Turizm sektoru dünyada ən gəlirli sahələrdən biri sayılır. O cümlədən, bu xidmət sektoru həm də kifayət qədər əmək tutumludur. Bununla belə, bir sıra dövlətlərin əsas gəlir mənbəyini məhz turizm sektoru təşkil edir. Məsələn, Avropa ölkələrindən olan İspaniya, Yunanıstan və İtaliya regionda ən çox turist qəbul edən dövlətlər hesab olunur.
   Bu ölkələrin iqtisadiyyatının bel sütununu da, məhz turizm sektoru təşkil edir. Ümumilikdə turizmin bir sıra növləri var. Turizm sahəsində ciddi uğurlar əldə etmək üçün bir sıra şərtlərin təmin olunması başlıca amillərdən sayılır. Bunun üçün tarixi abidələrin olması, yüksək infrastruktur, ekoloji amillər başlıca şərtlərdən sayılır. Azərbaycanda da qeyri-neft sektorunun inkişaf etdirilməsinin vacib olması son illər ən çox müzakirə olunan məsələlərdəndir. Bu baxımdan turizmin inkişaf etdirilməsi istiqamətində rəsmi səviyyədə müəyyən işlər görülür. Etiraf etmək lazımdır ki, turizm sahəsində müəyyən uğurlar da var və ilbəil ölkəyə gələn turistlərin sayında artım müşahidə olunur. Ancaq buna baxmayaraq, qarşıda görüləsi xeyli işlər də var. Bütövlükdə mütəxəssislər turizmlə bağlı görülən və görüləcək işləri necə dəyərləndirir?
   İqtisadçı alim, professor Əli Əlirzayev hesab edir ki, neft gəlirləri azalandan sonra qeyri-neft sektoruna böyük ehtiyac yaranacaq: "Ona görə də turizm sektorunun inkişafına xüsusi diqqət yetirmək lazımdır. Çünki turizmin əhəmiyyəti yetərincə böyükdür. Digər tərəfdən, Azərbaycanın turizmə görə əsaslı potensialı var. Bir var, heç nədən deyəsən turizmi inkişaf etdirək, bir də var, buna ciddi potensialın olsun. Azərbaycanda turizmin inkişafının iqtisadi, sosial, coğrafi və tranzit amilləri var. Ona görə də Azərbaycanda turizmi inkişaf etdirmək zəruridir. Bunun üçün birinci növbədə kapital lazımdır. Ancaq bu gün turizmin kapitalı kifayət qədər deyil. Onu da qeyd edim ki, turizm sektoru, başqa sahələrdən fərqli olaraq, risqli bir sahədir. Turizmin bazarı xarici-daxili amillərdən çox asılıdır. Turizmin inkişafı üçün gərək əhali özünün digər tələbatlarını ödəyə bilsin ki, ondan sonra istirahətə də pul xərcləmək haqda düşünsün. Yəni dünya turizm bazarında Azərbaycan turizminin özünəməxsus yeri olmalıdır. Bunun üçün çox iş görmək lazımdır və hələ ki, bu gün Azərbaycanın turizm sektoru dünya turizm sferasında öz yerini tapmayıb. Ona görə də sözügedən problemlər öz həllini tapmayıb. Görürsən ki, bir sıra turizm obyektləri tikilir, amma müştəri tapılmır. Bu da turizmin daxili imkanlarından asılıdır. Məsələ ondadır ki, turizmdə qiymət, əhalinin sosial gəlirləri, infrastruktur amilləri var. Bununla belə, otellər, yollar, hava şəraiti və digər amillər də var. Həmçinin, turizm sənayesinin özündə inkişaf problemləri vardır. Ona görə də Azərbaycanda turizmin inkişafı kompleks şəkildə həll olunmur. Bunların nəticəsidir ki, ölkə turizminin çəkisi ümumi daxili məhsulda heç 1 faiz də deyil. Turizm sektoruna qoyulan sərmayələrin səviyyəsi çox aşağıdır. Bu gün elə sahələrə gəlir qoyulur ki, həmin sahələr 1 ildən sonra gəlir verməyə başlayır. Ona görə də turizmin bugünkü inkişaf vəziyyəti qənaətbəxş deyil".
   Müstəqil iqtisadçı-ekspert İlham Hüseynlinin fikrincə, turizm sektorunun inkişafı bu gün Azərbaycanda arzuolunan səviyyədə deyil: "Ümumi daxili məhsulun formalaşmasında turizm sektoru çox-çox aşağı göstəriciyə malikdir.
   Bu da Azərbaycanda qeyri-neft sektorunun inkişafına məqsədyönlü diqqət ayrılmaması ilə əlaqədardır. Yetərli diqqət ayrılsa, turizm sektorunda ciddi inkişafın şahidi ola bilərik. Turizmin inkişafı üçün qeyri-neft sektorunun inkişafına dair xüsusi dövlət proqramının qəbul olunmasına ehtiyac var. Nə qədər ki, dövlət büdcəsinin formalaşmasında dominant rolunu neft sektoru oynayır, turizm sektoru yerində sayacaq. Azərbaycanın coğrafi baxımdan turizmin inkişafı üçün əlverişli regionları çoxdur. Ancaq turizmdən də daha çox, insanların real olaraq məşğul olduğu aqrar və digər sahələr inkişaf etdirilməlidir. Deməyim odur ki, əhalinin gəlirləri artsa, o zaman turizmin müştəriləri də çox olacaq. Bütün bunlara baxmayaraq, fikrimcə, turizmin inkişafı ilə bağlı artıq müəyyən hazırlıq işləri görülür. Məsələn, infrastruktur yenidən qurulur, otellər, istirahət ocaqları tikilir və sair. Digər tərəfdən, turizmin inkişafı üçün Avropa standartlarına uyğun xidmət sahələri yaradılmalıdır, əks halda bu o qədər də ciddi nəticə verə bilməz".
   

Bu barədə APA-nın Cənub bürosuna rayon polis şöbəsindən məlumat verilib. Fevralın 26-da Astara rayonunun Şahağacı kəndi ərazisində, yol kənarında 40-45 yaşlarında naməlum kişi meyiti aşkar edilib.
   Meyitə ilkin baxış keçirən ekspertlər onun üzərində zorakılıq əlamətləri aşkar edib.
   Hazırda onun şəxsiyyətinin və ölümün baş vermə səbəblərinin müəyyən edilməsi istiqamətində əməliyyat-axtarış tədbirləri davam etdirilir.

