Xəbər verildiyi kimi, Ermənistan ATƏT Parlament Assambleyasına Qarabağ münaqişəsinin həllilə bağlı təhlükəli sənəd göndərir. Belə ki, Ermənistanın ATƏT PA-dakı nümayəndə heyəti qurumun yay sessiyasına münaqişələrin həllində güc vasitələrindən istifadədən imtina edilməsi barədə sənəd təqdim etmək niyyətindədir.

   Amma Azərbaycan tərəfi belə bir sənədin sessiyada müzakirəyə çıxarılacağına inanmır. Belə ki, Milli Məclis sədrinin müavini, Azərbaycanın ATƏT PA-dakı nümayəndə heyətinin rəhbəri Bahar Muradova bildirib ki, Ermənistan ATƏT PA-nın yay sessiyasında Dağlıq Qarabağ münaqişəsilə bağlı heç bir sənəd qəbul etdirə bilməyəcək.

   "Ermənistanın ATƏT PA-dakı nümayəndə heyətinin yay sessiyasına təqdim edəcəyi sənədin məzmunu tam bəlli olandan sonra ciddi tədbirlər görəcəyik" deyən Muradovanın sözlərinə görə, Ermənistan tərəfi, hələ ki, heç bir sənəd təqdim etmədiyindən indidən konkret addımlar atmaq tezdir. "Sənədin məzmunu bəlli olandan sonra mövqeyimizi ortaya qoyacağıq. Amma istənilən halda yay sessiyasında münaqişənin həllində güc tətbiqindən imtina haqqında qətnamənin, yaxud başqa sənədin qəbul olunmasının əleyhinəyik və lazım olan bütün tədbirləri görəcəyik" - vitse-spiker əlavə edib. İndiki mərhələdə Ermənistan tərəfinin ATƏT PA-nın Dağlıq Qarabağ münaqişəsinin hərb yolu ilə həlli variantını beynəlxalq müstəvidə rəsmiləşdirməsi istiqamətində apardığı siyasət, haradasa, başadüşüləndir. Məlumdur ki, münaqişənin sülh yolu ilə həlli yönündə aparılan danışıqlar nəticə vermir. Ermənistanın qeyri-konstruktiv siyasətinin nəticəsi olaraq müzakirələr uzadılır və münaqişənin həlli vaxtı məchullaşdırılır. Azərbaycan prezidenti İlham Əliyev isə rəsmi Bakının bu prosesləri uzun müddət gözləmək imkanının olmadığını və hərb variantının istənilən an gündəmə gələ biləcəyini bəyan edib. Həm ölkə prezidentinin münaqişənin həlli yolları ilə bağlı açıqlamaları, həm də Azərbaycan ordusunun güclənməsi və müharibəyə hazırlaşması Ermənistanı təşvişə salıb. İqtisati cəhətdən zəif, ordusu dağınıq, hərbi texnikası köhnəlmiş olan Ermənistan yaxşı başa düşür ki, proseslərin sonu müharibə ilə nəticələnə bilər.

   Axı rəsmi İrəvan da Ermənistan ordusunun gücündən ağızdolusu danışır. Məsələ ilə bağlı münasibətini öyrəndiyimiz politoloq Hikmət Babaoğlu bildirdi ki, Azərbaycan dövlətinin həyata keçirdiyi məqsədyönlü siyasət nəticəsində regionda hərbi balans Azərbaycanın xeyrinə dəyişib: "Azərbaycan ordusu Ermənistan ordusundan güclüdür və torpaqları azad etməyə hər an hazırdır. Azərbaycan ordusunun güclü olması Ermənistanı narahat edir. Azərbaycan tərəfi ən yüksək səviyyədə bəyan edir ki, münanişənin sülh yolu ilə həlli mümkün olmasa, hərb variantına əl atılacaq. Azərbaycan heç vaxt müharibə variantından imtina etməyib. Bu mənada Ermənistanın narahatlığı, haradasa, başadüşüləndir. Müharibə bəyanatları prezidentin çıxışlarında da öz əksini tapıb. İndi Ermənistan ATƏT-in Parlament Assambleyasına belə bir sənədlə müraciət etməklə özlərini müharibədən sığortalamağa çalışır. Azərbaycanın öz suverenliyini təmin etmək hüququ var". H.Babaoğlu ermənilərin hazırladığı sənədin ATƏT PA-da qəbul ediləcəyinə inanmır: "Belə bir sənədin hazırlanması Ermənistan tərəfinin növbəti şousudur. Bu şounun reallaşması mümkün olmayacaq. İnanmıram ki, sənəd keçsin. ATƏT Parlament Assambleyasında təmsil olunan Azərbaycan deputatları kifayət qədər fəaldır və Assambleyada Azərbaycanın tərəfdarları da çoxdur".

   Politoloq Rasim Musabəyov da mətbuata açıqlamasında bildirib ki, nəticə olmasa, hərb variantı qaçılmazdır və bu, Ermənistanı narahat edir. Onun sözlərinə görə, hazırda Ermənistanı narahat edən Azərbaycanın konkret müharibəyə hazırlıq görməsidir: "Hesab edirəm ki, münaqişənin nizamlanması ilə bağlı məsələ həlledici məqama gəlib çatıb. Kimsə dşünürsə ki, Azərbaycan indiki vəziyyətlə barışacaq, yanılır. Bu olmayacaq. Son müharibə bəyanatlarının mahiyyəti budur. Ermənistan olduqca zəif, dilənçi dövlətdir. Onu ağıllandırmaq üçün böyük dövlətlərin - ABŞ-ın da, Rusiyanın da, Avropanın da imkanları var. Ermənistanın yeganə bəhanəsi təhlükəsizlikdir. Ona görə də, onlar müharibədən birdəfəlik imtina edilməsi üçün belə bir sənədlə ATƏT Parlament Assambleyasına müraciət etmək istəyirlər".