"Bakı"nın baş məşqçisi Bülənt Korkmaz çalışdırıcılıq karyerası ərzində ikinci dəfə komandasını ölkə kubokunun yarımfinalına çıxarıb. Apasport.az saytının hesablamalarına görə, ölkəmizə gələnədək 4 klubda çalışmış 42 yaşlı mütəxəssis rəhbərlik etdiyi komandaların hamısı ilə kubokda uğurlu çıxış edib.
   Korkmaz baş məşqçi kimi debüt mövsümündə Türkiyə kubokunun finalınadək irəliləyib. 2006/07 mövsümünün qış fasiləsində "Kayseri Ərciyəspor"un "sükanı arxasına" keçərkən, kubokun qrup mərhələsi finiş xəttində idi.
   Son turda "Bursaspor"la həlledici səfər matçında iş başında olan Korkmaz yetirmələrinin 4:2 hesablı qələbəsinə sevinib. Bunun sayəsində 1/4 finala çıxan kayserililər əvvəl "Qalatasaray" (0:0, 0:0, əlavə vaxtda 1:1), sonra "Trabzonspor"u (1:0, 0:1, penaltilərlə 5:4) sıradan çıxarıb. Həlledici görüşdə Korkmazın yetirmələrini "Başiktaş" dayandırıb - əlavə vaxtda 1:0.
   2007/08 mövsümündə Korkmaz kubok yarışlarını məğlubedilməz tərk edib. Onun rəhbərlik etdiyi "Bursaspor" ikinci mərhələdə "Boluspor"u 1:0 məğlub edib qrup turnirinə vəsiqə qazansa da, Korkmaza "yaxşı yol" deyiblər. Lakin mütəxəssis bu mərhələdə başqa klubla mübarizəyə qoşulub. Onun rəhbərlik etdiyi "Gənclərbirliyi" öz qrupunda 3 qələbə qazanaraq, yalnız 1 dəfə məğlub olub. Korkmaz "Vestel Manisaspor" (3:0), "Kırıkkalespor" (4:0), "Adanadəmirspor" (1:0) və "Trabzonspor" (2:3) klubları ilə matçlarda iş başında olub. Lakin 1/4 final öncəsi onu istefaya göndəriblər. Türkiyədəki son iş yeri olan "Qalatasaray" isə Korkmazın gəlişinədək kubokdan kənarda qalmışdı.
   Göründüyü kimi Korkmaz ölkə kuboku yarışlarında ya finala çıxar, ya da istefaya göndərilir. İndi "Bakı"da çalışan mütəxəssis 1/8 və 1/4 final mərhələlərini arxada qoyub final ənənəsini davam etdirməyə çalışacaq. Finala qədər heç bir komanda onu dayandıra bilmir.
   Qeyd edək ki, "Bakı" cari mövsüm "Bakılı" (6:0, 0:0) və "Standard"ı (1:1, 3:1) mübarizədən kənarlaşdırıb.

Yunan-Roma güləşi üzrə Ermənistan komandası ölkəmizdə keçiriləcək Avropa çempionatında iştirak etməyəcək. Bu məlumatı Ermənistanın yunan-Roma güləşi üzrə yığmasının baş məşqçisi Levon Culfalakyan verib.
   "Bu qərarı Ermənistan Milli Olimpiya Komitəsi çıxarıb. Bakıda baş tutacaq Avropa çempionatına qatılmamaqla idmançılarımız Rusiyanın paytaxtı Moskva şəhərində 6-12 sentyabrda baş tutacaq yunan-Roma güləşi üzrə Dünya Çempionatına daha yaxşı hazırlaşmış olacaqlar", - deyə Levon Culfalakyan bildirib. Xatırladaq ki, yunan-Roma güləşi üzrə Avropa çempionatı 13-18 aprel tarixində Bakıda baş tutacaq.

