"Azərenerji" Açıq Səhmdar Cəmiyyəti yüksəkgərginlikli elektrik hava xətlərinin altındakı obyektlərin siyahısını açıqlayıb.
   Bu barədə "OLAYLAR"a qurumun mətbuat xidmətinin rəhbəri Ələkbər Bəxşəliyev məlumat verib. Məlumata görə, araşdırmalar zamanı həmin zəbt edilən ərazilər arasında böyük obyektlərin də tikildiyi müəyyən edilib. Ələkbər Baxşəliyev həmin əraziləri də açıqlayıb. Araşdırmalar zamanı məlum olub ki, 110 kilovoltluq Ramana hava xəttinin Nizami rayonu ərazisində avtomobil dayanacağı, maşın təmiri sexi, "Gilavar" kafesi, "8-ci kilometr" yarımstansiyası ərazisində şadlıq evləri və digər tikililər, 220 kilovoltluq "Şirvan" hava xəttinin Səbail rayonu ərazisindəki "Naftalan" Müalicə Mərkəzi və müxtəlif tikililər Bakı şəhəri ərazilərində hava xətlərinin altında tikilib və fəaliyyət göstərir. Bundan başqa, Sumqayıtda 110 kilovoltluq Sumqayıt hava xəttinin altında yaşayış evləri və bağ evləri, 330 kilovoltluq Dərbənd hava xəttinin Siyəzən, Dəvəçi, Xaçmaz və Qubadakı hissəsində yaşayış evləri, fermer təsərüüfatları fəaliyyət göstərir. Həmin ərazilər bu cür obyektlər tərəfindən zəbt edilib". Ələkbər Baxşəliyevin dediyinə görə, bununla yanaşı, iki dövrəlik 220 kilovoltluq hava xətlərinin altındakı torpaq sahələri Suraxanı və Sabunçu rayonunun ərazilərində yaşayış evləri, 110 kilovoltluq 2,3,4 və 5-ci hava xətlərinin altı Əzizbəyov rayonu ərazisində bağ evləri, yardımçı tikililər, yaşayış evləri və restoranlar, 220 kilovoltluq Hövsan hava xəttinin Nizami rayonu ərazisindəki budaqlanma hissəsinin altı Nizami və Xətai rayonları ərazisində "Kleopatra" və "Tac Mahal" şadlıq evləri, "Nərmin" kafesi və yaşayış evləri, yanacaqdoldurma məntəqəsi tərəfindən zəbt edilib. Bundan başqa Maştağa hava xəttinin altını, Maştağada "Xəyal" firması zəbt edib. Ələkbər Baxşəliyev bildirib ki, bununla yanaşı, hava xətlərinin bölgələrdən keçən hissələrini də üzüm bağları, fermer təsərrüfatları və digər obyektlər tutub. Artıq bununla bağlı "Azərenerji" siyahı hazırlayıb və həmin obyektlərin hava xətlərinin altını zəbt etməsilə bağlı hüquq mühafizə orqanlarına müraciət olunub.
   
   

Standartlaşdırma, Metrologiya və Patent üzrə Dövlət Komitəsinin 2 saylı Ərazi Dövlət Nəzarəti İdarəsindən verilən məlumata görə, adıçəkilən qurumun əməkdaşları srağagün Gəncə şəhərindəki yanacaqdoldurma məntəqələrində reydlər keçirib.
   ("OLAYLAR"İA) 3 məntəqədən 2-də metroloji standartın tələbinin pozulduğu aşkarlanıb: "Standarta əsasən, yanacağın hər 10 litrinə görə 50 millilitr çox və ya az vurulması xətasına yol verildiyi halda, sözügedən məntəqələrdə bu fərqin 200 - 300 millilitr olduğunu müşahidə etdik. Buna səbəb isə yanacağı avtomobillərin çəninə vuran aparatlara komitənin vurduğu möhürlərin həmin məntəqələrin sahibləri tərəfindən qanunsuz olaraq qırılmasıdır. Yəni aparatlar yanacağın hər bir litrə görə 20 - 30 millilitr az ötürülməsi üçün nizamlanıb". ("OLAYLAR"İA) Aşkarlanan faktlar üzrə aktlar tərtib olunub və yanacaqdoldurma məntəqələrinin sahiblərinə xəbərdarlıq edilib. Belə hallara yol verilməsinə təkrar rast gəlinəcəyi təqdirdə vəzifəli şəxslər 1500 manatdan 2 min manatadək, hüquqi şəxslər isə 3 min manatdan 5 min manatadək cərimələnəcək. Reydlər ölkənin qərb bölgəsinin digər şəhərlərində də davam etdiriləcək. ("OLAYLAR"İA)

