"Xəzər Lənkəran"la "Standard" arasında baş tutan yoldaşlıq oyunu qalmaqalla başa çatıb. Fanat.az xəbər verir ki, oyundan sonra "Standard" klubunun baş məşqçisi Böyükağa Hacıyevlə Ramal Hüseynov arasında insident yaşanıb.
   Olayın canlı şahidinin Fanat.az-a verdiyi məlumata görə, matç başa çatandan sonra baş məşqçi ilə futbolçu arasında əvvəlcə söz dueli yaşanıb. Ardınca isə tərəflər əlbəyaxa olublar. Ətrafdakı insanların müdaxiləsi nəticəsində məşqçi və futbolçunu sakitləşdirmək mümkün olsa da, Böyukağa Hacıyev sakitləşməyib. Ramal Hüseynovu ADBTİA stadionunun yaxınlığındakı ağaclığa aparan baş məşqçi onunla bir saata yaxın "razborka" edib.
   "Standard"ın yarımmüdafiəçisi oyundan sonra baş məşqçi ilə əlbəyaxa olmaları barədə xəbəri təsdiqləyib. Qol.Az-a açıqlamasında R.Hüseynov bu məsələni şişirtməyə ehtiyac olmadığını vurğulayıb: "Bu, böyük bir məsələ deyil. Məşqçilə futbolçu arasında belə hallar yaşana bilər. Sonradan məşqçilə danışdıq və aramızdakı problemi həll etdik".
   Qeyd edək ki, "Xəzər Lənkəran" - "Standard" oyunu birincilərin 2:0 hesablı qələbəsi ilə yekunlaşıb.

Rusiya Futbol İttifaqının prezidenti Sergey Fursenko İngiltərə yığmasının baş məşqçisi Fabio Kapellonun Rusiya millisini çalışdırması ilə bağlı danışıqlar aparıb.
   Milli.Az Rusiya mətbuatına istinadən xəbər verir ki, bu yay yığmanın sükanı arxasındakı fəaliyyətini başa vuracaq hollandiyalı mütəxəssis Qus Hiddinqin mümkün əvəzləyicilərindən biri kimi məhz Kapello nəzərdən keçirilir. Məlumata görə, Fursenko Londonda italiyalı mütəxəssislə bu haqda ayaqüstü söhbətləşsə də, Kapello birbaşa danışıqlardan yayınıb və bu işi agentinə həvalə edib.

Türkiyənin "Qalatasaray" klubunun kapitanı Arda Turanın komandadan ayrılacağı bildirilir. Futbolçunun İngiltərə klublarından birinə keçəcəyini söyləyənlər daha çoxdur. "Qalatasaray" klubunun nümayəndəsi Haldun Üstüelin "Mançester Siti" klubunun rəhbəri Kaldounla yaxın münasibətlərinin olmasını nəzərə alsaq, Ardanın Mançester təmsilçisinə keçmək ehtimalının daha yüksək olduğu ortaya çıxır. Türkiyə mətbuatı Arda Turanın böyük pullar qarşılığında "Mançester Siti"yə transfer ediləcəyini 90 faiz real olaraq dəyərləndirir. Türkiyə mətbuatının yaydığı başqa bir məlumata görə, "Qalatasaray"ın kapitanı İngiltərə klubu ilə müqavilə imzalayıb. Bu barədə mətbuata "Cim Bom"un adının açıqlanmasını istəməyən rəsmisi bildirib. Onun sözlərinə görə, transfer məsələsi 2 həftə əvvəl həllini tapıb. "Ardanı 2 həftə əvvəl bir ingilis klubuna verdik. Bunun "Mançester Siti", "Arsenal", "Liverpul" və ya digər klub olduğunu mövsümün sonunda açıqlayacağıq", - deyə "Qalatasaray" rəsmisi qeyd edib. Məlumata görə, Arda məhz "Mançester Siti" ilə razılaşıb.

FİFA prezidenti Zepp Blatter futbolda ofsaydın (oyundan kənar vəziyyət) ləğvi barədə müzakirələr aparır. Milli.Az xəbər portalı "NTV Spor" telekanalına istinadən xəbər verir ki, Zepp Blatter Beynəlxalq Hokkey Federasiyasının prezidenti Leandro Neqre ilə bu məsələ ilə bağlı görüş keçirib.
   Futbol qaydaları son 100 ildə çox az dəyişib. Futbol kitabının ən önəmli qaydası isə ofsaytdır. "Qoldur, ya yox?", "Futbolçu osaytdaydı, yoxsa yox?" sualları bir çox oyunlardan sonra gündəmə gəlir. Ofsayd qaydası ləğv olunsa, nə baş verər? Qapılarını daha geniş sahədə qorumaq məcburiyyətində qalacaq komandalar çətinlik çəkərlərmi? Futbol daha gözəlləşər, ya yox? Bu suallara cavab vermək çətindir. Amma FİFA prezidenti Zepp Blatter ən radikal qayda dəyişikliyini gündəmə gətirib. Zepp Blatterlə Sürixdə görüşdükdən sonra Beynəlxalq Hokkey Federasiyasının prezidenti Leonardo Neqre ofsaytla bağlı junalistlərə bunları deyib: "Hokkeydə ofsayd qaydası 1988-ci ildə ləğv olunub. Zepp Blatter bununla bağlı mənə çoxsaylı suallar verdi. Ofsayd qaydasının ləğvindən sonra hokkey qarşılaşmaları daha zövqlü hala gəlib və tamaşaçı sayı artıb. Ancaq futbol meydançasının hokkey sahəsindən daha geniş olması ofsaydın ləğvini çətinləşdirir". Zepp Blatterin ofsayd qaydasının ləğvini müzakirəyə çıxarıb-çıxarmayacağı bir müddət sonra məlum olacaq.

