Mətbuat nümayəndələrinin informasiya mənbələrinin böyük əksəriyyəti dövlət qurumlarıdır. Amma əksər halda bəzi dövlət qurumlarından informasiya almaq mümkün olmur.
   Baxmayaraq ki, qanunvericilikdə dövlət qurumlarına öz fəaliyyətlərilə bağlı mediaya məlumatların verilməsi barədə konkret tələb qoyulub. Son vaxtlar isə jurnalistlərin dövlət qurumlarının toplantılarına, əsasən də görüşlərə, kollegiya iclaslarına, müşavirələrə dəvət olunmaması halları artıb.
   APA dövlət qurumlarının - nazirliklərin, dövlət komitələrinin, hüquq-mühafizə orqanlarının öz fəaliyyətləri barədə mətbuata məlumatların verilməsi işinin təşkilini, habelə medianın bu qurumların toplantılarına, görüşlərə dəvət edilməməsinin səbəblərini araşdırmağa çalışıb.
   
   Nazirlər Kabineti...
   
   Azərbaycan Nazirlər Kabineti ilə əməkdaşlıq edən jurnalistlər bu qurumun mətbuatla əlaqələrinin səviyyəsindən narazıdır. Onlar mətbuat xidmətinin Nazirlər Kabinetinin fəaliyyətilə bağlı sualları cavablandırmadığını, tədbirlərə yalnız telekanalların dəvət edildiyini, toplantılarla bağlı mətbuata məlumat göndərilmədiyini bildirir. Nazirlər Kabinetinin mətbuat xidmətinin rəhbəri Akif Əli isə APA-ya bildirib ki, tədbirlərə yalnız telekanallar və rəsmi dövlət agentliyinin dəvət olunması yer məhdudluğu ilə əlaqədardır: "İmkanımız olanda, toplantı keçirilən zal böyük olduqda bütün mətbu orqanları çağırırıq. Yəni burada hansısa xüsusi ayrıseçkilik barədə düşünməmişik. Sadəcə, dəvətlər keçirilən görüşlərin, qəbulların formatından asılı olur". A.Əli bildirib ki, rəhbərlik etdiyi qurum press-relizləri Nazirlər Kabinetinin rəsmi internet saytına yerləşdirir, istənilən mətbuat orqanı o xəbərlərdən istifadə edə bilər.
   
   DİN...
   
   Daxili İşlər Nazirliyilə bağlı isə jurnalistlər daha çox kollegiya iclaslarına, müşavirələrə çağırılmamaları və yerli polis idarələrinə mətbuata məlumat verməklə bağlı qadağaların qoyulmasından şikayətçidir. Nazirliyin sonuncu - bu il yanvarın 29-da keçirilmiş kollegiya iclasına da yalnız telekanallar dəvət edilib. DİN-in mətbuat xidmətinin rəis müavini Ehsan Zahidov APA-ya bildirib ki, onlar KİV və ictimaiyyətlə əlaqələrə böyük önəm verir: "Mətbuat xidməti olaraq, bizdən qəti şəkildə mətbuatla əlaqələrin daha geniş və effektli qurulması tələb olur". Yerli polis idarələrinin mətbuatla əlaqələrinə qadağa qoyulması barədə məlumatların həqiqətə uyğun olmadığını deyən E.Zahidov, əksinə, yerli qurumlara cinayətkarlıqla mübarizə tədbirlərinin həyata keçirilməsilə bağlı mətbuata məlumatların verilməsi barədə tapşırığın olduğunu qeyd edib: "Təbii ki, yalnız açıqlanması mümkün olan məlumatlar verilir. Kollegiya iclaslarına isə yalnız telekanalların dəvət edilməsi yer problemilə bağlıdır. Zalda kifayət qədər yer olmadığı üçün yalnız telekanallar və dövlət agentliyi dəvət edilir".
   
   Vergilər Nazirliyi...
   
   Vergilər Nazirliyinin mətbuat xidməti də tədbirlərə yalnız telekanalları dəvət edir, digər KİV-lər kənarda qalır. Mətbuat xidmətinin rəhbəri Fariz Səmədov da APA-ya bildirib ki, KİV nümayəndələrilə əlaqələrin yaxşı qurulması onların qarşısında dayanan əsas vəzifələrdən biridir: "Aparılan işlər haqqında yekun hesabatlar, o cümlədən kollegiya iclaslarından press-relizlər hazırlanaraq yayılır. KİV nümayəndələrinin işi xəbəri tapmaqdırsa, bizim işimiz də həmin KİV nümayəndəsinə yardımçı olmaqdır. Mənə elə gəlir ki, mətbuat nümayəndələrilə Vergilər Nazirliyinin münasibətləri yüksək səviyyədədir, istənilən fikirləri, vergi qanunvericiliyi, həyata keçirilən islahatlar, innovasiyalar, yeniliklərlə bağlı məlumatlar operativ olaraq mətbuata çatdırılır. Hər hansı mətbuat orqanı ilə problem yoxdur".
   
   XİN...
   
   Xarici İşlər Nazirliyinin mətbuatla əlaqələri yüksək səviyyədə olsa da, son vaxtlar brifinq və mətbuat konfransları məlum olmayan səbəblərə görə ləğv edilib. Nazirliyin mətbuat xidmətinin rəhbəri Elxan Poluxov bildirir ki, bu, nazirliyin daxilində struktur dəyişikliklərilə bağlıdır və müvəqqəti xarakter daşıyır.
   
   BŞBPİ...
   
   Bakı Şəhər Baş Polis İdarəsi isə, bir qayda olaraq, mətbuatı kollegiya iclaslarına, müşavirələrə dəvət etmir. Qurumun mətbuat xidmətinin rəhbəri Qalib Rəhimov APA-ya bildirib ki, idarədə bütün məlumatların açıq olmasına imkan yoxdur: "Yalnız bəzi hallarda maraq göstərən media orqanları dəvət olunur. Amma kollegiya ilə bağlı hansı məlumların açıqlanması mümkündürsə, onlar mətbuata göndərilir".
   
   Milli Məclis...
   
   Milli Məclisin mətbuat xidməti mətbuatla yaxşı işləsə də, yeganə problem spikerin görüşlərinə məhdud sayda media nümayəndəsinin dəvət edilməsidir. Mətbuat xidmətinin rəhbəri Akif Nəsirov APA-ya deyib ki, əslində onlar bütün aparıcı media orqanlarının bu görüşlərə dəvət edilməsində maraqlıdır: "Amma bu imkan xaricindədir. Görüşlər böyük zalda keçiriləndə hamı çağırılır, amma elə görüşlər olur ki, artıq müəyyən çərçivə yaratmağa ehtiyac yaranır, görüş keçirilən zalın imkanları nəzərə alınır. Görüşlər kiçik otaqlarda keçiriləndə bütün mətbuatı dəvət etmək mümkün deyil".
   
   Sənaye və Energetika Nazirliyi...
   
   Sənaye və Energetika Nazirliyinin mətbuat xidmətilə məlumatların dəqiqləşdirilməkdə, sualları birbaşa cavablandırmaqda bəzən problemlər yaranır. Mətbuat xidmətinin rəhbəri Azər Mənsimli bildirir ki, o yalnız bildiyi məsələlərlə bağlı sualları dərhal cavablandırır: "Bilmədiyim məsələlər barədə danışmıram. Bəzən də məlumatı dəqiqləşdirmək üçün zaman lazım olur və yalnız rəhbərlik tərəfindən mənə verilən məlumatları mətbuata çatdırıram. Mətbuatla münasibətlərdə ciddi problemlər yoxdur".
   
   Ədliyyə Nazirliyi...
   
   Ədliyyə Nazirliyi də medianı kollegiya iclaslarına, görüşlərə dəvət etməyən qurumlar siyahısındadır. Mətbuat xidmətinin əməkdaşı Rasim Həsənovun sözlərinə görə, kollegiya iclaslarında daxili məsələlər müzakirə edilir, buna görə də mətbuat çağırılmır: "Amma görüşlərə televiziya və agentliklər dəvət edilir. Mətbuat nadir hallarda dəvət edilmir ki, bu görüşlərdən, qəbullardan sonra da dərhal məlumat yayırıq".
   
   Baş Prokurorluq...
   
   Respublika Baş Prokurorluğunun mətbuat xidmətinin rəhbəri Eldar Sultanov isə bildirib ki, prokurorluğun fəaliyyətilə bağlı, o cümlədən Baş Prokurorluğun geniş kollegiya iclası barədə mütəmadi olaraq ictimaiyyətə dolğun və obyektiv informasiyalar verilir: "Azərbaycan Respublikası Prokurorluğu mətbuata kifayət qədər açıq orqandır. Kütləvi informasiya vasitələrinin nümayəndələri tərəfindən prokurorluğa ünvanlanmış bütün sorğular, istintaq sirri təşkil edən məlumatlar istisna olmaqla, vaxtında və dolğun cavablandırılır. Ona görə də Baş Prokurorluğun bu və ya digər tədbirində obyektiv səbəblərdən KİV nümayəndələrinin bəzilərinin iştirak etməməsini problem kimi qəbul etmək düzgün olmazdı".
   
   Dini Komitə...
   
   Dini Qurumlarla İş üzrə Dövlət Komitəsi həmişə öz tədbirlərinə medianı dəvət etsə də, sonuncu dəfə qeydiyyatdan keçmiş dini icmalara şəhadətnamələrin təqdim olunmasına heç bir mətbuat çağırılmayıb. Komitənin Nəşriyyat və redaksiya şöbəsinin müdiri Elçin Cabbarov APA-ya bildirib ki, bunun xüsusi bir səbəbi olmayıb: "Sadəcə, son vaxtlar dini icmalara şəhadətnamələrin təqdim olunması ilə bağlı bir neçə dəfə tədbir keçirilib, hamısında da mətbuat iştirak edib. Bu artıq adi hal kimi qəbul olunduğundan, mətbuatı növbəti tədbirlərə dəvət etməyi lazım bilmədik". E.Cabbarov komitənin yaxın vaxtlarda keçiriləcək digər tədbirlərinə mətbuatın dəvət ediləcəyini bildirib.
   
   MTN...
   
   Milli Təhlükəsizlik Nazirliyinin mətbuat xidmətinin rəhbəri Arif Babayev isə medianın bu qurumun tədbirlərinə dəvət olunmamasının səbəblərini açıqlamayıb: "MTN Kənd Təsərrüfatı Nazirliyi deyil. Nazirliyin həyata keçirdiyi tədbirlər barədə mütəmadi olaraq ictimaiyyətə geniş məlumat verilir və Azərbaycanın milli təhlükəsizliyi sahəsində maraqlarının hərtərəfli təmin olunması istiqamətində KİV-lə əlaqələrə böyük önəm verilir".
   
   Kənd Təsərrüfatı Nazirliyi...
   
   Yeri gəlmişkən, Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev deyir ki, hansı mətbuat orqanı aktiv olaraq nazirliklə əməkdaşlıq edirsə, onlar da tədbirlərə dəvət olunur: "Biz özümüz də maraqlıyıq ki, nazirliyin tədbirləri, fəaliyyəti mətbuatda işıqlansın. Hansı mətbuat orqanı informasiya məkanında layiqli yer tutubsa, hansı mətbuat orqanı bizim məlumatları təhrif etmirsə, heç bir fərq qoymadan onları bütün tədbirlərimizə dəvət edirik. Mətbuatla münasibətlərdə hər hansı problem yoxdur".
   
   MSK...
   
   Mərkəzi Seçki Komissiyası medianı fərq qoymadan bütün tədbirlərə, iclaslara dəvət etsə də, MSK-da keçirilən görüşlərə heç bir KİV təmsilçisi çağırılmır. Qurumun mətbuat xidmətinin rəhbəri Azər Sarıyev bildirir ki, bu, MSK rəhbərliyilə görüşən tərəfin istəyindən asılı məsələdir: "MSK rəhbərliyilə görüşən tərəflər medianın da görüşdə iştirakını arzu etsələr, bizim tərəfimizdən heç bir problem olmaz".
   
   Hərbi Prokurorluq...
   
   Hərbi Prokurorluğun mətbuat xidməti isə KİV-i kollegiya iclaslarına çağırmamaqla bərabər, həm də lazım olan məlumatları açıqlamır. Lakin APA-nın əməkdaşı bunun səbəblərilə bağlı mətbuat xidmətinin rəhbəri Əfrayim Təhməzovdan heç bir cavab ala bilməyib.
   
   Ali Məhkəmə...
   
