İngiltərənin "Portsmut" futbol klubu Premyer Liqa tarixində ilk dəfə "bankrot" olduğunu bəyan edib. Lent.az-ın "CNN"ə istinadən verdiyi məlumata görə, "Portsmut" borclarını ödəmək qabiliyyətində olmadığını rəsmən açıqlayıb.
   Klubun Britaniyanın vergi xidmətinə 12 milyon funt, digər kreditorlara isə 70 milyon funtdan çox borcu var. İndi rəhbərlik kreditorlara borcları ödəməyə qadir olan yeni imkanlı təşkilat tapmalarından ötrü klubu daxili inzibatçılara verib. Bu cəhdlər uğurla nəticələnməsə, müvəqqəti administrasiya komandanı dağıdacaq. "Portsmut"un əmlakı isə borcları ödəmək məqsədilə satılacaq.
   Azarkeşlərindən "Pompey" ləqəbi alan "Portsmut" klubu 1898-ci ildən mövcuddur. Son 7 mövsümdə bu klub Premyer Liqada çıxış edir. Lakin hazırda turnir cədvəlinin sonuncu pilləsindədir. Komandanın baş məşqçisi İsrail yığmasının və "Çelsi" klubunun sabiq çalışdırıcısı Avram Qrantdır. Reqlamentə əsasən, "bankrot" elan olunacağı halda, "Portsmut" 9 xaldan məhrum olacaq. Bu isə komandanın gələn mövsüm faktiki aşağı liqaya enəcəyi deməkdir.

Vaqif Sadıqovun istefasından sonra "Neftçi"nin baş məşqçi postuna bir neçə əcnəbi namizəd göstərilsə də, komandaya müvəqqəti rəhbər təyin olundu.
   Məlumat üçün diqqətinizə çatdıraq ki, komanda mövsümün sonuna qədər Arif Əsədova tapşırıldı və çempionat başa çatandan sonra "Neftçi"nin yeni baş məşqçisi təyin ediləcək. Yayılan məlumatlara görə, "Neftçi"nin yeni baş məşqçisi Böyükağa Hacıyev ola bilər. Fanat.az-a daxil olan məlumata görə, klub rəhbərliyinə yaxın olan mütəxəssis hazırda bu posta real namizədlərdən biridir. Lakin hazırda "Standard"la müqaviləsi olan Hacıyevin "Neftçi"yə keçidi mümkün deyil. Bu səbəbdən klub rəhbərliyi yayı gözləmək qərarına gəlib. Çünki Böyükağa bəyin Sumqayıt klubu ilə müqaviləsi mövsümün sonunda başa çatacaq. Maraqlıdır ki, "Neftçi"nin baş məşqçi postuna namizəd olduğu deyilən digər iki mütəxəssis - Naci Şensoy və Bülent Uyğunun da yaya qədər müqaviləsi var.

Azərbaycanın qadın güləşi üzrə dünya və ikiqat Avropa çempionu Mariya Stadnikin Ukraynanın Lvov şəhərindəki mənzilindən oğurlanan 2008-ci il Pekin Yay Olimpiya Oyunlarının bürünc medalının satış qiyməti müəyyənləşib.
   Lent.az-ın "kp.ua"ya istinadən verdiyi məlumata görə, Ukraynanın "qara bazarı"nda bir olimpiya medalının qiyməti ən azı 3 min dollardır. Ən yüksək satış məbləği kimi isə 10 min dollar göstərilir. Olimpiya medalının məbləği idman növündən və onun əyarından asılıdır. 48 kq çəki dərəcəsindəki təmsilçimiz olimpiadada qızıl və ya gümüş yox, bürünc medal qazandığından, oğrular onun medalının 10 min dollardan aşağı məbləğə sata bilərlər. Qeyd edək ki, Mariya Stadnikin əri Ukraynanın sərbəst güləş üzrə yığma komandasının 66 kq çəki dərəcəsindəki lideri, 2008-ci il Pekin Yay Olimpiya Oyunlarının gümüş mükafatçısı Andrey Stadnikdir. Andrey Stadnik Lvovun Sixov rayon milis şöbəsinə qarət olunması barədə şikayət edib. Ukraynanın əməkdar idman ustası mənzilindən ümumilikdə 57200 ABŞ dolları dəyərində oğurluğun edildiyini yazıb. O bildirib ki, oğrular qapının qıfılını qıraraq, 4700 dollarlıq zinət əşyaları, 25000 dollar dəyərində 8 kişi qol saatı, 5000 dollarlıq məişət texnikası, 2 olimpiya medalı, alkoqol içkiləri, qadın və kişi ətirləri, "Fort-12 CM" tipli rezin güllələr üçün qurğu aparıblar. Hazırda milis cinayətkarları axtarır. Oğurlanan olimpiya medallarından biri Andrey Stadnikə, digəri isə Mariya Stadnikə məxsusdur.