Azərbaycan Nazirlər Kabineti gənclərin xarici ölkələrdə təhsili üzrə aylıq xərc normalarının cədvəlinə daha üç ölkə üzrə xərclərin müəyyənləşməsinin əlavə edilməsini qərara alıb. Bu barədə Nazirlər Kabinetinin məlumatında deyilir.
   Qərarda "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"na əsasən Azərbaycan gənclərinin xarici ölkələrin ali məktəblərində təhsil haqlarının ödənilməsi cədvəlində Ukrayna, Macarıstan və Bolqarıstanda aylıq xərclər göstərilib.
   Qərara əsasən, Ukraynada təhsil alanlar üçün aylıq 960 dollar, Macarıstanda - 990 avro, Bolqarıstanda isə 890 avro müəyyən olunub.
   Nazirlər Kabinetinin 2008-ci il 27 noyabr tarixli 261 saylı qərarı ilə təsdiq edilmiş cədvəldə dünyanın 27 ölkəsində təhsil alanların aylıq xərcləri (həmçinin yaşayış, tədris materialları üzrə və yemək xərcləri) müəyyən olunub.
   

Azərbaycanda ötən il icra olunmayan məhkəmə qərarlarının əksəriyyəti borcun ödənilməməsilə bağlıdır.
   Ədliyyə Nazirliyinin Məhkəmə İcraçıları Baş İdarəsinin rəisi Xanlar Zeynalov cümə axşamı Trend News-a bildirib ki, borcun ödənilməsilə bağlı məhkəmə qərarlarının icra olunmamasının əsas səbəbi borclu şəxsin əmlakının olmamasıdır. "Araşdırma zamanı məlum olur ki, həmin şəxslərin borcu ödəməyə əmlakı yoxdur. Bu halda həmin şəxsləri cinayət məsuliyyətinə də cəlb etmək mümkün deyil"- İdarə rəisi bildirib. Zeynalovun sözlərinə görə, ötən il idarənin icraatında 114 min 229 icra sənədi olub. Bu isə 2008-ci illə müqayisədə 12,29 faiz çoxdur. İcrada olan işlərin 98806-sı məhkəmə və digər orqanların mülki, iqtisadi mübahisələrə və inzibati xətalara dair işlərlə bağlıdır və həmin qərarların 85 faizinin icrası təmin olunub.
   İcrada olan işlərin yerdə qalan hissəsi isə azadlıqdan məhrumetmə ilə əlaqədar olmayan cəzaların tətbiqilə bağlı məhkəmə qərarlarıdır. İdarə rəisi bildirib ki, icraya yönəldilən məhkəmə qərarlarının əksəriyyəti alimentin tutulması, torpaq mübahisələri, mənzildən çıxarılma, mənzilə köçürülmə, borcun ödənilməsi, cinayət nəticəsində vurulan ziyanın ödənilməsilə bağlıdır. Zeynalovun sözlərinə görə, məcburi köçkünlər tərəfindən evləri zəbt olunmuş vətəndaşların mənzillərinin boşaldılması ilə bağlı məhkəmə qərarlarının icrasında dönüş yaranıb. O hesab edir ki, bu işlərlə bağlı icra olunacaq məhkəmə qərarlarının sayı artacaq.
   "Ötən il mənzildən çıxarılma ilə bağlı 550-dən artıq məhkəmə qərarı icra edilib. Mənzilə köçürülmə ilə bağlı 900 qərar icra olunub. Onların əksəriyyəti məcburi köçkünlər tərəfindən zəbt olunmuş mənzillərlə bağlıdır",- Zeynalov vurğulayıb. Ötən il İdarənin icraatında alimentlə bağlı 25 minə qədər məhkəmə qərarı olub. Onlardan 3700-dən çoxu uşaq 18 yaşına çatdığı üçün icra olunub. 22 minə yaxın iş icraatı davam edir. Zeynalov bildirib ki, 2008-ci illə müqayisədə alimentlə bağlı icraatda 4000 iş artıb. 2009-cu ildə məhkəmə qərarını ödəməkdən qəsdən boyun qaçırdığı üçün 819 şəxs inzibati məsuliyyətə cəlb olunub, 125 nəfər barəsində cinayət işi başlanıb. İcra sənədlərinin yerinə yetirilməsi nəticəsində hüquqi və fiziki şəxslərə ödənilən vəsaitin məbləği ötən il 81,14 faiz artaraq 38 milyon manatdan çox olub.
   

Qəbələ sakini bədbəxt hadisə nəticəsində ölüb. Daxili İşlər Nazirliyinin mətbuat xidmətindən APA-ya verilən məlumata görə, rayonun Tikanlı kəndi ərazisindəki meşə zolağında kənd sakini Bəhruz Şirinov odun doğrayarkən qayadan qopmuş daş parçası onun başına düşüb. Xəsarətlə xəstəxanaya yerləşdirilən B.Şirinov orada dünyasını dəyişib.
   