İtaliyanın "Qazetta dello Sport" qəzeti müasir dövrdə İtaliyanın ən yaxşı futbolçusunu müəyyənləşdirib. "Roma" klubunun kapitanı Françesko Totti Daniel de Rossi və Andrea Pirlonu geridə qoyaraq bu nominasiyada qalib gəlib. Françesko Totti özü isə "Yuventus"un qolkiperi Canluici Buffonu müasir dövrdə İtaliyanın ən yaxşı futbolçusu hesab etdiyini açıqlayıb. Xatırladaq ki, Françesko Tottinin Cənubi Afrika Respublikasında keçiriləcək futbol üzrə dünya çempionatında İtaliya yığmasının heyətinə daxil ediləcəyi hələ də dəqiqləşməyib.

"Beşiktaş"ın baş məşqçisi Mustafa Dənizlinin səhhəti ilə əlaqədar gələn mövsüm fəaliyyətini dayandıra biləcəyini açıqlaması klub rəhbərliyini fikrə qərq edib.
   Türkiyə mətbuatının yazdığına görə, İstanbul klubunun rəhbərliyi Dənizliyə mümkün əvəz kimi diqqətini ölkə millisinin sabiq çalışdırıcısı Fatih Terimin üzərinə çevirib. Məlumata görə, "Beşiktaş"ın futbol komitəsinə rəhbərlik edən Serdal Adalı klub rəhbərliyinə Terimin razılığını ala biləcəyini söyləyib.

Dünya Futbolu Tarixi və Statistikaları Federasiyası mart ayı üçün dünya klublarının reytinq cədvəlini açıqlayıb. Ağdamın "Qarabağ" klubu ötən ayla müqayisədə 5 pillə geriləyərək 239-cu yer alır.
   Komandamızın aktivində 80,5 xal var. "Qarabağ" "Blekbörn Rovers", "Napoli", "Dinamo" (Moskva), "Santos" və "Brondbyu" kimi klubları üstələyib.
   Reytinq siyahısına İspaniyanın "Barselona" klubu başçılıq edir. İkinci yerdə İngiltərənin "Çelsi", üçüncü pillədə isə Almaniyanın "Verder" klubu yer alır. Sonrakı yerlərdə müvafiq olaraq "Mançester Yunayted", "Şaxtyor", "Arsenal", "Estudiantes", "Kruzeyru", "Hamburq" və "Roma" klubları yer alır. Türkiyənin "Qalatasaray" klubu 14-cü, "Fənərbaxça" 23-cüdür.
   

Bakı "İnter"inin oyunçuları Anqola yığmasına qarşı oynayıb. Fanat.az xəbər verir ki, Andreys Rubinslə Girts Karlsons dünən Latviya yığmasının heyətində meydana çıxıb.
   Qarşılaşma 1:1 hesabı ilə başa çatıb. Hesabı 45-ci dəqiqədə "İnter"in forvardı Girts Karlsons açıb. Lakin 75-ci dəqiqədə Æob tarazlığı bərpa edərək, Latviyanın qələbə qazanmasına imkan verməyib. Latviya yığmasının baş məşqçisi Karlsonsla Rubinsə start heyətində yer verib. "Simurq"un bir müddət əvvəl transferə çıxardığı Gennadi Solonitsin də meydana ilk 11-likdə çıxıb. Lakin o, 73-cü dəqiqədə əvəzlənib.
   

Şotlandiyanın 21 yaşadək futbolçulardan ibarət milli komandası ilə oyun Azərbaycan yığmasının tarixinə düşüb. Apasport.az saytının hesablamalarına görə, Bernard Lippertin yetirmələri səfərdə 2 qol vurmaqla, komandamızın rekordunu təkrarlayıb.
   Avropa çempionatının seçmə mərhələlərində ilk oyununu 1994-cü ildə keçirən yığmamız 16 il ərzində heç vaxt səfərdə 2-dən artıq qol vurmayıb. Komandamızın ilk rəsmi oyununda müəyyənləşən iki qol vurmaq rekordu isə sonradan daha iki dəfə təkrarlanmışdı. Falkirkdəki qarşılaşma bu nəticənin 4-cü dəfə qeydə alınması ilə nəticələnib. Tarixi ərzində 27-si səfərdə olmaqla, 54 seçmə oyununa çıxan U-21 Rumıniya, Makedoniya və Xorvatiyada da Şotlandiyadakı məhsuldarlığını nümayiş etdirib.