Çox zaman haqlı olaraq deyirlər ki, insan özü özünün düşmənidir. İnsanın özü özünə elədiyini min adam bir yerə yığışıb edə bilməz. Bu ifadə təsadüfən yaranmayıb. Hər deyilən ibratamiz sözün mütləq əsası, mənbəyi olur.
   Bakı bütün dövrlərdə gözəllər şəhəri olub. İndi də şəhərimizdə gözəl qız və qadınların sayı həddindən artıq çoxdur. Şübhəsiz ki, bu da hər bir azərbaycanlılını, paytaxt sakinini sevindirən, onda qürur oyadan bir haldır. İnsanın təbii gözəlliyi hər şeydən üstündür. Sözsüz ki, siması göyçək olanlar gözəlliyi müəyyən qədər kosmetik vasitələrdən istifadə etməklə daha da mükəmməlləşdirir. Müasir dövrdə çox az qadın tapılar ki, kosmetikadan istifadə eləməsin. Mövzumuz kosmetik vəsitələrlə gözəlləşməklə bağlı deyil. Buna yaxın mövzu olduğundan, cüzi də olsa, bu məqama toxunmağı özümüzə borc bildik.
   Bəzi qadınlar estetik əməliyyatla, kosmetik vasitələrlə gözəlləşməyi bəyənməyib, orqanizm üçün daha təhlükəli olan dərman preparatlarından istifadə etməyə üstünlük verir. Məlumatlara görə, bəzi qadın və qızlar müəyyən harmonal preparatlardan istifadə edərək özlərini bir qədər kökəldir, bu preparatların qəbulundan sonra həmin şəxslərin dərisi dartılıb şəffaflaşır, sifəti parıldayır. Bir çox hallarda arıq, sısqa, üz-gözünü ləkə, çil basmış qadın və qızları birdən-birə qəfil ətə-cana gəlmiş, üz dərilərini təmizlənib hamarlaşmış, parıldayan vəziyyətdə görəndə adam təəccüblənir. Onların özləri deyir ki, guya istifadə etdikləri kosmetik vasitələr onları gözəlləşdirib. Əksər hallarda həddindən artıq cılız bir qız, qadın çox keçmədən cəzbedici bir bədən quruluşuna malik olub qarşımıza çıxır. Bu adamlar birmənalı olaraq estetik əməliyyat keçirdiklərini inkar edir, sadəcə təbii yollarla mütanasib bədən quruluşuna malik olduqlarını iddia edirlər. Bir müddət keçdikdən sonra isə o adamların olduqca pis vəziyyətə düşdüyünü görürük.
   Bu fakt diqqətimizi çəkdiyindən, bəzi şəhər apteklərində işləyən əczaçılarla, həkimlərlə qız və qadınlarımızda baş verən bu dəyişikliyin səbəblərini aydınlaşdırmağa çalışdıq.
   Əczaçılar dedilər ki, hazırda şəhər qadın və qızları "Deksometazon", "Prednizalon", "Retobolil" və digər harmonal dərman preparatlarını almaq üçün apteklərə müraciət edir, lakin əksər hallarda bu dərmanlar həkim tərəfindən təyin edilmədiyi üçün istehlakçıya satılmır.
   Şəhər apteklərindən birində çalışan Gülşən adlı əczaçının sözlərinə görə, bəzən tanınmış qadınlar da harmonal preparatlar əldə eləməkdən ötrü onlara müraciət edir. Gülşən xanım bildirdi ki, onlar həmin şəxslərə bu dərmanların zərəri haqda məlumat verdikdən sonra onlara bunlardan istifadə etməməyi məsləhət görür: "Hazırda oğlanlar süni əzələ kütləsinə malik olmaq üçün "Retobolil" preparatından istifadə edir. Bu harmonal dərmandır, həkim bunu xəstəyə təyin edirsə, heç bir vaxt onun sayını 3-5-dən artıq göstərə bilməz. 5-dən artıq olarsa, bu onu qəbul edən insanda ciddi harmonal dəyişiklik yarada bilər. Biz bu dərmanları yalnız resept vasitəsilə veririk, reseptsiz isə vermirik. Elə olur ki, gənc qız və qadınlar bizə yaxınlaşıb "Deksometazon", "Prednizalon" və s. preparatlar istəyir. Yalandan deyirlər ki, həkim təyin edib. Onlardan resept tələb etdikdə isə yalvarırlar ki, tanıdıqları qadınların bəziləri bu dərmanlardan istifadə etdikdən sonra gözəl bədən quruluşuna malik olub, dərisi parıldayır. Biz o qadınlara başa salmağa çalışırıq ki, bu dərmanlar qadınlara müvəqqəti gözəllik bəxş edir, amma sonra böyük fəsadlara səbəb olur. Sonsuzluğa, xərçəngə, aybaşı pozğunluğuna gətirib çıxarır. Onların bəziləri bu anlasa da, müəyyən bir qrupu anlamaq istəmir. Bu dərmanları həkim müəyyən xəstəliklər zamanı təyin edir, amma onu, tutalım, 3-5 ədəddən çox qəbul eləmək olmaz. Amma bu adamlar bir də görürsən 20-30 tabletka atıb, bir o qədər də iynə vurdurub gözəl bədən quruluşuna malik oldu, üz dərisi işıq saçdı, bütün qadınlar, qızlar onun gözəlləşməsindən danışdı. Ancaq bu adamlar onları gözləyən təhlükədən xəbərsiz olur".
   Gülşən xanımın dediyinə görə, o dərmanları müəyyən dəllallar gözəllik eşqinə düşən qadınlara satır.
   Onun sözlərinə görə, arada işləyən bu adamlar bəzi aptek işçilərilə dilbir olub bu zərərli preparatların satışı ilə məşğul olur: "Təəssüf ki, bir çox hallarda həmin dəllal özünü həkim və tibb bacısı adlandıranlar olur. Onlar bu dərmanların üz qabığını cırıb atır, onları ədəd-ədəd qız və qadınlara satır.
   Yaxşı olar ki, qız və qadınlarımız müvəqqəti gözqamaşdırıcı cazibəyə malik olmaq üçün öz həyatını təhlükəyə atmasın. Bunu məsləhət görməzdim. Onların çoxu sabah ana ola bilməyəcək. Belə qadınları xərçəng də yaxalaya bilər. Hətta bu preparatları soruşanlar sırasında aşıq və müğənni qadınlar da var. Görürsüz, onların bəzilərinin üzü şüşə kimi parıldayır, həmin bu preparatlardır onları belə cazibəli göstərən".
   Tibb elmləri doktoru, professor Adil Qeybulla da qız və qadınları, idmanla məşğul olan kişiləri həkim təyinatı olmadan harmonal preparatlar qəbul etməməyə çağırdı. Professor Qeybullanın sözlərinə görə, harmonal dərmanların təbabətdə tətbiqi ancaq ayrı-ayrı xəstəliklər zamanı nəzərdə tutulur. Bunlar auti-immum və s. xəstəliklərdə müalicənin əsas bir komponenti kimi tətbiq edilir.
   Amma onların digər məqsədlər üçün tətbiqi yolverilməzdir. Xüsusilə də bədən kütləsini artırmaq üçün istifadə edilən harmonların qəbul edilməsi orqanizmə çox ciddi ziyan vura, harmon çatışmazlığına gətirib çıxara bilər. Bu preparatların müalicə zamanı tətbiqi müəyyən vasitələrlə tənzimlənir. Onların istifadəsi dayandırıldıqdan sonra digər stimuliyatorlardan istifadə edilir ki, bədəndə harmon mübadiləsi tənzimlənsin. Çünki harmonal preparatların qəbulu zamanı bədəndə onların istehsalı aşağı düşməyə başlayır və bədən bu istehsala tələbat görmür. Amma birdən-birə onu dayandırdıqda ortaya preparatı dayandırmaq simptomu çıxır. Bu da ki, həmin hormonun çatışmazlığı ilə müşayiət olunur. Hesab edirəm ki, hormonal dərmanların həkim nəzarətindən kənar müxtəlif vasitələr üçün qəbul edilməsinə yol vermək olmaz. Xüsusən də qadınların gözəlləşmək, kökəlmək və s. üçün harmon qəbulu onlarda çox ciddi dəyişiklik yaranmasına gətirib çıxara bilər".
   A.Qeybulla bildirdi ki, harmonal preparatlardan istifadə qadınlarda, əsasən də, ciddi aybaşı pozğunluğuna səbəb olar: "Ona görə də qadın və qızlarımız bu məsələdə diqqətli olmalıdır".
   A.Qeybullanın sözlərinə görə, insanlarımız adını, tərkibini bilmədiyi, Səhiyyə Nazirliyinin müvafiq qurumu tərəfindən təsdiq edilməyən dərman preparatını qəbul etməkdən çəkinməlidir.
   Onun bildirdiyinə görə, ayrı-ayrı adamlar tərəfindən ədədlə satılan bu preparatlar, ola bilsin, Azərbaycanı istəməyən dövlətlərin bir təxribatıdır":Bu təxribat da ola bilər. Adsız, ünvanı bilinməyən dərmanlı "sənə xeyirdir" deyib insanlara satmaq yaxşı hal deyil. Bunu hamilə qadın da, yaşlı insanlar da, uşaqlar da istifadə edə bilər. Yenə də deyirəm ki, insanlarımız bu məsələdə diqqətli olmalıdır".
   

