Son günlərdə Rusiya və ABŞ arasında yenidən fəal müzakirə mövzusu olan məsələlərdən biri də Raket Əleyhiən Müdafiə Sistemi (RƏMS) və strateji raketlərin ixtsarı ilə bağlıdır. Məsələnin ABş dövlət katibi Hillari Klintonla Rusiyanın xarici işlər naziri Sergey Lavrovun Moskvada başlanan növbəti görüşlərində də əsas müzakir mövzusu olacağı bildirilir.
   Ümumiyyətlə isə Hillari Klinton Rusiya paytaxtında hücum silahlarının ixtisarına dair danışıqları tamamlayaraq Yaxın Şərq tənzimləməsi məsələsini müzakirə edəcək.
   Sergey Lavrov deyib ki, amerikalı partnyoru ilə bərabər silahların ixtisarı müqaviləsi üzərində işləyən ekspert qrupların məruzəsini dinləyəcəklər: "Biz qrup rəhbərlərinin məruzələrini dinləyərək, öhdəliklərin necə yerinə yetirilməsini yoxlayacağıq ". Moskvada bildirilir ki, müqavilə mətni 95 faiz uzlaşdırılıb və sazişin imzalanması yaxın həftələrin işidir. Bununla belə, müşahidəçilərə görə, son uzlaşdırma kifayət qədər çətin gedir. Müqavilə dekabrda bitmiş əvvəlki sazişi əvəzləməlidir. İlk əvvəl yeni müqavilənin hələ ötən il imzalanacağı gözlənilirdi, ancaq qarşılıqlı narazılıqlar onu hələ də imzasız saxlayır.
   Ehtimallara görə, Hillari Klintonla onun rusiyalı həmkarı Sergey Lavrov işə təkan verməyə çalışacaqlar. Rusiya Dumasında bildirirlər ki, müqavilədə nüvə silahı ixtisarlarının raket əleyhinə sistemlə bağlılığı göstərilməsə ratifikasiya sual altına düşə bilər. Moskvanı ABŞ-ın Cənubi Avropa ölkələrində raket əleyhinə sistem yerləşdirmək planları narahat edir. Polşada belə sistemi quraşdırmaqdan vaz keçən ABŞ-da isə bildirilir ki, Rumıniyada quraşdırılacaq sistem Rusiya üçün təhlükə təşkil etmir, bu sistem İrandan gələn mümkün raket təhlükəsinə qarşıdır. Məhz elə bu fonda Qəbələ RLS-in ABŞ və Rusiya rəhbərləri arasında yenidən müzakirə predmeti olacağı vurğulanır. Vaşinqtonda Avropa Siyasəti Mərkəzinin analitiki Piter Doran bildirir ki, əslində Qəbələ RLS ABŞ-ın hazırki müdafiə planında vacib rol oynamır, lakin bu mövzu gündəlikdən götürülməyib, stansiya gələcəkdə istifadə edilə bilər: "Qəbələ RLS mövzusu Buş administrasiyası zamanı tez-tez gündəlikdə səsləndirilib. Bu o zaman Buşun antiraket planının Moskvaya qarşı yönəlmədiyini Rusiyaya göstərmək üçün ilk cəhd idi".
   Ekspertin sözlərinə görə, indiki administrasiya Avropada təhlükəsizlik sisteminin qurulmasından imtina etməyib, sadəcə, öz strategiyasını dəyişib. Doran hesab edir ki, Obama administrasiyası texnologiyanın yeni növünə, öz radarı olan sistem növünə daha çox diqqət cəmləyib. Bu halda Qəbələ RLS əlavə kimi istifadə edilə bilər: "ABŞ və Rusiya arasında bu sahədə əməkdaşlığı yaxşılaşdırmaq üçün xeyli imkanlar var".
