Bilindiyi kimi, parlament seçkiləri ərəfəsində birlik niyyəti heç cür alınmayan müxalifət partiyaları arasında yaranan ziddiyyət, hələ ki, səngimək bilmir. Bu düşərgədə yeni birlik modellərinin ortaya atılması və ayrı-ayrı qüvvələrin fərqli münasibəti müxalifətdaxili ziddiyyəti daha da dərinləşdirir.
   Bununla yanaşı o da məlumdur ki, Müsavat Partiyası tərəfindən irəli sürülən yeni birlik modeli də müxalifəti bir araya toplaya bilmədi. Əksinə, növbəti ziddiyyətlərə rəvac verdi. Söhbət bu günlərdə sözügedən partiya tərəfindən 2010-cu il parlament seçkilərində müxalifətin birgə iştirakı ilə bağlı Rəsulzadə-Elçibəy ideyasına sadiq partiyaların birliyinin yaradılması təklifindən gedir. Xatırladaq ki, bu sırada ilk olaraq Müsavat, AXCP, KXCP-nin adları qeyd olunub. Bildirilib ki, belə birliyə digər partiyaların, ictimai təşkilatların, güclü namizədlərin cəlb edilməsi mümkün və məqsədəuyğun sayılır.
   Lakin elə həmin vaxt "Azadlıq" blokuna daxil olan Vətəndaş və İnkişaf Partiyasının (VİP) sədri Əli Əliyev sözügedən məsələni şərh edərkən bunu "cəmiyyətə ötürülən piar xarakterli məsələ kimi dəyərləndirdi: "Rəsulzadə irsi heç bir partiyanın şəxsi mülkiyyəti deyil. Rəsulzadə Azərbaycanın qurucusudur, onun tarixi irsi, Azərbaycan xalqına bəxş etdikləri hamıya məxsusdur. Heç kim, heç bir partiya özünü onun varisi elan edib cəmiyyətə sırıya bilməz. O ki qaldı Elçibəyə, o da bu gün AXCP-nin varisi olduğu təşkilatın rəhbəri olub. Bu partiya isə "Azadlıq" blokunun həmtəsisçisidir. Göründüyü kimi, Müsavat Partiyası haqsızlığa yol verir və hansısa sahələrdə monopoliya yaratdığını göstərmək istəyir. Rəsulzadə yolu Azərbaycanın bütün demokratik qüvvələrinin, Azərbaycan dövlətçiliyinin möhkəmlənməsində maraqlı olan bütün qüvvələrin yoludur. Hakimiyyətdə, YAP-da dövlətçiliyə xidmət edən insanlar var. Ona görə də, Rəsulzadəni bir partiyanın inhisarına almaq cəhdi gülünc, əsası olmayan cəhddir. Bu cür aldadıcı tezislərlə cəmiyyəti səhv istiqamətə yönəltmək uğursuzluğa məhkumdur".
   Proseslər göstərir ki, digər partiyaların da məsələyə münasibəti birmənalı deyil. Məsələn, Vətəndaş Həmrəyliyi Partiyasının sədri Sabir Rüstəmxanlı məsələni "milli. az" portalına şərh edərkən aşağıdakıları bildirib: "Birinci müəyyənləşdirmək lazımdır ki, Rəsulzadənin və Elçibəyin yolu nədir? Bu iki yolu yüz faiz bir-birinə adekvat saymaq doğru deyil. Bunların müəyyən fərqləri var və bu fərqlər də ortaya qoyulmalıdır."
   Partiya sədrinin sözlərinə görə, Rəsulzadə yolu Azərbaycanın siyasi, mənəvi müstəqilliyi, fəaliyyət və fikri azadlığıdır: "Bu mənada baxaq görək, bizdə partiyalardan hansı biri daha müstəqildir? Hansı daha çox milli və dövlətçilik maraqlarına xidmət edir? Hansı millətin gələcəyilə bağlı maraqları partiya maraqlarından daha üstün tutur? Yalnız bütün bunları aydınlaşdırdıqdan sonra müəyyənləşdirmək olar ki, hansı partiya Rəsulzadə yoluna, yaxud onların dediyi kimi, Elçibəy yoluna daha sadiqdir".