   

Dünən Ağır Cinayətlərə Dair İşlər üzrə Hərbi Məhkəmədə tabeliyində olan əsgərləri ölümlə hədələyərək, onlara qarşı qeyri-əxlaqi hərəkətlər etməkdə təqsirləndirilən kiçik çavuş Arif Qurbanovun cinayət işi üzrə məhkəmə baxışı başlayıb.
   APA-nın xəbərinə görə, hakim İsgəndər Hacıyevin sədrliyilə qapalı keçirilən prosesdə prokuror ittiham aktını elan edib. İttihama görə, 2009-cu ilin avqustunda Müdafiə Nazirliyinin Qazax rayonunda yerləşən "N" saylı hərbi hissəsində xidmət edən kiçik çavuş Qurbanov Arif Akif oğlu tabeliyində olan 3 əsgəri müxtəlif günlərdə öldürəcəyilə hədələyib. Bununla yanaşı, A.Qurbanov həmin əsgərləri qeyri-əxlaqi hərəkətlər etməyə məcbur edib və istəyinə nail olub.
   

Azərbaycanda gənclərin ailə həyatı qurması ilə bağlı təzadlı vəziyyət yaranıb. Bir tərəfdən həddi-büluğa çatmayan qızların vaxtından əvvəl ərə verilməsi təhlükəli tendensiya kimi qəbul edilir. Digər tərəfdən, oğlanların (paytaxtda qızların da) gec ailə qurması narahatlıq doğurur.
   Statistik rəqəmlərə görə, 2009-cu ildə Azərbaycanda 90 min nikah bağlanıb və elə həmin il 9 min boşanma qeydə alınıb. . Müqayisə üçün qeyd edək ki, 2000-ci ildə Azərbaycanda təxminən 50 min nikah bağlanmışdı və bunlardan 5 mini pozulmuşdu. Gənclərin ailə həyatı qurmağa tələsməməsi və evləndikdən az müddət sonra boşanmalarına səbəb kimi sosial və mənəvi-psixoloji faktorlar irəli sürülür.
   Kişilərdə ailə həyatı qurmaqla bağlı orta yaş həddi 27, qızlarda isə 24 götürülür ki, bu da ürəkaçan göstərici deyil. Xüsusilə də, Bakıda gənclər daha gec evlənir. Maddi durumdan irəli gələrək evsizlik, işsizlik, psixoloji faktor olaraq inamsızlıq kimi problemlər Azərbaycan gəncinin vaxtında ailə qurmasına mane olur.
   Bu günə qədər hökumət və ictimai qurumlar gəncləri ailə qurmağa sövq etmək üçün əsaslı proqramlar işləyib hazırlamayıb, bu istiqamətdə hər hansı bir tədbir görməyiblər. Müşahidələr göstərir ki, kənd rayonlarında yaşayan və ali təhsili olmayan gənclər daha tez ailə həyatı qurur. Ali təhsillilər isə 25 yaşdan sonra evlənmək barədə fikirləşir.
   Milli Məclis gəncləri daha erkən ailə həyatı qurmağa sövq etmək üçün yeni qanun layihəsi üzərində işləyir.
   "Gənc ailələrin sosial müdafiəsinin gücləndirilməsi haqqında" adlı qanun layihəsinin məqsədi nisbətən kasıb ailələrdən olan gənclərin sosial müdafiəsini gücləndirməkdir. Layihədə gənclər üçün bir çox sosial güzəştlər nəzərdə tutulur. Belə ki, layihə Milli Məclisdə qəbul olunsa, yeni evlənən kasıb gənclərə birdəfəlik maliyyə yardımı veriləcək. Bunun üçün nikaha girənlərdən birinin yaşının 35-dən aşağı olması kifayətdir. Bundan başqa, belə ailələrdə dünyaya gələn ikinci və üçüncü uşağa görə birdəfəlik pul yardımının məbləği artırılacaq.
   Qanun layihəsində gənc ailələri də əhatə edən sosial ipoteka kreditlərinin genişləndirilməsi, şərtlərin yumşaldılması nəzərdə tutulur. Milli Məclisin Sosial siyasət komitəsinin hazırladığı layihədə gənc ailələrin daimi iş yerlərilə təmin olunması üçün kvotanın ayrılması nəzərdə tutulur.
   Xatırladaq ki, inkişaf etmiş ölkələrin təcrübəsit əsasında hazırlanmış qanun layihəsi ilin sonunadək təkmilləşdiriləcək və sonda Milli Məclisin plenar iclasına çıxarılacaq.
   Milli Məclisin Sosial siyasət komitəsinin üzvü Məlahət Həsənova bizimlə söhbətində bildirdi ki, bu təklif çox qiymətlidir və gənc ailələrin sosial müdafiəsinin gücləndirilməsinə xidmət edir: "Bilirsiniz ki, Nazirlər Kabineti gənc ailələrin sosial müdafiəsinin gücləndirilməsi məqsədilə dövlət proqramı hazırlayıb. Gənclərə ipoteka kreditlərinin verilməsi reallaşdırılıb. Bu siyasətin davamı olaraq, Milli Məclis "Gənc ailələrin sosial müdafiəsinin gücləndirilməsi haqqında" qanun layihəsi üzərində işləyir. Layihədə yeni ailə quranlara birdəfəlik yardımın verilməsi məsələsi var. Amma bu çox mürəkkəb və çətin işdir. Bəzən olur ki, ailə həyatı quran tərəflərdən biri imkanlı, digəri imkansızdır. Həmçinin, ailə quranların vəziyyətinin öyrənilməsi proseduru çətindir. Müzakirələrdən sonra bununla bağlı müəyyən qərara gələcəyik".
   M.Həsənova onu da bildirdi ki, qanun gənclərin daha tez ailə həyatı qurmasına təkan verəcək: "Ailə planlaşdırılması baxımından qanunun qəbulu çox vacibdir".
   

