Məlum olduğu kimi, Türkiyə və Ermənistan arasında imzalanan Sürix protokolları sonda Ankara ilə ABŞ-ın müəyyən ziddiyyətlər yaşamasına səbəb olub. Buna əsas səbəb isə Vaşinqtonun, heç bir ilkin şərt irəli sürmədən, Ankaradan Sürix protokollarını təsdiq etməyi istəməsidir.
   Məsələyə diqqət yetirən Britaniyanın "Economist" jurnalı isə bir sıra maraqlı məqamlara toxunub və ABŞ-ın Türkiyədəki hərbi bazası olan "İncirliy"in Sürix prtokollarının qurbanı ola biləcəyini vurğulayıb. Bununla bağlı jurnal yazır: "Türkiyə hökuməti Ermənistanla ötən ilin oktyabr ayında sövdələşmə imzalayanda, düşünmək olardı ki, qonşularla "sıfır problemlər" siyasəti öz bəhrəsini verib. Çünki köhnə düşmənlər münasibətlər qurmaq və sərhədi açmaq barədə razılığa gəlmişdilər.
   Türkiyə Ermənistanla sərhədini 1993-cü ildə-Ermənistanla o zaman Dağlıq Qarabağa görə müharibə vəziyyətində olan Azərbaycanla həmrəylik nümayişi kimi bağlamışdı. İndi isə münasibətlərin bərpa olunması üçün əldə edilən sövdələşməyə əsasən, 2 ölkə tarixçilərindən ibarət birgə komissyanın yaradılması nəzərdə tutulurdu. Həmin komissiya Osmanlı dövründə ermənilərin kütləvi qırğını barədə hadisələrə aydınlıq gətirməliydi. Lakin köhnə düşmənçilik asanlıqla yox olmur.
   Sövdələşmə əldə edildiyinin səhəri gün Türkiyənin baş naziri Rəcəb Tayyib Ərdoğan bəyan etdi ki, razılıq Ermənistan Dağlıq Qarabağdan çəkilməyənə qədər reallaşmayacaq. İndi isə Türkiyə yenidən qəzəblənib. Ermənistan Konstitusiya məhkəməsi bu yaxınlarda Sürix protokollarını o şərtlə təsdiqlədi ki, bu sənəd dövlətin əsasını təşkil edən prinsiplərə zidd olmasın. Belə prinsiplərdən biri isə 1915-ci il soyqırımıdır. Türkiyə bu qərara yenidən baxılmasını tələb edib. İndi çoxları hesab edir ki, Türkiyə hökuməti 2 daş arasında qalıb - milliyyətçilər ilə Azərbaycan arasında. Və Ermənistan Konstitusiya məhkəməsinin qərarından bir bəhanə kimi istifadə edir. Ermənistanda isə protokollar təsdiq üçün parlamentə göndərilib.
   Hazırda Türkiyə təcrid olunmuş kimi görünür. Belə ki, Türkiyənin ən mühüm müttəfiqi və Sürix sazişinin ən vacib tərəfdarı olan Amerika yaranmış vəziyyətdə Ermənistanın tərəfini tutub. Rusiya isə iddia edir ki, Türkiyə-Ermənistan münasibətləri Dağlıq Qarabağa bağlanmamalıdır. Bu yanaşmanı Vaşinqton da bölüşür. Sövdələşməyə Ermənistanın özündə də yekdil dəstək verilmir. Millətçilər hökumətin Türkiyə sərhədini tanımasından narazıdır. Onlar Türkiyənin şərq hissəsinin Ermənilərin "tarixi vətəni" olduğunu iddia edir. Prezident Serj Sarkisyan bildirib ki, ratifikasiya Türkiyə parlamentində protokollar təsdiqlənəndən sonra ediləcək. Amerika hadisələrin inkişafını diqqətlə izləməkdədir. Sövdələşmənin təsdiqlənməsi baş tutmasa, Konqresin 1915-ci il hadisələrini söyqırım kimi tanımaq üçün əl-qolu açılacaq. Bu isə, öz növbəsində, Türkiyədə Amerika əleyhinə hissləri coşdura bilər. Nəticədə Türkiyə cavab addımı ata bilər. Bu cür variantlardan biri "İncirlik" hərbi bazasından amerikalıları çıxarmaqdır. Ümidverici məqam ondadır ki, sıravi türklər və ermənilər, öz rəhbərlərinə fikir verməyərək, özləri bildikləri kimi dostluq əlaqələri qurmaqdadır. Türkiyənin özəl Su TV kanalı bu yaxınlarda erməni dilində yeni xəbər proqramının buraxılışına başlayıb. İki ölkə arasında biznes əlaqələri isə, sərhədin bağlı qalmasına rəsmən, gündən-günə Gürcüstan vasitəsilə inkişaf etməkdədir".
