"Qalatasaray" prezidenti Adnan Polat Ronaldinyonun transferi üçün hərəkətə keçib. Lent.az-ın "Vətən" qəzetinə istinadən verdiyi məlumata görə, hazırda İtaliyanın "Milan" klubunda oynayan braziliyalı ulduz futbolçunun transferi üçün Qalatasarayın futbol şöbəsinin müdiri Haldun Üstünel fevralın 13-də "Milan" klubunun rəhbərliyi ilə görüşüb.
   "Milan" klubunun vitse-prezidenti Adriano Galliani və klubun idman direktoru Ariedo Braida ilə bir araya gələn Haldun Üstünel Ronaldinyonun transferi şərtləri ilə bağlı müzakirə aparıb. "Milan" rəhbərliyi Ronaldinyonun qarşılığında Elano və 5 milyon dollar pul, o cümlədən "Qalatasaray"ın kapitanı Ardanı da istəyib.
   Əgər tərəflər qarşılıqlı razılaşma elan edərsə, Adnan Polat martın 20-də Ronaldinyonun "Qalatasaray"a transferi məsələsinin bitdiyini elan edəcək.
   Qeyd edək ki, martın 27-də "Qalatasaray" klubunda prezident postuna növbəti seçkilər olacaq. Adnan Polat seçkiöncəsi tərəfdarlarına super hədiyyə etmək istəyir.
   Xatırladaq ki, Ronaldinyonun "Milan" klubunda illik qazancı 6,5 milyon avrodur.
   "Qalatasaray" klubu mətbuatda Ronaldinyonun İstanbula gələ biləcəyi ilə bağlı yayılan xəbərlərə münasibət bildirib. "Sarı-qırmızılı" klub "Vətən" qəzetində dərc olunan "Polatın seçim hədiyyəsi Ronaldinyo" başlıqlı yazı ilə bağlı rəsmi saytı vasitəsi ilə açıqlama yayıb.
   "Qalatasaray"ın bəyanatında bildirilir ki, bu xəbər həqiqətəuyğun deyil. "Adıçəkilən yazıda əsilsiz bir iddia üzərinə bir transfer ssenarisi yazılıb. Xəbərdə adıkeçən futbolçu ilə klubumuzun heç bir əlaqəsi yoxdur", deyə "Qalatasaray"ın bəyanatında qeyd olunur.

Futbol üzrə İtaliya yığma komandasının baş məşqçisi Marçelo Lippi bildirib ki, "Milan" klubunun müdafiəçisi Alessandro Nesta dünya çempionatında iştirak etməyəcək.
   Baş məşqçi futbolçuya dəvət göndərsə də, o, milli komanda karyerasını başa vurduğunu əsas gətirərək bu təklifi rədd edib. 33 yaşlı futbolçu İtaliya yığma komandasının heyətində 78 qarşılaşmada meydana çıxıb. Nesta 2006-cı ildə İtaliya kollektivinin tərkibində Dünya çempionu tituluna sahib çıxıb. Nesta 2006-cı ilin oktyabr ayında Gürcüstanla qarşılaşmada sonuncu dəfə milli komandanın formasını geyinib.
   Xatırladaq ki, həmin oyun 3:1 hesabı ilə italiyalıların xeyrinə başa çatmışdı.

Nüfuzlu "Deloitte" auditor agentliyi dünya futbolunun 20 ən varlı komandasının gəlirlərini dərc edib. Lent.az-ın məlumatına görə, siyahının ilk iki pilləsində İspaniyanın "Real" və "Barselona" klubları yer alıb.
   Madrid komandası birinci, onun prinsipial rəqibi isə ikinci sıradadır. Üçüncü mövqeni isə İngiltərə çempionu "Mançester Yunayted" tutur. 2008-ci ilin 30 iyunundan 2009-cu ilin 30 iyununadək "Real" 404,1 milyon avro qazanıb. Bu yay "kral klubu"nun rəhbərliyi dəyişib. Köhnə-yeni prezident Florentino Peres Kriştianu Ronaldu və Kakanı alaraq, yenidən superulduzlar komandası yaratmaq kursunu götürüb.
   Çempionlar Liqasının hazırkı sahibi "Barselona"nın illik gəliri 365,9 milyon avro təşkil edib. Bu da 2007-2008-ci il mövsümündəki gəlirdən 76 milyon avro çoxdur. Kataloniya təmsilçisi iki il öncə də bu reytinqdə ikinci yeri tuturdu. "Mançester Yunayted"in gəliri isə 327 milyon avrodur. Lakin funt sterlinqin avroya qarşı inflyasiyası 7 faiz təşkil etməsəydi, İngiltərə klubu siyahıda ikinci yeri tuta bilərdi.

Son 7 rəsmi qarşılaşmada 1 qalibiyyət belə əldə edə bilməyən klub, almaniyalı baş məşqçi ilə yolları ayırmaq haqda düşünür. Milli.Az xəbər portalının Türkiyə mətbuatına istinadən verdiyi məlumata görə, onun yerini Aykut Kocamanın tutacağı bildirilir. Məlumata görə, fəaliyyətindən rəhbərliyin narazı olduğunu bilən Daum istefa verməyə hazır olduğunu deyib. Qeyd edək ki, hazırda "Fənərbağça" Türkiyə çempionatının lideri olan əzəli rəqibi "Qalatasaray"dan 5 xal geridədir.

