Əvəz Temirxan: "Müsavat intriqalara baş vurduğu halda onun ətrafında heç bir birlik olmamalıdır"
   
   Fuad Qəhrəmanlı: "Bu cür fikirlər qarşı tərəfdə bir qıcıq yaratmaq, birliklə bağlı münaqişəli durum yaratmaqdan ibarətdir"
   
   Əli Orucov: "Hər hansı partiya ətrafında birlikdən danışmaq zərərlidir"
   
   Son dövrlər müxalifətin parlament seçkiləri ərəfəsi birliyinin yaradılması istiqamətində müxtəlif fikirlər ortaya atılır. Bu istiqamətdə hələlik uğursuz alınan ən müxtəlif təklif və ideyalar irəli sürülüb. Bu arada Müsavat Partiyasının funksionerləri belə bir rəyə gəlib ki, birlik Müsavat ətrafında yaradılmalıdır. Onların fikrincə, demokratik qüvvələrin xalqdan dəstək almasının yeganə yolu məhz bundan keçir.
   Son illər, 2000-ci və 2005-ci illərin parlament, 2008-ci ilin prezident seçkilərində Müsavatın əldə etdiyi uğurlara əsasən bu partiyada belə qənaətə gəlinib ki, Müsavat hansı formada seçkilərdə iştirak edirsə, seçicilərin əksəriyyəti məhz həmin formata səs verir. Buradan da onlar belə nəticəyə gəliblər ki, ən uğurlu format siyasi qüvvələrin Müsavat Partiyası ətrafında birləşərək yaratdığı formatdır. Bu düşüncədə olanlara görə, ən böyük resursa malik siyasi qüvvə də Müsavatdır. Partiyanın Mərkəzi İcra Aparatının rəhbəri Arif Hacılı da mətbuata açıqlamasında bildirib ki, Azərbaycan seçicisi həmişə konkret bir qüvvəyə səs verib: "2000-ci ildən bu günədək Müsavat Partiyası hansı seçkidə iştirak edibsə, həmin qüvvə məhz Müsavat olub. Protest elektoratının seçkilərdə Müsavat Partiyasına səs verdiyi faktdır. 2010-cu ilin parlament seçilərində də protest elektoratı Müsavat Partiyasına səs verəcək. Müsavat seçkiyə təkbaşına qatılsa, seçicilərin əksəriyyətinin Müsavat Partiyasına, hansısa blokda seçkiyə qatılarsa isə həmin bloka səs verəcəyi şübhəsizdir. Bu baxımdan, blokun Müsavat Partiyasının ətrafında toplaşması və ya ümumi birliyin yaranması kimi modellər seçilməlidir". A.Hacılı həmçinin vurğulayıb ki, konkret olara, "Azadlıq" bloku və Müsavat Partiyası seçkidə ayrı-ayrılıqda iştirak edəcəksə, protest elektoratı Müsavat Partiyasını seçəcək.
   Bu açıqlama, söz yox ki, müxalifətdə olan digər qüvvələrin heç də ürəyincə olmayacaq. Bunu aydınlaşdırmaq üçün müxalifətdəki digər partiya təmsilçilərinin də məsələyə münasibətini öyrəndik.