   Ali Məhkəmənin də mətbuat xidmətindən məlumat almaq asan deyil. Media nümayəndələri bu qurumun plenumlarına dəvət edilmir, konkret işlər üzrə məhkəmə prosesinin nəticəsilə bağlı məlumat almaq olmur, məhkəmə iclaslarına media buraxılmır. Bunun səbəblərini öyrənmək üçün mətbuat xidmətinin rəhbəri Allahverdi Nehrəmli ilə əlaqə saxlamaq mümkün olmayıb. Mövzu ilə bağlı, həmçinin, Nəqliyyat, Maliyyə nazirliklərinin, Konstitusiya Məhkəməsinin mətbuat xidmətlərindən münasibət öyrənmək mümkün olmayıb. Bakı Şəhər İcra Hakimiyyətində də belə qurumun varlığı diqqəti çəkmir.
   Lakin işinə vicdanla yanaşan, jurnalistləri, demək olar ki, istisnasız olaraq bütün tədbirlərinə, görüşlərə dəvət edən dövlət qurumları da var. Mədəniyyət və Turizm Nazirliyi, Gənclər və İdman Nazirliyi, Təhsil Nazirliyi, Ekologiya və Təbii Sərvətlər Nazirliyi, Fövqəladə Hallar Nazirliyi, İqtisadi İnkişaf Nazirliyi, Əmək və Əhalinin Sosial Müdafiəsi Nazirliyi, Diasporla İş üzrə Dövlət Komitəsi, Standartlaşdırma, Metrologiya və Patent üzrə Dövlət Komitəsi, Dövlət Sosial Müdafiə Fondu, "Azərenerji" ASC, Tələbə Qəbulu üzrə Dövlət Komissiyası bu sıraya daxildir. Lakin iqtisadi inkişaf naziri Şahin Mustafayevdən eksklüziv müsahibə almaq hələ heç bir KİV-ə nəsib olmayıb.
   Məsələ ilə bağlı APA-ya açıqlama verən Prezident Administrasiyasının ictimai-siyasi şöbəsinin müdiri Əli Həsənov bildirib ki, Azərbaycanda ali idarəetmə strukturları, mərkəzi icra hakimiyyəti qurumları öz fəaliyyəti, il ərzində gördüyü işlərin əhaliyə çatdırılmasında maraqlı olmalıdır: "Bunun da yeganə mexanizmi KİV-dir. Ona görə də, biz bu işlərdə mütəmadi olaraq mətbuat xidmətlərinə, mərkəzi və yerli icra hakimiyyəti orqanlarına, ictimaiyyətlə əlaqələr bölmələrinə tövsiyə edirik ki, görülmüş işlərin cəmiyyətə çatdırılmasında mətbuatın imkanlarından geniş şəkildə istifadə etmək lazımdır. Bu, dövlət siyasətinin əsas prinsiplərindən biridir. Son 10 ildə mətbuat xidmətlərilə KİV arasında əlaqələrin yaradılması, birgə seminar və treninqlərin keçirilməsi, onların bir-birilə əlaqələrinin güclənməsi üçün işlər görürük, bundan sonra da bu kimi tədbirlər davam edəcək".

Daşkəsən rayonunda taksi sürücüsünü öldürməyə cəhd edilib. APA-nın qərb bürosunun məlumatına görə, Gəncə sakinləri 24 yaşlı Elçin Həsənov və 18 yaşlı Röyal Ələkbərov gecə saatlarında Gəncənin "Yevlax" avtovağzalı yaxınlığında taksiyə minərək sürücüdən avtomobili Daşkəsən rayonunun Bayan kəndi istiqamətinə sürməyi tələb ediblər. Sərnişinlər adıçəkilən kənddə taksi sürücüsü Yunis Xəlilovla mübahisə ediblər.
   Sərxoş vəziyyətdə olan Röyal Ələkbərov cibində gəzdirdiyi bıçaqla Yunis Xəlilova zərbə vuraraq ona ürək nahiyəsindən xəsarət yetirib. Daha sonra isə izi itirmək məqsədilə "VAZ-21015" markalı avtomobili Göygöl rayonunun "Daşkəsən dairəvi yolu" kimi tanınan ərazisindən aşırıblar. Hadisəni törətdikdən sonra onlar qaçsa da, Göygöl Rayon Polis Şöbəsi əməkdaşları həmin şəxsləri saxlamağa müvəffəq olublar.
   Göygöl Rayon Polis Şöbəsindən APA-nın qərb bürosuna verilən məlumata görə, saxlanan şəxslər törətdiyi əməli etiraf edib, bunu sərxoş vəziyyətdə törətdiklərini bildiriblər. Faktla bağlı cinayət işi açılıb, araşdırma aparılır.
   Gəncə şəhər Təcili Tibbi Yardım Xəstəxanasına yerləşdirilən sürücü Yunis Xəlilovun vəziyyəti ağır qiymətləndirilir.

Beynəlxalq Valyuta Fondu mərkəzi banklara maliyyə börhanının aradan qaldırılması üzrə tədbirlərə yanaşmanı köklü curətdə dəyişməyi təklif edib. Təklifə görə, banklar inflyasiyanın hədəf səviyyəsini "sülh" dövründə 4%-ə qədər qaldıra bilər.
   BVF-nin baş iqtisadçısı Olive Blanşar mərkəzi banklara inflyasiya səviyyəsini qaldırmağı və resessiyanın təkrarlanması ehtimalını azaltmaq üçün hazırkı dövrdə onun tempini çox da saxlamamağı tövsiyə edib. BVF-nin yeni tövsiyəsi Fondun kursunun kifayət qədər dəyişdiyini göstərir.
   "The Wall Street Æournal" qəzetinin yazdığına görə, dünya iqtisadi tənəzzülü mövcud makroiqtisadi siyasətdə çatışmazlıqları üzə çıxarıb: məsələn, mərkəzi banklar iqtisadiyyatın tənzimlənməsi zamanı uçot dərəcələrinə üz tutur. Blanşara görə, böhran bizi böhrandan sonrakı makroiqtisadi tənzimləmə arxitekturası barədə fikirləşməyə vadar edir.
   BVF ekspertlərinin hazırladığı məruzədə qeyd edilir ki, requlyatorlar iri maliyyə böhranlarının aradan qaldırılması üzrə tədbirlərə yanaşmaya yenidən baxmalıdır. Fond tövsiyələrinin birində mərkəzi banklara təklif edir ki, böhranın aradan qaldırılması zamanı pul-kredit tənzimlənməsi sferasında fəaliyyətə sərbəstlik yaratmaq məqsədilə adi vaxtlarda yüksək inflyasiya səviyyəsinə səy göstərməlidir. Hazırda dünyanın əksər mərkəzi banklarında inflyasiyanın hədəf səviyyəsi 2% təşkil edir. BVF bu səviyyəni 4%-ə qaldırmağı tövsiyə edir.
   Blanşarın fikrincə, böhran olmayan dövrdə 4%-lik inflyasiya şəraitində uçot dərəcələri 6-7% təşkil edəcək və mərkəzi banklar zərurət olduqda onu azaldacaq. Ekspertlərin fikrincə, yüksək inflyasiya tempinin 1970-1980-ci illərdə hansı mənfi nəticələrə gətirib çıxardığını görən mərkəzi banklar BVF-nin tövsiyəsini həvəssiz bölüşür.
   Qeyd edək ki, Beynəlxalq Valyuta Fondu tövsiyələri Azərbaycan Mərkəzi Bankına da şamil olunur. Ölkəmizdə inflyasiyanın hansı həddə olacağı isə hələlik ciddi müzakirə mövzusudur. Xatırladaq ki, ötən il Azərbaycanda cəmi 2,5 faizlik inflyasiya qeydə alınıb. Lakin BVF indi bu həddin, ən azı, 4 faizə qaldırılmasını təklif edir.
   Fondun digər təklifi isə bankların xilası ilə bağlıdır. BVF-nin sərəncamverici direktorunun birinci müavini Con Lipsli bununla bağlı qeyd edir: "Ekspertlərin gəldiyi qənaətdən biri də budur ki, bankların xilası tədbirlərindən imtina edilməlidir. Fikrimcə, hamımız bununla razılaşarıq".
   ABŞ Federal Ehtiyat Bankının sabiq rəhbəri Vilyam Pul bu fikri dəstəkləyib. Qeyd edək ki, ölkəmizdə də bir çox yerli kommersiya banklarının durumu ürəkaçan deyil və onlar hələ də Mərkəzi Bankdan yardım tələb edirlər. Onu da bildirək ki, ötən il ölkə üzrə bankların ehtiyatları 145,5 milyon azalaraq 392 milyon manata düşüb. "İqtisadi forum" jurnalının Mərkəzi Banka istinadən verdiyi məlumata görə, 2008-ci ildə ehtiyatların ümumi həcmi 537,5 milyard manat təşkil edib.
   Bank ehtiyatlarının 95%-i və ya 392 milyon manatı sərbəst, 5%-i və ya 20,4 milyon manatı isə məcburi ehtiyatların payına düşür. 2008-ci illə müqayisədə ötən il sərbəst ehtiyatların həcmi 65,6 milyon manat artıb. Məcburi ehtiyatlar isə 10 dəfəyədək azalıb. 2008-ci ildə bankların cəmi məcburi ehtiyatlarının həcmi 231,5 milyon manat olduğu halda, yola saldığımız ildə azalaraq 20,4 milyon manata düşüb.
   Məcburi ehtiyatların azalması Mərkəzi Bankın bütün mənbələr üzrə məcburi ehtiyat normalarını azaltması ilə bağlıdır. Belə ki, Bankın qərarı əsasında bu normalar martın 1-dən etibarən 3%-dən 0,5%-ə endirilib. Bununla yanaşı, bankların ehtiyat pulları da azalıb. Vəziyyətdən xilas olmaq üçün bəzi kommersiya bankları kredit alınması üçün Mərkəzi Banka müraciət edib.
   Daha bir maraqlı xəbərdarlıq isə dünyada başlanacaq yeni böhran fonunda bankların itkilərinin bir qədər də arta biləcəyilə bağlıdır. Söhbət neft resurslarının tükənmə təhlükəsindən gedir. Hesab olunur ki, bu amil təkcə banklara yox, ümumiyyətlə dünya maliyyə sisteminə də ciddi təhlükə yaratmaq iqtidarındadır. Qeyd olunan məsələ üzrə xəbərdarlıq isə "Virgin Group" şirkətinin banisi Riçard Branson tərəfindən edilib.
   Bransona görə, neft böhranı maliyyə böhranından da qorxulu ola bilər: "Növbəti 5 ildə biz daha bir böhranla - neft qıtlığı ilə üzləşə bilərik. Ancaq bu dəfə bizim hazırlaşmaq üçün vaxtımız var. Əsas vəzifəmiz bu zamanı düzgün istifadə etməkdir. Elə etməliyik ki, maliyyədə olduğu kimi, neft böhranı bizi pis vəziyyətdə qoymasın".
   

Dünən axşam saatlarında qəzetimizə daxil olan məlumata görə, Bakı Metropoliteninin "Qara Qarayev" stansiyasında şübhəli əlamətlər müşahidə olunub.
   Oxucunun məlumatına görə, "Qara Qarayev"lə "Əzizbəyov" stansiyaları arasındakı tuneldə mənşəyi məlum olmayan su sızıntıları var. Oxucu bəzi yerlərdə bu sızıntısının, hətta nazik gur axınla olduğunu deyib. Buna görə də dərhal əks tədbirlərə start verilib. "Qara Qarayev" metrosunun yaxınlığında bir neçə binanın həyətində dərin və iri həcmli kanalların qazıldığı bildirilir. Ərazidə işləyən fəhlələrin və yerli sakinlərin dediyinə görə, kanalların qazılmasında məqsəd metro tunelinə axan suyun mənbəyini tapmaqdır.
   Mövzuya qayıdacağıq.
   
   

Dünən Ağır Cinayətlərə Dair İşlər üzrə Məhkəmədə "Lotu Süleyman" ləqəbilə tanınan kriminal avtoritet Süleyman Şirinovun cinayət işi üzrə məhkəmə prosesi yekunlaşıb.
   APA-nın məlumatına görə, hakim Şəkər Məmmədovanın sədrliyilə keçirilən prosesdə S. Şirinov barəsində irəli sürülən ittiham sübuta yetirilmədiyindən onunla bağlı bəraət hökmü çıxarılıb və məhkəmə zalından sərbəst buraxılıb.
   Qeyd edək ki, prokuror təqsirləndirilənin 12 il müddətinə azadlıqdan məhrum edilməsini istəmişdi. İttihama görə, S.Şirinov 1997-ci il noyabrın 19-da adam oğurluğu ilə məşğul olan Abuzər Abuzərova öldürmək məqsədilə atəş açıb və onu yaralayıb. Təqsirləndirilən 11 il istintaqdan yayınıb, lakin 2008-ci ildə həbs edilib. Təqsirləndirilən şəxs 2000-ci ilə kimi qüvvədə olan Cinayət Məcəlləsinin 94,1.6-cı (ölümə sui-qəsd) maddəsilə ittiham olunub. S.Şirinov 1995-1996-cı illərdə mütəşəkkil qrup halında respublikada ayrı-ayrı vətəndaşlara basqın edərək onları girov götürüb və küllü miqdarda pul alıb. O, adam oğurluğu cinayətləri törətməkdə ittiham olunaraq müxtəlif müddətlərə cəza alan Abuzər Abuzərovun rəhbərlik etdiyi dəstəsinin üzvü olub.
   

