Qarşıdan gələn parlament seçkilərilə əlaqədar bir sıra müxalifət partiyaları artıq hazırlıqlara başlayıb. Ancaq nədənsə, Azərbaycan Milli İstiqlal Partiyasının timsalında bu o qədər də hiss olunmur. Bununla yanaşı, sözügedən partiya 2 ildən çoxdur ki, sədrsiz fəaliyyət göstərir. Partiyaya yeni sədrin seçilməsilə bağlı indiyədək qurultay keçirilməyib.
   Həmçinin, partiyanın fəaliyyətində müəyyən passivlik hiss olunur. Bu da, istər-istəməz, partiyanın fəaliyyətinə öz mənfi təsirini göstərir. Maraqlıdır, müstəqil Azərbaycanın qocaman partiyalarından biri olan, bir vaxtlar ana müxalifət statusunda çıxış edən və kifayət qədər strukturlaşmış AMİP-də qurultay niyə gecikir?
   Bütün bu və digər məsələlərə aydınlıq gətirən AMİP-in baş katibi Fuad Muxtarovun sözlərinə görə, partiyanın qurultayının gecikməsi ancaq və ancaq yer problemilə əlaqədardır: "Ən başlıcası, bununla əlaqədar bizə süni maneələr yaradıldı. Ona görə də yer məsələsi ən aktual məsələ olaraq qalmaqdadır. Bir sıra instansiyalara davamlı müraciətlərimizə baxmayaraq, heç birinə cavab verilmədi. Yeri gəlmişkən onu da qeyd edim ki, qurultay keçirməkdən ötrü bir sıra otellərə belə müraciət etsək də, bizə yox cavabı verdilər. Təbii ki, bunu birbaşa demədilər. Sadəcə bildirdilər ki, həmin günlərdə tədbirləri var və sair. Məsələn, "Hyatt Regency" otelindən bizə bildirdilər ki, böyük zalları aylıq kirayəyə götürülüb və o üzdən bizə yer vermək imkanları yoxdur. Sonra bir sıra digər yerlərə də müraciət olundu, onlar da yox dedilər. Digər tərəfdən qurultayın keçirilməsilə bağlı çox böyük istək nümayiş etdirsəydik, o zaman balaca bir məkanda belə qurultay keçirə bilərdik. Bunu etmədik və fikirləşdik ki, müəyyən bir zaman keçsin, bəlkə siyasi proseslərdə bir durulma baş verdi. O cümlədən siyasi partiyalara münasibət bəlkə dəyişdi. Təəssüf ki, bunların heç biri baş vermədi. Bütün bunların fonunda qurultay məsələsi bir qədər gecikdi. İndi də, təəssüflər olsun ki, Azərbaycanda partiyalaşma məsələsinə böyük zərbə endirilib. Müxalifyönümlü siyasi partiyaların böyük hissəsinin sıradan çıxarılması istiqamətində çox böyük "uğurlara" nail olunub və bu proses davam edir. Müxalifət partiyaları yerindən, yurdendan məhrum edilib. Hələlik partiyanın qurultayının keçirilməsi gündəmdə deyil və çox güman ki, parlament seçkilərinə qədər qurultay keçiriləcək. Nəticədə partiyanın sədr məsələsi öz həllini tapacaq. Partiya sədrliyinə namizədliyimi vermək haqqında ümumiyyətlə fikirləşmirəm. Dəfələrlə bu haqda mətbuata açıqlama vermişəm".
   F.Muxtarov iddia edir ki, ölkədə siyasi partiyaların hərəkəti, fəaliyyəti üçün hazırda meydan yoxdur: "Ona görə də, sadəcə adımın qarşısında sədr sözü yazılması naminə proseslərə qoşulmaq fikrim yoxdur. Digər tərəfdən, etiraf edirəm ki, sədrsiz qalması partiyanın fəaliyyətinə mənfi təsir göstərir.