   VHP sədri bildirir ki, Müsavatın Rəsulzadə yolu ilə bağlı olduğunu iddia etməsi haradasa normaldır: "Çünki Müsavatı yaradan adamlardan biri Rəsulzadə olub. Amma bugünkü Müsavat öz hərəkətləri və atdığı addımlarla Rəsulzadə yoluna nə qədər bağlıdır, bunu demək çətindir. Bir sıra ciddi məqamlar var ki, orada indiki Müsavatla Rəsulzadənin yaratdığı Müsavatın yolları ayrılır. Amma bu mənim işim deyil. Bunu ortaya qoymaq Müsavatın tarixilə bağlı adamların işidir. O ki qaldı Xalq Cəbhələrinə, onlar üzdə, kağız üzərində müsavatçılıq ideyalarına, Elçibəy yoluna sadiq olduqlarını göstərsələr də, bir çox hallarda həm müsavatçılığa, həm də Elçibəyə xəyanət ediblər. Bu gün də o partiyaların içində "Elçibəyçiyəm" deyə-deyə onun yolunu getməyən insanlar da var".
   Ədalət Partiyasının sədri İlyas İsmayılov isə sözügedən portala açıqlamasında bildirir ki, onların məramnaməsində hədəfləri haqqında aydın yazılıb. "Biz dünyəvi, hüquqi dövlət qurmaq yolu ilə gedirik. Məramımız qanunun aliliyi, demokratik inkişaf, insan hüquqlarının qorunmasıdır. Yolumuz budur."
   Partiya sədri hesab edir ki, hansısa yolu müəyyən bir insanın adına bağlamaq doğru deyil: "Partiyalar adətən cəmiyyətdə təbəqələşmə, sinifləşmə gedəndən sonra yaranmalı və müəyyən təbəqənin maraqlarını, iradəsini ifadə etməlidir. Bizdə isə partiyaların yaranmasının kökündə bu dayanmır. Ona görə də siyasi partiyaların əksəri ideologiyanın, ideyanın yox, şəxslərin ətrafında qurulub. Məsələn, klassik parlamentarizmin olduğu İngiltərədə əsasən iki partiya vardı. Bir iri burjuaziyanın maraqlarını ifadə edən Mühafizəkarlar partiyası, biri də kiçik burjuaziyanın və daha aşağı sosial təbəqələrin maraqlarını ifadə edən Leyboristlər partiyası. Daha sonra cəmiyyətdə gedən proseslər nəticəsində liberal dünyagörüşlü insanlar yarandı və onların maraqlarını ifadə edən Liberallar partiyası da belə ortaya çıxdı. Bizdə isə partiyalar şəxslər ətrafında yaradıldı. Belə baxanda, bir çox nöqsanlarımız da bununla bağlıdır".
   

Parisdə işgüzar səfərdə olan Ermənistanın xarici işlər naziri Edvard Nalbandyan ATƏT-in Minsk Qrupunun həmsədrləri və ATƏT-in fəaliyyətdə olan sədrinin şəxsi nümayəndəsi Anjey Kaspşiklə görüşüb.
   APA-nın Ermənistan mətbuatına istinadən verdiyi məlumata görə, görüşdə Dağlıq Qarabağ münaqişəsinin nizamlanmasına dair danışıqların son durumu, həmsədrlərin yaxın zamanlarda regiona mümkün səfərilə bağlı məsələlər müzakirə olunub.
   Həmsədrlər martın 5-də Parisdə Azərbaycanın xarici işlər naziri Elmar Məmmədyarovla görüşün nəticələri barədə erməni naziri məlumatlandırıb.
   Nalbandyan həmsədrlərə bildirib ki, qondarma rejim danışıqlar prosesinə qoşulmadan münaqişənin nizamlanması mümkün deyil. O, Azərbaycan tərəfini aparılan danışıqların mahiyyət və məzmunu barədə ictimaiyyəti yanlış məlumatlandırmaqda ittiham edib.
   "Hər iki tərəfə eyni sənəd təklif olunub, yanlışlıqdan söhbət gedə bilməz". Bunu APA-ya açıqlamasında Xarici İşlər Nazirliyinin (XİN) mətbuat katibi Elxan Poluxov Ermənistan XİN başçısı Edvard Nalbandyanın Parisdə vasitəçilərlə görüşdə "Azərbaycan tərəfi danışıqların mahiyyəti və məzmunu barədə ictimaiyyətə yanlış məlumatlar verir" sözlərinə münasibət bildirərkən deyib.