Daxili İşlər Nazirliyi Baş Mühafizə İdarəsinin rəisi, polis general-mayoru Mədət Quliyev Trend News-a müsahibəsində çox maraqlı məqamlar barədə açıqlama verib.
   - Baş Mühafizə İdarəsi tərəfindən nə qədər obyekt mühafizə olunur?
   - Baş Mühafizə İdarəsi tərəfindən 10 mindən artıq obyekt mühafizə olunur. Ötən il ərzində 450-dən artıq obyekt mühafizəyə götürülüb. Obyektlərin mühafizəsinin təşkili üçün müraciətlər hər il artır. Həm şirkət və müəssisələr, həm də mülki vətəndaşlar evlərinin, qarajlarının və digər obyektlərinin mühafizəsi üçün müraciət edir.
   - Son illər mənzillərdə oğurluqlar çoxalıb. Vətəndaşlar tərəfindən mənzillərin mühafizəsilə bağlı sizin quruma müraciətlər edilirmi?
   - Əfsuslar olsun ki, Azərbaycanda vətəndaşlar tərəfindən mənzillərin mühafizəsinə meyl o qədər də çox deyil. Bu, Daxili İşlər Nazirliyinin rəhbərliyini də narahat edir. Əvvəlki illərlə müqayisədə vətəndaşlar tərəfindən mənzillərinin mühafizəsilə bağlı müraciətlərin sayı artsa da, bu, qaneedici səviyyədə deyil. Tərəfimizdən mühafizə olunan mənzillərin sayı 2000-ə yaxındır. Amma bu bizi qane etmir. Biz "Yarasa" firması ilə paralel işləyirik. Mənzillərin mühafizəsi xüsusi texnika ilə tərəfimizdən təmin olunur. İstərdik ki, mənzillərin hamısının mühafizəsini təmin edək. Qonşu Rusiyada vətəndaşlar mənzillərini mühafizəyə götürmək üçün 2-3 ay növbəyə dururlar. Baxmayaraq ki, Azərbaycanda bununla bağlı maarifləndirmə aparırıq, sahə inspektorları da mənzillərin mühafizəsi üçün vətəndaşlara müraciət edir, amma vətəndaşlar tərəfindən buna maraq yoxdur.
   - Bu nə ilə bağlıdır - maarifləndirmənin olmaması, yoxsa mühafizə üçün ödənilməli olan məbləğin çox olması ilə?
   - Araşdırmalara görə, yol-nəqliyyat hadisələri zamanı təhlükəsizlik kəmərindən istifadə edənlərin 60 faizi sağ qalır. Amma təhlükəsizlik kəmərindən yalnız yol polisinin əməkdaşlarının təkidilə istifadə edirik. Müqayisə təxmini belədir. Vətəndaşlar mənzillərdə oğurluq olandan sonra mühafizə üçün müraciət edirlər. Bir qayda olaraq, hadisə baş verəndən sonra nəticə çıxarırıq.
   - Bir mənzilin mühafizəsi üçün nə qədər vəsait tələb olunur?
   - Qiymət çox sərfəlidir. Texniki avadanlıq, siqnalizasiya sistemi təqribən 300-500 manat məbləğində xərc tələb edir. İllik mühafizə üçün isə təqribən 250-300 manatdır. Mühafizə üçün ödəyəcəyimiz məbləğ il ərzində telefon danışıqlarımız üçün xərclədiyimiz məbləğdən azdır. Biz
   "Yarasa" firmasına müraciət etdik ki, bəzi vətəndaşlar bu pulu birdəfəyə ödəyə bilmədiyi üçün lizinq üsulu ilə ödəsin. Şirkət də bu şərti qəbul etdi. DİN rəhbərliyi üçün vacib olan mənzillərin mühafizəsi, mənzillərdə və digər obyektlərdə oğurluqların baş verməməsidir.
   Mənzillərin mühafizəsinin təşkili zamanı İsrail və ABŞ-dan alınan texnika və avadanlıqlar tətbiq olunur. Həmin texnikanın köməyilə, vətəndaş qapısını döyən şəxsi tanımadığı halda, mühafizə xidmətinə xəbər verir və bizim əməkdaşlar 5 dəqiqə ərzində həmin mənzildə olur. Yaxud evdə nə isə mübahisəli məsələ yaranarsa, texnikanın köməyilə mühafizəçini çağırmaq mümkündür. Bizim əməkdaşlar ən geci 6-7 dəqiqə ərzində hadisə yerində olur.
   - Azərbaycan Dövlət Neft Akademiyasında baş verən məlum hadisədən sonra təhsil müəssisələrinin mühafizə məsələsi aktuallaşdı. Bu hadisə təhsil müəssisələrində mühafizənin təşkili işinə təsir göstərdimi?
   - Məlum hadisədən sonra mühafizə üçün müraciətlər artıb. 60-a yaxın təhsil ocağı mühafizəsinin təşkili üçün bizə müraciət edib və əməkdaşlarımız tərəfindən həmin müəssisələrin təhlükəsizliyi təmin olunur. Həmin müəssisələrdə tərəfimizdən xüsusi texnika, kameralar qurulub, 24 saat ərzində video müşahidələr aparırıq. Təhsil Nazirliyi ali təhsil müəssisələrinin rəhbərliyinə mühafizənin təmin olunması üçün tapşırıq verib. Bu xidmət ödənişli olduğundan, bütün təhsil müəssisələri bizə müraciət etməyib. Ali və orta təhsil müəssisələrinin rəhbərləri bu məsələni diqqətdə saxlamalıdırlar. Texnikanın alınması üçün 2000 manata yaxın xərc tələb olunur. Univeristet rəhbərləri üçün bu məbləğ problem olmamalıdır.
   - "Əbu-Bəkr" məscidində baş vermiş hadisədən sonra məscidlərin, dini obyektlərin mühafizəsilə bağlı Baş Mühafizə İdarəsinə müraciətlər olubmu?
   - Bizə dini obyektlərin mühafizəsilə bağlı müraciətlər daxil olmayıb. Onların əksəriyyəti özəl mühafizə xidmətlərinə müraciət edir.
   - Respublikanın regionlarında idarənin şöbələri fəaliyyət göstərirmi?
   - Bakıda, Sumqayıtda, Abşeronda, Lənkəranda, Şəkidə, Mingəçevirdə, Qubada İdarənin şöbələri var. Gəncədə yeni fəaliyyətə başlamışıq.

Parlament seçkilərinə doğru məsafə daraldıqca Azərbaycandakı siyasi təşkilatlar daxilində canlanma da müşahidə olunmaqdadır. Partiyalar artıq namizədlərin müəyyənləşməsi istiqamətində iş aparır. Bu günə kimi Müsavat, Ümid, KXCP və bir sıra digər partiyalar namizədlərini dəqiqləşdirdikləri barədə məlumat vermişdi. Artıq bu sıraya AMİP də qoşulur.
   Belə ki, AMİP-in mətbuat və informasiya katibi Əli Orucovun mətbuata açıqlamasına görə, partiyanın 38 seçki dairəsi üzrə namizədləri məlumdur: "Partiyamızın rəhbərliyində təmsil olunan üzvlərimiz də daxil olmaqla, 38 nəfərin konkret hansı dairədən namizədliyini irəli sürəcəyi dəqiqləşdirilib". Orucovun sözlərinə görə, partiyanın deputatlığa digər namizədlərinin müəyyənləşdirilməsi şəhər və rayon
   təşkilatlarına həvalə olunub: "Partiyanın mərkəzi aparatı bu prosesə müdaxilə etməyəcək. Çünki hər bir yerli təşkilatın rəhbərliyi və üzvləri kimin həmin ərazidə daha şanslı olduğunu bilir. Ona görə biz onlara deputatlığa namizəd seçimi məsələsində sərbəstlik vermişik". Onun fikrincə, AMİP-in ayrı-ayrı şəhər və rayonlarda dəstəkləyəcəyi deputatlığa namizədlər partiyanın üzvü olmaya da bilər: "Əlbəttə, hər hansı bitərəf şəxsin, yaxud digər partiyanın namizədinin seçilmək şansı yüksək olacaqsa, bu halda onlara dəstək verə bilərik". Partiyanın lideri Etibar Məmmədovun isə namizədliyini irəli sürüb-sürməyəcəyi hələ ki, məlum deyil. Ə.Orucovun dediyinə görə, bu məsələ Etibar Məmmədovun özündən asılıdır: "Amma partiyanın rəhbərliyində təmsil olunan şəxslər onun da deputatlığa namizəd olmasını arzulayır". Beləliklə, AMİP hələlik 38 namizədini müəyyənləşdirib. Açıqlamadan belə görünür ki, digər namizədlər yerlərdə müəyyənləşəcək. Amma bunun elə də asan olacağı gözlənilmir. Belə ki, son illər əksər müxalifət düşərgəsində olduğu kimi, AMİP-in yerli strukturları da iflic vəziyyətə düşüb. Partiyanın elə rayon təşkilatları var ki, olan-qalan üzvləri də dağınıq olduğundan, indi orada hər hansı toplantı keçirmək belə mümkün olmur. Bu isə AMİP-in yerlərdəki üzvləri hesabına deputatlığa namizədlərin sayını xeyli artırmağa nail olacağına ümid vermir. Namizədlər məsələsinə daha geniş aydınlıq gətirmək üçün partiya ilə əlaqə saxladıq.
   Partiya funksioneri Əli Orucov 38 nəfər namizəd arasında kimlərin olduğunu indidən açıqlamaq istəməsə də, qeyd etdi ki, namizədliyi dəqiqləşənlər əsasən Bakı şəhərini əhatə edən dairələr üzrə müəyyənləşib: "Bu namizədlər arasında, partiya funksionerlərilə yanaşı, yerli təşkilatların sədrləri və fəal üzvləri də var. Ona görə də kimlərin namizəd olduğu barədə konkret ad çəkməyə lüzum görmürəm. Digər namizədlərin isə yaxın müddət ərzində müəyyənləşdirilməsi nəzərdə tutulur. Bildiyimiz kimi, bu iş yerli təşkilatların öhdəsinə buraxılıb. Partiyanın parlament seçkilərilə bağlı fəaliyyət proqramında bütün bunlar mərhələ-mərhələ nəzərdə tutulub və işlər də ona müvafiq olaraq gedir. Həmin 38 nəfərin dairələr üzrə namizədliyinin müəyyənləşməsində elə də ciddi rəqabət olmayıb. Onların müəyyənləşməsində problem yaranmayıb. O dairədə ki, bir nəfər iddialı idi, həmin ərazidə problem olmadı. Həmin iddialı şəxs təkbaşına olaraq öz iddiasını qoydu. Biz isə, sadəcə, prosesə dəstək verməklə kifayətlənirik. Amma elə rayonlar var ki, orada iddialılarımızın sayı birdən çoxdur. Bakının Binəqədi rayonunda, İmişlidə bir neçə üzvümüz namizəd olmağa iddialıdır. Belə olanda, təbii ki, seçimi yerli təşkilatlar etməlidir". Həmsöhbətimizin dediyinə görə, partiya ölkə üzrə mövcud dairələrin üçdə ikisində prosesə qoşulmaq niyyətindədir: "Düşünürəm ki, yaxın müddət ərzində dairələr üzrə namizədlərimizin sayı artacaq və 125 dairənin ən azı üçdə ikisindən çoxunda üzvlərimiz parlament seçkilərinə qoşulacaq. İrəli sürəcəyimiz namizədlərin qalib gəlmək şansı daha çox olanlardan ibarət olmasını istəyirik. Çünki seçkiyə qalib gəlmək şərtilə qatılırıq. Namizədlərə mərkəzi aparatdan hər hansı bir maliyyə dəstəyinin olacağını gözləmirəm. Bu ehtimal çox aşağıdır. Bizim dəstəyimiz, sadəcə olaraq, namizədlərə bəzi sənədlərin, vahid seçki platformasının hazırlanmasında yardım etməklə bağlı ola bilər. 38 nəfərdən başqa, cənub bölgəsindəki dairələrdə, habelə şimal zonasında Xaçmaz və Quba, Şəki və Gəncəbasar üzrə də namizədlə çıxış edəcəyimizə əminəm". O özü də namizəd olmaq istəyir. Amma bir əmması var: "Özüm də, böyük ehtimalla, prosesə qoşulacağam.
   Yaşadağım Binəqədi dairəsində hələlik bir neçə üzvümüz namizədliyə iddialıdır. Yerli təşkilat kimə etibar etsə, o da həmin dairədən namizəd olacaq. Ancaq bizi narahat edən əsas məsələ Seçki Məcəlləsinin dəyişdirilməməsilə bağlıdır. Seçki komissiyalarının tərkibi indiki kimi qalarsa, seçkilərdə iştirak etməyin və mübarizə aparmağın bir o qədər də əhəmiyyəti qalmır. Dediyim məqamlar öz həllini taparsa, parlament seçkiləri daha aktiv şəkildə keçəcək".
   