Bakıda evində əxlaqsızlıq yuvası təşkil edən qadın həbs edilib. Bu barədə APA-ya Daxili İşlər Nazirliyinin mətbuat xidmətindən məlumat verilib.
   DİN İnsan Alverinə Qarşı Mübarizə İdarəsi əməkdaşlarının həyata keçirdiyi əməliyyat tədbirləri nəticəsində Sabunçu rayonu, Zabrat qəsəbəsində yaşayan Beyləqan rayon sakini Şəfiqə Zeyniyeva evində əxlaqsızlıq yuvası təşkil etdiyi üçün tutulub. Fakt üzrə cinayət işi başlanıb, istintaq aparılır.
   

Bu barədə APA-ya Sumqayıt Şəhər Polis İdarəsindən məlumat verilib.
   Sumqayıt ŞPİ əməkdaşlarının həyata keçirdiyi əməliyyat tədbirləri nəticəsində Xəzər dənizinin sahilində 1 ədəd "F-1" əl qumbarası, 2 ədəd "RQD-5" qumbarası, 1 ədəd "Valter" tipli silah və müxtəlif çaplı patronlar aşkar edilərək götürülüb. Faktla bağlı araşdırma aparılır.
   

Kürdəmir rayonunun Dəyirmanlı kənd sakini həyat yoldaşını boğaraq öldürüb. Rayon polis şöbəsindən APA-nın yerli bürosuna verilən məlumata görə, hadisə fevralın 27-də gecə saat 4:00 radələrində Kürdəmirin Yenikənd kəndində baş verib.
   Dəyirmanlı kənd sakini, 1974-cü il təvəllüdlü Həmidov İkram Müzəffər oğlu Yenikənd kəndində qeyri-qanuni yaşadığı 1970-ci il təvəllüdlü Qurbanova Reyhan Qüdrət qızını boğaraq öldürüb. Hadisə ailə münaqişəsi zəminində baş verib. Qatil ər hadisədən sonra könüllü olaraq polis şöbəsinə gedib. Faktla bağlı Kürdəmir Rayon Prokurorluğunda cinayət işi açılıb, araşdırma aparılır.
   
   

Kəsrət çoxluq, vəhdət isə birlikdir. İnsanın bütün maddi-mənəvi dəyərlərinin hər biri sonsuz zərrələrdən ibarət olan bir aləmdir. Onun göz və qulaqları, əl və ayaqları, duyğu və hissləri, ruhu, qəlbi və vicdanı dəyərlər çoxluğudur. Bu kəsrət vahid mərkəzdən idarə olunmasa və kamil bir məxluqa xidmət etməsə, həmin çoxluq sadəcə lazımsız və faydasız bir kəmiyyət olar. Əgər həmin dəyərlər məcmusu orqanizmdə fəaliyyət göstərən ruh adlanan cövhərlə idarə olunarsa, bu zaman onlar insan adlanan mükəmməl və kamil bir vəhdətə-keyfiyyətə çevrilərlər.
   
   Güc vəhdətdədir
   
   Bir kitabın hər hansı hərfi də özünə görə bir varlığa sahibdir. Bununla o, həmin kitabı yazanı tanıtdırır. Hərflərin vəhdəti cümlə, cümlənin vəhdəti isə başqa isimlə yad edilir: Kitab. Sözsüz ki, həmin kitabın verdiyi feyz və xeyirdə o hərfin də, cümlənin də öz nəsibi, öz payı var. Deməli, çoxluq (hərf və cümlələr) olmasaydı vəhdət (kitab) də olmazdı. Göründüyü kimi, çoxluğa şərəf və izzət qazandıran vəhdətdir. Ağacın da hər üzvünün öz gözəlliyi var. Lakin ağacın kamil olması üçün həmin üzvlərin vəhdəti lazımdır. Səhradakı tək ağac da qol-budağı, yarpağı, çiçəyi və meyvəsilə kəsrətdə vəhdətdir. Lakin həmin kamil ağac bir varlıq olaraq tək olduğu üçün rüzgara qarşı acizdir. Ağacların kəsrəti sayılan meşə isə vəhdətdə olduğu üçün həm özünü, həm də hər bir ağacı qoruya bilir.
   
