Bakının "Neftçi" klubunu müvəqqəti olaraq çalışdıracaq məşqçilərin adı bəlli olub.
   Klubdan ANSPRESS-ə verilən məlumata görə, "Neftçi"ni önümüzdəki rəsmi qarşılaşmalara artıq vəzifəsindən istefa vermiş Vaqif Sadıqovun köməkçiləri - Şakir Qəribov və Arif Əsədov çıxaracaqlar.
   Xatırladaq ki, "Neftçi"nin baş məşqçisi Vaqif Sadıqov komandasının "İnter"ə 0:1 hesablı məğlubiyyətindən sonra istefa vermişdi.

Futbol üzrə Belarus və Ermənistan yığma komandaları arasında yoldaşlıq görüşü keçiriləcək. Hər iki ölkənin Futbol Federasiyaları yoldaşlıq görüşünün Türkiyənin Antalya şəhərində oynanılması haqqında razılığa gəliblər.
   Belarus - Ermənistan matçı Antalya şəhərinin "Atatürk" adına stadionunda oynanılacaq. Yoldaşlıq oyunu martın 3-də keçiriləcək.
   Xatırladaq ki, Ermənistan yığma komandası yoldaşlıq oyununda görüşmək üçün Latviya və Kipr millisinə də dəvət göndərmişdi. Ancaq bu yığmalar Ermənistan millisi ilə yoldaşlıq görüşü keçirməkdən imtina etmişdilər.

Türkiyə millisi və "Qalatasaray"ın müdafiəçisi Sərvət Çətinin Rusiya çempionu "Rubin"ə keçəcəyinə dair xəbərlər artmaqdadır.
   "Fotomaç" qəzetinin yazdığına görə, artıq məsələ həllini tapıb və gələn həftənin əvvəli Sərvət "Rubin"lə 2 illik müqavilə imzalayacaq. Məlumata görə, Rusiya klubu ilə "Qalatasaray" rəhbərliyi arasında aparılan danışıqlarda razılıq əldə olunub. Sərvət isə ruslarla daha əvvəl razılaşıbmış. Məlumata görə, klubu müdafiəçinin satışından 6 milyon 740 min avro əldə edəcək. Sərvətin qazancı isə 2 milyon avro olacaq.

"Qalatasaray" klubunun çexiyalı futbolçusu Milan Baroşun yaşıl meydanlara dönəcəyi tarix dəqiqləşib.
   Çexiyalı hücumçunun fevralın 28-də Türkiyə çempionatının növbəti turu çərçivəsində "Kasımpaşa" ilə oyunun ikinci hissəsində meydana çıxacağı gözlənilir. Milan Baroş artıq 3 həftədir ki, kollektivlə birlikdə məşqlərdə iştirak edir. Baş məşqçi Frank Raykard artıq futbolçunun formasını bərpa etmək üzrə olduğunu düşünür. Xatırladaq ki, Milan Baroş Türkiyə çempionatının X turu çərçivəsində "Fənərbaxça" ilə matçda zədələnərək meydandan çıxmışdı.

"Premyer Liqanın son turunun oyunlarına baxanda ürəyim də ağrıdı, gözlərim də. Yaxşı ürək və göz həkimi axtarıram, amma tapa bilmirəm". Fanat.az xəbər verir ki, bu sözləri İordaniyanın Əmman şəhərində keçirdiyi mətbuat konfransında milli komandamızın baş məşqçisi Berti Foqts deyib. Alman məşçi AVRO-2012-nin seçmə mərhələsinə hazırlıqla bağlı da danışıb: "Deməzdim ki, bizdə artıq əsas heyət var. İndidən AVRO-2012-nin oyunlarına hazırlaşırıq. İlk oyunumuza 6 ay vaxt qalıb. Sentyabrda Almaniya ilə, bir ay sonra isə Avstriya ilə oynayacağıq. Hazırlaşırıq və həmin oyunlara daha hazırlıqlı futbolçularla çıxacağıq".

İtaliyanın "İnter" klubunun portuqaliyalı baş məşqçisi Joze Mourinyo bildirib ki, o, vaxtilə İngiltərə millisinin sükanı arxasına keçmək haqda təklif alıbmış.
   İtaliya mətbuatının yazdığına görə, Mourinyo bu təklifi "hər gün məşqə çıxmaq istədiyi" üçün qəbul etməyib: "Mən İngiltərə millisinin baş məşqçisi ola bilərdim. Bu təklifi alan zaman bir tərəfdən onu qəbul etməyi çox istəyirdim. Digər yandan isə mən komanda ilə hər gün işləməyi xoşlayıram".
   

Türkiyənin "Fənərbaxça" klubu növbəti mövsümdə heyətini "Sanderlend"in forvardı Markus Bentlə gücləndirmək fikrindədir. "Sanderlend" bu futbolçuya görə, 15 milyon funt sterlinq istəyir.
   Futbolçunun özünün də İngiltərədən kənarda futbol oynamağın əleyhinə olmadığı bildirilir. Xatırladaq ki, Bent bu mövsüm forma geyindiyi 26 matçda 15 qol vurub.
   