   "Nazir Elmar Məmmədyarov açıq-aydın bəyan edib ki, təklif olunan yazılı sənəd Azərbaycan tərəfindən bəzi istisnalarla qəbul edilir" söyləyən diplomat bildirib ki, Ermənistan da eyni sənədi qəbul edirsə, bunu açıq bəyan etsin.
   E.Nalbandyanın "Dağlıq Qarabağ rejimi danışıqlar prosesinə qoşulmasa, münaqişənin nizamlanması mümkün deyil" fikirlərinə münasibət bildirən E.Poluxov deyib ki, Azərbaycan Dağlıq Qarabağın hər iki icmasının danışıqlar prosesində iştirakının müvafiq mərhələdə mümkünlüyünün istisna olmadığını dəfələrlə bəyan edib: "Lakin bu, ilkin addımlar atılandan sonra mümkün ola bilər".
   

Müsavat Partiyası ilə Demokratiya Uğrunda İttifaqa (DUİ) daxil olan partiya rəhbərlərinin parlament seçkilərinə hazırlıqla bağlı ilk görüşü keçirilib.
   DUİ-yə daxil olan Klassik Xalq Cəbhəsi Partiyasının sədri Mirmahmud Mirəlioğlunun APA-ya verdiyi məlumata görə, görüşdə Azərbaycandakı ictimai-siyasi vəziyyət, Dağlıq Qarabağ münaqişəsi müzakirə edilib: "Əsas müzakirə mövzusu isə bu il Azərbaycanda keçiriləcək parlament seçkilərində seçkinin demokratikliyini təmin etmək və real müxalifətin iştirak formatını müəyyənləşdirmək oldu. Qarşılıqlı anlaşma şəraitində keçən görüş məsləhətləşmələrin davam etdirilməsi qərarı ilə başa çatdı". M.Mirəlioğlu bildirib ki, məsləhətləşmələrin davam etdirilməsinə qərar verilməsi müsbət nəticənin əldə ediləcəyinə imkan yaradır: "Gözləntimiz budur ki, seçkilərdə real müxalifət birgə iştirak etmək məqsədinə çatacaq. İstisna olunmur ki, sonrakı mərhələdə əlavə partiyalar da bu müzakirələrdə iştirak edəcək". Görüşdə Müsavat başqanı İsa Qəmbər, KXCP sədri Mirmahmud Mirəlioğlu, Böyük Azərbaycan Partiyasının sədri Elşad Musayev, Xalq Partiyasının sədri Qiyas Sadıqov və Azadlıq Partiyasının sədri Əhməd Oruc iştirak edib.
   

Azərbaycanın hakim partiyası parlament seçkisilə bağlı ilkin planlarını açıqlayıb. "Seçki koalisiyası yaratmadıqlarından, parlament seçkilərində digər partiyaların namizədlərini müdafiə etməyəcəyik.
   Biz bütün seçkilərdə müstəqil iştirak etmişik, bu dəfə də belə olacaq. Bizim seçkilərdə təkbaşına iştirak etməyimiz üçün kifayət qədər potensialımız və namizədlərimiz var". Bu barədə çərşənbə günü Trend News-a hakim Yeni Azərbaycan Partiyası (YAP) icra katibinin müavini, millət vəkili Mübariz Qurbanlı bildirib. Qurbanlının sözlərinə görə, onlar yalnız YAP-ın platformasını müdafiə edən və Prezident İlham Əliyevin siyasətini dəstəkləyən partiyalarla əməkdaşlıq edir.
