Azərbaycan Premyer Liqasının dünən yekun vurulan təsnifat mərhələsindən sonra ölkə futbolunun flaqmanı hesab edilən "Neftçi" klubunun baş məşqçisi Vaqif Sadıqov istefaya göndərilib.
   Fanat.az-ın kluba yaxın mənbələrdən əldə etdiyi məlumata görə, istefaya səbəb komandanın dünən turun əsas qarşılaşmasında "İnter"ə məğlub olmasıdır. Məlumata görə, qərar oyundan sonra baş məşqçi ilə klubun prezidenti Sadıq Sadıqov arasında baş tutan görüşdə qəbul olunub. Baş məşqçi oyundan sonra futbolçularla görüşərək vidalaşıb.
   Fanat.az-a daxil olan son məlumatlara görə, klub rəhbərliyi artıq "Turan"ın sabiq baş məşqçisi, türkiyəli mütəxəssis Naci Şensoyla danışıqlar aparır.
   Klubun mətbuat xidməti Fanat.az-a açıqlamasında Vaqif sadıqovun istefası xəbərini təsdiqləsə də, hər hansı mütəxəssislə danışıqların getdiyini təkzib edib. Mətbuat xidməti yeni baş məşqçinin kim olması ilə bağlı hələ konkret variantın olmadığını deyib.
   "Neftçi"dən istefa verməyim haqqında yayılan xəbərlər doğrudur. Bu gün (dünən) "İnter"lə qarşılaşmadan sonra istefa ərizəmi yazdım. Hesab edirəm ki, istefam klub rəhbərliyi tərəfindən də qəbul olundu". Qol.Az-ın müxbirilə söhbətində bu sözləri "Neftçi" klubundan istefa verən baş məşqçi Vaqif Sadıqov deyib. Sadıqov istefasının səbəblərini belə izah edib: "Əslində klub rəhbərliyi ilə aramda heç bir problem yoxdur. Hesab edirəm ki, bu qərarım "Neftçi"nin xeyrinə atılmış addımdır. Son dörd ayda həddindən artıq çox yoruldum. Artıq hiss eləyirdim ki, "Neftçi"ni çempion edə bilməyəcəm. Bu səbəbdən komandanı vaxtında təslim etmək qərarına gəldim. Bugünkü oyunun da qərarıma istər-istəməz təsiri oldu. Qış fasiləsində etdiyimiz transferlər özlərini doğrultmadılar. Klubdan ayrılsam belə, hər zaman qəlbim "Neftçi" ilə döyünəcək".
   Təcrübəli mütəxəssis bundan sonrakı gələcək fəaliyyəti barəsində də danışıb: "Bu dəqiqə heç bir şey haqqında düşünmək istəmirəm. Gələcəkdə nə olacaq bunu zaman göstərəcək. Hazırda mənə güclü istirahət lazımdır".

Həmyerlimiz Anatoli Ponomaryov Türkiyənin Bank Asiya 1-ci liqasında növbəti oyununu keçirib. Fanat.az xəbər verir ki, onun çıxış etdiyi "Orduspor" dünən "Konyaspor"un qonağı olub.
   Heç kimin gözləmədiyi halda, "Orduspor" turnir cədvəlininin üçüncü pilləsində qərarlaşmış rəqibi ilə oyundan bir xalla ayrılıb. Hesabı 45-ci dəqiqədə meydan sahiblərinin oyunçusu Ahmet Görkem Görk açıb. 55-ci dəqiqədə isə Emre Özkan "Orduspor"a bir xal qazandıran qola imza atıb.
   "Orduspor"un baş məşqçisi Ponomaryova start heyətində şans verib. Onu 60-cı dəqiqədə Volkan Arslan əvəzləyib. Ajansspor.com saytı futbolçumuzun oyununu iki ulduzla qiymətləndirib. "Orduspor" hazırda turnir cədvəlinin 14-cü pilləsində qərarlaşıb. Ponomaryovun komandası 23 oyunda 25 xal qazanıb.

Ukraynanın Brovari şəhərində yeniyetmə və gənc qızlar arasında güləş üzrə "Drujba" beynəlxalq turniri başa çatıb. Yarışda mübarizə aparan 7 təmsilçimizdən 4-ü vətənə medalla dönüb.
   Yeniyetmələrin rəqabətində baş mükafata Patimat Baqomedova (52 kq) sahib çıxıb. Aydan Səfərli (46 kq) 3-cü yerlə kifayətlənib. Eyni nəticəni gənclərimiz də əldə ediblər. Bütün tərəf müqabillərini üstələyən Marziget Baqomedova (51 kq) qızıl, yalnız bir görüşdə məğlub olan Günay İsmayılova (55 kq) bürünc medal qazanıb.
   Qeyd edək ki, komandamız Qara dəniz sahilində olan ölkəyə məşqçi Arif Fərmanovun rəhbərliyi ilə yollanıb. Hakimlər briqadasında gənc referi Vüqar Şükürov yer alıb.

