Baki - Xəbər Qəzeti

"Ermənistan faktiki müharibə şəraitindədir. Azərbaycan müharibəyə ciddi hazırlaşır və məsələyə yalnız siyasi bəyanatlar çərçivəsində baxmaq olmaz". Belə bir açıqlama ilə Ermənistanın sabiq prezidenti Levon Ter-Petrosyan çıxış edib. Onun sözlərinə görə, müharibə başlasa, hərbi qarşıdurma yalnız Azərbaycan və Ermənistan arasında olmayacaq:
   "Bu zaman Kollektiv Təhlükəsizlik Müqaviləsi işə düşəcək və münaqişəyə Kollektiv Təhlükəsizlik Müqaviləsi Təşkilatının digər üzvü - Rusiya qoşulacaq. Azərbaycanın da Türkiyə ilə analoji razılaşması var. Belə çıxır ki, yalnız Azərbaycan-Ermənistan qarşıdurması yox, həm də NATO və KTMT blokları arasında qarşıdurma yaranacaq".
   Ermənistanın sabiq prezidenti etiraf edib ki, Azərbaycan hərbi texnika sahəsində Ermənistanı dəfələrlə üstələyir: "Bizim zabitlər Yunanıstan və Rusiyada, Azərbaycanın kadrları isə Türkiyədə təlim keçib".
   Bəzi Qərb dövlətlərinin son zamanlar açıq-aydın ermənipərəst mövqe tutması və qondarma soyqırım qanununun ABŞ və İsveçrə dövlətlərinin parlamentlərində qəbul olunması, Türkiyə ilə yanaşı, Azərbaycanı da çıxılmaz vəziyyətdə qoyub. Rəsmi Ankara Türkiyədə yaşayan Ermənistan vətəndaşlarını ölkədən deportasiya etsə, Azərbaycan da müharibə hazırlığını yekunlaşdırıb öz ərazisini işğaldan azad etməyə başlaya bilər.
   Qeyd edək ki, Azərbaycan prezidenti İlham Əliyevin beynəlxalq tədbirlərdə verdiyi müharibə bəyanatı Ermənistanda ciddi narahatlıqla qarşılanıb. Ermənistan hakimiyyəti də Azərbaycanın müharibə yoluna əl atacağından ehtiyatlanır. Xatırladaq ki, Azərbaycan prezidenti İlham Əliyev hələ Münhen görüşünə yollanmazdan əvvəl bildirmişdi ki, bu görüş həlledici olmalıdır: "Bu görüş danışıqlar prosesində həlledici rol oynamalıdır. Çünki bu il bir neçə dəfə görüşlər oldu, onların heç bir nəticəsi olmadı. Bu görüş nəticəsiz qalsa, danışıqlara ümidimiz tükənəcək. Danışıqlara ümidimiz tükənsə, o zaman bizim başqa yolumuz qalmır. Biz buna da hazır olmalıyıq. Son illər ərzində ordu quruculuğunda görülən işlərin, təbii ki, məqsədi var. Biz milyardlarla vəsait xərcləyirik, ordumuzu gücləndiririk, yeni silahlar texnika alırıq, təmas xəttində öz mövqelərimizi gücləndiririk. Bunu ona görə edirik ki, müharibə variantını heç vaxt istisna etməmişik və etmirik də. Bizim tam hüququmuz var ki, öz torpaqlarımızı hərbi yolla azad edək".
   Onu da bildirək ki, hazırda Azərbaycanın müdafiə sənayesi ordunu müasir hərbi texnika ilə təchiz edir. Bu günlərdə nümayiş etdirilən yerli istehsal hərbi texnika da Azərbaycan ordusunun maddi-texniki bazasının yüksək səviyyədə olmasından xəbər verir. Qarşı cəbhədə isə vəziyyət çox fərqlidir. Son vaxtlar Ermənistanın müdafiə sistemi acınacaqlı vəziyyətə düşüb. Şəxsi heyətin mənəvi-psixoloji durumu və nizam-intizam xeyli zəifləyib. Ermənistan ordusunda fərarilik halları gündən-günə artır. Bu, ordunun Azərbaycanın işğal olunmuş ərazilərində yerləşən bölmələrində daha qabarıq şəkildə nəzərə çarpır.
