Martın 5-də AFFA-nın növbəti Konfransı keçiriləcək. Fanat.az xəbər verir ki, tədbirdə Azərbaycan futbolu üçün önəmli olan bir sıra məsələlər müzakirəyə çıxarıla bilər.
   Konkret olaraq, Premyer Liqanın formatının dəyişdirilməsi və legionerlərə limit tətbiq olunması gözlənilir. Düzdür, bu məsələlər konfransın gündəliyinə daxil edilməyib. Amma gündəliyə daxil edilən "digər məsələlər"in müzakirəsi zamanı həmin iki məsələ ilə bağlı da qərarın verilməsi istisna deyil. Premyer Liqanın yeni formatının necə olacağına gəlincə, hazırda bir neçə variantın olduğu deyilir. Güclülər dəstəsində iştirak edən klubların sayının artırılması mümkündür ki, bu halda da Premyer Liqa oyunları 14 və ya 16 klubun iştirakı ilə keçirilə bilər. Yaxud da, komandaların sayının 10-a endirilməsi və çempionatın 4 dövrəli sistemlə keçirilməsi də istisna deyil. Bu halda klublar mövsüm ərzində təkcə Premyer Liqada 38 oyun keçirəcək. Legionerlərə limitin qoyulmasına gəlincə isə AFFA-nın birdən-birə inqilab etmək niyyətində olmadığı deyilir. Məlumatlara görə, ilkin mərhələdə ən azı 3 yerli futbolçunun start heyətinə daxil edilməsi ilə bağlı klubların qarşısına şərtin qoyulması nəzərdə tutula bilər. Yəni legioner limitinin 3+8 formatında tətbiqi gözlənilir. Bu halda, həmçinin 18-liyə ən azı 6 yerli futbolçunun adının daxil edilməsi də məcburi olacaq.

Lüksemburq və Azərbaycan yığma komandaları arasında yoldaşlıq görüşü keçirilib. Oyunun 21-ci dəqiqəsində yığmamızın qapıçısı Kamran Ağayev zədələnərək meydanı tərk edib.
   Qolkiper oyundan sonra AFFA-nın saytına fikirlərini bildirib: "Ağır zədə aldığımdan oyunu davam etdirə bilmədim. Zədəmin dərəcəsi tibbi müayinədən sonra bilinəcək".
   Xatırladaq ki, oyunda Kamran Ağayevi Fərhad Vəliyev əvəz etmişdi.

"Xəzər Lənkəran"la yoldaşlıq oyunundan sonra baş məşqçi Böyükağa Hacıyevlə dava edən Ramal Hüseynov "Standard"dan qovulacaq. Kluba yaxın mənbənin Fanat.az-a verdiyi məlumata görə, əslində Ramal olaydan dərhal sonra heyətdən kənarlaşdırılmalı imiş.
   Amma baş məşqçi tələsməmək qərarına gəlib. "Bakı" ilə vacib kubok oyunu öncəsi komandada ab-havanı pozmaq istəməyən Hacıyev bunu müvəqqəti olaraq təxirə salıb. Qeyd edək ki, "Standard" kubokun 1/4 final mərhələsinin ilk oyununu martın 6-da, cavab oyununu isə 16-da keçirəcək. Məhz bu oyunlardan sonra Ramalla bağlı yekun qərar veriləcək. Qeyd edək ki, "Xəzər Lənkəran"la oyunun gedişində Ramal Hacıyevin üstünə qışqırıb. Matç başa çatandan sonra baş məşqçi ilə futbolçu arasında əvvəlcə söz dueli yaşanıb. Ardınca isə tərəflər əlbəyaxa olublar. Ətrafdakı insanların müdaxiləsi nəticəsində məşqçi və futbolçunu sakitləşdirmək mümkün olsa da, Böyukağa Hacıyev sakitləşməyib. Hüseynovu ADBTİA stadionunun yaxınlığındakı ağaclığa aparan baş məşqçi onunla bir saata yaxın "razborka" edib.

İspaniyanın "AS" qəzetinin iddiasına görə, Türkiyənin "Fənərbaxça" klubunun futbolçusu Daniel Quiza Madridin "Atletiko" klubuna keçə bilər. Bu mövsümün sonunda "Atletiko"nun əsas futbolçuları Dieqo Forlan ya Kan Aquranın klubdan ayrılacağı gözlənilir. Belə olacağı təqdirdə Quizanın bu komandaya keçidi reallaşacaq. Xatırladaq ki, Daniel Quiza "Mursiya", "Hetafe" və "Malyorka" klublarının formasını geyinib.

Futbol üzrə milli komandamız yoldaşlıq görüşündə Lüksemburq üzərində 2:1 hesabı ilə qələbə qazanıb. Oyundan sonra hər iki komandanın baş məşqçisi qarşılaşma ilə bağlı fikirlərini bildiriblər. Yığmamızın çalışdırıcısı Berti Foqts oyunun nəticəsindən razı qalsa da, futbolçulardan narazı olduğunu bildirib. Baş məşqçi yetirmələrinin çox çalışmalarına baxmayaraq gözəl oyun göstərə bilməmələrindən şikayət edib. Lüksemburq yığmasının baş məşqçisi Qi Eller isə əksinə nəticədən yox, oyundan razı qaldığını bildirib. Rəqib komandanın baş məşqçisi azərbaycanlı futbolçuların lüksemburqlularla müqayisədə daha səviyyəli olduqlarını da etiraf edib. Xatırladaq ki, Lüksemburq - Azərbaycan qarşılaşmasında komandamızın heyətində qolları Fərid Quliyev və Elvin Məmmədov vurub.
   