   Bunu etiraf etməmək, reallığı qəbul etməmək olardı. Biz zaman-zaman regional tədbirlər keçiririk və həmin tədbirlərdə siyasi partiya üzvləri açıq şəkildə öz etirazını bildirir ki, bu boyda təşkilatı rəhbərsiz qoymaq olmaz. Ancaq bir daha qeyd edim ki, bu səbəblərin 99 faizi bizdən asılı deyil. Bunların hamısı süni yaradılan səbəblərlə əlaqədardır. Bütün bunlara rəğmən, ümidverici hal ondan ibarətdir ki, ötən 10-15 ildə partiya üzvləri mətanətlə mübarizə aparır. Eyni zamanda, bu həm də həvəsləndirici motivdir". F.Muxtarovun fikrincə, qurultayın parlament seçkiləri ərəfəsində keçirilməsi partiyanın seçkilərə hazırlığına mənfi təsir göstərməyəcək: "Ona görə ki, qurultayla bağlı böyük hazırlıqlar görülüb. Əsas məsələ parlament seçkilərində iştirakla bağlı insanları indiki fikirlərindən döndərməklə bağlı olacaq. Bu da çox çətin məsələdir. Çünki insanlar bələdiyyə seçkilərini və onun nəticələrini görəndən sonra çox bədbin əhval-ruhiyyədədir. Bu isə heç də yaxşı hal sayıla bilməz".
   

Siyasi partiyaların sayının çoxluğuna görə regionda lider ölkələrdən olan Azərbaycanda siyasi qurumların daxili inteqrasiyası, təmərküzləşməsinin zəruriliyi dəfələrlə vurğulansa da, müsbət nəticə əldə olunmayıb.
   Amma parlament seçkiləri qabağı platforması eyni olan siyasi təşkilatların bir araya gəlməsi və güclü partiyalar sistemi kimi fəaliyyət göstərməsi aktuallaşıb.
   İqtidaryönlü partiyaların funksionerləri bildirir ki, partiyalar klassik məzmuna qayıtmağa məhkumdur. Yəni onların mövcudluğunu ictimai etimad, güclü ideologiya, peşəkar komanda korpusu və lider parametrləri şərtləndirməlidir. Bu kriteriyalardan yanaşanda, Azərbaycanın siyasi partiyalar sistemində inteqrasiya qaçılmazdır. Zəiflərin bu prosesdə öz yerini qoruması mümkün olmayacaq. Parlament seçkilərinin yaxınlaşması Azərbaycanda platforması eyni olan təşkilatların bir araya gəlməsini və güclü partiyalar sistemi kimi fəaliyyətini zəruri edir. Başqa formada ölkənin birinci statusuna iddia etmək əvvəlki şərtlər əsasında mümkün deyil. Digər tərəfdən, çoxpartiyalılıq nominal mövcudluq olan 50 partiyanın yığnağı deyil. Güclü 5-6 partiya siyasi sistemin yaxşı funksiyalanmasını təmin edə bilər.
   Siyasi partiyaların təmərküzləşməsi, indiki halda, daha çox iqtidar düşərgəsinə yaxın olan siyasi qüvvələr arasında mümkün ola bilər. Müəyyən qədər radikallığını qoruyub saxlamış düşərgədə inteqrasiya zaman-zaman baş versə də, birliklər siyasi stiuasiyadan asılı olaraq dağılıb, parçalanıb.
   Bu aradan iqtidaryönlü partiyaların birləşməsi və yaxud parlament seçkilərində iştirakda qarşılıqlı məsləhətləşmələrin aparılması məsələsi ortaya gəlib. Hakimiyyətin bu və ya digər formada siyasətini dəstəkləyən partiyaların öz namizədlərini hakim partiya ilə razılaşdırmaları da mümkündür. Vəhdət Partiyasının sədri Tahir Kərimli mətbuata açıqlamasında qarşıdan gələn parlament seçkilərilə əlaqədar olaraq hakim partiya əməkdaşlıq etməyə hazır olduqlarını bəyan edib. Digər partiyalar da namizədlər siyahısını hazırlayarkən onu hakim partiya ilə razılaşdıracaqmı?