Kanadanın Vankuver şəhərində keçirilən Qış Olimpiya Oyunları davam edir. Yarışda Azərbaycanı təmsil edən idmançılardan əslən isveçrəli Sedrik Notsun dünənə planlaşdırılan çıxışı təxirə salınıb.
   Vankuverdə olan Milli Olimpiya Komitəsinin vitse-prezidenti Çingiz Hüseynzadənin ANS-ə verdiyi məlumata görə, hava şəraitinin yararsız olduğu səbəbindən yarış iki gün sonra keçiriləcək. Qeyd edək ki, Nots dağ xizəyinin slalom növündə mübarizə aparacaq.

21 yaşlı futbolçulardan ibarət Azərbaycan yığması Avropa çempionatının seçmə mərhələsində növbəti oyununu səfərdə Şotlandiyaya qarşı keçirəcək.
   Fanat.az-ın verdiyi xəbərə görə, çətin səfər öncəsi milli komandamız ciddi itki ilə üzləşib. Bundan öncəki matçda ikinci sarı vərqə alaraq, cəzalı duruma düşən Nodar Məmmədov baş məşqçi Bernard Lippertin sərəncamında olmayacaq. Nodar özünün iştirak etməyəcəyi oyunda komanda yoldaşlarını sona qədər mübarizəyə səsləyir: "Sarı vərəqə limitim dolub. Bu səbəbdən nə oyunda, nə də təlim-məşq toplanışında iştirak edəcəyəm. Şotlandiya yığmasının heyəti güclü futbolçulardan qurulub. Amma onlar məğlubedilməz deyillər. Birləşib sona qədər mübarizə aparsaq, nəticə qazana bilərik. Şotlandiya ilə oyundan sonra doğma meydançamızda Albaniya ilə üz-üzə gələcəyik. Məncə, bu oyunda mütləq qalib gəlməliyik. Başqa çıxış yolumuz yoxdur".
   Xatırladaq ki, U-21 seçmə mərhələdə keçirdiyi 5 oyunun hamısında məğlub olub.
   

"Ənənəvi olaraq, oyun boyu əldə etdiyimiz qol imkanlarını bugünkü qarşılaşmada da boşa verdik. Oyun boyu 10-12 real qol epizodlarından yalnız birindən istifadə etdik.
   Rəqibin uzaq məsafədən vurduğu qol bizim üçün gözlənilməz oldu". Fanat.az xəbər verir ki, bu sözləri "Simurq"la oyundan sonra "Turan"ın baş məşqçisi Nizami Sadıqov deyib.
   "Simurq"un baş məşqçisi Roman Pokora isə "Turan"ı təbrik edib: "Meydança və paltardəyişmə otaqları bərbad gündə idi. Bu şəraitsizliyə baxmayaraq, "Turan" çox gözəl və baxımlı oyun göstərir. Onları təbrik edirəm. Biz əldə etdiyimi imkanlardan maksimum istifadə etdik".
   

"Yeni mövsümdən etibarən ölkə xaricində işləmək istəyirəm. Ölkəmə fayda verə biləcək uzun müddətli başqa planlarım da var. Vaxtı çatanda bunları ictimaiyyətə açıqlayacağam". Apasport.az saytının məlumatına görə, bu sözləri Türkiyə milli komandasının sabiq baş məşqçisi Fatih Terim deyib.
   Ötən ilin oktyabrında dünya çempionatının seçmə mərhələsindəki uğursuzluq ucbatından "ay-ulduzlular"ın baş məşqçisi postundan istefa verən 57 yaşlı mütəxəssis hələ də işsizdir. O, Türkiyə jurnallarından birinə verdiyi son müsahibəsində maraqlı ifadələr işlədib: "Həyat mənə bədbinliyin lazımsız olduğunu öyrətdi.
   Şansa heç vaxt inanmıram. Bəzən bacarıqsızlığa "şanssızlıq" deyirlər. Lakin heç bir ciddi uğur təsadüfi ola bilməz. Nə qədər istedadlı olsanız da, intizamlı çalışmadıqda və kifayət qədər əmək sərf etmədikdə həyat bunun dərsini verir".
   Həmçinin, "İmperator" ləqəbli Terim siqaretə qarşı "müharibə"də qalib gəldiyini də açıqlayıb: "15 aydır siqaret çəkmirəm. İradəmi işə saldım, "siqareti atacağam" dedim və buna nail oldum. Yeməklərə gəlincə, xüsusi seçimim yoxdur. Yalnız bişmiş soğanı yeyə bilmirəm. Qalan hər şey qəbuldur".

