İstanbulun "Qalatasaray" klubunun baş məşqçisi Frank Raykard məhkəməyə veriləcək. Apasport.az saytının məlumatına görə, onun barəsində "Antalyaspor"un oyunçusu Yalçın Ayhan məhkəmə qarşısında iddia sürmək niyyətindədir.
   Gənc oyunçunu belə addımı atmağa məcbur edən Raykardın yalan danışmasıdır.
   Məsələ burasındadır ki, "Antalyaspor" - "Qalatasaray" matçında qonaqların üzvü Co ciddi zədələnib. Raykard isə oyundan sonra mətbuata verdiyi açıqlamada bildirib ki, Conun sıradan çıxmasında Yalçın Ayhan günahkardır. Halbuki həmin epizodda Ayhan "Qalatasaray" futbolçusunun yanında olmayıb.
   "Həmin epizodda mənim başqa mövqedə olduğumu hamı gördü. Ancaq Raykard məni günahlandırdı. Sonradan həqiqətin üzə çıxmasına baxmayaraq, o, heç nə demədi. Mən də haqqımı məhkəmədə axtaracağam. Qarşı tərəfdən maddi və mənəvi təzminat tələb edəcəyəm" - deyə "Antalyaspor"un üzvü vurğulayıb. Ayhan lazımi sənədləri topladığını və vəkilinin gələn həftə məhkəməyə müraciət edəcəyini də söyləyib.

Futbol üzrə Rusiya millisinin baş məşqçisi iş yerini Türkiyəyə dəyişmək haqda qərarının təfərrüatlarından danışıb.
   Milli.Az xəbər portalının məlumatına görə, ölkəsinin "NOS TV" televiziyasına müsahibəsində o, bir çox ölkələrdən işləmək üçün təklif aldığını, lakin Türkiyə təmsilçilərinin məsələyə daha ciddi yanaşdıqlarını söyləyib: "Türkiyə nümayəndələri çox alicənab və səmimi olduqları üçün məni təsirləndirə bildilər".

Ötən həftə Superliqada "Manisaspor"la oyundan sonra "Fənərbaxça"nın paltardəyişmə otağında dava düşməsi barədə xəbərlər yayılıb. Qol.Az-ın Türkiyə mətbuatına istinadən verdiyi məlumata görə, Əmrə Belazoğlu buraxılan qollarda günahkar hesab etdiyi Kristian, Bilica və Santosun üzərinə gedərək, onların üstünə bərk qışqırıb. Daha sonra mübahisəyə kapitan Aleks də qoşulub. Sonda futbolçuları yalnız araya girən baş məşqçi Kristof Daum sakitləşdirməyi bacarıb. Almaniyalı mütəxəssis bu hadisəyə görə mübahisədə iştirak edən oyunçuların hər birinə ciddi xəbərdarlıq edib.

İtaliyanın "Yuventus" klubunun və İtaliya yığma komandasının əsas qapıçısı sayılan Canluici Buffon zədələnib. Ayağından zədə alan Buffonun təxminən 1 ay yaşıl meydanlardan kənarda qalacağı bildirilir. Qapıçı Turin klubunun heyətində İtaliya çempionatı və UEFA Avropa Liqası qarşılaşmalarında iştirak edə bilməyəcək. O həmçinin 3 mart tarixində İtaliya millisi ilə Kamerun yığması arasında oynanılacaq yoldaşlıq görüşündə də forma geyinməyəcək.
   

"Fənərbağça" klubunun mövsümün sonunda heyətindən kənarlaşdıracağı 4 futbolçunun adı bəlli olub. Milli.Az xəbər portalının Türkiyənin "Fotomaç" qəzetinə istinadən verdiyi məlumata görə, bunlardan birincisi Dəniz Barışdır. Maraqlıdır ki, Daum onu heyətdə saxlamaq istəsə də, klub rəhbərliyi Dənizlə müqaviləni uzatmağı düşünmür. Əli Bilgin, Bekir və Səlcuq isə Daumun göndərilmələrinə "hə" dediyi digər isimlərdir.
   

