Son illər xaricdə yaşayan azərbaycanlıların diaspor fəaliyyətində xeyli irəliləyişlər əldə olunub. Onlar Azərbaycanın maraqlarını uğurla təmsil edir. Bu istiqamətdə Çeçenistanda fəaliyyət göstərən türkdilli və Azərbaycan diaspor təşkilatlarının da xidmətləri böyükdür. Belə təşkilatlardan biri Qroznıda fəaliyyət göstərən "Türkdilli Xalqların Mədəniyyət Mərkəzi" adlı Çeçenistan Respubliakasının Regional İctimai Xeyriyyə Cəmiyyətidir. Sözügedən cəmiyyət burada yaşayan türkdilli xalqların tarixinin, mənəvi sərvətlərinin qorunub-saxlanması istiqamətində, hər bir şəxsin hüquq və azadlığının təmin edilməsinə yardım sahəsində özünəməxsus xidmətlər göstərib. Mərkəzin rəhbəri milliyyətçə çeçen olan Həmzət Qastamirovdur. Onun müavini isə azərbaycanlı Mahir Hənifəsoydur. O, həm də buradakı Azərbaycan diasporunun rəhbəridir. Həmzət Qastamirov 1975-ci ildə anadan olub. Ali təhsili İstanbulda alıb. Bir müddət Türkiyə səfirliyində təbliğat və din üzrə köməkçi vəzifəsində çalışıb. Hazırda ictimai fəaliyyətlə məşğuldur, Şimali Qafqazın Türkdilli Xalqların Mədəni Mərkəzinin şura sədridir. Mahir isə Naxçıvanda anadan olub. Xeyli müddətdir Rusiyada yaşayır, ali təhsili də burada alıb. 2001-ci ildə Həmzət bəylə tanış olub, o gündən bir yerdə fəaliyyət göstərirlər. Bu günlərdə onlar Bakıda səfərdədir. Səfərdə məqsəd əlaqələrin daha da genişlənməsinə nail olmaqdır. Dünən onlar redaksiyamızda oldular. Bizimlə söhbətdə bu iki şəxs təşkilatın məqsəd və məramları, görülən və görüləcək işlər barədə məlumat verdilər.
   - Maraqlıdır, milliyyətcə türk olmayan bir şəxs, necə oldu ki, belə bir mərkəzə rəhbər seçildi?
   Həmzət Qastamirov:
   - Bu maraqlı təklif Azərbaycan tərəfindən gəlmişdi. Mənim öz təşəbbüsüm olsaydı, bunu heç kimə başa sala bilməyəcəkdim. Təklif Azərbaycan, konkret olaraq Xaricdə Yaşayan Azərbaycanlılarla İş üzrə Dövlət Komitəsinin sədri Nazim İbrahimovun gəldi.
   - Səhv etmirəmsə, siz Məshədovun hakimiyyəti dönəmində də vəzifədə işləmisiz, xarici işlər nazirinin müavini olmusunuz. O dövrdəki vəzifə ilə indiki hakimiyyət dönəmindəki vəzifəni bir-birilə necə əlaqələndirə bilirsiniz? Bu Sizə çətinlik yaratır ki?
   - Hər bir dövlətdə hakim qüvvə var. Hakim qüvvə isə hansısa bir məmur vəzifəsilə bağlı deyil. Onlara çox sağ ol deyirəm ki, mənim intellektimdən bu və ya digər qurumun mənafeyi naminə istifadə ediblər. İşləmək üçün müraciət etmişdilər. Türk və Azərbaycan dillərini gözəl bilirəm. Azərbaycan regionun lideridir. Bizim böyük qardaşımızın azərbaycanlılar olduğunu nəzərə alsaq, onun regionda rolunu qiymətləndirməmək qeyri-mümkündür. Görünür, mənim təhsilim və intellektim hansısa quruma lazım olduğundan, hər iki dönəmdə işləməyə dəvət ediblər. Çeçenistan çox kiçik ölkədir. Burada öz işinin peşəkarı olanları qiymətləndirirlər. Məshədovun dönəmində işləyənlərin əksəriyyəti indi Kadırov zamanında da işləyir. Bununla bağlı üzərimdə hansısa bir çətinlik hiss etməmişəm. Heç bir yerdə heç nə ilə bağlı olmamışam. Hara göndəriblər, orada çalışmışam.
   - Onda mümkünsə o dövrlə indiki dövrü müqayisə edərdiniz...
   - Bugünkü stabillik, sosial müdafiənin təmini, yaşlı insanlara pensiya, uşaqlara müavinətlərin vaxtlı-vaxtında verilməsi, gənc ailələrin dövlətdən pulsuz mənzil alması, insanların açıq fəaliyyət göstərməsi - bütün bunlar inkişafın nəticəsidir. Çeçenistanda 420 yaşayış məskəni var. Hər yaşayış məskənində azı iki məscid fəaliyyət göstərir. Qroznıda 10 min sakini qəbul edə biləcək məscid var. Urus-martan rayonunda isə 5 minlik məscidin tikintisi gedir. Bütün bunlar insanlara qayğının göstəricisidir. İnsan üçün artıq bütün imkanlar yaradılıb. Yaradılan imkanları nədən müdafiə etməyək? Ramzan Kadırovun səyləri sayəsində Çeçenistan və paytaxt Qroznı Fransaya oxşayır. Bunları görməmək qeyri-mümkündür. Xaricilər də gələndə Şimali Qafqazda 49 mərtəbəli binanın, böyük ticarət mərkəzinin tikildiyinə heyran qalır. Bizim səhiyyə Moskva və Sankt-Peterburqdan sonra öz inkişafına görə ölkədə üçüncü yeri tutur. Bütün göstəricilərə görə respublikamız ən mədəni və təhlükəsiz bölgələrdən birinə çevrilib. Bunları görə-görə Ramzan Kadırovu dəstəkləməmək mümkün deyil. Məhsədovun dövründə respublikamızda yaşayan türkdilli xalqları eşitmək belə istəmirdilər. İndi isə onların hamısı üçün mədəni mərkəzlər yaradılıb, öz məktəbləri var. Kadırovun hakimiyyəti dönəmində o qədər xoşbəxt yaşayırıq ki, Məhsədov dövrünü xatırlamaq belə istəmirsən.
   Mahir Hənifəsoy:
   - Yerli xalqın bizə münasibətində o dövrlə bu dövr arasında elə bir fərq görmürəm. Çeçen millətinin bizə olan səmimiyyəti Məhsədovun dövründə də, indi də eynidir. Çeçenlərin bizlərə münasibətindən tam razıyam. İndi daha rahat və əminamanlıqda yaşayırıq. Ramzan Kadırov bizim millət üçün də böyük səylər göstərib. Həmzət Qastamirovun da orada yaşayan azərbaycanlıların bir yerə toplanmasında böyük xidmətləri olub. Keçən il Novruz bayramını məhz o təntənəli şəkildə təşkil etmişdi. Əlaqələrimizin kenişlənməsində yaxın zamanlarda açılacaq Bakı-Qroznı avtobus marşurutunun da böyük rolu olacaq. Çeçenistanda bu gün tam sabitlikdir, bizim təşkilat üçün də geniş imkanlar yaradılıb. Təşkilatımızda hazırda 1764 nəfər təmsil olunur. Hər birilə sıx əlaqəmiz var. Xocalı faciəsi günündə tədbirlər keçiririk".
   - Bütün Qafqazın türkdilli xalqlarının mədəni-dini əlaqələrinin inkişafında Qafqaz Müsəlmanları İdarəsinin sədri, Şeyxülislam Allahşükür Paşazadənin xidmətləri danılmazdır. Siz onun bu rolunu necə dəyərləndirirsiniz?
   Həmzət Qastamirov:
   -Bütün Qafqaz üçün Allahşükür Paşazadə nəinki şeyxülislamdır, o hətta bizim hamımızın ağsaqqalıdır. Hamımız onu qiymətləndirir və hörmət edirik. O, gərgin fəaliyyətdə olmasına baxmayaraq, heç vaxt bizi unutmayıb. Daimi olaraq bizim mədəni mərkəzlə əlaqə saxlayır və himayə edir. Şeyxülislam təkcə dini qurumun deyil, mədəni qurumun fəaliyyətində də bizə geniş yardım əlini uzadıb.
   - Buna baxmayaraq, Rusiyanın tanınan qəzetlərindən olan "İzvestiya"da Qafqaz müsəlmanları ilə bağlı məqalələrdən birində Qafqazın dini rəhbərlərinin adı hallansa da, burada Allahşükür Paşazadənin adına, nədənsə, rast gəlinmir. Halbuki, Çeçenistan rəhbəri Kadırov Şeyxülislamın xidmətlərini dəfələrlə qeyd edib. Sizcə, bu nə ilə bağlıdır?
   - Qəzetlər bəzən belə səhvlərə yol verir. Amma şəxsən mən bir insan kimi Şeyxülislamın böyük təsir gücünə malik olduğunun şahidi olmuşam. Qroznıdakı ən böyük İslam Universitetinin açılışına gələn çoxsaylı xarici qonaqlar arasında şeyxin böyük nüfuz sahibi olduğunu gördüm. O, Ramzan Kadırovla yaxın münasibətdə olduğundan, ona öz yaxın qohumu kimi yanaşırdı.
   - Rəhbərlik etdiyiniz qurumun Xaricdə Yaşayan Azərbaycanlılarla İş üzrə Dövlət Komitəsilə münasibətləri nə səviyyədədir, əlaqələri koordinasiya edirsinizmi?
   - Nazim İbrahimov olmasaydı, diasporumuz belə aktiv işləməzdi. Ona qulaq asaraq şuraya sədr gəlmişəm.
   Mahir Hənifəsoy:
   - Nazim İbrahimovun təşkilatımızın yaranmasında böyük xidmətləri olub. O, əlindən gələn hər bir köməkliyi və böyüklüyü bizdən əsirgəməyib. Əlaqələrimiz çox gözəldir, gözəl cəmiyyətimiz var.
   - Xalqlar arasında əlaqələrin qurulması və möhkəmlənməsində Mədəniyyət və Turizm, habelə Gənclər və İdman nazirlikləri kimi qurumların da böyük xidmətləri var. Azərbaycandakı bu tip nazirliklərlə əlaqələriniz varmı?
   Həmzət Qastamirov:
   - Bizim bütün qurum və nazirliklərlə əlaqələrimiz qeyri-rəsmi şəkildədir. Kim dəvət edir, böyük məmnuniyyətlə orada iştirak edirik.
   - Respublikada yaşayan türkdillilərin ictimai-siyasi həyatda fəaliyyəti nə səviyyədədir? Onlardan parlamentdə, müxtəlif nazirliklərdə təmsil olunan varmı? Ümumiyyətlə, burada nə qədər türkdilli xalq yaşayır?
   - Fəxr edirəm ki, parlamentimizdə 4 nəfər türkdilli deputatımız var. Bir çox nazir müavinləri, yerli adminstrasiya rəhbərləri türkdilli qardaşlarımızdır. Bu o deməkdir ki, biz bir-birimizi tamamlayırıq. Burada 16 min kumık, 11 min noqay, ümumiyyətlə 36 min türkdilli xalqlar yaşayır.
   - Bildiyimiz kimi, təbliğat, prosesində elektron KİV-nin böyük rolu var, bu mənada televiziyalarla əlaqə qurmağın əhəmiyyəti böyükdür. Sizin necə, Azərbaycan televiziyaları ilə əlaqələriniz varmı?
   - Əlbəttə. İlk günlərdən ATV kanalı bizi müdafiə edib. Bundan başqa, ANS və bir sıra digər kanallarla da əlaqə qurmuşuq.
   - Müharibə ilə əlaqədar olaraq xeyli sayda çeçen Bakıda məskunlaşmağa məcbur olub. Bura gələrkən onlarla əlaqə saxlayırsınızmı?
   - Vaxtilə 9 min çeçen burada məskunlaşmışdı. İndi onların sayı azalıb. Bir çoxları Avropaya üz tutub, buna baxmayaraq, Ramzan Kadırovun çağırışından sonra əksəriyyəti geri dönüb. Bakıda olarkən burada yaşayaş çeçenlərlə də imkan daxilində görüşürəm.
   - Bəs ermənilər necə, respublikanızda yaşayır?
   - Sovet dönəmində yaşayıblar. Ermənilər, hər yerdə olduğu kimi, çeçenləri də satıb. Onlar guya bizimlə bir yerdə idi, qardaş idik. Müharibə başlayan kimi isə, son mismara kimi, hamısını özlərilə daşıyaraq Rusiyanın müxtəlif yerlərinə qaçdılar. Ümid edirəm ki, bundan sonra da respublikamızda erməni və onların diasporası olmayacaq.
   - Əldə etdiyimiz məlumata görə, bu ilin aprelində Bakıda Şeyxülislamın və Rusiya patriarxı Kirillin rəhbərliyilə din xadimlərinin beynəlxalq konfransı keçiriləcək. Siz bu tədbirə dəvət edilmisiniz?
   - Mərkəzin nailiyyətləri belə dəvətlərlə qeyd olunur. Rusiyadan təkcə bizim ictimai təşkilat həmin tədbirə dəvətlidir. Şeyxülislam Allahşükür Paşazadənin bizə göstərdiyi qayğıdan qürur duyuram. O, ağsaqqal kimi bizim qayğımıza qalır.
   - Mətbuatın yazdığına görə, orada Sizin aktiv iştirakınızla Heydər Əliyev adına park yaradılır.
   - Bu mənim və müavinimin şəxsi təşəbbüsüdür. Təşəbbüslə çıxış edərkən onun belə müvəffəqiyətlə davam edəcəyini düşünmürdük. Rusiyada və Türkiyədə 8 hektarlıq park ümumiyyətlə yoxdur. Müraciətimizə cavab olaraq, bizə keçmiş İnşaatçılar parkını məsləhət gördülər. Ümid edirəm ki, yaxın zamanda burada Heydər Əliyev adına parkın əsası qoyulacaq. Bizim təşəbbüsümüz və Şeyxülislamla millət vəkili Mehriban Əliyevanın xeyir-duası ilə Bakıdan start götürərək Moskvada başa çatacaq 3 min kilometrlik motoyürüş təşkil etməkdəyik. Motoyürüşün marşrutu boyu müxtəlif yaşayış məntəqələrində türkdilli xalqların mədəniyyəti, tarixi, bədii sərvət nümunələrilə tanışlıq məqsədilə tədbirlərin keçirilməsi nəzərdə tutulub. Respublikamızda Əhməd Kadırova həsr olunan 56 ölkə nümayəndəsinin iştirak etdiyi beynəlxalq konfrans keçirilib. Burada çıxış edərək, milli lider Heydər Əliyevin ideyalarını müdafiə etmək və onun haqqında danışmaq həmin sammitin böyük uğuru idi. Bu çıxış burada iştirak edənləri şoka saldı.
   Mahir Hənifəsoy:
   - Azərbaycanın hazırkı prezidenti İlham Əliyevin də bizim diasporumuza böyük dəstəyi olub.
   Qroznıda Heydər Əliyev adına park salmaq bizim ideyamızdır. Sevinirik ki, çeçen tərəfi də həmin məsələyə razılıq verib. Onu da qeyd edim ki, həmin parkın tikintisində Heydər Əliyev Fondunun rolu böyükdür. Ramzan Kadırov da bizə böyük dəstək verir. Münasibətlərin güclü olmasında Şeyxülislam Allahşükür Paşazadənin də xidmətləri danılmazdır.
   

