaliyyətinə cəlb olunmasının nəticəsi olur. Ona görə də istehsalat prosesində xəsarət alan şəxslər və onların ailə üzvləri sonradan öz hüquqlarını təmin edə bilmir.
   İstehsalat prosesində xəsarət alanların hüquqlarının bərpa edilməməsi, sosial müdafiəsinin təmin olunmaması, həmdə istehsalatda xəsarət alanların sosial müdafiəsi haqqında qanunun olmaması ilə bağlıdır.
   Bununla bağlı qanun layihəsi xeyli müddətdir Milli Məclisə təqdim olunsa da, qəbulu ləngiyir. Milli Məclisin Sosial siyasət komitəsinin sədri Hadı Rəcəbli mətbuata açıqlamasında bildirib ki, bu məsələnin ciddi ictimai müzakirəyə ehtiyacı var. Qanun layihəsinin indiyə qədər qəbul edilməməsi də bununla bağlıdır.
   Bərabər İmkanlar Mərkəzinin rəhbəri Rafiq Təmrazovun fikrincə, qanun layihəsi qəbul edilməzdən əvvəl bir sıra problemlərin həlli yolları tapılmalıdır. Onun fikrincə, əks halda bu qanunun ciddi faydası olmayacaq: "Mövcud qanunvericilik istehsalatda xəsarətalma və peşə xəstəliyilə əlaqədar dəyən ziyana görə işəgötürən tərəfin tam maddi məsuliyyətini nəzərdə tutur. Bununla bağlı Nazirlər Kabinetinin xüsusi normativ aktları və qaydaları var. Prezident dövlət müəssisələrində işləyib xəsarət almış şəxslərin sosial müdafiəsilə bağlı fərman da vermişdi. Amma bütövlükdə problem qalır. Elə müəssisələr var ki, vaxtilə fəaliyyət göstərərkən orada işçi istehsalat zədəsi alıb, amma indi o müəssisə yoxdur. Ona görə də istehsalatda xəsarət alanların sosial müdafiəsilə bağlı ciddi problemlər var. Amma bunu həyata keçirmək üçün, məsələn, icbari tibbi sığorta məsələsi öz həllini tapmalıdır. Yeni qanunvericiliklə bu məsələləri konkretləşdirmək istəyirlər, bu da asan başa gəlmir. Bu baxımdan, parlamenti qınamaq olmur. Tələm-tələsik qanun qəbul etməkdənsə, gecikmiş də olsa, mükəmməl qanun qəbul etmək daha yaxşı olar. Əmək Məcəlləsinə görə, işəgötürən işçini həm sığortalaya, həm də tam maddi məsuliyyət daşıya bilər. Xüsusilə də əmək fəaliyyəti üçün təhlükəli olan yerlərdə sığorta məcburidir. Yəni bunlar hazırkı qanunvericilikdə də var. Bu tətbiq olunmadığı halda, yeni bir qanun qəbul etməklə problemin həll olunacağını düşünmürəm. Problem, hələ ki, dərinə gedir. Bu da korrupsiya halları, ikili mühasibat sisteminin qalması, işçilərlə əmək müqaviləsinin bağlanmaması kimi səbəblərlə bağlıdır. Elə olur ki, işçi ayda 1000 manat alır, amma sənəddə 75 manat göstərilir. Sonra həmin işçi xəsarət alanda ödəniləcək kompensasiya 75 manatdan hesablanır. Hesab etmirəm ki, bir qanunun qəbulu ilə bu problemlərin hamısını həll etmək mümkün olacaq. Ancaq bu o demək deyil ki, problemin aradan qaldırılması istiqamətində iş aparılmamalıdır. Bütün məsuliyyəti sahibkarların üzərinə atmaq olmaz. Onların vəziyyəti çox ağırdır".
   Qeyd edək ki, rəsmi statistikaya əsasən, il ərzində istehsalatda xəsarət alanların sayı 200 nəfərə yaxın olur ki, onların da 50-60 nəfərinin ölümü ilə nəticələnir. R.Təmrazov isə ölüm hallarının sayının bir neçə dəfə çox olduğunu deyir. Ekspert hesab edir ki, yeni qanun layihəsi, istehsalatda xəsarət alanlarla yanaşı, peşə xəstəliyini də əhatə etməlidir. Hər bir fəaliyyət sahəsinin özünəməxsus peşə xəstəliyi mövcuddur. Ona görə də peşə xəstəliyindən əziyyət çəkənlərin sayı xəsarət alanlardan çoxdur: "Ümumiyyətlə, istehsalatda yüngül travmaların heç biri qeydə alınmır. Bəzən ağır travmaları da gizlədə bilirlər. Təəssüf ki, Dövlət Əmək Müfəttişliyi yoxlama apararkən daha çox xəsarət hallarının olub-olmamasına diqqət yetirir. Peşə xəstəliyindən əziyyət çəkənlərin sosial müdafiəsilə isə məşğul olan yoxdur".
   

Türkiyədə qaçırılan azərbaycanlı qadın xilas edilib. Türkiyə mətbuatının məlumatına görə, əlləri-ayaqları və ağzı bağlı olan 48 yaşlı qadın Dənizli şəhərində avtomobilin baqaj hissəsindən tapılıb.
   Atay Ağxanım Sahibovanı yanacaqdoldurma məntəqəsinin əməkdaşı xilas edib. Belə ki, o, benzin doldurmaq üçün məntəqəyə gələn maşının baqaj hissəsindən səs gəldiyini eşidib. Maşının sürücüsü isə həyəcanlanaraq benzin almadan hadisə yerindən uzaqlaşıb.
   Şübhələnən məntəqə işçisi dərhal polisə müraciət edib. Polis avtomobili benzindoldurma məntəqəsindən aralıda saxlaya bilib. Maşının baqajına baxış keçirən polis qadını xilas edib. Azərbaycanlı qadın ilk ifadəsində 34 yaşlı Mehmet adlı şəxsin onu yandırmağa apardığını bildirib. A. Sahibova Dənizli Dövlət Xəstəxanasına yerləşdirilib. Faktla bağlı araşdırma aparılır.
   

Bu il Azərbaycanın bəzi bölgələrində 1 hektar əkin sahəsindən 45-50 sentner taxıl götürülməsi gözlənir. "APA-Economics"in məlumatına görə, bunu Azərbaycanın kənd təsərrüfatı naziri İsmət Abasov bildirib.
   İ.Abasovun sözlərinə görə, bəzi yerlərdə məhsuldarlığın yüksək olması aparılmış aqrotexniki tədbirlər və xaricdən yüksək məhsuldarlıqlı toxumluq buğdanın gətirilməsi ilə bağlıdır. "Ölkə üzrə ümumilikdə orta hesabla 27-28 sentner məhsul istehsalı gözlənir. İstehsalla bağlı ilkin proqnozlar göstərir ki, məhsul istehsalında problem olmayacaq" - deyə nazir əlavə edib.
   İ.Abasov həmçinin qeyd edib ki, kənd təsərrüfatında məhsul istehsalı hava şəraiti ilə bağlı olduğundan, indidən dəqiq proqnoz vermək çətindir. Qeyd edək ki, Azərbaycanda 2009-cu ildə qarğıdalı da daxil olmaqla 1 125,4 min hektar sahədən, hər hektardan orta hesabla 26,6 sentner olmaqla 2 988,3 min ton taxıl məhsulu toplanılıb ki, 2008-ci ilə nisbətən onun istehsalı 19,6% artıb. İstehsal olunmuş taxıl məhsulunun 71,7%-ni və ya 2 141,4 min tonunu buğda təşkil edib.