   Ana Vətən Partiyasının sədri Fəzail Ağamalı siyasi partiyaların təmərküzləşməsini zəruri saysa da, bunun bu gün üçün elə də aktual olmadığını bildirdi: "Bununla bağlı sosial sifariş olmalıdır. Zərurət yaransa, sosial sifariş olsa Ana Vətən Partiyasının digər partiyalarla, xüsusilə də hakim partiya ətrafında birləşməsi mümkündür. Amma indiki halda bu aktual deyil".
   Namizədlər siyahısının razılaşdırılmasına gəlincə, F.Ağamalı qeyd etdi ki, namizədlər siyahısını hazırlayarkən hakim partiya ilə məsləhətləşmələr aparırlar: "Ötən seçkilərdə olduğu kimi, bu parlament seçkilərində də namizədlərimizi hakim partiyilə razılaşdıracağıq. Fəaliyyətimizi hakim partiyanın fəaliyyətilə koordinasiya edəcəyik".
   Demokratik Azərbaycan Dünyası Partiyasının sədri Məmməd Əlizadə isə bildirdi ki, parlamentdə uğur qazanmaq fikrindədirlər: "Qarşıdan gələn parlament seçkilərində uğur qazanmasaq, siyasətdən getmək təşəbbüsünü ortaya qoyacam. Amma seçkilərə hakim partiyanın siyahısı ilə deyil, müstəqil namizədlər siyahısı ilə qatılacağıq. Hazırda ortalıqda bununla bağlı hər hansı təklif, fikir yoxdur.
   Məsələni bu gün qabartmaq düzgün deyil. Hər bir partiya kimi, Demokratik Azərbaycan Dünyası Partiyası da seçkilərə müstəqil şəkildə qatılacaq. Artıq öz namizədlərimizi müəyyənləşdirmişik.
   Amma bəzi dairələrdə, hakim partiyanın nüfuzlu namizədlərinin irəli sürüldüyü dairələrdən öz namizədlərimizi geri çağıracağıq. Daha doğrusu, hakim partiyanın namizədinin xeyrinə namizədliyimizi geri götürəcəyik. Biz bu addımımızın qarşılığını hakim partiyadan gözləmirik".
   

Türkiyə Xarici İşlər Nazirliyi martın 4-də ABŞ Nümayəndələr Palatasının Xarici Əlaqələr Komitəsində müzakirə ediləcək uydurma "erməni soyqırımı"na dair qərar layihəsilə bağlı Vaşinqtona rəsmi xəbərdarlıq ünvanlayıb.
   APA-nın "CNN Türk"ə istinadən verdiyi xəbərə görə, Türkiyə XİN-in sözçüsü Burak Özügərgin layihənin komitənin gündəminə daxil edilməsini təəssüf hissilə qarşıladıqlarını açıqlayıb: "Əsassız soyqırım iddialarına dəstək verən 252 saylı qərar layihəsinin Amerika Nümayəndələr Palatasının Xarici Əlaqələr Komitəsinin gündəminə alınmasını təəssüflə qarşıladıq. Bu mövqeyimizi müxtəlif səviyyəli ABŞ səlahiyyətlilərinə bildirdik. Komitənin Türkiyə ilə ABŞ arasındakı ikitərəfli əlaqələrə zərər verəcək və Türkiyə-Ermənistan münasibətlərinin normallaşması istiqamətində səyləri axsadacaq layihəni rədd etməsini gözləyirik. Komitə üzvlərinin layihənin qəbulunun ABŞ-Türkiyə əlaqələrinə və Cənubi Qafqazdakı sülh, sabitlik cəhdlərinə verəcəyi zərəri dərk etdiyinə və bu baxımdan məsuliyyət hissilə addım atacaqlarına inanmaq istəyirik".
