Qələmə müraciət etməzdən əvvəl amerikalı filosof və şair Ralf Uoldo Emersonun (1803-1882) bir aforizminə diqqət çəkmək istərdim. Dahi mütəfəkkir deyir ki, sivilizasiyanın həqiqi göstəricisi şəhərlərin böyüklüyündə, sərvətin və təhsilin səviyyəsində deyil, ölkənin və xalqın tərbiyə etdiyi insanın zahiri görünüşündə, onun davranışında və əxlaqındadır.
   Biz yalnız davranışımız, bir-birimizə münasibətimiz və ümumi maraqlara səmərə verməyimizlə sivil cəmiyyətin sivil üzvünə çevrilə bilərik.
   Bu mənada, Azərbaycan Mətbuat Şurası 2009-cu ildə dərc edilən neqativ meylli yazılara görə bir sıra mətbu nəşrlərə qarşı mətbuatın sıralarının təmizlənməsi kontekstində iş aparıb və bu missiya ictimaiyyət tərəfindən qəbul edilir. Lakin bəzi mətbu orqanlar MŞ-nin kollegial şəkildə qəbul etdiyi qərarlarını ləğv etmək və 100 min manatlarla "dəyən" mənəvi ziyanın ödənilməsi məqsədilə məhkəmə instansiyalarına müraciət edir. Bu da sivil bir yoldur. MŞ-nin səlahiyyətli nümayəndəsi və hüquqşünas kimi məhkəmə proseslərində müşahidə etdiyim halları və təəssüratımı oxucuların nəzərinə çatdırmağı vacib saydım. Əslində nə baş verir? Ad çəkmədən məsələlərə geniş şərh vermək niyyətindəyəm.
   Etik qaydalara, insani dəyərlərə, "Azərbaycan Jurnalistlərinin Peşə Davranışı Qaydaları"nın prinsiplərinə zidd olan, "Kütləvi İnformasiya Vasitələri Haqqında" Azərbaycan Respublikasının Qanununun tələblərinə uyğun gəlməyən, bəzən də həqarətlə və ləyaqətin alçaldılması ilə müşayiət edilən yazıların dərcinə görə yüzə yaxın mətbuat orqanının adı "reket nəşr" elan edilərək Mətbuat Şurasının "qara siyahı"sına salınıb.
   "KİV haqqında" Qanunun 10-cu maddəsi kütləvi informasiya azadlığından sui-istifadənin yolverilməzliyini önə çəkir. Bu baxımdan, bəşəri dəyərlərə zidd halları təbliğ etmək, mötəbər mənbə adı altında vətəndaşların şərəf və ləyaqətini alçaldan şayiələrin, yalan yazıların çap etdirilməsi, böhtan xarakterli, qanunazidd əməllərin törədilməsi məqsədilə KİV-dən istifadəyə yol verilmir.
   Təəssüflə qeyd etmək istəyirəm ki, bəzən redaktorlar, hüquqşünaslar da "reket qəzet"i hüquqi anlamda qəbul edir və onun hüquqi baxımdan AR Cinayət Məcəlləsinin 181-ci (Quldurluq - yəni özgənin əmlakını ələ keçirmə məqsədilə hücuma məruz qalmış şəxsin həyatı və ya sağlamlığı üçün təhlükəli zorakılıqla və ya belə zorakılığın tətbiq ediləcəyi hədəsilə bağlı olan basqın) və ya 182-ci maddələrinin (hədə-qorxu ilə tələb etmə - yəni zərərçəkmiş şəxsin və ya onun qohumlarının şəxsiyyəti üzərində zor göstərmə və ya onların əmlakını tələf etmə hədəsilə özgənin əmlakını və ya əmlaka olan hüququnu və ya əmlak xarakteri daşıyan digər hərəkətlər etməsini tələb etmə) tərkibini xatırladır. Göründüyü kimi, "reket qəzet" qınağı durğu işarəsinin əhatəsində yazıldığı üçün qeyd etdiyim hər iki maddənin dispozisiyasına şamil etmək, ən azı, naşılıqdır. Lakin sual yaranır: MŞ niyə məhz "reket" sözündən istifadə edir? MŞ-nin İdarə Heyəti belə qənaətə gəlir ki, qəzetlərdə həqarətlə yazılan məqalələrin ünvanlandığı şəxslər belə yazıları özünə qarşı hədə-qorxu, şantaj kimi dəyərləndirdiyindən, səbəblə nəticə arasındakı əlaqələri hər hansı bir məqsədə nail olmaq kimi qəbul edir. Ona görə MŞ digər tərəfi məzəmmət edərək ona "dur" deyir, gələcəkdə hərəkətlərində korrektələrin edilməsini xatırladır. Niyə də yox? Bir tərəfdən "KİV Haqqında", "Məlumat Azadlığı Haqqında" və "İnformasiya Əldə Etmək Haqqında" qanunlar, habelə ölkənin əsas qanunu KİV nümayəndələrinə cəmiyyətdəki iqtisadi, siyasi, ictimai və sosial durum haqqında, vəzifəli şəxslərin fəaliyyətləri barədə operativ və doğru-dürüst məlumat almaq hüququ verirsə, digər tərəfdən də belə hüquqlardan sui-istifadənin yolverilməzliyini sanki xitab etməklə vurğulayır.
   Mətbuatda dərc edilən belə yazılar ikinci tərəfin ləyaqətinə, ictimai və işgüzar nüfuzuna xələl gətirir. Amma narazı tərəf redaksiya ilə bağlı məhkəmədə iddia qaldırmadan Mətbuat Şurasına müraciət etməyi üstün tutur. Cavabdeh isə MŞ-nin şikayətçinin müraciəti əsasında qəbul etdiyi qərarının ləğvi məqsədilə məhkəmədə iddia qaldırır. Ləyaqət, şəxsiyyət və işgüzar nüfuz hamıya şamil olunduğundan, qarşılıqlı hörmət gözlənməlidir.
   Azərbaycan Respublikası Mülki Məcəlləsinin 21, 23, 1097-ci, Konstitusiyanın 46-cı maddələri mənəvi zərərin ödənilməsinə dair hüququ müdafiə edir. Lakin prosessual qanunvericilik mənəvi ziyanın aşağı və yuxarı həddini özündə əks etdirmir və belə ziyanın ödənilməsini sübut etmək vəzifəsi iddiaçının üzərinə düşdüyündən, bunu sübut edə bilmir. Mənəvi ziyanın nədən və necə əmələ gəldiyi, niyə məhz qeyd olunan məbləğdə ödənilməlidir" suallarına cavab tapılmır.
   "İnformasiya azadlığı haqqında" 1 yanvar 2005-ci il tarixli Qanunun 4-cü maddəsində informasiya azadlığının prinsipləri göstərilir. İnformasiyanın əldə edilməsinin qanuniliyi və onun etibarlılığı mühüm prinsiplərdəndir. Etiraf edək ki, qəzet bolluğu olan ölkəmizdə, demək olar ki, hər gün onlarla qəzet bu prinsipi pozur, amma qınağa çəkilmir. Dörd minə yaxın mətbu nəşri olan Azərbaycanda "bazara" çıxmaq üçün rəqabət demokratik prinsiplər üzərində və yaxud ictimai maraq kəsb edən müstəvidə deyil, qrup və şəxsi maraqlar daxilində aparılır.
   Bəzən yazırlar təhqir və böhtanlarla dolu, şəxsiyyəti alçaldan, nüfuza zərər vuran notlarla dərc etdiyi məqalədə, özündə cəsarət tapıb, nə adını, nə də şəklini verir, imza yerinə uydurulmuş bir ad və soyad qoyur. Belə hallar cəmiyyətdə ikrah hissi doğurur. Düşünürəm ki, belə şəxslər "reketçiliyə" gedən yolun yolçularıdır. Mətbuat Şurası fəaliyyətini Ədliyyə Nazirliyindən rəsmi qeydiyyatdan keçmiş Nizamnaməsi - dövlət sənədi əsasında qurur və bu səlahiyyətlərdən irəli gələn digər vəzifələri də həyata keçirir. Qəbul edilən qərarlar isə əvvəlcədən mətbu nəşrlərə xəbərdarlıqdan sonra kollegial şəkildə qəbul edilir və qənaətim belədir ki, bu qərarların "acılığına" səbr etməklə onun səmərəsini görmək mümkündür. Məcazi mənada ifadə etsək, dərmanın təsirini görmək üçün onun acılığına səbr etmək lazımdır.
   Bu il MŞ diffamasiya və MŞ haqqında qanunların Milli Məclisdə müzakirəsinə çalışır. Artıq "Reket qəzet" qınağına məruz qalmış bir neçə qəzetin üzərindən bu adın götürülməsi ilə bağlı komissiya monitorinqə başlayıb. İl ərzində mətbu nəşrin 12 sayı təftişə məruz qalmaqla, etik baxışlara və jurnalistlərin davranış kodeksinə zidd yazılar aşkar olunmazsa, həmin qəzetlərin üzərindən, belə demək mümkünsə, "qara pərdə" götürülə bilər.
   Məsəl var, deyirlər - döyüş ruhunda olmayanı döyüş zirehinə və kəmərinə öyrətmək olmaz. Jurnalist ruhunda, ovqatında olmayanı da qələmə, etikaya öyrətmək çox çətindir. Jurnalist ona görə həqiqəti, düzü-düz yazmalıdır ki, qələmin özü də düzdür. Səmavi kitablar da qələmlə yazılıb. Qələmin mürəkkəbi də yalnız və yalnız həqiqəti yazmaq üçündür. Adam gərək ona və başqasına kölgə verən ağacı kəsməyi əmr etməsin. MŞ-nin 200-ə yaxın təsisçisi var. Demək olar ki, aparıcı qəzet və jurnalların əksəriyyəti MŞ-nin, onun İdarə Heyətinin bu addımını qəbul edir və ölkədə sağlam media mühitinin qanunlara uyğun formalaşmasına çalışır. Bütün hallarda, dərc edilən yazılar ictimai önəm kəsb etmirsə, jurnalistin yazısı vicdanlılıq baxımından heç bir ölçüyə sığmırsa, tənqid hədəfi olan şəxsin ictimai nüfuza malik olması unudulursa, burada qeyri-peşəkarlıq və qərəzlilik var. Məhkəməyə müraciət edənlərin bir fikrinə də aydınlıq gətirmək istəyirəm. Barəsində informasiya getmiş fiziki və ya hüquqi şəxsin məhkəməyə üz tutması üçün ilkin qaydada kütləvi informasiya vasitəsinə müraciət etməsi mütləq şərt sayılmır. Yəni haqqında məlumat yayılmış şəxslərin informasiya vasitəsinə (qəzetə, jurnala) və ya məhkəməyə və yaxud da MŞ-yə müraciət etməsini mülahizəsinə görə özü həll edir. Fiziki və ya hüquqi şəxs birbaşa MŞ-yə müraciət edirsə, bunu ona irad tutmaq olmaz. Əsas məqsəd daxil olan müraciətə mahiyyəti üzrə və obyektiv baxılmasından ibarətdir. Bir fikrə də aydınlıq gətirmək istəyirəm. Bəzən iddiaçılar "MŞ-nin "Reket nəşr"lə bağlı belə səlahiyyəti" yoxdur ifadələrini tez-tez işlədirlər. Bəyan edirəm ki, MŞ-nin bu addımı ictimai təsir tədbiri kimi əxlaq normalarına riayət edilməsini özündə əks etdirir. Müasir cəmiyyət, əvvəlki illərdən fərqli olaraq, insanın mənəvi siması ilə yalançılıq keyfiyyətlərini bir yerdə görməyi arzulamır. Əxlaq normaları, hüquq normalarından fərqli olaraq, dövlət qanunları ilə təsbit edilmir. Belə normalar (əxlaq) hər birimizin davranışını tənzimləmək üçündür. Düşünürəm ki, MŞ-nin "reket" qərarı ictimai təsir tədbiri kimi belə qəzetlərin yazı davranışını tənzimləmək və fəaliyyətlərində korrektələr etmək üçündür. MŞ-nin kollektiv iradəsi "biz deyirik, sən dinlə və əməl et. Bu, hamımız üçündür" ifadəsinə uyğun səslənir. Amma sən dinləməyə, əməl etməyə də bilərsən. Bu da hər kəsin subyektiv baxış bucağına xas olacaq.
   "KİV Haqqında" Qanunun ilk prinsiplərindən biri olan obyektivlik prinsipi real vəziyyətin, həqiqətin əks olunma dərəcəsilə bağlıdır. Yəni proseslər, hadisələr, faktlar və şəxslər barədə yayılan məlumatlar gerçəkliyə uyğun olmalı, həqiqəti əks etdirməlidir. Amma məhkəmə çəkişmələrində dərc olunan yazıların ifadələrində bu prinsipin pozulmasının şahidi olursan.
   Sonda demək istərdim ki, demokratiya hüquqi dövlətin anlamına xas əlamət olduğundan, o, ictimai həyatın bütün sferalarında plüralizmə əsaslanır. Bu prinsip ideologiya sahəsində müxtəlif fikirlərin, ideya və konsepsiyaların sərbəst (həddi aşmadan) ifadəsi olsa da, başqalarının hüquqlarına zərər gətirəcək, şərəfinə toxunacaq xəttində dayanmalıdır. O xəttdə və həddə müvazinətimizi saxlaya bilməsək, sonrasından qəhərlənməyə dəyməz. Hamımıza həddi aşmamaq və qəhərlənməmək arzusu ilə.