Rusiya Federasiyası tərəfindən barəsində beynəlxalq axtarış elan edilmiş azərbaycanlı Bakıda özünü öldürüb. Bu barədə APA-ya Nərimanov Rayon Prokurorluğundan məlumat verilib.
   Hadisə fevralın 17-də qeydə alınıb. Neftçala rayon sakini, 1974-cü il təvəllüdlü Zeynalov Səxavət Firudin oğlu Nərimanov rayonu ərazisində yerləşən yaşıllıq zolağında özünü asıb. Onun özünə qəsd etməsinin səbəbləri barədə hələlik məlumat yoxdur. Nərimanov Rayon Polis İdarəsindən isə APA-ya bildirilib ki, araşdırma nəticəsində S.Zeynalovun beynəlxalq axtarışda olduğu müəyyən edilib. O, Rusiya Federasiyası Cinayət Məcəlləsinin 158-ci maddəsilə təqsirli bilinib. Baş vermiş hadisə ilə bağlı Nərimanov Rayon Prokurorluğu tərəfindən Cinayət Məcəlləsinin 125-ci (özünü öldürmə həddinə çatdırma) maddəsilə cinayət işi başlanıb, istintaq tədbirləri davam etdirilir.
   

DİN-dən verilən məlumata görə, rayon sakini Zamiq Mirzəyev həmyerlisi Dəyanət Cəfərova bıçaqla xəsarət yetirib.
   Sabirabad RPŞ əməkdaşlarının keçirdiyi əməliyyat tədbirləri nəticəsində Z.Mirzəyev tutulub. İlkin araşdırma zamanı hadisənin münaqişə zəminində baş verdiyi müəyyən edilib.
   

Səbail Rayon Polis İdarəsi əməkdaşlarının həyata keçirdiyi əməliyat tədbirləri nəticəsində Ramil Əsgərov oğurluq etdiyinə görə saxlanıb.
   Onun ətrafında aparılan əməliyyat tədbirləri nəticəsində Bibiheybət qəsəbəsində yaşayan Bəşir Səfərovun evindən qızıl əşyaları oğurladığı müəyyən edilib. Hazırda onun digər oğurluq hadisələrində iştirakı araşdırılır.
   
   

İmişli rayonunda qanunsuz ov edən şəxslər tutulub. Bu barədə APA-ya İmişli Rayon Polis Şöbəsindən məlumat verilib.
   Məlumatda bildirilir ki, rayon sakinləri Vəli Babaşov, Asif Orucov, Fəxrəddin Sadıqov və Elman Məhərrəmov qanunsuz ov edərkən saxlanıb. Onlardan 56 kiloqram balıq, 3 ədəd çöl quşu, 1 ədəd ov tüfəngi, 24 ədəd güllə və ov ləvazimatları götürülüb.Faktla bağlı araşdırma aparılır.
   

Cari ilin yanvar ayında Bakı Metropolitenindən 14,9 mln. sərnişin istifadə edib. Bu barədə "APA-Economics"ə Dövlət Statistika Komitəsindən məlumat verilib.
   Yanvar ayında metro nəqliyyatının xidmətlərindən istifadə edənlərin sayı 2009-cu ilin yanvar ayı ilə müqayisədə 17,6% azalıb. Xatırladaq ki, 1967-ci ildə istifadəyə verilmiş Bakı Metropoliteninin hazırda 22 stansiyası və 1 deposu var. Ötən ilin dekabr ayında Metropolitenin "Azadlıq prospekti" stansiyası istismara verilib.

Binəqədi Rayon Polis İdarəsindən APA-ya verilən məlumata görə, dünən 11.00 radələrində Sulutəpə qəsəbəsində yerləşən kafedə qaz sızması nəticəsində güclü partlayış qeydə alınıb.
   Xoşbəxtlikdən, hadisə baş verən zaman kafedə heç kim olmadığından, xəsarət alan olmayıb. Bununla belə, kafe tamamilə yararsız hala düşüb. Hazırda hadisə yerində araşdırma aparılır.
   