   Fransanın nüfuzlu mətbu orqanlarından olan "Le Monde" isə yazır ki, Ermənistan-Türkiyə protokollarının imzalanmasından dörd ay keçmiş iki ölkə münasibətlərinin normallaşması ləngiyir: "Nə Ermənistan parlamenti, nə də Türkiyə Böyük Millət Məclisində beynəlxalq diplomatların "tarixi" adlandırdığı sənəd ratifikasiya olunub. Ermənistan deyir ki, Türkiyə bununla bağlı fikrini bildirməyincə, sənəd ratifikasiya olunmayacaq.
   Protokolların imzalanması ilə bağlı vəcdə gəlmək vaxtı keçib və danışıqlar da "qarşılıqlı məyusluq" mərhələsinə düşüb. Rusiya ilə ABŞ Türkiyə -Ermənistan prosesini sürətləndirməyə çağırır. Qüdrətli dövlətlər 2008-ci ilin yayında Gürcüstanda böhran nəticəsində bölgədə yaranmış qeyri-sabitlikdən sonra Cənubi Qafqazda yeni partlayış təhlükəsini aradan qaldırmaq istəyir. Lakin 16 ildir dondurulmuş vəziyyətdə olan Qarabağ münaqişəsi bölgədə sülh prosesini əngəlləyir.
   Rusiya, ABŞ və Fransanın Minsk Qrupu xəttilə səylərinə baxmayaraq, danışıqlarda heç bir irəliləyiş müşahidə olunmur. Azərbaycan Türkiyənin ənənəvi müttəfiqi və təbii qazın əsas təchizatçısıdır. Ermənistanda bununla əlaqədar ehtiyatlılıq artır, Türkiyənin səmimiyyəti isə şübhə altına alınır.
   2009-cu ildə imzalanmış protokollar keçmişin qaranlıq səhifələrini "elmi və obyektiv surətdə öyrənən tarixi komissiyanın" yaradılmasını nəzərdə tutur. Lakin ermənilər çox vaxt belə vəziyyəti 1915-ci illə bağlı gerçəkliyi "susdurmaq" istəyən Türkiyənin hiyləsi hesab edir.
   Fevralın 11-də Ermənistanın Konstitusiya məhkəməsi protokolların qanuna uyğunluğunu təsdiqlədi, lakin o, Ermənistanın "Osmanlı Türkiyəsində " 1915-ci ildə ermənilərin "soyqırımının beynəlxalq tanınması" uğrunda çıxış edən öz Konstitusiyasının əleyhinə gedə bilməyəcəyini xatırladır. Türkiyə hesab edir ki, bu cür tarixi qeydetmə "qeyri-məqbuldur". Bu fonda hər il aprelin 24-ü yaxınlaşdıqca, Ankaranı ABŞ-dakı erməni lobbisi həyəcanlandırır: o, qorxur ki, olaylar rəsmi olaraq soyqırım kimi tanına bilər".