Azərbaycan Prezidenti İlham Əliyev çərşənbə günü əmək pensiyalarının sığorta hissəsinin indeksləşdirilməsi haqqında sərəncam imzalayıb. Məlumatrı AzərTAc Dövlət İnformasiya Agentliyi yayıb.
   Azərbaycan Respublikasının Dövlət Sosial Müdafiə Fonduna tapşırılıb ki, 2009-cu il üzrə istehlak qiymətləri indeksinə uyğun olaraq 2010-cu ilin 1 yanvar tarixinə bütün növ əmək pensiyalarının sığorta hissəsinin artırılmasını təmin etsin; fərdi uçot sistemində fərdi hesabların sığorta hissəsində qeydə alınmış pensiya kapitalı məbləğlərinin indeksləşdirilməsini həyata keçirsin. Nazirlər Kabinetinə bu sərəncamdan irəli gələn məsələlərin həlli tapşırılıb.
   

"Ermənistan parlamentinin qəbul etdiyi qərarın Əsas Qanuna uyğun olub-olmamasını oranın Konstitusiya məhkəməsi müəyyənləşdirir. Ermənistan Konstitusiya Məhkəməsi ikiüzlü bir qərar qəbul edib.
   Məhkəmə bir tərəfdən deyir ki, bu protokollar konstitusiyaya uyğundur. Digər tərəfdən isə protokollara bəzi şərhlər verilməsini lazım bilir". Bu açıqlamanı APA-ya Türkiyə Böyük Millət Məclisi xarici əlaqələr komissiyasının üzvü, Türkiyənin Vaşinqtondakı keçmiş səfiri, XİN icra aparatının keçmiş rəhbəri, CHP İstanbul millət vəkili Şükrü Ələkdağ verib. Onun sözlərinə görə, bu şərhlər Türkiyə hökumətinin Ermənistanla apardığı müzakirələrdə meydana çıxacaq problemləri ortaya qoyur: "Ermənistan Konstitusiya Məhkəməsinin qərarını oxuyanda görürük ki, Qars və Moskva sazişləri onlar üçün qüvvədə deyil. İkincisi, Ermənistan Türkiyənin 1915-ci ildə ermənilərə qarşı "soyqırım" törətdiyini dünyaya "isbatlamağa" çalışmaq üçün fəaliyyətinə son qoymayacaq. Üçüncüsü, protokollarda nəzərdə tutulan tarix komissiyasının 1915-ci il hadisələrini araşdırmaq üçün səlahiyyəti yoxdur. Dördüncüsü, Türkiyənin Şərq vilayətləri, ermənilərə görə, "Qərbi Ermənistan"dır. Beşincisi, Türkiyənin Ermənistanla diplomatik münasibət yaratmasının Qarabağ problemilə əlaqəsi olmadığı iddia edilir. Türkiyə ilə Ermənistan arasında imzalanmış protokolların mətni şərhə açıq vəziyyətdədir".
   

Daxili işlər naziri, general-polkovnik Ramil Usubov ölkədə səfərdə olan Polşa Milli Təhlükəsizlik Bürosunun rəhbəri Aleksandr Şçıqlonun rəhbərlik etdiyi nümayəndə heyəti ilə görüşüb.
   DİN-in mətbuat xidmətindən APA-ya verilən xəbərə görə, Azərbaycanla Polşa arasında əlaqələrin son illər yüksələn xətt üzrə inkişaf etdiyini vurğulayan R.Usubov, hər iki ölkə başçılarının qarşılıqlı səfərlərinin, görüşlərinin və bağlanmış sazişlərin dövlətlər arasında münasibətlərin inkişafında geniş hüquqi əsaslar yaratdığını və onun yeni səviyyəyə qalxmasına təkan verdiyini bildirib.
   

Diasporla İş üzrə Dövlət Komitəsində xarici ölkələrdə fəaliyyət göstərən Azərbaycan diaspor təşkilatlarının Xocalı soyqırımının 18-ci ildönümünü qeyd etməsilə bağlı tədbirlər planı təsdiqlənib.
   Komitənin mətbuat xidmətindən APA-ya verilən məlumata görə, Xocalı faciəsini anmaq məqsədilə bu il də etiraz aksiyaları, konfransların keçirilməsi, anım mərasimlərinin, sərgilərin təşkili nəzərdə tutulub. Almaniya üzrə soyqırımın 18-ci ildönümü ilə bağlı xüsusi tədbirlər planı hazırlanıb. Fevralın 18-dən 28-dək Berlin şəhərində Almaniyadakı Azərbaycanlıların Koordinasiya Mərkəzi Azərbaycanın Almaniyadakı Səfirliyinin dəstəyilə Heydər Əliyev Fondunun "Xocalı uşaqların gözü ilə" sərgisinə daxil olan rəsmlərin nümayişini keçirir. Fevralın 26-da Almaniyadakı Azərbaycanlıların Koordinasiya Mərkəzi, "Azərbaycan Evi", "Alman Azərbaycan Həmrəylik Cəmiyyəti"nin təşəbbüsü, "İrəli" İctimai Birliyi və "Xocalıya ədalət" hərəkatının iştirakı ilə Berlinin "Breitscheidplatz" meydanında soyqırımın 18-ci ildönümünə həsr olunmuş mitinq keçiriləcək.
   Fransada da Xocalı soyqırımının 18-ci ildönümü ilə bağlı silsilə tədbirlər keçirilməsi planlaşdırılıb. Fevralın 21-də Strasburq Azərbaycan Evi Xocalı faciəsinə həsr edilmiş xüsusi radio proqramı yayımlayacaq.
   Fevralın 27-də isə Xocalı soyqırımının 18-ci ildönümü ilə əlaqədar Strasburqun mərkəzi "Kleber" meydanında nümayiş keçiriləcək. Azərbaycanlı Tələbələrin Avropa Forumu (FASE) isə Fransanın bir neçə şəhərində Xocalı soyqırımının 18-ci ildönümü ilə əlaqədar mitinq və digər etiraz aksiyalarının keçirilməsini nəzərdə tutub. Tədbirlərə rəsmi şəxslər də dəvət olunacaq. Parisin mərkəzində isə Fransa Azərbaycanlıları Birliyi və Fransa-Azərbaycan Gənclik Assosiasiyası Tuluza Azərbaycan Tələbələr Assosiasiyasının iştirakı və "İrəli" Ictimai Birliyinin dəstəyilə etiraz yürüşü keçiriləcək. Böyük Britaniyada fəaliyyət göstərən Avropa Azərbaycan Cəmiyyəti fevralın 24-də "Xocalıya ədalət" kampaniyası çərçivəsində şəhər sakinləri arasında imzatoplama kampaniyası keçirəcək. Fevralın 26-da isə soydaşlarımız Azərbaycan Respublikasının Böyük Britaniyadakı Səfirliyinin parlamentdə lordların iştirakı ilə keçirəcəyi toplantıya qatılacaq. Tədbirdə amerikalı yazıçı-jurnalist, son 20 ildə Qafqazdakı münaqişələrlə bağlı araşdırmalar aparan və "Azərbaycan gündəliyi" kitabının müəllifi Tomas Gols da çıxış edəcək. Bundan başqa, Azərbaycan diaspor nümayəndələri fevralın 26-da Böyük Britaniya parlamentinin binası qarşısında etiraz mitinqi keçirəcək.
   ABŞ-da da soyqırım qurbanlarının xatirəsi müxtəlif tədbirlərlə anılacaq. Amerika-Azərbaycan Şurasının, Azərbaycan Nyu-York Assosiasiyasının, Hyuston-Bakı Qardaşlaşmış Şəhərlər Assosiasiyasının təşkilatçılığı ilə keçirilən anım tədbirlərində Xocalı faciəsinə dair həqiqətlər yerli ictimaiyyətin diqqətinə çatdırılacaq. Türkiyəki Azərbaycan Dərnəkləri də soyqırımın 18-ci ildönümünə həsr olunmuş anım tədbirləri keçirməyi nəzərdə tutub. Şimali Kiprin Doğu Akdeniz Universitetində burada fəaliyyət göstərən İqtisadi, Mədəni Əməkdaşlıq Mərkəzinin keçirəcəyi anım tədbirində Universitetin tələbə və müəllim kollektivi iştirak edəcək. Həmçinin Hollandiya, Belçika, İsveç, İsveçrə, Danimarka, Çexiya, Moldova, Estoniya, Latviya, Litva, Macarıstan, Rumıniya, Birləşmiş Ərəb Əmirliklərinin Dubay Əmirliyi, Misir Ərəb Respublikası, Tailand, Yeni Zelandiya, Gürcüstan, Özbəkistan, Qazaxıstan, Qırğızıstan, Rusiya, Ukrayna və Belarusda anım tədbirləri keçiriləcək.