Dünən Azərbaycan Mətbuat Şurasının Şikayətlər üzrə Komissiyasının növbəti iclası keçirilib. MŞ sədrinin müavini Umud Rəhimoğlu rəhbərlik etdiyi komissiyanın müzakirəsinə çıxarılan məsələlər barədə məlumat verib.
   İclasda müzakirə edilən ilk məsələ "Respublika gəncləri" qəzetinin 20-30 yanvar 2010-cu il tarixli sayında gedən "Macarıstandan redaksiyamıza məktub" rubrikalı, "Anama deyiləsi çox sözüm qaldı!" sərlövhəli yazı ilə bağlı olub. Belə rəyə gəlinib ki, narazılıq doğuran məqalə nəinki peşə prinsiplərinə zidd tərzdə qələmə alınıb, orada həmçinin milli-mənəvi maraqlara da sayğısızlıq göstərilib. Nəşr rəhbərliyinin yazını jurnalistika janrı kimi təqdim etməsilə bağlı fikirləri əsassız sayılıb. Komissiya "Respublika gəncləri" qəzetinin təkcə şikayətçi tərəfdən deyil, bütövlükdə Azərbaycan xalqından üzr istəməsini zəruri sayıb. Yekun rəydə qəzetə ciddi xəbərdarlıq edilməsi də əksini tapıb.
   Standartlaşdırma Metrologiya və Patent üzrə Dövlət Komitəsinin "Gündəm xəbər" qəzetilə bağlı şikayəti müzakirə edilərkən belə rəyə gəlinib ki, narazılıq doğuran materialda "Azərbaycan Jurnalistlərinin Peşə Davranışı Qaydaları"nın bir sıra tələblərinə sayğısızlıq göstərilib. Qarşı tərəfin mövqeyi öyrənilməyib, həmçinin bunun edilməsinə cəhd göstərildiyi barədə də bilgi yoxdur. Qeyd edək ki, "Gündəm xəbər" qəzetinin fəaliyyəti Şuranın əvvəlki iclaslarının birində də müzakirəyə çıxarılıb və həmin vaxt nəşrə ciddi xəbərdarlıq olunub. Komissiya mövcud faktı və müzakirə edilən hazırkı məsələnin mahiyyətini nəzərə alaraq, bu nəşrlə bağlı materialın Şuranın "Reket" jurnalistikaya qarşı mübarizə Komissiyasında araşdırılması rəyinə gəlib.
   İclasda "Türk Azərbaycan dünyası" qəzetilə bağlı materialların da sözügedən komissiyada araşdırılması məqsədəmüvafiq sayılıb. Nəşr barədə müzakirə edilən konkret şikayət Qazax Rayon Təhsil Şöbəsindən olub.
   Millət vəkili Nazim Məmmədovun "Azərbaycan Cumhuriyyəti" və "Aktual" qəzetlərilə bağlı müraciəti müzakirə edilərkən bildirilib ki, deputat barədə gedən materialların təqdimatında qərəz motivləri mövcuddur. Etik prinsiplərin tələbləri pozulub, qarşı tərəfin mövqeyi verilməyib. Hər iki nəşrə şikayət doğuran məqamlarla bağlı təkzib verilməsi və qarşı tərəfin mövqeyinin işıqlandırılması tövsiyə olunub.
   

"İranda novruz bayramı geniş və şadlıq içində keçiriləcək". Bu barədə APA-ya İranın Azərbaycandakı səfirliyinin mətbuat katibi Abbas İsgəndəri məlumat verib.
   Onun sözlərinə görə, bəzi mətbuat vasitələrinin İranda bu il Novruz bayramının qeyd olunmayacağı barədə məlumatları əsassızdır: "Bu bizim və müxtəlif xalqların bayramıdır. Bu bayram İranda, həmişə olduğu kimi, bu il də şadlıq və bayram əhval-ruhiyyəsində qeyd olunacaq". A.İsgəndəri bildirib ki, İranın ali dini lideri Ayətullah Xamneyi bu il də ölkə vətəndaşlarını və digər xalqları Novruz bayramı münasibətilə təbrik edəcək.
   

Son dövrlər avronun dünya miqyasında mövqeyinin zəifləməsi, xüsusən də onun dollar qarşısında yenidən ucuzlaşması bir sıra maraqlı dəyişikliklərə gətirib çıxarmaqdadır. Söhbət, ilk olaraq, avro ilə saxlanan valyuta ehtiyatlarının strukturuna edilə biləcək dəyişikliklərdən gedir. Rusiyanın "nyusinfo" portalının yazdığına görə, dünyanın bir çox ölkələrində bununla bağlı ciddi müzakirələr aparılmaqdadır.
   İstisna olunmur ki, yaxın tezlikdə postsovet ölkələri də analoji addımlar atacaq. Belə dövlətlərə misal olaraq, ilk növbədə Rusiya və Azərbaycanın, həmçinin Qazaxıstan və Türkmənistanın adı çəkilir. Çünki məhz bu dövlətlər postsovet ölkələri arasında valyuta ehtiyatlarına görə fərqlənir. Bu arada isə artıq məlum olub ki, Rusiyanın Mərkəzi Bankı artıq aktivlərində dəyişiklik etməyə qərar verib. Onu da qeyd edək ki, Mərkəzi Bankın maliyyə səbətində hansı valyutanın olması onun fəaliyyət istiqamətinin əsas şərtlərindəndir.
   Azərbaycana gəlincə isə, ilk növbədə o qeyd edilməlidir ki, Mərkəzi Bankın valyuta ehtiyatlarının həcmi hələ də azalmaqda davam edir. Məlumata görə, fevral ayında Azərbaycanın beynəlxalq ehtiyatlarının həcmi 1,9% azalaraq 5 milyard 775,3 milyon dollara düşüb.
   Yanvarda Mərkəzi Bankın beynəlxalq ehtiyatlarının həcmi 5 milyard 887,4 milyon dollar təşkil edib. Fevral ayında ehtiyat 112 milyon dollar azalıb. Xatırladaq ki, ölkənin beynəlxalq ehtiyatlarının tərkibində qızıl yoxdur. Məlumat üçün onu da bildirək ki, beynəlxalq ehtiyatlara Neft Fondunun vəsaiti daxil deyil.
   Mərkəzi Bankın valyuta ehtiyatı 2008-ci il dekabrın 31-də ən yüksək həddə çataraq 6 milyard 137 milyon dollar təşkil edib. Bankın valyuta ehtiyatı 2009-cu ilin iyul ayında ən aşağı həddə - 4 milyard 787 milyon dollara düşüb.
   Ekspertlər hesab edir ki, Mərkəzi Bankın valyuta ehtiyatı yalnız neftin qiymətindən asılı olaraq arta bilər. Belə hesab edilir ki, neftin qiyməti yenidən 100 dollarlıq həddi keçdikdən sonra hökumət, Neft Fondu ilə yanaşı, Mərkəzi Bankın valyuta ehtiyatlarının artması üçün də vəsait ayıra bilər. Əks təqdirdə, proseslər indiki templə gedərsə, Mərkəzi Bank valyuta ehtiyatlarının itkisindən qurtula bilməyəcək.
   Araşdırmalara görə isə, bu il ərzində neftin bir barrelinin orta qiyməti, ən yaxşı halda, 80-90 dollar təşkil edəcək. Yalnız 2011-ci ildə dünya bazarında neftin bir barrelinin orta qiymətinin 110 dollar olacağı gözlənir. ABŞ-ın "Goldman Sachs" bankının analitikləri qeyd edir ki, 2011-ci ildə neftə olan dünya tələbatı artacaq və bu artım ilk növbədə iqtisadiyyatı güclü inkişaf edən ölkələr tərəfindən baş verəcək. Bankın hesablamaları Nyu-York birjasında satılan yüngül Texas nefti əsasında aparılıb.
   "Goldman Sachs" bankı 2010-cu ilin ortalarında Nyu-York birjasında neftin bir barrelinin qiymətinin 90 dollar olacağını gözləyir. Bununla yanaşı, ABŞ bu il Azərbaycanda sutkada 1,1 milyon barrel neft hasil olunacağını proqnozlaşdırıb. Amerikanın Enerji İnformasiyaları Dövlət İdarəsinin (EİA) açıqladığı hesabatda göstərilir ki, 2010, 2020, 2025 və 2030-cu illərdə Azərbaycanda sutkalıq neft hasilatı orta hesabla 1 milyon barrel olacaq. Həmin illərdə dünya bazarında neftin qiyməti yüksək olarsa, bu rəqəm 900 min barrel həcmində proqnozlaşdırılır. Əksinə, neftin qiyməti ucuzlaşarsa, sutkalıq neft istehsalı həcminin 2025-ci ildə 1,2 milyon, 2030-cu ildə 1,3 milyon barrelə çatacağı güman olunur. 2010, 2015 və 2020-ci illərdə isə bu rəqəmin 1,1 milyon təşkil edəcəyi nəzərdə tutulur.
   Enerji İnformasiyaları Dövlət İdarəsi, həmçinin, Xəzər hövzəsində neft hasilatı üzrə gözləntiləri açıqlayıb. Proqnoza görə, Xəzər hövzəsində sutkalıq neft hasilatı 2010-cu ildə 2,9 milyon, 2015-ci ildə 3,8 milyon, 2020-ci ildə 4,1 milyon, 2025-ci ildə 4,3 milyon, 2030-cu ildə 4,6 milyon barrel olacaq ki, bu da 2006-cı ilə nisbətən 2,9 faiz artım deməkdir.
   Neftin qiymətilə bağlı baş verənlər Mərkəzi Banka hələlik valyuta ayrılmasına imkan vermir. Bu isə o deməkdir ki, qlobal maliyyə böhranı ilə bağlı olaraq Mərkəzi Bank Azərbaycanda bu problemdən zərər görən obyektlər sırasında yer alır. Onu da xatırladaq ki, Azərbaycanın valyuta ehtiyatları, əsasən dollar və avro ilə diversifikasiya olunub. Bu səbəbdən nəticə qeyd olunan valyutaların məzənnəsinin enib-qalxmasından da çox asılıdır.
   Ekspertlər, qlobal böhranın ikinci dalğası başlayacağı təqdirdə Mərkəzi Bankın daha çox valyuta itkisilə üzləşəcəyini istisna etmir. Hadisələr bu səpkidə inkişaf edərsə, hökumət Neft Fondundan Mərkəzi Banka müəyyən miqdarda valyuta transfer etmək məcburiyyətində qalacaq. Proseslərin bununla nəticələnəcəyini bildirən ekspertlərin sayı isə artmaqdadır. Çünki bu il ərzində də qlobal maliyyə böhranının davam edəcəyi və onun ikinci dalğasının gələcəyi artıq dünya miqyasında da qəbul olunmaqdadır.
   

