Əmlak bazarında aparılan araşdırmalar göstərir ki, daşınmaz əmlakın (torpaq və mənzil) alqı-satqısı ilə bağlı son bir ildə ciddi geriləmələr müşahidə olunsa da, qiymətlər dəyişməz olaraq qalıb. Sadə vətəndaşların mənzil almağa əlçatımlığı olduqca aşağı səviyyədədir. Gözlənirdi ki, böhranın təsirlərilə əlaqədar olaraq daşınmaz əmlak bazarında qiymətlərdə ucuzlaşma baş verəcək.
   Amma proqnozlar özünü doğrultmadı. Ekspertlərə görə, Azərbaycanın daşınmaz əmlak bazarı iqtisadi qanunlarla deyil, psixoloji əsaslarla fəaliyyət göstərir.
   Qeyd olunur ki, son on ildə Bakıda mənzillərin qiyməti təxminən 10 dəfə artıb və bu heç bir məntiqə, iqtisadi qanunauyğunluğa sığmır. Ona görə də hesab edilir ki, mənzillərin maya dəyərindən neçə dəfə baha satıldığı araşdırılmalıdır. Hesablamalara görə, hazırda mənzillərin qiyməti 20-30 faiz aşağı düşməlidir.
   Xatırladaq ki, son illər Bakı şəhərində kirayədə yaşayan gənc ailələrin sayı çoxalıb. Mənzil almağa gücü çatmayan ailələr, şərtlər ağır olduğundan, ipoteka kreditlərinin də imkanlarından yararlana bilmir. Banklar vasitəsilə yeni binalardan kredit yolu ilə alınan mənzillər isə yararsız vəziyyətdədir.
   Ekspertlərin sözlərinə görə, paytaxt Bakıda mənzillərin qiyməti dünyanın ən bahalı şəhərləri sayılan Nyu-York və Moskvanın səviyyəsinə çatmaqdadır. Təbii ki, ölkədə mənzillərin bahalı olması əhalinin əksər hissəsinin evsiz qalmasını şərtləndirir. Rəsmi məlumatlara görə, ölkədə orta aylıq əməkhaqqı 200 manata çatmadığı bir şəraitdə mənzil biznesinin genişlənməsi obyektiv səbəblərlə izah oluna bilməz. Hazırda Bakının mərkəzində təkrar bazarda, daha doğrusu, köhnə binalarda iki otaqlı mənzilin qiyməti 80-90 min dollar, mərkəzdən bir uzaqda isə 60-70 min dollar təşkil edir.
   Qeyd edək ki, yeni tikililərdə iki otaqlı mənzilin sahəsi orta hesabla 80-90 kvadrat metr olduğu halda, sovet dövründə tikilmiş binalarda bu göstərici çox vaxt 50 kvadrat metrə belə çatmır. Ekspertlər hesab edir ki, yeni tikililərdə mənzil almaq istəyənlər binanın keyfiyyətsiz olmasından ehtiyyat edir və çox vaxt bu səbəbdən köhnə binalarda mənzil alır.
   Hazırda tikinti bazarında tikinti materiallarının sürətlə ucuzlaşması, təkliflərin azalması və digər böhranlar da mənzillərin qiymətinə təsir göstərə bilmir.
   Şəhərin mərkəzində onsuz da çox məhdud olan torpağın bir sotunu tikinti şirkətləri 200-250 min dollara alır. Ekspertlər bildirir ki, mənzillərin qiymətində iqtisadi faktorlar əhəmiyyətli rol oynamır. Belə ki, bu gün bazarda bir kvadrat metri 1000-2000 dollara satılan yaşayış sahəsinin faktiki maya dəyəri 250 dollardan belə aşağıdır və 100 kvadrat metrlik mənzil 25 min dollara başa gəlir. Bu rəqəmin üstünə 50 dollar vergi dərəcəsini də gəlsək, cəmi bu rəqəm 300 dollar olur. Yaşayış sahəsinin bir kvadrat metrinin maya dəyərinin 10-12 faizi şirkətin gəliri kimi nəzərdə tutulur.
   Maraqlıdır ki, mənzillərin qiymətində artım, əsasən inşaat materiallarının bahalaşdığı dövrlərdə müşahidə edilib. Yəni inşaat materiallarının bahalaşmasından sui-istifadə edən şirkətlər mənzilləri bahalaşdırıb. Amma indi materialların qiyməti aşağı salısa da, mənzillər ucuzlaşmayıb.
   Ekspertlər, həmçinin, bürokratik maneələrin də mənzillərin bahalaşmasında önəmli rol oynadığını deyir. Buna baxmayaraq, mənzil biznesi ölkədə ən rentabelli biznes sayılır. Bu sahəyə qoyulan vəsait bir ildən sonra iki-üç dəfə artır.
   Ekspertlərin sözlərinə görə, daşınmaz əmlak bazarında qiymətlərin yüksək olmasına əsas səbəb imkanlı adamların öz vəsaitlərini, banklara qoymaqdansa, məhz mənzil və torpaq sahələrinin alınmasına yönəltməsidir. Onların fikirlərinə görə, torpaq sahələrinin və evlərin qiymətləri ildə 30-40 faiz artdığı halda, bankların depozit qoyuluşuna maksimum 21 faiz dividend verməsi bu sahəyə marağın güclənməsinə gətirib çıxarır. Başqa bir tərəfdən isə, milli mentalitetdən irəli gələrək, azərbaycanlılar daşınmaz əmlak almağı daha üstün hesab edir.
   Ekspert İlham Hüseynlinin sözlərinə görə, tikinti şirkətlərinin rentabelliyi böhrana qədər 50 faiz olub: "İndiki böhran şəraitində rentabellik düşüb. Hazırda bazarda tikinti materiallarının ucuzlaşmasına baxmayaraq, hazır mənzillərdə istifadə olunmuş materiallar ən azı bir il bundan qabaq baha qiymətə alınıb. Ona görə də, mənzilləri mövcud bazar şərtlərinə uyğun satmaq şirkətlərə sərf etmir. Məndə olan məlumatlara görə, tikinti şirkətlərinin, hətta maya dəyərinə yaxın qiymətlərə satmasına baxmayaraq, hazırda mənzil alan yoxdur".
   Bununla belə, ekspert hesab edir ki, mənzillərin qiymətini bazar qiymətlərinə uyğunlaşdırmaq mümkündür: "Antiinhisar Haqqında" Qanunda göstərilib ki, dövlətin müvafiq strukturu, indiki halda İqtisadi İnkişaf Nazirliyinin Antiinhisar Departamenti bazarda qiymətlərə nəzarət edir. Hiss edilsə ki, təklif olunan qiymətlər bazara uyğun deyil, yəni bir qrup şəxs sözü bir yerə qoyaraq bahalıq yaradırsa, Antiinhisar Departamenti məsələni araşdırır. Aydın olsa ki, mənzil bazarında təklif olunan qiymət mənzilin maya dəyərindən qat-qat yuxarıdır, o zaman Antiinhisar Departamenti tikinti şirkətlərinə yazılı şəkildə xəbərdarlıq göndərir, yaxud da məhkəməyə müraciət edir".
   Mənzilin 1 kvadrat metrinin neçəyə başa gəlməsilə bağlı ekspert bildirdi ki, bu, müxtəlif binalar üçün fərqli ola bilər: "Elə binalar var ki, onlarda hər kvadrat metr 300-400 dollara başa gəlir. Elə binalar da var ki, 1000-1200 dollara başa gəlir. Mənzilin maya dəyəri otaqların sayından, yerləşdiyi məkandan, xidmətlərdən, kommunikasiya sistemindən və s. məsələlərdən asılıdır".
   İndiki şəraitində tikinti şirkətlərinə qiymətləri aşağı salmağı tövsiyə edən İ.Hüseynli hesab edir ki, belə olarsa, şirkətlər uduzmaz: "Ən ağıllı sərmayədar odur ki, tikinti materialları ucuz olan dövrdə əlindəki mənzilləri satışa çıxarır və əldə olunan vəsaitlə ucuz qiymətə tikinti materialları alır. İndi ucuz qiymətə tikinti materialları alıb bina tiksələr, vaxt başında, yəni böhran aradan qalxanda yüksək gəlir əldə etmək olar".
   Məsələnin görünən tərəfi isə odur ki, hətta hökumət də tikinti şirkətlərilə bacara bilmir. Çünki hər bir tikinti şirkəti bir binanı tikib qurtarana, hətta mənzilləri satana qədər ayrı-ayrı dövlət qurumlarına "şapkalar" ödəməkdədir.
   Odur ki, mənzillərin maya dəyərini hesablayarkən gözlənilməz xərcləri də nəzərə almaq lazımdır.
   