   "Amma seçki koalisiyası yaratmırıq. Siyasi partiyaların seçkilərdə iştirakı isə Seçki Məcəlləsilə tənzimlənir və bu prosesə partiyamız hər hansı formada müdaxilə etmir" - o əlavə edib. İcra katibinin müavini deyib ki, hakim partiya bütün dairələrdə namizəd irəli sürəcək. "Parlamentdə qazanacağımız yerlərin sayı isə seçicidən asılıdır. Bizim fikrimizcə, vətəndaşlar İlham Əliyevin siyasətini müdafiə edir və onun apardığı siyasətin simasında partiyamızın fəaliyyətinə qiymət verir, dəstəkləyirlər. Hesab edirik ki, seçicilərimiz partiyamızın namizədlərinə dəstək verəcək. Amma hansı dairədə irəli sürdüyümüz namizədimizin qalib gələcəyi seçki təşviqatından, namizədin şəxsi keyfiyyətindən, eyni zamanda, həmin dairədəki seçki kampaniyasının gedişindən asılı olacaq. Ona görə əvvəlcədən deyə bilərik ki, biz parlamentdəki üstünlüyü əldə saxlamaq üçün çalışırıq. Deputatların tərkibini indidən proqnozlaşdırmaq isə hələ tezdir" - millət vəkili vurğulayıb. Qurbanlı qeyd edib ki, seçki kampaniyasına rəsmi start verilməsə də, partiya seçkilərə indi də hazırdır.
   "Kadr potensialımız kifayət qədər yüksək həddədir. Bu səbəbdən hər hansı seçkilə bağlı real və ehtiyat namizədlərimiz bəllidir. Amma indiki şəraitdə dairələr üzrə namizədlərin müəyyənləşdirilməsi istiqamətində partiya daxilində müzakirələr aparılmır" - o xatırladıb.
   

Azərbaycan Milli İstiqlal Partiyası (AMİP) növbəti qurultayı ilə bağlı bu gün qərar verəcək.
   Partiyanın mətbuat xidmətindən APA-ya daxil olan məlumata görə, AMİP Siyasi Şurasının bu gün keçiriləcək iclasında qurultaya hazırlığa start veriləcək və qurultayın keçiriləcəyi tarix müəyyənləşəcək. Bundan başqa, toplantıda AMİP-in parlament seçkilərində iştirakı ilə də bağlı qərar qəbul olunması nəzərdə tutulub. Qeyd edək ki, AMİP sədri Ayaz Rüstəmov 2007-ci ilin dekabrında öz vəzifəsindən istefa verib. Həmin vaxtdan partiya sədrsiz fəaliyyət göstərir.
   
   

Qondarma "erməni soyqırımı"nın tanınması istiqamətində erməni lobbisinin, eləcə də Ermənistanın fəaliyyətini davam etdirməsi "Sürix protokolları"nın gələcəyini sual altına almaqla yanaşı, Türkiyədə yaşayan ermənilərin buradan deportasiyasını da stimullaşdırmaqdadır.
   Artıq məlumat verildiyi kimi, Türkiyənin xarici işlər naziri Əhməd Davudoğlunun ABŞ və İsveçdə uydurma "erməni soyqırımı" haqqında qərarların qəbulu ilə əlaqədar Böyük Millət Məclisinin (TBMM) Xarici İşlər Komissiyasında çıxışından sonra Milliyyətçi Hərəkat Partiyasından (MHP) olan sabiq diplomat Dəniz Bölükbaşı ABŞ Nümayəndələr Palatasının müvafiq komitəsinin qərarından sonra Türkiyə ilə Ermənistan arasında imzalanmış protokolların öz mənasını itirdiyini bildirib, bu səbəblə sənədlərin parlamentdən geri götürülməsini istəyib. Eyni partiyadan olan Tunca Toskay da Ermənistanla normallaşma prosesi başladıqdan indiyədək heç bir müsbət hadisənin baş vermədiyini söyləyib: "Ermənistan bizim şərq vilayətlərimizə hələ də Qərbi Ermənistan deyir, "soyqırım" məsələsində israrını davam etdirir. O zaman bu proses hansı işə yarayıb? Əksinə, Türkiyə ilə Azərbaycan arasında strateji əməkdaşlıq zədələnib".