   Xatırladaq ki, Moskva "böyük səkkizliy"in 2007-ci ilin yayında keçirilən sammitində ABŞ-a Azərbaycanda yerləşən Qəbələ RLS-dən, həmçinin Rusiyanın cənubundakı Armavirdə inşa edilən raket zərbələrindən xəbərdarlıq üzrə stansiyadan birgə istifadə etməyi təklif edib. Azərbaycanın şimal-qərbində yerləşən Qəbələ RLS sovet dövründə SSRİ-nin raket əleyhinə sisteminin ən vacib elementi kimi tikilib. Azərbaycan müstəqillik əldə etdikdən və RLS onun mülkiyyətinə keçdikdən sonra Rusiya, Azərbaycanın daxili siyasi vəziyyətinə baxmayaraq, stansiyadan istifadəni davam etdirib.
   Qəbələ RLS-nin icarə müddəti 2012-ci ildə bitir. Bu baxımdan bir sıra rusiyalı ekspertlər, hətta rəsmilər bildirirdi ki, texniki baxımdan bu müddətdən sonra Moskvanın stansiyaya elə bir ehtiyacı olmayacaq. Ölkənin Müdafiə Nazirliyi hələ əvvəllər bəyan etmişdi ki, Moskva üçün prioritet öz ərazisində radiolokasiya stansiyalarının tikilməsidir. Son bir neçə ildə Moskva bir neçə belə stansiya tikib və onlardan sonuncusu-Şimali Qafqazda yerləşən Armavir RLS artıq istifadəyə verilib. Ancaq mətbuat və ekspertlərə görə, Qəbələ Moskva üçün siyasi məna daşıyır və o, ABŞ-la siyasi alverdə çox vacib bir məqam ola bilər. Ekspert Aleksandr Qriqoryevə görə, Qəbələ RLS-nə bağlı müəyyən suallar olsa da, Obama hökuməti hələ öz birmənalı cavabını verməyib: "Avropadakı raket əleyhinə sistemin taleyi məlum deyil. Bu çox bahalı layihədir.
   Bu səbəbdən Qəbələ stansiyasına üstünlük vermək məsələsi gündəmdən düşməyib". Moskvalı ekspert Aleksey Vlasov da Rusiyanın Qəbələyə marağını ABŞ-la bağlayır: "Rusiya raket əleyhinə sistemlə bağlı ABŞ-la danışıqların davam etdirilməsi istiqamətində iş aparır. Bu arada bir çox şərhlərə görə, ABŞ-la birgə sistem qurulsa da, qurulmasa da Rusiya Azərbaycanda maksimum şəkildə öz təmsilçiliyini saxlamağa çalışacaq. Çünki Azərbaycanda bir çox ölkələrin geosiyasi maraqları kəsişir və Qafqaz hələ uzun illər planetin ən fəal diplomatik nöqtələrindən biri olaraq qalacaq".
   

"Erməni tərəfi həmsədrlərin təklif etdiyi Madrid prinsiplərini qəbul edirsə, bu imkan yaradır ki, Azərbaycanla Ermənistan arasında böyük sülh sazişi üzərində işlənsin".
   APA-nın xəbərinə görə, bunu Azərbaycanın xarici işlər naziri Elmar Məmmədyarov deyib.
   "Azərbaycan tərəfi ATƏT-in Minsk Qrupu həmsədrlərinin Madrid təkliflərinin yenilənmiş variantını qəbul edirmi" sualına cavab olaraq nazir bildirib ki, Azərbaycan sənəddəki bəzi məqamları qəbul edib: "Amma bir sıra məqamlar var ki, onun üzərində işləmək lazımdır".
   "Dağlıq Qarabağ tərəfi danışıqlar prosesində iştirak edə bilərmi" sualına cavab olaraq isə E.Məmmədyarov bunları deyib: "Ermənistan Madrid prinsiplərini qəbul edirsə və böyük sülh sazişi üzərində işlənməyə başlansa, o zaman əlbəttə ki, həm azərbaycanlı, həm erməni icması danışıqlarda iştirak edə bilər. İndiki mərhələdə isə danışıqlarda ancaq Ermənistan və Azərbaycan tərəfi iştirak edir"
   Nazir onu da bildirib ki, Dağlıq Qarabağın statusu ilə bağlı referendum olacaqsa, bu, Azərbaycan Konstitusiyasına uyğun olaraq bütün ölkə ərazisində keçirilməlidir.