   Deməli güc, müqavimət qaynağı vəhdətdədir
   
   Təklikdə qalan bir "göz"ü, bir də insanda olan o gözün vəzifəsini müqayisə edək. İkinci halda bədənin hər bir üzvü ilə təmasda olan və bədəni tamamlayan göz: "alimin elminə, sənətkarın sənətinə, əsgərin silahına" xidmət edir. Digər tərəfdən, həmin göz bədəndəki hər bir orqan kimi, vəhdətdən şərəf qazanaraq kamala çatır. Bu qayda üzrə insandakı hər bir üzv və əzanın da tək halda qiyməti başqa, bədənlə birlikdə (vəhdətdə) isə tamam başqadır. Təbir caizsə, onlar bədənə cüz (hissə) olmaqla təsbihlərini (dualarını) külliləşdirir və ümumi işə qulluq edirlər. Bu zaman həmin cüzlər orucdan da, namazdan da, elm, iradə və cihaddan da şərəf duyurlar. Bir sözlə, onlar bir kəsrət kimi, ruhun əmrilə vəhdətdə olub tək bir isimlə tanınırlar ki, onun da adı Rəbbin şah əsəri İnsandır. Lakin yaradılış baxımından bir nəfərin özü bir aləm olsa da, 100, 1000 nəfərlik cəmiyyət o aləmlərdən təşəkkül tapan daha böyük bir aləmdir. Əgər həmin qurum vahid əqidə, iman, taktika və strategiya üzrə çalışmazsa, o, sadəcə qara camaat, vaxtilə "aynəbəndlərin altında çox, bayraqlar altında isə az olan" (həz Əli) Kufə camaatı kimi yaxşı işə yaramayan, nə etdiyini özü də bilməyən bir insan yığınını-kütləni xatırladar. Və onun nə özünü, nə də başqasını qorumağa gücü çatar. Əksinə, əgər həmin cəmiyyət vəhdətdə olarsa, bu zaman o, Rəbb və Peyğəmbər(ə) kəlamlarına sadiq bir ümmət kimi təşkilatlanmış, nə edəcəyini bilən saleh bir zümrəyə çevrilər. Vəhdətdə olan bu camaatın iman, elm, iradə əndişəsi də olmaz. Zira "güc çoxluqda yox, birlikdədir, vəhdətdədir" deyiblər.
   Haşiyə: Musa(ə)-dən-təxminən b.e.ə. 1000-ildən başlayan yəhudi tarixi sübut edir ki, bu millətin sayı heç vaxt 15-17 milyondan artıq olmayıb. Fəqət bununla yanaşı heç bir millət, xalq yəhudi ümməti kimi vəhdətdə də olmayıb. Firondan Hitlerə qədər gecən 3000 min il ərzində Şeytan xislətli neçə-neçə hökmdar bu millətə çoxlu soyqırım edib. Sayları azalıb, yandırılıb, edam və sürgün edilib, işgəncələrlə öldürülüb və digər əzablara məruz qalıblar. Lakin həmişə vəhdətdə olublar və az sayları ilə dünya elminə, mədəniyyətinə, siyasətinə, iqtisadiyyatına önəmli təsir ediblər və indi də edirlər. Çünki həmişə bir-vəhdətdə olublar və indi də vəhdətdədirlər.
   
   "Təvhid və vəhdətdə cəmali İlahi və kəlami Rəbbani təzahür edər"
   
   Şübhəsiz ki, Allahın Şəfi (şəfa edən), Rəzzaq (ruzi verən) və Hadi (hidayətə qovuşduran) isimlərinin təcəlliləri olan şəfa, ruzi və hidayətin bir adama verilməsi həmin bəndə üçün böyük ehsandır. Lakin bu nemətlərin bir cəmiyyətə və ya bütöv millətə ehsan edilməsi isə bir fərdə verilən nemətdən daha xeyirlidir. Səmanı bir kitab, bəşəri kamil bir insan, təbiəti ilahi bir müəssisə kimi dəyərləndirə bilsək, aydın olar ki, sözügedən üç aləmin vəhdətindən alınan feyz, mərifət, ibrət və elm bu kitabın hərf və cümlələrindən, o kamil insanın ayrı-ayrı orqanlarından, həmin müəssisənin dəzgah və alətlərindən alınan feyz və mərifətdən daha mükəmməldir.
   Üç ədəd "1" rəqəmi ayrı-ayrılıqda "üç" sayını verirsə, həmin rəqəmlər yan-yana yazıldıqda "111" olur. İndi bu say əyləncəsini qaranlıqda əlində məşəl tutan bir nəfərin gətirdiyi işığı 11 və ya 111 nəfərin məşəllərinin verdiyi işıqla müqayisə edək. Sonra da bu adamların qüvvə, elm və imanlarının müştərəkliyini, bu müştərəkliyin vahid məfkurəyə xidmət etməsini təsəvvür etsək, aydın olar ki, həmin vəhdət tək bir adamın qabiliyyətindən qat-qat üstündür. Elə hər bir xalqı digərindən üstün edən də, məhz onların kəmiyyətdən keyfiyyətə, çoxluqdan vəhdətə nail olmasıdır. Vəhdətdə olan cəmiyyətin hər bir üzvünün mələk siması, şəfqət, mərhəmət və nurlu təbəssümü, iradə, əzm və elmi qarşısında Şeytan da, nəfs də acizdir.
   
   Cəmiyyət və millətin intibahı vəhdətdədir
   
   Yaradılış baxımından insan ictimai bir varlıqdır. Allah insanı cəmiyyət içində yaşamaq üçün yaradıb. İnsan maddi və mənəvi tərəfilə özünü ancaq cəmiyyət içərisində yaşamaqla qoruya bilir. Başqa sözlə, insan toplum halında yaşamağa məhkumdur. Bu məsələyə xüsusi önəm verən Rəbb təkbaşına namaz qılan möminə "Ancaq Sənə ibadət edirəm və ancaq Səndən kömək diləyirəm" yox, ona bütün İslam cəmiyyəti adından danışmağı tövsiyə edərək buyurur: "Ancaq Sənə ibadət edirik və ancaq Səndən kömək diləyirik" (Fətiha 4). Əslində, bu kəlamla hər bir müsəlman özünü təşkilatlanmış İslam ümmətinin üzvü, vəhdətdə olan kəsrətin ayrılmaz hissəsi hesab edir. Göründüyü kimi, məlum Quran ayəsində hər bir möminə gündəlik şəxsi işlərindən ibadətlərinə qədər bütün məsələlərdə vəhdətdə olması aşılanır. Çünki yaradılış, qəzavu-qədər, tale, hətta xoşbəxtlik hələ heç kəsi o səviyyəyə qaldırmayıb ki, o, birliyə, vəhdətə ehtiyac hiss etməsin. Peyğəmbər (ə) buyurub: "Müsəlmanları bir-birindən ayıranlar, onları tayfalara bölənlər lənətlənmişlər".
   