   Cumhuriyyət Xalq Partiyasından (CHP) olan üzvlər isə Türkiyədə qeyri-leqal yaşayan və çalışan Ermənistan vətəndaşlarının deportasiyasını tələb edib. Bundan sonra isə məlum olub ki, Türkiyənin baş naziri Rəcəb Tayyib Ərdoğan da ermənilərin ölkədən çıxarılmasını istisna etmir. Londona səfəri zamanı Bi-Bi-Si dünya xidmətinə müsahibə verən Ərdoğan deyib ki, Birləşmiş Ştatlar və Türkiyə arasında münasibətlər Ermənistan və Türkiyə arasında münasibətlərdən asılı deyil. "Bizim Amerika ilə strateji müttəfiqliyimiz var və parlamentlər heç zaman tarixi faktları redaktə edə bilməzlər". Onun sözlərinə görə, bu məsələdə razılığa gəlinsə, Amerika və Türkiyə arasında münasibətlər, əvvəllər olduğu kimi, sağlam vəziyyətinə qayıdacaq. "Soyqırım iddialarının başqa ölkələrin parlamentlərində qəbul olunması ilə bağlı nə deyərdiniz" sualına isə Türkiyənin baş naziri belə cavab verib: "Bunların heç biri bizi maraqlandırmır. Bunların heç birisinin Ermənistanla Türkiyə arasında yeri yoxdur. Bunlar özləri özü üçün rol oğurlayır. Bu ölkələrin Ermənistanla nə əlaqəsi var, bunlara bu vəzifəni kim verdi? Hardan çıxarırlar bu görəvi? Burada tərəf ölkə varsa, bu da Türkiyə və Ermənistandır. Bunlar öz qərarları ilə şou yaradırlar. Və Ermənistan xalqına zərər verirlər. Bir şey olacaqsa da, dalana dirənir. Baxın, mənim ölkəmdə 170 min erməni var, onların 70 mini mənim vətəndaşımdır. Amma 100 minini biz ölkəmizdə hazırda yola veririk. Nə edəcəyəm sabah? Lazım olarsa, həmin o yüz minə "haydı, siz də gedin məmləkətinizə" deyəcəyəm, bunu edəcəyəm. Niyə? Çünki mənim vətəndaşım deyil bunlar. Ölkəmdə saxlamaq məcburiyyətində deyiləm. Yəni bu andan bizim bu səmimi yaxınlaşmamızı, təəssüf ki, çıxmaz istiqamətə yönəldirlər, bunun fərqində deyillər".
   Qarabağ məsələsinə də toxunan Ərdoğan ermənilərin diasporun əsirliyindən çıxmasının lazım gəldiyini də önə sürüb: "Ermənistanın diasporun nəzarətindən, girovluğundan qurtulması lazımdır. Burada da Minsk Qrupu üçlüyünün üzərinə çox ciddi vəzifələr düşür. Buna nail olunduğu zaman onsuz da bütün problemlər özbaşına ortadan qalxacaq. O zaman nə Türkiyədəki bu problemlər, nə Türkiyə-Ermənistan arasında bir sıxıntı, nə də Azərbaycan və Ermənistan arasında bir sıxıntı qalacaq".
   Ərdoğanın Avrasiya üzrə müşaviri Qeybulla Ramazanoğlu "Trend"-ə bildirib ki, Ermənistanla Türkiyənin baş nazirinin ölkədə qeyri-leqal yaşayan 100 min erməninin qovula biləcəyi haqda bəyanatından nəticə çıxarmalıdır: "Ermənistan və erməni lobbisi Ərdoğanın bəyanatından nəticə çıxarmalıdır. Ərdoğan bu bəyanatı ilə dünya ölkələrinə və erməni lobbisinə Türkiyənin də əlində ermənilərə qarşı geniş imkanların olduğunu göstərmək istəyir. Sirr deyil ki, Ermənistan "soyqırım" və bir çox vasitələrlə rəsmi Ankaraya təzyiq göstərməkdədir. Ermənistan başa düşməlidir ki, Türkiyə də onun kimi müxtəlif təzyiq vasitələrindən istifadə edə bilər".
   Bununla yanaşı, Ramazanoğlu hesab edir ki, erməni lobbisinin Ərdoğanın bəyanatından sonra geri çəkiləcəyi bir o qədər də inandırıcı deyil: "Ermənilərin rifahı heç vaxt erməni lobbisi üçün aktuallıq kəsb etməyib və lobbi Ermənistanın mənafeyi üçün çalışmayıb".
   Ərdoğanın bəyanatının Türkiyə-Ermənistan münasibətlərinin gələcəyinə necə təsir edəcəyilə bağlı sualı cavablandıran Ramazanoğlu qeyd edib ki, hazırda danışıqlar "dalana dirənib" və Ermənistan Türkiyə və Azərbaycana qarşı tutduğu mövqedən əl çəkməyənə qədər bu danışıqlarda irəliləyiş olmayacaq.