APA Azərbaycan müdafiə nazirinin sabiq müavini, Hərbi Hava Qüvvələri və Hava Hücumundan Müdafiə Qoşunlarının keçmiş komandanı, 2009-cu il fevralın 11-də qətlə yetirilmiş general-leytenant Rail Rzayevin həbsdə olan yavəri Anar Haşımov, köməkçisi Aydın Rəfiyev və onun oğlu Anar Rəfiyevə qarşı elan olunmuş ittihamnaməni əldə edib
   Azərbaycanın müdafiə nazirinin sabiq müavini, Hərbi Hava Qüvvələri və Hava Hücumundan Müdafiə Qoşunlarının keçmiş komandanı general-leytenant Rail Rzayevin həbsdə olan yavəri Anar Haşımov, köməkçisi Aydın Rəfiyev və onun oğlu Anar Rəfiyevin ittiham olunduğu maddələr məlum olub.
   APA-nın məlumatına görə, Aydın Rəfiyev Cinayət Məcəlləsinin - 177.3.2 (oğurluq - külli miqdarda ziyan vurmaqla törədildikdə), 179.2.1 (mənimsəmə və ya israf etmə - qabaqcadan əlbir olan bir qrup şəxs tərəfindən edildikdə), 179.2.2 (mənimsəmə və ya israf etmə təkrar törədildikdə), 179.2.3 (mənimsəmə və ya israf etmə-şəxs tərəfindən öz qulluq mövqeyindən istifadə etməklə törədildikdə), 299.3 (ifadə verməkdən boyun qaçırmağa, yalan ifadə verməyə və yaxud yanlış tərcümə etməyə məcbur etmə və ya pulla ələ alma - bu əməllər sağlamlığa zərər vurmaqla, zor tətbiq etməklə törədildikdə), 311.3.1 (rüşvət alma - qabaqcadan əlbir olan bir qrup şəxs və ya mütəşəkkil dəstə tərəfindən), 341.2.1 (hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə - bu əməllər bir qrup şəxs tərəfindən yörədildikdə), 341.2.3-cü (hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə - bu əməllər ağır nəticələrə səbəb olduqda), Anar Haşımov -177.3.2, 341.2.1, 341.2.3-cü, Anar Rəfiyev isə 179.2.1, 179.2.2, 179.3.2 və 299.2-ci (ifadə verməkdən boyun qaçırmağa, yalan ifadə verməyə və yaxud yanlış tərcümə etməyə məcbur etmə və ya pulla ələ alma - şahidi, zərərçəkmiş şəxsi yalan ifadə verməyə, eksperti yalan rəy verməyə, habelə həmin şəxsləri ifadə verməkdən boyun qaçırmağa məcbur etmə, şantajla və ya onların yaxın qohumlarını öldürmək, sağlamlığa zərər vurmaq və ya əmlakını məhv etmək hədəsi ilə törədildikdə) maddələrilə təqsirləndirilir.
   İttihama görə, generalın köməkçisi Aydın Rəfiyev və yavəri Anar Haşımov 2009-cu il fevralın 11-də, R.Rzayev qətlə yetiriləndən dərhal sonra onun iş otağına qanunsuz müdaxilə edərək, oradan külli miqdarda qızıl-zinət əşyaları, xeyli sayda dərman preparatı, DVD disklər və generala məxsus seyfdən 200 min avro məbləğində pul oğurlayıb.
   Bundan başqa, Aydın Rəfiyev oğlu Anar Rəfiyevlə qabaqcadan əlbir olub cinayət əlaqəsinə girərək, 2009-cu ilin mart ayında general R.Rzayevin oğlu Qurban Rzayevin tapşırığı ilə onun şəxsi sürücüsü Bəxtiyar Ələsgərov tərəfindən Müdafiə Nazirliyinə qaytarılması üçün etibar edilərək ona verilmiş R.Rzayevə məxsus 41 manat 37 qəpik dəyərində "general-leytenant" poqonlarına malik 1 ədəd hərbi qış gödəkcəsi, dövlət mülkiyyəti olan generalın xidməti avtomobilinə təhkim olunmuş 18 manat dəyərində 10-00 HM hərbi nömrə nişanını nazirliyə qaytarmadan Anar Rəfiyevə məxsus "Mitsubishi-Pajero" markalı, 10 OR 323 dövlət nömrə nişanlı avtomaşında 16 aprel 2009-cu il tarixinədək saxlamaqla, ona etibar edilmiş özgə əmlakını qulluq mövqeyindən istifadə etməklə mənimsəmə yolu ilə talayıb.
   Bundan əlavə, Anar Rəfiyevin əməkdaşlıq etdiyi "Aztol Telekom" MMC-də satış üzrə menecer vəzifəsində çalışdığı müddətdə şirkət rəhbərliyinin icazəsi və razılığı olmadan ona etibar edilmiş ümumi dəyəri 11 min 710 manat olan 18 ədəd mobil telefonu mənimsədiyi məlum olub.
   İbtidai istintaq zamanı təqsirləndirilən şəxslərin ifadəsi əsasında müəyyən edilib ki, Aydın Rəfiyev generalın ölümündən dərhal sonra onun iş otağına girərək generala məxsus seyfdən oğurladığı 200 min avro məbləğində pulu Binəqədi rayonunda yaşayan tanışı Ceyran Babayevanın mənzilində gizlədib. Aydın Rəfiyev, həmçinin, general Rail Rzayevin öldürülməsi faktı üzrə başlanan cinayət işinin ibtidai istintaqı zamanı generalın yavəri Anar Haşımovu 12 fevral 2009-cu il tarixdə Müdafiə Nazirliyinin inzibati binasının yaxınlığında idarə etdiyi "Mitsubishi-Pajero" markalı avtomobilə mindirərək Mərkəzi Ordu İdman Klubunun yaxınlığına aparıb, onu döyərək R.Rzayevin qətlindən dərhal sonra onun iş otağına qanunsuz müdaxilə etməsi və seyfi açması faktını gizlətməyə, bu barədə istintaqa yalan ifadə verməyə təhrik edib. Nəticədə A.Haşımov öz iradəsi ziddinə bu barədə istintaqa yalan ifadə verib.
   Bundan əlavə, istintaq zamanı A.Rəfiyevin digər cinayət əməllərinin də üstü açılıb. İstintaqla müəyyən edilib ki, Aydın Rəfiyev general R.Rzayevlə olan yaxın münasibətlərindən istifadə edərək ayrı-ayrı rayon və şəhər Hərbi komissarlıqlarından həqiqi hərbi xidmətə çağırılan şəxslərin rüşvət müqabilində, öz istəklərinə əsasən, Hərbi Hava Qüvvələrinin tabeliyində olan hərbi hissələrdə qulluq keçmələrini təmin etmək məqsədilə yaradılmış mütəşəkkil dəstənin üzvü kimi fəaliyyət göstərib.
   İstintaq tərəfindən dindirilən Aydın Rəfiyev ilkin ifadələrində törətdiyi cinayət əməllərini etiraf etmədən ziddiyyətli fikirlər səsləndirib. Lakin sonda zərərçəkən və şahid ifadələri qarşısında çıxılmaz vəziyyətə düşən A.Rəfiyev generalın iş otağındakı əmlakını və seyfdə saxlanılan külli miqdarda pulu götürdüyünü etiraf etməklə yanaşı, R.Rzayevlə bağlı maraqlı faktlar danışıb. Onun sözlərinə görə, general R.Rzayev son illər çoxlu sayda qızıl-zinət əşyaları almağa meyl göstərib. Ölümündən bir gün əvvəl R. Rzayev köməkçisi Aydın Rəfiyevi çağıraraq, qızıl boyunbağısını iki il əvvəl tanış olduqları Zeynal adlı zərgərə düzəltdirməyini tapşırıb. R.Rzayev, həmçinin, Zeynalda olan qızıl məmulatlarını baxmaq üçün ona gətirməsini Aydın Rəfiyevdən xahiş edib. Generalın tapşırığı əsasında A.Rəfiyev zərgərdən götürdüyü 16 500 ABŞ dolları dəyərində təkqaş sırğa, 3 800 ABŞ dolları dəyərində qızıl komplekt, 1200 ABŞ dolları dəyərində qızıl üzük, 4000 ABŞ dolları dəyərində "qvozdik" sırğalar, 1600 ABŞ dolları dəyərində başqa formada qızıl sırğalar, 700 dollar dəyərində qızıl kulon, 3000 dollar dəyərində qolbaq və 1800 dollar dəyərində təkqaş qolbaqdan ibarət qızıl məmulatları gətirərək R.Rzayevə təhvil verib.
   Fevralın 11-i səhər saat 07.30 radələrində generalın sürücüsü Şövqi Seyfullayev Aydın Rəfiyevə zəng edərək, həyəcanlı vəziyyətdə "Maşının "podpresi" sındı, komandanın da ürəyi getdi, onu hara aparım" deyə soruşub. A.Rəfiyev sürücüyə generalı təcili hospitala çatdırması barədə tapşırıq verib. Lakin sürücü hospitalın yerini bilmədiyi üçün A.Rəfiyev ondan özünü də götürməyi tələb edib. Sürücü A.Rəfiyevi evindən götürdükdən sonra generalı hospitala aparıblar. Hospitalda isə həkimlər R. Rzayevin artıq öldüyünü deyiblər.
   A.Rəfiyev generalın ölməsi barədə onun yaxınlarına məlumat verib. Hospitala gələn R.Rzayevin kürəkəni İlqar Hüseynov A.Rəfiyevdən generalın iş otağındakı şəxsi əşyalarını təcili yığışdırmağı xahiş edib. Bundan dərhal sonra A.Rəfiyev generalın yavəri Anar Haşımova zəng edərək R.Rzayevin otağında olan bütün əşyaları və seyfdə olan pulları açıb götürməsi barədə tapşırıq verib. Lakin A.Haşımov seyfi aça bilmədiyi üçün oradakı əşyaları da götürə bilməyib. Buna qəzəblənən A.Rəfiyev özü R. Rzayevin iş otağına gedib. A.Rəfiyev oradakı qızılları, dərman preparatlarını, video diskləri və seyfdə olan pulu götürərək gizlədib. O, generalın yavəri Anar Haşımova bu barədə heç kimə danışmaması barədə tapşırıq verib. Sonra isə A.Rəfiyev generalın otaqdakı təzə ayaqqabılarını da geyinərək oranı tərk edib. Yenidən hospitala qayıdan A.Rəfiyev generalın yaxınlarına onun iş otağında pul və qızıl-zinət əşyalarının olmaması barədə yalan məlumat verib.
   Zərərçəkmiş şəxs qismində istintaqa ifadə verən generalın oğlu Qurban Rzayev atasının ölümündən iki gün sonra A.Rəfiyevin ona içərisində R.Rzayevə məxsus orden və medallar olan iki ədəd zərf verdiyini qeyd edib. A.Rəfiyev onda R.Rzayevə məxsus hər hansı əlavə əşya, pul, qızıl-zinət əşyalarının olmadığını bildirib.
   İş üzrə dindirilmiş Hərbi Hava Qüvvələrinin şəxsi heyət bölməsinin baş zabiti Ramil Tağıyev isə generalın ölümündən sonra dəfn mərasimilə əlaqədar R.Rzayevin şəkil və medallarını götürmək məqsədilə A.Rəfiyevlə birlikdə generalın iş otağına getdiklərini qeyd edib. Fevralın 11-i saat 10.00 radələrində növbətçi İzzət Məhərrəmov və inzibati bölmə rəisi Nailə İbrahimovanın iştirakı ilə generalın iş otağındakı seyfi açan R.Tağıyev orada tapança aşkar edib. Seyfdə aşkarlanan silah barədə Hərbi Hava Qüvvələrinin qərargah rəisi, polkovnik Yaqubəli Qulamov məlumatlandırılıb.
   Məlum cinayət işinin ibtidai istintaqı zamanı Hərbi Hava Qüvvələrinin xeyli sayda əməkdaşı istintaqa cəlb edilərək şahid qismində dindirilib. İş üzrə təqsirləndirilən şəxslərin günahı şahid və zərərçəkmişlərin ifadələri əsasında kifayət qədər sübuta yetirilmiş hesab olunub.

Son günlər Azərbaycanda radikal dini qrupların siyasi fəallığının artması müşahidə olunmaqdadır. Dindarları siyasi aksiya keçirməyə sövq edən səbəblərə iki istiqamətdən yanaşılır. Bəzi təhlilçilərin qənaətincə, dini qrupların fəallaşması əslində kənardan idarə olunur.
   Daha doğrusu, bu aksiyaların təşkilində xarici dövlətlərin, xüsusilə də İranın mühüm rolu var. Bu da son vaxtlar Azərbaycanın ABŞ və İsraillə siyasi əlaqələrinin intensivləşməsinə rəsmi Tehranın cavabıdır. Digər ehtimallara görə, dindarların aktivləşməsi qarşıdan gələn parlament seçkilərilə bağlıdır. Ənənəvi olaraq seçkiqabağı dini müxalifətin siyasi gündəmdə yer alması gözlənilən haldır. Ona görə də seçkilər yaxınlaşdıqca dini təşkilatların aksiyalarının sayı da arta bilər. Əslində üçüncü ehtimal ölkədə Qərbyönlü demokratik müxalifətin zəifləməsinə dair fikirlərdir.
   Mövcud şəraitin təhlilinə ekspertlərin verdiyi rəylər qeyd edilən ehtimallardan birinin qəbul olunub, digərlərinin istisna edilməsini inkar edir. Yəni burada hər üç amil var. Sadəcə olaraq, seçki öncəsi şərait, bir qayda olaraq, siyasi fəallığı daha qabarıq nümayiş etdirməyə və ictimai həyatın gündəminə gətirməyə imkan yaradır. Xatırladaq ki, Azərbaycanda əvvəlki illərdə keçirilən seçkilər ərəfəsində də dini qruplaşmaların xarici qüvvələr tərəfindən idarə olunaraq ölkədə daxili siyasi şəraiti dəyişdirmək cəhdləri qeydə alınıb. 2002-ci ildə Nardaran kəndində başlanan aksiyalara İran telekanallarının verdiyi informasiya dəstəyi əslində həmin dövrdə ölkədə keçirilən referendumla yanaşı, 2003-cü il prezident seçkiləri öncəsi siyasi şəraiti pozmağa yönəlmişdi. Eləcə də 2005-ci ildə yenə Nardaran kəndində 2005-ci ilin parlament seçkiləri ərəfəsində kütləvi mitinqlərin təşkili, 2008-ci ilin prezident seçkiləri ərəfəsində "vəhhabilər"in toplaşdığı "Əbu-Bəkr" məscidində partlayış törədilməsinin xarici qüvvələrlə bağlılığı üzə çıxdı. Yəni Azərbaycana təzyiq etmək istəyən xarici ölkələrin bu dəfə də seçkiqabağı şəraitdən faydalanmaq imkanı istisna olunmur. Onlara yardımçı olacaq ən optimal qüvvə isə yerli dini icmalardır. Eyni zamanda, həmin qüvvələr ölkədə yalnız hakimiyyətin deyil, eləcə də Qərbyönlü müxalifətin zəifləməsində və sıradan çıxmasında maraqlıdır. Azərbaycanın inkişafını Avrointeqrasiyada görən müxalifət partiyalarının siyasi gündəmi tərk etməsi radikal dini təşkilatların önə çıxmasına səbəb ola bilər. Bu baxımdan, arxasında xarici qüvvələr dayanan belə dini qruplar seçkilər yaxınlaşdıqca artmaqda olan seçici fəallığından da bir vasitə kimi istifadə etməyə çalışacaq. Yuxarıda qeyd edildiyi kimi, onların əlində ilk bəhanə seçkilərin verdiyi sərbəstlik hüququdursa, ikincisi Azərbaycanın xarici siyasətində atılan addımlardan sui-istifadə halları ola bilər.
   Ötən seçkilərin təcrübəsinə diqqət yetirdikdə, təəssüf doğuran hal radikal dini qrupların seçkiqabağı fəallaşmasının siyasi ənənəyə çevrilməsindən ibarətdir. Seçkidən sonrakı dövrün təcrübəsinə diqqət yetirdikdə isə onların sabitləşməsi müşahidə olunur. Bəlkə də, kimlərsə bunu siyasi plüralizm və seçki qanunauyğunluğu baxımından normal hal saya bilər. Ancaq həmin qüvvələrin terrora dəstək verən xarici ölkələrlə əlaqələri yeri gələndə üzə çıxır və onlar öz mübarizələrində ən təhlükəli üsullara belə əl atmağa hazır olduqlarını gizlətmir.
   

