Futbol üzrə Azərbaycan çempionatında I divizionun favoritlərindən sayılan "Gəncə" klubu Premyer Liqadan kənarda qala bilər. AFFA-nın baş katibi Elxan Məmmədovun apasport.az saytına verdiyi məlumata görə, Gəncənin eyniadlı komandası lisenziyalaşdırma ilə bağlı tələbləri yerinə yetirmir.
   Belə ki, sözügedən klub lisenziyalaşdırma prosesinin ilk mərhələsinə qatılmadığından, idman meyarları və infrastruktur üzrə sənədləri AFFA-ya təqdim etməyib.
   "İlk mərhələ fevralın 15-də başa çatsa da, "Gəncə" rəhbərliyi lazımi sənədləri AFFA-ya təqdim etməyib. Halbuki, "Gəncə" rəsmiləri ilə danışmışıq və onlar lisenziyalaşdırma prosesində iştirak edəcəklərini bildiriblər" - deyə Məmmədov vurğulayıb.
   Baş katib deyib ki, qarşıdakı günlərdə "Gəncə"nin sənədləri AFFA-ya təqdim edəcəyi istisna deyil: "Ola bilər ki, sənədlər qarşıdakı günlərdə göndəriləcək, ancaq "Gəncə"yə Premyer Liqada oynamaq üçün lisenziya verilib-verilməyəcəyini söyləməkdə çətinlik çəkirəm. Məsələ burasındadır ki, bizim əsas vəzifəmiz sənədləri toplamaqdır, klublara lisenziyanı isə xüsusi komissiya verir. Əgər "Gəncə" mövsümün sonunda ilk iki yerdən birini tutsa belə, lisenziya ala bilməyəcəyi təqdirdə, Premyer Liqaya buraxılmayacaq. Bununla bağlı qaydalar birmənalı və qətidir: lisenziyası olmayan Premyer Liqa klubu növbəti mövsümü I divizionda başlayacaq. Eyni zamanda, I divizionda 1-2-ci yerlərin sahiblərindən hansısa lisenziyaya malik olmasa, Premyer Liqada çıxış edə bilməyəcək. "Gəncə" rəhbərliyi Premyer Liqada oynamaq istədiklərini dəfələrlə bildiriblər. Ancaq görünür, onlar 2010/11 mövsümündə Premyer Liqaya yüksəlmək istəmirlər".
   Qeyd edək ki, lisenziyalaşdırma prosesində ikinci mərhələ (kadr-inzibati və hüquqi meyarlar) martın 15-də, üçüncü mərhələ (maliyyə meyarları) isə aprelin 5-də yekunlaşacaq. Məhz bundan sonra lisenziya veriləcək klubların adları açıqlanacaq.

Məşhur ukraynalı peşəkar boksçu Vitali Kliçko bu il karyerasını başa vurmaq niyyətindədir.
   Lent.az-ın "UNİAN"a istinadən verdiyi məlumata görə, 39 yaşlı idmançı cəmi bir çempionluq kəmərinin çatışmadığını bildirib. Kliçko bu il boks əlcəklərini mıxdan asacağını söyləyib: "Kiminsə fizionomiyasını "təmizləmək" üçün müxtəlif şəhərlərə yollanmaqdan əl çəkəcəyəm".
   Qeyd edək ki, Vitali Kliçko 2009-cu ildə 3 dəfə Ümumdünya Boks Şurasının çempion titulunu müdafiə edib.

"Santosa" icarəyə verilən braziliyalı Robinyo mövsümün sonunda İngiltərənin "Mançester Siti" klubuna dönmək istəmədiyini bildirib. "Sky Sports" xəbər verir ki, Robinyo "Santos"da oynamaqla CAR-da keçiriləcək Dünya çempionatında Braziliya yığmasının heyyətində yer alacağını düşünür. "Avropa həyatı məni məyus etdi. Braziliyada evim, dostlarım və möhtəşəm komandam var. "Santos"u tərk etmək istəmirəm. Məhz burda mən xoşbəxtəm", - deyə braziliyalı forvard bildirib.

Premyer Liqanın təsnifat mərhələsinin sonuncu - XXII turunun oyunlarının başlama vaxtları və keçiriləcəyi stadionlar məlum olub. Fanat.az xəbər verir ki, turun oyunları iki gündə - şənbə və bazar günü keçiriləcək. Yenə bütün oyunlar eyni saatda - 14.00-da başlayacaq. Amma bu dəfə də bir istisna olacaq. Belə ki, "Bakı" - "Muğan" qarşılaşmasına 15 dəqiqə gec - saat 14.15-də start veriləcək. Turun əsas oyunu - Bakı derbisi olan "İnter" - "Neftçi" qarşılaşması bazar günü keçiriləcək.
   20 fevral
   Olimpik-Şüvəlan - Qarabağ
   Bakı - Muğan
   21 fevral
   Xəzər Lənkəran - Karvan
   Qəbələ - Standard
   Turan - Simurq
   İnter - Neftçi