   Onu da qeyd edək ki, artıq Ermənistan parlamentinin xarici əlaqələr komissiyasında Sürix protokollarına dair ilk müzakirələr keçirilib. Komissiyanın sədri Armen Rustamyan sənədin fevralın 22-də parlamentin gündəliyinə daxil ediləcəyini bildirib. Məsələ ilə bağlı bütün fraksiyaların nümayəndələrindən ibarət işçi qrupun yaradılması barədə də qərar qəbul edilib. Qrup fevralın 22-dək sənədlərin dəqiq müzakirə prosedurunu hazırlamalıdr. Bundan başqa, protokolların bütün komissiyalarda müzakirəyə çıxarılması da nəzərdə tutulur.
   Məsələ ətrafında Armen Rustamyan prezident Serj Sarkisyanı London nitqində protokolların Ermənistan parlamenti tərəfindən təsdiqlənəcəyinə zəmanət verdiyinə görə də tənqid edib. Bu, parlamentin xarici əlaqələr komissiyası sədrinin sözlərinə görə, parlament çoxluğuna göstəriş vermək deməkdir: "Hesab edirəm ki, bu, ölkəmizin nüfuzunun artmasına xidmət etmir. Qanunverici orqanda proseslərə qarantiya vermək nə deməkdir? Bir halda ki, prezident öz vəzifə borcuna görə Konstitusiya üzrə parlamentin normal iş prosesinin qarantı olmalıdır. Bu isə o deməkdir ki, əslində, prezident parlament çoxluğuna parlament daxilində necə səs verməsinə dair göstəriş verir".
   Maraqlıdır ki, prezident Sarkisyan Ermənistan tərəfinin protokolları Türkiyədən sonra ratifikasiya edəcəyini bildirir, onun partiyadaşları isə son günlər öz müsahibələrində protokolların Türkiyədən qabaq təsdiqlənəcəyi ehtimalını istisna etmir. Armen Rustamyan hesab edir ki, bu fakt Ermənistan hakimiyyətinin məsələ ilə bağlı konkret konsepsiyasının olmamasından xəbər verir. Və iqtidar, şəraitdən asılı olaraq, təsadüfi addımlar atır.
   Protokolların tez təsdiqlənməsi, Ermənistan parlamentinin xarici əlaqələr komissiyası sədrinin sözlərinə görə, təslim olmaq və Türkiyənin şıltaqlığından asılı vəziyyətə düşmək deməkdir. Ermənistan rəhbərliyinin Türkiyə tərəfinin protokolları tez imzalamasını istəməsinin səbəbini isə Armen Rustamyan iki prosesin - Qarabağ münaqişəsinin həlli və Ermənistan-Türkiyə tənzimlənməsinin bir-birilə bağlı olması ilə izah edir: "Ermənistan istəyir ki, Türkiyə ilə sərhəd Qarabağ məsələsində istənilən irəliləyişdən daha tez açılsın. Türkiyə isə, əksinə, əvvəlcə Qarabağ məsələsinin həllində tərəqqiyə çatmaq, sonra Ermənistanla münasibətləri sahmana salmaq istəyir. Təbii sual ortaya çıxır. Sərhəd Qarabağ məsələsinin həllilə açılmalı idisə, bu protokolların mənası nədir? Bütün bundan Ermənistan nə əldə etdi? hazırda, Armen Rustamyanın sözlərinə görə, Ermənistanla Türkiyə arasında yarış gedir və Türkiyə istədiyinə nail olsa, demək olar ki, Ermənistan bütün məsələlərdə güzəşt edib.
   

İran dövlət televiziyasının bildirdiyinə görə, ölkədə istehsal olunan ilk raketlərə qarşı dağıdıcı gəmi sınaqdan keçirilib.
   APA-nın "Amerikanın səsi" radiostansiyasına istinadən verdiyi xəbərə görə, "Camaran" adlı hərbi gəmi srağagün ali ruhani lider Ayətulla Əli Xameneyinin təşkil etdiyi mərasimdə nümayiş etdirilib.