   ALP-nin sədr əvəzi Əvəz Temirxanın fikrincə, Müsavatın birliyinin əsasında onun öz şəxsi maraqları durur: " Dəfələrlə demişəm ki, Müsavat Partiyası böyük birlik görüntüsünü Azərbaycanda demokratik şəraitin yaradılması uğrunda deyil, məhz öz partiyası üçün daha çox mandat almaq naminə yaradır. Onlar müxalifətin qalib gəlməsi və ya əhəmiyyətli uğur qazanması yolunda yox, yalnız öz maraqları naminə mübarizə aparır. Bunu da artıq özləri etiraf edirlər. Müsavat ətrafında uğur birliyinin yaradılması fikri isə tamamilə əsassızdır. Əslində 1998-ci ilin SİDSUH təcrübəsi göstərir ki, müxalifət kiminsə birinci və ya ikinci olmasını əsas tutmadığı, bərabər şəkilli birlik olduğu halda müəyyən uğur qazanır. Hesab edirəm ki, SİDSUH dövrü müxalifətin Əliyevlər dönəmində ən güclü variantı olub. Ondan sonrakı, istər 2000-ci, istərsə də 2003 və 2005-ci illər dönəmi isə göstərdi ki, Müsavatla birlikdə olanda uğur olur, amma həlledici məqamda Müsavat rəhbərliyi prinsipiallıq göstərə bilmir. Müsavatdakı sıravilərin fədakarlığına isə heç bir şübhəm yoxdur. Amma rəhbərlik ardıcıl, qətiyyətli və cəsarətli ola bilmir. Bu bir xarakterdir, onu dəyişmək artıq mümkün deyil. 2000-ci ildə Müsavata 15 partiya dəstək verirdi, 24 faizlik nəticə ilə parlament seçkilərində birinci yeri tutdu. Həlledici məqamda - beynəlxalq təşkilatların nümayəndələri Bakıda olan ərəfədə noyabrın 9-da Azad Qadın heykəlinin yanında icazəsiz mitinq keçirməyi qərara aldıq. Müsavat isə mandat gözlədiyindən tərəddüd etdi. Ona görə də onlar mitinqi noyabrın 18-nə keçirdi. Belə halda olduğu artıq, bütün ehtiraslar söndüyündən, sonrakı müqavimət bir effekt vermədi. 2003-cü ildə Müsavata mübarizəni davam etdirmək üçün qanun çərçivəsində hər cür dəstək verməyə hazır olduğumuzu bildirdim. Səhəri gün meydanda vəhşicəsinə döyülənlərdən biri də mən idim. Amma Müsavat başqanı ay yarım evindən çıxmadı. Heç olmasa Levon Ter-Petrosyandan nümunə götürərdi, o 2008-ci ildə fevralında uduzsa da, iki ildir ki, mübarizəni davam etdirir. Musəvi keçən ilin ortalarında uduzdurulub, amma mübarizəsi bu gün də davam edir. İsa Qəmbər isə təəssüf ki, bu nümunəni göstərə bilmədi. 2005-ci ildə Müsavat rəhbərliyi oturaq mitinqlərdən imtina etdi. Oturaq mitinqləri tez keçirsəydik, situasiya bəli olar, beynəlxalq ictimaiyyətə təsir üçün vaxt resursumuz olardı. Amma Müsavat başqanı buna getmədi. 2003-cü ildə onlar bu rejimin legitimliyinin tanınması üçün mübarizəni dayandırdılar, 2005-ci ildə isə saxta parlamentə getməklə onu legitimləşdiriblər. Hesab edirəm ki, Müsavat intriqalara baş vurduğu halda onun ətrafında heç bir birlik olmamalıdır".
   AXCP sədrinin müavini Fuad Qəhrəmanlı zənn edir ki, Müsavatda səslənən bu cür fikirlər daha çox birliyin baş tutmamasına xidmət edir: "Burada söhbət hər hansı siyasi qüvvə ətrafında birlik yaradılmasından deyil, onların bərabərhüquqlu birgə əməkdaşlıq modelindən gedir. Birlik Müsavat ətrafında yaradılmalıdır fikri isə o deməkdir ki, burada şərt qoyulur və hər hansı birlikdən daha çox, öz üstünlüklərini digərlərinə qəbul etdirmək mənası daşıyır. Ancaq kimin üstün olmasını seçki müəyyən edir. Bu günə qədər ölkədə keçirilən seçkilər, təəssüf ki, qeyri-demokratik olduğundan, siyasi qüvvələr arasında güc nisbətini müəyyənləşdirmək bir qədər çətindir. 1995 və 2000-ci illərin parlament seçkilərində AXCP parlamentdə təmsil olunmaq imkanı əldə etmişdi, Müsavat isə seçkidən kənarda qalmışdı. 2005-ci ildə isə alınan birgə səslər nəticəsində Müsavat parlamentdə təmsil olunmaq imkanı qazandı. AXCP, parlamentdə təmsil olunub-olunmamasından asılı olmayaraq, keçirilən kütləvi aksiyalarda əsas təşkilatçı kimi çıxış edərək böyük güc nümayiş etdirib. Bu cür fikirlərin səslənməsi qarşı tərəfdə bir qıcıq yaradıb, birliklə bağlı münaqişəli durum yaratmaqdan ibarətdir. Bu, birliyə xidmət edən sağlam mövqe də deyil. Siyasi qüvvələr bərabər şərtlər əsasında birliyi gerçəkləşdirməlidir. Bunun da optimal variantını "Azadlıq" bloku hesab edirik. Yaxşı olardı ki, Müsavat Partiyası "mən güclüyəm" davası aparmadan birliklə bağlı səmimi addımlar atsın".
