Bütün dünyada kənd təsərrüfatı sahəsi rentabelli olmadığına görə, sözügedən sektora dövlət büdcəsindən müəyyən həcmdə subsidiyalar ayrılır. Ona görə ki, bu sahədə əlavə subsidiya olmadan rentabelli nəticə əldə etmək mümkün deyil.
   Azad bazar iqtisadiyyatının ən yüksək səviyyədə inkişaf etdiyi ABŞ-da, Qərbi Avropa ölkələrində belə kənd təsərrüfatı məhsullarının istehsalı ilə məşğul olanlara miqdarı 10 milyardlarla ölçülən subsidiyalar verilir. Azərbaycan Fermerlər İttifaqının sədri Sadıq Murtuzəliyev mətbuata verdiyi açıqlamasında bildirib ki, fermer təsərrüfatlarına verilən subsidiyaların həcmi artırılmalıdır. Bununla yanaşı, S.Murtuzayevin açıqlamasında diqqəti çəkən məqam ondan ibarətdir ki, o, təkcə taxıl məhsullarına görə subsidiyaların verilməsini düzgün hesab etmir: "Taxıl istehsalı ilə yanaşı, digər strateji məhsul kimi, pambıq, çay, kartof yetişdirənlərə də əlavə ödənişlərin edilməsi məqsədəuyğundur. Hesablamalara görə, yuxarıda sadalanan strateji məhsul istehsalçılarına hər hektara 120 manat, digər aqrar məhsul istehsalçılara isə hər hektara 60 manat verilməsi onların problemlərinin həllinə öz töhfəsini verir". Kənd təsərrüfatı üzrə mütəxəssis Vahid Məhərrəmov hesab edir ki, ümumilikdə Azərbaycanda kənd təsərrüfatı sektoruna ayrılan subsidiyanın həcmi çox cüzidir. Onun sözlərinə görə, hətta bu subsidiyalar təyinati üzrə çatsa belə, yenə faydası olmayacaq: "Aqrar sahədə ciddi problemlər mövcuddur. Belə ki, bu sahədə reallıqla potensialımız arasında 3 dəfə fərq var. Bizim fermerlərin, kəndlilərin əlində olan vəsait imkan vermir ki, mövcud potensiala uyğun olaraq yüksək məhsuldarlığa nail olaq. Bunun üçün kifayət qədər böyük həcmdə subsidiyalar lazımdır. Hətta sovet dönəmində belə, 60 qəpiyə başa gələn südü 10 qəpiyə satırdılar. Bunu o vaxt ona görə edirdilər ki, arada olan fərqi kəndliyə ödəmək vacib idi. Ona görə ki, maya dəyəri baha başa gələn südü alıcıya baha satmaq mümkün deyildi. Bu təkcə sovetlərdə deyil, bütün dünyada belədir. Bu gün Avropa Birliyi ölkələrinin hər bir vətəndaşının payına düşən subsidiyanın miqdarı 1000 avrodur. Bizdə isə heç 10 manat təşkil etmir. Görün fərq nə qədər böyükdür. Fərqin böyük olmasına görə AB ölkələrinin istehsal etdiyi məhsul həm keyfiyyətinə, həm də kəmiyyətinə görə bizim istehsal etdiyimiz məhsuldan qat-qat üstündür. Azərbaycan aqrar ölkə olduğu üçün və neftdən əldə etdiyimiz gəlirlər imkan verir ki, strateji əhəmiyyətli kənd təsərrüfatı sahələri böyük həcmdə subsidiyalaşdırılsın. Azərbaycan əhalisinin tən yarısı, yəni 48 faizdən artığı kənddə yaşayır. Kənddə yaşayanların imkanları məhdud olduğuna görə, bu sahəyə yardımlar artırılmalıdır".
   V.Məhərrəmovun fikrincə, ölkələr arasında kənd təsərrüfatı məhsullarının strateji əhəmiyyətinə görə yanaşma müxtəlifdir. Bu baxımdan o, kartofçuluğa, pambıqçılığa və çayçılığa strateji məhsul kimi yanaşmağın düzgün olmadığını bildirdi: "Azərbaycanda strateji kənd təsərrüfatı məhsulu taxılçılıqdır. Taxılçılıq ona görə strateji kənd təsərrüfatı məhsuludur ki, biz bu məhsulla çörəyə olan istehlak tələbatımızı ödəməliyik. Həmçinin, taxıldan yemçilikdə istifadə olunduğu üçün, heyvandarlıq sahəsində məhsuldarlığı artırmaq mühüm əhəmiyyət kəsb edir. Pambıqçılıq, çayçılıq və kartofçuluq mühüm əhəmiyyət kəsb edən sahə hesab olunsa da, strateji əhəmiyyətli sahə hesab oluna bilməz. Bu fərdlərin təxəyyüllüdür. Sovet dövründə pambıqçılıq ona görə strateji kənd təsərrüfatı məhsulu hesab olunurdu ki, həmin məhsuldan hərbi sənayedə istifadə olunurdu. Ancaq buna baxmayaraq, sözügedən sahələri dirçəltmək üçün yardımlar edilməlidir. Müqayisə üçün qeyd edim ki, sovet dövründə Azərbaycanda 30 min ton çay istehsal edilirdisə, indi bu rəqəm 300 tona düşüb. Göründüyü kimi, çayçılıqda azalma 100 dəfəyə çatıb. Bu qədər azalma bizdə subsidiyanın yetərli səviyyədə olmamağı ilə əlaqədardır. Sənaye məhsulu ilə kənd təsərrüfatı məhsullarının istehsal prosesində fərqlər var. Çünki sənaye müəssəsi qapalıdır. Eyni zamanda, sənaye müəssisəsində texnika, mexanizmlərin sayəsində istehsal olunan məhsulun maya dəyərini aşağı salmaq imkanı daha böyükdür, nəinki kənddə açıq şəraitdə bunu etmək. Həmçinin, kənddə istehsal prosesi mürəkkəb olduğuna görə bu mümkün deyil. Çünki kəndlinin istehsal etdiyi məhsulu uzun müddət saxlamağa şəraiti yoxdur. Uzun müddət saxlamaq istəyəndə məhsul xarab olur. Ona görə də tez və ucuz satmaq məcburiyyətində qalır. Hər hektara görə 120 manat subsidiya əsla yetərli rəqəm sayıla bilməz".
   