Azərbaycan yığmasının futbolçusu Mahir Şükürov "Anji" klubundan ayrılıb. Apasport.az saytının xəbərinə görə, müdafiəçi milli komandanın düşərgəsinə qatılmaq üçün Lüksemburqa yollanıb.
   Qeyd edək ki, yığma komandamız martın 3-də yerli vaxtla 20:00-da (Bakı vaxtı ilə 23:00-da) Lüksemburqla yoldaşlıq görüşü keçirəcək.
   

"Bakı" klubunun sabiq futbolçusu Aleksandr Tomaş FİFA-ya şikayət edib. "Sportline.bg"nin verdiyi məlumata görə, hazırda Bolqarıstanın "Slaviya" komandasının üzvü sayılan müdafiəçi ikiqat Azərbaycan çempionunu özünə məxsus transfer vərəqini verməməkdə günahlandırıb. Tomaş "Bakı"dan transfer vərəqini ala bilmədiyi üçün hələ yeni klubunda debüt edə bilməyib. O, ən yaxşı yalnız ikinci dövrədə oynaya biləcək.
   Qeyd edək ki, "Bakı" rəhbərliyi Aleksandr Tomaşla müqaviləni 2009-cu ilin sonlarında baş məşqçi Bülənt Korkmazın istəyilə qarşılıqlı anlaşma yolu ilə pozub.

Azərbaycan üçün Vankuver Qış Olimpiya Oyunları başa çatıb.
   Milli.Az-ın verdiyi xəbərə görə, yarışda ölkəmizi təmsil edən idmançılar çıxışı başa vurublar. Ölkəmizi təmsil edən dağ xizəkçisi Sedrik Nots slalom növündə yarışan qüvvəsini sınayıb. Nots yürüşün əvvəlində müvazinətini itirərək, çıxışını dayandırıb və finişə çata bilməyib.
   Qeyd edək ki, bundan öncə qadın dağ xizəkçimiz Qaya Bassani-Antivari də slalom yürüşündə eyni səbəbdən, ikinci mərhələyə yüksələ bilməyib. Antivari olimpiadanı 57-ci, Nots isə 72-ci yerdə başa vurub.
   

2010-2011-ci il mövsümündən futbol üzrə Unibank Premyer Liqasının formatı dəyişdirilə bilər. Lent.az-ın məlumatına görə, bu haqda Peşəkar Futbol Liqasının prezidenti (PFL) Ramin Musayev idman jurnalistləri ilə görüşündə bildirib.
   Musayev konkret qərarın cari mövsüm yekunlaşdıqdan sonra qəbul olunacağını vurğulayıb: "Açığı, bu haqda AFFA-nın prezidenti Rövnəq Abdullayev və baş katib Elxan Məmmədovla birgə söhbətimiz olub. Əvvəlcə istəyirdik ki, martın 5-də keçiriləcək AFFA Konfransında və İcraiyyə Komitəsinin iclasında bu məsələni müzakirə edək. Lakin sonradan qərara aldıq ki, hazırkı sistemin özünü doğruldub-doğrultmadığını müəyyənləşdirmək üçün cari mövsümün sonunadək gözləyək. Çempionat yekunlaşdıqdan sonra AFFA-nın növbədənkənar iclasını çağırıb, növbəti mövsümün formatı ilə bağlı qərar verəcəyik". Qeyd edək ki, görüşdə idman jurnalistlərinin hamısı hazırkı "6-lıq" sisteminin özünü doğrultmadığını PFL prezidentinin diqqətinə çatdırıblar.
   