Dünya futbolunda analoqu olmayan hadisə baş verib. Apasport.az saytının məlumatına görə, Şotlandiyanın "Houk Yunayted" həvəskar klubunun futbolçusu Pol Kuper 1 oyunda 6 qırmızı vərəqə alıb. Bu olay ötən ilin payızına təsadüf etsə də, Şotlandiya Futbol Assosiasiyası faktı uzun müddət gizlədib.
   Qalmaqal "Houk Yunayted"in çempionat çərçivəsində növbəti matçının başa çatmasına 10 dəqiqə qalmış yaşanıb. Görüşün baş hakimi 80-ci dəqiqədə Kuperə ikinci dəfə sarı vərəqə göstərib. Avtomatik qırmızı vərəqəyə çevrilən bu cəza hücumçunun meydandan qovulması ilə nəticələnib. Lakin hakimin qərarından qəzəblənən Pol özünü saxlaya bilməyib. O, sözün əsl mənasında, dişinin dibindən çıxan hər şeyi ədalət təmsilçisinə deyib. Əvəzində, hakim futbolçuya dalbadal 5 dəfə qırmızı vərəqə göstərib.
   Matçdan sonra günahını boynuna almasına, qarşı tərəfdən üzr istəməsinə baxmayaraq, Kuper cəzadan yaxa qurtarmağı bacarmayıb. Şotlandiya Futbol Assosiasiyası onu 2 illiyə diskvalifikasiya edib.

Türkiyə çempionatının oyunlarına təsir etmək üçün bukmeker kontorları ilə işbirliyinə girən futbolçulardan birinin adı açıqlanıb.
   Apasport.az saytının məlumatına görə, Diyarbəkir prokurorluğunun qərarı ilə həbs olunan qruplaşmanın üzvləri arasında Gökhan Ünver də yer alıb.
   Lakin bu oyunçunun hansı kluba məxsus olduğu dəqiqləşməyib. Belə ki, Gökhanın icarə əsasında "Kayseri Ərciyəsspor"da oynadığı iddia olunsa da, klub rəhbərliyi bunu təkzib edib. Kayseri təmsilçisinin hüquqşünası Murat İlhan belə bir futbolçu ilə heç bir əlaqələrinin olmaması haqda bəyanat yayıb.
   Qeyd edək ki, Avstriyanın "Ştadlau" və "Donau" klublarının aşağı yaş qruplarından olan komandalarda çıxış etmiş Ünver son illərdə "Sarıyer", "Qaziantepspor" və "Qaziantep Böyükşəhər Bələdiyyəspor" klublarında çıxış edib.

Norveçli hakim Tom Henninq Evrebenin Çempionlar Liqasında (ÇL) növbəti kobud səhvi FİFA prezidenti Yozef Blatteri də məsələyə qarışmağa məcbur edib. Apasport.az saytının məlumatına görə, dünya ali futbol qurumunun rəhbəri ədalət təmsilçilərinə mübahisəli vəziyyətləri düzgün qiymətləndirməyə kömək edən yeni variantlara baxmağa söz verib. Bu məqsədlə martın 6-da FİFA-da görüş olacaq və orada müxtəlif texniki vasitələrin tətbiqinin mümkünlüyü nəzərdən keçiriləcək. Qeyd edək ki, Evrebe ÇL-də "Bavariya" - "Fiorentina" oyununun (2:1) sonunda Miroslav Klozenin ofsayddan vurduğu qələbə topunu hesaba alıb. O, kobud səhvə yol verdiyini sonradan etiraf edib. Ötən mövsüm ÇL-in yarımfinalında "Çelsi" - "Barselona" oyununda da nəticəyə təsir edən xətalara yol verən Evrebeni hakimlikdən kənarlaşdırılma təhlükəsi gözləyir.