"Azərbaycan Dəmir Yolları" QSC-də iki sədr müavinin postu ixtisar edilib. Bu barədə "APA-Economics"ə "Azərbaycan Dəmir Yolları" QSC-nin mətbuat xidmətinin rəisi Nadir Əzməmmədov məlumat verib.
   N.Əzməmmədovun sözlərinə görə, Səhmdar Cəmiyyətin Nazirlər Kabineti tərəfindən fevralın 15-də təsdiqlənmiş nizamnaməsi ilə qurumda struktur islahatları aparılıb. Belə ki, kadr və sosial məsələlər üzrə müavin və yol-tikinti işləri üzrə müavin postları ləğv edilib. N.Əzməmmədov vurğulayıb ki, ləğv edilmiş yol-tikinti işləri üzrə müavin Mehdi Mehdiyev ilə kadr sosial məsələlər üzrə sabiq müavin Xeyrulla Hümbətovun yaxın günlərdə başqa bir vəzifəyə təyinatı nəzərdə tutulur. Xatırladaq ki, islahatlar nəticəsində "Azərbaycan Dəmir Yolları" QSC-nin sədr müavinlərinin sayı 6-dan 4-ə endirilib. Digər müavinlər vəzifəsində isə Əlirza Süleymanov, Qurban Nəzirov, Etibar Niftəliyev və İqbal Hüseynov çalışır.
   Qeyd edək ki, X.Hümbətov Yeni Azərbaycan Partiyası "Azərbaycan Dəmir Yolları" QSC təşkilatının rəhbəridir.
   
   

Dünən Ağır Cinayətlərə Dair İşlər üzrə Məhkəmədə radikal dini təmayüllü dəstə yaradaraq, beynəlxalq terrorçu şəbəkə ilə əlaqədə və digər bir sıra ağır cinayətlərdə ittiham olunan 31 nəfər Azərbaycan vətəndaşından ibarət mütəşəkkil dəstənin cinayət işi üzrə məhkəmə baxışı davam etdirilib.
   APA-nın xəbərinə görə, hakim Azər Orucovun sədrliyilə keçirilən prosesdə zərəçəkənlər ifadə verib. Zərərçəkənlər Qaib Tanrıverdipur, onun qardaşı Seymur Tanriverdipur və İlham Əmirli Sumqayıtda valyutadəyişmə məntəqəsinin işçilərinə edilən basqınla bağlı ifadə veriblər. Hadisə nəticəsində yaralandıqlarını deyən zərərçəkənlər basqında 3 nəfərin iştirak etdiyini söyləyib. Sonra proses digər zərərçəkənlərin ifadələrilə davam etdirilib.
   Təqsirləndirilən Asif Əmikişili isə çıxşında KİV-də onlarla bağlı yer alan yazılara münasibətini bildirib. A.Əmikişili deyib ki, onların radikal vəhhabi adlandırılması ilə razı deyil: "Bizə vəhhabi, radikal dindar deyirlər. Bunlarla razılaşmıram. Biz sadəcə müsəlmanıq". Proses martın 2-də davam etdiriləcək.
   