Martın 1-də Bosniyanın sabiq prezidenti Eyyub Qaniç Londonda həbs edilib. APA-nın AFP-yə istinadən verdiyi məlumata görə, E.Qaniç 1990-cı ildə Balkanlardakı münaqişə zamanı hərbi cinayətlər törətməkdə - yaralı hərbçilərin öldürülməsində ittiham olunur.
   63 yaşlı E.Qaniç Londonun "Hitrou" hava limanında Serbiya hakimiyyətinin ekstradisiya tələbi əsasında polis tərəfindən saxlanıb. Serbiya tərəfi ekstradisiya üçün lazım olan bütün sənədləri Böyük Britaniyaya göndərdikdən sonra E. Qaniç bu ölkəyə təhvil veriləcək. Qeyd edək ki, Belqrad dairə məhkəməsi 2009-cu ildə 19 sabiq bosniyalı məmurun, o cümlədən E.Qaniçin həbsi üçün order verib. Bu şəxslər 1992-ci ilin mayında Sarayevodan geri çəkilən Yuqoslaviya Xalq Ordusunun bölmələrinə hücumda ittiham olunur. Həmin vaxt Yuqoslaviya (serb) ordusu daha əvvəl razılaşdırılmış dəhlizlə Bosniya paytaxtı Sarayevonu tərk etməli idi. Lakin BMT sülhməramlılarının müşayiət etdiyi serb hərbçiləri bosniyalıların hücumuna məruz qalıb. Nəticədə 42 əsgər və zabit öldürülüb, 73 nəfər yaralanıb, 215 nəfər əsir götürülüb.

"Azərbaycana gətirilən avtomobillər "Avro-2" standartlarına uyğun olmasa, ölkəyə buraxılmayacaq." Bu barədə Ekologiya və Təbii Sərvətlər Nazirliyinin (ETSN) investisiya, inkovasiya və ekoloji layihələrlə iş şöbəsinin baş məsləhətçisi Sadiq Şirəliyev SİA-ya açıqlamasında bildirib.
   Onun sözlərinə görə, hazırda Azərbaycanda "Avro-2" standartlarına uyğun yanacaq istehsal olunur. Nazirlik rəsmisi qeyd edib ki, ölkəmizdə, həmçinin, bu standartlara uyğunluğu yoxlamaq üçün müasir cihazlar mövcuddur: "Ölkəyə daxil olan avtomobillərin sənədlərində bu barədə qeydiyyat aparılır. Yol polisində sənədləşdirilən avtomobillər diaqnostikadan keçərkən bu standartlar nəzərə alınacaq." O, həmçinin bildirib ki, avtomobillərə texniki baxış zamanı onların ixrac qazlarının tərkibində olan zəhərli maddələrə də polis tərəfindən nəzarət olunacaq. Mütəxəssis deyib ki, bu istiqamətdə, dövlət nəzarətindən başqa, istehsalat nəzarəti də olacaq: "Məsələn, Dövlət Neft Şirkətinin nəzdində təxminən 5 minə yaxın avtomobil var. O avtomobilləri yoxlamaq üçün Neft Şirkətinin monitorinq idarəsi fəaliyyət göstərir." Nazirlik rəsmisinin sözlərinə görə, "Avro-2" standardlarına uyğun olan avtomobillərin istehsal tarixinin hansı ilə qədər olmasını isə onların istehsal olunduğu ölkələr müəyyən edir: "Məsələn, Yaponiyada bu standarta 1997-ci ildən, Koreyada isə 2000-ci ildən bəri buraxılan maşınlar uyğun gəlir".
   Yasamalda Milli.Az xəbər portalı Fövqəladə Hallar Nazirliyinin saytına istinadən xəbər verir ki, nəticədə hər iki nəqliyyat vasitəsi deformasiyaya uğrayıb, "BMW" markalı minik avtomobilində olan sərnişin yaralanaraq avtomobildə sıxılmış vəziyyətdə qalıb. Xilasedicilər yaralını avtomobildən xüsusi avadanlıqların köməyilə çıxarıb.
   

Ağdam sakini, iki uşaq anası intihar edib. APA-nın Qarabağ bürosunun məlumatına görə, Ağdamın Xındırıstan kənd sakini, 1980 təvəllüdlü Kazımova Fidan Kamil qızı Paşabəyli kəndində yerləşən ata evinə gələrək özünü asıb. İki uşaq anası olan Fidan Kazımovanın intiharının səbəbi məlum deyil. Faktla bağlı araşdırma aparılır.

Dəməşqdə Azərbaycan qazının Suriyaya ixracı məsələləri müzakirə olunur. Bu barədə "APA-Economics"ə Azərbaycan Sənaye və Energetika Nazirliyi mətbuat xidmətinin rəhbəri Azər Mənsimli məlumat verib.
   A.Mənsimlinin sözlərinə görə, bu məqsədlə Azərbaycanın sənaye və energetika naziri Natiq Əliyevin rəhbərlik etdiyi nümayəndə heyəti srağagün Suriyaya səfər edib. Nümayəndə heyətində ARDNŞ-in vitse-prezidentləri Elşad Nəsirov, Muxtar Babayev və Azərbaycan Dövlət Neft Akademiyasının rektoru Siyavuş Qarayev təmsil olunur.
   "Suriya prezidentinin ötən il Bakıya səfəri zamanı Azərbaycan qazının bu ölkəyə nəqlinə dair ilkin razılıq əldə olunub. Azərbaycan nümayəndə heyəti Suriya rəsmilərilə görüşdə bununla bağlı detalları müzakirə edəcək" - deyə A.Mənsimli vurğulayıb.
   Müzakirələrə qazın qiyməti, tranzit xərcləri və s. məsələlər daxildir.
   Nazirlik sözçüsü bildirib ki, razılaşmaya əsasən, Azərbaycan cari ilin sonundan Suriyaya ildə 1 mlrd. kubmetr qaz ixrac edəcək. Artıq qazın ixracı ilə bağlı Türkiyə və Suriya arasında qaz şəbəkələri birləşdirilib və texniki məsələlər həll olunub.
   Azərbaycan nümayəndə heyəti Suriyanın energetika və mineral ehtiyatlar naziri, baş naziri və digər hökumət rəsmilərilə görüşlər keçirəcək, həmçinin Suriyadakı qaz emalı zavodunda olacaq. Səfər martın 4-də başa çatacaq.