Bilindiyi kimi, son günlərdə bəzi məhkəmələrin fəaliyyəti ölkənin rəsmi dairələrində ciddi narazılıq doğurub. Xüsusən də hakimlər tərəfindən qanunsuz olaraq həbs qərarlarının çıxarılması daha qabarıq şəkildə gündəmə gəlib. Məsələyə yenidən münasibət bildirən Məhkəmə-Hüquq Şurasının sədri, ədliyyə naziri Fikrət Məmmədov "İnterfaks-Azərbaycan" agentliyinə müsahibəsində belə hallardan yayınmaq üçün ilk olaraq bəzi qanunvericilik aktlarına toxunub:
   "İnsan hüquqları üzrə vacib beynəlxalq sənədlər, həmçinin Avropa İnsan Hüquqları Konvensiyası, habelə Avropa Məhkəməsinin presedentləri, Avropa Şurasının Nazirlər Komitəsinin tövsiyələri bu məsələyə diqqətli yanaşmanın vacibliyindən xəbər verir.
   Beləliklə də Nazirlər Komitəsinin "Məhkəməyə qədər həbsə alınma haqqında" R (80) 11 saylı Tövsiyəsində qeyd edilir: "Günahı sübut olunmayana qədər günahsız hesab edilərək, cinayət törətməkdə təqsirləndirilən heç bir şəxs ciddi zəruri əsaslar olmadıqda məhkəməyə qədər həbsə alına bilməz. Buna görə də ciddi qətimkan tədbiri olaraq məhkəməyə qədər həbsə alınma tədbirinə müstəsna tədbir kimi baxılmalıdır və o heç zaman mütləq olmamalı və cəza məqsədləri üçün istifadə edilməməlidir".
   Digər "Həbsxanaların həddindən artıq dolması və həbsdə olan insanların sayının artması problemi barədə" (99) 22 saylı Tövsiyə ilkin həbsə alınmanın və ədalət məhkəməsinin maraqlarına uyğun olaraq onun müddətinin minimuma qədər azaldılmasının tətbiqini tələb edir və ölkəni tərk etməmə barədə iltizam, ölkəni tərk etmənin və ölkəni xüsusi icazə olmadan tərk etmənin məhdudlaşdırılması, girov qoymaqla azadlığa buraxılma, habelə məhkəmənin verdiyi səlahiyyətlə orqan tərəfindən nəzarət kimi alternativ təsiretmə tədbirlərinin son dərəcə geniş istifadə edilməsini tövsiyə edir. Bununla əlaqədar olaraq konkret yerdə olma ərzində elektron nəzarət qurğularından istifadə imkanlarının araşdırılması təklif edilir.
   Biz bu yaxınlarda bu məsələni ətraflı araşdırdıq. Ölkənin Ali Məhkəmə plenumu xüsusi sessiyasını bu problemin müzakirəsinə həsr edib. Lakin təssüf ki, burada qanun pozuntuları aşkarlanıb. Bununla əlaqədar olaraq Məhkəmə-Hüquq Şurası tərəfindən inzibati icraata başlanıb. Müəyyən edilib ki, bəzi hakimlər effektiv məhkəmə nəzarəti həyata keçirməyib, insan hüquqlarına diqqətli münasibət əvəzinə qanunun elementar tələblərini nəzərə almadan, əsassız olaraq cəza qismində həbs qətimkan tədbiri seçiblər". Onun sözlərinə görə, belə hallara laqeyd yanaşmaq olmaz: "Çünki Məhkəmə-Hüquq Şurası insan hüquqlarını kobudcasına pozan 3 hakimin səlahiyyətlərinə vaxtından əvvəl xitam verilməsi barədə qərar qəbul edərək, bu barədə ölkə prezidenti üçün təqdimat hazırlayıb. Qeyd etmək istəyirəm ki, bu məsələ təkcə MDB məkanında deyil, Avropanın ən inkişaf etmiş ölkələrində də indiyədək aktualdır. Məsələn, Norveçdə həbsxanaların və xüsusilə də istintaq təcridxanaların həddindən artıq dolması problemi mövcuddur. Bu barədə bizə 2010-cu il fevralın əvvəlində Azərbaycana səfər edən Norveçin ədliyyə və polis naziri söyləyib. Biz onunla bir sıra məsələləri, həmçinin alternativ tədbirlərin, probasiya institutu və elektron izlənmənin tətbiqini müzakirə etmişik, bu sahədə əməkdaşlıq barədə razılığa gəlmişik".
   Azərbaycanda hakimlərin məsuliyyətə cəlb edilməsi prosesinin necəliyinə gəlincə, nazir bildirib: "Əvvəllər hakimlərin inzibati məsuliyyətə cəlb edilməsi Ali Məhkəmənin İnzibati Kollegiyası tərəfindən həyata keçirilirdi. Belə səlahiyyətlərin bilavasitə ali instansiya məhkəməsi tərəfindən həyata keçirilməsi, əlbəttə, korporativ münasibətlərin yaranmasına və inzibati tədbirlərin effektivliyinin azalmasına səbəb olub. Bununla əlaqədar olaraq hakimlərin məsuliyyətə cəlb edilməsi proseduruna yenidən baxılıb və bu funksiya Məhkəmə-Hüquq Şurasının müstəsna səlahiyyətlərinə verilib. Hakimlər barəsində inzibati icraatın başlanmasına dair müraciət hüququna malik subyektlər, dairəsi genişlənib. Bu səlahiyyətlər Ali Məhkəmə sədri və ədliyyə nazirilə yanaşı, apelyasiya məhkəmələrinin sədrlərinə də verilib, fiziki və hüquqi şəxslərin korrupsiya ilə əlaqədar olaraq qanun pozuntularına yol verilməsi barədə Şuraya müraciət hüququ təsbit edilib.
   Bu prosedurların hazırlanması zamanı məhkəmə hakimiyyətinin müstəqilliyinin təmin edilməsinə xüsusi diqqət yetirilib. Beləliklə də hakimlərin barəsində inzibati icraatın başlanmasına dair kifayət qədər əsas olduqda, Məhkəmə-Hüquq Şurası müvafiq qərar çıxarır. İnzibati icraat üzrə faktların araşdırılması isə yalnız hakim olan Məhkəmə-Hüquq Şurasının üzvü tərəfindən aparılır. Üç aya qədər davam edə bilən belə araşdırma zamanı barəsində inzibati icraat başlanan hakim bütün materiallarla tanış olur, öz izahatlarını verir və Şuranın iclasına müfəssəl məruzə hazırlanır. Məhkəmə-Hüquq Şurasının iclasında barəsində inzibati icraat məsələsinə baxılan hakimin onun seçdiyi vəkil və ya Şura üzvlərinin seçiminə əsasən həmkarı olan hakim tərəfindən müdafiə edilməsi hüququ var. Səsvermədə yalnız Şura üzvləri olan hakimlər iştirak edə bilər".
   Nazir bildirir ki, qəbul edilmiş qərar barəsində Ali Məhkəmə plenumuna şikayət verilmə hüququ təsbit olunur: "Bu çox vacib və mütərəqqidir, çünki bir çox Avropa ölkələrində ümumiyyətlə şikayət verilmə hüququ yoxdur. Bütün bunlar inzibati icraat prosedurunun obyektivliyi üçün əlavə şəraitlər yaradır.
   Eyni zamanda qeyd etmək lazımdır ki, hakimlərin barəsində başlanan inzibati icraatlar həmişə cəzalandırılma ilə bitmir. Hakimin fəaliyyətində onun məsuliyyətə cəlb edilməsi üçün əsas olan pozuntu faktları aşkarlanmırsa, icraat dayandırılır".
   