   
   
   
   

Dünən Ehtiyatda Olan Zabitlər Birliyinin (EZB) ofisində itkin düşənlərin ailələrinin sosial problemlərilə bağlı Dəyirmi Masa keçirilib.
   Tədbirdə itkin düşən şəxslərlə bağlı bir çox və o cümlədən, mənzil, sığorta haqlarının ödənməsi kimi problemlərin hələ də həlli tapılmadığı xüsusi vurğulanıb. "Problemin müzakirəsilə bağlı bir sıra rəsmi qurumları dəvət etsək də, tədbirə heç bir rəsmi qurum qatılmadı" - deyə EZB sədri Yaşar Cəfərli bildirib. Tədbirdə əsir, girov və itkin düşənlərlə iş üzrə dövlət komissiyasının siyahısında adı itkin kimi keçən 4500 nəfərin çoxunun hərbi qulluqçu olduğu iddia edilib və bu hərbi qulluqçuların Qarabağda hərbi əməliyyatların getdiyi 1992-94-cü illərdə itkin düşdüyü bildirilib.
   Tədbirdə çıxış edən EZB sədri Y.Cəfərli, bu məsələnin üstündən bu qədər çox vaxt keçməsinə baxmayaraq, problemin hələ də həllini tapmadığını söyləyib. Onun sözlərinə görə, bir şəxsin itkin düşmüş sayılması üçün məhkəmə qətnaməsi olmalı, bundan sonra ölməsi barədə şəhadətnamə verilməlidir. "Amma bizim quruma müraciət edən 40-50 itkin ailəsi ailə üzvlərinin itkin düşməsilə bağlı məhkəmə qərarı belə almayıb" - deyə Y.Cəfərli bu sahədəki duruma toxunub. O, şəxsin şəhid statusu alması ilə şəhid kimi sosial hüquqlarının gerçəkləşdirilməsinin başlandığını bildirib. "Bəzən şəxsin itkin düşməsilə bağlı məhkəmə qərarı verilir, amma hərbi komissarlıq dövlət adına çıxarılan məhkəmə qərarı ilə razılaşmayaraq, şəxsin itkin düşməsinə dair əlavə sənədlər istəyir" - deyə bu sahədəki süründürməçiliyə toxunub. Y.Cəfərli sığortaların ödənməməsini ən böyük problem sayaraq, bu ailələrin 20-30 il yaşadığı mənzilləri, torpaq sahələrini özəlləşdirə bilməməsi kimi problemlər yaşadığını söyləyib.
   EZB sədrinin müavini Telman Əbilov hərbi qulluqçuların hərbi qulluğa başladıqda məcburi sığortaya cəlb olunduqlarını, bu məqsədlə hərbi qulluqçuların sayı qədər Müdafiə Nazirliyinə ayrılan sığorta vəsaitinin Dövlət Sığorta Kommersiya Şirkətinə ödəndiyini deyib. T.Əbilovun sözlərinə görə, buna baxmayaraq, şirkət sığorta haqqında qanunun 1997-ci ildə qəbul edilməsini əsas gətirərək, itkin düşənlər üçün nəzərdə tutulan sığorta haqqını vermək istəmir. Onun sözlərinə görə, şirkət hətta o qədər irəli gedib ki, məhkəmələrin şəxslərin itkin düşməsi, sığorta ala bilməsi haqda qərar çıxarmasına qədər maneçilik törədə bilir.
   

Yardımlı rayonu ərazisində külli miqdarda silah-sursat aşkarlanıb.
   Yardımlı Rayon Polis Şöbəsindən (RPŞ) APA-nın cənub bürosuna verilən məlumata görə, fevralın 17-də şöbə əməkdaşları rayonun Perimbel kəndinin ərazisinə baxış keçirdikləri zaman bu yaşayış məntəqəsilə Azərbaycan-İran dövlət sərhədindən təxminən 350-400 metr aralıda - "Qarğadolaşmaz" otlaq sahəsindəki kolluqdan xeyli sayda silah-sursat aşkarlayaraq götürüblər. Tapılan silahlar 1 ədəd "Kalaşnikov" markalı avtomat, 1 ədəd naqan tipli tapança, 1 ədəd əl qumbarası, 3 ədəd avtomat darağı, 732 ədəd 5,45 çaplı patron, 82 ədəd pulemyot patron, 63 ədəd 7,62 çaplı avtomat patronundan ibarət olub. Polis əməkdaşları, həmçinin, yerli əhalidə qanunsuz saxlanılan daha 6 ədəd ov tüfəngi aşkarlayaraq müsadirə ediblər.
   