Bu gün Avroliqanın 1/16 final mərhələsinə yekun vurulacaq. Apasport.az saytının məlumatına görə, cavab görüşləri son 15 qalibin adını müəyyənləşdirəcək. Artıq 1/8 finalda rəqibini gözləyən Portuqaliyanın "Benfika" klubunun uğurunu davam etdirməyə 30 iddiaçı arasında Türkiyənin ən titullu klubları - "Qalatasaray"la "Fənərbaxça" da var.
   Özü də hər iki İstanbul təmsilçisinin növbəti mərhələyə çıxmaq şansı yüksəkdir. İspaniyadan sərfəli nəticə ilə dönən "Qalatasaray"a "Atletiko" ilə cavab görüşündə mərhələ keçmək üçün qolsuz heç-heçə də kifayətdir. "Fənərbaxça"ya isə Fransanın "Lill" klubu ilə ev oyununda istəyinə çatmaq üçün 1:0 hesablı qələbə də yetərlidir. Düzdür, Kristof Daumun çalışdırdığı komandanın Superliqanın son turunda "Bursaspor"la öz meydanında keçirdiyi görüşdə hesabda 2:0 irəlidə olduğu halda, sonradan üç qol buraxıb, məğlub olması azarkeşlərdə narahatlıq yaradır. Hər halda, "Fənərbaxça" bundan nəticə çıxarıb, prinsipial rəqibi "Qalatasaray" kimi 1/8 finala çıxmaq şansından maksimum yararlanmalıdır. Turnirdə azarkeşlik etdiyimiz digər komanda olan "Tvente"nin də növbəti mərhələyə çıxmaq üçün yaxşı şansı var. Hər halda, milli komandamızın hücumçusu Vaqif Cavadovu qış fasiləsində transfer edən Hollandiya klubu UEFA kubokunun ötən ilki finalçısı olan "Verder"i mübarizədən kənarlaşdırmağa yaxındır. "Tvente"yə bunun üçün Almaniyada istənilən heç-heçə, hətta minimal hesablı məğlubiyyət də yarayır. Komandanın baş məşqçisi Stiv Maklaren zədə üzündən iki aylıq itirdiyi Vaqifin Avroliqada oynadığı üçün də xidmətindən istifadə edə bilmir.
   25 fevral
   22:00. "Anderlext" - "Atletik" (İlk oyun - 1:1)
   22:00. "Marsel" - "Kopenhagen" (1:1)
   22:00. "Roma" - "Panatinaikos" (2:3)
   22:00. PSV Ü-"Hamburq" (0:1)
   22:00. "Qalatasaray" - "Atletiko" (1:1)
   22:00. "Şaxtyor" - "Fulhem" (1:2)
   22:00. "Unirea" - "Liverpul" (0:1)
   00:05. "Sportinq" - "Everton" (1:2)
   00:05. "Valensiya" - "Brügge" (0:1)
   00:05. "Yuventus" - "Ayaks" (2:1)
   00:05. "Verder" - "Tvente" (0:1)
   00:05. "Volfsburq" - "Vilyareal" (2:2)
   00:05. "Zalsburq" - "Standard" (2:3)
   00:05. "Hapoel" - "Rubin" (0:3)
   00:05. "Fənərbaxça" - "Lill" (1:2)
   Qeyd edək ki, oyunların başlama saatı Bakı vaxtı ilə göstərilib.
   

Yaxınlarda Rusiya çempionu "Rubin"lə müqavilə imzalayan Araz Abdullayev Almaniyanın "Hoffenhaym" klubuna keçə bilərmiş. Azerisport.az saytı xəbər verir ki, Azərbaycan yığmasının baş məşqçisi Berti Foqts keçidin real olduğunu söyləyib, amma son anda bunun nə üçün baş tutmadığını bilmir.
   "Hoffenhaym" Araza real müqavilə təklif edirdi. Bilmirəm, nə baş verdi və tərəflər razılığa gələ bilmədilər. Hər halda, almanlar bu futbolçunun xidmətində maraqlı idilər. Onu da başa düşə bilmirəm ki, bu futbolçu niyə "Neftçi"də ehtiyatda qalırdı", deyə Foqts bildirib.
   

UEFA-nın Nizam-İntizam Komitəsi 3 hakimin danışılmış oyunlarda iştirakını sübuta yetirərək onları diskvalifikasiya edib. Bosniya və Herseqovina təmsilçisi olan Novo Paniçu ömürlük futbol qarşılaşmalarını idarə etməkdən məhrum edilib.
   Xorvatiyalı laysman Tomislav Şetka 2011-ci ilin 30 iyun tarixədək diskvalifikasiya edilib. Ukraynalı Oleq Orexov isə bir ay cərimə olunub.