   Üç adam camaatdır
   
   İnsan tək yaşamaqdan qaçmalıdır. İki adam da camaat deyil. Çünki onlar aralarında razılığa gəlib, pis əməllər də edə bilərlər. Lakin üç nəfərin bu işi etmə ehtimalı çox azdır. "İki adam şeytandandır. 3 adam isə camaatdır" Peyğəmbər(ə) kəlamıdır. Tək insan "Atlant, Zevs", istənilən nağıl qəhrəmanı olsa belə, şəxsi düha, güc və mədəniyyəti, hətta kəşf və kəramətlərilə də təkbaşına əsrimizin bəla, müsibət, zəlalət və günahları qarşısında yaşaya bilməz. O, Robinzon Kruzo kimi "sürüdən" ayrı qaldığı üçün hər zaman "qurdlara" yem ola bilər. Ayaqlarını cəmiyyət zəmisinə basmayan insan, ayaqlar altında bir yarpaq və ya saman çöpü olar. Həmin səbəbdən, Peyğəmbər(ə) buyurub, "Tək yaşayan Şeytandır".
   Həz.Peyğəmbərin kəlamına görə, "Allahın rəhməti insanların çoxluğundadır". Camaatın başı üzərində dolaşan bir bulud, altında olan hər kəsə rəhmət yağdırar. Lakin bir nəfərin duası bir fərdin daşıdığı rəhmət damlaları qədərdir. Halbuki dil, könül birliyində olan toplumun duası ayrı-ayrı fərdlərin duasından qat-qat üstündür. Tək adamın duaları onun günahları üzündən qəbul olunmaya da bilər. Lakin həmin adam cəmiyyət içində olarsa, cəmiyyətin duaları eşidilər və qəbul olunar da. Zira Allah buyurub: "Onlar elə bir camaatdır ki, onlarla bir yerdə olan bədbəxt olmaz". Məgər gülüstanda olan, heç olmasa o bağçanın xoş iyindən istifadə etməzmi?! Bunun başqa bir dəlili də, camaatla qılınan namazlara 27 dəfə artıq savab verilməsidir. Səbəb isə nur və savabın çoxalmasının parçalanmanı və bölünməni qəbul etməməsidir. Camaat ilahi rəhməti duası ilə cəlb edib, könüllərdə yerləşdirməkdə bir vasitə olduğu kimi, həm də bəla və müsibətlərin dəfinə önəmli bir vəsilədir. Camaatın dua və yalvarışları rəhmətə açılan əl və ovuclara səmavi təbəssümləri cəlb edərkən, eyni zamanda səmadan yerə gələ biləcək müsibətlərin dəfinə də səbəb olur. Təbir caizsə, "ildırım ötürücülərindən" uzaqda olanlara Şeytanın ildırım oxları hər an təsir edə bilər.
   
   Dünya vəhdətdə yaradılıb
   
   Çağdaş dünya atom, super kompüter, operativ informasiya məkanıdır. Bu məkanı təşkil edən ölkələr ən azı, təbii fəlakətlərin ləğvi və ekoloji tarazlığın bərpası üçün inteqrasiyaya məhkumdurlar. Deməli, çağdaş zaman camaat, ümumbəşər zamanıdır. Burada ayrı-ayrı fərdlərin düha və zəkası ilə kəşf edilən xariqüladə dəyərlər tez bir zamanda bütün bəşərin malı olur. Və sözsüz ki, bəşərin həmin kəşfdən aldığı xeyir, həmin kəşfin müəllifinin xeyrindən çoxdur. Lakin məsələyə savab kontekstindən baxılarsa, müəllifə düşən savab bəşəri təşkil edən fərdlərin sayından da çox olar. Necə ki, bir nəfərin cəm halda oxuduğu bir Fətiha surəsi və ya Quran xətmini min adama hədiyyə etməsi, min nəfərin hamısı üçün oxunan min Fətiha və xətmə bərabərdir. Yəni savab minə bölünməz, əksinə, savab min dəfə artar.
   Məlumdur ki, Azərbaycan da daxil olmaqla Qafqaz adlı bir məkan tarixən Qərb ilə Şərq arasında bir körpü olub. Hər keçən də bu verimli torpağa, sanki bir toxum atıb gedib. Və bunların da əksəriyyəti çox təəssüf ki, gül yox, qanqal toxumları olduğundan bitən də qanqal olub. Vaxtilə saysız dişlərin və birləşən tək dişlərin amansız zərbələrinə cavab verə bilməməyimiz, əhali və ərazimizi qorumamağımız da göstərir ki, millətin nicatı onun vəhdətindədir. Dünya vəhdətdə yaradılıb ki, bəşər vəhdət halında həmin vəhdətdən istifadə etsin. "Məgər yaradan bilməzmi?!" (Mülk 14).
   Həmd olsun o Məbuda ki, bu böyük aləm Onun icadı (yoxdan var etməsi) və insan adlanan bu kiçik aləm Onun ibdasidir (yaratması). Biri inşası, digəri binasıdır. Biri sənəti, digəri boyasıdır. Biri nəqşi, digəri zinətidir. Biri rəhməti, digəri nemətidir. Biri qüdrəti, digəri hikmətidir. Biri əzəməti, digəri rububiyyətidir (sahib olması, Allahlığı). Biri məxluqi, digəri məsnuidir (orijinalı olmayan). Biri mülkü, digəri mülkündəki quludur. Biri məscidi, digəri həmin məsciddə ibadət edən abididir...
   Bunların hamısı kəsrətləri və kəsrətdən doğan vəhdətlərilə Allahın mülkü və malıdır. Çünki onların hər birində məhz Onun nişanı, Onun möhürü vardır. Elə isə bu mülk və malı, bu möhür və nişanı izzətləndirmək üçün millət və ümmətin vəhdəti arzusu ilə. Unutmayaq ki, dilbər Qarabağın açarlarından ən ümdəsi vətəndaş həmrəyliyi, millət və ümmət vəhdətidir.
   