   Dövlət televiziyasının verdiyi xəbərə görə, bu növ gəmi su və hava raketlərinin qarşısını almağa yönəlib. Məlumatda o da bildirilir ki, bu gəmidən müasir radar və kimyəvi silahlar daşıyan gəmilərə qarşı da istifadə edilə bilər. Xatırladaq ki, bu ayın əvvəlində də İranın dövlət televiziyası ölkənin yeni raketlər istehsal etməyə başladığını bildirib. Tehran, satellit daşınması üçün istifadə ediləcəyini deyərək, İranın daha bir raketi sınaqdan keçirdiyini bəyan edib.
   

İsrail nüvə silahının yayılmamasına dair sazişə qoşulmayıb. İsrailin Azərbaycandakı səfiri Mixail Lavon Lotem ANS-ə müsahibəsində bildirib ki, onun ölkəsi bu məsələdə də qonşu ölkələrlə müzakirələrin tərəfdarıdır.
   "Bununla bağlı bizim düşüncələrimiz olub. Hazırda da fikir mübadiləsi gedir. Əsas məqsəd Orta Şərqdə boş hərbi sahələrdə bu nüvə silahından istifadədir. Biz çalışırıq ki, bu məsələni qonşu dövlətləri bir masaya yığaraq müzakirə edək. Əlbəttə, müzakirələr daha kiçik məsələdən başlanmalıdır. Daha sonra isə daha mürəkkəb məsələlərə doğru addımlar atılmalıdır. Dediyim kimi, əsas məqsəd boş sahələrdə bu silahlardan təcrübə aparmaqdır", deyə səfir bildirib.
   

"Allaha şükürlər olsun ki, Azərbaycan məntəqədə hər cəhətdən inkişaf etmiş ölkədir və gündən-günə qabağa gedir".
   Bu sözləri APA-ya eksklüziv açıqlamasında İran İslam Şurası Məclisinin Ərdəbildən olan deputatı, İran-Azərbaycan Parlamentlərarası Dostluq Qrupunun rəhbəri Seyid Kazım Musəvi deyib.
   O, Azərbaycan millətinə hörmətini ifadə edərək, azərbaycanlıların qeyrətdə və millətçilik baxımından həmişə nümunə olduğunu bildirib. İki ölkə arasında münasibətlərə toxunan Seyid Kazım Musəvi İranın Azərbaycanın müstəqilliyini tanıyan ilk dövlətlərdən olduğunu xatırladıb: "20 yanvarda Azərbaycanın müstəqilliyi uğrunda özünü qurban verən şəhidlər bu ölkənin xalqının nə qədər şücaətli olduğunu bir daha göstərdi".
   Millət vəkili Qarabağ məsələsinə də toxunub: "Qarabağ Azərbaycanındır, Azərbaycanın da olacaq, bunu hamı bilir. Ermənilərin işğalçı olmasından da hər kəs xəbərdardır. Azərbaycan və onun rəhbərləri, bununla belə, həmişə yüksək insani mədəniyyət nümayiş etdirərək, məsələnin sülh yolu ilə həllinə çalışırlar. Allaha şükür ki, Azərbaycanın uğurları çoxdur. Azərbaycanla Ermənistanı müqayisə etmək isə ümumiyyətlə düzgün deyil. Bilirsiniz ki, biz müsəlman ölkəsiyik və həmişə dost, qardaş, müsəlman olan Azərbaycan xalqının yanındayıq. Qarabağ probleminin çözülməsində də əlimizdən gələn köməyi etməyə hazırıq. Bütün cəhətlərdən haqq Azərbaycanın yanındadır".
   

Dağlıq Qarabağdakı erməni separatçılarının rəhbəri Bako Saakyan bu günlərdə Azərbaycanın digər ərazilərilə cəbhə xəttinə gəlib. Qondarma respublikanın oyuncaq prezidenti Azərbaycan Silahlı Qüvvvlərinin təmas xəttinə yaxın ərazidən erməni ordusunun təlimlərini izləyib. Onun bu səfəri Ağdam, Füzuli və Goranboy istiqamətlərində ağır döyüşlərin getdiyi, üç əsgərimizin şəhid olduğu, 4 əsgərin isə yaralandığı vaxta təsadüf edib.