   AMİP sədrinin müavini Əli Orucov da bildirdi ki, bu termini heç bir siyasi qüvvə qəbul edə bilməz: "Danışıqlar aparılırsa, yalnız müxalifətin ümumi birliyindən söhbət gedə bilər. Yoxsa hansısa bir partiya ətrafında birliyin yaradılması absurd məsələdir və baş tutan deyil. Əksinə, həmin fikir birliyə əngəl törədən amildir. Nəticələrə gəldikdə isə, AMİP 1998-ci ildə böyük təcrübəyə malik Heydər Əliyevi seçkilərdə faktiki udmuşdu, əlimizdə 2 mindən çox protokolun nəticəsi də vardı. Onların dedikləri isə sadəcə sözlərdir. Əsas hədəf kimi müxalifət birliyindən söhbət getməlidir, hər hansı partiya ətrafında isə birlikdən danışmaq zərərlidir".
   

Gürcüstan Prezidenti ölkə parlamentində debatların səviyyəsinin artdığını qeyd edir. Parlamentdə debatlarda çıxış edən Mixail Saakaşvili bəzi müxalifətçi deputatların öz həmkarlarının ünvanına söylədiyi fikirlərdən narazılığını bildirib.
   "Biz öz ölkəmizi sərt prinsiplər əsasında qururuq və onları dəyişmirik. Bizə deyəndə ki, adamlar sizdən qaçır və sonradan müxalifəti gücləndirir, mən deyirəm ki, onlar prinsipləri satan və artıq bizimlə ola bilməyən adamlardır. Biz heç zaman öz prinsiplərimizi dəyişmirik və həmin adamların bizim dostlarımız və ya qohumlarımız olub-olmamasına baxmayaraq, onlardan ayrılırıq". Bu barədə Mixail Saakaşvili cümə günü parlamentə illik müraciətində bildirib.
   "Hamı yaxşı bilir ki, kimsə nəsə oğurlayıbsa, mütləq getməlidir. Mən təəssüf edirəm ki, biz çoxlarından yaxamızı gec qurtarmışıq, lakin bu mənim səhvimdir və mən bunu etiraf edirəm", -Saakaşvili vurğulayıb.
   Prezident qeyd edib ki, parlamentdə debatlar müxalifətin və əksəriyyətin mövqeyinin müxtəlif olduğunu göstərir.
   "Əlbəttə, hadisələrə müxtəlif yanaşmaq lazımdır, stəkan yarıya qədər doludur və ya yarıya qədər boşdur, biz statistik məlumatlara əsasən fikir yürütsək, ölkəmiz üç dəfə güclənib və artım göz qabağındadır. Biz ölkəni qura bilmişik, baxmayaraq ki, bəziləri bunu baş tutmamış sayır" - Saakaşvili bildirib.
   Gürcüstan Prezidenti müxalifəti dinlədiyini qeyd edib və zarafatla əlavə edib ki, təkcə daxili işlər nazirinin qulaqları ilə yox.
   "Biz sizin təkliflərinizin bir hissəsini qəbul etmişik, cənab müxalifətçilər və əməkdaşlığa hazırıq" - o vurğulayıb.
   Saakaşvili qeyd edib ki, ölkədəki real vəziyyəti, müxtəlif sahələrdəki problemləri bilir, "lakin daim çətinliklərdən danışmaq yox, çox işləmək lazımdır".
   Müdafiə sahəsinin maliyyələşdirilməsinin azaldılmasına toxunan prezident deyib ki, o, Dalay Lama deyil, Gürcüstan müharibə vəziyyətindədir və Rusiya ilə atəşkəs haqqında sazişi yoxdur.
   "Belə olan vəziyyətdə biz düşmənə qarşı boş əllə dayana bilmərik, halbuki, belə şəraitdə hərbçilərin maliyyələşdirilməsini iki dəfə azaltmışıq" - o bildirib.