Qadınların böyük əksəriyyəti özünə baxmağı çox sevir, onlar fərqli görünmək üçün tez-tez qadın salonlarına gedir, dəblə geyinməyə çalışır. Elə qadın var ki, hər həftə, bəlkə də üç gündən bir saçının rəngini dəyişməsə narahat olur.
   Bəzən qadınlar hamilə vaxtı da qadın salonlarının daimi müştəriləri sırasındakı yerlərini boşaltmır. Belə qadınlar, heç olmasa, hamiləlik müddətində iki-üç dəfə saç boyadır. Bəzi salonlarda "hamilə olmağının mənə nə dəxli var, pulumu versin" deyib, qadınların saçlarını kəsib rəngləyirlər. Elə saç ustaları da olur ki, hamilə qadına bu istiqamətdə xidmət göstərməkdən birmənalı olaraq boyun qaçırır.
   Tez-tez eşidirik ki, saç boyası hamilə qadına böyük zərər vurur. Saç ustaları özləri də deyir ki, hamilə qadın ümumiyyətlə saçını boyamalı deyil. Onlar hesab edirlər ki, qədim dövrdən başlayaraq, hamilə qadına nə saç kəsmək icazəsi verilib, nə də saç boyamaq. Qadın salonlarında işləyən ustaların sözlərinə görə, bu günah sayılır. Ustalar bildirir ki, çox zaman hamilə vaxtı saçını boyayıb kəsdirən qadınlar doğuş prosesində çətinliklə üzləşir. Onlara görə, həm də ki, saç boyası qadının bətnindəki uşağa zərər verə bilər.
   Yeri gəlmişkən, qəzetimizə yaxın şəxslərdən birinin dediyinə görə, o özü müşahidə edib ki, bir hamilə qadın saçlarını burdurmaq üçün ustaya müraciət edib, usta nə qədər çalışsa da onun saçlarını burmağa nail olma bilməyib, o qadının saçları yenə də əvvəlki vəziyyətində qalıb.
   El inanclarına fikir versək görərik ki, orada da hamilə qadınlara saç kəsdirmək, qaş aldırmaq, saçı boyamaq qadağan edilir. İnanclarımızda deyilir ki, hamilə qadın saçlarını kəsirsə, gələcək övladının ömrünü kəsir. Bəzən görürsən ki, hansısa bir uşağın saçı qırmızımtıldır (buna kürən deyirlər). Bu halda yaşlı adamlar deyir ki, anası bu uşağa hamilə olanda saçlarını qırmızı boyayıbmış, bu da uşağa keçib.
   Hamilə qadının saçını kəsdirib boyatdırması tibbi baxımdan nə dərəcədə doğrudur? Saç boyasının hamilə qadına zərər vurması ilə bağlı deyilənlər el inancıdır, mifdir, yoxsa həqiqət?
   Ginekoloq həkimlərə müraciət etdik. Onlar bildirdilər ki, hamilə qadının saç boyamasının birbaşa bətnində daşıdığı uşağa ziyanı var. Saç kəsdirməyə gəlincə, onlar dedilər ki, bunun o qədər də zərəri yoxdur. Həkimlərə görə, ola bilsin, hamilə qadın saçını kəsdirdikdən sonra kimsə ona kənardan "niyə saçını kəsdirdin, bu uşağa ziyandır" desin, bu vəziyyətdə ana narahatlıq keçirə bilər, amma bu tibbi baxımdan qadağan edilmir.
   Tanınmış ginekoloq Maya İsmayılova bizimlə söhbətində " yaxşı olardı ki, hamilə qadın 9 ay səbrini basıb, gələcək körpəsini sağlam şəkildə dünyaya gətirməyin qeydinə qalsın. Qadın hər zaman gözəl görünmək istəyir. Bu təbiidir. Amma hamilə qadının öz təbii gözəlliyini nə saç boyası, nə də əlavə kompanentlər əvəz edə bilər. Qadınlarımız hamilə vaxtı kimyəvi maddələrdən nə qədər uzaq dursalar, bir o qədər yaxşıdır"-deyə bildirdi.
   Mir-Əsəddulla Mirqasımov adına Respublika Klinik Xəstəxanasının nəzdində fəaliyyət göstərən poliklinikanın ginekoloq-həkimi Məlahət Quliyevanın bildirdiyinə görə isə, hamilə qadına saç kəsdirmək tibbi baxımdan qadağan edilmir, amma saç rənglətməyə yasaq qoyulur":Bu nə mifdir, nə el inancıdır, tibbdə də hamilə qadına saç boyatmağı məsləhət görmürlər. Birincisi, saç boyası kimyəvi maddədir, o qadının özünə ziyan vura bilər. Digər tərəfdən isə, saç boyandığı zaman o kimyəvi maddə, milyonda bir qram da olsa, qan vasitəsilə ana bətnindəki uşağa keçə bilər. Bu ehtimal az da olsa var. Buna görə də, hamilə qadınlara bu kimi şeylər məsləhət görülmür. Amma onlar saçlarını istədikləri formada kəsdirə bilər. Bunun zərəri barədə tibbdə heç nə yoxdur".
   Ginekoloq Kəmalə Dünyamalıyeva isə hamilə qadınlara, ümumiyyətlə, qadın salonlarının xidmətindən yararlanmağı məsləhət görmür. Onun sözlərinə görə, indi hepatit S və hepatit B geniş yayılıb, hamilə qadının hər an belə viruslara yoluxma ehtimalı var: "Biz heç bir xəstəmizə hamilə vaxtı nə saç kəsdirməyi, nə boyatmağı, nə manikür-pedikür etdirməyi məsləhət görürük. Bunların hər biri gələcək ana və onun körpəsi üçün böyük təhlükə deməkdir. Rəng qan vasitəsilə uşağa keçə, saç kəsdirmək uşağı narahat edə, əl və ayaq dırnaqlarını salonda qaydasına saldırmaq isə anaya təhlükəli viruslar qazandıra bilər. Odur ki, hamilə qadınlar bu şeylərdən uzaq dursa yaxşıdır".
   

Xəbər verildiyi kimi, İqtisadi İnkişaf Nazirliyi istehlakçılara üzərində istehsalçısı barədə məlumat olmayan "çovdar çörəyi"ni və "pəhriz çörəyi"ni almamağı tövsiyə edir. Belə ki, sözügedən nazirliyin mətbuat xidmətindən, mətbuata verilən məlumata görə, Badamdar qəsəbəsində yerləşən çörək sexində aparılan yoxlamalar zamanı sexin anbarında 1-ci növ buğda unu olduğu halda, bu undan bişirilmiş çörəyin "çovdar çörəyi" və "kəpəkli çörək" kimi markalanmaqla ticarət şəbəkəsinə buraxıldığı müəyyən edilib.
   Əslinə baxanda, belə hallar təkcə Bakının bir çörək sexində deyil. Əksər sexlərdə analoji hal hökm sürür. Çünki 70 qəpiyə satılan qara çörəklərin bəlkə də tam əksəriyyəti qarışıq undan hazırlanır və müvafiq tələblərə cavab vermir. O da məlumdur ki, ümumilikdə Azərbaycanda xeyli sayda xəstə insan dieta saxlayır və sözügedən çörəklərdən istifadə etmək məcburiyyətindədir. Belə saxtakarlıqlardan sonra həmin insanlar nə etməlidir?
   Məsələyə münasibət bildirən Azad İstehlakçılar Birliyinin sədri Eyyub Hüseynovun fikrincə, dövlət orqanlarının sözügedən məsələ ilə bağlı reydlər keçirməsi çox yaxşı haldır: "Ancaq xəstə istehlakçılar dietik çörəklərdən istifadə edərkən öz hüquqlarını qorumalıdır. Nədir həmin hüquqlar? "İstehlakçıların hüquqlarının müdafiəsi haqqında" Azərbaycan Respublikası Qanununda istehlakçıların, o cümlədən xəstələrin malın istənilən sənədlərini tələb etmək hüququ var. Həmçinin, gedib mala baxmaq, ekspertizaya vermək hüququ var. Digər tərəfdən, paketlənməmiş, buraxılma vaxtı üzərinə yazılmamış, üzərində ünvanı, telefonu yazılmayan malları almasınlar. İstehlakçılara tövsiyələrim yalnız bunlardan ibarətdir".
   İqtisadçı-ekspert Cümşüd Nuriyevin fikrincə, istehlakçılar hər bir malın keyfiyyət sertifikatı ilə yanaşı, onun uyğunluq sertifikatını da yoxlamalıdır: "Yəni mal həmin standarta uyğundur, yoxsa uyğun deyil. Bundan başqa, Azərbaycanın həm İnzibati Xətalar Məcəlləsində, həm də Cinayət Məcəlləsində ekoloji cəhətdən təmiz olmayan məhsulu satana, yetişdirənə inzibati cəza düşür. Bunun miqyası böyükdürsə, o zaman cinayət məsuliyyətinə cəlb olunmalıdır. Deməyim odur ki, bu cür saxta çörək istehsalçılarına cinayət işi açılsa, onlar həbs olunsa, digərlərinə bu ciddi dərs olacaq. Həmin adamlar elə fikirləşir ki, onların ailə üzvləri həmin çörəyi alıb yemədiyinə görə istehsal etdiklərini başqalarına sırıya bilərlər. Müqayisə üçün qeyd edim ki, sözügedən "pəhriz çörəkləri" Moskvada bizim pulla 3-4 manatadır. Digər tərəfdən, Rusiyadan gətirilən diabetik çörəklərin keyfiyyətinə heç kəs zəmanət verə bilməz. Çünki bu çörəklərin hamısı yoxlanılmır. Gömrük orqanları onlardan yalnız müəyyən nümunələr götürə bilir. Ona görə də sözügedən çörəklərin eyni olmasına kimsə zəmanət verə bilməz. Bu isə artıq rəsmi qurumların işidir. Çünki Prezident İlham Əliyevin 2008-2015-ci illərdə Azərbaycanda ərzaq təhlükəsizliyilə bağlı sərəncamı var. Eyni zamanda, həmin dövlət proqramının icrasına nəzarətdə də Azərbaycanın mövcud orqanları məsuliyyət daşıyır. Birincisi, buna Kənd Təsərrüfatı Nazirliyi məsuliyyət daşıyır. Ancaq sözügedən nazirlik, hələ ki, bəyanat verməkdən o yana getmir. Burada heç kəsə ixtiyar verilmir ki, ötür-ötür oyunu ilə millətin taleyilə oynasın. Nazirliklər arasında arbitr rolunu oynayan Nazirlər Kabinetinin işi qənaətbəxş deyil".
   