Azərbaycan Mətbuat Şurası milli mətbuatın 135 illiyilə bağlı keçiriləcək tədbirləri müəyyənləşdirib.
   "Milli mətbuatın 135 illiyi münasibətilə iyulun 21-də "Gülüstan" sarayında böyük tədbirin keçirilməsi nəzərdə tutulur". Bu barədə cümə axşamı Trend News-a Mətbuat Şurasından bildirilib. Milli mətbuatın 135 illiyi ərəfəsində Şuranın həbsdə olan jurnalistlərin əfv olunması üçün müvafiq dövlət qurumlarına mürciət edəcəyi də gözlənir. "Şura kütləvi informasiya vasitələri nümayəndələrinin təltif olunması ilə də bağlı Azərbaycan Prezidenti İlham Əliyevə müraciət edəcək", - məlumatda qeyd edilir.
   

Azərbaycan hakimiyyəti müdafiə və təhlükəsizlik sektorunda ciddi islahatlardan birini həyata keçirməyə hazırlaşır. Söhbət 2005-ci ildə qəbul olunmuş "Səfərbərlik hazırlığı və səfərbərlik haqqında" və "Hərbi Xidmət Haqqında" Azərbaycan Respublikası Qanunlarından irəli gələn vəzifələrin həyata keçirilməsinə başlanmasından gedir.
   Bu barədə "MilAz" İnformasiya Agentliyinə hökumətdəki mənbədən eksklüziv məlumat verilib.
   Məlumata görə, hazırda bu məsələ hökumətdə ciddi müzakirə mövzusudur. "Ortada yaxın zamanlarda ölkə ərazisində hərbi toplanışların keçirilməsi kimi ciddi niyyət var. Bəzi texniki və maliyyə məsələləri həll edildikdən sonra bu məsələyə başlanacaq" - deyə mənbə bildirib.
   Digər məlumata görə, Azərbaycanın səfərbərlik sistemində baş verməsi gözlənilən tədbirlər ölkənin NATO ilə Fərdi Tərəfdaşlığa dair Əməliyyat Planının (İPAP) aşağıdakı hədəfləri çərçivəsində həyata keçirilir: 1. Silahlı Qüvvələrin şəxsi heyətinin ixtisarına hazırlıq işlərinə başlamaq. Mülki heyətlə əvəz oluna biləcək vəzifələri müəyyən etmək. Bununla bağlı qanunvericilikdə müəyyən dəyişikliklər və əlavələr etmək. 2. Strateji Müdafiə İcmalı çərçivəsində səfərbərliyin hazırkı sistemini nəzərdən keçirmək və dəyişmək. Məqsəd onun effektivliyinin artırılması və xərclərin ixtisar edilməsidir. 3. Ehtiyat qoşunların sayını və kateqoriyalarını nəzərdən keçirmək, hər səviyyənin təchizatı və təlimi üçün zəruri olan xərcləri və xidmətləri müəyyən etmək. Bu o deməkdir ki, səfərbərlik sisteminin təkmilləşdirilməsi və bu istiqamətdə atılacaq addımlar Silahlı Qüvvələrin şəxsi heyətinin ixtisarı ilə əlaqələndirilə bilər. O da bildirilir ki, hazırda ölkədə hərbi toplanışların keçirilməsi zamanı ortaya çıxa biləcək problemlər öyrənilir. Artıq bu prosesin sınaqdan çıxarılmasına da başlanıb. Rayonların birində ehtiyatda olanların kiçik bir qismi hərbi toplanışlara çağırılıb və hazırda onlar təlim keçir. İPAP çərçivəsində islahatlar həyata keçirən ölkələrin, o cümlədən NATO dövlətlərinin səfərbərlik sahəsində təcrübələrinə əsasən, ölkə əhalisinin 5-7 faizinin səfərbərlik ehtiyatına salınması mümkündür. Qonşu Gürcüstanda 250 min nəfərdən artıq insan illik hərbi toplanışlara cəlb olunur. Azərbaycanda isə bu prosesin 450-500 min adamı əhatə edəcəyi gözlənir. Bu çərçivədə həm də nəzərə almaq lazımdır ki, müvafiq qanuna görə, ehtiyatda olan və səfərbərlik üzrə hərbi xidmətə çağırılmayan vətəndaşlar Azərbaycan Respublikası Silahlı Qüvvələrinin, qanunvericiliklə nəzərdə tutulmuş digər silahlı birləşmələrin və xüsusi birləşmələrin mülki heyət vəzifəsində işləmək üçün göndərilə bilər.
   Ekspertlərin fikrincə, torpaqlarımız işğal altında olduğundan, "Səfərbərlik hazırlığı və səfərbərlik haqqında" Azərbaycan Respublikası Qanunundan irəli gələn vəzifələrin həyata keçirilməsi bu gün olduqca vacibdir. Amma qanunun tətbiqi zamanı ortaya çıxa biləcək problemlərin həlli yolları dəqiq öyrənilməlidir. Bununla yanaşı, belə fikirlər də hakimdir ki, əslində qeyd olunanlar həm də Azərbaycanın müharibə hazırlığını sürətləndirən daha bir amildir. Qarabağ münaqişəsinin hərbi müstəvidə çözülmə ehtimalı isə günü-gündən artır. Qeyd edək ki, bu yaxınlarda ABŞ Mərkəzi Kəşfiyyat İdarəsinin (MKİ) direktoru Denis Bleyerin Konqresə göndərdiyi yazılı hesabatda Azərbaycanla Ermənistan arasında müharibənin yenidən başlanması riskinin olması barədə xəbərdarlıq edilib. Maraqlıdır ki, bundan bir neçə gün öncə Amerika kəşfiyyatına bağlı özəl kəşfiyyat araşdırmaları mərkəzi "Stratfor" da Qarabağda müharibənin yenidən başlaya biləcəyi haqda xəbərdarlıq etmişdi. Hər iki xəbərdarlıqda deyilir ki, situasiya nəzarətdən çıxa və Qarabağ müharibəsi yenidən alovlana bilər.
   Xatırladaq ki, ötən ilin sonunda Azərbaycan prezidenti də Goranboy səfəri zamanı müharibə variantına əl atıla biləcəyini daha açıq şəkildə dilə gətirib. Məhz bu açıqlamadan sonra o da məlum oldu ki, Azərbaycan rəhbərliyi bunu artıq Ermənistana siyasi təzyiq vasitəsi və danışıqlar öncəsi taktiki alət kimi gündəmə gətirmir. Sözün həqiqi mənasında hərbi vasitə ilə problemin çözümünə əl atılması reallığı mövcuddur. Qeyd edək ki, bundan sonra beynəlxalq aləmdə də Azərbaycanın çox kəskin şəkildə mövqeyini ortaya qoyması, müharibənin hər an başlayacağını reallığa əsaslanaraq bəyan etməsi artıq daha ciddiyə alınmaqdadır.
   Bir sıra ekspertlər isə qeyd edir ki, Türkiyə-Ermənistan prosesinin dalana dirəndiyi və bu prosesi başladan ölkələrin hesablamalarının yanlış olduğu ortaya çıxıb. Onların Türkiyə-Azərbaycan münasibətlərinin həssaslığını, Türkiyə-Ermənistan münasibətləri və sərhədlərin açılmasının Dağlıq Qarabağ məsələsinin həllindən keçdiyi gerçəyini nəzərə almaması hərbi münaqişə risqini artırıb.
   

ATV kanalı xəbər proqramlarının sayını artırmaq niyyətindədir. "Telekanalımızın Xəbərlər Departamenti ötən yeddi il ərzində "Son xəbər" proqramının özünəməxsus xəbərlər yayımlamasına nail ola bilib.
   Xəbərlər proqramının sayını artırmaq niyyətindəyik". Bu barədə Trend News-a "Azad Azərbaycan" Teleradio Yayım Şirkətinin (ATV) Xəbərlər Departamentinin baş redaktoru Vaqif Aydınoğlu bildirib. ATV kanalının Xəbərlər Departamentinin yaranmasından 7 il ötür. Aydınoğlunun sözlərinə görə, ötən müddətdə hər bir tamaşaçı yayımlanan xəbərin ATV-nin "Son xəbər"inə məxsus olduğunu hiss edib.
   "Biz həmişə xəbəri şoulaşdırmaq niyyətindən uzaq olmuşuq. Xəbərlərdə operativliyə, qərəzsizliyə sadiq qalmağa çalışmışıq", - o əlavə edib.
   Baş redaktor deyib ki, yeddi il əvvəl "Son xəbər" gündə yalnız bir dəfə - 20:30-da yayımlanıb.
   "Artıq xəbər yayımının sayını üçə çatdırmışıq. İndi hər gün səhər saat 09:00-da, günorta saat 14:00-da və axşam əsas xəbərimiz isə saat 20:30-da efirə çıxır. Hazırda "Son xəbər"in saat 24:00-da, yaxud gecə saat 1-də buraxılışının yayımı haqqında düşünürük.
   Müəyyən müddətdən sonra isə axşam saat 20:30-da yayımlanan əsas xəbərlərin vaxtının da artırılacağı istisna olunmur. İndi "Son xəbər"in həmin buraxılışının vaxtı 20-22 dəqiqədir. Bu müddət 10-15 dəqiqə artırıla bilər" - Aydınoğlu vurğulayıb. O, "Son xəbər"in "Həftə sonu" adlı buraxılışında həftə ərzində baş verən hadisələrin yekunu ilə bağlı süjetlərin yayımlandığını qeyd edib. Onun fikrincə, yeddi il ərzində əldə etdikləri nailiyyətlərdən biri də "ATV İnternational" kanalının fəaliyyətə başlamasıdır. "Bu bizə göstərilən etimadın nəticəsi idi. Məhz həmin etimadı doğruldaraq, biz indi eyni vaxtda kanal vasitəsilə erməni, fars, rus və ingilis dillərində xəbər veririk", - baş redaktor xatırladıb.
   Aydınoğlu deyib ki, uğurları işgüzar və sağlam kollektivə sahib olmaları nəticəsində əldə edə biliblər.
   "ATV adlı bir məktəbin olduğu da artıq təsdiqlənib. Azərbaycanda fəaliyyət göstərən, demək olar ki, bütün xəbər proqramlarında ATV-nin "Son xəbər" proqramının yetirmələri məsul vəzifələrdədir. Bu da ATV-nin digər uğurudur", - baş redaktor bildirib.

Mətbuat Şurasının sədri Əflatun Amaşov bəzi dövlət qurumları ilə "reket" mətbu orqanların birgə, planlaşdırılmış şəkildə hərəkət etməsindən şübhələnir.
   Lent.az-ın verdiyi məlumata görə, Əflatun Amaşov hüquq-mühafizə, vergi, maliyyə və digər dövlət qurumlarının "reket nəşr"lərdə dərc olunan məlumatlar əsasında apardıqları yoxlamalara ehtiyatlı yanaşmağa çağırmasını şərh edərkən bu şübhəsini dilə gətirib.
   Mətbuat Şurasının sədri bildirib ki, "Azərbaycan", "Ədalət", "İki Sahil", "Bakı-Xəbər" kimi ciddi qəzetlərə çox az sayda şikayət gəlir: "Ancaq "reket qəzet"lərə gələn şikayətlərin sayı ciddi qəzetlərlə müqayisədə 10 dəfələrlə çoxdur. Digər tərəfdən, ciddi qəzetlərin yazdıqlarına diqqət yetirilmir, ancaq dövlət orqanları "reket qəzet"lərin yazılarına diqqət ayırır, o qəzetlərin yazdıqları əsasında yoxlamalar aparırlar. Bu bizi narahat edir və bizdə müəyyən şübhələr yaradır".
   