   

Ermənistan və Türkiyə Arpaçay üzərində körpünün bərpa edilməsi məsələsində əməkdaşlıq edir. APA-nın "News.am"a istinadən yaydığı məlumata görə, "Hurriyet Daily News" körpünün bərpası təşəbbüsünün Türkiyə İqtisadi Araşdırmalar Fonduna (TEPAV) məxsus olduğunu bildirib:
   "Bu layihəni həm Türkiyə prezidenti Abdulla Gül, həm də Ermənistan prezidenti Serj Sarkisyan dəstələyir, erməni diasporu da bu məsələyə müsbət yanaşır. Sökülmüş körpü iki ölkə arasında iqtisadi və siyasi əlaqələrin olmadığını göstərir, onun bərpası münasibətlərlə yeni mərhələnin başlanmasını simvolizə edəcək". TEPAV rəhbərlərindən biri körpünün bərpasının Ermənistan-Türkiyə münasibətlərinin normallaşmasına müsbət impuls verəcəyini bildirib.
   
   

Ombudsman Elmira Süleymanova "Azərbaycan Respublikasının İnsan Hüquqları üzrə Müvəkkili (Ombudsman) haqqında" Azərbaycan Respublikası Konstitusiya Qanununun 14-cü maddəsinə əsasən, əvvəlki illərdə olduğu kimi, cari il bitdikdən sonra, iki aydan gec olmayaraq, 26 fevral 2010-cu il tarixdə "Azərbaycanda insan hüquqlarının və azadlıqlarının təmin edilməsi və müdafiəsinin vəziyyəti haqqında" 2009-cu il üzrə illik məruzəsini Azərbaycan Respublikasının Prezidentinə və Azərbaycan Respublikasının Milli Məclisinə təqdim edib.
   Ombudsman Aparatının mətbuat xidmətindən APA-ya verilən məlumata görə, müvəkkilin illik məruzəsi Konstitusiya Qanunu ilə müəyyən edilmiş qaydada Nazirlər Kabinetinə, Konstitusiya Məhkəməsinə, Ali Məhkəməyə və baş prokurora da göndərilib. Məruzə Milli Məclisin iclasında dinlədikdən sonra geniş ictimaiyyətin tanış olması məqsədilə qəzetdə, "Azərbaycan Respublikasının Qanunvericilik Toplusu"nda və digər mətbu orqanlarda dərc olunacaq. İllik məruzədə, Ombudsman haqqında Konstitusiya Qanununa əsasən, Müvəkkilin Azərbaycan Respublikasının Konstitusiyasında və ölkəmizin tərəfdar çıxdığı beynəlxalq müqavilələrdə təsbit olunmuş, dövlət və yerli özünüidarə orqanları, vəzifəli şəxsləri tərəfindən pozulan insan hüquqları və azadlıqlarının bərpası, insan hüquqlarının müdafiəsi və pozulmasının qarşısının alınması, habelə insan hüquqlarının təmin edilməsi vəziyyətinin öyrənilməsi sahəsində fəaliyyəti, hüquqi maarifləndirmə və elmi-analitik işin nəticələri, onun dövlət qurumları, ictimaiyyətlə və kütləvi informasiya vasitələrilə əməkdaşlığı, beynəlxalq əlaqələri, həmçinin insan hüquq və azadlıqlarının daha etibarlı təmin edilməsinə yönəlmiş ümumiləşdirilmiş təklif və tövsiyələri öz əksini tapıb. İllik məruzənin Milli Məclisin iclasında dinlənməsi nəzərdə tutulub.

Avropa İttifaqının Azərbaycandan təbii qaz alışına hesablanan "Nabukko" layihəsinin reallaşmasının gecikməsi fonunda ölkəmizdən "mavi yanacaq" almaq istəyən dövlətlərin sayı durmadan artır. Artıq bu dövlətlər siahısına Suriya da qoşulub.