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu yanvarın 19-da elan etdiyi KİV-lərin və jurnalist təşkilatlarının layihələrinin maliyyələşdirilməsilə bağlı müsabiqənin nəticələrini açıqlayıb.
   Fonddan APA-ya verilən məlumata görə, müsabiqəyə 46 layihə daxil olub, ekspertlərin qiymətləndirilməsindən sonra 28 layihə qalib hesab edilib. Bunlardan 14-ü qəzet redaksiyası, 5-i informasiya agentliyi, 9-u isə jurnalist təşkilatıdır. Layihəsi qalib elan olunan KİV-lər və jurnalist təşkilatları aşağıdakılardır:
   1. Azərbaycan Müstəqil Jurnalistlər Liqası
   2. "Jurnalist Araşdırmaları Mərkəzi" İctimai Birliyi
   3. "Zərdabi Mətbuat Mərkəzi" İctimai Birliyi
   4. "Səs" qəzeti
   5. "RUH" Azərbaycan Jurnalistləri Müdafiə Komitəsi
   6. "Olaylar" qəzeti
   7. "Paritet" qəzeti
   8. "ASSA-İradə" Azərbaycan Beynəlxalq Müstəqil Xəbər Agentliyi
   9. "Yeni Müsavat" qəzeti
   10. "The First News" İnformasiya Agentliyi
   11. "Azadlıq" qəzeti
   12. "Bakı-Xəbər" qəzeti
   13. "Azad Azərbaycan" qəzeti
   14. Jurnalistlərin Həmkarlar İttifaqı
   15. Azərbaycan Jurnalistlər Birliyi
   16. "Azərbaycan Mətbuat Şurası" İctimai Birliyi
   17. Müstəqil Araşdırmaçı Jurnalistlər Liqası
   18. Beynəlxalq Mətbuat Klubu
   19. "Mövqe" qəzeti
   20. "AZADİNFORM" Müstəqil İnformasiya Agentliyi
   21. "Ayna-Zerkalo" qəzeti
   22. "Yeni Azərbaycan" qəzeti
   23. "Trend" İnformasiya Agentliyi
   24. "Oxu Məni" qəzeti
   25. "Palitra" qəzeti
   26. "Kaspi" qəzeti
   27. "Ədalət" qəzeti
   28. "Azəri-Press" İnformasiya Agentliyi (APA)