Ali Məhkəmənin sədri Ramiz Rzayev ötən ilin yekunları ilə bağlı mətbuat konfransı keçirib.
   APA-nın məlumatına görə, R.Rzayev ölkədə məhkəmə sisteminin infrastrukturunun inkişaf etdiyini, yerli məhkəmənin müasir standartlara cavab verən binalarla təmin olunacağını deyib.
   O, Ali Məhkəmənin dəftərxanasının elektronlaşdırıldığını, cəzaçəkmə müəssisələrilə birbaşa videobağlantı sisteminin yaradıldığını qeyd edib. R.Rzayev 2009-cu ildə Ali Məhkəmənin kollegiyaları və plenumunda 4862 işə baxıldığını bildirib. Onun sözlərinə görə, respublikanın birinci instansiya ümumi və hərbi məhkəmələrində isə 14 min 14 cinayət işinə baxılıb və 14 min 496 nəfər müxtəlif cəzalara məhkum edilib, 21 nəfərə isə bəraət verilib.
   R.Rzayev 2008-ci ilə nisbətən 2009-cu ildə Ali Məhkəmədə baxılan işlərin 10 faiz artdığını deyib. Bəzi mətbuat orqanlarında Ali Məhkəmədə yoxlamaların aparılması barədə yanlış məlumatların yayıldığını deyən R.Rzayev "Məhkəməni heç kim yoxlaya bilməz. Məhkəmə sistemi müstəqil bir hakimiyyət qoludur" deyə bildirib. "2000-ci ilə qədər Azərbaycanda həbs-qətimkan tədbirinin seçilməsi prokurorluğun səlahiyyətində olub. Amma həmin ildən bu səlahiyyət məhkəmələrə verilib. Bunun da əsas məqsədi insanların hüquqlarının daha yaxşı qorunması idi. Amma təəssüflə demək lazımdır ki, bu belə olmadı". Ramiz Rzayev keçirdiyi mətbuat konfransında daha sonra qeyd edib ki, bununla bağlı Bakı şəhəri və Sumqayıtdakı vəziyyət öyrənilib və ortaya acınacaqlı faktlar çıxıb: "Bu məsələni Ali Məhkəmənin 2009-cu ilin noyabrında keçirilən plenumunda müzakirəyə çıxardıq. Təəssüflər olsun ki, hakimlər qətimkan tədbiri kimi həbsə üstünlük verir. Azərbaycanda girov qətimkan tədbiri tətbiq olunmur, başqa yerə getməmək, ev dustaqlığı qətimkan tədbirləri seçilmir". R.Rzayevin sözlərinə görə, həbs ən ağır, ən sərt qətimkan tədbiridir və bu tədbir müstəsna hallarda seçilməlidir: "Şəxsin istintaqdan qaçıb gizlənməsi, istintaqa təsir etməsi üçün əsaslar olarsa, həbs seçilməlidir. Məhkəmə həbslə bağlı qərar qəbul edərkən bu halları əsaslandırmalıdır". Ali Məhkəmə sədri mülahizələrlə həbs-qətimkan tədbirinin seçilməsinin mümkün olmadığını vurğulayıb. R.Rzayev bu məsələdə ciddi bir dəyişikliyin olacağına ümid etdiyini bildirib. Bunun üçün o, Ali Məhkəmə tərəfindən xüsusi əyani vəsaitlərin hazırlandığını, onların hakimlərə təqdim olunduğunu bildirib. R.Rzayev pozuntulara yol verən hakimlərin cəzalandırıldığını, 3 hakimin səlahiyyətinə xitam verildiyini, bir neçə hakimə töhmət verildiyini, bəzilərinin isə vəzifəsinin aşağı endirildiyini vurğulayıb.
   Ramiz Rzayev Avropa Məhkəməsinin qərarlarından da danışıb.
   O deyib ki, 2009-cu ildə Azərbaycandan Avropa İnsan Hüquqları Məhkəməsinə hüquq pozuntuları ilə bağlı edilmiş 7 şikayət təmin edilib. Ali Məhkəmə sədri deyib ki, bu vaxta qədər həmin qərarların 3-ü hüquqi qüvvəyə minib, digər 4 qərar isə məhkəmə qərarının qəbul olunmasından sonra 3 ay müddətində qüvvəyə minəcək.
   R.Rzayevin sözlərinə görə, indiyə kimi Azərbaycanla bağlı Avropa İnsan Hüquqları Məhkəməsində 26 işə baxılıb, onların 23-ü hüquq pozuntuları ilə bağlı olduğundan təmin edilib: "Ötən il Avropa Məhkəməsinə bütün Avropadan 35 min 560 iş daxil olub, ondan 33 min 65-nə baxılmayıb, rədd edilib. 2395 işə baxılıb. Bununla müqayisədə Azərbaycandan müraciətlər çox azdır". R.Rzayev onu da qeyd edib ki, Avropa Məhkəməsinin qəbul etdiyi qərarlar Azərbaycanda tam olaraq yerinə yetirilir. Ali Məhkəmə sədri qəbul edilən qərarların icrasının ləngidilməsi barədə iddiaların əsasının olmadığını da vurğulayıb.
   

Azərbaycanda aztəminatlı ailələrin vəkillə təmin olunmasını həyata keçirəcək qurum yaradılacaq. Ali Məhkəmənin sədri Ramiz Rzayev çərşənbə axşamı Trend News-un sualına cavab olaraq bildirib ki, qurumun ya müstəqil, ya Ədliyyə Nazirliyinin, ya da Ali Məhkəmənin tərkibində yaradılması təklif olunur.
   Rzayev bu qurumun Ali Məhkəmənin tərkibində yaradılmasının tərəfdarı olmadığını vurğulayıb.
   "Biz maddi durumu ağır olan tərəfə vəkil tutanda qarşı tərəf məhkəmənin bu qərarını həmin şəxsin himayə olunması kimi qiymətləndirə bilər. Odur ki, yaradılacaq qurum müstəqil fəaliyyət göstərməlidir" - sədr vurğulayıb.
   Rzayevin sözlərinə görə, vəkil üçün müraciət edən şəxsin maddi vəziyyəti həmin qurum tərəfindən araşdırılacaq.
   Həmin ailənin maddi durumu yaşayış minimumu həddindən az olarsa, həmin şəxsin adından vəkillə müqavilə bağlanacaq və vəkilin pulunu həmin qurum ödəyəcək.
   Rzayev deyib ki, yaradılacaq qurumun özünün büdcəsi olacaq və vəkil üçün ödəniləcək pul da həmin büdcədən veriləcək.
   "Vəkillərə xidmət müqabilində ödənilən məbləğ bu yaxınlarda 100 faiz artırıldı. Amma bu da istənilən səviyyədə deyil.
   Təyinatla işə çıxan vəkillər müqavilə ilə işə çıxan vəkillərdən az haqq alır. Bu qurum fəaliyyət göstərərsə, vəkillərin aldığı haqq arasında fərq də aradan qaldırılacaq" - Ali Məhkəmə sədri bildirib.
   Ali Məhkəmənin sədri Azərbaycanda belə bir qurumun müstəqil fəaliyyət göstərməsini vacib sayır.
   Azərbaycan qanunvericiliyinə görə, mülki işlərdə kassasiya instansiyasında işə mütləq vəkil çıxmalıdır.

Nazirlər Kabineti "İri dövlət vergi ödəyicilərinin gəlirlər və xərclər smetalarının icrası üzrə 2010-cu ildə aparılacaq monitorinqin qrafiki"ni təsdiq edib. Bu barədə "İnterfaks-Azərbaycan" agentliyinə Nazirlər Kabinetindən məlumat verilib.
   Təsdiqlənmiş qrafikə əsasən, cari ilin aprel ayında "Azərbaycan Hava Yolları" QSC-də (AzAL), mayda "Azərenerji" SC və "Azərsu" SC-də monitorinq aparılacaq. Bu strukturlarda monitorinq 2010-cu ilin I rübündə onların gəlirlər və xərclər smetalarının yerinə yetirilməsini əhatə edəcək", - deyə Nazirlər Kabinetinin nümayəndəsi bildirib. Onun sözlərinə görə, iyulda monitorinq "Bakıelektrikşəbəkə" SC-də, sentyabrda Xəzər Dəniz Gəmiçiliyində aparılacaq: "Bu təşkilatlarda monitorinq I yarımildə smetaların yerinə yetirilməsini əhatə edəcək".
   Oktyabrda monitorinq Rabitə və İnformasiya Texnologiyaları Nazirliyi, Bakı Metropoliteni, noyabrda SOCAR şirkəti (Dövlət Neft Şirkəti) və "Azərbaycan Dəmir Yolları" QSC, dekabrda "Azərikimya" Dövlət Şirkətində keçiriləcək: "Bu 5 strukturda monitorinq onların cari ilin 9 ayı ərzində büdcələri yerinə yetirməsini əhatə edəcək". Xatırladaq ki, Azərbaycan hökuməti Beynəlxalq Valyuta Fondunun tövsiyəsilə 2003-cü ildən dövlət müəssisələri arasında iri vergi ödəyicilərinin gəlirlər və xərclər smetalarının təsdiqlənməsi prosesinə başlayıb.
   