Martın 17-də Milli Məclisin Təbii ehtiyatlar, energetika və ekologiya komitəsinin iclası keçirilib. Komitənin sədr müavini Elton Məmmədov "Media forum" saytına açıqlamasında deyib ki, iclasda "Elektroenergetika haqqında", "Qaz təchizatı haqqında" və "Su təchizatı və tullantı suları haqqında" qanunlara təklif edilən əlavə və dəyişikliklər layihəsi müzakirə olunub.
   Layihəni qanunvericilik təşəbbüsü ilə prezident İlham Əliyev Milli Məclisə göndərib.
   E.Məmmədov bildirib ki, qanunlara təklif edilən əlavə və dəyişikliklərə əsasən, Dövlət Qəbul Komissiyası yeni tikilən hər hansı bir binanı tam istismara qəbul edənədək bu binalara, onun mənzillərinə elektrik, qaz və su verilə bilməz: "Eyni zamanda, yeni tikilən yaşayış binaları tam istismara qəbul olunanadək mənzillərdə elektrik, qaz və su sayğacları quraşdırıla bilməz. Həyat inkişaf edir, sahə qanunları isə onunla ayaqlaşmır və dəyişiklik zərurəti yaranır. Təklif olunan əlavə və dəyişikliklər qanunların təkmilləşdirilməsinə xidmət edir. Prezident əhalinin təhlükəsizliyi haqda düşünür. Ona görə də bunlar çox zəruri əlavə və dəyişikliklərdir. Pul verib köçüb yaşamaqla deyil. Qanun var və hər şey onun əsasında həyata keçirilməlidir. Bu dəyişikliklər hər bir insanın mülkiyyət hüququnu təmin edəcək. Amma bina istismara veriləndən sonra".
   Martın 17-də keçirilən iclasda layihə təsdiqlənmək üçün Milli Məclisin iclasına tövsiyə edilib.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası "Azərbaycanda vətəndaş cəmiyyətinin inkişafında qeyri-hökumət təşkilatlarının rolu və vəzifələri" mövzusunda QHT fəaliyyətinin işıqlandırılması üzrə jurnalistlər üçün müsabiqə elan edib.
   Şuranın mətbuat xidmətindən APA-ya verilən məlumata görə, müsabiqəyə hər jurnalistin yalnız bir məqaləsi qəbul edilir. Məqalələr 2010-cu ilin mart, aprel, may və iyun aylarında gündəlik qəzetlərdə, eləcə də media məkanının aparıcı informasiya saytlarında çap edilməli və aşağıdakı qeydlə müşayiət olunmalıdır: "Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının QHT fəaliyyətinin işıqlandırılması həsr olunmuş jurnalistika müsabiqəsində iştirak üçün".
   Məqalə 7-10 min kompüter işarəsi həcmində olmalıdır. Məqalənin mətbuatda çap olunan və ya elektron saytda verilən variantında müəllifin imzası vacibdir. Başqa müsabiqələrdə iştirak etmiş yazılar müsabiqəyə qəbul olunmur. Jurnalistlər müsabiqəyə məqalənin çap edildiyi mətbu orqanın 1 nüsxəsi və ya elektron saytdan çıxarılmış surətini, mətbuatda çap edilmiş varianta adekvat olan 3 nüsxə məqalənin əlyazmasını (müəllif imzası olmadan), elektron variantını, şəxsiyyət vəsiqəsinin surətini, jurnalistin KİV-də çalışması haqda müvafiq arayışı, VÖEN surətini (əsas mükafatı alarkən jurnalist öz adına olan kassa-mədaxil orderi verməlidir) təqdim etməlidir. Müsabiqə üzrə 6 əsas mükafatın verilməsi nəzərdə tutulur. 2 I yerin hər biri üçün 1000 AZN, 2 II yerin hər biri üçün 800 AZN, 2 III yerin hər biri üçün 500 AZN mükafat təyin olunub. Bunlardan əlavə jurnalistlərə hər biri 100 AZN məbləğində 10 həvəsləndirici mükafat veriləcək. İddiaçılar məqalə və sənədlərini elanın mətbuatda verildiyi tarixdən iyulun 1-dək Şuranın katibliyinə təqdim edə bilər.
   

Moskvanın Yaroslavl vağzalında ölümlə müşayiət olunan çoxsaylı soyğunçuluq, quldurluq və dələduzluqda təqsirli bilinən Azərbaycan vətəndaşı həbs edilib.
   Milli.Az xəbər portalı Rusiya mətbuatına istinadən xəbər verir ki, hüquq-mühafizə orqanlarının məlumatına görə, saxlanan 46 yaşlı Nazim Qasımov cinayətkar fəaliyyəti üçün elektrik qatarları, vağzallar və vağzalətrafı əraziləri seçib. N.Qasımovun pul qoparmaq üçün üç yoldan istifadə etdiyi bildirilir. Birinci ssenariyə görə, o özünü kriminal aləmdə nüfuzlu şəxs və Moskvadakı vağzallara nəzarət edən "qanuni oğru" kimi təqdim edib. Rusiya DİN nəqliyyatda asayişin təmin edilməsi departamentinin məlumatına görə, o, vağzallara nəzarət edən cinayətkar qrupun lideri kimi vətəndaşlardan kriminal qruplaşmanın xəzinəsi üçün pul tələb edib. Nazim Qasımovun "qurban"ları arasında Rusiyaya başqa yerlərdən gəlmiş şəxslər üstünlük təşkil edib. Əməliyyat məlumatlarına görə, N.Qasımov rus millətinə nifrətilə də tanınıb. O, ruslardan başqa ölkələrdən gələnlərlə müqayisədə daha çox pul alırmış. İkinci ssenariyə görə, o, soyğunçuluq üçün güclü psixotrop vasitələrdən istifadə edib və onları zərərçəkənlərin içkisinə qatıb. O, elektrik qatarlarının sərnişinlərinin içkilərinə kimyəvi preparatlar qataraq, onları qarət edib. Bəzi hallarda Nazimə cazibədar qadınlar da kömək edib. Hazırda onların axtarışları davam etdirilir. Üçüncü ssenari isə vətəndaşların birbaşa qarət edilməsidir. N.Qasımov zərərçəkənləri hədələyərək, pullarını alıb. Əməliyyatçılar N.Qasımovu ölümlə müşayiət olunan dələduzluq əməllərində də şübhəli bilir. Məsələn, o, bir qadının mənzilinə sahiblik hüququnu əldə edərək, onu satıb. O vaxtdan qadından xəbər yoxdur. Milis idarəsindən bildirilib ki, Nazim Qasımov uzun illər məhkumluq həyatı yaşayıb. Lakin onun hansısa iri kriminal qruplaşmanın üzvü olub-olmadığı və ya "qanuni oğru" sayılıb-sayılmadığı məlum deyil. Yalnız bir şey məlumdur ki, həbs olunan Azərbaycan vətəndaşı ömrünün 20 ildən çoxunu məhkumluqda keçirib.
   

Bakıda saxta sənəd hazırlayan Pakistan vətəndaşlarından ibarət dəstə zərərsizləşdirilib. Bu barədə APA-ya Daxili İşlər Nazirliyindən məlumat verilib.
   Məlumata görə, DİN-nin Baş Pasport Qeydiyyat və Miqrasiya İdarəsi əməkdaşlarının həyata keçirdiyi əməliyyat tədbirləri nəticəsində Pakistan vətəndaşları Abid Muhammadın, Aşraf Vasimin və Tahir Naemin ali məktəblərə təhsil almaq haqqında saxta arayışlar, eyni zamanda, ölkə ərazisində müvəqqəti yaşamaq hüquqi verən saxta sənədlər və ölkədə 30 gündən artıq yaşamaq istəyən əcnəbilərin qeydiyyata alınması haqqında saxta vəsiqələr hazırladığı və satdığı müəyyən edilib. Faktla bağlı araşdırmalar davam etdirilir.
   