   "Dağlıq Qarabağın statusu nə vaxt müəyyən olunacaq" sualına cavab olaraq isə E.Məmmədyarov əvvəlcə azərbaycanlı icmasının Dağlıq Qarabağa qayıtmalı olduğunu vurğulayıb: "Azərbaycanlılar ermənilərlə bir yerdə yaşamalıdır, yalnız ondan sonra statusu müəyyən etmək olar. Amma statusun necə olacağını danışıqlar müəyyənləşdirəcək. Bu uzun bir prosesdir. Bunu bir gün ərzində müəyyən etmək olmaz. Yəni erməni tərəfi razılığa gəlsə, azərbaycanlı icması Dağlıq Qarabağa qayıtsa, ola bilər ki, hansısa xüsusi komitə çərçivəsində bütün bu suallara cavab tapa bilək".
   

"Azərbaycanın nüvə təhlükəsizliyi mövzusunda Vaşinqtonda keçiriləcək sammitdə iştirakına ehtiyac yoxdur".
   APA-nın məlumatına görə, bu sözləri Azərbaycanın xarici işlər naziri Elmar Məmmədyarov deyib. E.Məmmədyarov bildirib ki, Azərbaycan nüvə silahına malik deyil və bunu planlaşdırmır: "Azərbaycanda nüvə silahı yoxdur və gələcəkdə yaradılması da planlaşdırılmır. Bu səbəbdən Azərbaycanın nüvə təhlükəsizliyi sammitində iştirakına ehtiyac yoxdur". Qeyd edək ki, sammit aprelin 12-də Vaşinqtonda keçiriləcək. Sammitdə Gürcüstan və Ermənistan da iştirak edəcək.
   

Türkiyə və ABŞ on illərlə tərəfdaş olub və bu tərəfdaşlıq indi həmişəkindən daha vacibdir. APA-nın Vaşinqton müxbirinin məlumatına görə, bunu ABŞ dövlət katibinin Avropa və Avrasiya məsələləri üzrə köməkçisi Filip Qordon Brukinqz İnstitutunda Obama administrasiyasının Türkiyə ilə əlaqələri barədə danışarkən bildirib.
   "Biz hesab edirik ki, Türkiyə Avro-Atlantik məkandadır və orada möhkəmlənmək istəyir. Buna baxmayaraq, bəziləri bizim əlaqələrin gücünə şübhə edir. Biz sovet təhlükəsilə üzləşəndə bu münasibətləri ayırd etmək daha asan idi, indi bu hər iki tərəfdən gərgin iş və diqqət tələb edir" - deyə F.Qordon vurğulayıb və təxminən bir il əvvəl Prezident Obamanın Türkiyəyə səfər etdiyini xatırladıb.
   F.Qordonun sözlərinə görə, az-az ölkələr bu cür müxtəlif sahələrdə həlledici rol oynayır. "Neçə ölkə Türkiyə ilə həmsərhəddir - Yunanıstan, Bolqarıstan, Gürcüstan, Ermənistan, Azərbaycan, İran, İraq və Suriya. Strateji, iqtisadi və mədəni əlaqələrlə yanaşı, Türkiyənin təsir dairəsinə hər iki ölkəni narahat edən Yaxın Şərqdə sabitlik və geniş İslam dünyası ilə əlaqələr, Qafqaz və Qara dəniz regionu ilə əlaqələr, Xəzər hövzəsindən Avropaya enerji tranziti, İraq, Əfqanıstan və Pakistanda təhlükəsizlik və inkişaf, Avropa və Transatlantik alyansla möhkəm əlaqələrin qurulması daxildir" - deyə o bildirib. Diplomatın sözlərinə görə, Türkiyə artıq Avropaya enerji tranzitinin mərkəzi kimi həlledici rol oynayır. "2006-cı ildə işə düşən Bakı-Tiflis-Ceyhan əsas ixrac boru kəməri vasitəsilə gündə bir milyon barel neft daşınır və 2007-ci ildə Cənubi Qafqaz boru kəməri vasitəsilə Azərbaycandan Türkiyəyə təbii qaz nəqli başlandı. Bütün bu müxtəlif layihələr və gələcək təşəbbüslər göstərir ki, Türkiyə Avropanın enerji ehtiyaclarını ödəməkdə və Avropanın enerji təhlükəsizliyini təmin etməkdə əsas rol oynayacaq", - deyə F.Qordon qeyd edib.
