"Neftçi" klubunun baş məşqçisi Vaqif Sadıqov "İnter"lə oyundan sonra istefa verib. Apasport.az saytının xəbərinə görə, 0:1 hesablı məğlubiyyətin ardından Sadıqov futbolçularla ayaqüstü söhbətləşib, onlara komandadan ayrıldığını söyləyib və yetirmələrindən halallıq istəyib.
   O, apasport.az saytının əməkdaşı ilə söhbətində istefa verdiyini təsdiqləyib. Sadıqovun fikrincə, baş məşqçi təyin olunan vaxtda əsas məqsəd çətin vəziyyətdə olan komandanı ilk "altılığ"a salmaq olub: "Biz gələndə komanda çətin vəziyyətdə idi. Məqsəd "altılığ"a düşmək idi ki, buna da nail olduq. İstefa verməyimə gəlincə, fikrimcə, komandaya yeni nəfəs lazımdı".
   Sadıqov, həmçinin bildirib ki, köməkçilərinin komandada qalıb-qalmayacağını bilmir.
   Mötəbər mənbələrdən aldığımız məlumata görə, Sadıqov öz istəyilə istefa ərizəsi yazmayıb. Komandanın son vaxtlar göstərdiyi oyun rəhbərliyi qane etməyindən, Vaqif müəllim bu addımı məcburiyyətdən atıb. Bildirildiyinə görə, "Turan"la nəticəsi əvvəlcədən danışılmış görüşdən sonra onun, eləcə də vitse-prezident Tahir Süleymanovun istefası gündəmdə olub. Amma klubun yeni prezidenti Sadıq Sadıqov köhnə rəhbərlikdən qalan kadrların təmizlənməsinə indi start verib.
   Çox güman ki, yaxın günlərdə Sadıq Sadıqov Süleymanova da qapını göstərəcək. Komandanı isə mövsümün sonunadək Əsgər Abdullayevin çalışdıracağı bildirilir.

"Azərbaycana gələndə "Bakı" rəhbərliyindən üç şey istədim. Birincisi, infrastrukturu yüksək səviyyəyə qaldırmaq. İkincisi, aşağı yaş qruplarına diqqət ayıraraq, əsas komandaya layiqli oyunçu yetişdirmək.
   Üçüncüsü isə beynəlxalq oyun təcrübəsinə malik oyunçular axtarmaq". Bu sözləri Türkiyənin "Zaman" qəzetinə müsahibəsində "Bakı"nın baş məşqçisi Bülent Korkmaz deyib. Korkmaz Azərbaycan futbolunun çatışmamazlıqlarından danışıb: "Azərbaycan futbolu inkişaf mərhələsinə qədəm qoyub. Amma Türkiyə ilə müqayisədə əlbəttə ki, geri qalır. Çünki stadionların qazonları o qədər də yaxşı deyil. Bir də azarkeşlərin oyunlara marağı, demək olar ki, yoxdur. İndi-indi peşəkarlaşmağa başlayırlar".

Bakının "Neftçi" klubunun Unibank Premyer Liqasının cari mövsümündə rekordu qırılıb. Apasport.az saytının məlumatına görə, "ağ-qaralar"ın ölkə kubokunun 1/8 mərhələsində iki görüşünü də nəzərə alsaq, məğlubiyyətsiz seriyası 16-cı oyunda dayandırılıb.
   Flaqmanın qarşısını axırıncı turda "Şəfa" stadionunda keçirilən matçda "İnter" kəsib (1:0). Bununla həm "Neftçi"nin uğurlu seriyasına son qoyulub, həm də baş məşqçi Vaqif Sadıqov istefaya göndərilib. "İnter" bu vacib qələbə sayəsində çempionatda olduğu kimi, "altılığ"a da vahid lider kimi yollanıb. Beşinci pillədə olan "Neftçi" isə həmşəhərlilərindən artıq 6 xal geri qalır. Qeyd edək ki, cari mövsümdə ən az uduzan komandalar "Qarabağ"la "Xəzər-Lənkəran" da belə uzun müddətli seriyaya malik deyildi. "Neftçi" buna qədər sonuncu dəfə oktyabrın 21-də III turdan təxirə salınan "Qəbələ" ilə səfər oyununda uduzmuşdu - 0:1. Flaqmanın bu dəfə fevralın 21-də yenildiyini nəzərə alsaq, ayın 21-i onlara düşərli olmur. Komanda Sadıqovun rəhbərliyi altında ümumilikdə 3 məğlubiyyət aldı ki, onların hamısı rəqib meydanında, özü də 0:1 hesabı ilə olub. İlk belə məğlubiyyət "Qəbələ" ilə görüşdən üç gün öncə, oktyabrın 18-də Ağdamda "Qarabağ"la görüşdə olmuşdu.