Tərtər və Bərdə sakinlərinin verdiyi məlumata görə, qış girəndən adıçəkilən rayonların əksər kəndlərinin hələ də qazlaşdırılmaması, yolların bərbad durumda olması, su qıtlığı və sair məsələlər üzündən yerli əhali çox əziyyət çəkir.
   Qazsız kəndlərdə ağacların doğranaraq yanacaq kimi istifadə edilməsi üzündən ekologiyaya hələ də ciddi zərər dəyir. Təkcə Bərdədə 90 kənddən yalnız 20-yə qədərində təbii qaz var. Bərdənin bəzi məktəbləri istilik sistemilə təchiz olunmadığından, şagirdlərlə yanaşı, müəllimlərin də dərsə davamiyyəti zəifləyib. ("OLAYLAR"İA) Məsələn, şəhid Habil Məmmədovun adını daşıyan Böyük Göyüşlü kənd orta məktəbində sinif otaqlarının qızdırılması orada təhsil alan 265 şagirdin hesabına həyata keçirilir. Yəni məktəbdə təhsil alan hər bir uşaqdan yanacaq üçün ayda 9 manat alınır. Bu qış havalar şaxtalı keçdiyindən, Tərtərdə də dərsə davamiyyətin zəiflədiyi bildirilir. Sözügedən rayonlar sutkada 18 - 19 saat elektrik enerjisilə təmin olunsa da, naqillərin təzələnməsi, elektrik dirəklərinin dəyişdirilməsi və s. problemlər hələ də qalır. Tərtərin bəzi kəndlərində, məsələn, Seydimli kəndindəki elektrik dirəkləri və naqilləri 1970-ci illərin yadigarıdır. Onlardan bəziləri yararsız hala düşsə də, istismar müddətini başa vursa da, hələ də dəyişdirilməyib. Tərtər və Bərdənin əksər kəndlərində axşamlar zülmət qaranlıq hökm sürür. Təkcə kənd yollarında deyil, hətta əksər həyətlərdə də gecələr lampalar yandırılmır. Evlərə sayğac qoşulduğundan, kimsə elektrik enerjisindən artıq istifadə etmək və əlavə işıqpulu ödəmək istəmir. Bu səbəbdən də axşam saat 21:00 - 22:00 radələrindən sonra lampalar söndürülür. Zülmət qaranlıq üzündən buzlu və kələ-kötür yollarda hərəkət edən piyadalar arasında zədələnənlər, xəsarət alanlar var. Yerli sakinlər deyir ki, kəndlərdəki yol kənarlarında olan elektrik dirəklərinə lampaların qoşulması və yandırılması üçün bütün xərcləri rayonun elektrik şəbəkəsi ödəsə, problem xeyli azalar. ("OLAYLAR"İA)
   Tərtər və Bərdədəki bəzi yaşayış massivlərində içməli və suvarma suyu ilə də bağlı çətinlik yaranıb. Tərtərdə və Bərdədə yerli əhalini su ilə təmin edən əsas mənbə Tərtər çayı olsa da, xeyli çökəklikdə yerləşən çayın suyundan tam istifadə mümkünsüzdür. Üstəlik, bu çay mənbəyini Sərsəng Su Anbarından götürdüyündən, ermənilər onun qarşısını kəsərək suyu həmin anbara yığır. Ona görə də hər iki rayonda su qıtlığı yaranıb. Əkin və həyətyanı sahələrin suvarılması xeyli müşkülləşir. Yaranmış problem rayonda kənd təsərrüfatına, məhsuldarlığa ciddi zərbə vurmaqda davam edir. Məlum səbəbdən sözügedən rayonların ərazisindən axan xırda çayların sularına tələbat artır. Amma onların suyundan da səmərəli istifadə etmək qeyri-mümkündür. Çünki həmin rayonların bütün kəndlərinin əhalisinin içməli su ilə təmin edilməsi, əkin sahələrinin suvarılması üçün bu çayların suları çox azdır. Bərdə və Tərtərin əksər ərazilərində köhnə və yeni artezian quyuları olsa da, elektrik enerjisinin çatışmazlığı üzündən onlardan tam istifadə xeyli çətinləşib.

Azərbaycan Milli Məclisinin Mədəniyyət komitəsinin sədri Nizami Cəfərov APA-ya müsahibəsində Adlar və Soyadlar üzrə Xüsusi Komissiyanın maraqlı araşdırmaları barədə məlumat verib.
   - Sizin adınız yüzlükdə neçənci yerdədir?
   - Mənim adım 63-cü yerdədir. Bu o deməkdir ki, hazırda ölkədə 13374 Nizami var.
   - Populyar qadın adlarını necə, müəyyənləşdiribsiniz?
   - Bəli, bu gün Azərbaycanda ən populyar qadın adı Sevincdir. İndi ölkədə 46937 Sevinc var. Bundan başqa, 40215 Günel, 35395 Leyla, 35276 Aygün, 35138 Günay, 31675 Sevda, 31453 Vüsalə, 31308 Könül, 29956 Təranə, 28600 Samirə adlı xanım var. Bu statistikanı da XIX əsrin sonu, XX əsrin əvvəllərilə müqayisə etsək, fərqlilik görərik. Həmin vaxt daha çox Zeynəb, Fatimə, Zübeydə və digər adlara rast gəlinirdi. Ötən əsrin 40-cı 50-ci illərində ən populyar qadın adı Cəfər Cabbarlının eyni adlı əsərinə görə Sevil idi. İndi isə Sevil adı 32-ci yerdədir və bu gün ölkədə 21077 bu adı daşıyan insan var. Biz bu məsələdən sonra advermənin sosial-psixoloji tərəfini də izah edə bilərik. Adətən ailənin ilk övladı qız olanda onun adını Sevinc qoyurlar. Və ya bir neçə oğlandan sonra doğulan qıza Sevinc adı verilir.
   - Yəqin ad və soyadı eyni olanlar da çoxluq təşkil edər?
   - Bu məsələ də araşdırılıb. Bu gün Azərbaycanda 3055 Məmmədova Sevinc var. 2951 Əliyev Əli, 2558 Məmmədova Günel, 2435 Məmmədov Məmməd, 2419 Əliyeva Sevinc, 2381 Məmmədov Elçin, 2299 Məmmədov Əli, 2281 Məmmədova Aygün, 2260 Məmmədova Günay, 2192 Məmmədova Sevda var. Göründüyü kimi, Məmmədov və Məmmədova soyadları çox təkrar olunur. Bu, eynilə ən populyar soyadı da müəyyən edir. Deməli, ən populyar soyadlar Məmmədov, Əliyev, Hüseynov, İsmayılovdur.
   - Adınız Yazıçılar Birliyinə sədr olacaq şəxslər sırasında hallanır...
   - Mən bunu istəmirəm. Bu heç vaxt ağlıma gələ bilməz. Əvvəla, həqiqətən də Yazıçılar Birliyini dövrün mürəkkəbliyindən, problemlərdən Anar çıxarıb. Bu gün Yazıçılar Birliyi yaşayırsa, birinci növbədə ümummilli liderimizə borcluyuq ki, bu təşkilat üçün bütün şəraiti yaradıb. Anar isə, dediyim kimi, bu qurumu böhrandan çıxarıb. Hesab edirəm ki, Anar bu işi sonsuza qədər davam etdirməlidir. Ancaq ortaya çıxan müəyyən iddiaları da təbii hesab edirəm. Hər bir qələm sahibinin ixtiyarı var ki, bu iddiaya düşsün və sədr seçilsin. Bu iddiaya görə kimisə qınamaq düzgün deyil. Ancaq mən səs verəsi olsam, birinci növbədə Anara səs verərəm.