Ədliyyə Nazirliyinin Penitensiar Xidməti Eynulla Fətullayevin və cəzaçəkmə müəssisələrində saxlanan bütün məhkumların həyatının təhlükəsizliyinə tam təminat verir.
   "Onun həyatına təhlükə ilə bağlı yaydığı bəyanat tam əsassızdır. Eynulla Fətullayev və digər təqsirləndirilən şəxslərin təhlükəsiz şəraitdə saxlanması tam təmin edilib. Bu sözləri Ədliyyə Nazirliyinin mətbuat xidmətinin rəhbəri Mehman Sadıqov "Turan"a bildirib.
   O, "Turan"ın "təhlükəsizlik tam təmin edilibsə, cəzaçəkmə müəssisələrinə narkotiklər necə keçirilir? Narkotiklər keçirilirsə, insan həyatı üçün daha təhlükəli maddələrin cəzaçəkmə müəssiələrinə keçirilməyəcəyinə təminat varmı" sualının cavabında ötən il cəzaçəkmə müəssisələrində 41 nəfərin narkotiklə həbs edildiyini deyib. "Hazırda cəzaçəkmə müəssisələrində narkotiklə bağlı 4 mindən çox insan saxlanır.
   Həmin insanlar hər vəchlə cəzaçəkmə müəssisələrinə narkotik keçirilməsinə çalışır, biz isə bunun qarşısının alınması üçün daim tədbirlər görürük" - deyə o qeyd edib.
   8,5 il müddətinə azadlıqdan məhrum edilmiş Eynulla Fətullayev martın 1-də bəyan edib ki, onu öldürmək istəyirlər. Onun sözlərinə görə, qətl metodu həddindən artıq dozada narkotik qəbul etmə görüntüsü yaradılmasından ibarət olmalıdır. Fətullayev hesab edir ki, məhz bu məqsədlə dekabrın sonlarında 12 saylı Cəzaçəkmə Müəssisəsində onun üzərinə narkotik atılıb.
   

ABŞ Əfqanıstanda xaşxaş sahələrinin məhv edilməsilə bağlı proqramdan imtina edib. Lent.az-ın Amerika mətbuatına istinadən verdiyi məlumata görə, Vaşinqtonun bu qərarının səbəbi həmin proqramın arzu edilən nəticə verməməsidir.
   Dövlət katibinin köməkçisi Devid Conson deyib ki, ABŞ əfqan fermerlərə narkotik bitkilər əvəzinə alternativ fəaliyyətlə məşğul olmağı, kənd təsərrüfatı məhsulu istehsal etməyə diqqət yönəltməyi təklif edir. Devid Conson xaşxaş sahələrinin məhv edilməsilə bağlı proqramdan imtinadan Rusiyanın narahatlıq keçirməsindən məlumatlı olduqlarını söyləyib. Bununla belə, o hesab edir ki, bu proqram mövcud təhlükəni aradan qaldırmaq üçün effektiv olmayıb.
   

Azərbaycanın səhmdar bazarında vəziyyətin hansı səviyyədə olması barədə ötən saylarımızda məlumat vermişdik. Qeyd etmişdik ki, səhmdar cəmiyyətlər səhmdarlara heç bir dividend vermir. Yalnız bir-iki səhmdar cəmiyyət dividendlə işlədiyini etiraf edir və səhmdarlara az-çox xeyir verir.
   Ən dözülməz vəziyyət tikinti sektorundakı səhmdar cəmiyyətlərdədir desək, yanılmarıq. Tikintidə ən çox istifadə olunan mişar daşıdır. El arasında buna kubik deyilir. Kubik istehsalı isə, əsasən, Bakının Qaradağ və Qobustan rayonlarındadır. Buradakı karxanaların əksəriyyəti səhmdar cəmiyyət kimi fəaliyyət göstərsə də, əslində gəlirlər gizlədilir.
   Əsasən mişar daşları istehsal edən hələlik adlarını çəkmədiyimiz səhmdar cəmiyyətlərin rəhbərləri səhmdarlara bildirir ki, satış həddindən artıq aşağı düşdüyündən, şirkətlər ziyanla işləyir. Şirkətlərin nümayəndələri bildirir ki, səhmdarlara heç bir köməklik edə bilmirlər.
   Səhmdar cəmiyyətlərin ikili mühasibat uçotu ilə işlədiyini nəzərə çatdıran ekspertlər bildirir ki, bu cəmiyyətlər heç bir iclas çağırmır. Qanunla səhmdar cəmiyyətlər iclas çağırmalı və səhmdarların qarşısında hesabat verməlidir. Amma heç bir hesabat vermirlər. Bakıda tikinti bumu yaşananda da səhmdar cəmiyyətlərin nümayəndələri dividend əldə etmədiklərini bildiriblər. Mühasibat uçotlarında karxanalar ziyanla işləyir, amma real bazarda mənfəətləri böyükdür.
   "Səhmdarlarla daş karxanaları arasında "daş hasar" yenə də qalmaqdadır" deyən səhmdarların sözlərinə görə, mişar daşı bazarda 50 qəpiyə satıldığı halda, karxanaların sənədlərində qiymətlər 10 qəpik göstərilib. Bunun əsas günahı isə aidiyyəti qurumların üzərinə düşür. Nə qədər ki, vergi orqanları və digər dövlət qurumları öz üzərinə düşən işin öhdəsindən layiqincə gəlmir, bu cür hallar davam edəcək. Səhmdar cəmiyyətlər maliyyə sənədlərini düzəltmək əvəzinə, yoxlama aparanları "yola salmaq"la məşğuldur. Bu kimi hallar Azərbaycanda səhm bazarının inkişaf etməməsinə gətirib çıxarır.
   Daş karxanalarının fəaliyyətindən ciddi narazılıq edən səhmdarların əksəriyyəti aidiyyəti dövlət qurumlarının, xüsusilə də Vergilər Nazirliyinin və əmək müfəttişliyinin qeyd olunan şirkətlərdə yoxlamalar aparmasını vacib sayır. Redaksiyamıza daxil olan məlumata görə, xüsusilə də "Qızıldaş" Səhmdar Cəmiyyətində. Belə ki, "Qızıldaş" SC-də vəziyyət daha dözülməzdir. Daim zərərlə işlədiyini deyən "Qızıldaş" SC-nin rəhbərliyi səhmdarlara bu günə qədər qane edici heç bir pay verməyib.
   "Qızıldaş"ın fırıldaqçılıqla məşğul olduğunu deyən səhmdarlar bildirir ki, bu cəmiyyətin fəaliyyətində kifayət qədər qaranlıq məqamlar var. Bu və digər faktlarla bağlı araşdırma aparırıq.
   Qəzetimizin ötən saylarının birində yaxın vaxtlarda hüquq-mühafizə orqanları, xüsusilə də əmək müfəttişliyinin bir neçə karxanada yoxlamalara başlayacağını qeyd etmişdik. Səhmdarlar hesab edir ki, ciddi yoxlamalar aparılsa, səhmdar cəmiyyətlərin rəhbərliklərində təmsil olunan bir neçə şəxs həbs edilə bilər.
   Hələlik səhmdar cəmiyyətlərdə yoxlamalara başlanıb-başlanmadığı bizə məlum olmasa da, səhmdarların narahatlığı davam edir.
   Qeyd edək ki, bu günə qədər bir neçə cəmiyyətin rəhbəri səhmdarlar tərəfindən məhkəmələrə verilib. Amma cəmiyyətlərin real gəlirlərini göstərən sənədlər ortalıqda olmadığından, məhkəmələr səhmdarların xeyrinə qərar çıxara bilməyib. Bütün bunlar onu göstərir ki, Azərbaycandakı səhmdar cəmiyyətlər biznes nüfuzu və perspektivi deyil, gündəlik maddi maraqlarını düşünür. Bu isə artıq biznes mədəniyyətinin aşağı səviyyədə olduğunu göstərir.
   