İngiltərə çempionatının lideri, Londonun "Çelsi" klubu ölkə çempionatının 28-ci turunda "Mançester Siti"yə məğlub olub. "Stemford Bric"dəki qarşılaşma qonaqların 4:2 hesablı qələbəsi ilə başa çatıb.
   Oyunda hesabı 42-ci dəqiqədə Frenk Lempard açıb. Amma heç üç dəqiqə keçməmiş "Mançester Siti" hesabı bərabərləşdirib. Birinci hissənin sonuncu dəqiqəsində Karlos Teves təkbaşına "Çelsi"nin müdafiə xəttinin öhdəsindən gəlib və topu istehzalı şəkildə qapıçı İlariunun yanından qapının uzaq güncünə göndərib.
   51-ci dəqiqədə isə "Mançester Siti" hesabda irəli çıxıb. Əks-hücumu Kreyq Bellami qola çevirib. 76-cı dəqiqədə Culiano Belletti öz cərimə meydançasının yaxınlığında uğursuz oynayıb və topu oğurlayan Qaret Barrinin qarşısını yalnız qayda pozuntusu ilə ala bilib. Hakim Mayk Din qayda pozuntusunu sonuncu ümid kimi istifadə edən Bellettini meydançadan qovub. Teves isə 11 metrlik cərimə zərbəsi sayəsində həm dubl edib, həm də komandasının üstünlüyünü iki topa çatdırıb. Tezliklə "Çelsi" meydançada 9 nəfərlə qalıb. Mixal Ballak Tevesə arxadan müdaxilə edib və hakim ona qırmızı kart göstərərək, Belletinin arxasınca göndərib. Oyunun 87-ci dəqiqəsində "Mançester Siti" daha bir qol vurub. Bu dəfə də Kreyq Bellami fərqlənib.
   Qalan dəqiqələr ərzində Karlo Ançelottinin yetirmələri yalnız hesab arasındakı fərqi azalda biliblər. Lakin Frenk Lempardın penaltidən vurduğu qol oyunun ümumi mənzərəsini dəyişməyib. Bu, Çempionlar Liqasında "İnter"lə qarşılaşma da daxil olmaqla "Çelsi"nin son dörd oyundakı üçüncü məğlubiyyətidir. Buna baxmayaraq, komanda 61 xalla turnir cədvəlinə liderliyi davam etdirir.
   

"Barselona" futbol klubu "Malaqa" üzərində qələbə qazanmaqla İspaniya çempionatında liderliyini bərpa edib. 24-cü turun qarşılaşması "Barselona"nın 2:1 hesablı qələbəsi ilə başa çatıb. Komanda ilk qolu oyunun 68-ci dəqiqəsində vurub. Pedro Rorices fərqlənib. 81-ci dəqiqədə isə qonaqlar Valmiro Valyadonun qolu ilə hesabı bərabərləşdiriblər. Lakin Lionel Messinin 84-cü dəqiqədə vurduğu qol "Barselona"nı xal itkisindən xilas edib. Bu qələbədən sonra 61 xal toplayan "Barselona" "Real"ı iki xal üstələyib və yenidən liderliyə yüksəlib. Üçüncü pillədəki "Valensiya"nın 46 xalı var.