Türkiyənin Ərzincan Universitetinin rektoru, professor Ərdoğan Büyükkasap martın 18-də iş otağında intihar edib.
   APA-nın "Milliyet"ə istinadən verdiyi xəbərə görə, 48 yaşlı rektor kabinetində kabellə özünü asıb. Hələlik intiharın səbəbi bəlli deyil. Məlum olan budur ki, ötən həftə universitetdə 3 nəfər korrupsiya ittihamı ilə həbs edilib.
   Qeyd edək ki, Ə.Büyükkasap 2007-ci il mayın 18-də o vaxtkı prezidenti Əhməd Nejdət Sezər tərəfindən Ərzincan Universitetinin rektoru təyin olunub. Mərhum atom və molekulyar fizika üzrə mütəxəssis idi.ürkiyənin Ərzincan Universitetinin rektoru, professor Ərdoğan Büyükkasap martın 18-də iş otağında intihar edib.
   APA-nın "Milliyet"ə istinadən verdiyi xəbərə görə, 48 yaşlı rektor kabinetində kabellə özünü asıb. Hələlik intiharın səbəbi bəlli deyil. Məlum olan budur ki, ötən həftə universitetdə 3 nəfər korrupsiya ittihamı ilə həbs edilib.
   Qeyd edək ki, Ə.Büyükkasap 2007-ci il mayın 18-də o vaxtkı prezidenti Əhməd Nejdət Sezər tərəfindən Ərzincan Universitetinin rektoru təyin olunub. Mərhum atom və molekulyar fizika üzrə mütəxəssis idi.

Novruz bayramının gəlişi bütün ticarətçilərin işinə yarayır. Biri bazarda qiymətləri süni yolla yüksəldir və yaxşı qazanc əldə edir.
   Başqa biri isə elə küçənin ortasında öz alverini edir. Son günlər küçələrdə-insanların sıx olduğu yerlərdə xüsusilə toyuq əti satanlar cənfəşanlıq göstərir. Hətta iş o yerə çatıb ki, toyuq ətini qapı-qapı dolaşıb satmaq istəyənlər də var. Toyuğun hansı yolla əldə olunduğu, necə saxlandığı məlum olmasa da, alverçilər müştəri tapa bilir. Maraqlıdır ki,məhsul kənd toyuqları adı altında satılır. Amma onların hardan əldə olunduğu naməlumdur. Narahatlıq doğuran problemlərdən biri isə xüsusilə bayram ərəfələrində qanunsuz ət kəsimilə məşğul olanların sayının daha da artmasıdır. Alverin yaxşı gedəcəyi əvvəlcədən məlum olduğundan, belə günlər fürsət əldən verilmir. Dövlət Baytarlıq Xidmətindən verilən məlumata görə, bayram günlərində baytarlıq idarələrinə nəzarəti gücləndirmək üçün heç bir tapşırıq verilmir. Bu isə ondan irəli gəlir ki, xidməti idarələr ilin bütün günlərində qanunsuz ət kəsimilə bağlı nəzarət həyata keçirir. Amma qanunsuz ət kəsiminə və satışına qarşı mübarizəyə Daxili İşlər Nazirliyi və Səhiyyə Nazirliyi də qoşulmalıdır. Qanunsuz ət kəsən insanlara təyin olunan cəriməyə gəlincə isə, bu məbləğ cəmi 20-25 manatdır. Təbii ki, bu məbləğ küçə ticarətçiləri üçün həddən artıq az, olduğundan onlar rahatca öz işlərinə davam edə bilir. ("OLAYLAR"İA)

"Azercell Telekom" MMC Telekommunikasiya sahəsində "Ən qabaqcıl telekommunikasiya şirkəti" adına layiq görülüb.
   Nüfuzlu "Socrates" mükafatı Avropa Biznes Assambleyasının (EBA, Böyük Britaniya) "Liderlərin Oksford Sammiti"ndə şirkətin prezidenti Ali Ağana təqdim olunub. Bundan əlavə, şirkətin prezidenti Ali Ağan "İlin meneceri" medalı ilə təltif olunmuşdur. 22 ölkənin iştirak etdiyi mötəbər tədbir 14-17 mart tarixlərində Oksford şəhərində baş tutmuşdur.
   EBA-nın analitik departamentinin apardığı araşdırma nəticəsində "Ən yaxşı biznes qurumu" adının "Azercell Telekom" MMC-yə təqdim olunması qərara alınıb. Araşdırma zamanı Assambleyanın Rusiya, Belçika, Almaniya, Çex Respublikası, Avstriya, İsveçrə və digər ölkələrdən olan partnyor təşkilatlarının rəyi nəzərə alınıb.
   Mükafat sahiblərinin adları müəyyənləşdirilərkən şirkətin fəaliyyəti haqqında müxtəlif göstəricilər - satış həcmi, son 5 ildə satışın artım qrafiki, müəssisənin istehsal gücü, marketinq siyasəti, yeni iş yerlərinin yaradılması, yeni texnologiyaların tətbiqi, yeni idarəçilik formalarını tətbiqi və s. kimi vacib amillər diqqətə alınıb.
   Avropa Biznes Assambleyası sosial tərəfdaşlıq üzrə beynəlxalq korporasiyadır. Müstəqil qurum olan EBA-nın əsas məqsədi şirkətlər üçün imic proyektlərinin hazırlanması, keçmiş postsovet ölkələrində iqtisadi və demokratik islahat proqramlarının dəstəklənməsi, onların Avropa Birliyindəki nüfuzunu yüksəltməkdən ibarətdir. Assambleya öz məqsədlərini reallaşdırmaq üçün müəssisələr, ictimai təşkilatlar və biznes sahəsindəki liderlərə, istedadlı şəxsiyyətlərə yardım göstərir, Avropada inteqrasiyaya və sosial inkişafa aparan biznes qurumlarının nailiyyətlərini qiymətləndirir.
   "Ən qabaqcıl telekommunikasiya şirkəti" mükafatı qızılı heykəlcik, sertifikat və diplomdan ibarətdir.
   