   "Mən Türkiyədə 100 min yox, 46 min Ermənistan vətəndaşı olduğunu bilirəm. Ancaq baş nazirin əlində başqa mənbələrdən gəlmə məlumatlar da ola bilər. Türkiyə öz qanunlarını tapdayaraq, indiyə qədər bu 100 min və ya 46 min erməninin ölkədə işləməsinə şərait yaradıb". Bu açıqlamanı APA-nın Türkiyə bürosuna "XXİ əsr Türkiyə" İnstitutunun direktoru, professor Ümit Özdağ verib. O, Türkiyədə qanunsuz yaşayıb işləyən ermənilərin hesabına Ermənistana Türkiyədən hər il külli miqdarda pul göndərildiyini bildirib: "Burada işləyən hər bir erməninin ayda Ermənistana 1000 dollar göndərdiyini ehtimal etsək, 100 min erməninin 1 ildə türk iqtisadiyyatından öz ölkəsinə 1 milyard 200 milyon dollar pul göndərdiyini görərik. Bu rəqəmi nəzərdən qaçırmaq olmaz. Ermənistanın kiçik iqtisadiyyatı üçün bu fövqəladə dərəcədə böyük rəqəmdir. Mən baş nazirin bu açıqlamasını gecikmiş bir addım kimi dəyərləndirirəm. Bu məsələ ilə bağlı bir an əvvəl konkret addımların atılmasını gözləyirəm".
   Ümit Özdağ Türkiyənin Ermənistana qarşı loyal siyasət yürütməklə səhv etdiyini anlamaq məcburiyyətində olduğunu deyib: "Türkiyə Ermənistana qarşı yumşaq siyasət yeritməklə necə səhvə yol verdiyini artıq anlamaq məcburiyyətindədir. ABŞ Nümayəndələr Palatası xarici əlaqələr komitəsinin son qərarının Ankaraya bəzi ciddi şeyləri göstərdiyinə inanıram. "Erməni açılımı"nın ən səhv tərəfi Azərbaycanla münasibətlərin düzgün koordinasiya edilməməsindədir. Ən yaxşı siyasət düşünə bilərsiniz, ancaq Azərbaycan buna "yox" deyirsə, demək, o pis siyasətdir. Türkiyə Qafqaz siyasətin müəyyənləşdirən zaman Azərbaycanla vahid dövlət kimi hərəkət etməlidir. Belə olmazsa, Türkiyənin həm Qafqaz, həm də Orta Asiya siyasətinə zərbə dəyəcək. Bu proseslərdə Azərbaycan da öz reaksiyasını ürək sındıran səviyyələrə çıxarmamalıdır. Reaksiyalar dövlət səviyyəsində göstərilməlidir, xalqlar bundan zərər görməməlidir. Ölkələrimizi idarə edənlər, hər şeydən əvvəl, bir-birinin dostu və qardaşı olduqlarını xatırlamalıdır".
   

ABŞ dövlət katibi Hillari Klinton bəzi KİV-in və rəsmilərin ABŞ-İsrail münasibətlərinin böhran yaşadığı barədə bəyanatlarını sərt tənqid edib.
   "Biz İsrailin təhlükəsizliyi məqsədinə sadiqik. ABŞ və İsrail arasında sıx və sarsılmaz münasibətlər mövcuddur. Bizi ümumi dəyərlər və dünyanın demokratik gələcəyinə yönəlik fəaliyyət birləşdirir" - deyə Klinton İrlandiya XİN başçısı Maykl Martinlə keçirdiyi birgə mətbuat konfransında bildirib.

ABŞ-ın qlobal analitik şirkəti "Stratfor"un APA üçün hazırladığı hesabatda bildirilir ki, Vaşinqton Azərbaycanın Türkiyəyə hərtərəfli dəstək verməsində maraqlıdır
   "ABŞ Konqresinin xarici əlaqələr komitəsində 1915-ci il hadisələrilə bağlı qəbul olunan qətnamə bir qrup konqresmen və senator tərəfindən hazırlanıb. Bunlar Kaliforniyadan Adam Şif, Corc Radanoviç, Konqresin Ermənistanla işçi qrupunun həmsədri Frank Pallone, Senatorlar Robert Menendez və Con Ensayndır". Bu fikirlər ABŞ-ın tanınmış qlobal analitik şirkəti "Stratfor"un APA üçün hazırladığı hesabatda öz əksini tapıb.