   ABŞ rəsmisinin fikrincə, nə qədər ki, Türkiyə dünya arenasında Avropa gücü kimi aktiv rol oynayacaq, o eyni zamanda yaxın qonşuları ilə də fəal şəkildə əlaqə saxlayacaq. "Biz Türkiyə hökumətinin qonşularla "sıfır problem" siyasətini yürütmək konsepsiyasını dəstəkləyirik. Bu nəcib bir məqsəddir. Bunu reallaşdırmaq çətin güzəştlər və cəsur rəhbərlik tələb edir" - deyə diplomat vurğulayıb.
   F.Qordon xatırladıb ki, Türkiyə Ermənistanla münasibətləri normallaşdırmaq üçün fəaliyyəti ümidvericidir lakin eyni zamanda işin çətinliyindən xəbər verir.
   "Bu, regionda müsbətə doğru dəyişiklikdən xəbər verir. Hər iki ölkə tərəfindən indiyədək atılan addımlar istək və cəsarəti tərənnüm edib. Keçən ilin oktyabr ayında dövlət katibi Hillari Klintonun, Fransa, Rusiya və İsveçrənin xarici işlər nazirlərinin, eləcə də Avropa Birliyinin Ali Nümayəndəsinin iştirakı ilə Türkiyə və Ermənistan xarici işlər nazirləri iki ölkə arasında münasibətlərin normallaşması və inkişafı ilə bağlı protokollar imzaladı. Biz inanırıq ki, diplomatik əlaqələrin qurulması və sərhədlərin açılmasına aparan bu protokolların yerinə yetirilməsi hər iki ölkənin mənafeyinə xidmət edəcək və bütün regionda təhlükəsizliyə və iqtisadi inkişafa töhfə verəcək tarixi hadisə olacaq. Biz indiyədək göstərilən səyləri alqışlayır və prezident Obamanın da iki həftə əvvəl prezident Güllə telefonda danışarkən qeyd etdiyi kimi, hər iki ölkəni protokolları heç bir şərt irəli sürmədən mümkün qədər tez ratifikasiya etməyə çağırırıq. Gəlin artıq əldə edilmiş tarixi irəliləyişi hədərə verməyək. Protokolların ratifikasiyası həm Türkiyə həm də Ermənistan üçün olduqca faydalı olacaq. Bu prosesdə əməyi olan hər bir kəs bunun irəliyə aparılması üçün səylərini əsirgəməməlidir" - deyə ABŞ rəsmisi bildirib. Dövlət katibinin müavini bu yaxınlarda ABŞ Konqresi Nümayəndələr Palatasının xarici əlaqələr komitəsində qəbul edilən qətnaməyə də toxunub. "Prezident Obama deyib ki, biz 1915-ci il hadisələrilə bağlı faktlara tam, səmimi və ədalətli qiymətin verilməsində maraqlıyıq. Lakin biz inanırıq ki, erməni və türk xalqlarının özlərinin bu tarixə birgə sülh və inkişafın gələcəyini qurmaq səylərinin bir hissəsi kimi yanaşmaları ən yaxşı yoldur. Həm dövlət katibi Hillari Klintonun, həm də müdafiə naziri Robert Qeytsin qeyd etdiyi kimi, Konqresin gələcək fəaliyyəti münasibətlərin normallaşması prosesinə maneə ola bilər və buna görə də biz bu qətnaməyə qarşıyıq" - deyə F.Qordon fikrini yekunlaşdırıb.

Məlum olduğu kimi, martın 17-də prezident İlham Əliyev Novruz bayramı münasibətilə Əfv Komissiyasının tərtib etdiyi siyahı üzrə 72 məhbusun əfv olunmasına dair sərəncam imzalayıb. Sərəncam, prezidentə ünvanlanmış əfv haqqında müraciətlərə baxılaraq, məhkumların şəxsiyyəti, səhhəti ailə vəziyyəti, cəza çəkdiyi müddətdə davranışı nəzərə alınaraq verilib.