Uşaqlar, oyuncaqları ilə oynamaqdansa, ya evlərinə yaxın bağlarda, ya da ki, Dənizkənarı Milli Parkda müxtəlif cür yelləncəklərə minməyi, maşın sürməyi, sürüşməyi və c. üstün tutur. Şəhərin ayrı-ayrı yerlərində fəaliyyət göstərən karusellərin qiyməti qəpiklə ölçülürsə, Bulvarda əksinədir. Burada 50-60 qəpiyə karusel tapmaq mümkün deyil.
   Valideynlər tez-tez şikayət edir ki, qəsəbə parklarında yalnız maşın və bir cür yelləncək var. Bu da uşaqların zövqünü və tələbatını lazımi səviyyədə ödəmir. Uşaqlar daha macəralı əyləncə axtarır. Bu cəhətdən Dənizkənarı Bulvar balaca sakinlər üçün daha cəlbedicidir, lakin burada da qiymətlər həddindən artıq baha olduğu üçün onlar ürəkləri istədiyi qədər əyləndirə bilmir.
   Valideynləri narazı salanda məhz budur. Onların sözlərinə görə, iki-üç uşağı olanlar böyük bir attraksiondan istifadə üçün, ən azı, 30-40 manat xərcləməli olur.
   Dənizkənarı Milli Parkda fəaliyyət göstərən karusellərin qiymətinin həqiqətən də baha olub-olmadığını öz gözümüzlə görmək üçün bu məkana yollandıq. Həm səhər üzü olduğundan, həm də havanın kəskin soyuq olması səbəbindən, Bulvarda o qədər də adam gözə dəymirdi. Uşaqlara isə adda-budda rast gəlinirdi. Bir dəstə dilənçi uşaq Bulvar boyu qaçışır, gəzintiyə çıxan insanların qarşısını kəsib sədəqə istəyirdi. Attraksionlar da, həmişəkindən fərqli olaraq, bom-boş idi.
   Bulvarda bəlkə də 20-30 karusel işləyir. Əyləncə vasitələrini işlədən adamların dediyinə görə, bunlar hamısı bir sahibkara məxsusdur. O, sadəcə yeri Milli Park rəhbərliyindən icarəyə götürüb və orada böyük əyləncə qurğuları qurdurub.
   Vaxtilə Dənizkənarı Bulvarın yaraşığı olan "Təbiət sərgisi"nin isə yerində yeni böyük attraksion inşa edilib. Bu karuselin fasadında müxtəlif müasir cizgi filmlərinin qəhrəmanlarının şəkilləri həkk edilib. İçəridə də "Buz dövrü" multfilminin qəhrəmanları-mamontlar uşaqları salamlayır. Yəni onların maketi hazırlanaraq düz qapının ağzına qoyulub. Şirek və başqa cizgi qəhrəmanları da uşaqları bu məkanda tək qoymur. Qiymətlərlə maraqlandıq. Burada işləyənlər dedilər ki, adambaşı qiymət 2 manatdır. Uşaq valideynilə birgə əylənmək istəyirsə, 3 dəqiqə üçün 4 manat pul ödəməlidir. Qiymətlərin hansı səbəbdən bu cür baha olmasına gəlincə, işçilər dedi ki, Bulvar rəhbərliyi sahibkardan böyük məbləğdə icarə haqqı aldığı üçün qiymət ucuz deyil. İşçilər onu da bildirdi ki, burada quraşdırılan əyləncə vasitələri də bahalıdır, bu səbəbdən də onun pulunu çıxarmaq lazımdır.
   Oyuncaq motosiklet sürmək üçün nəzərdə tutulan oyun meydançası isə təmirə dayandığından işləmirdi. Sahibinin sözlərinə görə, qiymət adambaşına bir manatdır, meydança isə üç-dörd günə uşaqların ixtiyarına veriləcək. Üç hissədən ibarət olan "Qalaktika" attraksionunda, əsasən hava gəmilərinin, maşınların xidməti təklif edilir. Burada hər karuselin qiyməti bir manatdır. Uşaq valideynilə birgə hər üçündən istifadə etsə, 6 manat pul ödəməlidir.
   Bulvarda ən maraqlı karusellərdən biri isə yellənən böyük gəmidir. Bu gəmidə tək adamın yellənməsi iki, iki nəfərinki isə 4 manata başa gəlir. Bulvarda yalnız iki-üç karusel 1 manatadır. Qalanlarının qiyməti isə iki manatdır.
   Qeyd elədiyimiz kimi, bulvarda olduğumuz müddətdə bir nəfər də olsun, karusellərə yaxın gəlib əylənmirdi. İşçilərin sözlərinə görə, hava soyuq olduğundan, müştərilərin sayı kəskin surətdə azalıb. Onlar dedilər ki, yay vaxtı əməlli-başlı qazanc əldə edirlər. Attraksion şəbəkəsində (ümumi) işləyən, özünü Yaşar kimi təqdim edən orta yaşlı kişinin fikrincə isə, qiymətlər elə də baha deyil. Valideynlərin narazılığını əsassız sayan həmsöhbətimiz "bizdə qiymətlər elə də baha deyil ki. Aparatlar hamısı bahalıdır. Karusellərin oturacaqları gündə bir neçə dəfə silinib təmizlənir. "Luna park"da qiymətlər "od qiymətinə"dir. Amma heç kəs danışmır. 2 manat bahadır? Bizim karusellərin çoxu iki, bəzilərisə bir manatadır. Bilmirəm, bunu niyə faciəyə çevirirsiniz?" deyə giley etdi.
   Müsahibimiz 2 manatı baha saymasa da, bu rəqəm bizim üçün olduqca böyük görünür. Nəzərə alsaq ki, valideynlərin müəyyən bir qisminin əməkhaqqı 200-300 manat civarındadır, bu qədər məvacib alan valideyn uşağının əyləncəsini necə təmin edə bilər? Axı onun maaşı heç aylıq yemək xərclərini ödəmir.
   Bulvarda bir stəkan suyun-koka-kola, fanta və s. qiyməti 50-60 qəpikdirsə, bir torba pop-korn üçün 40-50 qəpik pul tələb olunursa, onda hansı ucuzluqdan söhbət gedir? Karusel işçisi deyir ki, valideynlər uşaqlarını "Luna Park"a aparanda heç narazılıq bildirmir. Axı "Luna Park"a, "Kaula" ya kasıb-kusub uşağı yox, imkanlı şəxslərin övladları gedir. Yəni bu məkanların qapısı kasıb balalarının üzünə bağlıdır. Heç olmasa bulvarda qiymətlər münasib olmalıdır ki, valideyn beş-on manata uşağını bütün karusellərə mindirə bilsin.
   Axı məsum körpələri indidən təbəqələşməyə alışdırmaq çətindir...
   

Paytaxtın Nərimanov rayonu ərazisindəki "Mc Donalds" sökülür. Bu barədə "OLAYLAR"a etibarlı mənbədən məlumat verilib.
   Məlumata görə, obyektin sökülməsi Nərimanov rayonunda aparılan tikinti abadlıq işlərilə əlaqədardır. Metronun "Gənclik" stansiyası yaxınlığındakı avtomobil yolunun genişləndirilməsi məqsədilə həyata keçirilən layihədə Mc Donalds-ın da həmin ərazidən köçürülməsi nəzərdə tutulub. Mənbənin dediyinə görə, Mc Donalds-ın yerində, genişləndirilən yolun kənarında ikimərtəbəli yeraltı avtomobil dayanacağı inşa ediləcək. Artıq bu barədə obyekt rəhbərliyinə də məlumat verilib və obyektin yaxın vaxtlarda köçürülməsi tapşırılıb. Mənbənin dediyinə görə, obyektin köçürülməsi üçün başqa yer də təklif edilməyib.
   

