Yəqin ki, "Eurovizion 2010" mahnı müsabiqəsi tamaşaçıların xatirəsində heç də oradakı ifalara görə qalmayacaq. Ümumiyyətlə, "Eurovizion" müsabiqələri Azərbaycan üçün elə ilk gündən o qədər də uğurlu olmadı. Sanki bu müsabiqənin şərtlərində şəxsiyyət, əxlaq məsələlərilə bağlı qeyri-adiliklər olub.

   Azərbaycanı 2008-ci ildə bu müsabiqədə təmsil edən və sonuncu yerlərlə kifayətlənən Elnur Hüseynov-Samir Cavadzadə cütlüyü barədə mətbuatda yazılanlar hər kəsə məlumdur. Deyilənləri təkrarlamaq fikrindən uzağıq. Amma ilk gündən başlanan iyrənc tendensiya, 2009-cu il də daxil olmaqla, bu il də təkrarlandı.

   2009-cu ildə Azərbaycanı "Eurovizion"da təmsil edən Aysel Teymurzadə, ifasından başqa, bütün göstəricilərinə görə yaddaşlarda qaldı. Onun dünya şöhrətli, iranlı Araşla səhnəyə çıxması və ən əsası açıq-saçıq geyimi hələ də müəyyən dairələrdə müzakirə mövzusu olaraq qalmaqdadır.

   Hətta qeyd olunurdu ki, Aysel Teymurzadə oxumadan belə "Eurovizion" səhnəsində cəlbedici bədənilə hərəkət etməklə lazımi səsi toplaya biləcək. Əlbəttə bu bir qədər şişirdilmiş yanaşma olsa da, arqumentlərdə həqiqət yükü heç də az deyil. Üstəlik, "Eurovizion"ın veteran xanımı iki gün öncə "Eurovizion 2010" mahnı müsabiqəsinin final gecəsində də öz ənənəsinə sadiq qaldı. Çılpaq bədənilə səhnədə var-gəl edən Teymurzadənin ifalarını çətinliklə dinləmək olurdu. Təəssüflər olsun ki, Azərbaycanın "Eurovizion" müsabiqəsinə Ayselin gətirmiş olduğu hərəkətlər adət halını aldı və xələfləri tərəfindən "uğurla" davam etdirildi. Belə ki, müsabiqənin finalına gəlib çıxmış üç namizəd - Səfurə Əlizadə, Məryəm Şabanova və "Milk&Kisses" (Süd və öpüşlər) qrupunun üzvləri də soyundu. Artıq iştrakçıların tamaşaçılar üçün gizli heç nələri qalmayıb desək, yəqin ki, yanılmarıq. Hər şey üzdə olduğu qədər də adi və mənasız görünür.

   Avropa sivilizasiyası budurmu? Yoxsa soyunmaq Azərbaycan tərəfinin qarşısına şərt kimi qoyulub? Biz Avropanın sivilizasiyasına qoşulmaq istədik, amma çaşıb kanalizasiya sisteminə düşdük.

   "Buta Palace"da keçirilən finalda Gürcüstanı "Eurovizion 2010"-da təmsil edəcək xanım da iştirak etdi və öz ifasını səsləndirdi. Xristian ölkəsi olan Gürcüstanın nümayəndəsi bizimkilərdən dəfələrlə abırlı geyinmişdi.

   Bunun adı soyunmaq, cazibədar bədən quruluşunu nümayiş etdirmək müsabiqəsidirsə, o zaman hər şeylə razılaşmaq mümkündür. Yox, "Eurovizion" mahnı müsabiqəsidirsə, o zaman ifanızı ortaya qoyun. Soyunmaqla tamaşaçıların diqqətini cəlb etmək olar, amma Azərbaycanın adını zirvələrə qaldırmaq mümkün deyil. Cənablar, "Eurovizion"a Azərbaycanı təmsil edəcək şəxsləri müəyyənləşdirərkən və hazırlaşdırarkən, az da olsa, millilik barədə düşünün. Qəti şəkildə demək olar ki, Aysel Teymurzadə və Səfurə Əlizadənin xarici görünüşlərinin Azərbaycanla heç bir bağlılığı yoxdur.