Bakıda 21 yaşlı qız dəm qazından boğulub. Bu barədə APA-ya Yasamal Rayon Prokurorluğundan məlumat verilib.
   Hadisə fevralın 17-dən 18-ə keçən gecə qeydə alınıb. 21 yaşlı Səriyyə Nəsrullayeva yaşadığı evdə dəm qazından boğularaq ölüb. Faktla bağlı araşdırma aparılır.

Kazino biznesi leqallaşsa....
   
   Akif Nəsirli: "Kazino biznesinin Azərbaycana iqtisadi xeyrindən daha çox, ictimai zərəri ola bilər"
   
   Şəmsəddin Əliyev: "Fəsadları faydasından böyük olan kazino biznesi ailələrə ancaq bəla gətirir və şəriətdə də lənətlənir"
   
   Bakı şəhərində, xüsusilə də paytaxtın ucqar qəsəbə və kəndlərində gizli qumarxanaların (kazinoların) fəaliyyət göstərməsi barədə qəzetimizin 14 dekabr 2009-cu il tarixli sayında məlumat vermişdik. Qeyd etmişdik ki, belə kazinolar, bir qayda olaraq, dəniz kənarındakı istirahət mərkəzlərində, binaların zirzəmilərində fəaliyyət göstərir.
   Kazinolara gələnlər arasında xarici ölkə vətəndaşları, hətta bəzi ölkələrin diplomatik korpuslarının nümayəndələri də var. Öz ölkələrində sərbəst şəkildə kazinolara gedən qumarbaz diplomatlar Azərbaycanda da öz vərdişlərini tərk edə bilmirlər. Ona görə də, vaxt tapan kimi, "azart"larını öldürmək üçün gizli qumarxanalara üz tuturlar.
   Qeyd edək ki, diplomatların kazinolara və gecə barlarına üz tutması hallarına Azərbaycanda dəfələrlə rast gəlinib. Bir neçə il öncə xarici dövlətlərin ölkəmizdəki səfirlərindən biri bardan çıxarkən naməlum şəxslərin hücumuna məruz qalmışdı. O zaman bu məsələ çox böyük səs-küyə səbəb oldu.
   Onu da bildirmişdik ki, nəzarətdən kənarda qalan belə kazinolarda tez-tez mübahisələr düşür, soyğunçuluq halları olur. Lakin kazinoların fəaliyyətinə ölkədə rəsmən qadağa qoyulduğundan, zərərçəkənlər heç bir yerə şikayət edə bilmir.
   Nəhayət ki, yazdıqlarımız təsdiqləndi. Belə ki, Vergilər Nazirliyi yanında Vergi Auditi Departamenti əməkdaşlarının həyata keçirdiyi operativ əməliyyat tədbirləri nəticəsində Bakı şəhərinin Nəsimi rayonu ərazisində qanunsuz fəaliyyət göstərən kazino aşkarlanıb.
   Nəsimi rayonu Vidadi küçəsi 148 ünvanında yerləşən obyektdə fəaliyyət göstərən kazinonun vergi orqanlarında uçota durmadan qanunsuz sahibkarlıq fəaliyyətilə məşğul olan Cavid Əlizadə tərəfindən işlədildiyi müəyyən edilib. Qanunsuz fəaliyyət göstərən kazinoda 16 ədəd pul uduşlu oyun avtomatı, o cümlədən 12 ədəd "Kazino imperial", 2 ədəd "Novamatik admiral", 1 ədəd "Hunday" və y ədəd "Kosmos" sözləri yazılmış aparat aşkar edilib.
   Vergilər Məcəlləsinin 50-ci maddəsinə əsasən C.Əlizadə barəsində akt tərtib edilərək, ondan müvafiq izahat alınıb. Faktla bağlı araşdırmalar davam edir.
   Bir neçə ay bundan öncəyə qədər Azərbaycanda qanunsuz fəaliyyət göstərən totalizatorluq geniş vüsət almışdı. Bunun qarşısını ala bilməyən hökumət sonda məcbur olub bu pullu oyun növünü leqallaşdırdı. Hazırda bu sahəyə nəzarəti Gənclər və İdman Nazirliyi həyata keçirir. Bu mənada, Azərbaycan kapitalist ölkə və Avropanın bir hissəsi olaraq, kazino fəaliyyətinə qarşı mübarizə aparmaqda çətinlik çəkir. Azərbaycanın kənd rayonlarında, xüsusilə də mağar toylarında (toydan bir neçə gün qabaq və bir neçə gün sonra) şıdırığı qumar gedir. İslamın, şəriətin haram buyurduğu qumar qarşısıalınmaz bəlaya çevrilib. Hətta bəzi müsəlman ölkələrində bu oyun növü leqallaşdırılıb.
   Elə ölkələr var ki, büdcəsinin əsaslı hissəsini kazinolardan gələn vergilər təşkil edir. Bu sahəyə külli miqdarda vəsait xərcləndiyindən və vergi məbləği yüksək olduğundan, dövlətin qazancı da çox olur. Azərbaycan da isə kazinoların fəaliyyətini mərhum prezident Heydər Əliyev 1998-ci ilin yanvar ayında müvafiq sərəncamı ilə ləğv edib. Həmin vaxta qədər Azərbaycanda kazino biznesinə sahib çıxmaq uğrunda qeyri-sağlam mübarizə aparılırdı. Digər tərəfdən, dövr edən pullar da vergidən gizlədilirdi.
   İqtisadçı ekspert Akif Nəsirlinin sözlərinə görə, 1998-ci ildə Azərbaycanda kazinonun qadağan edilməsi labud idi: "Mən mərhum prezident Heydər Əliyevin məlum sərəncamını təqdir etmişəm. Hesab edirəm ki, Azərbaycan kimi ölkə üçün gərəkən addım idi. Bu biznesin o ölkələrdə genişlənməsi effekt verir ki, orada oliqarxiya yoxdur. İqtisadiyyatla hakimiyyətin qovuşması prosesi müşahidə olunmur. Harada ki, məmur həm də biznesmendir, orada bu biznesin genişlənməsi ciddi fəasadlara gətirib çıxarır. Ölkə iqtisadiyytının əsas hissəsi biznesmen məmurların nəzarətindədir. Bu mənada, hesab etmirəm ki, kazino biznesinin leqallaşması fəsadsız ötüşəcək".
   Akif Nəsirliyə görə, kazino biznesinin Azərbaycana iqtisadi xeyrindən daha çox, ictimai zərəri ola bilər.
   Hüquqşünas Şəmsəddin Əliyev də hesab edir ki, bu gün Azərbaycan üçün kazinoların leqallaşdırılmasına heç bir əsas yoxdur: "Bizim buna nə iqtisadi, nə də mənəvi cəhətdən ehtiyacımız var. Leqal və qeyri-leqal kazino biznesinin arxasında cinayətkar ünsürlər, niyyətlər var. Bu mənada vaxtilə mərhum prezident Heydər Əliyev tərəfindən atılmış addım müsbət qiymətləndirilməlidir. Bu illər ərzində kazino biznesi, demək olar ki, vətəndaşların yaddaşından silinmişdi. Şəhərin mərkəzində gizli şəkildə kazinonun fəaliyyət göstərməsi yolverilməzdir. Bunlara qarşı sərt davranmaq lazımdır. İctimai mənəviyyatımıza qarşı yönələn hallara bəraət vermək mümkün deyil. Fəsadları faydasından böyük olan kazino biznesi ailələrə ancaq bəla gətirir və şəriətdə də lənətlənir".
   