Bu gün Ağır Cinayətlərə Dair İşlər üzrə Məhkəmədə siqaret üstündə bacısını xüsusi amansızlıqla qətlə yetirən şəxsin cinayət işi üzrə hazırlıq iclası keçirilib.
   APA-nın xəbərinə görə, hakim Rasim Sadıxovun sədrliyilə keçirilən iclasda təqsirləndirilən Bakı şəhəri sakini Laura Bahadır qızı Qasımovanın cinayət işi üzrə məhkəmə baxışı aprelin 2-nə təyin olunub.
   İttihama görə, 2009-cu ilin dekabrın 3-də Bakının Şərifzadə küçəsində yerləşən mənzildə yaşayan 1969-cu il təvəllüdlü Laura Bahadur qızı Qasımova özündən böyük bacısı Nərgiz Qasımovanın başını balta ilə kəsib. Sonra isə onun doğrayaraq torbaya doldurub və zibilliyə atıb. Hüquq-mühafizə orqanlarının əməkdaşları hadisəni L.Qasımova tərəfindən törədildiyini müəyyənləşdirib. O, ilkin istintaq zamanı ifadəsində hadisəni siqaret üstündə törətdiyini etiraf edib. L.Qasımova bacısından siqaret istəyib. N.Qasımova siqaret vermədiyinə görə, bacısı onu öldürüb. Təqsirləndirilən Cinayət Məcəlləsinin 120.2.4-cü (xüsusi amansızlıqla və ya ümümi təhlükəli üsulla adam öldürmə) maddəsilə ittiham olunur.
   

Azərbaycan ali təhsil müəssisələri yeni maliyyələşmə mexanizminin tətbiq edilməsi və dövlət sifarişi əsasında tələbə qəbulunun həyata keçirilməsilə əlaqədar olaraq daha çox tələbat olan istiqamətlər üzrə yeni ixtisaslar açmaq və mövcud olanların tədrisini genişləndirmək niyyətindədir.
   "XX əsr informatika əsri kimi tarixə düşmüşdüsə, XXI əsr elm-təhsil müstəvisində olan bir sıra istiqamətləri önə çəkir" - deyə Bakı Dövlət Universitetinin rektoru Abel Məhərrəmov Trend News-a bildirib. Onun sözlərinə görə, hazırda yeni istiqamətlər olan nanotexnologiya, mikrobiologiya, ekologiya kimi sahələrin inkişafına ehtiyac var. "BDU-da artıq 3-ilə yaxındır ki, nanotexnologiya üzrə bakalavr və magistr pilləsində mütəxəssis hazırlığına başlanıb və bu ixtisas həm elm, həm də təhsil müstəvisində artıq formalaşıb" - Məhərrəmov bildirib.
   Məhərrəmov həmçinin bildirib ki, universitetlərdə tibb-biologiya kimi ixtisasların açılması zərurəti var. "Elmlər bir-birilə vəhdət təşkil etdiyindən, hər hansı bir sahə ayrıca deyil, kompleks elmlərlə birgə tədris olunmalıdır" - rektor bildirib.
   Azərbaycan Dövlət Pedaqoji Universitetində (ADPU) də müasir tələblərdən irəli gələrək yeni istiqamətlərin tədrisi hazırlanır. ADPU rektoru Yusif Məmmədovun Trend News-a bildirdiyinə görə, universitet tərəfindən qoşa ixtisaslar üzrə tədrisin aparılması müəyyənləşib. Onun sözlərinə görə, ADPU-da tarix-coğrafiya, kimya-biologiya tipli ixtisaslar yaradıla bilər. "Kənd yerlərində məktəblərdə hansısa bir fənn müəlliminə ehtiyac var, ancaq dərs saatı az olduğundan, müəllimlər orada işləmək istəyində olmur" - Məmmədov bildirib.
   Azərbaycan Dillər Universitetinin rektoru Səməd Seyidov da rəhbərlik etdiyi tədris ocağında üç yeni istiqamət üzrə tədrisin təşkilinin planlaşdırıldığını bilıdirib. "Biz aşağıdakı istiqamətlər üzrə tədris təşkil etmək niyyətindəyik: Hindistan, Malayziya və Qafqazşünaslıq" - Seyidov məlumat verib.
   Milli Məclisin Elm və təhsil komitəsinin üzvü Asəf Hacıyev Azərbaycanda bir tələbənin hazırlanmasına ayrılacaq vəsaitin məbləğinin dəqiqləşdirilməli olduğunu hesab edir. "İnkişaf etmiş ölkələrdə adambaşına düşən maliyyənin həcmi təxminən 30 min dollar məbləğindədirsə, bizdə bu rəqəm çox azdır - cəmi 2-3 min arasında dəyişir" - Hacıyev bildirib. Millət vəkilinin fikrincə, hər tələbə üçün ayrılan vəsaitin artırılması istiqamətində proqram olmalı və bu proqrama uyğun olaraq vəsaitin həcmi artırılmalıdır.
   

Bakı Dövlət Universitetində (BDU) ötən ilin elmi hesabatı ilə bağlı Elmi Şuranın növbəti iclası keçirilib. APA-nın məlumatına görə, iclasda çıxış edən universitetin rektoru Abel Məhərrəmov bildirib ki, ötən il BDU üçün əlamətdar olub.
   Universitetin 90 illik yubileyi dövlət səviyyəsində qeyd edilib, elmi tədqiqat işləri sahəsində uğurlu nəticələr əldə olunub. Rektor artıq beş ildir ki, universitetin elmi hesabatlarının Azərbaycan Milli Elmlər Akademiyasının (AMEA) Rəyasət Heyəti qarşısında verildiyini deyib.
   BDU-nun elmi işlər üzrə prorektoru İsmayıl Əliyev isə bildirib ki, universitetin 16 fakültəsinin 125 kafedrası, 2 elmi tədqiqat institutu, 4 elmi tədqiqat mərkəzi və 19 elmi-tədqiqat laboratoriyasında elmin müxtəlif istiqamətləri üzrə tədqiqatlar aparılıb.
   Ötən il BDU əməkdaşları tərəfindən 12 ixtiraya müsbət rəy və 12 patent alınıb. Onlardan 8-i BDU-nun sahibliyi alınmış patentdir. Ötən il BDU-da 1570 nəfər professor-müəllim heyəti və elmi işçi çalışıb. Onlardan 8-i AMEA-nın həqiqi, 15-i müxbir üzvü, 36-sı əməkdar elm xadimi, 4-ü dövlət mükafatı laureatı, 14-ü Milli Məclisin deputatı, 349-u elmlər doktoru, 860-ı elmlər namizədi, o cümlədən 567-si dosentdir.
   Ötən il BDU-da təbiət və humanitar elm sahələrini əhatə edən bir sıra aktual mövzuların həllinə yönəlmiş 81 istiqamətdə 211 mövzu üzrə 1158 elmi iş yerinə yetirilib.
   Elmi Şura BDU-da universitet məzunlarının ixtisas artırmasına və ixtisas dəyişməsinə şərait yaradacaq Əlavə Təhsil Mərkəzinin yaradılması ilə də bağlı qərar verib. Şuranın digər qərarına görə, "Neft sənayesində nanotexnologiyalar" fundamental tədqiqat əsəri BDU tərəfindən Elm, mədəniyyət və ədəbiyyat üzrə Dövlət Mükafatları Komissiyasına təqdim ediləcək.