Demokratiya və İnsan Haqları Komitəsinin sədri, hüquq müdafiəçisi Çingiz Qənizadə bir neçə gün əvvəl Bakıda dindarlarla polis əməkdaşları arasında baş verən insidentdə hər iki tərəfi günahlandırıb.
   O, APA-ya açıqlamasında həmin hadisədə dindarların polisə müqavimət göstərməsi barədə deyilənlərin əsassız olduğunu bildirib: "Lakin onu da bilməyik ki, bu gün Azərbaycanda dinlə bağlı qanunsuz aksiyaların keçirilməsi də yolverilməzdir. Yaşananlar onu göstərir ki, bu aksiya məqsədli şəkildə təşkil olunub və kimlərinsə maraqları çərçivəsində idarə edilirdi".
   Dini məsələlərlə bağlı vətəndaşları həssas olmağa çağıran hüquq müdafiəçisi dini mərasimlərin keçirilməsinə də münasibətini bildirib: "Dini məsələlərdə həm dövlət, həm də xalq çox həssas olmalıdır. Çalışmalıyıq ki, bütün bu məsələlər hüquq müstəvisində həllini tapsın. Mən bir hüquq müdafiəçisi kimi bu gün Azərbaycanda dini aksiyaların keçirilməsinin tərəfdarı deyiləm. Məlum məsələdir ki, bu gün Azərbaycanda İran və başqa ölkələrin təsir dairəsində olanlar var. Onlar belə aksiyalardan öz məqsədləri üçün istifadə edirlər". Ç.Qənizadə dindarlarla polis arasında baş vermiş insidentlə bağlı İranın "Səhər" telekanalına müsahibə verməkdən imtina etdiyini də qeyd edib: "İranın "Səhər" televiziyasından mənə zəng edərək, Bakıda din xadimlərilə polis arasında baş vermiş insidentlə bağlı insan haqlarının pozulmasına dair hüquq müdafiəçisi kimi fikirlərimi öyrənmək istədilər. Mən bu televiziyaya müsahibə verməkdən imtina etdim. Onlara bildirdim ki, üç aydan artıqdır, İranda həbsdə olan azərbaycanlı alim Rəşid Əliyevlə görüşmək məqsədilə bu ölkənin Azərbaycandakı səfirliyi ilə danışıqlar aparıram. Lakin bu günədək bu danışıqlar nəticə verməyib. Onlara dedim ki, siz insan haqlarından danışırsınızsa, hökumətiniz niyə biz hüquq müdafiəçilərinin həbsdə olan Rəşid Əliyevlə görüşünə şərait yaratmır, niyə onun hüquqları maraqlanmırsınız?"
   

Bakıda "Qış bulvarı"nın tikiləcəyi ərazidəki evlərin sahibləri fevralın 18-də Prezident Administrasiyasının qəbul otağının qarşısına toplaşıb.
   Lent.az-ın müxbirinin verdiyi məlumata görə, vətəndaşlar onlara kompensasiya verilməməsindən şikayətlənib. Sakinlər bildiriblər ki, onlara şifahi olaraq hər kvadratmetrə görə 1500 ABŞ dolları təklif olunub. Lakin sakinlər bununla razılaşmadıqlarını bildirib. "Qış bulvarı"nın tikiləcəyi ərazidə evləri və obyektləri sökülənlərdən, ikisi sakin, ikisi sahibkar olmaqla, 4 nəfəri Prezident Administrasiyasında qəbul ediblər. Qalan vətəndaşlar isə qəbul otağının qarşısında gözləyib. Qeyd edək ki, "Qış bulvarı"nın tikiləcəyi ərazi Füzuli və Topçubaşov küçələrini əhatə edir.
   
   

Prezident İlham Əliyevin yanında cümə axşamı ekoloji problemlərə həsr olunmuş müşavirə keçirilib. Məlumatı AzərTAc Dövlət Agentliyi yayıb. Prezident İlham Əliyev müşavirəni giriş sözü ilə açaraq, 2010-cu ilin ölkəmizdə "Ekologiya ili" elan olunduğunu, respublikamda ekoloji problemlərin həllinə böyük diqqət yetirildiyini və bununla bağlı konkret proqramın qəbul edildiyini vurğulayıb.
   Azərbaycanın sosial-iqtisadi sahədə qazandığı nailiyyətləri hərtərəfli şərh edən Prezident iqtisadi uğurların daha da möhkəmləndirilməsilə yanaşı, hazırda ekoloji problemlərə də xüsusi diqqət yetirilməsinin vacibliyini nəzərə çatdırıb. Dövlət başçısı neftlə çirklənmiş ərazilərin təmizlənməsi, içməli su, kanalizasiya, məişət tullantılarının utilizasiyası və s. istiqamətlərdə görülən işlərdən və qarşıda duran vəzifələrdən danışıb.
   Bakı buxtasının təmizlənməsi tədbirlərinin də həyata keçirilməsi məsələsinə toxunan Prezident İlham Əliyev Xəzər dənizinin suyundan içməli su kimi və suvarma məqsədilə istifadə edilməsinin beynəlxalq təcrübəyə uyğun mümkünlüyünü də nəzərə çarpdırıb.
   Dövlət başçısı havanın çirkləndirilməsinin qarşısının alınması, meşələrin qorunması, Abşeron yarımadasındakı göllərin bəzilərinin qurudulması, bir sıra göllərin isə abadlaşdırılaraq istirahət məkanına çevrilməsi, bərpa olunan enerji mənbələri üzrə layihələr və s. məsələlərlə əlaqədar fikirlərini bildirib, müzakirə edilən bütün mövzulara dair kompleks layihələr və təkliflərin hazırlanmasını tapşırıb.
   

Azərbaycan Mətbuat Şurası (MŞ) bəyanatla çıxış edib. APA-nın məlumatına görə, bəyanatda bildirilib ki, MŞ açıq və obyektiv sözə, jurnalistin və mətbuatın təmiz adına, əxlaqına ləkə gətirən neqativ hallara biganə qalmır:
   "Lakin çox təəssüflə bildiririk ki, illərdən bəri şərti olaraq "reket jurnalistika" adlandırdığımız xoşagəlməz meyl bu gün də davam etməkdə, mediamızın nüfuzuna, onun saf və təmiz adına ləkə gətirməkdədir.
   Mətbuat Şurası ötən müddətdə quruma ünvanlanan çoxsaylı müraciətləri və şikayətləri ictimai sifariş kimi dəyərləndirərək, "reket nəşr"lərə qarşı ardıcıl və prinsipial mübarizə aparmaqdadır. Ölkə jurnalistlərinin V qurultayının iştirakçısı olan yüzlərlə tanınmış media təmsilçisi qurumun bu istiqamətdəki fəaliyyətinin intensiv xarakter alması üçün təşəbbüs və təkliflərini irəli sürüb. Nəticədə Şuranın "Reket jurnalistika"ya qarşı mübarizə Komissiyası formalaşdırılıb. Peşə prinsiplərinə etinasız yanaşan media orqanlarına qarşı ictimai qınağın təsir gücünü artırmaq məqsədilə mətbuatın "qara siyahı"sı tərtib edilib. Konkret şikayət və müraciətlər əsas götürülərək, Azərbaycan Jurnalistlərinin Peşə Davranışı Qaydalarını, ölkə qanunvericiliyinin tələblərini kobud və mütəmadi pozan qəzet və jurnallar həmin siyahıya salınmaqdadır. Hazırda onların sayı 94-dür".
   MŞ bildirib ki, bu siyahıya daxil olanlar qurumu hədələmək yolu tutub. Bəyanatda qeyd olunub ki, əməllərini yeni adla qeydiyyatdan keçirdikləri nəşrlərdə davam etdirən qəzet rəhbərləri də var: " Xüsusən "Gündəlik Bakı" və "Təzadlar" qəzetləri, həmçinin "Mozalan" jurnalı kimi bütün sərhədləri aşan nəşrlər də mövcuddur. Mətbuat Şurasının rəhbərliyini məhkəməyə verməklə kifayətlənməyən bu KİV-lər hər saylarında Şuranın İdarə Heyətinin üzvlərinin ünvanına hətta hədə-qorxu gəlməkdən belə çəkinmirlər".
   Bəyanatda daha sonra bildirilib: "Mətbuat Şurası bəzi "reket nəşr"lərin arxasında gizli havadarların olmasını, onların maliyyələşdirilərək məkrli sifarişlərin icrasına cəlb edilmələrini yolverilməz hal sayır. MŞ bununla bağlı kifayət qədər tutarlı faktlara malikdir. Gizli sponsorlar sırasında dövlət orqanlarında çalışan bəzi məmurların mövcudluğu isə xüsusilə təəssüf doğurur. Azərbaycan iqtidarının söz və mətbuat azadlığı ilə bağlı məsələlərə həssas yanaşdığı şəraitdə onların bu siyasətə uyğun gəlməyən addımlar atanlara, öz mənafeləri naminə müxtəlif spekulyasiyalara baş vuranlara himayədarlığı heç bir məntiqə sığmır".
   Şura bildirib ki, quruma qarşı göstərilən bütün təsir və təzyiq cəhdləri mənasız və əbəsdir.
   Qurum "reket qəzetlər"ə gizli şəkildə maddi və mənəvi dəstək verənlərin mövqelərini pisləyib, bu kimi halları ölkədə sivil jurnalistika mühiti yaratmaq istəklərinə, media sahəsində aparılan sistemli və ardıcıl fəaliyyətə zidd hərəkətlər kimi dəyərləndirib.
   MŞ Azərbaycanın ziyalılarını, həqiqi jurnalistləri və bütövlükdə ictimaiyyəti jurnalistikamızı ləkələyənlərə və mətbuatdan çirkin məqsədlərlə istifadə edənlərə qarşı birgə mübarizədə Mətbuat Şurasına daha sıx dəstək verməyə çağırıb.
   Həmçinin dövlət orqanlarını, hüquq-mühafizə, vergi, maliyyə və digər qurumları "reket nəşr"lərdə dərc olunan mətbu nümunələrə əsasən apardıqları yoxlamalara ehtiyatla yanaşmağa çağırıb.
   MŞ oxucuların, bütövlükdə vətəndaşların qurumun qərarlarına daim hörmət və etimadla yanaşdığını, dəstək olduğunu nəzərə alaraq, mediamızın təmizliyi uğrunda mübarizəsini davam etdirəcəyini bəyan edib.

ABŞ dövlət katibinin siyasi məsələlər üzrə müavini Uilyams Berns fevralın 19-da birgünlük səfərlə Bakıya gəlir. ABŞ-ın Azərbaycandakı səfirliyindən APA-ya verilən məlumata görə, səfərin məqsədi ABŞ-Azərbaycan münasibətlərini daha da genişləndirmək və dərinləşdirməkdir.
   Səfər zamanı onu Azərbaycan prezidenti İlham Əliyev qəbul edəcək, U.Berns vətəndaş cəmiyyətinin nümayəndələrilə görüşlər keçirəcək.
   Qeyd edək ki, U.Berns Bakıya Türkiyədən gəlir, öncə isə Livan və Suriyada olub.
   U.Bernsin digər Cənubi Qafqaz ölkələrinə səfəri nəzərdə tutulmur.
   

Dünən Vyanada ATƏT Parlament Assambleyasının qış sessiyası başlayıb. APA-nın xəbərinə görə, Azərbaycan Milli Məclisini ATƏT PA-da təmsil edən nümayəndə heyəti sessiyada iştirak edəcək. Azərbaycan nümayəndə heyətində MM sədrinin müavini Bahar Muradova, millət vəkilləri Rəbiyyət Aslanova, Fəttah Heydərov, Fazil Mustafa və Azay Quliyev təmsil olunur. Sessiyada Əfqanıstandakı indiki vəziyyət, ATƏT-in illik sessiyasına çıxarılacaq məsələlər, həmçinin iqtisadi, siyasi mövzular və insan hüquqları barədə müzakirələr aparılacaq.
   