Peşəkar Futbol Liqasının (PFL) prezidenti Ramin Musayev Azərbaycan yığmasının baş məşqçisi Berti Foqtsun Unibank Premyer Liqasında 22-ci turun oyunları haqda fikirlərinə münasibət bildirib. R.Musayev Lent.az-a açıqlamasında Berti Foqts üçün yaxşı ürək və göz həkimi tapdığını vurğulayıb.
   Foqts son oyunlara baxanda ürəyinin və gözlərinin ağrıdığını söyləyib. O, yaxşı ürək və göz həkimi axtardığını, amma tapa bilmədiyini açıqlayıb. PFL prezidenti isə almaniyalı mütəxəssisin fikirlərinə belə reaksiya verib: "Mən həkim tapmışam. Maştağada yaxşı həkim var. Amma bilmirəm o, kömək edə bilər, ya yox".
   R.Musayev Unibank Premyer Liqasında oyunların keyfiyyətinin aşağı olmadığını əlavə edib: "Məgər onun izlədiyi "Neftçi" - "Xəzər-Lənkəran" matçı pis keçdi? Gərgin oyun keçmədi? Qol vurulmayıbsa, PFL nə etsin? Gələn dəfə xahiş edərik, hərəsi bir qol vurar".
   

Dünən keçirilən daha 2 oyunla Çempionlar Liqasının 1/8 final mərhələsinin ilk görüşlərinə yekun vurulub. Lent.az-ın məlumatına görə, Rusiyanın MOİK klubu İspaniyanın "Sevilya" komandasına məğlubiyyətdən qurtulmağı bacarıb.
   İtaliya "İnter"i isə İngiltərə "Çelsi"silə qarşılaşmadan qalib ayrılıb. "İnter"in hazırkı baş məşqçisi Joze Mourinyo keçmiş komandasını məyus etməyə müvəffəq olub:
   MOİK (Rusiya) - "Sevilya" (İspaniya) - 1:1
   "İnter" (İtaliya) - "Çelsi" (İngiltərə) - 2:1
   Cavab görüşləri martın 16-da olacaq.
   1|8 final mərhələsinin ilk görüşləri çərçivəsində bundan əvvəl keçirilən 6 oyunda qeydə alınan nəticələr:
   "Milan" (İtaliya) - "Mançester Yunayted" (İngiltərə) - 2:3
   "Lion" (Fransa) - "Real" (İspaniya) - 1:0
   "Bavariya" (Almaniya) - "Fiorentina" (İtaliya) - 2:1
   "Portu" (Portuqaliya) - "Arsenal" (İngiltərə) - 2:1
   "Ştutqart" (Almaniya) - "Barselona" (İspaniya) - 1:1
   "Olimpiakos" (Yunanıstan) - "Bordo" (Fransa) - 0:1.
   

"Mançester Siti" klubunun futbolçusu Ueyn Bric İngiltərə yığma komandasından rəsmən imtina edib. "Çox təəssüf edirəm ki, belə bir qərar qəbul etmişəm. Ancaq bu, mənim qəti fikrimdir.
   Bir daha yığma komandada çıxış etməyəcəm", - deyə Ueyn Bric bildirib.
   Xatırladaq ki, Ueyn Bric İngiltərə yığmasında çıxış edən və zədə səbəbindən sıradan çıxan Eşli Koulun yerinə əsas namizəd sayılırdı.
   

"Simurq" klubunun prezidenti Zaur Məmmədov Supersport.Az-a müsahibəsində Unibank Premyer Liqasında danışılmış oyunlar olduğunu bəyan etmişdi.
   Bu məsələyə münasibət açıqlayan Peşəkar Futbol Liqasının rəhbəri Ramin Musayev bildirib ki, danışılmış oyunların olduğundan söhbət gedə bilməz: "Belə şey olsaydı, həmin komandaları ciddi cəzalandırardıq. Bu yerdə ataların "Elin gözü tərəzidir" məsəlini yada salmaq istərdim". PFL prezidenti "Əgər Zaur Məmmədovun əlində fakt varsa, açıqlasın" fikrini səsləndirib.