   
   
   
   

Azərbaycan prezidenti İlham Əliyev Novruz bayramı münasibətilə bir qrup məhkumun əfv olunması haqqında sərəncam imzalayıb.
   Prezidentin mətbuat xidmətindən APA-ya verilən məlumata görə, sərəncamla Azərbaycan Prezidentinə ünvanlanmış əfv haqqında müraciətləri, məhkumların şəxsiyyətini, səhhətini, ailə vəziyyətini, cəza çəkdikləri müddətdə davranışları nəzərə alınaraq, humanizm prinsiplərinə əsaslanaraq, 62 məhbus cəzasının çəkilməmiş hissəsindən azad edilib.
   Sərəncam ümumilikdə 72 məhbusa şamil edilib. Sərəncam imzalandığı gündən qüvvəyə minir.
   Onların arasında "Azadlıq" qəzetinin həbsdə olan baş redaktoru Qənimət Zahid də var.
   Qeyd edək ki, "Azadlıq" qəzetinin baş redaktoru Q.Zahid 2007-ci ildə həbs edilib. O, məhkəmənin qərarı ilə 4 il müddətinə azadlıqdan məhrum edilib.
   Əfv olunan məhbusların tam siyahısı:
   I. Azadlıqdan məhrum etmə cəzasına məhkum edilmiş aşağıdakı şəxslər cəzanın çəkilməmiş hissəsindən azad edilsin:
   1. Abasov Həşim Üzeyir oğlu
   2. Akperi Elşad Məmməd oğlu
   3. Alıyev Eltun Yusif oğlu
   4. Alıyev Vaqif Hətəm oğlu
   5. Altaf Hüseyn Qayser
   6. Aslan Qabil oğlu
   7. Aslanlı Samir Zakir oğlu
   8. Atakişiyev Elnur Qüdrət oğlu
   9. Bağırov Sərxan Eldəniz oğlu
   10. Bədəlov Kamran Zakir oğlu
   11. Cabbarov Elşad Mirməmməd oğlu
   12. Cəbrayılov Anar Ərəstun oğlu
   13. Cəfərzadə Elxan Ələkbər oğlu
   14. Daşdəmirov Rasim Vilayət oğlu
   15. Doşanov İlkin Ramazan oğlu
   16. Əhədov Tərxan Elman oğlu
   17. Əhmədov Ayaz Oktay oğlu
   18. Əliyev Ceyhun Qədir oğlu
   19. Əliyev Elçin Məmmədağa oğlu
   20. Əliyev Rauf Müzəffər oğlu
   21. Əliyev Rövşən Soltan oğlu
   22. Əliyev Sabir Saleh oğlu
   23. Əsədov Əkbər Səməd oğlu
   24. Fərəcov Füzuli Kəlbəli oğlu
   25. Fərzəliyev Ağababa Əmir oğlu
   26. Fətəliyev Rafiq Əli oğlu
   27. Gözəlli Röyal Şahin oğlu
   28. Hacıyev Rauf Məsud oğlu
   29. Haqverdiyev Rafiq İdris oğlu
   30. Həsənov Arzuman Musa oğlu
   31. Hüseynli Aqşin Rafiq oğlu
   32. Hüseynov Ələmdər Bayram oğlu
   33. İbrahimov Sadiq Bayram oğlu
   34. İmanov Vüqar Zöhrab oğlu
   35. İsayev Vaqif Vahid oğlu
   36. Kərimov Anar Hüseyn oğlu
   37. Kərimov Şahin Vidadi oğlu
   38. Klişev Sergey Aleksandroviç
   39. Qafarov Sadıq Xanqulu oğlu
   40. Qurbani Məhəmmədəli Firuz oğlu
   41. Qurbani Şəmsəli Eynəli oğlu
   42. Qurbanov Elşən Kamal oğlu
   43. Məmmədov Elvin Maarif oğlu
   44. Məmmədov Əvəz Lətif oğlu
   45. Məmmədov Rövşən Yaşar oğlu
   46. Nəsirov Elgün İslam oğlu
   47. Novruzov Şərif Məmməd oğlu
   48. Novruzov Tələt Rafiq oğlu
   49. Orucov Sahil Daşdəmir oğlu
   50. Paşayev Həşim Rəsul oğlu
   51. Rəhimov İbrahimxəlil Əli oğlu
   52. Rəhimov Qoşqar Rəsul oğlu
   53. Rüstəmov Rafəddin Yavər oğlu
   54. Salıfov Elçin İslam oğlu
   55. Salmanov Vüsal Ağabəy oğlu
   56. Səfərov Adil Rasim oğlu
   57. Səmədov Ruslan Yuri oğlu
   58. Şirinov Faiq Əbülfəz oğlu
   59. Şirinov Fuad Adıgözəl oğlu
   60. Vəliyev Ədalət Səttar oğlu
   61. Zayidov Qənimət Səlim oğlu
   62. Zıkov Oleq Vyaçeslavoviç
   II. Bakı şəhəri Nərimanov Rayon Məhkəməsinin 2006-cı il 25 sentyabr tarixli hökmü ilə azadlıqdan məhrum etmə cəzasına məhkum edilmiş və cəzasının çəkilməsi təxirə salınmış, 1981-ci ildə anadan olmuş, Azərbaycan Respublikasının vətəndaşı Fətullayeva Nəzakət Balakişi qızı cəzadan azad edilsin.
   III. Azadlığın məhdudlaşdırılması cəzasına məhkum edilmiş aşağıdakı şəxslər cəzanın çəkilməmiş hissəsindən azad edilsinlər:
   1. Babayev Rafiq Rahim oğlu
   2. Behbudov Xəyyam Behbud oğlu
   3. Cəfərov Samid Umudvar oğlu
   4. İbişov Amid Əjdər oğlu
   5. Kərimov Mədəd Ziyad oğlu
   6. Mayılov Hikmət Ziyəddin oğlu
   7. Mənsimov Səməd İbadət oğlu
   IV. Bakı şəhəri Nəsimi Rayon Məhkəməsinin 2008-ci il 20 may tarixli hökmü ilə cərimə cəzasına məhkum edilmiş, 1969-cu ildə anadan olmuş, Azərbaycan Respublikasının vətəndaşı Məmmədov İftixar Mağbet oğlu cəzadan azad edilsin.
   V. Bakı Şəhər Məhkəməsinin 1997-ci il 23 may tarixli hökmü ilə ölüm cəzasına məhkum edilmiş və ömürlük azadlıqdan məhrum etmə növündə cəza çəkən 1962-ci ildə anadan olmuş Azərbaycan Respublikasının vətəndaşı İsmayılov Təbriz Ağabala oğlunun cəzası 20 il müddətə azadlıqdan məhrum etmə cəzası ilə əvəz edilsin.

PKK terror təşkilatının lideri Abdullah Öcalanın qardaşı Osman Öcalan bildirib ki, PKK artıq silah gücünə nəyəsə nail olmağın mümkünsüzlüyünü anlayıb.
   Milli.Az xəbər portalının məlumatına görə, o, "Reuters"ə müsahibəsində deyib: "Abdullah Öcalan İmralı həbsxanasından buraxılaraq ev dustağı edilərsə, PKK silahı yerə qoymağa hazırdır". Osman Öcalan onu da iddia edib ki, Türkiyə kürd problemilə bağlı siyasi qərar verib, "kürdlərin muxtariyyat istəyini gerçəkləşdirməsə", artıq 25 ildir davam edən mübarizə bitməyəcək və sonda yenə də heç kim qalib gəlməyəcək: "PKK-ya qalib gəlmək mümkün deyil. Çünki onun sıralarına qoşulmaq istəyənlərin sayı həmişə kifayət qədərdir".
   

Azərbaycan və türk diasporu martın 21-də İsveçin paytaxtı Stokholmda mitinq keçirəcək.
   Diasporla İş üzrə Dövlət Komitəsindən APA-ya verilən məlumata görə, aksiya İsveç vaxtı ilə saat 14.00-dan 16.00-dək (Bakı vaxtı ilə 17.00-19.00) Stokholmun "Sergels Torg" meydanında baş tutacaq.
   İsveç parlamentinin uydurma "erməni soyqırımı" haqqında qətnamə qəbul etməsinə etiraz ifadə olunacaq mitinqi "İsveç Türk İş Dərnəkləri Federasiyası", "Azərbaycan Naminə", "Odlar Yurdu", "Vətən" və "Yeni Azərbaycan" cəmiyyətləri təşkil edir.
   