Ölkəmizin şimal-qərbində yerləşən Balakən, sərhəd rayonu olmaqla yanaşı, gözəl təbiəti, münbit torpaqları, mülayim iqlimilə seçilir. Tanrı bu bölgəyə zənginlik barədə çox əliaçıqlıq edib. Lakin son illərdə bu bölgə əhalisinin, xüsusilə gənc nəslin səhhətində əmələ gələn çətinlikləri təbiətə vurulan ziyanla, filiz mədənlərində istehsalat təhlükəsizliyinin təmin edilməməsilə əlaqələndirirlər.
   Bəziləri ağır xəstəliklərin yaranmasında, hətta Qəbələ radiolokasiya stansiyasının buraxdığı şüaların mənfi təsirini ön plana çəkir. Səbəblərindən asılı olmayaraq, son dövrlərdə rayonda leykemiya (ağ qan xərçəngi) xəstəliyinə düçar olanların sayı xeyli artıb. Uşaqlar arasında bu xəstəlikdən ölüm halları da baş verib.
   Dövlətimiz, şəxsən prezident İlham Əliyev Balakənin sosial-iqtisadi inkişafına böyük qayğı göstərir. Əhalinin sağlamlığının səviyyəsini yüksəltmək məqsədilə son illərdə rayon mərkəzində yeni xəstəxana binası istifadəyə verilib, bu səhiyyə ocağı müasir tibbi avadanlıqlarla təchiz edilib. Əhali bu qayğıdan çox razı qalmaqla yanaşı, yeni təhlükəli xəstəliyin yaranmasından ciddi təşviş hissləri keçirməyə başlayıb. Səhiyyə Nazirliyinin rəhbərliyi möhkəmləndirildikdən sonra ölkədə qorxulu xəstəliklərə qarşı mübarizə xeyli gücləndirilib, xəstəliklərin artma səviyyəsi və arealı barədə məlumatların ört-basdır edilməsi kimi biabırçı hallara son qoyulub. Balakən rayonunda səhiyyə sahəsində müəyyən dəyişikliklər baş versə də, yeni qorxulu xəstəliklərin qarşısının alınması sahəsindəki işləri qənaətbəxş hesab etmək olmaz. Təəssüflə qeyd etmək lazımdır ki, valideynlərin böyük həyəcanına baxmayaraq, rayon mərkəzi xəstəxanasının rəhbərliyi, nədənsə, vəziyyətə adekvat qiymət vermək istəmir. Problem elə şəkil alıb ki, Səhiyyə Nazirliyi işə qarışmasa, bu mərəzin qarşısının alınması xeyli çətinləşə bilər. Rayon mərkəzi xəstəxanasının baş həkimi Akif Uluxanov bu gün həyəcan təbili çalmırsa, rayona mərkəzdən güclü mütəxəssislər dəvət etməsə əhalinin sağlamlığının mühafizəsində daha ciddi vəziyyətlər yarana bilər.
   Elə etmək lazımdır ki, kömək gecikməsin, valideynlər "uşaqlarımızın həyatını xilas edin" şüarı ilə möhtərəm Prezidentə müraciət etmək məcburiyyətində qalmasın.
   Səhiyyə naziri, dioqnostika sahəsində görkəmli mütəxəssis kimi tanınan Oqtay Şirəliyev özü işə qarışmasa, vəziyyət nəzarətdən çıxa bilər və bu, daha acınacaqlı nəticələrə gətirib çıxarar. Balakən daim uzunömürlülərin vətəni olub, indi onun ərazisi səhiyyənin nöqsanları ucbatından meydana gələn və sayı sürətlə artan uşaq qəbirlərinin müdhiş mənzərəsini nümayiş etdirən səhnəyə çevrilməməlidir. Biz ciddi tədbirlər görüləcəyinə möhkəm inanırıq.
   