   Məsələ ilə bağlı cari ilin mart ayının 1-dən 4-nə kimi sənaye və energetika naziri Natiq Əliyevin rəhbərlik etdiyi nümayəndə heyətinin Suriyaya rəsmi səfəri başlayıb. SİA-nın məlumatına görə, nümayəndə heyətinin tərkibinə Azərbaycan Respublikası Dövlət Neft Şirkətinin (ARDNŞ) vitse-prezidentləri Elşad Nəsirov, Muxtar Babayev və Dövlət Neft Akademiyasının rektoru Səyavuş Qarayev daxildir. Səfərin əsas məqsədi Azərbaycan qazının Suriyaya satışı ilə bağlı detalları müzakirə etmək və konkret nəticəyə gəlməkdir. Qeyd edək ki, Suriya prezidenti Bəşər Əsədin 2009-cu ildə ölkəmizə səfəri zamanı əldə olunmuş razılığa əsasən, Azərbaycan il ərzində bu ölkəyə 1 milyard kubmetr qaz nəql edəcək. Hazırda Türkiyə ilə Suriya arasında qaz kəmərinin inşasına başlanıb və Azərbaycan bu kəmərdən istifadə etməklə 2010-cu ilin sonundan etibarən Suriyaya qaz nəqlinə başlayacaq.
   Ekspertlər hesab edir ki, Azərbaycanın qazını almaq istəyən və bu məqsədlə real hərəkətə keçən müştərilərin artması fonunda "Nabukko" layihəsinin reallaşması daha sürətlə gündəmdən çıxır. Hadisələrin bu səpkidə inkişafına görə məsuliyyət daşıyan əsas tərəf kimi isə Avropa İttifaqı çıxış edir. Bir müddət əvvəl məsələ ilə bağlı prezident İlham Əliyev "The Wall Street Yournal"a müsahibəsində bildirib ki, Avropa İttifaqının planlaşdırdığı "Nabukko" kəmərinin inşasının ləngiməsindən məyusdur: "Nabukko" Xəzər dənizindən qazı Türkiyə üzərindən Avropaya çıxarmalıdır. "Qazprom" deyir ki, bizdən təchiz edəcəyimiz qədər qaz alacaq. "Nabukko" gecikdirilsə, aydındır ki, biz "Qazprom"a daha çox qaz satacağıq. "Nabukko" qaz layihəsində qaz təchizatını, istehsalçıları və maliyyələşməni təmin etmək üçün zəruri olan rəhbərlik çatışmır. Biz indiyədək bilmirik ki, bu lider kimdir, bu prosesi kim irəli aparmalıdır. Qaz istehsalçıları və tranzit ölkələrlə danışıqları kim aparacaq? Bu qazın marketinqini kim edəcək? Qiymətlər necə olacaq? Bir sözlə, uzun müddətdir ki, çoxlu suallar cavabsız qalır".
   Vəziyyətdən istifadə edən İran və Rusiya isə, əvvəlki kimi, ölkəmizdən daha çox qaz almaq istiqamətində siyasətlərini davam etdirir. Ötən həftə yenidən bu məsələyə qayıdan İranın Azərbaycandakı səfiri Məmmədbağır Bəhrami bildirib ki, Tehran Azərbaycandan ildə 10 milyard kubmetrə qədər qaz almağa hazırdır: "İran tərəfi Azərbaycandan lazım olduğu qədər, 10 milyard kubmetrədək qaz almağa hazır olduğunu elan edib". Xatırladaq ki, bu ilin yanvar ayında İranla Azərbaycan arasında 100 gün ərzində sutkada 2 milyon kubmetr qazın nəqlinə dair sənəd imzalanıb. Bu həcmdən 800 min kubmetr Naxçıvan Muxtar Respublikasına, qalan həcm isə İranın şimal əyalətlərinə göndərilir.
   "Lakin mövcud müqaviləyə əsasən, İran Azərbaycandan ildə 5 milyard kubmetr qaz ala bilər. Mövcud qaz kəməri isə yalnız 2 milyard kubmetr qazın nəqlinə imkan verir. Bununla əlaqədar Azərbaycan tərəfi nəql edilən qazın həcmini 5 milyard kubmetrədək artırmaq üçün yeni qaz kəmərinin çəkilməsinə dair qərar qəbul edib".