   Hesabatda bildirilir ki, qeyd olunan millət vəkilləri qətnamə ilə bağlı ABŞ Erməni Milli Komitəsilə məsləhətləşmələr aparıb. "Lakin qanun layihəsinə Ağ Evin aidiyyəti olmayıb. Barak Obama administrasiyası Konqresdə səsvermənin baş tutmasına mənfi yanaşır. Çünki onlar bu addımın ikitərəfli münasibətlərə ziyan vuracağını bilir. Həmçinin, Konqresdə may ayında səsverməyə çıxarılacaq qanun layihəsi icbari xarakter (non-binding resolution) daşımır və Türkiyənin üzərinə heç bir məsuliyyət qoymur.
   ABŞ hökumətində az sayda konqresmen və senator var ki, 1915-ci il hadisələrilə bağlı qanun layihəsindən Türkiyəyə təzyiq üçün istifadə edir. Onlar bir çox istiqamətdə rəsmi Ankaradan güzəştlər istəyir - Sürix protokolları, Rusiya ilə sıx əlaqələri yumşaltmaq, İran və Əfqanıstanla bağlı məsələlərdə Türkiyədən istədiyi dəstəyi almaq. Lakin Ağ Ev bilir ki, Türkiyə ilə danışmaq üçün təzyiq düz yol deyil və buna görə də may ayında Konqresdə "erməni soyqırımı" ilə bağlı səsvermənin keçirilməsinin qarşısını almaq istəyir". "Stratfor" analitikləri hesab edir ki, Türkiyənin ABŞ Konqresinin xarici əlaqələr komitəsinin qərarına cavabı, daha çox, simvolik xarakter daşıyırdı: "Səfir geri çağırıldı və belə şayiələr yayıldı ki, ABŞ-la bəzi iqtisadi layihələr yenidən diqqətdən keçirilə bilər. Lakin rəsmi Ankara bundan başqa heç bir addım atmadı. Həmçinin belə bir inam var idi ki, komitənin qərarı Ankara ilə İrəvan arasında imzalanan protokolların perspektivini sıfıra endirəcək. Lakin "Sürix protokolları" heç bir halda Türkiyə parlamentində ratifikasiya olunmayacaqdı. Bu baxımdan, protokollar ilə Konqresin qətnaməsi arasında çox cüzi əlaqə var".
   Analitiklər Azərbaycanın hadisələrə yanaşmasının çox maraqlı olduğunu qeyd edir: "Xüsusən Bakının Ankaraya verdiyi dəstək Birləşmiş Ştatları üçün maraq doğurur. Vaşinqton istəyir ki, erməni-türk danışıqlarına görə zədələnən Bakı-Ankara münasibətləri əvvəlki səviyyəyə qalxsın. Türkiyə Qafqazda mövqelərini bərpa edən Rusiyaya qarşı ABŞ-ın ən güclü dayağıdır. Ağ Ev Bakı ilə Ankaranın münasibətlərinin yenidən yaxşılaşması üçün hətta Ermənistanla münasibətləri belə qurban verə bilər. ABŞ Rusiyanı Qafqazdan uzaq saxlamaq üçün hər şeyə hazırdır".
   

Rəsmi Ankara Vaşinqtondan qondarma erməni soyqırımının tanınmasına dair qətnamənin ABŞ Konqresinin gündəliyinə daxil edilməyəcəyinə dair yazılı zəmanət tələb edir.
   Türkiyə kütləvi informasiya vasitələrinin yaydığı məlumata görə, rəsmi Ankara yalnız bu şərtlərlə Vaşinqtonda akreditə olunmuş səfiri Namik Tanı geri - Amerikaya yollaya bilər. Xatırladaq ki, cari ilin 4 mart tarixində ABŞ Konqresi Nümayəndələr Palatasının Xarici Əlaqələr Komitəsi qondarma erməni soyqırımının tanınmasına dair qətnamə qəbul edib. Sənədin qəbulundan dərhal sonra Ankara Vaşinqtondakı səfirini geri çağırıb.
   Analoji addım İsveç parlamentinin Xarici Əlaqələr Komitəsinin qondarma erməni soyqırımının tanınmasına dair qərarı qəbul etməsindən sonra da atılıb. Türkiyə Stokholmdakı səfiri Zergün Koruturkü etiraz olaraq geri çağırıb.