Təbiət qaş-qabağını açıb insanlara xoş üz göstərməyə başlayıb. Düzdür, Hələ yaz gəlməyib, dağlar, düzlər yaşıl xalıya bürünməyib, çöllər yaxasına novruzgülü, bənövşə taxmayıb, heç suların da buzu sınmayıb.
   Amma Novruz çərşənbələrinin ilki-əzəl çərşənbə özünü yetirib. Bu çərşənbəyə el arasında yalançı, sular novruzu, birinci çərşənbə də deyirlər.
   Doğrudur, illərdən bəridir ki, çərşənbələrin adları üstündə dava-qalmaqal düşür. Folklorşünas, etnoqraf alimlərin bir qismi ab-atəş-xaki-bad deyiminə üstünlük verərək, ilk çərşənbənin su, ikinci çərşənbənin od, üçüncü çərşənbənin torpaq, dördüncünün isə yel çərşənbəsi olduğunu iddia edir.
   Mərasimşünasların əksəriyyəti isə, əski türk yaddaşına söykənərək, çərşənbələri onların el arasındakı adları ilə təqdim edir. Kimin əsaslı, kimin əsassız danışdığını isə zaman göstərəcək.
   Filologiya elmləri doktoru, professor, tanınmış folklorşünas Məhərrəm Qasımlının sözlərinə görə, boz ayın ilk çərşənbəsi olan yalançı (əzəl, sular novruzu) çərşənbəni elə də təntənə ilə qeyd etmirlər: "Boz ayın ilk çərşənbəsi olan əzəl çərşənbədə insanlar tonqal qalayır, odun üstündən atılaraq öz ağrı-acılarını, çillələrini odda yandırıb saflaşırlar. Bir də bu çərşənbə axşamı evlərdə ləziz xörək bişməlidir. Yəni kimin evində nəyi varsa, ondan ocağa qazan asmalıdır".
   Tarix elmləri doktoru, etnoqraf Güllü Yoloğlu isə bizimlə söhbətində bildirdi ki, yalançı (əzəl) çərşənbə adətən keçirilmir. G.Yoloğlunun sözlərinə görə, 7 çərşənbə mövcuddur, onların üçü oğru, biri yalançı, üç isə doğru çərşənbədir: "Boz ayın birinci çərşənbəsi olan yalançı çərşənbə keçirilmir. Bu gün insanlar heç bir mərasim keçirmir. Ondan sonra gələn üç çərşənbə isə qeyd edilir. İkinci çərşənbə xəbərçi (bəzi bölgələrdə buna müjdəçi, muştuluqçu, cıdırçı çərşənbə də deyirlər), üçüncü çərşənbə ata-baba günü (buna ölülər bayramı da deyirlər), dördüncü çərşənbə isə ilaxır çərşənbədir".
   Güllü xanım onu da dedi ki, heç kəs ata-baba günü ilə qara bayramı qarışdırmasın. Qara bayram sırf İslamla, ata-baba günü isə bizim məişətimizlə bağlıdır: "Həmin gün insanlar əzizlərinin məzarı başına gedib, onları yad edir".
   

Dünən Ağır Cinayətlərə Dair İşlər üzrə Məhkəmədə paytaxtda 10-a yaxın mənzildən oğurluq etməkdə təqsirləndirilən şəxsə hökm oxunub. APA-nın məlumatına görə, hakim Tamilla Nəsrullayevanın sədrliyilə keçirilən prosesdə məhkəmə təqsirləndirilən Mahir Həsənovun cinayətinin sübuta yetirildiyi qənaətinə gəlib. Məhkəmənin hökmü ilə M.Həsənov 10 il müddətinə azadlıqdan məhrum edilib. Qeyd edək ki, paytaxt sakini Mahir Həsənov təkcə 2009-cu ilin may, iyun və iyul aylarında müxtəlif vaxtlarda 10-a yaxın evdən oğurluq edib. Hüquq-mühafizə orqanları tərəfindən aparılan əməliyyat tədbirləri nəticəsində M.Həsənov ötən ilin iyulunda saxlanıb. Təqsirləndirilən Cinayət Məcəlləsinin 177-ci (oğurluq) maddəsilə ittiham olunub.

Azərbaycanda külli miqdarda narkotik vasitə əldə etməkdə ittiham olunan kriminal avtoritetin məhkəməsi başlayıb.
   Trend News-un məlumatına görə, dünən Ağır Cinayətlərə Dair İşlər üzrə Məhkəmədə "Dərzi Taleh" ləqəbilə tanınan Salyan rayon sakini, 1963-ci il təvəllüdlü Taleh Nüsrət oğlu Şükürovun cinayət işi üzrə məhkəmənin hazırlıq iclası keçirilib. Məhkəmə baxışı fevralın 26-na təyin edilib.
   Təqsirləndirilən şəxs Cinayət Məcəlləsinin satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama (234.1), qanunsuz olaraq külli miqdarda narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma (234.4.3) maddələrilə ittiham olunur. Salyan Rayon Polis İdarəsinin Narkotiklərlə mübarizə bölməsinin əməkdaşları tərəfindən 2009-cu il sentyabrın 3-də saxlanan Şükürovdan 1 kiloqram 755 qram narkotik vasitə olan tiryək aşkar olunaraq götürülüb. Prezident Lökbatanda Qarabağ əlil və şəhid ailələri üçün bina açılışında iştirak etdi
   

Bakıda ailəsindən küsüb gedən vətəndaş evinə qaytarılıb. Bu barədə məlumatı "OLAYLAR"a Bakı Şəhər Baş Polis İdarəsindən veriblər.
   Hadisə Yasamal rayonu ərazisində baş verib. Yasamal rayonu, X.Dadaşov küçəsində yaşayan Azad Şahvələdov yanvarın 24-də saat 10:00 radələrində yaşadığı evdən çıxıb gedib. Yasamal Rayon Polis İdarəsi 29-cu Polis Bölməsi əməkdaşlarının keçirdiyi əməliyyat tədbirləri nəticəsində A.Şahvələdovun yeri müəyyən edilib. Polislərin səyi nəticəsində Azad Şahvələdov evinə qaytarılıb.
   