ABŞ-ın Yaxın Şərq və Mərkəzi Asiya regionlarında baş komandanı general Devid Petreus bildirib ki, İranın BMT Təhlükəsizlik Şurasının qətnamələrinə əməl etməyərək nüvə proqramını davam etdirməsi bölgədə sabitliyə əsas təhlükə olaraq qalır.
   General Senatda dinləmələr zamanı qeyd edib ki, İran nüvə silahı istehsal etmək qabiliyyətinə maliik olsa, bu, regionda qeyri-sabitlik və silah yarışına gətirib çıxaracaq. Onun sözlərinə görə, İran İraq, Livan, Qəzza zolağı və az səviyyədə Əfqanıstanda ekstremist elementlərə silah və yardım verməyə, habelə onları idarə etməyə davam edir. O, İranın bu ölkələrin daxili siyasətinə müdaxilə etməyə davam etdiyini bildirib. Qeyd edək ki, bundan əvvəl
   Amerika Birləşmiş Ştatları məhz general Devid Petreusun simasında, ilk dəfə olaraq, diplomatların səyləri və iqtisadi sanksiyalar lazımi nəticə vermədiyi halda, İranı nüvə obyektlərinə raket-bomba zərbəsi endirəcəyilə hədələyib. Cari ilin əvvəllərində o bildirib ki, Pentaqon İranın nüvə problemini güc yolu ilə həll etməyin bir neçə variantını hazırlayıb: "Hadisələrin bütün mümkün inkişaf variantlarını və gözlənilməyən hallar yaranarsa, atılacaq addımları düşünməmək Mərkəzi Komandanlıq tərəfindən çox böyük məsuliyyətsizlik olardı".
   General deyib ki, İran məhz onun rəhbərlik etdiyi komandanlığın nəzarət sahəsinə daxildir. Ona görə də hərbi əməliyyatlar planı hazırda onun əlinin altındadır. Mərkəz Komandanlığı Amerika ordusunun 10 strukturundan biridir və Yaxın Şərq, Şərqi Afrika və Mərkəzi Asiya regionlarında mümkün hərbi əməliyyatlar zamanı silahlı qüvvələrin idarə edilməsinə məsuliyyət daşıyır. Petreus İrana qarşı hərbi əməliyyatlar planının detallarını açıqlamayıb, ancaq deyib ki, Pentaqonun hazırladığı planda hadisələrin bütün mümkün inkişaf ssenariləri öz əksini tapıb. İranın nüvə obyektlərinin nə dərəcədə sıradan çıxarıla biləcəyi haqda danışan Petreus deyib ki, son vaxtlar Tehran öz nüvə obyektlərini yeraltı bunkerlərdə yerləşdirib və möhkəmləndirib: "Buna baxmayaraq, Amerikanın imkanları onları sıradan çıxarmağa yetər. Bu cür obyektlər nə qədər möhkəmləndirilsə də, xüsusi bunkerdağıdan bombalardan yayına bilməyəcək. Əlbəttə, onları bombalamaq olar. Zərbələrin effektivliyi ondan asılı olacaq ki, hansı silahlardan və bombalardan istifadə olunacaq".
   Bundan əvvəl isə Amerika Silahlı Qüvvələri Qərargah Rəisləri Komitəsinin rəhbəri admiral Maykl Müllen bəyan etmişdi ki, Birləşmiş Ştatlar ordusu İrana qarşı hərbi əməliyyatlar üçün hazırlıqlara başlayıb. Müllen hərbi variantın arzuolunmaz olduğunu və bir sıra gözlənilməz nəticələrə gətirib çıxara biləcəyini bildirsə də, qeyd edib ki, İranın nüvə silahı əldə etmək səylərini diplomatik yolla dayandırmaq mümkün olmasa, o zaman iki ən pis variantdan daha az pis olanına üstünlük verəcək. Onun fikrincə, İranın nüvə silahına malik olması dünya və region üçün bu ölkəyə qarşı hərbi əməliyyatlardan az təhlükəli deyil. Belə bir vaxtda isə İran Atom Enerjisi Təşkilatının sədri Əli Əkbər Salehi jurnalistlərə açıqlamasında 3,5 faiz zənginləşdirilmiş 1 ton 200 kiloqram uranın mübadiləsinə hazır olduqlarını bildirib. "Media forum" saytının məlumatına görə, Əli Əkbər Salehi Tehranın şərt qoyduğunu vurğulayıb: "Biz 3,5 faiz zənginləşdirdiyimiz 1 ton 200 kiloqram uranı dəyişməyə hazırıq. Lakin bunun qarşılığında bizə 20 faiz dərəcəsində zənginləşdirilmiş 120 kiloqram uran təhvil verilməlidir. Bu mübadilə eyni vaxtda və İranda baş tutmalıdır. Əmin olmaq istəyirik ki, gələcəkdə bu yanacağı ala biləcəyik". Bundan əvvəl İran uranın mübadiləsinə yönəlmiş Vyana razılaşmasına rədd cavabı vermişdi. ABŞ, Rusiya və Fransanın dəstəklədiyi həmin razılaşmağa əsasən, İran 3,5 faiz həddində zənginləşdirdiyi 1 ton 200 kiloqramlıq uranı Rusiyaya təhvil verməli, bunun müqabilində isə Fransada 20 faiz dərəcəsində zənginləşdirilmiş uranı hissə-hissə təhvil almalı idi. Ölkənin öz daxilində isə vəziyyət sürətlə sabitsizləşməkdədir. Belə ki, İranın ən güclü müxalifət liderlərindən olan Mehdi Kərrubi hökumətə qarşı bir daha çıxış edərək, İran İslam Respublikasının müstəbidlik girdabında olduğunu deyib. İran müxalifətinin lideri özünün veb sahifəsində yayılan açıqlamasında ölkədəki seçkilərin mənasız olduğunu deyib. O, keçən ilin iyun ayında Mahmud Əhmədinejadın yenidən prezident seçilməsinin ümummilli səsvermənin nəticələrini əks etdirmədiyini təkrar edib. Cənab Kərrubinin bu çıxışı onun həyat yoldaşının hökumət tərəfdarlarının dünənonların Tehrandakı evlərinə hücum edərək dağıtdıqlarını bəyan etməsindən sonra açıqlanıb. Dünən Mehdi Kərrubinin veb səhifəsində onun həyat yoldaşı Fatimənin 50 nəfərə yaxın insanın bazar günü onların yaşadığı evin önünə yığışaraq, Kərrubinin məhkəmə qarşısına çıxarılması tələbilə onlara hücum etdiyini bildirən xəbəri yerləşdirilmişdi.
   

Azərbaycanda kütləvi terror aktları həyata keçirməyə hazırlaşan radikal dini qruplaşmanın üzvləri zərərsizləşdirilib. Bu barədə APA-ya hüquq-mühafizə orqanlarından məlumat verilib.
   Məlumata görə, Milli Təhlükəsizlik Nazirliyi əməkdaşlarının həyata keçirdiyi əməliyyat tədbirləri nəticəsində 8 nəfər saxlanıb. Tutulan şəxslər arasında Dağıstan və Çeçenistan vətəndaşları da var.
   Bildirilib ki, dəstənin daha bir üzvü ötən gün Balakən rayonu ərazisində Gürcüstandan ölkəyə silah keçirərkən saxlanıb. Ondan xeyli miqdarda silah-sursat və narkotik götürülüb. Araşdırmalar nəticəsində saxlanan şəxslərin radikal dini qruplaşmanın üzvü olduğu müəyyənləşib. Mütəşəkkil dəstənin Azərbaycan paytaxtında kütləvi terror aktları gerçəkləşdirmək niyyətində olduğu bildirilib. Bu niyyətlə onlar Gürcüstandan Azərbaycana xeyli miqdarda silah-sursat gətiriblər. Hazırda dəstənin digər üzvlərinin tutulması istiqamətində əməliyyat tədbirləri davam etdirilir.
   Azərbaycanın hüquq-mühafizə orqanları respublikada terror aktları törətməyi planlaşdıran zərərsizləşdirilmiş qrupla bağlı istintaq tədbirləri həyata keçirir. Bu barədə İnterfaks-Azərbaycan agentliyi hüquq-mühafizə orqanlarındakı mənbələrə istinadla xəbər verir. Son məlumata görə, Azərbaycanın Milli Təhlükəsizlik Nazirliyi bu məsələ ilə bağlı rəsmi açıqlama hazırlayır. "OLAYLAR"ın məlumatına görə, mütəşəkkil dəstə üzvlərinin bir müddət əvvəl Azərbaycanda zərərsizləşdirilən radikal dini qruplaşmalarla əlaqəsi olduğu bildirilir. Dəstənin digər üzvlərinin tutulması istiqamətində əməliyyat-axtarış tədbirləri həyata keçirilir.
   Lent.az-ın yaydığı məlumata görə isə, mütəşəkkil terrorçu dəstə martın 15-də Bakıda zərərsizləşdirilib. Məlumatda deyilir ki, Milli Təhlükəsizlik Nazirliyinin həyata keçirdiyi əməliyyat zamanı 5 nəfər həbs edilib. Tutulanlardan biri milliyyətcə çeçendir. İlkin məlumata görə, dəstə üzvləri Azərbaycan paytaxtında və ayrı-ayrı yerlərdə genişmiqyaslı terror aktları həyata keçirməyə hazırlaşırmış.
   Məlumatda o da bildirilir ki, həbs olunan dəstə üzvlərindən külli miqdarda silah-sursat və partlayıcı maddə olan trotil götürülüb. Əməliyyat məlumatlarında həmin dəstənin Bakıda fəaliyyət göstərən xarici ölkə səfirliklərinə və başqa beynəlxalq təşkilatlara qarşı terror hərəkətləri hazırladığı bəlli olub.
   Lakin Milli Təhlükəsizlik Nazirliyinin İctimai Əlaqələr Mərkəzindən Lent.az-a bildirilib ki, onlarda bu barədə məlumat yoxdur.
   