"Şəmkirli Saşa" kimi tanınan Şahbaz Süleymanovun silahlı hücuma məruz qalması faktı ilə əlaqədar Cinayət Məcəlləsinin iki maddəsilə cinayət işi başlanıb. Bu barədə APA-ya Yasamal rayon Polis İdarəsindən məlumat verilib.
   Məlumatda bildirilir ki, hadisəni törədən "Qoca" ləqəbli Namiq Məmmədov saxlanıb. Cinayət işi Cinayət Məcəlləsinin 182-ci (hədə-qorxu ilə tələb etmə) və 228-ci (qanunsuz olaraq odlu silah, onun komplekt hissələrini, döyüş sursatı əldə etmə, satma, saxlama, daşıma, gəzdirmə) maddələrilə qaldırılıb. Hazırda hadisənin baş vermə səbəbləri araşdırılır.
   Qeyd edək ki, hadisə fevralın 28-dən martın 1-nə keçən gecə Yasamal rayonu ərazisində baş verib. Ş.Süleymanov Hüseyn Cavid parkının yaxınlığındakı "Mercedes" markalı avtomobilində olarkən ona tapançadan atəş açılıb. Məlumatlara görə, Ş.Süleymanovun başına tuşlanan güllə təsadüf nəticəsində avtomobildə quraşdırılmış monitora dəyib.
   Bildirilir ki, uzun müddət Rusiyada yaşayan tanınmış iş adamı, "Şəmkir" Futbol Klubunun sabiq prezidenti Ş.Süleymanovla "Qoca" ləqəbli şəxs arasında pul üstündə mübahisə yaranıb. Belə ki, "Şəmkirli Saşa" borc aldığı böyük məbləğdə pulu qaytardıqdan sonra ondan əlavə faiz tələb olunub. Tələb olunan pulu vermədikdə isə ona tapançadan atəş açılıb.
   "Şəmkirli Saşa"ya atəş açan "Qoca" ləqəbli N.Məmmədovun Bakı Şəhər Baş Polis İdarəsinin rəis müavini, general-mayor Elxan Həsənovun qudası olduğu bildirilir.

Dünən Ağır Cinayətlərə Dair İşlər üzrə Məhkəmədə Ağır Cinayətlərə Dair İşlər üzrə Məhkəmədə paytaxtda bir sıra oğurluq hadisələrini törətməkdə, o cümlədən İşgəncələr Əleyhinə Azərbaycan Komitəsinin sədri Elçin Behbudovun avtomobilindən ona məxsus 30 min manatı oğurlamaqda təqsirləndirilən şəxslərin məhkəmə prosesi davam etdirilib.
   APA-nın xəbərinə görə, hakim İradə Həsənzadənin sədrliyilə keçirilən prosesdə zərərçəkmiş qismində hüquq müdafiəçisi Elçin Behbudov ifadə verib. E.Behbudov deyib ki, 2008-ci il iyulun 14-də ona məxsus 30 min manat pul avtomobilindən oğurlanıb: "Böyük qızımın xeyir işilə bağlı cehiz almaq üçün dostlarımdan 38 min ABŞ dolları borc almışdım. Həmin pulu valyutadəyişmə məntəqələrinin birində Azərbaycan manatına çevirdim. Şəxsi işimlə bağlı "Nizami" metrostansiyasının yaxınlığında avtomobili saxlayıb düşdüm. Yaxınlıqda əvvəllər mənimlə birgə polis orqanında işləmiş istefada olan mayor rütbəli şəxsi gördüm. Biz görüşdük və ondan soruşdum ki, burda maşına əl vurmazlar? O dedi ki, burda heç bir problem ola bilməz. Bir neçə dəqiqə sonra həmin şəxs evə gedib. Oğrular isə öz işlərini görüblər. 25 dəqiqə sonra avtomobilə yaxınlaşanda gördüm ki, avtomobilin sürücü tərəfdən pəncərəsi sındırılıb və oturacağın altında olan pul çantası oradan oğurlanıb. Həmin dəqiqə polisə məlumat verdim. Sonra məlum oldu ki, oğrular məni valyutadəyişmə məntəqəsindən izləyiblər".
   E.Behbudov məhkəmədən ona məxsus pulun təqsirləndirilənlər tərəfindən ödənilməsininin təmin olunmasını xahiş edib. Təqsirləndirilən Ruslan Məmmədov isə oğurlanan pulun E.Behbudova məxsus olduğunu bilmədiklərini deyib: "Mənim "İnfiniti" markalı avtomobilim var. Onu da müsadirə ediblər. Məhkəmə icazə verirsə, həmin avtomobili pulun müqabilində Elçin Behbudova versinlər".
   E.Behbudov isə avtomobildən imtina edib. O zaman R.Məmmədov təklif edib ki, avtomobil satılsın və pulu Elçin Behbudova verilsin. Digər təqsirləndirilən Zaur Aslanov da ona məxsus "BMW" markalı avtomobilin satılaraq, pulunun E.Behbudova verilməsini istəyib.
   Qeyd edək ki, təqsirləndirilənlər - Səxavət Mehdiyev, Ruslan Məmmədov, Elgiz Hüseynov, Zaur Əliyev və Fətəli Həsənov Azərbaycan Cinayət Məcəlləsinin 180.2.1-ci (soyğunçuluq qabaqcadan əlbir olan bir qrup şəxs tərəfindən törədildikdə), 180.2.2-ci (təkrar törədildikdə) və 180.2.5-ci (zərərçəkmiş şəxsə xeyli miqdarda ziyan vurmaqla törədildikdə) maddələrilə ittiham olunur.
   

Sanksiyalar İran üçün humanitar problemlər yaratmayacağı təqdirdə Rusiya hakimiyyəti bu ölkəyə qarşı sanksiyaların tətbiqinə hazırdır.
   APA-nın vz.ru saytına istinadən verdiyi xəbərə görə, bunu Fransa Prezidenti Nikolya Sarkozi Parisdə Rusiya Prezidenti Dmitri Medvedyevlə danışıqlardan sonra bildirib. "Rusiya ilə Fransanın vacib məsələlərdə bir çox ortaq baxışları var. Məsələn, İranla bağlı Rusiya Prezidenti mənə bildirdi ki, sanksiyaların İran üçün humanitar problemlər törətməməsi üçün sanksiya məsələlərini həll etməyə hazırdır" - deyə Sarkozi bildirib.
   

Azərbaycanda Cinayət Məcəlləsinin müxtəlif maddələrilə axtarışda olan şəxs tutulub.
   Bu barədə APA-ya Daxili İşlər Nazirliyinin mətbuat xidmətindən bildirilib. Məlumata görə, Gəncə şəhər Nizami Rayon Polis Şöbəsi əməkdaşlarının həyata keçirdiyi əməliyyat-axtarış tədbirləri nəticəsində saxlanan Maarif Cəfərov Cinayət Məcəlləsinin 132 (döymə), 181 (quldurluq), 221 (xuliqanlıq), 320 (rəsmi sənədləri saxtalaşdırma) və 325-ci (saxtalaşdırılmış sənədi əldə etmə və ya satma) maddələrilə axtarışda olub.
   
