Müstəqillik əldə edildikdən sonra Azərbaycan kinosunda, az da olsa, canlanma gözə dəyməkdədir. Bu müddət ərzində bir sıra şəxslər tərəfindən filmlər çəkilib ərsəyə gətirilib. Təbliğat prosesində filmlərin böyük rolunun olduğu danılmaz faktdır. Bu mənada, Azərbaycan kinosunun beynəlxalq aləmdə tanıdılması olduqca vacibdir.
   Bu günlərdə Azərbaycan Dövlət Mədəniyyət və İncəsənət Universitetinin müəlliməsi, kinoşünas, sənətşünaslıq namizədi Zülfiyyə Eldarqızı Türkiyədə səfərdə olub. Burada o, ANS telekanalının aparıcısı Orxan Fikrətoğlu ilə birlikdə Türkdilli dövlətlərin filmlərinin nümayişilə bağlı keçirilən festivalda iştirak edib. Bizimlə söhbətdə Zülfiyyə xanım festival barədə müşahidələrini danışdı.
   - Orxan Fikrətoğlu ilə birlikdə fevralın 14-dən 18-nə kimi Türkiyədə olduq. Burada "Türk dünyası bəyaz pərdədə buluşuyor" adlı festival keçirilirdi. Həmin festivala 9 türk dövlətindən nümayəndələr dəvət olunmuşdu.
   Bunlar Azərbaycan, Qazaxıstan, Qırğızıstan, Başqırdıstan, Özbəkistan, Tatarıstan, Tacikistan, Türkiyə və Türkmənistandan ibarət idi. Yəni tədbirdə ancaq türk filmləri nümayiş etdirilirdi. Azərbaycandan 6 film göndərilmişdi, onlardan üçü bədii.
   Mehriban Ələkbərzadənin rejissorluğu ilə Çingiz Abdullayevin ssenarisi əsasında çəkilən "Məhkumlar", Eldar Quliyevin çəkdiyi "Girov" və ssenari müəllifi Orxan Fikrətoğlu, rejissoru Ramiz Əzizbəyli olan "Yalan" filmləri. Qısametrajlı filmlər isə Asif Rüstəmovun hələ festivala qədər böyük uğur qazanan filmi, İqbal Məmmədəliyevin rejissorluğu ilə "Qədim Azərbaycan" sənədli filmi və Orxan Fikrətoğlunun ssenarisi əsasında Samir Kərimoğlunun çəkdiyi "Qanadlarımı oxşa" filmindən ibarət idi. Bizi orada Türksoyun Azərbaycan təmsilçisi İlkin Qafarlı qarşıladı. Festivalın açılışında Rüstəm İbrahimbəyovun ssenarisi əsasında çəkilən, rejissoru Qazaxıstandan olan "Köçərilər" filmi qala filmi olaraq seçildi.
   Tədbirə Türkiyənin Bakıdakı səfirliyinin Tanıtım və Kültür müşavirliyinin əməkdaşı Nizami Zöhrabinin təqdimatı ilə getmişdik. Ona bizi belə bir tədbirə göndərdiyinə görə təşəkkürümü bildirirəm.
   Türk xalqlarının bir araya gəlməsi baxımından belə tədbirlərin əhəmiyyəti böyükdür. Açılış mərasimində tamaşaçılar sırasında Türkiyədə yaşayan aktrisamız Məlahət Abbasovanı da gördüm. O da çox sevinirdi.
   - Festivalda ən çox yadınızda qalan məqamlar olubmu, olubsa, mümkünsə bu barədə məlumat verərdiniz.
   - Açılış günü ən çox yadımda qalan məqam əsasən sufizmlə bağlı əsərləri səhnələşdirən "Şaman dans" teatrosunun kompozisiyası oldu. Onlar həmin gün Cəlaləddin Ruminin sözləri əsasında çox gözəl kompozisiya hazırlamışdılar.
   Təxminən 40 dəqiqə ərzində kompozisiyanı o qədər gözəl ifa etdilər ki, bu oradakı tamaşaçılara da öz müsbət təsirini göstərdi. İstanbulun, demək olar ki, hər küçəsində İslam mədəniyyətini xatırladan camelər vardı, bu da mənə çox güclü təsir etdi. Bu ovqat içində də festivala qatıldıq.