   Saakaşvili bir daha bəyan edib ki, "kriminal avtoritet"ə mənfi yanaşır və onun ölkədə dirçəlməsinə imkan verməyəcək.
   O qeyd edib ki, Gürcüstan Palermodan pis olub.
   "Mən öz prezidentliyim dövründə elə Gürcüstan yaratmaq istəyirəm ki, bu ölkədə yollar Avropa ölkələrində olduğundan yaxşı olsun, ən yaxşı məktəblər, xəstəxanalar olsun, siyasi düşmənlər yox, siyasi opponentlər olsun. Heç kim etnik və ya dini prinsiplərə görə sıxışdırılmasın və əsas məsələ onların ağlı, istedadı olsun. Bütün bunlar xəyal deyil, reallıqdır və başlıcası birlik və inamdır" - o bildirib.
   Gürcüstan Prezidenti qeyd edib ki, onun xalqı günahkar qismində dayanmayacaq və ölkəsi hər zaman hamıya tərəfdaş olacaq.
   "Biz elə Gürcüstan yaradacağıq ki, işğalçı çəkmələrilə tapdalanmayacaq və bu ölkədə ya sevincdən, ya da faydalanmaq istəyindən həmin çəkmələri öpmək istəyənlər olmayacaq" - o qeyd edib.
   Saakaşvili ölkədəki vəziyyətə qara eynəklə baxan müxalifətçiləri bu eynəkləri çıxarmağa çağırıb, "belə ki, irəliyə doğru yalnız avtomobillə hərəkət etmək olar, qara eynəklə rubl üzərində oturmaqla uzağa getmək olmaz".
   

Gürcüstan Avropaya inteqrasiya yolundan dönmək niyyətində deyil. APA-nın "Exo Moskvı" radiostansiyasına istinadən verdiyi xəbərə görə, bunu Gürcüstan prezidenti Mixail Saakaşvili parlament qarşısında illik hesabatı zamanı bildirib.
   Onun sözlərinə görə, "gürcü xalqı çoxdan Avropaya aparan avro-atlantik kursu seçib".
   Saakaşvili onu da bildirib ki, "bir çox qüvvələr respublikanı bu yoldan çəkindirməyə çalışır, lakin bütün təhdid və şantajlara baxmayaraq, Gürcüstan heç vaxt diz çökməyəcək".
   Rusiya barədə fikirlərini bildirən prezident əminliklə qeyd edib ki, bu ölkə ilə münasibətlər, nə vaxtsa, hökmən normallaşacaq.
   

Ölkənin siyasi səhnəsində yer alan qüvvələrin parlament seçkiləri ərəfəsində nümayiş etdirəcəyi mövqe, yaradacağı mümkün birliklərin konturları artıq indidən özünü büruzə verməkdədir. Proseslərin real mənzərəsi göstərir ki, əvvəlki seçkilərlə müqayisədə bu dəfə müxalifətin daha zəif mövqe sahibi kimi seçkilərə qatılma ehtimalı artmaqdadır.
   Bunu isə iki vacib faktor şərtləndirir. Əvvəla, müxalifət qüvvələri, göstərdiyi bütün təşəbbüs və cəhdlərə rəğmən, hələ də öz aralarında hər hansı birlik, blok formalaşdıra bilməyib. Əksinə, qarşılıqlı ittihamlar fonunda müxalifət qüvvələrinin bir-birindən ayrılma prosesi daha da sürətlənir. Bu isə, öz növbəsində, müxalifətdə təmsil olunan qüvvələrin ayrı-ayrılıqda seçkilərə qatılmaq məcburiyyətində olmasını şərtləndirir.
   Digər önəmli faktor isə ötən illər ərzində müxalifətin elektorat baxımından daim itikilərə məruz qalmasıdır. Son illərdə müxalifətin bir dəfə olsun yaddaqalan mitinq keçirə bilməməsi bu düşərgənin eloktoratının indi çox az sayda insanlardan ibarət olduğunu təsdiq edir. Bütün bunlar onu göstərir ki, indi parçalanmış müxalifət elə parçalanmış azsaylı eleoktoratla da seçkilərə qatılır. Belə vəziyyət, təbii olaraq, seçkilərdə müxalifətə hər hansı uğur vəd etmir. Bu səbəbdən istisna olunmur ki, növbəti parlament seçkilərində müxalifətin üzləşdiyi məğlubiyyətin miqyası ötən dövrlərlə müqayisədə daha böyük olacaq.