   

Dağlıq Qarabağ münaqişəsilə bağlı olaraq yenidən bir sıra maraqlı məlumatlar gündəmə gəlməkdədir. Məsələ ilə əlaqədar bu dəfə daha çox diqqət cəlb edən hal isə Ermənistan Milli Konqresinin lideri Levon Ter-Petrosyanın İrəvanda təşkil olunmuş mitinqdə verdiyi açıqlamalardır.
   Serj Sarkisyan iqtidarının həm Dağlıq Qarabağ münaqişəsi, həm də Türkiyə ilə münasibətlərdə uduzduğuna əminliyini ifadə edən Levon Ter-Petrosyan bildirib ki, Dağlıq Qarabağ ətrafındakı 5 rayonun Azərbaycana qaytarılması məsələsi artıq həllini tapıb: "Prezidentlərin Soçi görüşündən sonra isə tərəflərin, sanki həllin açarını tapdığına dair qənaət yaranıb. Yaxın vaxtlarda bu məsələyə aydınlıq gələcək". O, istənilən halda, münaqişənin həll mərhələsinə qədəm qoyduğunu söyləyib: "Fikrimcə, Ermənistanla Azərbaycan Dağlıq Qarabağın gələcək statusu, oraya sülhməramlıların yerləşdirilməsi, həmçinin iki ölkə arasında quru sərhədlərinin müəyyənləşdirilməsi məsələlərinin də açarını tapıb".
   Türkiyə ilə münasibətlərə gəlincə, Ter-Petrosyan hesab edir ki, rəsmi İrəvan ilk gündən Ankaranın istənilən halda Azərbaycanın maraqlarını nəzərə alacağını bilməli idi. "Beynəlxalq ictimaiyyətin Türkiyəyə təzyiqlər etməsi haqda deyilənlər isə siyasi şoudur" - deyə müxalifət lideri bildirib: "Türkiyə və Ermənistan parlamentləri Sürix protokollarını ratifikasiya etmədiyi üçün çoxları prosesin dalana dirəndiyini bildirir. Lakin heç bir dalana dirənmədən söhbət getmir. Çünki Türkiyə prosesdən istədiyini alıb. Ankara son illər boyunca əsas hədəfi olan soyqırımın tanınması prosesini dayandırıb. Hazırkı mərhələdə Serj Sarkisyanın xarici siyasətinin dalana dirəndiyi haqda danışılmalıdır".
   Ermənistan prezidenti və Konstitusiya Məhkəməsinin Sürix protokolları ilə bağlı fəaliyyətini sərt tənqid edən Ter-Petrosyan hesab edir ki, bunlar Türkiyəyə hədiyyədir: "Daha bir belə təşəbbüs irəli sürülsə, nə Ermənistandan, nə də Qarabağdan bir şey qalacaq".
   Ermənistan Demokrat Partiyasının lideri Stepan Dəmirçyan isə Qarabağ münaqişəsilə əlaqədar Ermənistana beynəlxalq təzyiqlərin artdığını söyləyib: "Qarabağ danışıqlar prosesindən kənarlaşdırılıb. Türkiyə ilə münasibətlərin normallaşdırılması prosesində qeyri-müəyyənlik var. Ermənistanın bu protokolları imzalamaqla nə qazanacağı bilinmir. Bu qarışıq situasiyadan çıxmağın yeganə yolu yeni və ədalətli seçkilərin keçirilməsidir".
   Bu arada o da məlum olub ki, "Madrid prinsipləri"nin razılaşdırılmamış məqamları ilə bağlı İrəvanın təklifləri artıq ATƏT-in Minsk Qrupuna təqdim edilib. Bunu Ermənistanın xarici işlər naziri Edvard Nalbandyan İrəvanda ispaniyalı həmkarı, Avropa İttifaqının sədri Migel Anhel Moratinosla keçirdiyi birgə mətbuat konfransında deyib. Bununla yanaşı, o, jurnalistləri bundan sensasiya düzəltməməyə çağırıb. "Razılaşdırılmamış məqamlarla bağlı təkliflərin irəli sürülməsi adi prosesdir".
   "Milli.az" xəbər portalının məlumatına görə, Nalbandyan daha sonra deyib: "Bu uzun prosesdir. Proses tərəflərin mövqelərini yaxınlaşdırmağa nail olanadək davam edəcək. Burada qeyri-adi heç nə yoxdur".
   Xatırladaq ki, Azərbaycan və Ermənistan prezidentləri İlham Əliyevlə Serj Sarkisyanın yanvarın 15-də Soçidə rusiyalı həmkarları Dmitri Medvedyevin iştirakı ilə keçirdiyi görüşdə ATƏT-in Minsk Qrupunun həmsədrləri tərəflərə "Madrid prinsipləri"nin yenilənmiş variantını təqdim edib.
   O zaman verilən açıqlamada bildirilirdi ki, tərəflər 2 həftə ərzində yenilənmiş variantla bağlı təkliflərini hazırlamalı və vasitəçilərə təqdim etməlidir.
   

"Hansısa ölkədə başqa ölkənin əleyhinə təbliğat kampaniyasının aparılması təbiidir. Biz buna fövqəladə hal kimi baxmırıq". APA-nın məlumatına görə, bunu xarici işlər nazirinin müavini Vaqif Sadıxov İranda Azərbaycan əleyhinə aksiyaların keçirilməsinə münasibət bildirərkən deyib. Onun sözlərinə görə, belə kampaniyalar zamanı səsləndirilən fikirlər təşkilatçıların mövqeyini əks etdirir: "Biz də belə məsələlərdən özümüz üçün müəyyən nəticələr çıxarırıq".
   

Ermənistan Dağlıq Qarabağ münaqişəsinin həlli üzrə Madrid təkliflərinin yenilənmiş variantına dair təkliflərini vasitəçilərə təqdim edib.
   APA-nın "RİA Novosti"yə istinadən verdiyi məlumata görə, bunu Ermənistanın xarici işlər naziri Edvard Nalbandyan bu ölkədə səfərdə olan Avropa Birliyinə sədrlik edən İspaniyanın xarici işlər naziri Migel Anhel Moratinosla keçirdiyi birgə mətbuat konfransında deyib. O bildirib ki, proses davam edir: "Mövqelər yaxınlaşana, fikir ayrılıqları aradan qaldırılana qədər bu proses davam edəcək. Burada qeyri-adi bir şey yoxdur".
   Xatırladaq ki, yanvarın 15-də Azərbaycan, Ermənistan və Rusiya prezidentləri arasında Soçidə keçirilən görüş zamanı ATƏT-in Minsk Qrupunun həmsədrləri Madrid prinsiplərinin yenilənmiş variantını tərəflərə təqdim edib.
   

Avropa İttifaqı Türkiyə və Ermənistanı heç bir ilkin şərt irəli sürmədən Sürix protokollarını ratifikasiya etməyə və həyata keçirməyə çağırır.
   APA-nın "Novosti-Armenia"ya istinadən yaydığı məlumata görə, bu bəyanatla İspaniyanın xarici işlər naziri, Avropa İttifaqına sədrlik edən Migel Anhel Moratinos çıxış edib. O bildirib ki, Avropa İttifaqı Ermənistanla Türkiyə arasında münasibətlərin normallaşması prosesini dəstəkləyir və tərəfləri bu prosesə sadiq olmağa çağırır. Geniştərkibli nümayəndə heyətilə İrəvana gələn Moratinos Ermənistan prezidentinin protokolları parlamentə göndərməsini, Türkiyə prezidentinin isə Ermənistanla dialoqu davam etdirməyə hazır olduğunu bəyan etməsini alqışlayıb: "Avropa İttifaqı Ermənistan-Türkiyə prosesini dəstəkləyir. Protokolların imzalanması iki ölkə arasında münasibətlərdə mühüm tarixi dönüş nöqtəsidir. Avropa İttifaqı bu prosesə cəlb olunmaq istəyir. Ortada imzalanmış sənədlər varsa, bu proses davam etməli və protokollarda göstərilən məqamlar həyata keçirilməlidir".

Martın 1-də Azərbaycan Respublikasının Prezidenti İlham Əliyev Dövlət Teleqraf Agentliyinin - AzərTAc-ın 90 illik yubiley mərasimində və MDB Milli İnformasiya Agentliklərinin Rəhbərləri Şurasının XI iclasında iştirak edən nümayəndə heyətlərinin başçılarını qəbul edib.
   APA-nın AzərTAc-a istinadən verdiyi xəbərə görə, görüşdə Prezident İlham Əliyev qeyd edib ki, AzərTAc-ın yubileyi çərçivəsində keçirilən ənənəvi tədbir qonaqlara Azərbaycanla daha yaxından tanış olmaq imkanı yaradır.
   Dövlət başçısı belə görüşlərin, aparılan fikir mübadilələrinin ölkələr və xalqlar arasında qarşılıqlı anlaşmaya daha geniş imkanlar açdığını vurğulayaraq deyib ki, bu baxımdan informasiya agentliklərinin, kütləvi informasiya vasitələrinin fəaliyyətindən çox şey asılıdır. Həqiqi məlumatın vaxtında verilməsi operativ qərarların qəbulu, proseslərin düzgün şərh edilməsi, ölkələr arasında ikitərəfli və çoxtərəfli əlaqələrin qurulmasında mühüm rol oynayır.
   

