Rusiyanın Vankuverdə keçirilən Qış Olimpiya Oyunlarında uğursuz çıxış etməsi ölkə prezidenti Dmitri Medvedyevi hiddətləndirib.
   Milli.Az "Life News"a istinadən xəbər verir ki, "Vahid Rusiya" partiyasının rəhbərliyi ilə keçirdiyi görüşdə Kreml sahibi başa çatmış Olimpiadada ölkəsinin çıxışını da dəyərləndirib: "Olimpiadaya hazırlığa görə məsuliyyəti kim daşıyırsa, indi də məsuliyyət daşımalıdır. Məsul şəxslər cəsarətli olmalı və istefa ərizəsi yazmalıdır. Bacarmırlarsa, biz kömək edərik".
   O, məsuliyyət daşıyanların kimlər olduğuna da işarə edib: bunlar idman federasiyaları və İdman Nazirliyidir. Medvedev hesab edir ki, Vankuver Olimpiadası Rusiyada idmançıların hazırlıq prosesinə köklü dəyişikliklər edilməsinin vacibliyini üzə çıxarıb: "Biz uzun müddət Sovet İttifaqının imkanları ilə hərəkət etmişik və günlərin birində bu imkanlar tükənib". Medvedev Sovet İttifaqının idman məktəbini ideallaşdırmağa ehtiyac olmadığını da söyləyib.

"Neftçi"nin sabiq baş məşqçisi Hans-Yurgen Gede özünə yeni iş yeri tapıb. Fanat.az xəbər verir ki, alman məşqçi Liviya çempionatında çalışmağa başlayıb. Belə ki, Gede Liviyanın "Tahhadi" klubuna baş məşqçi təyin edilib. Liviyalılar onunla iki illik anlaşma imzalayıb.
   Gedenin yeni komandası Liviyanın ikinci divizionunda çıxış edir. Komanda Liviya Premyer Liqasını 2007/08 mövsümündə tərk edib. "Tahhadi" 4 dəfə Liviya çempionu (1967, 1977, 1997) olub, 1 dəfə ölkə Super Kubokunu (1997) qazanıb və 1999-cu ildə kubokun finalında oynayıb. Bu komanda 1967 və 1978-ci illərdə Afrika Çempionlar Kubokuna qatılıb. Qeyd edək ki, Gede ötən il Myanmarın "Okktaha" klubunda çalışırdı. Bir müddət əvvəl onu bu klubdan da qovublar. Onu da nəzərinizə çatdıraq ki, Gedeni ölkəmizə Berti Foqts gətirmişdi. Bir müddət milli komandada köməkçi-məşqçi işləyən alman daha sonra "Neftçi"nin baş məşqçisi təyin olundu. O, ölkəmizdə qalmaqalçı kimi tanınıb. Belə ki, Rəşad Sadıqov, Aleksandr Çertoqanov, Georgi Adamiya, Elnur Allahverdiyev, və Levent Kartopu komandadan kənarlaşdıran Gede daha sonra özü də qovuldu. Bir müddət əvvəl isə o, "Neftçi"dən FİFA-ya şikayət edərək, komandanı 100 min dollar cərimə etdirib.

Lüksemburq yığması martın 3-də Azərbaycan milli komandası ilə oyuna sürpriz hazırlayıb. Apasport.az saytının məlumatına görə, baş məşqçi Quy Hellers yığmamız üçün taktiki yenilik hazırlayıb.
   Lüksemburqlu həmkarlarımızın fikrincə, onların komandası hücum futbolu nümayiş etdirməklə çoxlarını təəccübləndirəcək. Dünya çempionatının seçmə mərhələsi ilə müqayisədə tam fərqli oyun göstərəcək meydan sahibləri son iki yoxlama görüşündə də bu yeniliyi sınaqdan çıxarıb. Almaniyanın "Ayntraxt" (Trir) və Fransanın "Mets" klubları ilə görüşlərə əsasən belə qənaətə gələn həmkarlarımız ön xətdəki fəallığın artacağına sevinir. Bütün bunlara baxmayaraq, Lüksemburq millisinin meydana 1, yoxsa 2 hücumçu ilə çıxacağı hələ dəqiqləşməyib. Bu Hellersin neçə mərkəz müdafiəçisinə güvənəcəyindən asılı olacaq. Qeyd edək ki, martın 3-də "Josi Bartel" stadionunda keçiriləcək qarşılaşma Bakı avxtı ilə saat 23:00-da başlayacaq.

Türkiyəli futbolçu Fatih Təkkə yeni klubu "Rubin"in heyətində 10 nömrəli forma ilə çıxış edəcək. "Sport-Ekspress" xəbər verir ki, Rusiya çempionu ilə müqavilə imzalamış hücumçu 9 nömrəli futbolkanı istəsə də, sonda 10 nömrə ilə kifayətlənməli olub. Buna səbəb hazırda 9 nömrəli futbolkanın Salukvadzeyə məxsus olmasıdır.