   "Qazprom"un İdarə Heyətinin sədri Aleksey Miller yenidən bəyan edib ki, təmsil etdiyi şirkət 2010-cu ildə Azərbaycanın ixrac etmək istədiyi qazı tam həcmdə almaq niyyətindədir. Onun sözlərinə görə, "Qazprom" bu istiqamətdə danışıqları intensivləşdirməyi düşünür. Ekspertlərə görə, "Qazprom"un bu dəfə öz niyyətini reallaşdırmaq ehtimalı böyükdür. Çünki uzun danışıqlara baxmayaraq, Avropa hələ də "Nabukko" layihəsinin inşasını reallaşdıra bilmir və bu layihəyə indi Qərbin özündə də getdikcə pessimist mövqedən yanaşılır. Belə olan halda, daha çox qaz hasil etməyə başlayan Azərbaycan üçün Rusiya bazarları daha cəlbedici hala gəlir.
   Xatırladaq ki, artıq 2010-cu il yanvarın 1-dən Azərbaycan Rusiyaya qaz ixracına başlayıb. İxracatın başlaması ilə əlaqədar Azərbaycan-Rusiya sərhədində "Şirvanovka" qazölçmə stansiyası bərpa edilib. Azərbaycanla Rusiya arasında qaz alqı-satqısı barədə ortamüddətli müqavilə isə 14 oktyabr 2009-cu ildə Bakıda ARDNŞ və "Qazprom" arasında imzalanıb. Müqavilə 2010-2014-cü illəri əhatə edir.
   Beləliklə, Avropanın "Nabukko" layihəsinin inşasını reallaşdırmaq istiqamətində yol verdiyi ləngimələr Rusiyanın elə Avropanın öz üzərində qaz qələbəsini təmin edən əsas faktorlardan biridir. Çünki Azərbaycan Rusiyanın nəzarətində olan "Cənub axını" qaz kəmərinə alternativ "Nabukko" layihəsinin potensial xammal təchizatçısıdır. "Qazprom" un 1,3 trilyon kubmetr ehtiyatı olan "Şahdəniz" yatağının qazına iddialı olması "Nabukko" üçün ehtiyat bazasının əldən çıxması deməkdir.
   Xatırladaq ki, "Nabukko" qaz kəmərinin uzunluğu 3,3 min kilometr, illik nəqletmə gücü 31 milyard kubmetr olacaq. Avropa Komissiyası hesab edir ki, qaz təchizatçıları olduğu təqdirdə kəmər 2014-cü ildə işə salına bilər.
   

Dubay polisi HƏMAS liderlərindən biri Mahmud əl-Məbuhun qətlə yetirilməsinə dair yeni detallar açıqlayıb. Ekspertiza nəticəsində Əl-Məbuhun bədənində zəhərləyici kimyəvi məhlul aşkar edilib.
   Ekspertiza müəyyən edib ki, əvvəlcə Mahmud əl-Məbuhu hərəkətsizləşdirmək üçün onun bədəninə sinir-əzələ relaksantı yeridilib, daha sonra o yastıqla boğulub. Cinayətkarlar isə hesab edib ki, polis bunu ürək dayanması kimi qeydə alacaq, çünki bədənin üzərində zorakılıq halları müşahidə edilməyib. Lakin istənilən halda Əl-Məbuhun bədənində sözügedən kimyəvi məhlul aşkar edilib. Təhqiqatçılar hesab edir ki, yanvarın 20-si baş verən qətldə İsrail xüsusi xidmət orqanlarının əli var. İsrail isə bu ittihamı qəti şəkildə rədd edir. "The Times" qəzeti isə xəbər verir ki, Əl-Məbuhun qətlə yetirilməsində MOSSAD İsrail kəşfiyyatının adının hallanması, bu xüsusi xidmət orqanında işləmək istəyən israillilərin sayının kəskin şəkildə artması ilə nəticələnib.