   Həmçinin, sərəncam humanizm prinsiplərinə əsaslanaraq və konstitusiyanın 109-cu maddəsinin 22-ci bəndi rəhbər tutularaq imzalanıb.
   Maraqlıdır, hüquq müdafiəçiləri sözügedən sərəncamı necə qiymətləndirir? Məsələ ilə bağlı bir neçə hüquq müdafiəçisinin fikirlərini öyrəndik. Dilarə Əliyeva adına Qadın Hüquqlarını Müdafiə Cəmiyyətinin sədri Novella Cəfəroğlu imzalanan sərəncamı prezidentin humanist addımı kimi dəyərləndirdi: "Xüsusən də siyahıda Qənimət Zahidovun olması bizi çox qane edir.
   Çünki Q.Zahidovun çıxması çox vacib idi. Bu həm də Azərbaycan və dövlətçilik üçün çox vacib idi. Hesab edirəm ki, bu prezidentin humanist addımıdır və inşallah sonrakı aylarda bloggerləri, Eynulla Fətullayevi, həmçinin, digər siyasi məhbusları əfv edəcək. Biz çox istərdik ki, Ruslan Bəşirli, Müşfiq Mədətov da əfv olunsun. Deməyim odur ki, türmədə xəstə məhbuslar çoxdur. Mənə elə gəlir ki, sonrakı mərhələdə hamısını bir-bir buraxacaqlar".
   Digər hüquq müdafiəçisi Səadət Bənənyarlı da Novruz bayramı ərəfəsində imzalanan əfv sərəncamını yüksək qiymətləndirdi: "Bu bizi çox sevindirdi. O mənada ki, xeyli məhbus azadlığa qovuşdu.
   O cümlədən də siyasi məhbus kateqoriyasına şamil olunan bir neçə məhbus azadlığa çıxıb. İnsan Haqlarına dair Monitorinq Qrupunun siyahısından 2 nəfər azadlığa çıxıb. Bunlardan biri Qənimət Zahidovdur, digəri isə Novruzov soyadlı "OMON"-çudur. Ümumiyyətlə, Q.Zahidovun əfv olunmasını çox yüksək qiymətləndiririk. Onu da qeyd edim ki, biz hüquq müdafiəçiləri olaraq ölkə başçısına müraciət göndərmişdik. Müraciətimizdə prezidentdən, humanistlik göstərərək, bir sıra xəstə məhbusların, jurnalistlərin, bloggerlərin azadlığa çıxmasını istəmişdik.
   Ümid edirik ki, sözügedən əfv fərmanları davam edəcək və digər siyasi məhbuslar da azadlığa qovuşacaq". Əmək Hüquqlarını Müdafiə Liqasının sədri Sahib Məmmədov da bunu humanist addım kimi dəyərləndirdi: "Digər tərəfdən, çox istərdik ki, əfv siyahısına daha çox məhbus düşsün.
   Eləsi var müraciət etməyib, eləsi var çatdıra bilməyib və eləsi də var ki, müraciəti nəzərə alınmayıb. Ancaq bütün hallarda, bayramqabağı əfvin imzalanması çox müsbət addımdır. Əfv olunanlar arasında bir çox vərəmli xəstələrin olması çox müsbət haldır".
   

Məlum olduğu kimi, Türkiyənin baş naziri Rəcəb Tayyib Ərdoğan Londona səfəri zamanı bəyan edib ki, lazım olsa, ölkəsində qeyri-leqal yaşayan 100 min erməninin çıxarılması məsələsinə baxıla bilər. Ərdoğanın bu açıqlaması ermənilər arasında böyük təşvişə səbəb olub. Xüsusən də Ermənistan rəsmiləri bundan çox narahatdır.
   Məsələ ondadır ki, Ermənistanın iqtisadi cəhətdən vəziyyəti çox acınacaqlıdır. Qeyri-leqal yaşayan ermənilərin Türkiyədən çıxarılması isə Ermənistanda Serj Sarkisyan rejiminə qarşı narazıların daha da artmasına səbəb olacaq. Bu da, heç şübhəsiz, Sarkisyanın başını bərk ağrıdacaq.