Dünən Çanaqqala zəfərinin 95-ci ildönümü ilə bağlı bu şəhərdə tədbir keçirilib. Lent.az-ın Türkiyə mətbuatına istinadən verdiyi məlumata görə, tədbirdə Çanaqqalada döyüşərək həlak olmuş azərbaycanlıların xatirəsinə lövhə qoyulması üçün bu ölkəyə getmiş Azərbaycan nümayəndə heyətinə qarşı Türkiyənin daxili işlər naziri Bəşir Atalay və vali Abdülkadir Atalık sayğısızlıq edib və mərasimdə Çanaqqalada vuruşmuş Azərbaycan şəhidlərinin xatirə lövhəsinin qoyulmasına imkan verilməyib.
   Qeyd edək ki, ötən il baş nazir Rəcəb Tayyib Ərdoğan Çanaqqalada Azərbaycan şəhidlərinin xatirə lövhəsinin qoyulmasına müsbət yanaşıb və bunu yazdığı məktubda ifadə edib. Ancaq Azərbaycan nümayəndə heyətində yer alan Beynəlxalq Diaspora Mərkəzinin sədri İsmayıl Ağayev bu istəyin əks olunduğu məktubu daxili işlər naziri Bəşir Atalay və vali Abdulkadir Atalıka vermək istəsə də, onlar məktubu qəbul etməyib və İsmayıl Ağayevi dinləmədən oradan uzaqlaşıblar.
   İsmayıl Ağayev yüksək tonla danışıb və bu hərəkətin yolverilməz yolduğunu vurğulayıb: "Birinci Dünya Müharibəsi zamanı Türkiyənin, müsəlman dünyasının ayaqda qalması üçün şəhid olan 253 min türk əsgəri ilə 3 min Azərbaycan şəhidi bir taleni paylaşıb. 3 min Azərbaycan şəhidinin xatirəsinə burada lövhə qoymaq istəyirik. Bizim lövhəmiz hazırdır. Keçən il bu məsələ ilə bağlı baş nazir Rəcəb Tayyib Ərdoğanla da görüşmüşdük. Baş nazirin lövhənin qoyulmasına razılığını bildirən məktubu da əlimizdə var. Biz bir millət, iki dövlətik. Sadəcə, şəhidlərimizin xatirəsinə lövhə qoymaq istəyirik. Nəyə görə bunu qəbul etmirlər? Niyə anlamırlar ki, azərbaycanlılar burada döyüşüb, şəhid olub?"
   İsmayıl Ağayev vurğulayıb ki, ABŞ və İsveçdə deputatlar qondarma erməni soyqırımı iddiası ilə Türkiyəni günahlandırır: "Biz özümüzü tanımasaq, şəhidlərimizə qiymət verməsək, kim bizə qiymət verə bilər? Özümüz bizi ayırsaq, ABŞ, İsveç və Ermənistandan nə fərqimiz qalar?" Mərasim Bəşir Atalay və Abdülkadir Atalıkın oradan ayrılması ilə başa çatıb. Qeyd edək ki, Azərbaycan nümayəndə heyətində millət vəkili Gülər Əhmədova da yer alıb.
   İnsidentlə bağlı valiliyinin hadisə yerində olan Hüsaməddin adlı əməkdaşı Lent.az-a açıqlama verərək bildirib ki, artıq məsələ həll olunub və Azərbaycan şəhidlərinin xatirəsi üçün nəzərdə tutulmuş lövhənin qoyulmasında problem yoxdur: "İndi baş nazir bura gəlir. Baş nazir gəlsin, Çanaqqala zəfərinin 95-ci ildönümü münasibətilə keçirilən tədbirə qatılsın. O gedəndən sonra Azərbaycan şəhidlərinin xatirə lövhəsi qoyulacaq".
   Valiliyin əməkdaşı lövhənin qoyulmasına imkan verilməməsini "valilikdən gələn göstərişlə" izah edib.
   Hazırda Çanaqqala zəfərinin 95-ci ildönümü ilə bağlı keçirilən tədbirə qatılmış Beynəlxalq Diaspora Mərkəzinin sədri İsmayıl Ağayev də Lent.az-a açıqlamasında məsələnin həll olunduğunu təsdiqləyib: "İnsidentdən sonra baş nazir Rəcəb Tayyib Ərdoğanla görüşümüz oldu. Xatırlatdım ki, bu abidə Azərbaycan Respublikasının Xarici İşlər Nazirliyi və Ankaradakı səfirliyi adından qorunur. Bununla bağlı bizdə izn məktubları da var. Bizə lövhə qoymağa imkan verməyənlərin tələbi ondan ibarət idi ki, Türkiyənin Xarici İşlər Nazirliyinin rəsmi, yaxud qeyri-rsəsmi icazəsi olmalıdır. Mən baş nazirlə görüşüm zamanı o bildirdi ki, lövhə qoyulacaq. Mərasimdən sonra - təxminən 1-2 saata lövhə qoyulacaq".
   İ.Ağayev Türkiyə daxili işlər naziri Bəşir Atalayın da lövhə qoyulmasına imkan verməyənlər sırasında olduğunu təsdiqləyib: "Lakin sonradan biz bir-birimizi başa düşdük. Çünki baş nazirlə danışmışdım".

Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti Bakıda un istehsalı ilə məşğul olan müəssisənin fəaliyyətini dayandırıb.
   Nazirlikdən "APA-Economics"ə verilən məlumata görə, Dövlət Xidmətinin Badamdar qəsəbəsi, 2-ci yaşayış massivi, 257 ünvanında sahibkar İmtiyaz Babayevə məxsus çörək sexində apardığı yoxlama zamanı çörək istehsalında istifadə olunan undan götürülmüş nümunənin laborator müayinəsi nəticəsində əla növ unun rənginin və tərkibindəki mineral qarışıqların normativ sənədlərin tələblərinə uyğun olmadığı müəyyən edilib.
   Bununla əlaqədar olaraq istehsalçı "Orxan LM" MMC-də yoxlamaya başlanıb və istehsal olunan unlardan nümunələr götürülərək laborator müayinəyə göndərilib. Nəticədə "Orxan LM" MMC-də istehsal olunan "Odlar yurdu" əmtəə nişanlı 1-ci növ və "Orxan" əmtəə nişanlı 2-ci növ unun tərkibində küllülüyün normadan artıq, müvafiq növ un üçün ələkdən keçməli olan unun miqdarının normadan az, rənginin normativ sənədlərin tələblərinə uyğun olmadığı müəyyən edilib.
   Bundan başqa, unların etiketinin üzərində istehsal tarixi və saxlama müddətinin göstərilmədiyi, məhsulların uyğunluq və gigiyenik sertifikatlarının olmadığı, sexdə olan laboratoriyanın akkreditasiya olunmadığı aşkar edilib. Bu qanun pozuntuları ilə əlaqədar məhsul istehsalının və anbarda olan 83 ton unun satışının dayandırılması barədə "Orxan LM" MMC-yə göstəriş verilib və haqsız rəqabət hallarına yol verildiyinə görə antiinhisar qanunvericiliyinin tələblərinin pozulması əlamətləri üzrə iş qaldırılıb.

Məlum olduğu kimi, Bakı Şəhəri üzrə Təhsil İdarəsi bir müddət öncə paytaxt məktəblərinin bufetlərində meyvə-tərəvəzin satışı ilə bağlı təşəbbüs irəli sürmüşdü. İdarə rəhbərliyi o zaman təşəbbüsü onunla əsaslandırmışdı ki, təzə meyvə-tərəvəz şagirdlərin sağlamlığı və intellektin inkişafı baxımından xeyirlidir. Ancaq idarənin bu təşəbbüsü ictimaiyyət tərəfindən birmənalı qarşılanmadı.
   Qeyd edək ki, Bakı Şəhəri üzrə Təhsil İdarəsi ötən ay-11 fevral tarixində Bakı Bağça-Məktəb-Lisey Kompleksinin bufetində meyvə-tərəvəzin satışı ilə bağlı eksperiment də keçirdi. Eksperiment zamanı şagirdlərə daha çox banan və naringi (mandarin) satmışdılar.
   Amma sonradan məktəblərinin bufetlərində meyvə-tərəvəzin satışı məsələsi gündəmdən çıxarıldı. Təhsil işçilərinin "Modern.az"a verilən məlumata görə, həmin təklif yuxarı dairələrdə pis qarşılandığından, məsələyə birdəfəlik nöqtə qoyulub. Yəni Bakıdakı orta məktəblərdə meyvə satışına icazə verilməyib. Xəbəri Təhsil Nazirliyindəki mənbə də təsdiqləyib.
   Xatırladaq ki, məsələ gündəmə gələndən az sonra təhsil naziri Misir Mərdanov da onu dəstəklədiyini bildirmişdi: "Bakı Şəhəri üzrə Təhsil İdarəsinin məktəblərdə meyvə satışı ilə bağlı ideyasını dəstəkləyirəm. Məktəb yaşlı uşaqların təzə meyvə yeməsinə böyük ehtiyac var". Nazir onu da bildirmişdi ki, ideya yaxşı olsa da, ondan düzgün nəticə çıxarılmalıdır: "Bu məsələdən düzgün nəticə çıxarılacaqsa, onu dəstəkləyirəm. Amma elə etmək lazım deyil ki, buna görə də haradasa pul yığsınlar".
   Qeyd edək ki, Bakı Şəhəri üzrə Təhsil İdarəsi ictimaiyyət arasında orta məktəblərdə meyvə-tərəvəz satışına münasibətlə bağlı sorğu da keçirmişdi. İdarənin məlumatına görə, sorğuya qatılan respondentlərin yarıdan çoxu təşəbbüsü dəstəkləmişdi. İndi isə məlum olur ki, meyvə satışı yığışdırılıb. "Modern.az" bununla bağlı Bakı Şəhəri üzrə Təhsil İdarəsilə əlaqə saxlayıb. Amma idarə rəsmiləri məsələyə şərh verməkdən imtina edib.
   Hələlik məktəblərdə meyvə satışı məsələsinin qapadılması rəsmən təsdiqlənməyib. Ekspertlər hesab edir ki, Bakı Şəhəri üzrə Təhsil İdarəsinin orta məktəblərdə meyvə-tərəvəz və süd məhsullarının satışı ilə bağlı təşəbbüsü reallaşsa, bu prosesə ciddi dövlət nəzarəti olmalıdır.
   İlk növbədə uşaqlara satılan meyvə, tərəvəz və ya süd məhsulları mütləq keyfiyyətli olmalıdır. Hazırda Azərbaycanda süd məhsulları istehsal edən özəl şirkətlərin mallarının keyfiyyəti aşağıdır. Onların istehsal etdiyi süd və qatıq bir gün qalanda xarab olur.
   Respublika Gigiyena və Epidemiologiya Mərkəzi isə bundan əvvəl bildirib ki, məktəblərdə satılacaq meyvə-tərəvəz və süd məhsullarının keyfiyyətinə nəzarət etməyə hazırdır. Ancaq o da faktdır ki, həmin məhsulların keyfiyyətinə görə məsuliyyəti dövlət orqanları yox, istehsalçı şirkətlər daşıyır. O da vurğulanır ki, istehsalçı şirkətlər məktəblər üçün xüsusi qablaşdırmalardan istifadə etməlidir. Həmçinin, məhsulların keyfiyyətinə, məktəblərə çatdırılmasına, satışına nəzarət olmalıdır.
   