Sumqayıt şəhərində şəxsi mənzil qarət edilib.
   Şəhər Polis İdarəsindən Milli.Az xəbər portalına verilən məlumata görə, srağagün şəhər sakini, 42 yaşlı Əsməd Əliyevanın yaşadığı mənzildən oğurluq edilib.
   Nəməlum şəxslər mənzilə daxil olaraq yataq otağından 50.000 manat pul və qızıl-zinət əşyaları aparıblar. Hadisəni törədən şəxslərin tutulması istiqamətində axtarış tədbirləri həyata keçirilir.
   

Sumqayıt şəhərində bıçaqlanma hadisəsi baş verib. Rayon Polis İdarəsindən Milli.Az xəbər portalına verilən məlumata görə, srağagün şəhərin 29-cu məhəlləsinin ərazisində naməlum şəxs tərəfindən şəhər sakini, 32 yaşlı Sadiq Babayevə üz nahiyəsindən kəsici alətlə xəsarət yetirilib və ondan 360 manat pul alınıb. Keçirilən tədbirlər nəticəsində cinayətin şəhər sakini 32 yaşlı Lətifə Zamanova tərəfindən törədildiyi müəyyən edilib. L.Zamanova əvvəllər məhkum olunub.
   

Bakıda 17 mərtəbəli yaşayış binasında yanğın olub. APA-nın Fövqəladə Hallar Nazirliyinin rəsmi internet saytına istinadən verdiyi məlumata görə, hadisə srağagün baş verib.
   Bakı şəhəri, Yasamal rayonunda "ARAZ-A-MTK" tikinti şirkəti tərəfindən inşa olunan 17 mərtəbəli yaşayış binasının şaxtasında baş verən yanğın nəticəsində elektrik naqilinin 120 pm hissəsi yanıb. Yanğınsöndürənlər tərəfindən yanğın zamanı binada olan 12 nəfər sakin təxliyə edilib, mənzillər yanğından mühafizə olunub.
   İlkin ehtimala görə, yanğına qısaqapanma səbəb olub.
   