   Fevralın 14-ü sevgililər günü Türkiyədə böyük anlamda qeyd olunur, burada həmin gün insanların bir-birinə qarşı sıcaq münasibətinin şahidi oldum. İlk andan İstanbul bizi gözəlliyilə heyran etdi. Qaldığımız küçə mənə bizdəki Torqovını xatırladırdı.
   - Təqdim etdiyiniz filmlərdən ən çox alqışa layiq görülənlər hansıları oldu?
   - "Məhkumlar" və "Yalan" filmləri daha çox tamaşaçı alqışına tuş gəldi. O biri filmlər də böyük alqışlarla qarşılandı, amma xüsusi diqqət "Məhkumlar" və "Yalan" filmlərinə yönəlmişdi.
   - Mümkünsə, həmin bu iki filmin süjeti barədə qısa məlumat verərdiniz.
   - "Məhkumlar" filmi Mehriban Ələkbərzadənin çəkdiyi bir filmdir. Burada söhbət cüzam xəstəliyindən əziyyət çəkən bir xanıma həkimin aşiq olmasından gedir.
   Yəni xəstə olmasına baxmayaraq, bunların da qayğıya, diqqətə və məhəbbətə ehtiyacı var. "Yalan" filmi isə Qarabağ haqqında filmdir.
   Bəlkə də buna görə onların diqqətini daha çox çəkib.
   Burada, oğlu şəhid olsa da, Yavər adlı bir qəhrəmanın bu xəbəri həyat yoldaşına deyə bilməməsindən, onun acı yaşantılarından söhbət gedir.
   

İki gün əvvəl narkotik maddə istifadəçisi olduğu üçün həbs edilən və evindən kokain tapılan Türkiyənin meqa-starı Tarkan Tevetoğlu hələ də İstanbul Əmniyyət Müdirliyinin (polis idarəsi) təcridxanasında saxlanır.
   Sənətçinin meneceri və prodüseri Uyqar Ataş APA-ya açıqlamasında Tarkanın bazar ertəsinə qədər polisdə saxlanacağını və həmin gün məhkəmə önünə çıxarılacağını deyib. Məhkəmə ya həbs-qətimkan tədbiri seçəcək, ya da Tarkanın istintaq müddətində azadlıqda qalmasına qərar verəcək.
   U.Ataş bildirib ki, Tarkanın həbsilə əlaqəli detallar, istintaq sirri olduğundan, hələlik açıqlanmır: "Hazırda Tarkanın ifadəsinin alınması davam edir. O bazar ertəsi, yəni martın 1-də məhkəmə önünə çıxarılacaq. Tarkanın evindən kokain çıxması qurama bir iş deyil, həqiqətdir. Lakin bu barədə ətraflı məlumat yaymağa icazə verilmir. Bazar ertəsi məhkəmə iclası keçirildikdən və nəticə məlum olduqdan sonra geniş məlumat vermək mümkün olacaq. Tarkanla birgə bu iş üzrə daha 10 nəfər tutulub və onların da ifadəsi alınır. Bu durumda ümidimiz ancaq Allahadır və ondan kömək gözləyirik".
   Uyqar Ataş Tarkanı məşhur vəkil Yunus Egemenoğlunun müdafiə etdiyini söyləyib. Meqa-starın hazırda özünü yaxşı hiss etdiyini də vurğulayan menecer Tarkanın pərəstişkarlarının çox sarsıldığını dilə gətirib: "Hər an telefonlarımıza zəng gəlir. Tarkanın pərəstişkarları çox narahatdır və tez bir zamanda onun azadlığa buraxılmasını arzulayırlar".
   

Milli Teatr Festivalı çərçivəsində Nəcəf bəy Vəzirov adına Lənkəran Dövlət Dram Teatrı "Şeytanın oyunları" tamaşası ilə çıxış edəcək. Bu barədə məlumat qəzetimizə Festivalın təşkilat komitəsindən verilib.
   Martın 1-i saat 19:00-da "Aktyor Evi"ndə təqdim ediləcək "Şeytanın oyunları" tamaşası gürcü və azərbaycanlı rejissorların müştərək səhnə əsəridir. Tamaşada baş rolu (Miron) Lənkəran Dram Teatrının aktyoru, respublikanın xalq artisti Qabil Quliyev oynayacaq.
   Qeyd edək ki, Milli Teatr Festivalı fevralın 22-dən start götürüb və il boyu davam edəcək. Festivalda yalnız Mədəniyyət və Turizm Nazirliyinin nəzdində fəaliyyət göstərən teatrlar öz tamaşaları ilə iştirak edə bilər.