Ucar-Zərdab yolunun Ucar rayonunun Qarabörk kəndindən keçən hissəsində ölümlə nəticələnən yol qəzası baş verib. APA-nın yerli bürosunun xəbərinə görə, hadisə srağagün axşam saatlarında qeydə alınıb. Ucar rayonunun Qazyan kənd sakini, 1967-ci il təvəllüdlü Zeynalov Qurban Zaur oğlu idarə etdiyi 61 BD 799 dövlət nömrə nişanlı, "Hyundai" markalı3 avtomaşınla yoldan keçən piyada - 1951-ci il təvəllüdlü Qarabörk kənd sakini Şahverdiyeva Nahidə Əhəd qızını və onun qızı, 1969-cu il təvəllüdlü Şahverdiyeva Məhəbbət Ağasəf qızını vurub. Xəsarət alan hər iki şəxs Ucar Mərkəzi Rayon Xəstəxanasına yerləşdirilib. N.Şahverdiyeva orada dünyasını dəyişib. Onun qızının isə vəziyyətinin ağır olduğu bildirilir. Faktla bağlı Ucar Rayon Polis Şöbəsində araşdırma aparılır.

Martın 18-də Ağır Cinayətlərə Dair İşlər üzrə Məhkəmədə kriminal aləmdə "Rövşən Lənkəranski" ləqəbilə tanınan Rövşən Canıyevin cinayət işi üzrə məhkəmə prosesi keçirilib.
   Lent.az-ın məlumatına görə, hakim Kəramət Əliyevin sədrliyilə keçirilən prosesdə dövlət ittihamçısı R.Canıyevin 12 il müddətinə azadlıqdan məhrum edilməsini istəyib. Proses martın 19-da davam etdiriləcək. İttihama görə, Rövşən Canıyev 2000-ci il iyunun 26-da Bakı şəhəri, Dənizkənarı Parkın Hökumət Evi ilə üzbəüz hissəsində tanışı Məmmədov Kəramət Əli oğlu ilə aralarında yaranmış mübahisə nəticəsində onu istintaqa məlum olmayan mənbədən əldə etdiyi kustar üsulla düzəldilmiş tapança ilə vuraraq ağır yaralayıb. Lakin güllə K.Məmmədovun qoluna dəyib zəiflədikdən sonra bədənində ilişib qalıb. Hadisə yerinə gələn Səbail Rayon Polis İdarəsinin əməkdaşları R.Canıyevi tutublar. K.Məmmədova isə vaxtında tibbi yardım edildiyinə görə həyatını xilas etmək mümkün olub.
   R.Canıyev istintaqa ifadə verməkdən boyun qaçırıb. O, heç bir səbəb göstərmədən ifadə verməkdən və istintaq hərəkəti sənədlərini imzalamaqdan imtina edib.
   Qeyd edək ki, 2000-ci il iyunun 28-də R.Canıyev barəsində məhkəmə həbs qəti-imkan tədbiri seçib. Avqustun 4-də R.Caniyev barəsində məhkəmə psixiatrik ekspertiza təyin edilib. Ekspertizanın rəyində R.Canıyevin cinayəti törədərkən anlaqlı olduğu lakin sonradan kəllə-beyin travması aldığı, baş beynin əzilməsi nəticəsində baş vermiş psixi pozuntular onu öz hərəkətlərini şüurlu idarə etmək iqtidarından məhrum etdiyi və buna görə də intensiv müşahidə altında məcburi müalicəyə ehtiyacı olduğu göstərilib.
   Məhkəmənin 03.09.2001-ci il tarixli qərarı ilə R.Caniyev cinayət məsuliyyətindən azad edilib, ümumi tipli psixiatriya stasionarında sağalana qədər məcburi müalicəsi ləğv edilərək məcburi ambulator müşahidəsi və psixiatr müalicəsinə keçirilib.
   2001-ci il dekabrın 25-də Sabunçu Rayon Məhkəməsi R.Canıyev barəsində seçilmiş ambulator müşahidəsi və psixiatr müalicəsini ləğv edərək onu ümumi əsaslarla müalicəyə göndərib.
   Daha sonra Sabunçu Rayon Məhkəməsi R.Canıyev sağaldığına görə onun təqsirləndirilməsinə dair cinayət işinin ibtidai araşdırılması üçün Ağır Cinayətlərə Dair İşlər üzrə Azərbaycan Respublikası Məhkəməsindən alınıb Bakı Şəhər Prokurorluğuna verilməsi haqqında qərar çıxarıb.
   Lakin R.Canıyev istintaqdan qaçıb gizləndiyinə görə onun barəsində 2002-ci il iyulun 7-dən axtarış elan edilib.
   7 ildən sonra - 2009-cu il dekabrın 3-də R.Canıyev Kiyevdə həbs olunub. Onunla bərabər Kiyevdə yaşayan və mərkəzdəki restoranlardan birinin sahibi olan Rusiya vətəndaşı, eləcə də biznesmenin üç mühafizəçisi saxlanıb. Tutulanlardan rezin güllə atmaq üçün nəzərdə tutulan 2 ədəd "Fort-12P" və "PMR-9" tapançası və "Vulkan" karabini götürülüb.
   Qeyd edək ki, "Rövşən Lənkəranski" Qafqazın nüfuzlu "qanuni oğru"larından biri sayılır. O, 2008-ci ilin yanvarında da MCMBİ əməkdaşları tərəfindən tutulub. Kiyevin Şevçenko rayon məhkəməsi o zaman da Canıyevin barəsində 40 günlük həbs qərarı çıxarıb. Amma həbsdə olan R.Caniyev əlaqələrindən istifadə edərək "qaçqın" statusu alıb və həbsdən çıxıb. Onun son günlərədək Ukrayna ərazisində qeyri-leqal şəkildə yaşadığı bildirilir. Ukrayna Ali Arbitraj Məhkəməsi ona verilən qaçqın statusunu ləğv edib.
   O, 2009-cu ilin dekabrın 13-də Ukraynadan Azərbaycana ekstradisiya olunub. R.Canıyev 2000-ci ilədək qüvvədə olan Azərbaycan Respublikası Cinayət Məcəlləsinin 15, 94-cü maddəsi (qəsdən adam öldürməyə cəhd) və 228.1-ci (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddəsilə ittiham olunur.
   

Küçə uşaqları arasında vərəm xəstəliyi yayılıb. Bu barədə "OLAYLAR"a Azərbaycan Uşaqlar Birliyinin sədri Kəmalə Ağayeva bildirib. K.Ağayeva deyib ki, 30 küçə uşağı müayinəyə cəlb edilib.
   Uşaqlar arasında hepatit və cinsi yolla yoluxan viruslar da aşkarlanıb. 1 uşaqda isə böyrək çatışmazlığı kimi ağır xəstəlik olub: "Küçə uşaqları arasında kəllə-beyin travması alanların sayı çoxdur. Bu isə uşaqların aqressiv olmasına səbəb olur. Hazırda vərəm xəstəliyi aşkarlanmış uşaqların müalicəsinə başlanıb. hepatitə yoluxan uşaqların isə valideynləri də bu virusun daşıyıcılarıdır".
   