   Son məlumatlara görə isə, yaralanan əsgərlərdən daha bir nəfəri - E.Adıgözəlov da dünyasını dəyişib. Bako Saakyanı yüksək rütbəli hərbçilər müşayiət edib, sonra isə separatçıların lideri sağ-salamat Xankəndinə dönüb. Ona "gözün üstə qaşın var deyən" də tapılmayıb. Yəqin ki, B.Sakayan Rusiyaya qarşı separatçı hərəkata başçılıq etsəydi, ən azı, həmin cəbhə xəttində yerini müəyyənləşdirib onu məhv edərdilər. Azərbaycanın da separatçı, terrorçu elan etdiyi şəxsi yerindəcə məhv etmək hüququ var. Bunun üçün B.Saakyan öz ayağı ilə Azərbaycan ordusunun mövqelərinin iki addımlığına gəlmişdi. Sadəcə, onun yerini müəyyən etmək və havadan bir raket atəşi buraxmaq kifayət idi. Ancaq bu baş vermədi. Halbuki, Azərbaycanın separatçıları total müharibəyə başlamadan da aradan götürmək imkanı var. Bununla da Qarabağ ermənilərinə öz yerini asanlıqla göstərmək olar. Bütün beynəlxalq təşkilatlar və vasitəçi dövlətlər münaqişənin hərbi yolla həllini pisləyirsə, ayrı-ayrılıqda separatçı liderlərin məhvinə əl atılsa, buna terrorçuluqla mübarizə kimi yanaşmalı olacaqlar. Necə ki, Çeçenistanda irimiqyaslı hərbi əməliyyatlar apardığına görə Avropa Şurası Parlament Assambleyasında Rusiyanın deputat nümayəndə heyəti səsvermə hüququndan məhrum edilmişdi. Amma Çeçenistan prezidenti Cövhər Dudayevin məhv edilməsinə Qərb terrorçuluqla mübarizə kimi yardım etdi. Belədə, Azərbaycan tərəfindən də Qarabağ separatçılarının izlənməsi və məhv edilməsinin vaxtı çatmayıbmı?
   Qarabağ Azadlıq Təşkilatının sədri Akif Nağının fikrincə, Azərbaycan belə bir addım atarsa, bu, beynəlxalq hüquqa uyğun olar: "Bu günlərdə keçirdiyimiz konfransda hüquqşünas alim Kamil Səlimov bildirdi ki, beynəlxalq hüquqda belə bir məsələ var. Bəzi ölkələrdə bu, yazılı qanun şəklində var, bəzilərində isə yazılmamış qanun var ki, separatçıya, terrorçuya qarşı mübarizə aparılırsa, dünyanın istənilən yerində onun bu və ya digər şəkildə məhv edilməsi qəbul olunur. Almaniyada İsrail idmançılarına qarşı 11 nəfərlik qrup tərəfindən terror hərəkəti törədilmişdi. Sonradan İsrail xüsusi xidmət orqanları tərəfindən həmin 11 nəfərin hamısı dünyanın müxtəlif ölkələrində öldürüldü. Eyni zamanda, Rusiyanın çeçen komandirləri məhv etməsi dünya tərəfindən pislənmədi. Zəlimxan Yandarbiyevi Yaxın Şərq ölkələrindən birində öldürdülər, Cövhər Dudayevi raketlə vurub məhv etdilər. Sadəcə olaraq, Azərbaycan iqtidarının mövqeyi başadüşülən deyil. Bu istiqamətdə heç nə etmək istəmirlər. Azərbaycan hərbi canilərin məsuliyyətə cəlb edilməsi istiqamətində də beynəlxalq təşkilatlar səviyyəsində addımlar ata bilər. Dəfələrlə demişik ki, ermənilər Azərbaycanın ərazilərində hərbi təlimlər keçirirsə, Azərbaycan öz aviasiyasını, raketlərini qaldırmalıdır, həmin təlimləri dağıtmalıdır. O zaman beynəlxalq ictimai rəy də bizim tərəfimizdə olacaq. Digər tərəfdən, həmin separatçıları Xankəndində oturduqları yerdə də məhv etmək olar. Onlar o qədər arxayındır ki, özlərini mühafizə də etmirlər. Ona görə də Azərbaycan onları rahat vura bilər. Xüsusilə də cəbhə xəttinə gəliblərsə, onları məhv etmək üçün Azərbaycanın imkanları genişdir. Rəsmi Bakı belə addım atarsa, heç bir beynəlxalq rəydən çəkinməməlidir".