Zaman-zaman Dağlıq Qarabağ münaqişəsinin həllilə məşğul olan beynəlxalq qurumlar məsuliyyətdən yayınmaq üçün konfliktin çözülməsini Azərbaycan tərəfinin boynuna atmaq istiqamətində canfəşanlıq göstərib. Bu günlərdə ATƏT-in Parlament Assambleyasının sədri Joao Soareş də belə bir iddiada bulunub.
   Belə ki, onun açıqlamasına görə, Dağlıq Qarabağ münaqişəsinin həlli Azərbaycan tərəfindən və prezident İlham Əliyevdən asılıdır: "Mən ümid edirəm ki, qərarın bu il qəbul olunması üçün hər iki tərəfin siyasi rəhbərliyi siyasi cəsurluq göstərəcək. Çox qəti addımlar atılmalıdır. Ümid edirəm ki, prezident İlham Əliyev bu qəti addımı atacaq və bununla da öz adını, sadəcə Azərbaycanın deyil, eyni zamanda, regionun, dünyanın tarixinə Dağlıq Qarabağ probleminin həllini mümkün edən şəxs kimi salacaq". Bu açıqlaması ilə ATƏT PA rəhbərinin heç də düzgün mövqe tutmadığı bütün çılpaqlığı ilə üzə çıxır. Necə ola bilər ki, işğala məruz qalan Azərbaycan ola-ola, münaqişənin həlli ondan və ölkə rəhbərindən asılı olsun? Bəs onda torpaqlarımızı işğal edən Ermənistanın məsuliyyəti nədir? Əslində məsuliyyəti bizim üzərimizə atmaq İrəvanı təmizə çıxarmağa yönəlik addımdır. Bu hal sözügedən beynəlxalq qurumun münaqişənin həll prosesinə real müstəvidən yanaşmadığının bariz nümunəsidir. Görünür, ATƏT-də oturanlar bu kimi çıxışlarla Azərbaycandan yeni güzəştlər qoparmağa çalışır, bu baş tutmadıqda isə təzyiq variantına üstünlük verirlər. Bu mənada, Soareşin "münaqişənin həlli İlham Əliyevdən asılıdır" deməsinin arxasında da, çox güman ki, ölkəmizə yönəlik növbəti təzyiq mexanizmləri durur. ATƏT sülh danışıqlarının intensivləşdiyi bir ərəfədə məsuliyyəti Azərbaycanın boynuna atmaq, bununla da danışıqlar nəticə vermədikdə günahkar qismində bizi görmək istəyir. Onlar anlamır və yaxud da anlamaq istəmirlər ki, belə mövqe ilə əslində işğalçını şirnikləndirirlər. Başqa bir tərəfdən, Azərbaycan son zamanlar haqlı olaraq qeyd edir ki, sülh danışıqları nəticə verməsə başqa variantlar üzərində düşünməli olacaq. Böyük ehtimalla, Soareş də Azərbaycanı həmin başqa variantlardan çəkindirmək üçün belə bir fikri ortaya atıb. Amma bütün hallarda ölkəmizin sürətlə inkişaf etməsi və yeritdiyi siyasət ondan xəbər verir ki, Azərbaycan Soareşin dediklərinə uyan deyil və hər bir sahədə, o cümlədən, konfliktin həlli istiqamətində də xalqın maraqlarına uyğun siyasət yeritməkdə davam edəcək.
   Millət vəkili Zahid Orucun fikrincə, ATƏT təmsilçisi belə fikir səsləndirməklə, əslində rəhbərlik etdiyi beynəlxalq qurumun münaqişənin həllində məsuliyyətini öz üzərindən atmağa çalışır: "Onun dediyi fikirlər nöqsanlı, beynəlxalq təşkilatların məsuliyyətini üzərlərindən atmaq kimi qəbul ediləcək bir bəyanatdır. Parlamentdə səslənmişdi ki, beynəlxalq qurumlara inanmayın. İlk baxışda guya xeyrimizə olduğu kimi görünən bu baxışların arxasında görəsən nə dayanır? Onda Soareş və başqaları ATƏT kimi bir qurumun sadəcə əhəmiyyətsizliyini elan etsinlər. Necə olur ki, bu təşkilatın seçki məsələlərilə bağlı müvafiq qurumları ən kəskin davranış və standartlar tətbiq edir, amma Dağlıq Qarabağ məsələsində problemin həlli tərəflərdən asılı olur?" Soareşin səsləndirdiyi fikirləri həmsöhbətimiz məsuliyyətsiz fikir kimi dəyərləndirdi: "Bu tamamilə məsuliyyətsiz fikirdir. Bir tərəfdən ona görə ki, ATƏT-in keçmişdə sülhə məcbur etmək üçün həmin ölkəyə sanksiyalar tətbiq etmək sahəsində müəyyən mexanizmləri olub. İkinci tərəfdən, münaqişənin həllində dönüş yarada biləcək addımların atılması istiqamətində başqa vasitələr də var. ATƏT və Avropa Şurasının üzvü olan Ermənistan hər hansı bir formada bu qurumlar tərəfindən müəyyən təzyiq və tədbirlərə məruz qalmırsa, əksinə, bir sıra hallarda işğalçı mükafatlandırılırsa, onda bu qurumlar özlərinin nizamlama prinsiplərini niyə elan edir? Məsələnin mahiyyəti budur. Onlar onu təlqin etmək istəyir ki, məsələ hər hansı formada, indiki gerçəklikdə Azərbaycanın maraqları ziyanına həllini tapsın. Bunun əsasında da Azərbaycan məsuliyyət daşısın, bütün problemlər onun üzərində qalsın, mahiyyət etibarilə də bu, Azərbaycanın özünün daxilində ciddi problemlərə yol açmış olsun. Halbuki, beynəlxalq qurumlar bu məsələdə ciddi addımlar atsaydı, Azərbaycan hakimiyyəti, baxmayaraq ki, böyük məsuliyyəti hər zaman öz üzərində saxlayır, amma bununla belə, əleyhimizə olan müddəalar indiki qədər geniş olmazdı. Söhbət bundan gedir. Yoxsa heç kim demir ki, ATƏT gəlib Azərbaycan əvəzinə Qarabağda döyüşsün. Bu tip qurumların ciddi prinsipləri var ki, onun əsasında da qərarlar verməlidirlər. Özlərinin üzərinə düşən vəzifələri yerinə yetirsinlər, ondan sonrakı addımlar Azərbaycan tərəfindən atılacaq. Onlar bununla özlərinin kənarda olduğunu aşkar şəkildə işarə edirlər. Onlara görə prosesdə ATƏT-in Minsk Qrupunu qınamağa dəyməz, guya onlar tərəflərə təsir etməyə çalışır, lakin bizim tərəfdən addımlar atılmır. İndiki gerçəklikdə dövlət başçısı Azərbaycanın əleyhinə olan müddəalarla razılaşmayıb son dərəcədə kəskin davranışlar ifadə edibsə, Qarabağ məsələsilə bağlı sərt platforma ortaya qoyubsa, bunun əsasında ölkəmiz öz mövqeyini irəliyə daşıya bilibsə, təbii ki, millət bu işə görə prezidentə təşəkkür edir. Bundan sonrakı dönəmdə də proseslərin bu cür davam olunması istənilir. Lakin bundan belə nəticə çıxırsa ki, Azərbaycan əleyhinə olan sənədi imzalamadığına görə günahkardır və bunun başlıca məsuliyyəti də dövlət rəhbərinin üzərindədir, bu həmin qurumlar tərəfindən söylənilən tamamilə məsuliyyətsiz fikirlərdir".
   Digər millət vəkili Sabir Rüstəmxanlı da qeyd etdi ki, belə fikirləri səsləndirməkdə məqsəd Azərbaycanı güzəştə getməyə vadar etməkdir: "Azərbaycan hansı güzəştə getməlidir? Onun tək bir güzəşt varinatı var.
   O da ondan ibarətdir ki, Ermənistandan bütün azərbaycanlıların qovulmasına baxmayaraq, Azərbaycan öz torpaqlarını təmizləyəndən sonra burada yaşayan ermənilərə ən yüksək status verir. Bu olur Azərbaycanın güzəşti.
   Yoxsa soydaşlarımız oradan qovulsun, torpaqlarımız işğal olunsun, insanlarımız məhv edilsin, sonra gəlib biz güzəşt edək. Onlar "İlham Əliyevdən asılıdır" deyəndə məhz güzəşti nəzərdə tuturlar. Yəni İlham Əliyev Dağlıq Qarabağdan əl çəksin. Bunların fikri budur, başqa niyyətləri yoxdur".
   

Bakıda bir qrup sakin tikintisi yarımçıq qalmış daha bir "göydələn"in qarşısında aksiya keçirməyə qərar verib. Bu barədə məlumatı "OLAYLAR"a Bakı sakinləri verib.
   Sakinlər bildirib ki, 2005-ci ildə bir qrup şəxs onlardan pul alaraq Bakının mərkəzində inşa ediləcək çoxmərtəbəli yaşayış binasında onlara ucuz qiymətə mənzil verəcəyini bildirib. Həmin şəxslər telekanallarda reklam çarxları təqdim etməklə vətəndaşları həmin binadan ev almağa çağırıb. Telekanalların reklamına aldanan bir qrup vətəndaş da həmin binadan ev almaq üçün həmin şəxslərlə razılaşıb və onlara pul verib: "2005-ci ildə bu məsələ ilə bağlı həmin şəxslərlə görüşüb onlara mənzilin bir kvadratmetri üçün 500 dollar ödədik. Elə ailə var ki, bu binada ev almaq üçün 150 min manat pul verib. Hazırda işdə 70-dən artıq zərərçəkmiş var. Milyonlarla manat vəsaiti yığıb ev tikməyə başladılar. 2005-ci ilin sonlarında binanın tikintisi müəmmalı halda dayandırıldı. Hazırda binanın cəmi 3 mərtəbəsi tikilib. Bina 16 mərtəbəli olmalı idi. Amma 2005-ci ilin sonlarından etibarən binada tikinti işləri aparılmadı. O zaman camaatı sakitləşdirmək üçün dedilər ki, yaxın vaxtlarda tikinti işləri başlayacaq. Amma artıq 5 il keçib, nə şirkətin rəhbərliyini tapa bilirik, nə də pulumuzu ala bilirik. Qarara gəlmişik ki, məsələ ilə bağlı bir neçə dəfə aksiya keçirək. Şikayətlərimizə də cavab verən yoxdur". Sakinlər bildirir ki, sözügedən tikili paytaxtın mərkəzi hissəsində, "Gənclik" metrostansiyasının yaxınlığında yerləşir.

Martın 17-də "Sarı gəlin" restoranında Prezident Yanında Kütləvi İnformasiya Vasitələrinə Dövlət Dəstəyi Fondunun (KİVDDF) elan etdiyi fərdi jurnalist müsabiqəsinin nəticələri və Novruz bayramı münasibətilə tədbir keçirildi.
   Qeyd edək ki, KİVDDF-nın 7 istiqamət üzrə elan etdiyi bu müsabiqədə həm jurnalistlər, həm jurnalist təşkilatları, həm də qəzetlər iştirak edirdi.
   Azərbaycan Respublikasının dövlət himninin səslənməsindən sonra Fondun icraçı direktoru Vüqar Səfərli çıxış edərək, mətbuat nümayəndələrini Novruz bayramı münasibətilə təbrik etdi. Fondun yaranmasından bir il keçdiyini deyən V.Səfərlinin sözlərinə görə, indiyə qədər rəhbərlik etdiyi bu qurum bir sıra işlər görüb, bundan sonra da bu yöndə fəaliyyətini davam etdirəcək. İcraçı direktor həmçinin bildirdi ki, 2010-cu ilin mətbuat işçiləri üçün çox önəmlidir. Bu il milli mətbuatımızın 135 illik yubileyinin keçiriləcəyini qeyd edən V.Səfərlinin bildirdiyinə görə, Fond bu münasibətlə geniş tədbirlər planı hazırlayıb və il ərzində onların hamısını həyata keçirməyi düşünür.
   Fondun ikinci dəfədir ki, fərdi jurnalist müsabiqəsi keçirdiyini deyən cənab Səfərlinin bildirdiyinə görə, 7 istiqamət üzrə elan edilən fərdi jurnalist müsabiqəsinə 49 yazı təqdim edilib, peşəkar ekspert heyəti isə bu yazıları diqqətlə araşdırdıqdan sonra 15 yazı müəllifini qalib adına layiq görüb. V.Səfərli onu da bildirdi ki, əvvəllər bir mövzu üzrə iki qalib olurdusa, Novruz bayramı münasibətilə onların sayı üç olub. Qəzet redaksiyaları və jurnalist təşkilatları tərəfindən Fonda 46 layihə təqdim edildiyini deyən V.Səfərlinin sözlərinə görə, onlardan 28-i qalib elan ediləcək".
   Daha sonra tədbirdə Prezident Administrasiyası ictimai-siyasi şöbənin müdiri Əli Həsənov çıxış elədi. O, əvvəlcə media mənsublarını Novruz bayramı münasibətilə təbrik etdi və qaliblər barəsində xoş sözlər söylədi. Ölkə başçısı İlham Əliyevin mütəmadi olaraq mətbuata dəstək göstərdiyini vurğulayan Ə.Həsənov mətbuatın inkişafı, jurnalistlərin sosial problemlərinin həlli, mətbuatın maddi-texniki bazasının yaxşılaşdırılmasının daim dövlətin diqqətində olduğunu dedi.
   Ə.Həsənovun sözlərinə görə, yalnız Prezident Yanında Kütləvi İnformasiya Vasitələrinə Dövlət Dəstəyi Fondunun xəttilə deyil, başqa şəkildə də dövlət büdcəsindən mətbuata maliyyə vəsaiti ayrılacaq. Bu cür müsabiqələrin jurnalistlərin maddi vəziyyətinin yaxşılaşdırılmasına, yaradıcılıq mühitinin formalaşmasına gətirəcəyini və redaksiyalarda jurnalistlər arasında rəqabətə stimul verəcəyini söyləyən Ə.Həsənov çıxışının sonunda qaliblərə uğurlar dilədi.
   KİVDDF-nın keçirdiyi müsabiqədə yazıları saf-sürük edib seçənlərdən biri - ekspert Ramiz Əsgər isə qalib yazıların seçimində obyektivliyə riayət olunduğunu dedi: "Ola bilsin ki, digər sahələrdə olduğu kimi, burada da narazılıq olsun, amma biz seçimdə yüksək səviyyədə obyektivliyə nail olmağa çalışmışıq".
   Sonra qaliblər elan olundu. Məlum oldu ki, KİVDDF-nın keçirdiyi fərdi jurnalist müsabiqəsində Mübariz Aslanov ("Azərinform" Agentliyi), Alı Rzayev ("Azadlıq" qəzeti), Aqşin Hümbətov ("Yeni Azərbaycan"), Pərvanə Sultanova ("525-ci qəzet"), Abbas Əlikişioğlu ("Paralel"), Nail Rəhimzadə ("İki sahil"), Fariz Vəliyev ("Mövqe"), Əlmərdan Sultanov ("Palitra"), Elşad Paşasoy ("Yeni Müsavat"), Natiq Qocayev ("Oxu məni"), Namiq Əhmədov ("Xalq qəzeti"), Samirə Səfərova ("Bakı-Xəbər"), Telman Qafarov ("İki sahil"), Zümrüd Bayramova ("Səs"), Alim Hüseynli ("Olaylar") qalib gəlib. Qalibləri Mətbuat Şurasının sədri Ə.Amaşov və BDU-nun Jurnalistika fakültəsinin müəllimi C.Məmmədli təbrik etdi.
   Xatırladaq ki, qaliblərə mükafatları PA rəsmisi Əli Həsənov Milli Məclis spikerinin müavini Ziyafət Əsgərov, Turizm İnstitunun rektoru Cəfər Cəfərov, Rabitə və informasiya texnologiyaları naziri Əli Abbasov, ekologiya və təbii sərvətlər naziri Hüseynqulu Bağırov, Nizami rayon icra başçısı və millət vəkili Bəxtiyar Sadıqov təqdim etdi.
   KİVDDF-nın təşkil etdiyi bu tədbiri daha maraqlı edən isə Novruz atributlarından olan yumurta döyüşü və s. oldu. Tədbirdə xalq artisti Mənsum İbrahimov, eləcə də digər incəsənət nümayəndələri iştirak edirdi.
   