Azərbaycan milli komandası İordaniyada keçirilən təlim-məşq toplanışını başa vuraraq Lüksemburqa yola düşüb. Fanat.az xəbər verir ki, martın 3-də Lüksemburq yığması ilə keçiriləcək yoldaşlıq oyununun hazırlığında iştirak etmək üçün daha bir futbolçu - Vaqif Cavadov millinin düşərgəsinə qoşulacaq.
   Qeyd edək ki, srağagün "Anji"nin üzvü Mahir Şükürov da yığmanın düşərgəsinə yollanıb.
   

"Xəzər-Lənkəran" klubunun futbolçusu Denis Kalinkov Moldova milli komandasından kənarlaşdırılıb. Apasport.az saytının məlumatına görə, 24 yaşlı hücumçu martın 3-də Qazaxıstanla yoldaşlıq görüşündə iştirak etməyəcək. Moldovalıların yeni baş məşqçisi Qabi Balint Türkiyədə keçiriləcək yoldaşlıq görüşünə çağırdığı Kalinkovun adını sonradan siyahıdan çıxarıb. Buna səbəb Denisin zədədən sonra tam sağalmamasıdır. Hücumçu "Xəzər-Lənkəran"ın heyətində Unibank Premyer Liqasında "Standard"la ev oyununda (0:0) aldığı zədədən sonra müalicə olunur.
   

"Mançester Yunayted" klubu bu mövsümdə ilk kubokunu əldə edib. Aleks Ferqyusonun baş məşqçisi olduğu kollektiv İngiltərə Liqa Kuboku uğrunda final qarşılaşmasında "Aston Villa"nı 2:1 hesabı ilə məğlub edərək bu titula sahib çıxıb.
   Oyunda ilk olaraq Ceyms Milner "Aston Villa"nı önə keçirsə də, sonradan Maykl Ouen və Ueyn Runinin qolları sayəsində "Mançester Yunayted" qələbəni təmin edib.
   Xatırladaq ki, "Mançester Yunayted" ötən mövsüm də, İngiltərə Liqa Kubokunu qazanmışdı.
   

"Bundan sonra "Fenərbaxça"nın çempion olmasına imkan yoxdur. "Fənər" bu heyət və bu məşqçi ilə çempion ola bilməz". Bunu "Fənərbaxça" klubunun keçmiş oyunçusu, idman icmalçısı Rıdvan Dilmən deyib.
   Dilmən bu fikirlərini "Fənərbaxça" komandası "İBBspor" komandasına 1:2 məğlub olduqdan sonra TV proqramında bu oyunu şərh edərkən deyib. Rıdvan Dilmən həmçinin əlavə edib ki, belə fikirləşməsinin səbəbi sadəcə axırıncı oyun deyil. "Fənərbaxça" son 8 ildə həyata keçirdiyi səhv transferləri gözdən keçirməlidir. Bu komandadan Aleks, Emre və Gökhanı çıxsaq geriyə heç nə qalmaz".
   Qeyd edək ki, Türkiyənin 4 ən böyük futbol komandalarından biri olan "Fənərbaxça" fevral ayında qarşılaşdığı oyunların heç birindən qalib ayrılmayıb.
   

İngiltərə millisinin italiyalı baş məşqçisi Fabio Kapello keçmiş iş yerinə qayıda bilər.
   "Tuttosport" qəzetinin yazdığına görə, yayda keçiriləcək futbol üzrə dünya çempionatından sonra onun yenidən "Yuventus" klubunu çalışdırması mümkündür. Xatırladaq ki, 2004-2006-cı illərdə "Qoca sinyora"ya rəhbərlik etmiş Kapello bu klubla 2 dəfə İtaliya çempionluğunu qazanıb. Təcrübəli mütəxəssis "Milan", "Roma" və "Real" (Madrid) klublarına da rəhbərlik edib və onların hər biri ilə milli çempionatda birinci olmağı bacarıb.
   

"Mançester Yunayted" futbol klubunun hücumçusu Ueyn Runi zədələnib.
   Futbolçu İngiltərə Liqa Kubokunun "Aston Villa" ilə final qarşılaşmasında ayaq əzələ bağını dartıb. Futbolçunun martın 3-də baş tutacaq İngiltərə - Misir matçında forma geyinməyəcəyi artıq dəqiqləşib.
   Xatırladaq ki, "Mançester Yunayted" Ueyn Runinin də qol vurduğu final oyununda "Aston Villa"nı məğlub edərək Liqa Kubokuna sahib çıxmışdı.
   

Futbol üzrə Çili yığma komandası zəlzələ səbəbindən Kosta-Rika və Şimali Koreya milliləri ilə keçirəcəyi yoldaşlıq görüşlərini təxirə salıb. Qeyd edək ki, hər iki görüş bu həftə baş tutmalı idi.
   2009-cu ilin noyabr ayında Çili komandasının Almaniya kollektivi ilə hazırlıq oyunu təxirə salınmışdı. Buna səbəb isə Almaniya kollektivinin qapıçısı Robert Enkenin intihar etməsi idi.
   Xatırladaq ki, Çili ərazisində zəlzələ fevralın 27-də baş vermişdi. Təbii fəlakət nəticəsində 700-dən çox insan dünyasını dəyişib.