Neçə vaxtdır danışılmış oyunlarla bağlı araşdırma aparan Çin Futbol Assosiasiyası iki klubla bağlı sərt qərar verib. Apasport.az saytının məlumatına görə, Superliqada çıxış edən "Quanmjou" və "Şenqdu Beydes" komandaları çempionatdan kənarlaşdırılıb. Bu iki klubun rəhbərliyinin totalizatorla məşğul olmasını sübut edən assosiasiya onları aşağı dəstəyə göndərib. Qeyd edək ki, klubların totalizatorlarla işbirliyində şübhəli bilinməsi və danışılmış oyunların keçirilməsi dünya futbolunda adi hal çevrilib. Lakin belə faktların sübut olunub müvafiq qərarların verilməsi nadir hadisələrdən sayılır.

Bakının "Neftçi" klubunun baş məşqçisi Vaqif Sadıqov istefaya göndərildikdən sonra kluba hansı mütəxəssisin təyin olunacağı maraqla gözlənilir. Namizədlər sırasında "Qarabağ"ın hazırki baş məşqçisi Qurban Qurbanov və "Turan"ın sabiq çalışdırıcısı türkiyəli Naci Şensoyun da adı var. ANS PRESS-in əldə etdiyi məlumata görə, "Neftçi" rəhbərliyi kluba "Qarabağ"ın hazırki baş məşqçisi Qurban Qurbanovu gətirməyi planlaşdırır. "Qarabağ" futbol klubunun mətbuat katibi Nurlan İbrahimovun ANS PRESS-ə açıqlamasında Qurban Qurbanovla hər hansı bir danışıqların aparılmasını təkzib edib. Klub rəsmisi eyni zamanda Q. Qurbanovun Ağdam təmsilçisi ilə 3 illik müqaviləsinin olduğunu diqqətə çatdırıb. Xatırladaq ki, "Neftçi" klubu dünən Unibank Premyer Liqasının XXII turu çərçivəsində digər paytaxt təmsilçisi "İnter"ə məğlub olub və klub prezidenti Sadıq Sadıqov məğlubiyyəti Vaqif Sadıqova bağışlamayaraq onu istefaya göndərib.

İngiltərə millisi və "Mançester Yunayted"in hücumçusu Ueyn Runi millinin baş məşqçisi Fabio Kapello ilə komandanın ilk görüşündən danışıb.
   Britaniya mətbuatının yazdığına görə, Runi ilk görüşdəcə özünün və bütünlükdə komandanın Kapellonun "zəhmli sifətindən" qorxduğunu bildirib. "Elə ilk məşqdəcə o, dəli təsiri bağışladı və hamımızı qorxutdu. Cəmi bir neçə saniyəyə Kapello hər şeyi tam nəzarətə götürdü", - deyə Runi qeyd edib. Hücumçu Kapellonun "hər şeyi dəyişdiyini" bildirib: "Amma o, fantastik işlər görüb və biz hamımız belə məşqçi ilə işlədiyimiz üçün şadıq".