   QAT sədri hesab edir ki, Azərbaycan separatçıların vurulması ilə sülh danışıqlarının pozulmasından da narahat olmamalıdır. Çünki belə danışıqların əhəmiyyəti yoxdur: "Bu danışıqların məqsədi vaxtın uzadılması, onun aldadılması, Azərbaycanın işğal amili ilə barışdırılmasından ibarətdir. Ona görə də hesab edirəm ki, bu danışıqların pozulması Azərbaycanın maraqlarına tam cavab verəcək".
   

İran-Azərbaycan münasibətlərində gərgin proseslər yaşanmaqdadır. Bu gərginlik son vaxtlar İran tərəfindən Azərbaycana qarşı təhdidedici hərəkətlərə yol verilməsilə müşahidə olunur. Öncə İsrailin xarici işləri Avidqor Libermanın Azərbaycana səfərinə etiraz olaraq dindarların Bakıda etiraz aksiya keçirildi.
   Dərhal həmin aksiyanın təşkilatçılığında İranın rolunun olması barədə informasiyalar ortaya çıxdı. Eyni vaxtda İranın Milli Neft Şirkəti Xəzər dənizindəki neft yataqlarında qazma kəşfiyyat işlərinə başladı ki, bu da Azərbaycan tərəfinə xəbərdarlıq kimi qiymətləndirildi. Ardınca İranın Ermənistandakı səfiri Əli Saqayan bəyan etdi ki, gələcəkdə Dağlıq Qarabağa yerləşdirilə biləcək sülhməramlı qüvvələrin tərkibinin müəyyənləşməsində İranın rəyi nəzərə alınmalıdır. Bununla da İran ABŞ, Türkiyə kimi NATO dövlətlərinin öz sərhədində sülhməramlı missiya yerinə yetirməsinə imkan verməyəcəyini bildirdi. Əslində bu, Azərbaycana ünvanlanmış ismarıc idi. Çünki həmin dövlətlər Azərbaycanın Qərbdəki müttəfiqləridir. Ötən həftə İran parlamentinin deputatlarından biri Qarabağı İran ərazisi adlandırdı. Bunlar azmış kimi, İran KİV-lərində Azərbaycanı hədələyən təbliğat da aparılır. Hətta prezident Mahmud Əhmədinejadın Azərbaycanda şiəlik, narkomaniya və ya separatçılığı yaymaq üçün xüsusi konsepsiya ilə çıxış etdiyi bildirilir. Anti-Azərbaycan münasibət o qədər güclənib ki, ölkəmizin Tehrandakı səfirliyi qarşısında keçirilən piketdə Azərbaycanın dövlət bayrağını yandırıblar. Təbrizdəki Konsulluğumuzun binası isə yumurta atəşinə tutulub. Artıq iki ölkə arasında diplomatik ziddiyyətlər artmağa başlayıb. İran münaqişəli vəziyyətin dərinləşməsində maraqlı görünür. Azərbaycan isə artıq İrana baş vermiş hadisə ilə bağlı nota verib. İranın əsl niyyətinin nədən ibarət olduğunu təhlil etmək üçün politoloq Qabil Hüseynliyə müraciət etdik.