Mətbuat Şurasının sədri Əflatun Amaşov Avropa Şurasının insan haqları üzrə komissarı Tomas Hammarberqlə görüşüb.
   Bu barədə APA-ya məlumat verən Ə.Amaşov bildirib ki, görüşdə Azərbaycanda söz və mətbuat azadlığının durumu ilə bağlı fikir mübadiləsi aparılıb: "Mətbuat Şurası bu ili Azərbaycanda "Diffamasiya ili" elan edib və fəaliyyətini, əsasən jurnalistlərin peşə-davranış qaydalarına əməl etməsi istiqamətində quracaq. Bu istiqamətdə fikir mübadiləsi aparıldı".
   Ə.Amaşov deyib ki, T.Hammarberq həbsdə olan jurnalistlərin vəziyyətilə maraqlanıb: "Novruz bayramı ərəfəsində həbsdə olan jurnalistlərə baş çəkəcəyik. Şura indiyədək həbsdəki jurnalistlərlə bağlı bir neçə dəfə müraciət edib. Milli mətbuatın yaranmasının 135 illiyi ərəfəsində bu məsələ yenidən müzakirə olunacaq".
   Şura sədrinin sözlərinə görə, T.Hammarberq peşə prinsiplərinə əməl etməyən KİV-lərdən ibarət "qara siyahı" və Mətbuat Şurasında vətəndaşların müraciətlərinə baxılma qaydası ilə də maraqlanıb.
   

Yeni Azərbaycan Partiyası Avropa Xalq Partiyasına müşahidəçi qismində üzv qəbul edilməsi üçün müraciət edib.
   APA-nın məlumatına görə, bu barədə Avropa Xalq Partiyasının sədri Vilfrid Martens bildirib. Onun sözlərinə görə, YAP-ın onun rəhbərlik etdiyi təşkilata üzvlüyü ikitərəfli əlaqələri daha da gücləndirə bilər: "Mart ayında məhz bu mövzunu müzakirə etmək üçün işçi qrupun toplantısı keçiriləcək. Ümid edirik ki, bu müraciətə müsbət cavab veriləcək" .
   V.Martensi, həmçinin, Dağlıq Qarabağ münaqişəsinin həllilə bağlı məsələyə də münasibətini açıqlayıb: "Biz düşünürük ki, bu məsələnin çözülməsi "Madrid prinsipləri"nə əsaslanmalı, ATƏT-in Minsk Qrupu öz işini davam etdirməli, beynəlxalq hüququn aliliyinə hörmət edilməlidir".
   
   

Yasamal Rayon Məhkəməsinin "Femida 007" qəzetinin baş redaktoru Əyyub Kərimov barəsində fevralın 3-də çıxardığı hökmdən apelyasiya şikayəti verilib. "Media forum" saytına danışan Daxili İşlər Nazirliyi mətbuat xidmətinin rəis müavini Ehsan Zahidovun sözlərinə görə, nazirliyin səlahiyyətli nümayəndələri Nazil Əliyev və Dableyka Quliyev DİN əməkdaşları adından şikayət hazırlayıb: "Apelyasiya şikayətində cəzanın daha da sərtləşdirilməsi istənilir. Nazirlik əməkdaşları hesab edir ki, baş redaktora verilən cəza törətdiyi əmələ, polisi nahaqdan cinayət əməllərində günahlandırmasına adekvat deyil. Ona görə də xahiş edilir ki, Əyyub Kərimova verilən cəza sərt olsun". Yasamal Rayon Məhkəməsi Ə.Kərimovu Daxili İşlər Nazirliyinin veteranlarının iddia ərizəsi əsasında Cinayət Məcəlləsinin 147.2-ci maddəsilə (ağır və ya xüsusilə ağır cinayətdə ittiham etməklə böhtan atma) təqsirli bilib. Baş redaktor aylıq maaşından 15 faizi tutulmaqla 1 il 6 ay müddətinə islah işlərinə cəlb olunub. 220 manat məbləğində məhkəmə xərcləri və məhkəmə ekspertiza xərcləri də Ə.Kərimovun hesabına ödənəcək. Polis əməkdaşları və veteranları adından verilmiş iddiada deyilir ki, baş redaktor "Femida-007" qəzetində "Məktubbazlıq", "MTN və Baş Prokurorluq çox gözəl bilir ki, sifarişçi kimdir" başlıqlı, "Azadlıq" qəzetində isə "DİN oyunun içində və oyundankənar vəziyyətdə" sərlövhəli yazılarda polisin şərəf və ləyaqətini alçaldan fikirlər səsləndirib, nazirə isə böhtan atıb.
   

Gəncə şəhərində yerləşən 1 saylı Doğum Evində biri qız, ikisi oğlan olmaqla üçəm dünyaya gəlib. Gəncə şəhər 1 saylı Doğum Evindən APA-nın qərb bürosuna verilən məlumata görə, Gəncə sakini Zülfiyyə Məmmədovanın dünyaya gətirdiyi uşaqlar vaxtından əvvəl doğulduğundan, bir müddət həkim nəzarəti altında qalacaq. Oğlanların birinin çəkisi 1,2 kiloqram, digərininki 900 qram, qızın çəkisi isə 1 kiloqramdır. Uşaqların və ananın vəziyyəti normal qiymətləndirilir.
   

Astara rayonunda intihar hadisəsi baş verib. Astara Rayon Prokurorluğundan APA-nın cənub bürosuna verilən məlumata görə, hadisə martın 1-də saat 18.00 radələrində rayonun Kijəbə qəsəbə ərazi nümayəndəliyinə daxil olan Lovain kəndində qeydə alınıb.
   Kənd sakini, 1992-ci il təvəllüdlü Əfsanə Fərzəddin qızı Həsənova kəndirlə həyətlərindəki ağacların birindən özünü asaraq öldürüb. Ə.Həsənovanın səkkiz ay öncə nişanlandığı bildirilir. İntiharın səbəbləri barədə isə hələlik heç bir məlumat verilmir. Faktla bağlı Astara Rayon Prokurorluğunda Cinayət Məcəlləsinin 125-ci maddəsilə cinayət işi açılıb, araşdırma aparılır. Sumqayıtda 17 yaşlı qız özünü öldürüb. Bu barədə APA-ya Sumqayıt Şəhər Polis İdarəsindən məlumat verilib.
   Hadisə martın 1-i, 17-ci mikrorayon, ev 51, mənzil 6-da qeydə alınıb. Həmin ünvanda yaşayan 1993-cü il təvəllüdlü Kəmalə Nadim qızı Həsənzadə yaşadığı evin vanna otağında özünü asıb. Mərhumun özünə qəsd etməsinin səbəbləri barədə hələlik heç bir məlumat yoxdur. Bununla belə, K.Həsənzadənin ruhi xəstə olduğu bildirilir.
   Faktla bağlı Sumqayıt Şəhər Prokurorluğu tərəfindən Cinayət Məcəlləsinin 125-ci (özünü öldürmə həddinə çatdırma) maddəsilə cinayət işi başlanıb, istintaq gedir.

Qusar rayonunda torpaq sürüşməsi fəallaşıb. APA-nın Fövqəladə Hallar Nazirliyinin rəsmi internet səhifəsinə istinadən dünən yaydığı məlumata görə, hazırda sürüşmə 10 min m2 ərazini əhatə edir.
   Məlumatda bildirilir ki, Nazirliyin şimal Regional Mərkəzindən daxil olan məlumata əsasən, 2009-cu ilin mart ayının ortalarında Qusar rayonu Urva kəndində baş vermiş torpaq sürüşməsi 22 fevral 2010-cu il tarixindən yağıntılar nəticəsində fəallaşıb. Sürüşmə ərazisində yerləşən evlərə ciddi təhlükə yaradıb. Hazırda aidiyyəti qurumlar tərəfindən müvafiq tədbirlər həyata keçirilir.