Xəbər verildiyi kimi, "Azərbaycan Dəmir Yolları" QSC dəmir yolunun Bakı, Gəncə və digər şəhərlərində yolun mühafizə zolağındakı tikililərin siyahısını tərtib edib və analizlərə başlayıb. "Azərbaycan Dəmir Yolları" QSC-nin sədr müavini Qurban Nəzirovun sözlərinə görə, toplanmış sənədlər hökumətə təqdim olunub və son qərarı hökumət verəcək:
   "Dəmir yollarının mühafizə zolağında inşa olunmuş, lakin qatarların hərəkətinə təhlükə yaradan tikililər var. Bununla bağlı müvafiq tədbirlər görüləcək".
   Q.Nəzirovun açıqlamasından o da məlum olub ki, belə tikililər çox olduğundan, ərazilərdə boş yer yoxdur. Ona görə də o, dəmir yolunun yerinin dəyişdirilməsinin mümkün olmadığını bildirib. Bununla belə, Q.Nəzirov onu da əlavə edib ki, Bakının yaşayış massivlərinin ərazisindən dəmir yolu xətlərinin köçürülməsi hələlik nəzərdə tutulmur. Ancaq o, gələcəkdə bu məsələyə baxılmasını da istisna etməyib. Məlumat üçün qeyd edək ki, dəmir yollarının mühafizə zolağında inşa olunmuş qanunsuz tikililərin siyahısı martın 5-də hökumətə təqdim olunub. Ümumilikdə 2840 qanunsuz tikili aşkarlanıb. Bunun 538-i qeyri-yaşayış sahəsi, 2302-si isə yaşayış sahəsidir.
   Ümumilikdə sözügedən problemin necə həll olunacağı ilə bağlı aydın fikrin olmaması həmin mühafizə zolağlarında tikilən ev və obyektlərin sahiblərini ciddi narahat edir. Bütövlükdə yaranan problem necə həll olunmalıdır?
   Məsələyə münasibət bildirən əmlak məsələləri üzrə ekspert Ramil Osmanovun sözlərinə görə, ümumilikdə 2840 qanunsuz tikili aşkarlansa da, konkret olaraq bu məsələnin hansı formada həll olunacağına aydınlıq gətirilməyib: "Biz də belə fikirləşirik ki, sözügedən məsələ bilavasitə Nazirlər Kabinetinin nəzarətində olduğundan, yəqin ki, yekun qərarı həmin orqan verəcək. Mənə elə gəlir ki, həmin ərazidə qanunsuz tikili inşa edən sakinlərə kompensasiyanın verilib-verilməyəcəyinə də yekunda aydınlıq gətiriləcək. Onu da qeyd edim ki, "Azəriqaz" İB, "Azərsu" SC və "Azərenerji" QSC də analoji araşdırmalar aparır. Onlar da bu barədə araşdırmalarını Nazirlər Kabinetinə təqdim etməlidir. Yəqin ki, bütün bu təqdimatlardan sonra sözügedən məsələ ilə bağlı yekun qərar veriləcək".
   Bütün bunlarla yanaşı, R.Osmanov problemdən çıxış yolunu, mütəxəssis olaraq, həmin sakinlərə kompensasiyanın ödənilməsində gördüyünü bildirdi: "Fikrimcə, ən optimal variant həmin mənzillər qiymətləndirilərək, onların sahiblərinə kompensasiyanın ödənilməsidir. Çünki söhbət ondan gedir ki, həmin sakinlərin bir qismi ərazidə qanunsuz məskunlaşıb. Ancaq onların əksər hissəsi, yəqin ki, müvafiq strukturlardan, ən azından, qeyri-rəsmi formada olsa da icazə alıb. Bütövlükdə burada 5-10 evdən söhbət getmir. Söhbət ümumilikdə 100 minə yaxın evdən gedir. Yəni mühafizə zolağına düşən 50-60 min evdən və həmçinin, bu gün 500 minə yaxın tikilinin taleyindən söhbət gedir. Bu baxımdan hesab edirəm ki, bu məsələlərə kompleks şəkildə aydınlıq gətirilməlidir. Ən başlıcası, kompensasiya məsələsi mütləq nəzərə alınmalıdır".
   

Böhran şəraitində maliyyə nəzarətinin gücləndirilməsi iqtisadi baxımdan mühüm faktorlardan biridir. Məlumat üçün qeyd edək ki, hələ ötən ilin sonlarında Azərbaycan prezidenti İlham Əliyev Maliyyə Nazirliyinin fəaliyyətinin təkmilləşdirilməsilə bağlı fərman imzalamışdı. O zaman bir çox ekspertlər bunun çox vacib olduğunu bildirməklə yanaşı, yerində verilmiş fərman kimi dəyərləndirdi.
   Qeyd edək ki, sözügedən fərmana müvafiq olaraq, nazirliyin tərkibində bir neçə yeni qurumun yaradılması nəzərdə tutulurdu. Bunların sırasına Dövlət Borcunun İdarə Edilməsi Agentliyi, Dövlət Maliyyə Nəzarəti Xidməti, Dövlət Sığorta Nəzarəti Xidməti aiddir. Eyni zamanda, nazirliyin yanında fəaliyyət göstərən Baş Dövlət Xəzinədarlığı əsasında Dövlət Xəzinədarlığı Agentliyi, Dövlət Əyar Palatasının bazasında isə Qiymətli Metallara və Qiymətli Daşlara Nəzarət Dövlət Xidməti yaradılmışdı. Maraqlıdır, böhran şəraitində maliyyə nəzarəti nə dərəcədə effektli ola bilər?
   İqtisadi və Sosial İnkişaf Mərkəzinin rəhbəri Vüqar Bayramov hesab edir ki, maliyyə sektorunda nəzarətin gücləndirilməsi gözlənilən idi: "Əslində, hətta qlobal maliyyə böhranından əvvəl belə bir fərmanın imzalanması müzakirə olunurdu. Ümumilikdə bu sənəd, özlüyündə uğurlu sənəddir. Baxmayaraq ki, bu, nazirlikdə idarələrin sayını artırır və praktiki olaraq idarələrin artması ilə paralel xərclərin də miqdarı müəyyən qədər artır. Ancaq sənədin keyfiyyətli olması əsas şərtlərdən olmaqla yanaşı, sənədin icrasının düzgün təşkil edilməsi də olduqca vacibdir. Yəni nəzərdə tutulan işlərin icrasında nöqsan olarsa, bunu dərhal aradan qaldırmaq lazımdır. Bütün hallarda, ölkədə maliyyə nəzarətinin gücləndirilməsi olduqca vacibdir. Çünki ölkənin dövlət büdcəsinin gəlirləri artır və büdcə gəlirlərinin artması eyni zamanda o deməkdir ki, müxtəlif layihələrə ayrılan vəsaitlərin həcmi də artır. Müqayisə üçün qeyd edək ki, 2008-ci ildə yalnız bir sektora 2 milyard manat vəsait ayrılmışdı. Bu da, öz növbəsində, maliyyə nəzarətinin gücləndirilməsini zərurətə çevirir. Çünki əks halda vəsaitlərin təyinatından yayındırılması ehtimalı böyük ola bilər. Ancaq bütövlükdə bu qurumların yaradılması, sərəncam olaraq, uğurlu sərəncamdır. Yetər ki, icrasında nöqsanlara yol verilməsin və o zaman bütövlükdə sərəncamın maliyyə nəzarətinin gücləndirilməsinə təsiri ola bilər. Ən azından, maliyyə nəzarətinin nə dərəcədə effektli olduğu il ərzində məlum olacaq".
   V.Bayramovun fikrincə, bu gün Azərbaycanda kifayət qədər çoxlu sayda saxta qızıllar var: "Həmin saxta qızıllara qarşı mübarizə olduqca zəifdir. Baxmayaraq ki, Standartlaşdırma Agentliyi saxta qızıllara qarşı mübarizə aparır. Çox təəssüf ki, istehlak və qızıl bazarında saxta qızılların həcmi olduqca çoxdur. Müsbət məqamlardan biri də odur ki, sənəddə saxta qızıllara qarşı da mübarizə öz əksini tapıb. Ancaq digər qurumlarda belə bir anoloji idarənin yaradılmasına ehtiyac yoxdur. Ona görə ehtiyac yoxdur ki, maliyyə sektoruna, Maliyyə Nazirliyindən kənar qurumlar nəzarət edirsə, bu, əslində maliyyə nəzarətinin gücləndirilməsinə xidmət etməz. Bu daha çox maliyyə nəzarəti sisteminə kifayət qədər çoxlu sayda müdaxilələrin olmasına gətirib çıxaracaq. Ona görə də, güman etmirəm ki, digər qurumlarda da analoji xidmətlərin və qurumların yaradılmasına ehtiyac var. Onu da qeyd edim ki, bir sıra hallarda belə qurumlar yaradılır, amma bunun bir effekti olmur. Müqayisə üçün qeyd edim ki, İqtisadi İnkişaf Nazirliyində süni qiymətlərə qarşı xidmət yaradılmışdı və həmin xidmətin məqsədi süni qiymət artımına qarşı mübarizə aparmaqdır. Bəs, reallıq nə oldu?
   Reallıq ondan ibarət oldu ki, həmin xidmət yaradıldıqdan sonra ölkədə süni qiymət artımları nəinki azaldı, əksinə daha da artdı. Xatırlayırsınızsa, bayramlarda artan qiymətlər bayram sonrası aşağı düşmədi. Əslində, həmin idarə süni qiymət artımına qarşı mübarizə aparmalı idi. Ancaq bunun əksinə olaraq, sözügedən qurum süni qiymət artımını daha da stimullaşdırdı. İdarələrin sayının çox olması heç də o demək deyil ki, o sektorda nəzarət güclənir. Əsas odur ki, yaradılan idarələr effektli və səmərəli işləsin. Bunu da yaşayarıq, görərik".
   

Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən ticarət şəbəkələrində aparılan yoxlamalar zamanı müəyyən yararsız ərzaq məhsulları aşkarlanıb.
   Nazirlikdən "APA-Economics"ə verilən məlumata görə, yoxlamalar zamanı Sulutəpə qəsəbəsində yerləşən "Elvan İrmak Qida Məhsulları" MMC tərəfindən "Elvan" əmtəə nişanı ilə istehsal olunmuş şəkərli peçenyelərin və qaletlərin yararlılıq müddətinin 1 il göstərildiyi müəyyən edilib. Normativ-texniki sənədlərə əsasən, şəkərli peçenyelər üçün maksimal saxlama müddəti 3 ay, qaletlər üçün isə 6 aydır.
   Bu malların üzərində göstərilmiş saxlama müddəti normativ-texniki sənədlərdə nəzərdə tutulmuş müddətlərlə uyğun olmadığından Dövlət Xidməti tərəfindən bu qənnadı məmulatlarının istehsal olunduğu "Elvan İrmak Qida Məhsulları" MMC-də yoxlamaya başlanılıb. Yoxlama zamanı yuxarıda qeyd edilən faktlar təsdiqini tapıb, müəssisə tərəfindən istehsal olunan şəkərli peçenyelərin və qaletlərin saxlama müddətinin məhsulların etiketlərində 12 ay göstərildiyi məlum olub. Bununla bərabər, müəssisənin anbarında satışa hazır məhsulların arasında yararlılıq müddəti 1 ili ötmüş 12 tondan çox məhsul aşkar edilib. Bundan başqa, müəssisənin anbarında Türkiyədə istehsal olunan "Elvan" əmtəə nişanlı malların qablaşdırılması üçün nəzərdə tutulmuş 1 439 ədəd boş qutu da aşkar edilib. Beləliklə, müəssisədə istehsal olunan malların Türkiyədə istehsal olunmuş mal kimi qablaşdırılaraq satışa çıxarıldığı müəyyən olunub, "Elvan İrmak Qida Məhsulları" MMC tərəfindən istehlakçıları çaşdırmaqla haqsız rəqabət hallarına yol verilib. Bu qanun pozuntuları ilə əlaqədar müəssisənin anbarında olan 100 tondan artıq "Elvan" əmtəə nişanlı malların satışının dayandırılması və ticarət şəbəkələrində olan məhsulların geri qaytarılması barədə "Elvan İrmak Qida Məhsulları" MMC-yə göstəriş verilib.
   

Martın 18-də Ağır Cinayətlərə Dair İşlər üzrə Məhkəmədə hakim Cavid Hüseynovun sədrliyilə Gəncədə oğlunu qətlə yetirməkdə təqsirləndirilərək həbs olunan Kamal Nəcəfovun işi üzrə məhkəmə prosesi başlayıb.
   Bu barədə məlumatı "OLAYLAR"a məhkəmədən veriblər. Prosesdə iş üzrə məhkəmənin hazırlıq iclası yekunlaşıb və məhkəmə prosesinin vaxtı aprelin 2-ə təyin edilib.
   İttihama görə, Kamal Nəcəfov 2009-cu ilin dekabr ayında oğlu Sirac Nəcəfovu güllələyib. Aldığı güllə yarasından Sirac Nəcəfov hadisə yerində keçinib. Keçirilən əməliyyat tədbirləri nəticəsində Kamal Nəcəfov həbs edilib.
   