   

Azərbaycanda orta ümumtəhsil məktəb müəllimlərinin beşillik müqavilə əsasında işləmələri tətbiq oluna bilər. Bunu Trend News-a Təhsil Nazirliyinin baş məsləhətçisi Musa Əhmədov deyib.
   "Yeni qaydalar təsdiqini taparsa, müəllimlərlə 5 il müddətinə iş müqaviləsi bağlanacaq. Həmin dövr bitdikdə, müəllimin ixtisasartırma kurslarında topladığı kredit balları nəzərə alınaraq müqavilə uzadıla, yaxud ləğv oluna bilər" - baş məsləhətçi bildirib.
   Azərbaycanda fəaliyyət göstərən 4 552 dövlət ümumtəhsil məktəbində 170 minə yaxın müəllim işləyir, 1 420 mindən çox şagird təhsil alır. 17 özəl ümumtəhsil məktəbində isə 1005 müəllim çalışır.
   Onun sözlərinə görə, hazırda nazirlikdə əlavə təhsil qaydaları hazırlanır ki, bu da müəllimlərin təkmilləşdirilməsinin yeni modul kredit sisteminə əsasən həyata keçirilməsini nəzərdə tutur.
   Əhmədovun sözlərinə görə, bu il Təhsil Nazirliyi tərəfindən müəllimlər üçün işə qəbul müsabiqələrinin rayon təhsil şöbələrinin vakant vəzifələr siyahısını təqdim etməsindən sonra elan olunması gözlənir.
   "Nəzərə alsaq ki, hazırda tədris ilinin yarısındayıq, bu imtahanlar gələn tədris ilinin əvvəllərinə təsadüf edə bilər" - nazirlik nümayəndəsi bildirib.
   

Azərbaycanda bu il orta məktəbi yüksək nailiyyətlə başa çatdıran şagirdlərə qızıl və gümüş medalların verilməsi prosesinin bərpası gözlənir.
   "APA-Economics"in məlumatına görə, bunu jurnalistlərə verdiyi açıqlamada təhsil naziri Misir Mərdanov bildirib.
   "Biz təkliflərimizi hökumətə təqdim etmişik və hazırda müzakirələr aparılır. Yekunlara əsasən hökumətin qərarı çıxdıqdan sonra biz bu prosesə başlaya biləcəyik" - deyə nazir qeyd edib.
   Təhsil nazirinin sözlərinə görə, bu il nazirlik fiziki olaraq medalların təqdim edilməsinə hazır olmaya bilər, lakin fərqlənmə attestatları təqdim edə biləcək.
   Azərbaycanda Uşaq Qaynar Xətt Xidməti istifadəyə verilib.
   Dünən Bakıda "Azercell Terlekom" şirkəti və Azərbaycan Təhsil Nazirliyinin birgə səyilə Uşaq Qaynar Xətt Xidmətinin açılışı olub. "APA-Economics"in məlumatına görə, xidmət mərkəzinin açılışında təhsil naziri Misir Mərdanov və "Azercell Telekom" şirkətinin baş direktoru Ali Ağan, UNİCEF-in, Uşaq Hüquqları üzrə Azərbaycan QHT Alyansının, "Save the Children-Azerbaijan" nümayəndələri iştirak edib.
   M.Mərdanov qeyd edib ki, Azərbaycanda ilk Uşaq Qaynar Xətt Xidmətinin 5 nəfər işçisi var: "Onların əmək haqları "Azercell Telekom" şirkəti tərəfindən ödəniləcək. Buraya daxil olan zənglər pulsuz olacaq, xidmətin istifadəsinə dörd telefon nömrəsi verilib və bu nömrələrə müxtəlif ciddi problemləri olan uşaqlar anonim zəng edə biləcək. Xüsusi təhsil almış psixoloq, sosioloq və hüquqşünas operatorlar onlara lazımi köməklik edərək məsləhətlər verəcək".
   Eyni zamanda, Uşaq Hüquqları üzrə Azərbaycan QHT Alyansı tərəfindən mini-avtobus alınaraq xidmət mərkəzinə təqdim edilib. Bu avtobuslar vasitəsilə lazım olduğu halda təcili yardım göstəriləcək. Qaynar xəttə, sağlamlıq problemləri olanlarla yanaşı, ümumilikdə təhsillə bağlı problemləri olan uşaqlar da müraciət edə bilər. Nazirlik daxil olan şikayətləri araşdıraraq tədbirlər görəcək.
   Öz növbəsində, A.Ağan "Azercell" şirkətinə bu cür mühüm bir layihədə iştirak imkanı yaratdığı üçün Təhsil Nazirliyinə təşəkkür edib.
   Qeyd edək ki, "Narahatsan? Bizə zəng et" şüarı altında fəaliyyət göstərən Uşaq Qaynar Xətt Xidmətinə 480 22 80, (050) 680 22 80, (051) 880 11 80 nömrələrinə zəng edərək müraciət etmək olar.