"Türk Hava Yolları" şirkəti ilə "Mançester Yunayted" klubu arasında sponsorluq müqaviləsinin imzalanma mərasimində çıxış edən Ueyn Runi maraqlı açıqlamaları ilə yadda qalıb. İngilis futbolçu türkiyəli azarkeşlərin dünyada ən çılğın azarkeşlər olduğuna diqqət çəkib. "Türkiyə klublarına qarşı bir neçə dəfə oynamışam. Türkiyədə atmosfer çox fərqlidir. Türkiyəli futbolçular arasında isə son 10 ildə ən yaxşı futbolçu kimi Tuqay Kərimoğlunu tanıyıram. Bu futbolçunu "Blekbörn"də oyunu ilə xatırlayıram", - deyə Ueyn Runi bildirib.
   Ueyn Runi həmçinin nə vaxtsa Türkiyə klublarından birində çıxış edəcəyini də istisna etməyib.

"Barselona"nın baş məşqçisi Xosep Qvardioladan İspaniya Futbol Rəqabət Komissiyasına şikayət edilib. İspaniya Hakimlərin İntizam Komitəsi Qvardiolanın "Almeriya"-"Barselona" oyunundan sonra hakim Klos Qomez və onun köməkçisini təhqir etdiyini bildirib. Qvardiola martın 6-da İspaniya La Liqası çərçivəsində keçirilən "Almeria-Barselona" oyununun 26-cı dəqiqəsində baş vermiş bir məqamla bağlı israrlı etirazlarına görə hakim Klos Qomez tərəfindən qırımızı kart göstərilərək meydandan qovulub. Oyundan sonra isə baş məşqçi Qomez və onun köməkçisini "yalançılıqda" ittiham edib. Hakimlərin İntizam Komitəsi Qvardiola haqqında şikayət edərək onun cəzalandırılmasını tələb edir. Hazırda baş məşqçi barəsində araşdırma başlanılıb və Qvardiola 4 gün müddətində yazılı ifadəsini quruma təqdim etməlidir.
   

Braziliya futbolunda xoşagəlməz hadisə baş verib. Apasport.az saytının məlumatına görə, "Kanadense" və "Vilya Nova" klublarının qarşılaşmasından sonra faciə yaşanıb. Mərkəzi Braziliyada keçirilən qarşılaşmada qonaqların qələbəsi tamaşaçıları o dərəcədə qəzəbləndirib ki, onlar vəhşilikdən də çəkinməyiblər. Matç bitən kimi futbolçuların əlbəyaxa olmasına biganə qalmayan azarkeşlər öncə meydana axışıblar. Dava-dalaşla kifayətlənməyən fanatlar qarşılaşmadan sonra qonaq komandanın soyunub-geyinmə otağına qumbara atıblar. Partlayışdan sonra bir futbolçu yaralanıb. Bundan başqa şəhər rəhbərliyinin bir nümayəndəsi də xəsarət alıb. Qeyd edək ki, Braziliyanın Qoyas ştatının birinciliyi olan Qoyano çempionatının 14-cü turunun oyununda "Vila Nova" 2:1 hesabı ilə qələbə qazanıb.

Azərbaycan taekvandoçusu, dünya çempionu Aydın Bəhmalova ötənilki Dünya çempionatında uduzmaq üçün pul təklif ediblər. Bu barədə idmançının özü salamnews.org saytına açıqlamasında bildirib.
   "Oteldə bir nəfər zəng edib, oyunu satıb-satmamaq barədə soruşdu. Mən dərhal rədd cavabı verdim. Amma söhbət konkret məbləğdən, yəni 20 min dollardan gedəndə görüşməyə razılıq verdim. Çünki mənə çox maraqlı idi ki, birinci yerin rəsmi mükafatından qat-qat çox olan pulu təklif edən kimdir", deyə dünya çempionu bildirib. Onun sözlərinə görə, ötənilki Dünya çempionatının qalibinə verilən mükafatın məbləği 3 min dollar olub: "Zəng edən adam bildirdi ki, mənimlə finalda döyüşəcək iordaniyalı taekvandoçu Yasər Əl-Sadeqin nümayəndəsidir. Onun kim olduğunu bilməyim mənim üçün kifayət etdi. Bildirdim ki, "heç bir məbləğə satılmıram. Mənə sadəcə sizin kim olduğunuzu bilmək maraqlı idi". Bundan sonra o, dəstəyi yer atdı. Bu təklif mənim üçün final döyüşündə stimul oldu. Finalda təkcə dünya çempionu adı uğrunda yox, həm də təmiz adım uğrunda döyüşdüm. Rəqibi quru hesabla məğlub edib həm 3 minimi, həm də təmiz adımı qazandım".
   