Azərbaycan milli komandası ilə ardıcıl ikinci seçmə mərhələdə görüşəcək holland mütəxəssis Qus Hiddink türkiyəli jurnalistlərə qarşı hörmətsizlik edib. Apasport.az saytının məlumatına görə, "ay-ulduzlu" komandanın baş məşqçisi postunda işləyəcək 63 yaşlı çalışdırıcı dünən Macarıstanda xoşagəlməz olayın iştirakçısı olub.
   Hələlik müqaviləyə əsasən bağlı olduğu Rusiya yığması ilə birgə Budapeştə gələn Hiddinki hava limanında türk həmkarlarımız qarşılayıb. Onlar yığmalarının yeni baş məşqçisindən Türkiyə Futbol Federasiyası (TFF) ilə bağladığı müqavilə, gələcək planları haqda öyrənmək istəsələr də, sualları cavabsız qalıb: "Mən indi Türkiyə yığması haqda danışmağa hazır deyiləm. Bütün fikirlərim komandamın sabahkı oyunu ilə bağlıdır" - deyə Hiddink bildirib. Bu azmış kimi, holland mütəxəssis jurnalistlərin ona hədiyyə etdiyi Türkiyə yığmasının formasını almaqdan imtina edib.
   Qeyd edək ki, Hiddink bu gün Macarıstan yığması ilə yoldaşlıq görüşündən sonra Rusiya yığması ilə vidalaşacaq. Onun TFF ilə bağladığı müqavilə bu ilin avqustun 1-də qüvvəyə minəcək.
   

"Yuventus" klubunun rəhbərliyi "Şalke"nin almaniyalı hücumçusu Kevin Kuraninin keçidini həll edib. "Sky İtalia" xəbər verir ki, hazırki komandası ilə müqaviləsi iyunda bitən hücumçu "Yuve" ilə artıq ilkin razılaşmaya imza atıb. Rəsmi imzalanmanın isə yaxın vaxtlarda reallaşdırılması planlaşdırılır.
   

İspaniya Primerosının texniki komitəsi növbəti iclasını keçirib. Apasport.az saytının məlumatına görə, qurum Alfonso Peres Burrulu qeyri-müəyyən müddətə hakimlikdən kənarlaşdırmağa qərar verib.
   Buna ədalət təmsilçisinin ölkə çempionatının son turundakı idarəçiliyi səbəb olub. Madridin "Visente Kalderon" stadionunda keçirilən "Atletiko" - "Valensiya" oyununu idarə edən Burrul işinin öhdəsindən gələ bilməmişdi. Məhz onun şübhəli qərarları meydan sahiblərinin işinə yaramışdı - 4:1.
   Lakin referi təkcə madridlilərə kömək etməyib. Komitə onun qonaqların qapısına təmiz penaltini təyin etməməsini üzə çıxarıb. Məhz Reyesə qarşı kobudluq zamanı hakimin susması əks-hücumda Silvanın fərqlənməsinə səbəb olmuşdu. Aqueronun zərbəsindən sonra topun Marçenanın əlinə dəyməsini də gözdən qaçırması, "Atletiko" futbolçularının şikayəti və 4-cü hakimin məsləhətindən sonra qərar verməsi də Burrulun səhvləri kimi dəyərləndirilib.
   Üstəlik o, penalti verməklə yanaşı, Marçenanı da meydandan qovub. Burrul ötən mövsüm "Osasuna" ilə oyunda "Real"ın qapısına iki təmiz penalti təyin etmədiyi üçün 1 aylıq cəzalanmışdı.
   Qeyd edək ki, "Atletiko"nun 4 gün ərzində qazandığı iki qələbədə hakim "əməyi" olub. İspanlardan fərqli, UEFA Avropa Liqasının fevralın 25-də keçirilən "Qalatasaray"la İstanbuldakı matçında hoqqa çıxaran italiyalı Roççini cəzalandırmayıb. Madridlilərin Türkiyə səfərindəki 2:1 hesablı qələbəsində də qırmızı vərəqənin rolu olmuşdu.
   

Fələstin milli basketbol komandasının baş məşqçisi postuna israilli məşqçi İlan Kovalski gətirilib.
   Lent.az-ın "El Arabiye" telekanalına istinadən verdiyi məlumata görə, İlan Kovalski iki ölkə arasındakı gərgin münasibətlərin idmana sirayət etməməsini istədiyini, barışı və qardaşlığı bir araya gətirdiyini söyləyib.
   
   

Martın 3-də Lüksemburq və Azərbaycan milli komandaları arasında keçiriləcək yoldaşlıq oyununun hakimlər briqadası müəyyənləşib.
   Lent.az-ın AFFA-nın rəsmi saytına istinadən verdiyi məlumata görə, qarşılaşmanı finlandiyalı hakimlər briqadası idarə edəcək. Baş hakim Kari Petteriyə yan xətt hakimləri qismində Mikko Alakare və Conas Turunen yardımçı olacaq. Dördüncü hakim isə lüksemburqlu Bruno Qomesdir.
   Qeyd edək ki, Lüksemburq - Azərbaycan matçı Bakı vaxtı ilə saat 23:00-da başlanacaq.