   Baş verənlərin fonunda diqqətçəkən məqam həm də ondan ibarətdir ki, bu kimi məsələlər Qarabağla bağlı gedən danışıqların dalana dirənməsinə əlavə təkan verir. Daha doğrusu, sözügedən məsələ ilə bağlı konstruktiv mövqe nümayiş etdirməyən Ermənistanın bu kimi məsələlərdən ustalıqla bəhanə olaraq istifadə edəcəyi şübhəsizdir. Bəs politoloqlar necə düşünür?
   Məsələyə münasibət bildirən politoloq Fuad Muxtarov baş verənlərin danışıqlar prosesinə mənfi təsir edəcəyini istisna etmir: "Bu proseslərin Qarabağ probleminin həllinə təsiri olacaq: ya dolayısı ilə, ya da birbaşa. Çünki erməni lobbisi qondarma soyqırım məsələsini Avropa ölkələrinin parlamentlərində qaldırmaqla, bir növ, Serj Sarkisyana təsir edir. Ona görə ki, S.Sarkisyan erməni lobbisi və daşnaklarla müqayisədə daha konstruktiv mövqe sərgiləyir. Digər tərəfdən, gedən proseslər onu göstərir ki, erməni tərəfi çoxşaxəli və mürəkkəb oyun oynayır. Bu minvalla həm Ermənistanda gedən daxili proseslərə təsir etmək, həm də Türkiyəni dolayısı ilə qəzəbləndirib, həmin protokolların gündəmdən çıxarılmasına nail olmaq istəyirlər. Zahirən baxanda, Türkiyə qondarma soyqırım məsələsinin dünya ölkələrinin parlamentlərinə çıxarılmasının qarşısını almaqda aciz görünür. Ona görə də Türkiyə əlacsız qalıb əlində olan faktorları qabartmağa çalışır. Bununla Türkiyə hakimiyyəti açıq şəkildə bildirir ki, Ermənistan bir az da irəli getsə, həmin rıçaqlar işə salınacaq. Ancaq onu da qeyd edim ki, inanmıram Türkiyə qeyri-leqal yaşayan erməniləri ölkədən çıxarsın. O zaman Türkiyə daha çox təzyiqə və qınağa məruz qalacaq. Ona görə də Türkiyə daxilində demokratik dəyərləri genişləndirib qorumaqla digər siyasi qüvvələrlə arxa cəbhəsini möhkəmləndirməlidir. Bununla xaricdən gələn zərbələrin, təzyiqlərin, vahid cəbhə olaraq, qarşısının alınmasında mühüm rol oynayacaq. Onu da qeyd edim ki, Türkiyəyə edilən təzyiqlər həm Avropa Birliyinə, həm ABŞ-a və həm də digər ölkələrə sərfəlidir. Bununla həmin ölkələr Türkiyədən istədiyi güzəştləri qoparmaq istəyir.
   Ermənilər elə hiyləgərdir ki, Türkiyədə qeyri-leqal yaşayan ermənilərin çıxarılması fonunda nəinki Qarabağ danışıqlarında dirənəcəklər, eyni zamanda digər tələblərlə də çıxış edəcəklər. Belə ki, bu məsələni insan haqları ilə bağlayıb bağıracaqlar ki, nə üçün Rusiya 100 minlərlə azərbaycanlını, gürcünü ölkəsindən çıxarmır? Bütün bunların hamısı son nəticədə 2 məsələyə hesablanıb: Birincisi, Dağlıq Qarabağ probleminin həllinə nə qədər mümkündürsə, mane olmaq. İkincisi də Türkiyə-Ermənistan arasında əlaqələrin iqtisadi inkişafı fonunda öz bildiklərini etmək. Çünki Ermənistan iqtisadiyyatı bərbad durumdadır".