Jurnalistikada qaynağın gizliliyinin qorunması "ən müqəddəs" borc sayılır. Jurnalist qaynağı açmaq əmrini yerinə yetirməkdən boyun qaçırdığı üçün ittihamla və ya məhkum olunma ilə üz-üzə qalma risqi altında belə bu borcuna sadiq qalmalıdır.
   Çünki jurnalistə "Bunu yazma ha!" və ya "Mənim adım olmasın ha!" əmrini verən "qapalı qaynaqlar" olmazsa, media xəbər sarıdan çox yoxsul hala düşər, demokratik toplumda dartışma, çəkişmə üçün daha az faktlar və daha az bilgilər ortaya qoyulmuş olar.
   Azərbaycan mediası jurnalist qaynaqları sarıdan çox yoxsuldur. İstər qəzetlərdə, istər telekanallarda, istərsə də saytlarda ciddi xəbər qıtlığı var. Gün ərzində Bakıdakı media qurumlarında tək-tük sayda özəl və cəmiyyətin marağına səbəb ola biləcək informasiyaya rast gəlmək olar.
   Bu durumun səbəbi həm də jurnalist qaynaqlarının gizliliyilə bağlı ölkəiçi qanunvericiliyin bəsitliyində və qabaqcıl təcrübələrlə ayaqlaşmaq gücündə olmamasındadır.
   "KİV Haqqında" Qanunun 11-ci maddəsi jurnalist qaynaqlarının gizliliyinin qorunması üçün bəzi qaydalar müəyyən edib. Həmin maddə jurnalistin üzərinə bilgi qaynağının kimliyini açıqlamamaq vəzifəsi qoyub. Qanuna görə, yalnız insan həyatının müdafiəsi üçün, ağır cinayətin qarşısını almaq məqsədilə, ağır cinayət törətməkdə ittiham olunan, yaxud təqsirli bilinən şəxsin müdafiəsi üçün məhkəmə jurnalist və redaktoru qaynağın kimliyini açıqlamağa məcbur edə bilər. Apardığımız araşdırma və müşahidələr göstərir ki, mənbələrin jurnalistlərə etibar etməməsi bir neçə amillə bağlıdır. Birincisi, Azərbaycanda dövlət strukturlarında çalışanlar rəhbərləri barədə mətbuata məlumat ötürməkdə maraqlı deyil, yaxud da onlarda qorxu var. İkincisi, mənbələr mətbuata ötürdüyü məlumatların nəticə verəcəyinə inanmır. Üçüncüsü, jurnalistlərin mənbəni açıqlamayacağına inam yoxdur.
   Bəzən jurnalistlər özündən "etibarlı mənbə" uydurur ki, bu da həqiqi mənbələrin etibarlılığını sual altında qoyur. Azərbaycanın tərəfdar çıxdığı beynəlxalq normalar qanunvericiliyin təkmilləşdirilməsini zəruri edir.
   Avropa Şurası Nazirlər Komitəsi jurnalistin qaynağın gizliliyini qorumaq haqqı ilə bağlı 8 mart 2000-ci il tarixli (2000) 7 saylı Tövsiyələrində jurnalistin bilgi qaynaqlarının gizliliyini, başqa şəxslərin bilgi qaynaqlarını açmamaq haqqını tanıyıb. Həmin Sənədə görə, hökumətlər qaynağı açmaq barədə əmri ancaq həmin bilginin açılmasına ictimai maraqlar naminə birinci dərəcəli zərurət olduqda, bilinməsi istənən hal yetərincə vacib və ciddi xarakter daşıdıqda verə bilərlər.
   Avropa İnsan Haqları Məhkəməsi "jurnalistlərin bilgi qaynaqlarının qorunması bir çox ölkələrin qanunlarında və jurnalistlərin peşə davranışı məcəllələrində mətbuat azadlığının həyata keçirilməsinin əsas şərtlərindən biri sayılır", "belə qorunma olmazsa, qaynaqlar toplumu onun maraq dairəsində olan məsələlərlə bağlı bilgiləndirməkdə mətbuata yardım etmək kimi mühüm işdən çəkinə bilər.
   Nəticədə mətbuatın toplumun maraqlarını qorumaq kimi mühüm rolu qırıla və mətbuatın dəqiq və etibarlı bilgi ortaya çıxarmaq qabiliyyəti qəsdən təhlükə altına qoyula bilər. Jurnalistərin bilgi qaynaqlarının qorunması demokratik toplumda azad mətbuat üçün vacibdir. Açıqlama barədə hər bir qərar bu azadlığın gerçəkləşdirilməsinə çəkindirici təsir potensialı daşıyır. Ona görə də açıqlamaya yönəlik tədbiri toplumun sanballı maraqları ilə bəraətləndirmək mümkün olmazsa, bu, Konvensiyanın 10-cu maddəsilə bir araya sığmayacaq"-deyib. AİHM bəyan edib ki, jurnalistlərlə onların qaynaqları arasında peşəkar bağlılıqlar bilginin faktiki dəyərindən də böyük önəm daşıyır. Qaynağın hər hansı açılması, bilginin məzmunundan asılı olmayaraq, gələcək qaynaqlarda jurnalistə bilgi verməkdən çəkindirici effekt yarada bilər.
   

Ermənistanda səfərdə olan Moskva və Bütün Rusiyanın patriarxı Kirill Qafqaz Müsəlmanları İdarəsinin sədri, şeyxülislam Allahşükür Paşazadənin Bakıda keçiriləcək dinlərarası sammitdə iştirakla bağlı dəvət məktubunu bütün ermənilərin katolikosu II Qareginə təqdim edib.
   APA-nın "Novosti-Armeniya" agentliyinə istinadən verdiyi məlumata görə, patriarx deyib: "Mən özümün və dostum Allahşükür Paşazadənin adından sizi MDB Dinlərarası Şurası tərəfindən Bakıda keçiriləcək konfransa dəvət edirəm". Kirill bildirib ki, tədbirdə iştirak orada müzakirə olunacaq vacib məsələlər haqqında fikir ifadə etməyə imkan verəcək. O xatırladıb ki, MDB Dinlərarası Şurasında həm Ermənistan xristianları, həm də Azərbaycan müsəlmanları iştirak edir və ilk dinlərarası sammit bir neçə il əvvəl Moskvada keçirilib. Patriarx kilsələrin sülhməramlı səylərinə böyük önəm verdiyini söyləyib. Kirillin sözlərinə görə, erməni apostol və rus pravoslav kilsələri Dağlıq Qarabağ münaqişəsinin nizamlanmasında fəal iştirak edir və Ermənistanla Azərbaycanın dini liderləri üçün görüşmək çox çətin olsa da, onlar bunu dəfələrlə reallaşdırıb. "Ermənistan, Türkiyə və Azərbaycan tarixi xatirələrini və milli özünəməxsusluqlarını qorumaqla yanaşı, keçmişin girovuna çevrilməməlidir". APA-nın "Novosti-Armeniya"ya istinadən verdiyi məlumata görə, bu sözləri Moskva və bütün Rusiyanın patriarxı Kirill İrəvan Dövlət Universitetində çıxışında deyib. Kirill 1915-ci il hadisələrinə toxunarkən soyqırım ifadəsini işlətməyib: "Biz dünən bu faciənin qurbanlarını yad etdik. Çox vacibdir ki, erməni cəmiyyəti bunu öz yaddaşında saxlayır". Patriarx ermənilərə xatırladıb ki, nifrət alovu dalana aparan yoldur: "Elə etmək lazımdır ki, bu yaddaş bu gün münasibətləri inkişaf etdirməyə, o cümlədən Ermənistan-Türkiyə əlaqələrinə mane olmasın. Bu yaxınlarda münasibətlərin yaxşılaşdırılması istiqamətində atılan addımlar düzgün addımlardır".
   

Müsavat Partiyası Novruz bayramından sonra kütləvi aksiyalar keçirəcək. Bu barədə APA-ya partiyanın mərkəzi İcra Aparatının rəhbəri Arif Hacılı məlumat verib.
   Onun sözlərinə görə, ölkədə bir sıra aktual problem var və partiya bu problemlərin həlli məsələsini hakimiyyətin qarşısında qaldırmaq fikrindədir: "Həm Dağlıq Qarabağ münaqişəsinin həlli ətrafında yaranmış vəziyyət, həm də parlament seçkiləri öncəsi ölkədə demokratik şəraitin yaradılması, seçki qanunvericiliyində islahatların aparılması kifayət qədər aktual problemlərdir. Biz bununla bağlı dəfələrlə məsələ qaldırmışıq, amma hələlik real nəticə yoxdur". A.Hacılı bildirib ki, aksiyaların keçirilməsi üçün yerlərin ayrılması barədə Müsavat Partiyası Bakı Şəhər İcra Hakimiyyətinə müraciət edilib və şəhər rəhbərliyinin cavabından asılı olaraq aksiyanın vaxtı təyin ediləcək. A.Hacılı aksiyada digər müxalifət partiyalarının da iştirakının müzakirə olunacağını qeyd edib.

