Rotterdam məhkəməsi Malta "FIM Bank"ının Azərbaycan dövlətinə qarşı qaldırdığı iddianı rədd edib və bankın Azərbaycana 20 590 avro təzminat ödəməsi barədə qərar qəbul edib.

   Bu barədə APA-ya Rabitə və İnformasiya Texnologiyaları Nazirliyi (RİTN) mətbuat xidmətinin rəhbəri Müşfiq Əmirov məlumat verib.

   M.Əmirovun sözlərinə görə, bu barədə qərar Rotterdam məhkəməsinin fevralın 17-də keçirilən yekun iclasında qəbul olunub.

   Məhkəmədə Azərbaycan dövlətinin maraqlarını Hollandiyanın "Eversheds Faasen" hüquq şirkəti təmsil edib: "Şirkətdən bildirilib ki, fevralın 17-də keçirilən yekun iclasda məhkəmə "FIM Bank"ın iddiasının təmin olunmaması barədə qərar qəbul edib. Bankın iddiası ləğv edilməklə yanaşı, "FIM Bank"dan 20 590 avro məbləğində vəsaitin tutularaq Azərbaycana ödənilməsi qərara alınıb".

   Qeyd edək ki, "FIM Bank" Rotterdam məhkəməsində Azərbaycan dövlətinə qarşı 6,775 mln. ABŞ dolları məbləğində iddia qaldırmışdı.

   Azərbaycanda fəaliyyət göstərən "Poçtbank" Səhmdar Kommersiya Bankı külli miqdarda borcu yarandığı üçün Azərbaycan hökuməti adından müəyyən sənədlər təqdim etməklə "FIM Bank"dan kredit alıb. "FIM Bank"da həmin sənədlərin həqiqi olmadığını bilsələr də, ikitərəfli razılaşmalar nəticəsində kredit ayrılıb. Bu sənədlərdə göstərilib ki, guya Rabitə Nazirliyinə məxsus olan "Aztell" və "Baktell" şirkətləri (əslində bu şirkətlər mövcud olmayıb) üçün telekommunikasiya avadanlıqları alınacaq və həmin vəsaitin geri qaytarılmasına dövlət Rabitə Nazirliyi qismində zəmanət verir. "Poçtbank" bu krediti qaytara bilmədiyi üçün "FIM Bank" onu Azərbaycan dövlətindən almaq məqsədilə müxtəlif ölkələrdə məhkəmələrə müraciət edib. İddia ərizələrinin təmin olunması üçün görülmüş tədbirlər nəticəsində Azərbaycanın Hollandiyada "New Skies Satellites N.V." şirkətindəki 50 min səhminə, Fransada "Eutelsat S.A." şirkətindəki 500 min səhminə və səhmlərdən əldə edilən dividendlərə, Bermud adalarında qeydiyyatdan keçmiş "İntelsat Ltd." şirkətindəki payına həbs qoyulması barədə qərar çıxarılıb.

   Lakin 2006-cı ilin noyabrında Paris Yuxarı İnstansiya Məhkəməsi Paris Məhkəməsinin "Eutelsat S.A." peyk rabitəsi şirkətindəki Azərbaycan Rabitə və İnformasiya Texnologiyaları Nazirliyinin 500 min səhminə və bu səhmlərdən əldə edilən dividendlərə həbs tədbirinin icra edilməsi barədə 2004-cü il 8 iyul tarixli qərarını ləğv edib.