   Politoloq Eldar Namazovun fikrincə, sözügedən proseslərin hamısı bir-birilə bağlıdır və bunları ayrı təsəvvür etmək düzgün deyil: "Həm erməni-türk münasibətləri, həm də Qarabağ problemi bir-birilə sıx bağlıdır, ya hər iki sahədə ciddi irəliləyişlər olacaq və hər iki problemi həll etmək mümkün olacaq. Ya da bu məsələlərin heç birində hansısa irəliləyiş olmayacaq və vəziyyət daha da gərginləşəcək. Əvvəllər erməni tərəfi və bəzi beynəlxalq təşkilatlar ümid edirdi ki, Qarabağ problemi həll olunmadan da Ermənistanla Türkiyə arasında münasibətləri bərpa etmək mümkündür. Artıt onlar yanıldıqlarını başa düşməyə başlayıblar. Yəni ya bu iki məsələ həl olunmalıdır, ya da həllolunmaz olaraq qalacaq".
   

Qaynar.info saytının xəbərinə görə, Amerika Milli Təhsil Nazirliyinin "Vaşinqton Post" şirkətinin ən mühüm maliyyə mənbəyi olan "Kaplan" təhsil müəssisələrinə qarşı istintaq başlanıb.
   İstintaqa səbəb isə həmin müəssisənin hesabatlarındakı uyğunsuzluğun sübuta yetirilməsidir. Bu barədə ABŞ-ın həftəlik iqtisadi qəzeti "Barrons" xəbər yayıb. Həmin müəssisədə təhqiqat işləri keçən ilin sentyabrından aparılır. Hesabatdakı bu uyğunsuzluq hətta şirkətin payçı və sərmayəçilərini belə yanıldacaq dərəcədədir. "Barrons" qəzeti xəbərlər səhifəsində təhqiqat barədə bir sətir belə yazmaması ilə bağlı olaraq "Vaşinqton Post"un ünvanına göndərdiyi "Qəzet "Vaşinqton Post"un iqtisadiyyatla bağlı səhifəsində bu cür əhəmiyyətli məsələni görməyə bilər, amma "Vaşinqton Post" şirkətinin payçıları və sərmayəçilərinin bunu görmək istəyində olduğu istisna deyil" ismarıcı ilə bütün diqqəti özünə çəkib. Mərkəzi Floridada yerləşən "Kaplan" təhsil müəssisələri "Vaşinqton Post" şirkətinin əsas maliyyə mənbəyi sayılır. Dünya miqyasında həm şəbəkə, həm də internet vasitəsilə hazırlıq kursları, peşə, ingilis dili kursları və universitet təhsili verən "Kaplan İnc" "Vaşinqton Post" şirkətinin illik 5 milyard dollar olan bütün gəlirinin yarıdan çoxunu təmin edir. Başqa ölkələrdə buna bənzər tədqiqatlara çox həssas yanaşan ABŞ media orqanlarının "Vaşinqton Post" şirkətinin maliyyə mənbələrilə bağlı təhqiqatla əlaqədar sakit durması diqqəti cəlb edən nüanslardandır. Digər tərəfdən, "Vaşinqton Post" qəzetinin son bir həftədə Ağ Evin baş katibi Rahm Emanuel barəsində yaydığı xəbərlərlə ABŞ mediasında "Emanuel Obamaya faydamı verir, ziyanmı?" qalmaqalını yaratması da diqqət çəkən məqamlardandır. Nyu-Yorklu jurnalist Klifford Bryan "Vaşinqton Post"un Emanuel ətrafında yaratdığı fırtınanın "həm əsas maliyyə mənbəyilə əlaqədar qalmaqaldan yayındırmaq, həm də Ağ Evin diqqətini öz problemlərinə yönəldən "qaz bombası" olduğunu iddia edib. "Vaşinqton Post"dakı şərhçilər "Obamanın uğursuzluqlarının Emanuelə görə deyil, əksinə, onun məsləhətlərinə tam olaraq qulaq asmadığı üçün baş verdiyini" düşünür. Bir həftə ərzində qəzetin Emanuellə bağlı məsələyə geniş yer ayırması media dairələrində qəribə qarşılandığından, "Vaşinqton Post"un oxucu nümayəndəsi Andrey Aleksanderin "Son vaxtlar üst-üstə gələn xəbərlərin qəzetin şüurlu şəkildə keçirdiyi bir kampaniya olmadığı, xəbər mərkəzinin böyüklüyü və dağınıqlığı səbəbindən irəli gələn təsadüflər olduğu" şəklində yazdığı yazı da bu qalmaqalı azaltmaqdansa, daha da artırdı.