   Bir faktı da qeyd edək ki, Azərbaycanın 2010-cu il dövlət büdcəsinin 10,7 faizi hərbi xərclərə ayrılıb. Bu isə 1 milyard 527 milyon manat deməkdir. Ermənistanın müdafiəsinə xərclənən vəsait isə bu rəqəmlərlə müqayisədə xeyli azdır və cəmi 340 milyon dollar təşkil edir.
   Bununla yanaşı, son dövrlər Azərbaycanla Rusiya arasında münasibətlərin inkişafı Ermənistan tərəfindən qısqanclıqla qarşılanır.
   Rusiyanın Azərbaycanı strateji tərəfdaş kimi qəbul etməsi Ermənistanın bütün ümidlərini puça çıxarıb. Hakimiyyətin himayəsində olan kütləvi informasiya vasitələri, bir neçə gündür ki, Moskvanın əleyhinə kampaniyaya başlayıb. Bir-birinin ardınca dərc olunan yazılarda Rusiyanın Azərbaycanla əlaqələrinin sıxlaşması İrəvana qarşı böyük zərbə kimi qiymətləndirilir. Ən böyük himayədarını itirmək "Sürix protokolları"nın imzalanmasından sonra regionda mövqeyinin möhkəmlənəcəyinə ümid edən Ermənistan üçün gözlənilməz olub. "Türkiyə ilə münasibətlərin normallaşması prosesində irəliləyiş yoxdur. Bu məsələdə heç kim Ankaraya təzyiq etmək istəmir. Digər tərəfdən, Rusiya gözlənilməz mövqe nümayiş etdirməyə başlayıb. Sanki başlıca məqsəd Ermənistanı regionda təkləməkdir" - deyən erməni siyasi ekspert Gevork Qəribyan baş verən son hadisələri İrəvana qarşı əvvəlcədən hazırlanan planın tərkib hissəsi hesab edir. Ekspert etiraf edir ki, İrəvan-Moskva münasibətlərinin soyuqlaşması Ermənistanı regionun ən lazımsız fiquruna çevirə bilər: "Bu yaxınlaşma Dağlıq Qarabağ münaqişəsinin həllində Azərbaycanın mövqeyinin dəstəklənəcəyindən xəbər verir.
   Bu isə Ermənistan üçün ciddi təhlükədir". O, indiki məqamda ölkəsi üçün yeganə çıxış yolunu Birləşmiş Ştatlarla əlaqələri sıxlaşdırmaqda görür: "Düzdür, Dağlıq Qarabağ münaqişəsinin həllində Vaşinqtonun mövqeyi İrəvanı qane etmir. Vaşinqton, hətta protokolların ratifikasiyasında Ankaraya təzyiq göstərməkdə belə acizdir. Amma Rusiyanın bu satqın siyasətinə ən tutarlı cavab Birləşmiş Ştatlarla əlaqə qurmaqdır". Ağ Evlə münasibətlərin normallaşmasını asanlıqla həzm edə bilməyən Kreml Ermənistanı itirməmək üçün səyləri artıra bilər".
   Bu günlərdə ABŞ Konqresinin Nümayəndələr Palatasında və İsveçrə parlamentində qondarma erməni soyqırımı ilə bağlı qanunun qəbulu Ermənistanı Rusiyadan bir qədər də uzaqlaşdırıb.
   Rəsmi İrəvan artıq öz xilasını Qərbdə görür. Son proseslər Ermənistanı Qərbə daha da yaxınlaşdırdı. Prezident Serj Sarkisyanın Ağ Evə dəvət olunması bu prosesi bir qədər də sürətləndirdi. Onu da gözləmək olar ki, Türkiyədə yaşayan Ermənistan vətəndaşları bu ölkədən deportasiya olunsa, öz ölkələrində deyil, Avropa dövlətlərində sığınacaq tapacaq.