Silahlı Qüvvələrdə hərbi xidmət müddətinin uzadılması ilə bağlı mətbuatda səslənən təkliflər ekspertlər tərəfindən birmənalı qarşılanmır. Qeyd olunur ki, əsaslandırılmamış belə təkliflər artıq qeyri-ciddi qarşılanır və valideynlərin narazılığına səbəb olur.
   Ehtiyatda və İstefada olan Zabitlər Birliyinin sədri Yaşar Cəfərli hərbi xidmət müddətinin uzadılacağına inanmır. Onun sözlərinə görə, Azərbaycanın Silahlı Qüvvələrində xidmət müddətinin uzadılmasına ehtiyac yoxdur.
   Ehtiyatda olan polkovnik İldırım Məmmədov da bildirir ki, belə təkliflərin heç bir əsası yoxdur: "Bunu daha çox ona görə deyirlər ki, bu gün silahlı qüvvələrdə əsgər çatışmazlığı problemi var. Əsgərlər istirahətsiz xidmətə çıxır və xidmətdən qayıtdıqdan sonra başqa işlərə göndərilirlər. Bu isə əsgərlər arasında narazılıq yaradır, arzuolunmaz halların baş verməsinə səbəb olur. Ona görə də istəyirlər ki, hərbi xidmətin müddətini uzatsınlar".
   İ.Məmmədov təklifin reallaşacağına inanmır: "Ali təhsilli gənclərin hərbi xidmət müddətini 6 ay artırmaq düzgün deyil. Bu onların ixtisas biliklərinin zəifləməsinə gətirib çıxaracaq. Orta təhsilli gənclərin də xidməti müddətini iki ilə qədər uzatmaq düzgün deyil, bu onlara çox pis təsir edəcək".
   Ekspert hesab edir ki, Azərbaycan Silahlı Qüvvələrinin daha çox peşəkar orduya keçməsinə ehtiyac var: "Nə üçün əsgər paltar yumalıdır, yemək bişirməlidir? Olmazmı ki, bunu ayrı-ayrı təşkilatlar icra etsin? Məsələn, hərbi hissələrin əsgərlərinə yeməklərinin bişirilməsi bir şirkətə, paltarların yuyulması digər şirkətə sifariş olunmalıdır. Əsgər yalnız hərbi hazırlıq istiqamətində çalışmalı, biliyini artırmalıdır".
   

Prezident yanında Kütləvi İnformasiya Vasitələrinin İnkişafına Dövlət Dəstəyi Fondu media qurumları və jurnalist təşkilatlarının layihələrinin maliyyələşdirilməsilə bağlı müsabiqənin nəticələrini martın 18-də açıqlayacaq.
   Fondun icraçı direktoru Vüqar Səfərli "Media forum"a açıqlamasında deyib ki, nəticələr "Kivdf.gov.az" saytında yerləşdiriləcək. Müsabiqə 2010-cu il yanvarın 19-da elan edilib və altı istiqamət üzrə müəyyənləşdirilib - Fikir, söz və məlumat azadlığının, plüralizmin inkişaf etdirilməsi, insan hüquq və azadlıqlarının müdafiəsi; Ermənistan-Azərbaycan, Dağlıq Qarabağ münaqişəsi, erməni terrorizmi haqqında həqiqətlərin dünya ictimaiyyətinə çatdırılması; İnformasiya və kommunikasiya texnologiyalarının, müasir texniki nailiyyətlərin KİV-lərin fəaliyyətinə tətbiqi; KİV-lərin fəaliyyətinin təkmilləşdirilməsi, jurnalist peşəkarlığının və məsuliyyətinin artırılması, dövlət orqanları ilə KİV-lərin əməkdaşlığının gücləndirilməsi; Ekologiya və ətraf mühitin mühafizəsi, ekoloji maarifçilik; Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği.
   Layihə üçün maksimum məbləğ 15 000 (on beş min) manat müəyyən edilib. Hər istiqamət üzrə ən çox bal toplamış 5 layihə maliyyələşdiriləcək.
   2010-cu ilin ilk müsabiqəsinə 47 layihə təqdim olunub. V.Səfərli 30 layihənin qalib elan olunmasının nəzərdə tutulduğunu bildirib: "Ola bilər ki, 30 deyil, daha az layihə maliyyələşdirilsin. Çünki elə istiqamət var ki, ora cəmi 3 layihə təqdim olunub. Halbuki ən azı 5 layihə təqdim edilməli idi".
   

Türkiyə baş naziri Rəcəb Tayyib Ərdoğana zəng edərək, parlamentin "erməni soyqırımı" qərarına görə üzr istəyən İsveç baş naziri Fredrik Reynfeldin hərəkəti sosial-demokratların qəzəbinə səbəb olub.
   APA-nın məlumatına görə, müxalifətdəki İsveç Sosial-Demokrat partiyasının nümayəndəsi Svend Erik Osterberq Reynfeldin, Ərdoğana zəng edərək, parlamentin qərarına görə üzr istəməsinin ölkə qanunlarına zidd olduğunu bəyan edib. "Reynfeldin Türkiyə baş naziri Rəcəb Tayyib Ərdoğana zəng edərək öz parlamentinin verdiyi qərar barədə saymazyana danışması və üzr istəməsi qanunlarımıza ziddir. Bu davranış hökumətin xalqın qərarına qarşı çıxması anlamına gəlir. Bu səbəbdən Ali Məhkəməyə Reynfeld haqqında ittihamla müraciət etmişik" - deyə Osterberq bildirib.
   

"Əl-Qaidə" terror təşkilatının lideri Üsamə bin Laden heç vaxt ABŞ-da məhkəmə qarşısına çıxarılmayacaq. Lent.az-ın BBC-yə istinadən verdiyi məlumata görə, bunu Konqresdə keçirilən dinləmələr zamanı ABŞ-ın baş prokuroru Erik Xolder bəyan edib.
   Erik Xolder deyib ki, bunun bir səbəbi var: "Üsamə bin Ladeni canlı ələ keçirmək bizə müyəssər olmayacaq. Məsələyə real baxmaq lazımdır. Biz ancaq onun ölüsünü ələ keçirə bilərik. "Əl-Qaidə" liderinin canlı ələ keçməsi ehtimalı mikroskopik həddə qədər azdır. O, ələ keçməməsi üçün ya bizi, ya da özünü öldürəcək".

Bakının Qaradağ rayonunun Sahil qəsəbəsində 2 nəfərin ölümü, 2 nəfərin xəsarət alması ilə nəticələnən yol qəzası baş verib.
   APA-nın hadisə yerində olan əməkdaşının məlumatına görə, qəzada ölənlər "Bakılektrikşəbəkə" ASC-nin əməkdaşlarıdır. 10 EK 707 dövlət nömrə nişanlı, "VAZ 2107" markalı avtomobil Bakı-Astara yolunun 30-cu kilometrliyində, Sahil qəsəbəsi ərazisində təmir işlər aparan "Bakelektro" ASC-nin üç əməkdaşını vurub. Onlardan ikisi hadisə yerində dünyasını dəyişib, biri isə xəsarət alıb. 10 OZ 544 dövlət nömrə nişanlı "Mercedes" markalı avtomobil isə arxadan qəza vəziyyətini törədən "VAZ-2107"yə çırpılıb. "Mercedes"də olan sərnişinlərdən biri də yüngül xəsarət alıb.
   Məlumata görə, "VAZ 2107" markalı avtomobil yola aşıb və nəticədə yolda hərəkət dayanıb.
   Yol qəzasında ölən və xəsarət alanların adları açıqlanıb. Bu barədə APA-ya Respublika Baş Dövlət Yol Polisi İdarəsindən məlumat verilib.
   Məlumata görə, qəza nəticəsində "Bakelektrikşəbəkə" ASC-nin əməkdaşları - əslən Lerik rayonundan olan Əzizbəyov rayon sakini, 26 yaşlı Pərviz Adbala oğlu Dənziyev və Sabunçu qəsəbə sakini, 34 yaşlı Məhəmməd Vəzir oğlu Hüseynov hadisə yerində dünyasını dəyişib. Qəzanı törədən "VAZ-2107"nin sərnişini, 1965-ci il təvəllüdlü Mahizə Fərəcova isə ağır vəziyyətdə xəstəxanaya yerləşdirilib. Daha bir nəfərə isə hadisə yerində ilkin tibbi yardım göstərildikdən sonra evə buraxılıb.
   İlkin məlumata görə, qəzanın baş verməsinə yüksək sürət səbəb olub.
   Baş Dövlət Yol Polisi İdarəsindən ANS PRESS-ə verilən məlumata görə, hadisəyə səbəb "Mercedes" markalı avtomobilin yol hərəkəti qaydalarına riayət etməməsi olub.
   