"Qalatasaray"ın gənc kapitanı Arda Turan milli çempionatda etdiyi məhsuldar ötürmələrin sayına görə Avropada 5-ci yerdə qərarlaşıb. Bu mövsüm Superliqada 19 oyunda meydana çıxan 23 yaşlı futbolçu 11 dəfə komanda yoldaşlarının fərqlənməsinə şərait yaradıb.
   Apasport.az saytının xəbərinə görə, bu göstəriciyə əsasən, "Anderlext"in mərakeşli yarımmüdafiəçisi Mbark Bussufa liderdir. 25 yaşlı futbolçu 21 oyunda 14 məhsuldar ötürmə edib. Onun ən yaxın izləyicisi isə bir başqa türk - "Verder"in sol cinah yarımmüdafiəçisi Mesut Özildir.
   

UEFA prezidenti Mişel Platini müasir futbolun ən yaxşılarının adlarını açıqlayıb. "Barselona"nın rəsmi saytına müsahibə verən fransız mütəxəssis Kataloniya klubunun gənc vunderkindi Lionel Messi haqqında tərifləri yağdırıb: "Messi ulduzların ulduzudur. Ötən ilin dekabr ayında FİFA-nın dünyanın ən yaxşı oyunçusu mükafatını təqdimetmə mərasimində digər futbolçuları görəndə hamısının yaxşı oyunçu olduğunu başa düşdüm. Amma Messi onların hamısından yaxşıdır. Ondan sonra Kriştianu Ronaldo, Kaka və digərləri gəlir".
   

Türkiyənin "Beşiktaş" klubunda struktur dəyişiklikləri baş verib. Apasport.az saytının məlumatına görə, İstanbul təmsilçisinin İdarə Heyətinin növbəti yığıncağında yeni vəzifə bölgüsü gerçəkləşib.
   Dəyişikliklər "Xəzər-Lənkəran" klubunun fəxri prezidenti, "Palmali" Şirkətlər Qrupunun rəhbəri Mübariz Mənsimovdan da yan ötməyib. Belə ki, "Palmali"nin əməkdaşı və "Beşiktaş"dakı nümayəndəsi Ələddin Aykaç sponsor məsələləri üzrə vitse-prezident vəzifəsindən kənarlaşdırılıb. Bundan sonra o, Futbol Komitəsinin üzvü olacaq. Bu komitə İstanbul təmsilçisinin transferlərinə cavabdehlik daşıdığından, Aykaç "futbolçu bazarı"nda daha çox söz sahibi olacaq.

Ağdamın "Qarabağ" futbol klubunun futbolçusu Əfran İsmayılov Unibank Premyer Liqasında 2009-cu ilin dekabr ayının yekunlarına görə, ən yaxşı futbolçu seçilib. Müvafiq qərar Peşəkar Futbol Liqası tərəfindən verilib.
   Xatırladaq ki, oktyabr və noyabr aylarında Unibank Premyer Liqasının ən yaxşı futbolçuları hazırda "Tvente"nin şərəfini qoruyan Vaqif Cavadov və "Xəzər Lənkəran"lı Mario Souza seçilmişdi.
   

"Barselona" klubunun baş məşqçisi Xosep Qvardiola fransız futbolçusu Tyerri Anrinin xidmətində maraqlı deyil. Futbolçuya gələn mövsümün əvvəlindən özünə yenu klub axtarmaq məsləhət görülüb.
   Bu mövsüm "Barselona"nın heyətində sadəcə 13 qarşılaşmada meydana çıxan Anrinin ABŞ-ın "Nyu York" klubuna keçmək ehtimalı var.
   Xatırladaq ki, Tyeri Anri karyerasının ən parlaq dövrünü İngiltərənin "Arsenal" klubunda keçirib.
   

2009/2010 mövsümü başa çatdıqdan sonra AFFA Hakim-İnspektorlar Komitəsində (HİK) böyük islahatlar aparılacaq. Bu haqda Lent.az-a HİK-in sədri Gülağa Cabbarov məlumat verib.
   Cabbarovun sözlərinə görə, ilk növbədə, hakim-inspektorlar attestasiyadan keçəcəklər. Attestasiya futbol qaydaları, hakimliyin keyfiyyətinin qiymətləndirilməsi mexanizmi amillərini əhatə edəcək: "Növbəti mövsümün hakim-inspektorları seçim qaydalarına uyğun müəyyənləşdiriləcək. Hakim-inspektorlar futbol adamları olmalıdırlar".
   Lakin HİK sədri hazırkı hakim-inspektorlar arasında kimlərin artıq olduqlarını ilə bağlı suala konkret cavab verməyib. Cabbarov bunu etik baxımdan düzgün saymayıb: "Biz mövsümün əvvəlində bütün hakim-inspektorların siyahısını təsdiqləmişik. İndi onların hansının artıq olduğunu demək etik baxımdan doğru olmazdı. Mövsüm başa çatsın, attestasiya keçirək, sonra da kimin hakim-inspektor kimi fəaliyyətini davam etdirəcəyinə aydınlıq gəlsin".