Azərbaycan prezidenti İlham Əliyev martın 18-də Rumıniyanın xarici işlər naziri Teodor Bakonskinin başçılıq etdiyi nümayəndə heyətini qəbul edib.
   APA-nın məlumatına görə, Azərbaycanla Rumıniya arasında güclü tərəfdaşlıq münasibətlərinin və bütün səviyyələrdə fəal diplomatik əlaqələrin olduğunu qeyd edən dövlət başçısı iki ölkənin prezidentləri arasında münasibətlərin əlaqələrin inkişafında mühüm rol oynadığını deyib. Prezident İ.Əliyev T.Bakonskinin səfərinin ölkələrimiz arasında ikitərəfli münasibətlərin inkişaf etdirilməsində mühüm addım olacağını, həmçinin Avropa İttifaqı-Azərbaycan əməkdaşlığının və regional vəziyyətin müzakirə edilməsi baxımından əhəmiyyətli olduğunu bildirib. Dövlət başçısı ölkələrimiz arasında dostluq və tərəfdaşlıq əlaqələrinin bundan sonra da uğurla inkişaf edəcəyinə ümidvar olduğunu vurğulayıb.
   Öz növbəsində, T. Bakonski Rumıniya prezidenti Trayan Baseskunun Azərbaycanla ikitərəfli münasibətlərin inkişafında maraqlı olduğunu qeyd edib. O da iki ölkənin prezidentləri arasında şəxsi münasibətləri strateji tərəfdaşlıq əlaqələrinin inkişafında başlıca amil kimi qiymətləndirib.
   

Türkiyənin Azərbaycanda fövqəladə və səlahiyyətli səfiri Hulusi Kılıc Novruz bayramı münasibətilə Azərbaycan xalqını təbrik edib.
   Təbrikdə deyilir: "Novruz bayramının gəlişi münasibətilə qardaş və dost Azərbaycan xalqını səmimi qəlbdən təbrik edirəm. Artıq üçüncü Novruz bayramımı azərbaycanda qeyd etməkdən böyük xoşbəxtlik və sevinc hiss edirəm. Novruzun, həmişə olduğu kimi, bu il də Azərbaycanda və Azərbaycan hüdudlarından kənarda yaşayan bacı və qardaşlarıma və bütün türk dünyasına yeni ümidlər, sülh, əmin-amanlıq, xoşbəxt gələcək naminə əbədi birlik, bərabərlik, sevinc, bərəkət gətirməsini arzu edir, bu əziz bayram günündə hər birinizə cansağlığı və uğurlar diləyirəm".
   

Azərbaycan jurnalistlərinin peşə davranış qaydalarına edilməsi nəzərdə tutulan dəyişikliklər heç də bütün kütləvi-informasiya vasitələri tərəfindən birmənalı qarşılanmayıb.
   Bir sıra mətbu orqanlar hesab edir ki, sənədə ediləcək dəyişikliklər jurnalistlər üçün Cinayət Məcəlləsi funksiyasını yerinə yetirəcək və bu sahədə ciddi problemlərə səbəb olacaq. Azərbaycan Mətbuat Şurasının sədri Əflatun Amaşov isə irəli sürülən iddialarla razılaşmır. Mətbuat Şurasının sədri "OLAYLAR"a verdiyi açıqlamada bildirib ki, 2003-cü ildə hazırlanmış Azərbaycan jurnalistlərinin peşə davranış qaydaları kifayət qədər yığcam bir sənəddir. Əflatun Amaşovun sözlərinə görə, Mətbuat Şurasına daxil olan bəzi şikayətlərə baxarkən elə detallar olur ki, sənəddəki prinsiplərlə onları müəyyənləşdirmək çətin olur. MŞ sədri deyib ki, hazırda sənəd üzərində iki istiqamətdə işləmək planlaşdırılır:
   "Biz jurnalistlərin peşə davranış qaydalarının prinsiplərində olan maddələrin bəzilərini açmaq istəyirik. Yəni daxil olan şikayətləri müəyyənləşdirərkən və çıxış yollarını axtarıb taparkən məhz peşə davranış qaydalarındakı o prinsiplər bizə birbaşa yardımçı olsun".
   
   

"Həbsxanada olanda məlum oldu ki, mən "Azadlıq" qəzetinə lazım deyiləm". Bu sözləri APA-ya açıqlamasında Azərbaycan prezidentinin imzaladığı əfv fərmanı ilə dünən həbsdən azadlığa çıxan "Azadlıq" qəzetinin baş redaktoru Qənimət Zahid deyib. Baş redaktor həbsxanadan buraxılandan sonra evdə ailəsinin və dostlarının arasında özünü çox yaxşı hiss etdiyini deyib. Q.Zahid ilk gedəcəyi yerin iki gün əvvəl dünyasını dəyişən jurnalist İbrahim Bayandurlunun üç mərasimi olacağını bildirib: "Bu tezlikdə işə çıxa biləcəyimi güman eləmirəm. "Azadlıq"da işə başlamağa tələsmirəm". Q.Zahid əfv olunmasına da münasibət bildirib: "Azadlıq mənim haqqımdır. Bütün dəyərləndirməm bundan ibarətdir". Baş redaktor həbsxana həyatının jurnalist mövqeyinə heç bir təsiri olmayacağını da deyib: "Həbsxana həyatımın mövqeyimə heç bir təsiri olmayacaq. Yenə də əvvəlki Qənimətəm".
   

Ukrayna tərəfindən beynəlxalq axtarışa verilən şəxs Azərbaycanda tutulub. Daxili İşlər Nazirliyinin mətbuat xidmətinin cümə axşamı yaydığı məlumata görə, Baş Cinayət-Axtarış İdarəsi əməkdaşlarının həyata keçirdiyi əməliyyat tədbirləri nəticəsində Ukrayna Cinayət Məcəlləsinin 121-ci maddəsilə (sağlamlığa qəsdən ağır zərər vurma) axtarışda olan Ruslan Niyazov tutulub.
   

Sumqayıtda xəstəxanada yanğın hadisəsi baş verib. "OLAYLAR"ın Fövqəladə Hallar Nazirliyinin saytına istinadən yaydığı məlumata görə, hadisə martın 17-də axşam saatlarında baş verib. Sumqayıt şəhər 1 saylı Xəstəxanasının paltaryuma sexində məcburi köçkünün yaşadığı tikilidə yanğın hadisəsi baş verib. Hadisə nəticəsində məcburi köçkün ailəsinin məskunlaşdığı 50 kvadratmetrlik otaq yanar konstruksiyaları və ev əşyaları ilə birlikdə tamamilə yanıb.
   
   

Türkiyənin "Pana film" şirkəti "Qurdlar vadisi - Qarabağ" filmi çəkməyə hazırlaşır. APA-nın "Vatan" qəzetinə istinadən yaydığı məlumata görə, bu barədə Azərbaycanda səfərdə olan "Pana film"in rəhbərlərindən Mehmet Canpolat açıqlama verib. O, "Qurdlar vadisi - Qarabağ" və ya "Qurdlar vadisi - Xocalı" filmi çəkmək istədiklərini bildirib. Xatırladaq ki, Türkiyənin ən məşhur teleserialı "Qurdlar vadisi"nin qəhrəmanları - aktyorlar Necati Şaşmaz (Polat Alemdar), Kənan Çoban (Əbdülhey), Ərhan Ufak (Ərhan), Osman Vöber (Tuncay) və "Pana film"in təmsilçisi Mehmet Canpolat martın 17-də Azərbaycana gəlib. Onlar bir neçə gün Qəbələdə qalacaq.

Udmurt vilayət Prokurorluğu beynəlxalq axtarışda olan Azərbaycan vətəndaşını Azərbaycan Baş Prokurorluğuna təhvil vermək barədə qərar çıxarıb.
   APA-nın vilayətin rəsmi saytına istinadən verdiyi məlumata görə, 1969-cu il təvəllüdlü Fərid Ramiz oğlu Quliyev külli miqdarda dövlət əmlakını talamaqda ittiham olunur.
   Azərbaycan istintaq orqanları onu kommersiya banklarından birinin İdarə heyətinin sədri olarkən Azərbaycan Beynəlxalq Bankının ayırdığı 400 min ABŞ dolları depozitin 357 min dollarını bankın kassasından oğurlamaqda təqsirləndirir.
   Cinayət işi başlanandan sonra o gizlənib və barəsində beynəlxalq axtarış elan olunub. Sonradan məlum olub ki, o, Rusiyada mühakimə olunub.