Məlum olduğu kimi, qlobal maliyyə böhranının başlanmasından sonra ölkə banklarının üzləşdiyi əsas çətinliklərdən biri də problemli kreditlərlə bağlı oldu. Bu məsələnin Azərbaycanda özünü kifayət qədər qabarıq şəkildə büruzə verməsinə dair mediada indiyə qədər yetərincə məlumat verilib.
   Lakin araşdırmalar göstərir ki, problem əslində beynəlxalq miqyaslıdır. Bununla belə, problemin həlli istiqamətində müxtəlif ölkələrdə tamamilə fərqli metodlar tətbiq olunur. Digər tərəfdən, yaranan vəziyyətdən bəzi bankların sui-istifadə etməyə çalışmasına da ayrı-ayrı ölkələrin məhkəmə orqanlarının ciddi cəzalar tətbiq etməsi geniş vüsət almaqdadır. Məsələn, ötən il Rusiyada banklarla bağlı keçirilən məhkəmə proseslərinin çoxu müştərilərin xeyrinə başa çatıb. Qonşu ölkədə kreditlər, hesablaşma hesabları, kartlar və bu kimi xidmətlərə görə bankların faizləri artırmasından narazı qalan müştərilər arasında məhkəməyə müraciət edənlərin sayı artıb.
   Əvvəlki illərdən fərqli olaraq, 2009-cu ildə onların çoxu məhkəməni udub və bu proses indi də davam etməkdədir.
   Azərbaycanda bu istiqamətdə məhkəmə çəkişmələri geniş vüsət almasa da, banklar tərəfindən müştərilərə kreditlərin verilməsi və qaytarılmasında problemlər zaman-zaman yaşanır. Bununla bağlı qəbul olunan məhkəmə qərarlarının icrasında isə çətinliklər yaşanır. İqtisadçı-ekspertlərin bildirdiyinə görə də, əsas problem məhkəmə qərarlarının icrası ilə bağlıdır. Belə ki, məhkəmə icraçılarının səlahiyyətləri az olduğundan, onlar hər addım üçün məhkəməyə müraciət edir. Bu da işi ləngidir. Belə vəziyyətdə daha ciddi problemlərlə üzləşməmək üçün banklar müştəriləri daha ciddi şəkildə təftiş etməyə başlayıb. İndi kredit menecerləri müştərinin ailə vəziyyətindən tutmuş, işlədiyi müəssisə və sahəyə qədər bütün detalları araşdırır.
   Ekspertlər bunu təbii sayır, çünki böhranın şirkətlərə yaratdığı problemlər sonradan işçinin öz probleminə çevrilir. Sirr deyil ki, böhran nəticəsində bəzi şirkətlərdə iş yeri azalmağa başladı, bəzilərində fəaliyyət dayandı, bəzilərində ödəniş azaldı. Yəni maaşlar və kompensasiyalar azaldı. Bu da kreditlərin qaytarılmasına mənfi təsir etməyə başladı. Bunun nəticəsidir ki, banklar, böhranın verdiyi dərs olaraq, istehlak kreditlərini verilməsinə ciddi yanaşır.
   Nəticədə indi dövlət sektorunda işləyənlər, özəl təşkilatlara nisbətən, krediti daha asan alır. Burda maaşlar özəl sektordakından az olsa da, sabitdir, üstəlik, ixtisar ehtimalı da azdır. Amma bu, özəl şirkətlərin hamısına aid deyil. Məsələn, mobil rabitə şirkətlərinin, sığorta, audit, hüquq şirkətlərinin, xarici neft şirkətlərinin, ümumiyyətlə xarici kapitalı olan şirkətlərin işçilərinə krediti həvəslə verirlər. Bankların çoxu tanımadığı şirkətin işçisinə kredit vermir. Səbəb isə saxta arayışlardır. Məsələn, heç ofisi də olmayan şirkət işçisinin böyük məbləğdə maaş alması barədə arayış verə bilər. Bəzən bundan şubhələnən banklar məsələni araşdıranda arayışın saxtalığı üzə çıxır.
   Bankirlər etiraf edir ki, tikinti şirkətləri, pərakəndə mal satan şirkətlərin işçilərinə ehtiyatla yanaşırlar. Son vaxtlar onların işləri zəiflədiyinə görə, belələrinə kredit verməkdən çəkinirlər.
   Bank eksperti Abbas İbrahimov İctimai Televiziyaya açıqlamasında bildirir ki, özəl şirkətdə işləyənlərə kredit verəndə həmin şirkətin maliyyə vəziyyətinin necə olduğu nəzərə alınır.
   Müştərinin etibarlılığı ilk baxışdan əhəmiyyətli olmayan məsələlərdən də asılıdır. Məsələn, banklar hesab edir ki, şəhərin mərkəzində yaşayanlar, avtomobili olanlar krediti daha yaxşı qaytarır. Banklar, subay müştərilərə nisbətən, ailəlilərə daha çox etibar edir. Məsuliyyət bir tərəfə, ailəliləri tapmaq çətin deyil, subaylar isə yaşayış yerini asanlıqla dəyişə bilir.
   Bəzi banklar 21-22 yaşdan aşağı olanlara kredit vermir, pensiyaçılara isə kredit hökmən zaminlə verilir. İstehlak kreditlərinin alındığı məqsədlər dəyişib. Böhrandan əvvəl kreditlərdə əsas yer tutan məişət əşyaları, mobil telefonlar və s.-nin kreditlə satışı, demək olar ki, dayanıb. Hətta yeni 3G texnologiyasının tətbiqi də telefonlara marağı artıra bilməyib. Mebellərin də kreditlə satışı kəskin azalıb, yalnız kompüterlərin satışı davam edir. İndi banklar yeni kredit növlərinə hazırlaşır. Məsələn, məlum olub ki, bəzi banklar səhiyyə xidmətləri üçün kredit verəcək.
   Yəni müştəri böyük pul tələb edən əməliyyatların və ya müalicənin aparılması üçün kredit alacaq. Bir şərtlə ki, həmin əməliyyat müəyyən edilmiş tibb mərkəzində olmalıdır. Bundan başqa, son vaxtlar bəzi banklar hətta toyda iştirak etmək üçün kiçik məbləğli kredit xətti açır. 100 manata qədər olan bu kreditlər 1 aya bağlanmalıdır. O ki qaldı peşələrə, banklar bildirir ki, kredit verəndə ziyalılara daha çox etibar edirlər. Çünki həyat təcrübəsi və təhsil onları daha məsuliyyətli edir. Kredit almaq baxımından da ən hörmətli peşə müəllim sayılır.
   

Novruz bayramı münasibətilə keçiriləcək tədbirlərlə əlaqədar paytaxt Bakıda avtomobillərin hərəkətinə məhdudiyyət tətbiq olunacaq.
   Bununla bağlı Bakı Şəhər Baş Polis İdarəsinin (BŞBPİ) rəis müavini, BŞBPİ Dövlət Yol Polisi İdarəsinin (DYPİ) rəisi vəzifəsini müvəqqəti icra edən polis polkovniki Həsən Şirinov əmr imzalayıb. DYPİ-dən APA-ya daxil olan məlumatda bildirilir ki, əmrə əsasən, martın 20-də Bakı şəhərində beynəlxalq Novruz Bayramı münasibətilə keçiriləcək tədbir zamanı əhalinin xoş əhval-ruhiyyəsini qorumaq və təhlükəsizliyini təmin etmək məqsədilə paytaxtın aşağıda qeyd edilən küçə və prospektlərində nəqliyyat vasitələrinin hərəkəti 19.03.2010-cu il saat 24.00-dan 20.03.20010-cu il saat 16.00-dək tam məhdudlaşdırılacaq:
   - Yusif Səfərov küçəsindən başlayaraq Cavanşir körpüsü, Üzeyir Hacıbəyov küçəsi, Bülbül prospekti, sağa Zərifə Əliyeva küçəsi, sola Rəsul Rza küçəsi, sağa Neftçilər prospekti-Əziz Əliyev küçəsi, Azneft meydanı, Bakı Gəmi Təmiri Zavodunun qarşısına qədər, oradan sola "Əl oyunları" sarayı, Milli Park da daxil olmaqla dəniz limanınadək qapanan dairə daxilində bütün növ nəqliyyat hərəkəti qadağan olunacaq;
   - Əlavə olaraq, hərəkət istiqamətləri Teleteatrın qarşısından N. Nərimanov abidəsi tərəfə, İstiqlaliyyət küçəsi, Azərbaycan prospekti, Gənclər meydanı, "Qoşa Qala" qapısından isə "5 mərtəbə" tərəfə dəyişdiriləcək;
   - Səbail meydanı tərəfdən gələn nəqliyyat vasitələri Bakı Gəmi Təmiri Zavodunun qarşısından geri qaytarılacaq;
   - Bayıldan "Gülüstan" sarayı və "40 pilləkən" tərəfə nəqliyyatın hərəkəti dayandırılacaq;
   - Cavanşir körpüsündən gələrək Üzeyir Hacıbəyovla hərəkət edən nəqliyyat vasitələri yalnız sağa - R.Behbudov küçəsinə yönəldiləcək;
   - Azadlıq prospekti, Bülbül prospekti, Səməd Vurğun küçəsi ilə "Milli Park" istiqamətinə nəqliyyat vasitələri buraxılmayacaq. Bu küçələrlə hərəkət edən nəqliyyat vasitələri R.Behbudov, Füzuli və S.Əsgərova küçələrindən geri qaytarılacaq;
   DYPİ sürücülərdən öz rahatlıqlarını təmin etmək məqsədilə elanda qeyd olunan sxem üzrə hərəkət etmələrini, qadağan olunan yerlərdə nəqliyyat vasitələrindən istifadə etməmələrini, bu müddətdə nəqliyyat vasitələrindən mümkün qədər az istifadə olunmasını xahiş edir.