   Hakim düşərgədə hadisələr isə tamam fərqli prizmada cərəyan edir. Bu gün mövqelərini daha da gücləndirən, eyni zamanda eloktoratını əhəmiyyətli dərəcədə artıran, üzvlərinin sayını yarım milyona çatdıran hakim Yeni Azərbaycan Partiyası (YAP), müxalifətdən fərqli olaraq, təşəbbüs göstərəcəyi təqdirdə onun siyasətini dəstəkləyən partiyaların, təşkilatların və digər qüvvələrin böyük koalisiyasını da yaratmaq iqtidarındadır. Sadəcə, YAP-ın belə bir təşəbbüslə çıxış etməsi sözügedən koalisiyanın formalaşması üçün yetərlidir. Düzdür, hakim partiyanın belə bir birliyin yaranmasına hər hansı ehtiyacı yoxdur. Buna rəğmən, iqtidarın siyasətini dəstəkləyən qüvvələr seçkilər ərəfəsində YAP-ın birlik yaranması təşəbbüsü ilə çıxış etməsində maraqlı olduqlarını gizlətmir.
   Lakin qeyd olunduğu kimi, bunun üçün təşəbbüsün YAP-dan gəlməsi iqtidarmeylli qüvvələr üçün başlıca şərtdir. Vəhdət Partiyasının sədri Tahir Kərimli bununla bağlı "Həftə içi" qəzetinə müsahibəsində qeyd edir: "Bildiyiniz kimi, Vəhdət Partiyası İlham Əliyevin siyasi strategiyasını dəstəkləyir. Bu strategiyanın daha da irəliyə aparılması, inkişaf etdirilməsinin də başında Yeni Azərbaycan Partiyası (YAP) dayanır. YAP seçkiyə hər hansı müttəfiq partiya ilə deyil, müstəqil qatılacaqsa, o zaman Vəhdət Partiyası da seçkiyə müstəqil qatılmaq fikrindədir. YAP-ın təşkilatçılığı ilə prezidenti müdafiə edən partiyaların birliyi yaransa, biz ora məmnuniyyətlə qoşularıq. Belə bir hal olmadığına görə hələlik seçkiyə müstəqil qatılmaq fikrindəyik".
   Qeyd edək ki, bundan əvvəl sözügedən məsələ ilə bağlı "milli.az" portalına müsahibəsində də Vəhdət Partiyasının sədri maraqlı fikirlər səsləndirib: "Əməkdaşlıq haqqında Vəhdət Partiyası Baş Məclisinin qərarı var. Bu qərar Prezident İlham Əliyevin strategiyasını birmənalı şəkildə müdafiə etməkdən ibarətdir. Vəhdət Partiyası hesab edir ki, İlham Əliyevin alternativi yoxdur. İstər iqtidar, istərsə də müxalifətdən kimsə başqası prezident olarsa, Azərbaycanı xarici ölkələr diri-diri yeyəcək. Biz İlham Əliyevi şəxsi istəklərə görə deyil, zəruri səbəblərə görə dəstəkləyirik. İlham Əliyev sabitliyin qarantıdır. Ona görə də YAP-la münasibətlərimizi tənzimləməyə çalışırıq. Amma hələlik bu qarşılıqlı deyil".
   Bununla yanaşı, cənab Kərimli müxalifətdə birlik məsələsinə də kifayət qədər pessimist mövqedən yanaşır: "Müxalifətdə baş verənləri dəqiqliyilə izləyirəm. Amma hansısa yenilik görmürəm. Əksinə, münasibətlərin daha da dramatikləşdiyinin şahidiyəm. Hesab edirəm ki, müxalifət silkələnib özünə gəlməlidir... Əks təqdirdə qarşıdakı seçkilərdə daha da ağır zərbə alacaq".