Dünən Almaniyanın Frankfurt şəhərində Avro-2012-nin seçmə mərhələsi çərçivəsində A qrupunda keçiriləcək oyunların təqviminin müzakirəsi məqsədilə qrupda yer alan komandaların nümayəndələrinin iştirakı ilə görüş keçirilib.
   Milli.Az xəbər portalı AFFA-nın saytına istinadən xəbər verir ki, aparılan müzakirələr nəticəsində qrupun təqvimi müəyyənləşdirilib. Azərbaycan milli komandasının Avro-2012-nin seçmə mərhələsi çərçivəsində keçirəcəyi oyunların təqvimi belədir:
   7 sentyabr 2010-cu il Almaniya - Azərbaycan
   8 oktyabr 2010-cu il Avstriya - Azərbaycan
   12 oktyabr 2010-cu il Azərbaycan - Türkiyə
   29 mart 2011-ci il Belçika - Azərbaycan
   3 iyun 2011-ci il Qazaxıstan - Azərbaycan
   7 iyun 2011-ci il Azərbaycan - Almaniya
   2 sentyabr 2011-ci il Azərbaycan - Belçika
   6 sentyabr 2011-ci il Azərbaycan - Qazaxıstan
   7 oktyabr 2011-ci il Azərbaycan - Avstriya
   11 oktyabr 2011-ci il Türkiyə - Azərbaycan
   Tədbirdə iştirak edən Azərbaycan milli komandasının baş məşqçisi Berti Foqts təqvimə münasibət bildirib. O deyib ki, təqvim Azərbaycan yığmasının rəhbərliyinin arzuladığı kimi tərtib olunub: "Qızğın müzakirələrin getməsinə baxmayaraq - sözsüz ki, hər bir komandanın nümayəndəsi öz maraqlarını müdafiə edirdi - balanslı və ədalətli təqvim alındı. Artıq bütün diqqətimizi millinin hazırlığına, yoldaşlıq oyunlarının keçirilməsinə yönəldəcəyik. Yaxşı nəticə əldə etmək üçün əlimizdən gələni əsirgəməyəcəyik".
   

Unibank Premyer Liqasında "altılıq"dan kənarda qalan "Simurq" rəhbərliyi heyətdə köklü islahatlara başlayıb. Apasport.az saytının məlumatına görə, Zaqatala təmsilçisi cari mövsümdə uğursuz çıxışın müqabilində legionerlərinin çoxunu qovub.
   Rəhbərlik heyətdə olan əcnəbilərdən altısını - gürcülər Roman Axalkatsi, David Bolkvadze, Kaxaber Çxetiani, ukraynalılar Ruslan Qunçakla Yuri Bulıçev və moldovalı Aleksandr Qolbanı saxlayıb. Yeddi futbolçu - ukraynalılar Aleksey Malıgin (kapitan), Sergey Artyux və Andrey Raspopov, serblər Zdraqan Perişiçlə Nenan Beqoviç, latviyalı Gennadi Solonitsın və bolqar Nikolay Petrov-Valev komandadan çıxarılıb. Qeyd edək ki, rəhbərlik uğursuz çıxışda günahkar bildiyi ukraynalı baş məşqçi Roman Pokora ilə də yollarını ayıracaq və "Simurq" gələn mövsümə yeni baş məşqçinin rəhbərliyi altında çıxacaq. Çox güman ki, yeni baş məşqçi milli komandamızın sabiq çalışdırıcısı İqor Ponomaryov olacaq.
   

Türkiyə Superliqasının XXII turunda keçirilən "Kasımpaşa" - "Qaziantepspor" oyunu dünya futbolu tarixinə düşüb.
   Apasport.az saytının məlumatına görə, qarşılaşmanın "qəhrəman"ı baş hakim Hakan Özkan olub. O, 51-ci dəqiqədə təyin etdiyi qırmızı vərəqə və penalti qərarını ləğv edib.
   Belə ki, ikinci hissənin əvvəlində qonaqların hücumçusu Xulia Sezar topu sol cinahdan cərimə meydançasına qaldırıb. Bu epizodda "Kasımpaşa"nın üzvü Ergün Teber topu sinəsi ilə uzaqlaşdırsa da, hakim onun komanda yoldaşı Barışın cərimə meydançasında əllə oynadığını zənn edib. Buna görə də Hakan Özkan Barışa qırmızı vərəqə göstərib və "Kasımpaşa"nın qapısına 11 metrlik cərimə zərbəsi verib. Referini rüsvayçılıqdan dördüncü hakim Hüseyn Sabancı qurtarıb. O, Hakan Özkanla danışaraq, epizodu ona başa salıb və penalti olmadığın söyləyib. Məhz bundan sonra baş hakim həm qırmızı vərəqəni, həm də penalti qərarını ləğv edib.