Son bir ildə böhranla əlaqədar ölkənin tikinti sektorunda durğunluq davam etməkdədir. O da məlumdur ki, tikinti sektorunun hərəkətə gətirilməsi, paralel olaraq, bu sahə ilə bağlı olan digər istehsal və xidmət sektorlarının canlanmasına təkan verir.
   Bu da, öz növbəsində, ölkədə məşğulluğun artmasına, işsizliyin azalmasına və ən nəhayət əhalinin vəziyyətinin yaxşılaşmasına gətirib çıxarır. Qeyd edək ki, 2010-cu ilin dövlət büdcəsində ipoteka kreditləşməsi üçün 75 milyon manat nəzərdə tutulub. Ola bilsin ki, ilin ortalarında büdcəyə yenidən baxılarkən bu rəqəm artsın. Məsələ ondadır ki, neftin qiyməti artır. Adətən neftin qiyməti artanda büdcəyə yenidən baxmaq imkanı yaranır. Maraqlıdır, bu il Azərbaycanın tikinti sektorunda vəziyyət necə olacaq? Mövcud durğunluq davam edəcək, yoxsa hansısa inkişaf meylləri özünü göstərəcək? Məsələyə münasibət bildirən iqtisadçı-ekspert Samir Əliyev hesab edir ki, adətən özəl sektorda tikinti mövsümü yazqabağı başlayaraq, payızın sonunda pik nöqtəyə çatır: "Ancaq bu il tikinti sektorunda bir neçə il əvvəl mövcud olan canlanmanın təkrarlanacağını gözləmirəm. Ən azından, mövcud reallıqlar bu qənaətə gəlməyə əsas verir. Bunun bir sıra obyektiv və subyektiv səbəbləri var. Məsələ ondadır ki, 2008-ci ilin ortalarında böhran başlayandan sonra tikinti sektorunda qiymətlər aşağı düşməkdə davam edir. Baxmayaraq ki, bu qiymət azalması elə də böyük miqdarda olmayıb. Ancaq tələbatın azalması ilə əlaqədar olaraq evlərin qiyməti aşağı düşməkdədir. Evlərin ucuzlaşmasının ən başlıca səbəblərindən biri, təbii ki, tələbatın kəskin olaraq azalması ilə bağlıdır. Azərbaycanda bir vaxtlar elə dövr yarandı ki, regionlardan paytaxta əhalinin kütləvi axını başladı. Bu axının fonunda Bakıda evlərin qiyməti sürətlə yüksəldi. Onu da nəzərə almaq lazımdır ki, paytaxtda evlərin əsas hissəsini Rusiyada çalışan soydaşlarımız alırdı. Bütün bunlar, paralel olaraq, tikinti sektorunda aktivliyin artmasına və bu sektora sərmayə qoyuluşunun güclənməsinə təkan verirdi. Ancaq qlobal maliyyə böhranı ilə əlaqədar Rusiyadan Azərbaycana pul köçürmələrinin miqdarı kəskin surətdə azalmağa başladı. Belə ki, 2009-cu ildə Rusiyadan Azərbaycana göndərilən pulların miqdarı, hardasa, 2 dəfəyə qədər azalıb. Bu isə o deməkdir ki, Rusiyada yaşayan azərbaycanlıların gəlirləri kəskin şəkildə azalıb".
   S.Əliyev tikinti sektorunda yaranan durğunluğu ipoteka kreditlərinin məhdud olması amililə də əlaqələndirdi: "Bir neçə il əvvəl ölkədə tikinti bumu yaşanarkən ipoteka kreditlərinin verilməsinə start verildi. Bu da ev bazarında qiymətlərin daha da artmasına əlavə təkan verdi. Ancaq göründüyü kimi, bu gün ipoteka kreditlərinin verilməsilə bağlı ölkədə durğunluq höküm sürür. Çünki bununla əlaqədər 2010-cu ildə verilməsi nəzərdə tutulan 75 milyon manat vəsait çox azdır. Digər tərəfdən, verilən ipoteka kreditlərinin şərtləri əvvəlki illərlə müqayisədə xeyli sərtləşdirilib. Onu da qeyd edim ki, ötən ilin ortalarında məhdud miqdarda ipoteka kreditinin bazara buraxılması müəyyən qədər canlama yaratdı. Bu zaman ancaq ucuz evlər bir qədər bahalaşdı. Lakin bu bahalaşma çox uzun sürmədi və daha sonra qiymətlər yenidən aşağı düşməyə başladı. O baxımdan, bu il tikinti sektorunda hansısa qiymət artımının baş verəcəyini düşünmürəm. Mövsümi olaraq, ola bilsin ki, qiymətlərdə 5-10 faiz artım olsun, amma bu artım, daha çox, ucuz evlərin timsalında özünü göstərəcək. Baha evlərdə elə bir artımın olacağını gözləmirəm. Yarımçıq qalan binalarda işlərin sürətlənəcəyi də gözlənilmir. Çünki həmin binaları inşa edən tikinti şirkətləri binanı tamamlamaq üçün vəsait tapa bilmir. Səbəb odur ki, əvvəl bu şirkətlərin bir gəlir mənbəyi ev alanların pulu idisə, ikinci mənbəyi banklardan alınan kreditlər idi. İndi, demək olar ki, bunların heç biri yoxdur".
   

Narkotik vasitələrin qanunsuz dövriyəsilə məşğul olan Zaqatala rayon sakini həbs edilib.
   Bu barədə APA-nın Şəki-Zaqatala bürosuna Zaqatala Rayon Polis Şöbəsindən (RPŞ) məlumat verilib. Məlumata görə, Zaqatala RPŞ-nın əmələliyyat-axtarış qrupunun keçirdiyi tədbir zamanı rayonun Yuxarı Tala kənd sakini 1957-ci il təvəllüdlü Səfərov Rəcəb Abakar oğlu rayon ərazisində şübhəli şəxs qismində saxlanıb. R.Səfərovun üzərinə baxış zamanı ondan kütlə şəklində 1 kiloqram 325 qram narkotik vasitə hesab edilən, qurudulmuş marixuana aşkar edilərək götürülüb. Faktla bağlı Zaqatala RPŞ-də cinayət işi başlanıb, araşdırma aparılır.