Unibank Premyer Liqasının təsnifat mərhələsində son turun oyunları başa çatdı. Apasport.az saytının xəbərinə görə, baş tutan bu görüşlərdən sonra "altılığ"a düşən sonuncu komanda da bəlli olub.
   "Qəbələ" öz meydanında "Standard"ı məğlub etməklə, mükafatlar uğrunda mübarizəni davam etdirəcək. Ötən il avroliqada çıxış etmiş "Simurq" isə turu qələbə ilə başa vursa belə, ikinci "altılıq"da yarışacaq.
   Turun mərkəzi "İnter" - "Neftçi" görüşünün taleyini Karlsonsun son dəqiqələrdə vurduğu bir qol həll edib. Günün böyük hesablı qələbəsi isə Lənkəranda qeydə alınıb. Yerli "Xəzər-Lənkəran" autsayder Yevlaxın "Karvan" klubunu 3 cavabsız qolla üstələyib.
   Beləliklə, "altılıq"da "İnter", "Qarabağ", "Xəzər-Lənkəran", "Bakı", "Neftçi" və "Qəbələ" mübarizə aparacaq.
   21 fevral
   "Xəzər-Lənkəran" - "Karvan" - 3:0
   İlk dövrədəki oyun - 2:0
   "Qəbələ" - "Standard" - 2:1
   İlk dövrədəki oyun - 2:1
   "Turan" - "Simurq" - 1:2
   İlk dövrədəki oyun - 1:2
   "İnter" - "Neftçi" - 1:0
   İlk dövrədəki oyun - 1:2
   20 fevral
   "Olimpik-Şüvəlan" - "Qarabağ" - 1:1
   İlk dövrədəki oyun - 0:1
   "Bakı" - "Muğan" - 0:0
   İlk dövrədəki oyun - 1:0
   

Futbol üzrə İspaniya çempionatının lideri "Barselona" 23-cü tur çərçivəsində "Rasinq"i çətinlik çəkmədən məğlub edib.
   "Nou Kamp"dakı qarşılaşma meydan sahiblərinin 4:0 hesablı qələbəsi ilə başa çatıb. Qalibin kimliyi fasiləyə qədər müəyyən edilib. Oyunun 7-ci dəqiqəsində hesabı Adres İnyesta açıb, ardınca isə Tyerri Anri (29-cu dəqiqə) və Rafel Markes (34-cü dəqiqə) fərqlənib. Oyunda son nöqtəni 89-cu dəqiqədə "Barselona"nın 18 yaşlı yarımmüdafiəçisi Tiaqo Alkantara qoyub.
   "Barselona" bu qələbədən sonra xallarının sayını 58-ə çatdırıb və turnir cədvəlinə liderliyi inamla davam etdirir. "Rasinq" isə 25 xalla 14-cü pillədədir.
   

Braziliya dünya futbolunda növbəti rekord müəyyənləşdirib. Apasport.az-ın məşhur transfermarket.de saytına istinadən verdiyi məlumata görə, ötən il bu ölkəni 1000-dən artıq futbolçu tərk edib.
   Bu isə o deməkdir ki, Braziliya dünya futbolunda ən əsas ixracatçıdır. Əsasən Avropaya üz tutan həmin 1017 futbolçu daha çox (181) Portuqaliya klublarına keçib. Bu göstəricidə 2-ci yeri Almaniya tutur - 60 futbolçu. Lakin 1017 futbolçudan 707-si xaricdə uğur qazana bilməyərək, bu ilin əvvəlinədək vətənə dönüblər. Qeyd edək ki, Braziliya milli komandalar arasında ən çox dünya çempionu olan (5 dəfə) ölkədir.
   
   

"Bu formal oyun idi. Buna baxmayaraq, nəticəyə görə çox şadam. Çünki bu gün ölkənin ən güclü komandalarından birinə qarşı oynayıram". Fanat.az xəbər verir ki, bu sözləri "Qarabağ"la oyundan sonra "Olimpik-Şüvəlan"ın baş məşqçisi Nazim Süleymanov deyib.
   Süleymanov Premyer Liqanın reqlamentindən narazılıq edib: "Məncə, gələcəkdə çempionatın formatı dəyişdirilsə, yaxşı olar. Çünki bu sistem elə də uğurlu deyil".

"Birinci yarıda ikinci hissədən daha yaxşı oynadıq. Bu gün oyunumuz alınmadı. Müdafiədə səhvlərimiz oldu. Yarımmüdafiədə də boşluqlar yaranırdı". Fanat.az xəbər verir ki, bu sözləri "İnter"lə oyundan sonra "Neftçi"nin baş məşqçisi Vaqif Sadıqov deyib.
   "Rəqib daha sürətli oyun nümayiş etdirirdi və bunun nəticəsində qələbə qazandı. Mən əlimdən gələn hər şeyi etdim. Meydana bir xal üçün çıxmamışdıq. Məqsədimiz qələbə qazanmaq idi", deyə Sadıqov əlavə edib.