Salyan sakini intihar edib. Bu barədə APA-nın Mil-Muğan bürosuna Salyan Rayon Polis Şöbəsindən verilən məlumata görə, rayonun Arbatan kənd sakini, 1994-cü il təvəllüdlü İbrahimov Şəmsəddin Fərhad oğlu dünən günorta radələrində yaxınları ilə nahar etdikdən sonra evdən çıxıb. Sonradan onu mal tövləsində asılmış vəziyyətdə aşkar ediblər. Yaxınlarının bildirdiyinə görə, mərhum həmişə əsəbi vəziyyətdə olurmuş. Faktla bağlı Salyan Rayon Prokurorluğunda araşdırma aparılır.
   

Bakıda oğurluqla məşğul olan Gürcüstan vətəndaşları həbs edilib. Nəsimi Rayon Polis İdarəsindən APA-ya verilən məlumata görə, həyata keçirilən əməliyyat tədbirləri nəticəsində rayon ərazisində mənzillərdən oğurluq edən Gürcüstan Respublikasının vətəndaşları Vaxtanq Qukuaşvili və Mamuka Demitaşvili tutulub. Faktla bağlı araşdırma aparılır.
   

Bir neçə il bundan əvvəl ölkədə aptek açmaq bir növ ənənə halını alaraq geniş yayılmağa başladı. Kimin az-çox imkanı çatırdısa çalışırdı ki, aptek açsın. Ancaq bu, daha çox, özünü paytaxt Bakı şəhərində göstərirdi. Yəni 5500 manat dövlət rüsumu ödəyib lisenziya alandan sonra aptek açmaq elə də çətin olmurdu.
   Son vaxtlar aptek işlətmək elə də "xodovoy" sayılmır desək, yanılmarıq. Çünki şəhərdə apteklərin sayı həddən ziyadə çoxdur. Özü də bu apteklərdə satılan dərmanların qiymətində də ciddi fərqlər var.
   Rayonlarda isə aptek açmaq ümumiyyətlə sərfəli deyil. Məsələ ondadır ki, rayonlarda dərman alıcılarının sayı, paytaxta və digər iri şəhərlərə baxanda elə də çox olmur. Bu da təbiidir. Ancaq heç də o demək deyil ki, rayon mərkəzlərində və kəndlərdə apteklərə ehtiyac yoxdur. Var. Sadəcə olaraq, tələb olunan 5500 manatlıq birdəfəlik dövlət rüsumu rayonda aptek açmaq istəyənlər üçün kifayət qədər böyük rəqəmdir. Digər tərəfdən, rayonlarda fəaliyyət göstərən apteklər şəhərdəki apteklər kimi çoxlu qazanc əldə etmək imkanında deyil. O zaman olmazmı ki, aptek açmaq üçün tələb olunan rüsum rayonlarda azaldılsın?
   Məsələyə münasibət bildirən tibb elmləri doktoru, cərrah Adil Qeybulla sözügedən vahid rüsumun nəyə görə bütün ölkəyə eyni miqdarda şamil edilməsinin səbəblərinə aydınlıq gətirdi: "Bu rüsum əvvəl dövlət büdcəsinə az ödənilirdi və bu sahədə müəyyən rüşvət faktları var idi. Ona görə də ümumi olaraq dövlət büdcəsinə müəyyən rəqəmin ödənilməsindən ötrü Səhiyyə Nazirliyi tərəfindən belə bir qiymət müəyyən olundu. Ancaq o da danılmaz reallıqdır ki, ölkədəki bütün apteklər eyni rentabeldə işləyə bilməz. Bunun kənd yerində olanı var, dalan yerdə tikiləni var, gediş-gəlişin sıx olduğu yerdə fəaliyyət göstərəni var. Sözügedən apteklərin, yerləşmə yerindən asılı olaraq, rentabelliyi də müxtəlifdir. Ancaq bu rentabelliyi təyin etmək üçün bir meyar olmadığına görə, belə bir ümumi rəqəm təyin olunub. Lakin bütün bunlara baxmayaraq, aptek açmaq üçün tələb olunan 5500 manat dövlət rüsumu ölkədə müəyyən narahatlıq doğurur. Çünki bütün apteklər eyni gücdə işləmək imkanında deyil. Ona görə də, ola bilsin ki, apteklərlə bağlı müəyyən kriteriyalar müəyyən olunsun və bu kriteriyalara uyğun olaraq rüsumlar təyin edilsin. Məndə olan məlumatlara görə, artıq bu haqda fikirləşirlər. Yəni iri apteklərlə kənddə bir budka formasında olan aptekin lisenziyası eyni ola bilməz. Bu təbii bir məsələdir. Ümumiyyətlə, özəl sektora daha çox şərait yaradılması, texniki yardım edilməsi baxımından rüsumlara yenidən baxmaq lazımdır. İndiki böhran şəraitində həmin rüsumların miqdarının azaldılması məqsədəuyğundur. Azaldılarkən də aralarında fərqlər olmalıdır. Aptekin sahəsinə, yerləşdiyi yerə, əhali sayına görə və digər başqa meyarlara əsasən bu rüsum təyin edilməlidir".
   A.Qeybullanın açıqlamasından belə məlum oldu ki, əvvəlki dövrlə müqayisədə aptek açanların sayı xeyli azalıb. O, bunun səbəblərini bir neçə amillərlə əlaqələndirdi: "Aptek açanların sayı xeyli azalıb. Əvvəlki templə aptek açan yoxdur. Çünki aptek əvvəlki kimi gəlir gətirə bilmir. Mövcud böhran amili də buna bu və ya digər dərəcədə təsir edir. Bununla belə, apteklərin fəaliyyətilə bağlı xeyli problemlər var. Bütün bunları insanlar nəzərə alır və təcrübə əsasında artıq buna xüsusi bir həvəs görünmür. Nəticədə aptek açmaq artan dinamika üzrə getmir. Digər tərəfdən, apteklərin açılması zamanı çalışmaq lazımdır ki, heç olmasa bu apteklər əhalinin sıxlığına görə tələbatı ödəyə bilsin. Bunun üçün bir xəritə olmalıdır və həmin xəritəyə uyğun olaraq apteklərin dislokasiya yerləri olmalıdır. Yəni əsas üstünlük insanların nisbətən sıx olduğu yerlərdəki apteklərə verilməlidir və eyni zamanda həmin apteklərə güzəştli şərtlərlə lisenziya verilməlidir. Bütün bunlar nəzərə alınsa, o zaman regionlarda aptek açmaqla bağlı problemlər azalacaq".
   