Lənkəran rayonunda 30 yaşlı qadın dərmandan zəhərlənərək dünyasını dəyişib. APA-nın cənub bürosunun xəbərinə görə, hadisə dünən qeydə alınıb. Səhər saat 10.00 radələrində Lənkəran şəhər sakini, 1980-ci il təvəllüdlü Samirə Aydın qızı Mirzəyeva koma vəziyyətində Lənkəran Mərkəzi Rayon Xəstəxanasına gətirilib. Qadın orada dünyasını dəyişib. İlkin ehtimala görə, onun ölümünə hamiləliyə qarşı qəbul etdiyi dərman səbəb olub.
   Mərhumun 3 övladının olduğu bildirilir. Məlumata görə, mərhum artıq dəfn edilib. Amma ölümün dəqiq səbəbini aydınlaşdırmaq üçün meyitin eksqumasiya olunacağı bildirilib. Faktla bağlı Lənkəran Rayon Prokurorluğunda araşdırma aparılır.

Fevralın 27-də Çilidə baş verən 8,8 bal gücündə zəlzələ bütün dünyanı silkələyib. Lent.az-ın xəbər agentliklərinə istinadən verdiyi məlumata görə, zəlzələ dünyanın orbitini belə dəyişib.
   Reaktiv Hərəkat laboratoriyasının əməkdaşı Riçard Qrossun apardığı hesablama göstərib ki, Yer kürəsinin kütləsinin dəyişməsi nəticəsində planetimiz oxundan təxminən 8 santimetr aralanıb. Nəticədə, dünyada sutkanın uzunluğu da 1,26 millisaniyə azalıb. O, Çili zəlzələsini 2004-cü ildə Sumatrada baş vermiş təbii fəlakətlə müqayisə edib: "Həmin vaxt Yer öz oxu ətrafında yerini 7 santimetr dəyişmişdi. İndi isə bu dəyişiklik 8 santimetrdir". Xatırladaq ki, bu günlərdə Çili yaxınlığında okeanda baş vermiş zəlzələnin gücü 8,8 bal olub.
   

Azərbaycan Müdafiə Nazirliyi atəşkəsin pozulması və Azərbaycan hərbçiləri tərəfindən bir erməni əsgərin vurularaq öldürülməsi barədə Ermənistan tərəfinin iddiasını təkzib edib.
   Nazirliyin mətbuat xidmətinin rəis müavini Teymur Abdullayev APA-ya açıqlamasında Ermənistan Müdafiə Nazirliyi mətbuat xidmətinin yaydığı məlumatın həqiqətə uyğun olmadığını deyib: "Əldə etdiyimiz məlumatlara görə, Sarkis Voskanyan səngərdə erməni əsgərləri arasında baş verən atışma nəticəsində ölüb. Hadisə zamanı bir erməni əsgər də ağır yaralanıb. İrəvan mərkəzi hospitalının bir qrup həkimi yaralı əsgəri xilas etmək məqsədilə cəbhə bölgəsinə ezam olunub. Baş vermiş olayla bağlı Ermənistan Hərbi Prokurorluğunda cinayət işi başlanıb, üç nəfər həbs edilib". Qeyd edək ki, Ermənistan Müdafiə Nazirliyi Tavuş rayonunun Çinari kəndi yaxınlığında Azərbaycan hərbçilərinin açdığı atəş nəticəsində pulemyot bölməsinin komandiri, müqavilə əsasında xidmət edən 29 yaşlı kiçik serjant Sarkis Voskanyanın başından güllə yarası alaraq həlak olduğunu açıqlayıb.
   

İran Məsləhət Şurasının sədri Haşimi Rəfsəncaninin övladları haqqında cinayət işi açılıb.
   APA-nın "Farsnews"a istinadən verdiyi məlumata görə, İranın ədliyyə naziri Mürtəza Bəxtiyari bildirib ki, Haşimi Rəfsəncaninin övladları Mehdi və Faizə Haşimi Rəfsəncanilər 2009-cu ilin iyun ayından etibarən ölkədə dəfələrlə qarışıqlıq salıb, qanunsuz küçə yürüşlərində iştirak edərək insanları qarşıdurmaya səsləyib. Nazir hər iki şəxs haqqında indiyə qədər bəzi araşdırmalar aparıldığını bildirib. Hazırda onlar haqqında rəsmi olaraq cinayət işi başlanıb və sabiq prezidentin övladları törətdiyi əməllərə görə məhkəmə qarşısında cavab verməli olacaq.
   

Milli Məclisin növbəti iclası martın 5-də keçiriləcək. APA-nın xəbərinə görə, iclasın gündəliyinə 13 məsələnin müzakirəsi daxil edilib.
   Gündəlikdəki ilk məsələ Azərbaycanın insan hüquqları üzrə müvəkkilinin (Ombudsmanın) seçilməsi haqqındadır. Bundan başqa, gündəliyə Azərbaycanla Fransa arasında diplomatik pasportlara malik vətəndaşların qısamüddətli viza rejimindən qarşılıqlı azad olunması, Azərbaycanla Fransa arasında mədəniyyət mərkəzlərinin təsisi və fəaliyyət şərtləri haqqında sazişlərin təsdiqlənməsi haqqında qanun layihələri daxildir.
   
   
   

Bu barədə APA-ya Binəqədi Rayon Prokurorluğundan məlumat verilib. Hadisə martın 1-dən 2-ə keçən gecə baş verib. Gürcüstan vətəndaşı, 1950-ci il təvəllüdlü Məyli Məmmədov Bakıda yaşayan qızı, 1974-cü il təvəllüdlü Rahilə Ənsərovanın evinə qonaq gəlib. Gecə yarısı Gürcüstana geri qayıdacağını bildirən ata qızından onu yola salmağı xahiş edib.
   Yaşadıqları binanın həyətindəki zibilliyin yanına çatanda M.Məmmədov özü ilə gətirdiyi bıçaqla qızını başını kəsərək qətlə yetirib.
   Bu barədə polisə məlumat daxil olan kimi, dərhal əməliyyat qrupu yaradılıb. Həyata keçirilən axtarış tədbirləri nəticəsində hadisəni törədən M.Məmmədov saxlanıb.
   Polis tərəfindən dindirilən M.Məmmədov hadisəni namus üstündə törətdiyini və Gürcüstandan Bakıya məhz qızını öldürmək məqsədilə gəldiyini etiraf edib.
   ANS TV-nin məlumatına görə, Gürcüstanın Marnueli rayonundan olan Məyli Məmmədov dindirilmə zamanı hüquq-mühafizə orqanlarına bildirib ki, rayonda olarkən 36 yaşlı qızı Rahilə Ənsərova barədə heç də xoş olmayan məlumatlar eşidib. Bundan sonra qızının sürdüyü həyat tərzinə görə ona bir neçə dəfə xəbərdarlıq edib. Etdiyi nəsihətə əməl edilmədiyini düşünən ata bu dəfə daha sərt qərar verərək Bakıya üz tutub.
   Fevralın 1-də qızının Binəqədi rayonu, Süleyman Sani Axundov küçəsi ev 1-də kirayə yaşadığı mənzilə gələrək qızı ilə söhbət edib, sonra onu ürəyində tutduğu planı həyata keçirmək üçün bayıra çıxarıb. Nə qədər əsəbi olsa da, qətli azyaşlı uşaqların gözü qarşısında törətmək istəməyib. Təxminən saat 21:00 radələrində Gürcüstana qayıtmalı olduğunu bildirərək, qızının onu ötürməsini istəyib. Mənzildən bir az aralıda yerləşən Hacıyev küçəsindəki qarajların yanına çatanda üzərində olan bıçaqla qızına boğazının ön nahiyəsindən kəsilmiş-deşilmiş xəsarət yetirib.
   Rahilə Ənsərova hadisə yerində keçinib, ata isə polisə gedərək törətdiyi cinayəti etiraf edib.
   Faktla bağlı Binəqədi Rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb, araşdırma aparılır.
   Qeyd edək ki, qətlə yetirilən Rahilə Ənsərova həyat yoldaşından ayrıldığına görə 3 uşaqla kirayə tutduğu evdə yaşayırmış.