Biləsuvar rayonunun Xırmandalı kəndində 1 nəfərin ölümü, 2 nəfərin yaralanması ilə nəticələnən yol qəzası baş verib.
   Daxili İşlər Nazirliyinin (DİN) mətbuat xidmətindən ANS PRESS-ə verilən məlumata görə, martın 16-da saat 17.00 radələrində, Bakı şəhər sakini Gülverdi Məmmədov "VAZ-2106" markalı avtomaşını idarə edərkən kənd sakinləri Ramin Həsənovu, Elman Tomarovu və Rəşad Orucovu vurub.
   Nəticədə, xəsarət almış hər üç şəxs xəstəxanaya yerləşdirilib.
   Həkimlərin səyi nəticəsində R.Orucovun həyatını xilas etmək mümkün olsa da, digər iki nəfər keçinib.
   G.Məmmədov saxlanaraq barəsində Biləsuvar Rayon Polis Şöbəsi tərəfindən cinayət işi başlanıb, araşdırma aparılır.
   

Martın 17-i günün 2-ci yarısı "Turan" İnformasiya Agentliyinin direktoru Mehman Əliyev Milli Təhlükəsizlik Nazirliyinə dəvət olunub.
   Buna səbəb "Turan"ın jurnalist Eynulla Fətullayevin "Monitor" jurnalının baş redaktoru Elmar Hüseynovun qətlində MTN-nin əli olması barədə bəyanatının yayması olub. MTN-də hesab edirlər ki, bu məlumatlar həqiqətə uyğun deyil və bu nazirliyin nüfuzuna və ümumiyyətlə ölkənin imicinə xələl gətirir. Müstəntiqlər, əsasən Fətullayevin bəyanatlarının hansı yolnan İstintaq təcridxanasından "Turan"a daxil olması ilə maraqlanıb. Onlar, həmçinin, bu məlumatların hansı məqsədlə yayıldığını aydınlaşdırmaq istəyiblər. Buna cavab olaraq bildirilib ki, informasiyalar Fətullayevin ailəsi ətrafında yaranan vəziyyət və onun həyatına təhlükə ilə bağlı yayılıb. MTN-də söhbət normal məcrada və qanunvericiliklə nəzərdə tutulan çərçivədə keçirilib.
   

Azərbaycanın xalq şairi Zəlimxan Yaqub dünən əməliyyat olunub. Bu barədə APA-ya açıqlamasında şairin özü məlumat verib. Z.Yaqub budəfəki əməliyyatın yüngül keçdiyini deyib.
   Sümük ağrılarından əziyyət çəkən şair srağagün axşamdan narahatlıq keçirdiyi üçün Mərkəzi Klinik Xəstəxanasına müraciət etdiyini və burada həkimlərin məsləhətilə əməliyyat olunduğunu deyib: "Ayaqlarımda sümük ağrısı var. Həkimlər pəhriz saxlamağımı məsləhət görüb. Əməliyyat artıq başa çatıb, məni bir-iki saata evə buraxacaqlar". Qeyd edək ki, 60 yaşlı Z.Yaqub ötən ilin sonlarında Türkiyədə böyrəyindən əməliyyat olunub. Bundan bir qədər əvvəl isə şair Almaniyada ürəyində cərrahiyyə əməliyyatı keçirib.
   

Bakıda qaynaq sexində partlayış baş verib.
   Xətai Rayon Prokurorluğundan APA-ya verilən məlumata görə, hadisə martın 16-da, saat 18:20 radələrində Babək prospektində qeydə alınıb.
   Həmin ünvanda yerləşən qaynaq sexində çalışan Yaşar Orucov avtomobil təkərində qaynaq işləri aparan zaman partlayış baş verib. Nəticədə Y.Orucov hadisə yerindəcə dünyasını dəyişib. Faktla bağlı Xətai Rayon Prokurorluğu tərəfindən araşdırma aparılır.
   
   

Obama administrasiyası qondarma "erməni soyqırımı" ilə bağlı qətnamə layihəsinin Konqresin gündəliyinə salınmaması ilə bağlı Nümayəndələr Palatası ilə razılığa gələ bilib.
   APA-nın məlumatına görə, respublikaçı konqresmen Corc Radanoviç "Amerikanın səsi" radiosunun rus redaksiyasına müsahibəsində bildirib ki, hazırda 252 saylı qətnamə layihəsinin Konqresin gündəliyinə daxil ediləcəyini söyləmək üçün heç bir əsas yoxdur: "Bildiyim qədər, Obama administrasiyası erməni soyqırımı ilə bağlı qətnamə layihəsinin Konqresin gündəliyinə salınmaması ilə bağlı Nümayəndələr Palatası ilə razılığa gələ bilib. Bununla belə, Birləşmiş Ştatların erməni icması qətnamənin qəbulu üçün təzyiqləri davam etdirməlidir. Gec-tez bu qətnamə layihəsi Konqresdə müzakirə olunacaq". Konqresin bu qətnamə layihəsini qəbul etməsinin Türkiyə-ABŞ münasibətlərinə təsirini dəyərləndirən Radanoviç bildirib ki, bu münasibətlərdə müəyyən böhran yaranacaq, amma zaman keçdikcə hər şey yoluna düşəcək: "Türklər inciyəcək, 3 ay küsülü qalacaqlar, amma sonra hər şey öz əvvəlki məcrasına dönəcək. Çünki hər iki ölkənin bir-birinə ehtiyacı var. Bu elə bir məsələ deyil ki, bundan ötrü münasibətləri korlayasan".
   
   

Dünən axşam saatlarında Türkiyənin məşhur aktyoru, "Kurtlar Vadisi" serialındakı Polad Ələmdar rolu ilə məşhur olan Necati Şaşmaz Bakıya gəlib. Lent.az-ın məlumatına görə, aktyoru nəinki media işçiləri, eləcə də sadə insanlar da qarşılamağa gəlib. Necati Şaşmaz izdihamı "Azərbaycanda olmaqdan məmnunam" sözləri ilə salamlayıb. "Polad Ələmdar" mətbuatın suallarını cavablandırmayıb.
   Lent.az-ın məlumatına görə, aktyor 4 gün Bakıda qalmaq niyyətindədir. O, bu gün Qəbələyə yola düşəcək. Xatırladaq ki, filmdə "Abdülhey" rolunun ifaçısı Kənan Çoban, "Tuncay" rolunun ifaçısı Osma Wöber, "Güllü Erhan" rolunun ifaçısı Erhan Ufaq və "Polad Alemdar" sürücüsü "Cahid" obrazını canlandıran aktyor da dünən günorta radələrində Türk Hava Yollarına məxsus təyyarə ilə Bakıya gəlib. Səfərin məqsədi açıqlanmasa da, aktyorların Türkiyə və Azərbaycanın müştərək istehsalı olan filmin çəkilişləri üçün Azərbaycana gəldiyi güman olunur.
   

Mingəçevir şəhər sakinlərinə məxsus minik avtomobilləri Yevlax rayonu ərazisində toqquşub, xəsarət alanlar var. APA-nın yerli bürosunun məlumatına görə, hadisə dünən saat 13:30 radələrində Xaldan-Mingəçevir yolunun 8-ci kilometrliyində baş verib. Mingəçevir şəhərinin N.Nərimanov küçəsindəki 40 saylı mənzildə yaşayan, 1978-ci il təvəllüdlü Mustafayev Bəxtiyar Allahverdi oğlunun idarə etdiyi 01-BA-587 dövlət nömrə nişanlı "VAZ 21099" markalı avtomobil qarşı tərəfdən gələn Mingəçevir şəhəri, Təbriz küçəsi ev 15, mənzil 20-də yaşayan 1956-cı il təvəllüdlü Şirinov Köçəri Bilal oğluna məxsus 05-BE-642 dövlət nömrə nişanlı "VAZ 2104" markalı maşının hərəkət zolağına çıxaraq toqquşub. Güclü zərbə nəticəsində "VAZ 2104" markalı avtomobil yoldan çıxaraq dərəyə yuvarlanıb. Hadisə nəticəsində sürücü Köçəri Şirinov və onun oğlu, 1984-cü il təvəllüdlü Səxavət Şirinov ağır bədən xəsarətləri alıb, onların digər 3 ailə üzvü isə yüngül xəsarətlərlə Mingəçevir Mərkəzi Şəhər Xəstəxanasına yerləşdirilib. Faktla bağlı Yevlax Rayon Polis Şöbəsində araşdırma aparılır.
   

Dünən Ermənistan Silahlı Qüvvələrinin atəşkəsi pozması nəticəsində Azərbaycan Ordusunun əsgəri yaralanıb.
   APA-nın Qarabağ bürosunun məlumatına görə, erməni hərbiçilər Ağdamın işğal altında olan Baş Qərvənd kəndi istiqamətində saat 18 radələrində milli ordumuzun üzbəüz mövqelərini atəşə tutmağa başlayıb.
   Düşmənin həmləsini dəf edərkən Azərbaycan Ordusunun əsgəri Əliyev Mustafa Aslan oğlu çiynindən güllə yarası alıb. Yaralı əsgər hospitala yerləşdirilib, vəziyyəti orta ağırdır. Mustafa Əliyev Salyan Rayon Hərbi Komissarlığından həqiqi hərbi xidmətə çağırılıb.

İrandan Azərbaycana psixotrop maddələr gətirən şəxslər tutulub. Bu barədə APA-ya Daxili İşlər Nazirliyindən məlumat verilib. Məlumatda bildirilir ki, Baş Mütəşəkkil Cinayətkarlıqla Mübarizə İdarəsi (BMCMİ) əməkdaşlarının keçirdiyi tədbir nəticəsində Abşeron rayon sakini, 38 yaşlı Marsa Səmədzadə və Kürdəmir rayon sakini Sadiq Abbasov İrandan "Avrasiya Karqo" şirkəti vasitəsilə Azərbaycana 54.600 həb "Diozepam", "Penobarbital" və sair psixotrop dərman preparatlarını gətirərkən tutulub. Faktla əlaqədar DİN-in BMCMİ-nin İstintaq Şöbəsində Azərbaycan Cinayət Məcəlləsinin 206-cı (Qaçaqmalçılıq) və 234-cü (Qanunsuz olaraq narkotik maddələri daşıma) maddələrilə cinayət işi başlanıb.
   

Kür çayında daşqın olub. APA-nın Fövqəladə Hallar Nazirliyinin rəsmi internet səhifəsinə istinadən yaydığı məlumata görə, hadisə martın 16-dan 17-ə keçən gecə baş verib. Məlumatda bildirilir ki, Kür çayının Qazax rayonu ərazisindən keçən hissəsində yağan yağışlar nəticəsində daşqın əmələ gəlib və rayonun Aşağı Salahlı kəndinə yaxın ərazi subasmaya məruz qalıb. Həmin vaxt qeyd olunan yerdə təsərrüfatla məşğul olan 14 nəfər köməksiz vəziyyətə düşüb.
   Fövqəladə Hallar Nazirliyi Dövlət Sularda Xilasetmə Xidmətinin Aran Dalğıc Axtarış Qrupunun dalğıc-xilasedicilərinin və Gəncə Regional Mərkəzinin xilasedicilərinin köməkliyilə zərərçəkənlər xilas ediliblər.