   Onun sözlərinə görə, bu günlərdə Müsavat başqanının səsləndirdiyi fikirlərdən sonra Lalə Şövkətin onun liderliyini qəbul etməsi qeyri-mümkündür: "Keçmişdə Azərbaycan Xalq Cəbhəsi Partiyasının (AXCP) sədri Əli Kərimli İsa Qəmbərin liderliyini qəbul etmirdi, amma Azərbaycan Milli İstiqlal Partiyasının (AMİP) lideri Etibar Məmmədov qəbul edirdi. Müəyyən bir ittifaqları da yaradılmışdı. Ancaq bu gün fərqlidir - AXCP sədri İsa Qəmbərin liderliyini, onunla bir yerdə olmağı daha çox istəyir. Hazırda bunlar, qarşıdan seçkilərin gəlməsinə baxmayaraq, bir-birini ittihamlayır, hətta məhkəməyə də müraciət ediblər. Hətta bu gün irəli sürdükləri ittihamların girovuna çevriliblər".
   

Müsavat Partiyasında başqanlıq uğrunda mübarizəyə qoşulanlar arasında gənclər də var. Belə ki, mətbuatın yazdığına görə, Müsavat Gənclər Təşkilatının sədri Tural Abbaslı da başqanlığa namizəd olmaq iddiasındadır. Onun namizədliyi partiyanın Gənclər Təşkilatı tərəfindən irəli sürülüb.
   Təşkilat sədrinin müavini Əhəd Məmmədli musavat.com saytındakı məqaləsində gənclərin ortaya ciddi mövqe qoymaq niyyətində olduğunu qeyd edib. Məqalədə bu il həm Müsavatda, həm də Azərbaycanda guya ciddi dəyişikliyin olacağı göstərilir və deyilir ki, müsavatçı gənclər qurultaya özlərinin namizədi - təşkilatın sədri Tural Abbaslı ilə getmək niyyətindədir. T.Abbaslının sözügedən məsələdə nə dərəcədə iddialı olub-olmadığını aydınlaşdırmaq üçün onun özü ilə əlaqə saxladıq. Həmsöhbətimiz özü barədə yayılan informasiyanı təsdiqlədi: "Həmin iddia Gənclər Təşkilatının növbəti qurultayda öz namizədilə çıxış etmək qərarından irəli gəlib. Təşkilatımızın Şurasında qurultay və parlament seçkilərinə hazırlıqla bağlı müzakirələr aparılırdı. Bu müzakirələr zamanı Şura belə qərara gəldi ki, İsa Qəmbər namizədliyini verməyəcəksə, Gənclər Təşkilatı heç kimin namizədliyini dəstəkləməsin və öz namizədilə çıxış etsin. Bunun ardınca namizədliklər barədə düşünüldü və sədr olaraq namizədliyimin verilməsi məqsədəuyğun sayıldı. Qurultayda güclü rəqabət aparmaq niyyətindəyik. İsa bəy namizədliyini verməyəcəksə, ondan başqa heç bir namizədi bu və ya digər formada dəstəkləmək fikrində deyilik. Bildiyimiz kimi, İsa Qəmbər və onun komandası 1992-1993-cü illərdə dövləti idarə edəndə də bizim yaşda idilər. Yəni onlar biz yaşda olanda dövləti idarə edirdisə, nədən biz həmin yaşda partiyanı idarə edə bilməyək? İsa Qəmbər postundan gedirsə, deməli yeni sifətlər, yeni simalar gəlməlidir. İsa Qəmbər gedəcək, yerinə başqa funksioner seçiləcəksə, bu tam dəyişiklik olmayacaq. Dolayısı ilə bu yenə də eyni insanların müxalifətdəki simaları olacaq. Bizə belə gəlir ki, İsa Qəmbər də yeni simaların gəlməsində maraqlı olmalıdır. Bu heç də o demək deyil ki, gənclər seçilsə, bütün funksionerlərdən və onların təcrübəsindən vaz keçiləcək. Biz öz namizədliyimizi verərkən elə ona hesablamışdıq ki, İsa Qəmbər, Sülhəddin Əkbər, Arif Hacılı, Vurğun Əyyub kimi insanların siyasi təcrübəsindən istifadə edərək partiya rəhbərliyinə gəlmək istəyirik. Güman edirik ki, şanslarımız da kifayət qədərdir. Azərbaycan cəmiyyəti və müxalifətdə gənclərin sayının kifayət qədər olduğunu nəzərə alsaq, bu halın ictimaiyyət arasında da Müsavatın imicinə müsbət bir xal gətirəcəyini görərik. Müsavat, digər partiyalardan fərqli olaraq, özündə dəyişiklik etmək gücündədir. Namizədlərin şansları barədə danışsaq, mətbuatda bununla bağlı adları hallanan şəxslərdən heç də zəif deyilik. Prosesin içində olan adam kimi deyə bilərəm ki, hələlik hamı bərabərdir. Hələlik təbliğat prosesi başlamadığından hamı bərabərdir. Müsavat kimi demokratik seçkilərin keçirildiyi partiyada öncədən nəyisə proqnozlaşdırmaq mümkün deyil".