   Ekspert hesab edir ki, məsələyə səbəb və nəticə kateqoriyasından yanaşsaq, İranın Azərbaycanı sionizmə qulluq etməkdə ittiham etməsi sadəcə bir bəhanədir. Əsl səbəblər isə İranın özünün dünya dövlətlərilə münasibətlərindən qaynaqlanır: "Bu problemlər də İranın nüvə proqramı, terrorçuluğa dəstək verməsilə, daxildə insan hüquqlarını pozması kimi qanunsuz hərəkətlərilə bağlıdır. Qaldı ki, İranın suverenliyimizə qəsd xarakterli addımlarına, bütün bunlar gündəmi dəyişmək, vəziyyəti qızışdırmaq, əzələ nümayiş etdirmək məqsədi daşıyır.
   Əsas hədəf olaraq isə Qərb dövlətləri seçilib. Çünki həmin dövlətlər Azərbaycanda neft-qaz sektoruna sərmayə yatırıb. İran Xəzər dənizində neft və ya qaz hasilatı ilə məşğul ola biləcək texnoloji imkanlara malik deyil. İran gəmilərinin Azərbaycan sularında kəşfiyyat-qazma işləri aparmasına da imkan verilməyəcək.
   O ki qaldı İranla sərhədlərimizdə sülhməramlı qüvvələrin yerləşdirilməsi nə, bu bizim iradəmizdən asılı olmadığı kimi, İranın iradəsindən heç asılı deyil. Sülhməramlı qüvvələrin tərkibinin seçilməsində Azərbaycanın da, Ermənistanında, vasitəçi dövlətlərin də rəyi nəzərə alınacaq. İran da gətirib Azərbaycanla sərhəddə, öz ərazisində Ermənistanın və ya HƏMASın hərbi bazalarını yerləşdirə bilər, bu onun suveren hüququdur.
   İran qazan kimi qaynayır. Azərbaycan səfirliyinin, konsulluğunun yumurta atəşinə tutulması, bayrağımızın yandırılması azərbaycanlıların əlilə həyata keçirilir. Bu da siyasi isterikadır. İran siyasi elitasında böyük parçalanma var. Böyük qüvvələr dini lider Xamneyiyə qarşı birləşiblər. İran sanki inqilabi bir dövr yaşayır. O səbəbdən də diqqəti yayındırmaq üçün düşünüb belə kiçikmiqyaslı avantüralar tapırlar. Bu siyasi texnologiyadır, amma onu həyata keçirmək mənasızdır".
   Q. Hüseynli bildirdi ki, rəsmi Bakı bu hadisələrə biganə qalmamalı və İranın səfirini çağırıb Azərbaycana qarşı təbliğat maşınının dayandırılmasını tələb etməlidir: "Azərbaycanın əlində olan texniki imkanlar İranın imkanlarından qat-qat böyükdür. Biz çox asanlıqla İranı inqilabiləşdirə və orada daxili təbəddülat yarada bilərik. Amma Azərbaycan, İranla qonşu dövlət kimi, münasibətlərin dostluq üzərində qurulmasını istəyir. Belə bir vəziyyətdə İranın atdığı addımlardan onun özü ziyan çəkə bilər".
   Politoloq İran prezidentinin Azərbaycanla bağlı irəli sürdüyü təklifləri də ağlabatan hesab etmir: "Birincisi ona görə ki, Azərbaycanın 90 faizi şiə müsəlmanlardır. Görünür, Əhmədinejad Azərbaycanı yaxşı tanımır. Separatçılıq Qarabağda baş qaldırıb və bitib.
   Onlara ərazicə talışlar yaxındır, o da qeyri-mümkündür. Çünki talışlar Azərbaycan əhalisilə qaynayıb-qarışıb, qohumlaşıb və yerli əhalini çox sevirlər. Ona görə də talışlar belə təxribata getməz. Qalan təxribatçı əməlləri törətməyə isə İranın gücü çatmayacaq".