Telekommunikasiya sahəsinin ən son texnologiyalarını Azərbaycana gətirən "Azercell Telekom" MMC ötən ilin iyununda "BlackBerry Solution" məhsulunu təqdim etmişdi.
   Bir neçə ay ərzində "Azercell" abonentləri tərəfindən çox böyük maraqla qarşılanan bu mobil rabitə vasitəsi "İlin brendi" adına layiq görülüb.
   "Azercell" şirkətinin Azərbaycana gətirdiyi "BlackBerry" telefonu "Azeri Business Award" Milli Mükafatına layiq görülüb. "Business Time" jurnalının təsis etdiyi bu mükafat "BlackBerry" telefonunu "İlin brendi" nominasiyasında qalib elan edib.
   Mükafat "Azercell Telekom" MMC-nin Korporativ Ünsiyyət və Sosial Məsuliyyət bölümünün rəhbəri Ülviyyə Həsənzadəyə təqdim olunub. Təqdimat mərasimindəki çıxışında Ülviyyə xanım təmsil etdiyi qurumun həmişə öz abonentlərini müxtəlif yeniliklər və maraqlı təkliflərlə sevindirməyə çalışdığını deyib.
   Mərasimlə yanaşı keçirilən sərgidə "BlackBerry" telefonunun üstünlüklərini əks etdirən sərgi də təşkil olunub.
   Sevindirici haldır ki, Azərbaycanda bu telefondan istifadə edənlərin sayı artmaqdadır. Getdikcə daha çox "Azercell" abonenti bu telefonu əsas və rahat ünsiyyət vasitəsi kimi qiymətləndirir.
   