   İsraildə nəşr olunan "Haaretz" qəzeti isə yazır ki, cinayəti törətmiş şəxslər qrimli olub və bu səbəbdən Dubay polisinin cinayətkarların xarici görünüşü barədə dəqiq məlumatı yoxdur. Dubay polisi xəbər verib ki, şübhəlilər əməliyyatın koordinasiya mərkəzi olması ehtimal edilən Avstriya ilə əlaqə saxlayıb. Qətldə şübhəli hesab edilənlər Dubaya Honkonqdan, Milandan, Parisdən, Romadan, Sürixdən gəliblər. Əl-Məbuhun qətlindən sonra isə onlar dərhal Dubayı tərk ediblər. Bununla belə, onlardan ikisi yaxtada İran istiqamətində gedib.
   Xatırladaq ki, Brüsseldə görüşən Avropa Birliyinin xarici işlər nazirləri də qətli və Əl-Məbuhun aradan götürülməsi əməliyyatı zamanı saxta Avropa pasportlarından istifadə edilməsi faktını mühakimə ediblər.

Türkiyə Böyük Millət Məclisini (TBMM) təmsil edən iki nümayəndə heyəti uydurma "erməni soyqırımı"na dair qərar layihəsinin ABŞ Nümayəndələr Palatasının komissiyasında müzakirəsilə əlaqədar bu ölkəyə gedib.
   APA-nın Türkiyə xəbər agentliklərinə istinadən verdiyi məlumata görə, TBMM Xarici Əlaqələr Komissiyasının sədri, Ədalət və İnkişaf Partiyasından (AKP) Murad Mərcanın rəhbərlik etdiyi birinci heyətə hakim partiyadan Abdulla Çalışkan və Şaban Dişli, müxalifətdən isə Cumhuriyyət Xalq Partiyasını (CHP) təmsil edən Türkiyənin ABŞ-dakı sabiq səfiri Şükrü Ələkdağ və Milliyyətçi Hərəkat Partiyasını (MHP) təmsil edən Mithət Melen daxildir. Heyət ABŞ prezident administrasiyasında, Dövlət Departamentində, Konqresdə və düşüncə mərkəzlərində görüşlər keçirəcək.
   İkinci heyət isə Türkiyə-ABŞ parlamentlərarası dostluq qrupunun üzvlərindən ibarətdir. Heyətə qrupun sədri, AKP liderinin xarici əlaqələr üzrə müavini Suat Kınıklıoğlu rəhbərlik edir. Xatırladaq ki, erməni yalanları ilə dolu olan qətnamə layihəsi martın 4-də Nümayəndələr Palatasının Xarici Əlaqələr Komissiyasında müzakirəyə çıxarılacaq.
   
   
   
   

Türkiyənin Azərbaycandakı fövqəladə və səlahiyyətli səfiri Hulusi Kılıc APA-ya müsahibəsində "Ermənistan Konstitusiya Məhkəməsinin protokollarla bağlı qərarından sonra bu sənədlərin TBMM-də təsdiqlənməsi də qeyri-mümkün görünür və tərəflər bir-birini günahlandırır.
   Bundan sonra hansı addımlar atılacaq" sualına belə cavab verib: - "Ermənistan Konstitusiya Məhkəməsinin qərarını xoşməramlı saymırıq. Dediyimiz kimi, məhkəmə qərarı qəbuledilməz ön şərtlər və məhdudlaşdırıcı şərhlər ehtiva edir...
   Təəssüf ki, Ermənistan Konstitusiya Məhkəməsinin qərarı Ermənistan rəhbərliyində bu istiqamətdə siyasi iradənin olduğuna dair inamımızı zəiflətdi. Biz Ermənistanın öz xoş niyyətini göstərən addımlar atmasını, münasibətlərin normallaşması üçün səmimi siyasi iradənin varlığını göstərən yazılı təminat verməsini gözləyirik"
   - Bu vəziyyətin yaranmasında Azərbaycan tərəfinin etirazlarının rolu varmı?