Martın 17-də Ermənistan tərəfdən atəş açılması nəticəsində Azərbaycan ordusunun əsgəri Əliyev Mustafa Aslan oğlu yaralanıb.
   Bəzi KİV-lər onun həlak oması barədə məlumat yayıb, lakin əsgər sağdır və qospitaldadır. "Onun vəziyyəti qənaətbəxşdir, deyə Müdafiə Nazirliyinin mətbuat xidməti bildirib".
   

Türkiyə ana müxalifətinin lideri - Cümhuriyyət Xalq Partiyasının (CHP) başqanı Dəniz Baykal ölkədə qeyri-leqal çalışan təxminən 100 min erməninin deportasiya edilə biləcəyinə dair baş nazir Rəcəb Tayyib Ərdoğanın açıqlamasını pisləyib.
   APA-nın "Vatan" qəzetinə istinadən verdiyi məlumata görə, D.Baykal bildirib ki, Türkiyəyə işləməyə gələn insanlardan hər hansı ixtilafın həllində təzyiq vasitəsi olaraq istifadə etmək yolverilməzdir: "Bu, insan haqlarına ziddir və qətiyyən qəbul oluna bilməz". CHP lideri bir daha Ermənistanla imzalanmış protokolların parlamentdən geri götürülməsini tələb edib. O, Türkiyə Böyük Millət Məclisində Ermənistanla münasibətlərə həsr olunmuş xüsusi müzakirənin keçirilməsi üçün təklif verəcəklərini də açıqlayıb.
   

Moskva milisi etnik cinayətkar qruplaşmaya daxil olan azərbaycanlının öldürülməsini araşdırır. Lent.az-ın "RİA Novosti" agentliyinə istinadən verdiyi məlumata görə, Azərbaycan vətəndaşı, 32 yaşlı Nicat Əliyevi martın 17-də Moskvanın cənubundakı Çertanov mikrorayonunda avtomat silahdan güllələyiblər.
   "İlkin ehtimala görə, naməlum şəxslər qurbanı yaşayış binasının girişindən çıxarkən güllələyib. Zərərçəkənin aldığı xəsarətlər ağır olduğundan, təcili tibbi yardım maşını gələnə qədər o, dünyasını dəyişib"- deyə hüquq-mühafizə orqanlarındakı mənbə agentliyə bildirib. Hadisə yerli vaxtla saat 17:16-da baş verib. Operativ məlumata görə, N.Əliyev mütəşəkkil cinayətkar qruplaşmanın aktiv üzvü olub. Onun cibində "Makarov" tipli tapança tapılıb.
   Şahidlər bildirib ki, killer hadisə yerindən "VAZ-2114" markalı maşında qaçıb. Avtomobildə onu başqa bir şəxs gözləyirmiş. İstintaq idarəsi Rusiya Cinayət Məcəlləsinin 105 (qətl) və 222-ci (qanunsuz silah saxlanılması) maddələrilə cinayət işi başlayıb.
   

Milli Parkın Təhlükəsizlik Xidmətinin rəisi Emin Əliyevin Milli.Az xəbər portalına verdiyi məlumata görə, dünən saat 17:00 radələrində Milli Parkın Hökumət Evinin qarşısnda olan hissəsində 14 yaşlı Vəfa Paşayeva özünü dənizə atıb.
   Təhlükəsizlik Xidmətinin əməkdaşları qızı dərhal sudan çıxarıblar. Xilas olunan qız şokda olduğundan yalnız adını deyə bilib. V.Paşayeva xəstəxanaya aparılıb. Gənc qızın intihara cəhd etməsinin səbəbləri bilinmir. Səbail Rayon Polis İdarəsi 38-ci Polis Bölməsinin əməkdaşları hadisə yerində araşdırma aparıb.
   

Gəncə şəhərinin baş memarının iş otağını yaran şəxs tutulub.
   Gəncə şəhər Polis İdarəsindən Milli.Az xəbər portalına verilən məlumata görə, hadisə ötən il dekabrın 8-də baş verib. İcra Hakimiyyətinin Memarlıq və tikinti şöbəsinin müdiri, şəhərin baş memarı Məmməd İbrahimovun inzibati binadakı iş otağından olunan oğurluqda şübhəli bilinən 35 yaşlı Ceyhun Verdiyev saxlanıb. Faktla bağlı Cinayət Məcəlləsinin 177-ci (oğurluq) maddəsilə cinayət işi başlanıb.
   
   
   
   

Dünən gecə paytaxtın Sabunçu rayonunda qətl hadisəsi baş verib. Bakıxanov qəsəbəsindəki Həsən bəy Ağayev küçəsində 17 yaşlı Ramin İmdad oğlu Mustafayev naməlum şəxs tərəfindən bıçaqlanıb. Nəticədə o, dünyasını dəyişib.
   Naməlum şəxslər Raminlə birlikdə hadisə yerində olan əmisi oğlu, 16 yaşlı Kənan Mustafa oğlu Mustafazadəyə də bıçaqla xəsarətlər yetiriblər. Hadisədən sonra 3 saylı şəhər Klinik Xəstəxanasına çatdırılan Kənana tibbi yardım göstərilib.
   Zərərçəkənlərin yaxınlarının ANS PRESS-ə verdiyi məlumata görə, Kənan Mustafazadə və Ramin Mustafayev evə qayıdarkən naməlum şəxslər onlara yaxınlaşaraq mobil telefonlarını tələb edib. Bu zaman yaranan mübahisə isə sonda Raminin qətlə yetirilməsi, Kənanın isə müxtəlif dərəcəli xəsarətlər alması ilə nəticələnib. Baş vermiş hadisə ilə bağlı Sabunçu Rayon Polis İdarəsi, o cümlədən rayon prokurorluğunun əməkdaşları tərəfindən hadisə yerinə baxış keçirilib. 11-ci sinif şagirdləri olan Kənan və Raminin hansı şəraitdə və kimlər tərəfindən bıçaqlandığını müəyyən etmək üçün əməliyyat-istintaq qrupu yaradılıb. Hadisənin təfərrüatları, baş vermə şəraiti və səbəbləri istintaqın gedişi zamanı məlum olacaq. Faktla bağlı Sabunçu Rayon Prokurorluğunda Cinayət Məcəlləsinin müvafiq maddələrilə cinayət işi başlanıb, istintaq davam edir.
   Hadisə ilə bağlı bir nəfər saxlanıb. Rayon Polis İdarəsinin 13-cü polis bölməsindən Milli.Az-a bildirilib ki, cinayətdə şübhəli bilinən Osman Novruzov da istintaqa cəlb olunub.

Masallı rayonunda ailə münaqişəsi zəminində silahlı insident baş verib. APA-nın cənub bürosunun məlumatına görə, saat 22.00 radələrində Masallı rayon Gənclər və İdman İdarəsinin əməkdaşı, 1955-ci il təvəllüdlü Abbas Qasım oğlu Abbasov həyat yoldaşı - 1961-ci il təvəllüdlü Zahidə Əlihüseyn qızı Ağayevanı, oğlu - 1989-cu il təvəllüdlü Xəzər Abbas oğlu Abbasovu və qardaşı - 1955-ci il təvəllüdlü Hüseyn Qasım oğlu Abbasovu odlu silahdan atəş açaraq yaralayıb.
   Hər üç zərərçəkmiş Masallı Regional təcili tibbi yardım stansiyasına yerləşdirilib.
   Xəstəxanadan verilən məlumata görə, X.Abbasov travmatologiya şöbəsinə yerləşdirilib. Z.Ağayeva və H.Abbasov üzərində isə hazırda cərrahiyyə əməliyyatı aparılıb.
   Abbas Abbasov polis tərəfindən saxlanıb. Faktla bağlı Masallı Rayon Polis Şöbəsində və Masallı Rayon Prokurorluğunda araşdırma aparılır.
   Həyat yoldaşı tərəfindən güllələnən Masallı sakini dünyasını dəyişib. Masallı Regional Təcili Tibbi Yardım Stansiyasından APA-nın cənub bürosuna verilən məlumata görə, rayonun Şərəfə kənd sakini, 1961-ci il təvəllüdlü Zahidə Əlihüseyn qızı Ağayeva əməliyyat zamanı keçinib. Güllə Z.Ağayevanın ağ ciyərini, dalağını və böyrəyini dağıtdığından həkimlər onu xilas edə bilməyib. İlkin məlumata görə, hadisə ailə münaqişəsi zəminində baş verib. A.Abbasovun hadisəni törədərkən sərxoş olduğu bildirilir. Artıq polis onu saxlayıb.