Azərbaycanda istehlakçıların geni dəyişdirilmiş məhsullardan istifadə etməsilə bağlı alim və mütəxəssislər həyəcan təbili çalmaqdadır. Belə meyvə və tərəvəzlər, sosiska və kolbasalar, uşaq qidaları, digər məhsullara yalnız istehlak bazarında rast gəlinmir. Tərkibinə müxtəlif canlıların, o cümlədən insanın geni vurulmuş məhsullar həm də toxum kimi Azərbaycana gətirilərək burada istehsal olunur.
   Genetik Modifikasiya Olunmuş orqanizmləri müəyyən edən laboratoriyaların mövcud olduğu ölkələrdə belə məhsulları müəyyən etmək asan olur. Azərbaycan kimi ölkələrdə isə GMO bazara asanlıqla daxil olur. Ekspertlər bunun əsas səbəblərindən biri kimi "Genetik Modifikasiya Olunmuş Məhsullar haqqında" Qanunun mövcud olmamasını göstərir. "APA" İNformasiya Agentliyi bununla bağlı mətbuatın dünənki sayında xüsusi araşdırma da yayıb. Orada qeyd edilir ki, Azərbaycana xaricdən gətirilmiş kartofların 80 faizi, İrandan gətirilən pomidorların 70 faizi, ümumilikdə ölkəyə gətirilən məhsulların 90 faizi, soyaların 98 faizi, qarğıdalıların 70 faizi, çuğundurların 60 faizi, qarpızların isə hamısı GMO tərkiblidir. Lakin onların tərkibinin təhlükəli olduğunu və insan orqanizminə vurduğu zərəri müəyyənləşdirmək üçün mütləq ölkədə xüsusi laboratoriyalar olmalıdır. Bu məhsulların GMO olduğu yalnız həmin laboratoriyalarda sübuta yetirilə bilər.
   Bununla bağlı qəzetimizə açıqlama verən Respublika Gigiyena və Epidemiologiya Mərkəzinin qidalanma gigiyenası bölməsinin müdiri İmran Abdullayev hazırda ABŞ-dan bir qrup mütəxəssisin bu məqsədlə Azərbaycana dəvət olunduğunu dedi: "Biotəhlükəsizlik haqqında Azərbaycan Respublikasının qanun layihəsi var. Qanun qəbul olunduğu halda normativ aktlar hazırlanacaq. həmin normativ aktlardan biri də bu sahədə elmi-tədqiqat laboratoriyalarının təşkil olunması, ekspertizaların həyata keçirilməsidir. Bunsuz modifikasiya edilmiş məhsullar haqqında fikir yürütmək mümkün deyil. Həmin qanun layihəsilə bağlı ABŞ-ın USAİD təşkilatının mütəxəssisləri Bakıdadır və öz tövsiyələrini verir".
   İ. Abdullayev, bu Azərbaycanda yeni bir sahə olduğuna görə, qanun layihəsinin hazırlanmasına təkliflər verməyin xüsusi peşəkarlıq tələb etdiyini deyir və qeyd edir ki, Gigiyena və Epidemiologiya Mərkəzi də öz təkliflərini parlamentə göndərib. Amma bu məsələyə dair daha dəqiq fikirləri alimlər söyləyə bilər: "Qanunun və onun elementlərinin adları Avropa İttifaqı qanunvericiliyinin tələblərinə uyğun olmalıdır. ABŞ və Avropa İttifaqı təşkilatları da Azərbaycanın Ümumdünya Ticarət Təşkilatına üzv olması üçün bu qanunun tezliklə qəbul olunmasını istəyir. Amma bu bir səhiyyə təşkilatının işi deyil. Onunla həm də genetiklər, kənd təsərrüfatı işçiləri məşğul olacaq. Genetik Modifikasiya Olunmuş məhsulların becərilməsi, yem kimi istifadə olunması, toxum kimi daşınması, əkilməsi, həmin ərazilərin qorunması uzun bir prosesdir".
   İ.Abdullayevin sözlərinə görə, məhsulların GMO tərkibli olub-olmadığını yoxlamaq üçün tənzimləmə aktı olmalıdır. Bu aktı isə laboratoriya analizi əsasında əldə etmək olar. Ona görə də qanun qəbul olunmadan hər hansı fikir söyləmək mümkün deyil.
   Standartlaşdırma, Metrologiya və Patent üzrə Dövlət Komitəsinin mətbuat xidmətinin rəhbəri Fazil Talıblı isə problemin yaxın vaxtlarda öz həllini tapacağını bildirdi: "Standartlaşdırma, Metrologiya və Patent üzrə Dövlət Komitəsi Almaniyanın "Geogen" şirkətilə müqavilə üzərində işləyir. Həmin şirkət Genetik Modifikasiya Olunmuş məhsullar üzərində işləməklə məşğul olur. Yaxın iki ay ərzində bu laboratoriyanın Standartlaşdırma, Metrologiya və Patent üzrə Dövlət Komitəsində qurulması təmin ediləcək. Hazırda bizim mütəxəssislər bu sahədə iş aparır. Bundan başqa, geni dəyişdirilmiş məhsullar haqqında Azərbaycan Respublikasının qanunu da yoxdur. Biz Avropa Birliyinin "TACİS" proqramı çərçivəsində bu qanun layihəsi üzərində işləyirik və başa çatdırıb müvafiq qurumlara göndərmək üzrəyik. Ona görə də hər iki proses paralel həyata keçiriləcək. Həm laboratoriyanın qurulması, həm də qanun layihəsinin Milli Məclisə təqdim olunması tarixi təxminən eyni olacaq".
   F.Talıblı bildirdi ki, qanun qəbul olunmadan da laboratoriya quraşdırmaq mümkündür. Amma qanun olmasa, laboratoriyanın aşkar etdiyi faktlar ciddi əhəmiyyət daşımaya bilər. Ona görə də bu proses paralel həyata keçiriləcək: "Toxumçuluq haqqında" Qanun var, "Gen Mühəndisliyinin Təhlükəsizliyinin Risqləri haqqında" Qanunverici akt var ki, orada geni dəyişdirilmiş məhsullarla bağlı xüsusi müddəalar öz əksini tapıb. Ölkə əhalisinin etibarlı ərzaq məhsulları ilə təminatına dair cənab prezidentin imzaladığı fərmanda da bu məsələ öz əksini tapıb və bizə işin başlanğıcı üçün bizə bu sahəni nəzarətə götürməyə imkan verir. Onu da deyim ki, bu laboratoriya qurulduğu andan biz Azərbaycanda istehsal olunan və Azərbaycana idxal olunan məhsulların genetik tərkibini araşdırmaq üçün kütləvi monitorinqlərə başlayacağıq. Hansı məhsulların geninin neçə faiz dəyişidirildiyi müəyyənləşdiriləcək. Bu göstərici 0,9 faiz olmalıdır".
   F.Talıblı Azərbaycana idxal olunan GMO-larda bu göstəricinin 1,1 faiz təşkil etməsi barədə məlumatlarla razılaşmır":Çox təəssüf ki, bəzi mətbuat orqanları bizim rəyimizi öyrənmədən əhalidə qorxu yaradan məlumatlar yaymağa başlayıb. Məncə, əhalidə ciddi xof yaratmağa ehtiyac yoxdur. Hansı laboratoriya müəyyən edib ki, Azərbaycana 1.1 faiz geni dəyişidirilmiş məhsullar gətirilib? Bizdə bunu müəyyən edən nə laboratoriya var, nə qanun. Mən qəzetdən oxudum ki, kartofa əqrəb geni vurulur və sairə, amma dövlət orqanı olaraq, bizdə belə bir məlumat yoxdur. Yalnız laborator analizlərin nəticələri əlimizdə olduqdan sonra konkret fikir söyləyə bilərik".
   

2010-cu il fevralın 21-də saat 16:00 radələrində Ekologiya və Təbii Sərvətlər Nazirliyi (ETSN) Meşələrin İnkişafı Departamentinin Daşkəsən Meşə Mühafizəsi və Bərpası Müəssisəsinin (MMBM) xidməti ərazisi olan 5 saylı dolayının 29-cu kvartalında yanğın hadisəsi baş verib.
   ETSN-in mətbuat xidmətindən APA-ya verilən məlumata görə, açıq və kollardan ibarət ərazidə baş vermiş yanğın 0,75 hektar sahəni əhatə edib və meşə fonduna ciddi ziyan dəyməyib. Yanğın qısa müddət ərzində Daşkəsən MMBM-in kollektivi və yaxın kəndlərin sakinlərinin operativ səyləri nəticəsində söndürülüb. Nazirliyin Meşələrin İnkişafı Departamenti tərəfindən aparılan ilkin araşdırmalara görə, yanğına (yanğının baş verdiyi ərazi yaşayan məntəqələrindən uzaq olduğundan və gediş-gəliş olmadığından) ovçuların atdığı söndürülməmiş siqaret kötüyü səbəb olub. Son zamanlar respublika ərazisində hava şəraitinin küləkli olmasını nəzərə alaraq ETSN meşə və yaşıllıqları qoruyub saxlamaq üçün əhalini bir daha odla ehtiyatlı olmağa, yanğın təhlükəsizliyi qaydalarına ciddi riayət etməyə və Azərbaycan xalqının milli sərvəti olan meşələri qorumağa çağırır.