UEFA Çempionlar Liqasının 1/4 final mərhələsinin daha iki iştirakçısı müəyyənləşib. Fanat.az xəbər verir ki, Rusiyanın ÇSKA və İtaliyanın "İnter" klubları 1/8 final mərhələsində uğurlu çıxış edərək, növbəti mərhələyə adlayıb.
   Moskvadakı oyunda meydandan 1:1 hesablı bərabərliklə ayrılan ÇSKA İspaniyada "Seviliya"nın qonağı olub. Səfər oyununda 2:1 hesablı qələbə qazanan ruslar 1/4 finala vəsiqə qazanıb. "İnter" isə baş məşqçisi Joze Maurinyonun keçmiş komandası "Çelsi"ni mübarizədən kənarlaşdırıb. Yenidən "Stemford Bric"ə dönən portuqaliyalı mütəxəssis meydandan 1:0 hesablı qələbə ilə ayrılıb. Qeyd edək ki, 1/4 final mərhələsinin 4 iştirakçısı ötən həftə müəyyənləşib. "Arsenal", "Bavariya", "Mançester Yunayted" və Lion "Olimpik"i növbəti mərhələyə adladığı halda, "Real" və "Milan" sürpriz şəkildə turnirdən kənarda qalıb.
   16 mart
   Seviliya (İspaniya) - ÇSKA (Moskva, Rusiya) 1:2
   İlk oyun - 1:1.
   Çelsi (İngiltərə) - İnter (İtaliya) 0:1
   İlk oyun - 1:2.

Türkiyənin Futbol Federasiyası sdaionda baş verən hadisələr üzündən yarımçıq qalan "Diyarbəkirspor"-"Bursaspor" oyunu ilə bağlı qərarını verdi. Qurumun İdarə Heyətinin toplantısında "Diyarbəkirspor"a texniki məğlubiyyət (3:0) verilməsi barədə qərar qəbul olunub.
   "Diyarbəkirspor"un ötən həftə "İstanbul Böyükşəhər Bələdiyyəspor" komandası ilə yarımçıq qalmış oyunu ilə bağlı son qərar isə martın 19-da veriləcək. Əgər bu oyunda da Diyarbəkir təmsilçisinə texniki məğlubiyyət verilsə, komanda avtomatik olaraq Türkiyə çempionatından kənarlaşdırılacaq. Bu isə rəsmi Ankaranın "kürd açılımı" siyasətinə zərbə vura bilər. Türkiyə Futbol Federasiyası prezidentinin müavini Lutfi Arıboğan bu oyunla bağlı texniki məğlubiyyət qərarının verilməyəcəyinə işarə edib: "Hər iki oyunda dəhşətli hadisələr var. Oyunların ikisində də problemlər olub. Amma fərqli hadisələr və oyunlardır. Belə düşünmək lazımdır". Türkiyə Futbol Feerasiyasının son qərarı Super liqanın turnir cədvəlində lider dəyişikliyinə səbəb olub. "Bursaspor"a texniki qələbə verilməsi nəticəsində komanda 55 xal toplayıb və turnir cədvəlinin birinci pilləsinə yüksəlib. Hesabında 53 xalı olan "Qalatasaray" isə ikinci yerə düşüb. Üçüncü yerdə 51 xalı olan "Beşiktaş", dördüncü yerdə isə 49 xal toplayan "Fənərbaxça" qərarlaşıb.