   T.Abbaslı, nəinki başqanlıq uğrunda mübarizədə, həmçinin parlament seçkilərində də namizədliyini vermək niyyətindədir: "Gənclər Təşkilatı olaraq, 5-10 nəfər gənc partiya namizədi kimi builki parlament seçkilərinə də qoşulacaq.
   Bu barədə partiya rəhbərliyilə də ilkin razılıq var. Partiyada ilkin siyahı tutulur. Artıq beş nəfər gəncin namizədliyi dairələr üzrə verilib. Nəsimi, Xətai, Qazax, Zəngilan-Qubadlı və Qaradağdan gənclərin namizədliyini irəli sürmüşük. Özüm Nəsimidən namizədliyimi vermək niyyətindəyəm. Ola bilsin, seçkiyə qədər bir neçə nəfər gənc də bura əlavə olunsun. Hamı yeni simaları Marsdan, Kosmosdan gözləyir. Amma əslində yeni simalar köhnə güclü partiyaların içindən çıxmalıdır. Bizim gənclərimiz kifayət qədər siyasi təcrübəsi olan insanlardır".
   

"Xarici ölkələrin xüsusi xidmət orqanlarına işləyən agentlər söhbətini ortaya atanlar da agentdir və zaman-zaman bu kimi oyunlarda özləri də iştirak edirlər.
   Mən isə bu oyunlarda rol almadığım üçün bu barədə danışmaq fikrində deyiləm". Bunu APA-ya açıqlamasında Azərbaycan Milli İstiqlal Partiyasının (AMİP) baş katibi, sədr əvəzi Fuad Muxtarov deyib. O bildirib ki, partiyalar arasında agent axtarmaq köhnə xəstəlikdir və bu xəstəliyi müalicə etməyin bir yolu var ki, o da bu adamların sıradan çıxmasıdır: "Bunların hamısı qəsdən ortaya atılmış fikirlərdir, ictimai diqqəti başqa yerə yönəltmək üçün belə fikirlər səsləndirirlər. Əslində bunlar lazımsız söhbətlərdir. Agent kimdirsə, o həmişə öz oyununu oynayır".
   Baş katib parlament seçkilərində müxalifətin birgə iştirakına tərəfdar olduğunu, lakin hazırda AMİP-in heç bir partiya ilə danışıq aparmadığını söyləyib: "Bu istiqamətdə konkret addım atılmayıb. Bizimlə rəsmi danışıq aparılmayıb. Biz də danışıqlar üçün hələ qəti qərar verməmişik, amma danışıqların aparılmasında maraqlıyıq. Bu məsələləri masa arxasında əyləşib müzakirə etmək lazımdır".
   

Azərbaycan deputatlarının Dağlıq Qarabağa səfəri gözlənir. "Hazırda Dağlıq Qarabağa gedəcək nümayəndə heyətinin tərkibinin genişləndirilməsi istiqamətində müzakirələr aparılır.
   Səfərin tarixi barədə, hələ ki, dəqiq razılaşma yoxdur". Bu sözləri şənbə günü Trend News-a millət vəkili Rövşən Rzayev bildirib. Rzayevin sözlərinə görə, deputatlarla yanaşı, Dağlıq Qarabağa ictimaiyyət nümayəndələrindən ibarət qrupun da səfəri nəzərdə tutulur.
   Azərbaycan və Ermənistan parlamentlərinin üzvləri bundan əvvəl Rusiyanın paytaxtı Moskva şəhərində görüşmüşdülər. Növbəti belə bir görüşün başqa dövlətin ərazisində keçirilməsinə gəldikdə, Rzayev deyib ki, onlar belə görüşlərin yalnız Dağlıq Qarabağda keçirilməsinə maraqlıdır və bunun üçün səylərinin davam etdirəcəklər.