Dünyanın, demək olar ki, bütün inkişaf etmiş ölkələrində dükanlarda, iri ticarət mərkəzlərində, xidmət sektorunda müştərilər ödənişləri plastik kartlar vasitəsilə həyata keçirir. Bunun üçün də sözügedən obyektlərdə POS terminallar quraşdırılıb. POS terminalların bir sıra üstünlükləri var. Belə ki, nağdsız əməliyyatlar aparılarkən inkassator xidmətlərinə ehtiyac əhəmiyyətli dərəcədə azalır.
   Bununla belə, nağdsız əməliyyatlar kassirlərin işini azaldır və səhv hesablamaların qarşısını alır. Bu xidmətin başlıca faydası ondan ibarətdir ki, ticarət və digər xidmət sahələrinin vergidən yayınmasının qarşısı alınır. Nəticədə bundan həm dövlət büdcəsi qazanır, həm də cəmiyyət faydalanır.
   Azərbaycanda da POS terminalların quraşdırılması bir neçə ildir ən aktual və müzakirə olunan məsələlərdən biri olsa da, təəssüf ki, hələlik bu sahədə arzuolunan nəticə ortada yoxdur. Məsələ ondadır ki, Mərkəzi Bankın verdiyi məlumata görə, Azərbaycanda yalnız 32 bank POS terminal quraşdırmağa üstünlük verir. Yerdə qalan digər 14 bank isə, ümumiyyətlə, belə xidmət göstərmir. Ümumilikdə ölkə ərazisində 8657 POS terminal quraşdırılıb ki, bunların da 91 faizi paytaxt Bakının payına düşür. POS terminalların yalnız 9 faizi regionlarda quraşdırılıb. Ötən ilin dekabrında 44 POS terminal quraşdırılıb ki, bunların da hamısı Bakının payına düşüb. Necə etmək lazımdır ki, regionlarda POS terminalların quraşdırılma faizi yüksək olsun? Ümumilikdə POS terminallarla bağlı öyrəndiyimiz ekspert rəyləri fərqli oldu.
   Müstəqil iqtisadçı-ekspert Yaşar Əsədov hesab edir ki, POS terminalların genişləndirilməsi və özünü doğrultması üçün gəlirlər deklarasiya olunmalıdır: "Ona görə də Azərbaycanda bu sahədə yaxın illərdə hansısa ciddi irəliləyişlərin baş verəcəyi real görünmür. Çünki ölkədə kifayət qədər böyük həcmdə qeyri-leqal pul dövriyyəsi var. Sözügedən pul kütləsinin leqallaşdırılmasına ehtiyac var. Həmin pulları, hələlik, praktiki olaraq rəsmi dövriyyəyə daxil etmək mümkün deyil. Bu mümkün olsa, o zaman regionlarda da POS terminalların sayı xeyli artacaq. Məlumat üçün onu da qeyd edim ki, rəsmi dövriyyəyə daxil olan pul kütləsi ölkədə infilyasiya risqlərini xeyli artırır. Həmçinin, pulun alıcılıq qabiliyyəti aşağı düşür və qiymətlər qalxır. Mənə elə gəlir ki, dövriyyədə olan həmin pullara amnistiya verilsə, o zaman POS terminallardan istifadə və onların quraşdırılması arta bilər".
   Müstəqil iqtisadçı-ekspert Qadir İbrahimlinin fikrincə, regionlarda POS terminalların geniş şəkildə quraşdırılması üçün Vergilər Nazirliyi ciddi səy göstərməlidir: "Bu məsələ birbaşa Vergilər Nazirliyinin funksiyalarına daxil olan məsələdir. Vergilər Nazirliyi işini elə qurmalıdır ki, POS terminallardan geniş istifadə olunsun. Onu da qeyd edim ki, POS terminalların quraşdırılması həm vergidən yayınmaların qarşısını alır, həm vətəndaşlardan alqı-satqı prosesini asanlaşdırır, həm də prosedur sadələşir və sair. Təbii, ticarət müəssisələri hər vasitə ilə müqavimət göstərəcək ki, POS terminallar quraşdırılmasın. Çünki POS terminallar quraşdırılmayanda, həmin ticarət obyektlərinin vergidən yayınma imkanları xeyli artır. Vergilər Nazirliyi də ona görə fəaliyyət göstərir ki, ölkədəki vergi potensialını tam və qanuni şəkildə vergiyə cəlb edə bilsin. Bunun yollarından biri də bütün ölkə üzrə POS terminalların quraşdırılmasından keçir. Bundan həm vətəndaşlar, həm də dövlət büdcəsi faydalana bilər. Regionlarda POS terminalların az quraşdırılması düşünmürəm ki, alıcı kütləsilə bağlıdır. Çünki vergi orqanları çox operativ işləyirlər və onların diqqətindən heç nə yayınmır.
   Ona görə də çalışmaq lazımdır ki, POS terminallar quraşdırılması rayonlarda da həyata keçirilsin. İstək olsa, POS terminalların regionlarda quraşdırılmasında heç bir problem olmayacaq".
   

Sumqayıtda qadağan olunmuş dini ədəbiyyatın satışı ilə məşğul olan mağaza sahibi polis tərəfindən saxlanıb. Bu barədə APA-ya Sumqayıt şəhər Polis İdarəsindən məlumat verilib.
   Məlumatda bildirilir ki, Sumqayıt ŞPİ əməkdaşlarının həyata keçirdiyi əməliyyat tədbirləri nəticəsində şəhər sakini Asif İsmayılova məxsus "Rəsulallah" mağazasında axtarış aparılıb. Axtarış zamanı oradan 125 ədəd yayılması qadağan olunmuş dini ədəbiyyat aşkar edilərək götürülüb.
   Mağaza sahibi A.İsmayılov isə polis tərəfindən saxlanıb. Onun barəsində İnzibati Xətalar Məcəlləsinin müvafiq maddəsilə protokol tərtib edilib.

Sumqayıtda pornoqrafik videokasetlər satılan mağaza aşkar edilib.
   Sumqayıt şəhər Polis İdarəsindən APA-ya verilən məlumata görə, keçirilən əməliyyat tədbirləri nəticəsində şəhər ərazisində fəaliyyət göstərən, Ramil Qasımova məxsus "Amil" marketdən 54 ədəd yayılması qadağan olunmuş pornoqrafik videokaset aşkarlanaraq götürülüb. Faktla bağlı araşdırma aparılır.