   - Türkiyə-Ermənistan münasibətlərinin normallaşması prosesinin tıxanmasının səbəbi Azərbaycan deyil, Ermənistandır. Təəssüf ki, Azərbaycanda belə bir qənaət yarandığını görürəm. Sanki Azərbaycan 2009-cu ildə Türkiyənin Ermənistanla münasibətlərin normallaşdırılması istiqamətində atdığı addımlara etiraz etməsəydi, Türkiyə şərtsiz olaraq bu prosesə davam edəcəkdi. Bu yanlış düşüncədir. Belə mövqeyi qəbul etmirik...
   Türkiyə Ermənistanın Azərbaycan torpaqlarını işğal etməsindən sonra tamamən öz istəyilə başqa heç bir hegemon ölkənin etməyəcəyi bir şeyi edərək, Ermənistanla sərhədlərini bağlayıb. 1993-cü ildə sərhədlərin bağlanması üçün azərbaycanlı qardaşlarımızın hər hansı tələbi olmuşdumu? Bu gün də Ermənistanla müzakirələrin bu mərhələyə gəlməsində Azərbaycandakı narazılıqların təsiri yoxdur. Onsuz da Türkiyə Azərbaycana hər sahədə yardım etmək və dəstək vermək iradəsinə sahibdir.
   - 24 aprel yaxınlaşır və digər dövlətlərin protokolları təsdiqləməsi istiqamətində Türkiyəyə təzyiqi artacaq. Bu təzyiqlərə qarşı hansı mövqe nümayiş olunacaq?
   - Türkiyə, uzun illərdir, uydurma "erməni soyqırımı" iddialarına qarşı mübarizə aparır. ABŞ prezidenti Barak Obamadan əvvəl də bu prosesi keçmişik, mövqeyimiz həmişə eyni və açıq olub. Bundan sonra da belə olacaq. Yəni təzyiqlərə boyun əyməyəcəyik. Uydurma "erməni soyqırımı"nın tanınması ilə bağlı qərar layihəsinin qəbul olunması ABŞ-ın marağına uyğun deyil. Obama 24 aprel çıxışında "soyqırım" ifadəsini işlətsə, tarixdə "erməniləri qazanan prezident" kimi yox, "türkləri itirən prezident" kimi qalacaq.
   - Azərbaycanın Türkiyəyə satdığı təbii qazın qiymətində indiyədək razılaşma əldə olunmayıb. Hətta bu, "Nabucco" layihəsinin reallaşmasında problemlərin yaranmasının səbəblərindən biri kimi göstərilir.
   - Azərbaycanla Türkiyə arasında təbii qazla bağlı uzun müddətdir davam edən müzakirələr haqqında çox spekulyasiya edilir. Bəzi dairələrdə ticari məsələlər siyasi məsələlərlə qarışdırılır, hətta fərqli şərhlər verilir. Bilirsiniz ki, müzakirələrdə bir paket çərçivəsində müxtəlif mövzulara toxunulur. Əsasən, "Şahdəniz" layihəsinin birinci fazasından alınan təbii qazın qiymət reviziyası, "Şahdəniz" layihəsinin ikinci fazasından alınacaq qazın qiyməti və həcminin təsbiti və Türkiyədən keçərək Avropa bazarlarına satılacaq mavi yanacağa tətbiq olunacaq tranzit tariflərinin müəyyənləşməsilə bağlı müzakirələr aparılır.
   Enerji və təbii sərvətlər naziri Taner Yıldızın da ifadə etdiyi kimi, Türkiyə tərəfindən uyğun təkliflər edilib, Azərbaycan tərəfinin bunu qiymətləndirməsi gözlənir, sonra isə razılaşma əldə ediləcək. Bir yanlışlığı düzəltmək istəyirəm. "Nabucco" layihəsi Türkiyə tərəfindən dəstəklənir. Ancaq Türkiyə-Azərbaycan təbii qaz müzakirələri ilə "Nabucco" layihəsi arasında rəsmi bir əlaqə yoxdur, tərəflər "Nabucco" layihəsinə dair məsələləri müzakirə etmir.