İtaliyanın "Yuventus" klubu "Real" klubunun argentinalı futbolçusu Qonsalo İquaini heyətinə qatmağı planlaşdırır. Hazırda futbolçu "Real"la müqaviləsini uzatmaq üçün danışıqlar aparır. Turin klubunun futbolçuya "Real"la ortaq məxrəcə gəlməyəcəyi təqdirdə, sərfəli şərtlər irəli sürəcəyi gözlənilir. Argentinalı futbolçunun xidmətində İngiltərənin "Mançester Siti" klubu da maraqlıdır. Xatırladaq ki, İquain 2007-ci ildə "Real"a Argentinanın "River Pleyt" klubundan transfer olunmuşdu.
   

Milli komandamızın Lüksemburqla yoldaşlıq oyununun əks-sədası İngiltərədən gəlib. Apasport.az saytının məlumatına görə, sevimli yığmalarının Misirlə görüşünü izləyən bir qrup britaniyalı azarkeş oyunun fasiləsində qalmaqal yaradıblar.
   Həmin vaxt internet vasitəsilə digər yoldaşlıq görüşlərinin nəticələrinə nəzər yetirən ingilis fanatlarını Lüksemburqdakı oyundan məlumat ala bilməmələri özündən çıxarıb. Müxtəlif onlayn saytlarında da istədiyini tapmayan çılğın britaniyalılar dünyanın 109-cu və 126-cı komandalarının necə oynamasını mütləq öyrənmək istəyib. Ancaq axtarış saytları da bu işdə onların köməyinə çatmayıb. Böyük ehtimalla yığmamızın oyununa pul qoyan azarkeşlər hirslərini stadiondakı kresloları sındırmaqla çıxıblar. Qeyd edək ki, oyunda millimiz Lüksemburq yığmasını səfərdə 2:1 hesabı ilə məğlub edib. Özü də bu nəticə hələ fasiləyədək qeydə alınmışdı.
   

Dünya Futbolu Tarixi və Statistikaları Federasiyası bütün dövrlər ərzində ən məhsuldar qapıçıların siyahısını açıqlayıb. Reytinq siyahısında ümumilikdə 15 qapıçı yer alıb. Həmyerlimiz Nizami Sadıqov karyerası ərzində vurduğu 21 qolla bütün dövrlərin ən məhsuldar qapıçıları siyahısında 13-cü olub.
   Bütün dövrlərin ən məhsuldar qapıçısı isə Braziliyanın "San Paulo" klubunun üzvü Rojerio Kenidir. Onun aktivində 88 qol var. Artıq karyerasını başa vurmuş paraqvaylı Xose Luis Çilavert 62 qolla 2-ci, Kolumbiya yığmasının sabiq qolkiperi Rene Huiqita isə 41 qolla 3-cüdür.
   Türkiyənin "Bursaspor" klubunun bolqarıstanlı qapıçısı Dimitar İvankov karyerası ərzində vurduğu 37 qolla 6-cı pillədədir. "Bursaspor"un üzvü vurduğu qollarla bu siyahıda rəqiblərini ötərək bir qədər də irəliləyə bilər. Xatırladaq ki, İvankov hələ ki, karyerasını başa vurmayıb.
   

Futbol üzrə Azərbaycan yığma komandasının üzvü Saşa Yunisoğlunun karyerasını harada davam etdirəcəyi məsələsinə aydınlıq gəlib.
   Dünən baş tutan Lüksemburq - Azərbaycan yoldaşlıq oyununu izləyənlər arasında Norveçin "Hauqesun" klubunun nümayəndələri və baş məşqçisi Yosten Qrindhauq da olub. Klub funksionerləri Saşa Yunisoğlunun oyununa baxaraq onunla yerində müqavilə imzalamaq niyyətində olublar.
   Ancaq Norveç klubunun baş məşqçisi Yosten Qrindhauq futbolçumuzun sərgilədiyi oyunu bəyənməyib və onunla müqavilə imzalamaqdan imtina edib. Beləliklə, Saşa Yunisoğlu "Bakı" klubunda çıxışlarını davam etdirəcək.
   

Fransa milli komandasının kapitanı Tyeri Anri İspaniya ilə yoldaşlıq görüşündə uduzmalarının səbəbini izah edib. Apasport.az saytının məlumatına görə, 33 yaşlı hücumçu son Avropa çempionunun Yer kürəsini təmsil etməsinə də şübhə edir.
   İspaniyalıların Fransadakı 2:0 hesablı qələbəsindən sonra Anri rəqibin nə dərəcədə güclü olduğunu vurğulayıb: "İspaniya yığması başqa planetdən gələn komandadır. "Barselona"da oynadığım vaxt top dalınca qaçmağa öyrəşməmişəm. Lakin millinin heyətində ispanlar məni buna məcbur etdilər. Məncə, İspaniya yığması Braziliya ilə yanaşı dünya çempionatının favoritləridir". Qeyd edək ki, İspaniya yığması Berti Foqtsun baş məşqçiliyi dövründə millimizin ən acınacaqlı məğlubiyyətinin səbəbkarlarıdır. Anrinin sözlərindən belə çıxır ki, futbol tariximizdə Bakıda qeydə alınan ən ağır yenilgi yadplanetlilərin sayəsində gerçəkləşib. 2009-cu il iyunun 9-da komandamızı Tofiq Bəhramov adına Respublika stadionundakı yoldaşlıq oyununda 6:0 hesabı ilə udan pireneylilər həm Foqtsu məyus etmiş, həm də şou göstərmişdi.