Son günlər Azərbaycanda Geni Dəyişdirilmiş Məhsullarla (GMO) bağlı müzakirələr bitmək bilmir. Bununla bağlı hərə bir söz deyir. Ancaq bir sıra reallıqlar var ki, onlara əsaslanaraq narahatlıq keçirməyə bilmirsən. Məsələ ondadır ki, dədə-babadan meyvəni xüsusi şəraitdə qışa saxlayanda, nə qədər olmasa da, həmin meyvənin forması dəyişirdi.
   Yəni olduğu kimi qalmırdı. Ancaq indi bazara gedəndə görürsən ki, satılan meyvə və yaxud da digər kənd təsərrüfatı məhsulları sanki indicə dərilib. Necə deyərlər, xarici görünüşünə görə adama gəl-gəl deyir. Dadanda isə görürsən ki, tamam başqa, qeyri-adi tam verir. Diqqəti çəkən məqamlardan biri də odur ki, sözügedən məhsullar, aylarla piştaxtalarda qalmağına baxmayaraq, hələm-hələm xarab olmur. Bu zaman şübhələnməyə bilmirsən. Bəs görəsən siyasi və ictimai xadimlər necə, gündəlik həyatlarında aldıqları meyvə və yaxud da digər bostan məhsullarının qeyri-adi tam verməsilə üzləşirmi? Ən əzından, bunun fərqində olurlarmı?
   Azadlıq Partiyasının sədri Əhməd Oruc belə məsələlərə o qədər də fikir vermədiyini bildirsə də, bəzi məqamlara diqqət etdiyini dedi: "Onu bilirəm ki, Azərbaycana geni dəyişdirilmiş məhsulları necə gəldi gətirirlər. Buna nəzarət yoxdur. Deməyim odur ki, bu sahədə vəziyyət həqiqətən də acınacaqlıdır. Digər tərəfdən, gündəlik həyatda alınan ərzaq məhsullarının qeyri-adi tam verməsinin tez-tez şahidi oluram. Məsələn, bazarda çiyələk satırlar. Alanda görürsən ki, çiyələr öz dadını vermir, alma da həmçinin. Demək olar ki, istifadə etdiyimiz qidaların əksəriyyəti öz təbii dadını vermir. Almağına da peşman olursan".
   Ədalət Partiyasının sədr müavini Elxan Şükürlü bildirdi ki, inkişaf etmiş ölkələr öz keyfiyyətsiz ərzaq məhsullarını üçüncü dünya ölkələrinə göndərir: "Nəticədə həmin məhsullar müxtəlif vasitələrlə bu ölkələrdə realizə olunur. O baxımdan, Azərbaycanda da sözügedən məhsullar satılır. Özü də tək ərzaq məhsulları deyil, sənaye məhsulları da bu sırada özünəməxsus yer tutur. Rəqabət mühiti olmadığına görə, satmağa nə gətirirlərsə, əhali də məcbur olub, həmin ərzaq məhsulunu bazardan alır. Bütün bunların nəticəsidir ki, ölkədə nə qədər zəhərlənmələr olur. Xəstəliklərin sayı xeyli artıb. Ümumiyyətlə, ölkədə qida təhlükəsizliyinə əməl olunmur və o baxımdan satılan ərzaqlar da öz tamını vermir".
   Azərbaycan Ziyalılar Birliyinin sədri Eldəniz Quliyevin sözlərinə görə, ərzaqla bağlı çeşidli problemlər həll olunmadıqca vəziyyət daha da qəlizləşir: "Bütün bunların səbəbkarı Azərbaycanı idxaldan asılı görmək istəyən qüvvələrdir. İdxaldan asılı olan ölkə ruhu məhv olmuş insana bənzəyir. Dükanlara çıxıb baxanda görürsən ki, pomidorundan tutmuş, ananasına qədər bütün ərzaq məhsulları gəlmədir. Bu minvalla azərbaycanlıların genetikasını dəyişmək istəyirlər. Toya, digər məclislərə gedəndə hansısa təamları dadmalı olursan. Görürsən ki, istifadə etdiyin meyvə meyvənin dadını vermir, suyun dadını verir. Çox təəssüflər olsun ki, təbii nemətlərdən uzaqlaşdıqca özümüz də süniləşirik".
   

Şirvan şəhərində mal-qara oğurlamış şəxslər tutulub. Bu barədə APA-nın Mil-Muğan bürosuna Şirvan şəhər Polis Şöbəsinin istintaq bölməsinin rəisi Əlbaxış Məmiyev məlumat verib.
   Məlumatda bildirilir ki, fevralın 21-də gecə saatlarında Şirvan sakinləri Elvin və Elçin Mustafayev qardaşları, Rahil Əbilov Məhəbbət Şirməmmədov əlbir olaraq Şirvan şəhəri, Mehmandarov küçəsi 45, mənzil 8-də yaşayan Qarayev Azər Məmmədəli oğlunun qarajında saxladığı 4 baş iribuynuzlu mallarını oğurlayıb. Əməliyyat axtarışları nəticəsində həmin şəxslər tutularaq istintaqa təhvil verilib. Faktla bağlı cinayət işi açılıb, araşdırma aparılır.