Qarabağ münaqişəsinin həll edilməsində "yol xəritəsi"nin hazırlanması məsələsi yenidən gündəmə qayıdır. Hər halda, ATƏT-in fəaliyyətdə olan sədri kimi rəsmi Astananın mövqeyi və verilən bəyanatlar bu qənaətə gəlməyə əsas verir.
   Qazaxıstanın dövlət katibi - xarici işlər naziri Kanat Saudabayev məsələ ilə bağlı Vyanada ATƏT PA-nın üç ümumi komitəsinin birgə iclasında çıxışında bildirib ki, ölkəsi ATƏT-in fəaliyyətdə olan sədri kimi Dağlıq Qarabağ münaqişəsinin sülh yolu ilə həlli məqsədilə "yol xəritəsi" hazırlamaq niyyətindədir.
   Xatırladaq ki, bu günlərdə K.Saudabayevin Cənubi Qafqaz ölkələrinə: Azərbaycan, Ermənistan və Gürcüstana dördgünlük işgüzar səfəri başa çatıb.
   Qeyd edək ki, Qazaxıstandan əvvəl də Qarabağ münaqişəsinin həll edilməsində "yol xəritəsi"nin hazırlanması məsələsi gündəmdə olub. Hələ ötən ilin əvvəllərində Türkiyənin baş naziri Rəcəb Tayyib Ərdoğan bildirirdi ki, Ermənistan səmimi davranış göstərsə, Qarabağ münaqişəsinin nizamlanması üçün "yol xəritəsi"nin hazırlanması mümkündür. Həmin vaxt o, ölkəsinin bu məsələdə Azərbaycanı yalnız qoymayacağını bildirərək, Ermənistan rəhbərliyilə müəyyən görüşlər keçirsə də heç bir nəticə hasil olunmadı.
   Bundan sonra "yol xəritəsi" anlayışı ATƏT-in Minsk Qrupunun rusiyalı həmsədri Yuri Merzlyakov tərəfindən gündəmə gətirildi. Ötən ilin aprelində İrəvanda keçirdiyi mətbuat konfransında həmsədr bildirdi ki, Dağlıq Qarabağ probleminin nizamlanması üçün "yol xəritəsi" sənədinin imzalanması Azərbaycan və Ermənistan prezidentlərindən asılıdır. Lakin həmin vaxt "yol xəritəsi"nin nədən ibarət olmasına Yuri Merzlyakov heç bir aydınlıq gətirmədi.
   İndi qeyd olunduğu kimi, ATƏT-in fəaliyyətdə olan sədri kimi, Qazaxıstan Dağlıq Qarabağ münaqişəsinin sülh yolu ilə həlli məqsədilə "yol xəritəsi" hazırlamaq niyyətindədir. Qeyd edək ki, ölkəmizdə olarkən Kanat Saudabayev prezident Nursultan Nazarbayevin Dağlıq Qarabağ münaqişəsinin nizamlanmasına dair təkliflərini Azərbaycan prezidenti İlham Əliyevə təqdim edib. Həmçinin, Bakıda səfərdə olan K. Saudabayev xatırladıb ki, Nursultan Nazarbayev 1991-ci ildə Rusiya prezidenti Boris Yeltsinlə birlikdə danışıqlar prosesində birbaşa iştirak edib və indiyə kimi bu məsələ onun diqqət mərkəzində qalır. Nazarbayevin Dağlıq Qarabağ münaqişəsinin həllilə bağlı verdiyi təkliflərin mahiyyətini isə o belə cavablandırıb: "Azərbaycana və Ermənistana səfərlərim olub. Məqsədim səfər çərçivəsində konflikt olan ərazilərdə sülh əhval-ruhiyyəsinin yaradılması, Qazaxıstan prezidenti Nursultan Nazarbayevin münaqişə ilə bağlı xoşməramlı təkliflərini tərəflərə çatdırmaq olub. Mən Nursultan Nazarbayevin təkliflərini Azərbaycanda olanda prezident İlham Əliyevə çatdırdım. Analoji təklifləri, həm də, Ermənistan prezidentinə təqdim etdim. Burada münaqişənin həlli mexanizmləri də göstərilib. Qazaxıstan ATƏT-in sədri kimi bu təkliflərdə hər iki tərəfin maraqlarını ifadə edib. Bu təkliflər konfliktlə bağlı situasiya xarakterizə ediləndən sonra formalaşıb". Nazir onu da qeyd edib ki, Qazaxıstan Dağlıq Qarabağ münaqişəsinin nizamlanması prosesini olduqca diqqətlə izləyir və problemin həllinə müsbət stimul vermək niyyətindədir. O, bununla yanaşı bildirib ki, problemin həlli açarı bilavasitə münaqişə tərəflərinin öz əlindədir, vasitəçilər isə yalnız onun tezliklə həllinə köməklik göstərə bilər. Saudabayevin sözlərinə görə, rəsmi Astana Qarabağ münaqişəsi zonasında gərginliyin azaldılması üzrə istənilən təklifi, o cümlədən ATƏT-in Minsk Qrupunun tərəflərə ünvanlayacağı təmas xəttindən snayperlərin çıxarılmasına dair təklifləri dəstəkləyəcək: "ATƏT-ə sədrliyi dövründə Qazaxıstanın əsas məqsədi yubadılmış ərazi münaqişələrinin həlli olacaq".
   

Fevralın 19-da Ermənistan parlamentinin Xarici əlaqələr komissiyasında Türkiyə ilə imzalanmış protokolların ilkin müzakirəsi keçiriləcək.
   APA-nın "Panarmenian"a istinadən verdiyi məlumata görə, bunu komissiyanın sədri Armen Rustamyan deyib. O, ilkin müzakirə üçün xüsusi qayda işləyib hazırlamağı və komissiyanın öz rəyini qəbul etməsindən sonra protokolların parlamentin 4 günlük müzakirəsinə verilməsini təklif etdiklərini bildirib. A.Rustamyan müzakirələrin açıq və şəffaf olacağını söyləyib.
   

Bu barədə APA-ya Göygöl rayon Polis Şöbəsindən məlumat verilib. Hadisə rayonun Hacıməlik kəndində qeydə alınıb. Kənd sakini, 22 yaşlı Taleh Həsənov həyat yoldaşı, 20 yaşlı Rəsmiyə Rüstəmovanı gəzinti adı ilə aldadaraq rayonun Çaybağı deyilən yerə aparıb. Orada R.Rüstəmovaya bir neçə bıçaq zərbəsi vuran T.Həsənov onun öldüyünü zənn edərək polisə gedib və könüllü təslim olub. Hadisə yerinə baxış keçirən polis əməkdaşları R.Rüstəmovanın sağ olduğu görüblər. R.Rüstəmova təcili rayon xəstəxanasına çatdırılsa da, çoxlu qan itirdiyindən onu xilas etmək mümkün olmayıb.
   İlkin məlumata görə, T.Həsənov hadisəni qısqanclıq zəminində törədib.
   Faktla bağlı Göygöl Rayon Prokurorluğunda Cinayət Məcəlləsinin 120.1-ci (qəsdəm adam öldürmə) maddəsilə cinayət işi başlanıb, istintaq tədbirləri davam etdirilir.

Azərbaycandan Türkmənistana gedən yük gəmisinin sərnişini dənizə düşüb. APA-nın Fövqəladə Hallar Nazirliyinin rəsmi internet saytına istinadən verdiyi məlumata görə, 17 fevral 2010-cu il tarixində saat 09:30 radələrində Bakı-Krasnovodsk marşrutu ilə hərəkət edən Xəzər Dəniz Gəmiçiliyinə məxsus "Qarabağ" yük gəmisindən 1 nəfər dənizə düşüb. Həmin şəxsin axtarışlarına nazirliyin Aviasiya dəstəsinin 1 vertolyotu və Xəzər Dəniz Neft Donanmasının 2 gəmisi cəlb edilib.
   Hazırda axtarışlar davam edir.

Bakı şəhər sakini mənzilində əxlaqsızlıq yuvası təşkil etdiyi üçün tutulub. Bu barədə APA-ya Daxili İşlər Nazirliyinin (DİN) mətbuat xidmətindən bildirilib. Məlumata görə, Bakı şəhər sakini Elxan Mustafayev DİN-in İnsan Alverinə Qarşı Mübarizə İdarəsi əməkdaşlarının həyata keçirdiyi əməliyyat-axtarış tədbirləri nəticəsində saxlanıb. Onun mənzilində əxlaqsızlıq yuvası təşkil etməsi faktı üzrə cinayət işi başlanıb.
   

Səbail Rayon Polis İdarəsindən APA-ya verilən məlumata görə, hadisə dünən səhər saat 09:30 radələrində Səbail rayonu, İstiqlaliyyət küçəsində - Dövlət İqtisad Universitetinin binası ilə üzbəüz yerləşən "Karvan" çay evində baş verib.
   Hadisə nəticəsində çay evində olan iki nəfər yüngül xəsarət alıb. Xəsarət alanlardan 20 yaşlı Anar Novruzov Klinik Tibbi Mərkəzə yerləşdirilib. Digər yaralı isə ilkin tibbi yardım göstərildikdən sonra evə buraxılıb. İlkin məlumata görə, partlayışa qaz sızması səbəb olub. Faktla bağlı araşdırma aparılır. Partlayışla bağlı çəkiliş aparan jurnalist Zülfüqar Xeyirxəbər naməlum şəxslər tərəfindən döyülüb. "Salamnews" informasiya agentliyinin əməkdaşı Zülfüqar Xeyirxəbər "Turan"a bildirib ki, çəkiliş aparmaq üçün kafedə olan 30-35 yaşında kişidən icazə almaq istəyib. Həmin şəxs ona icazə verməyib. Sonra onu təhqir edib. Təhqirə etirazını bildirdikdən isə naməlum şəxs onu döyməyə başlayıb. Səbail Rayon 9-cu Polis Bölməsindən "Turan"a bildiriblər ki, jurnalistə hücum edən 2 nəfər də saxlanılıb. Bunlar çay evinin işçiləri Əziz və Zaur adlı şəxslərdir. Hazırda iş üzrə təhqiqat aparılır.
   
   
   

Fevralın 16-dan 17-nə keçən gecə, saat 23.00 radələrində Bakının Hövsan qəsəbəsində 3 nəfər naməlum şəxs həmin qəsəbənin sakini, polis kapitanı, 39 yaşlı Atəş Quliyevə hücum edərək onu döyüb. Bu barədə APA-ya Suraxanı Rayon Polis İdarəsindən məlumat verilib. Mühafizə polisində inspektor vəzifəsində çalışan A.Quliyev hadisədən sonra Suraxanı Rayon Polis İdarəsinin 30-cu Polis Bölməsinə ərizə ilə müraciət edib.
   Daxil olan şikayət əsasında həyata keçirilən əməliyyat-axtarış tədbirləri nəticəsində hadisəni törədən şəxslər - 1979-cu il təvəllüdlü Rasim Həsənov, 1973-cü il təvəllüdlü Vasif Rzayev və 1977-ci il təvəllüdlü İlham Şahvələdov müəyyən edilərək saxlanıb. Təqsirləndirilən şəxslər ifadələrində polis kapitanı A.Quliyevi şəxsi münaqişə zəminində döydüklərini bildiriblər. Faktla bağlı araşdırmalar davam etdirilir.

Səbail Rayon Məhkəməsində Çexiyanın "Harvard Sənaye Holdinqi" Səhmdar Cəmiyyətinin Azərbaycanın baş prokuroru Zakir Qaralova qarşı iddiasına baxılıb.
   Lent.az-ın məlumatına görə, hakim Nurəddin Bağırovun sədrliyilə keçirilən iclasda məhkəmə Çexiya şirkətinin müraciətini qəbul etməyib, Z.Qaralovun xeyrinə qərar çıxarıb.
   Qeyd edək ki, Səhmdar Cəmiyyət bir müddət əvvəl Zakir Qaralova müraciət edib. Ancaq baş prokuror müraciətlərə cavab verməyib. Şirkət baş prokurorun hərəkətsizliyi barədə iddia qaldırıb. Məhkəmə isə iddianı rədd edib.
   "Harvard Sənaye Holdinq" Səhmdar Cəmiyyətinin baş prokurora ünvanladığı müraciətdə cəmiyyətin keçmiş prezidenti Viktor Kojenni, onun şəriki Boris Vostri və digərlərinin törətdiyi əməllərin düzgün araşdırılması xahiş edilib.
   

Cümə axşamı saat 11.20 radələrində "Sahil" parkında iki gənc vətəndaş İlahə İlyasovanı oğurlamağa cəhd edib. Onlardan biri İlyasovanın qolundan tutub, digəri isə yaxınlıqda cinayət ortağını ört-basdır edib.
   "Turan"ın müxbiri Tapdıq Fərhadoğlu yoldan keçərkən qadının qışqırtısını eşidib və onun köməyinə yetişib. Jurnalistin müdaxiləsi naməlum şəxsləri qadını buraxaraq qaçmağa məcbur edib. Bir qədər sonra "Turan"ın müxbiri bu canilərdən birini hadisə yerinin yaxınlığında görüb. Gənc kimə isə telefonla qadını oğurlaya bilmədiyi barədə məlumat verirmiş. Jurnalistin sözlərinə görə, o, cənub (Lənkəran) ləhcəsilə danışır və "Boranı" ləqəbli kiməsə müraciət edirmiş. İlahə İlyasova artıq çoxdan təzyiqlərə məruz qalır. O, 2007-ci ildə fırıldaqçıların qurbanı olub. Mənzil alarkən makler onu aldadıb. Makler Məlik Məmmədov onun 42 min dollarını alıb, amma mənzil verməyib. İstintaq əsassız olaraq fırıldaqçılıq haqqında işi borc probleminə tövsif edib. Məmmədovun təqsiri məhkəmədə sübuta yetirilib, amma İlyasova itirdiyi pulları geri ala bilmir.
   

Gəncə şəhərində qətl hadisəsi baş verib. Gəncə Şəhər Prokurorluğundan APA-nın qərb bürosuna verilən məlumata görə, Gəncə şəhər Sevinc qəsəbə sakini, 1977-ci il təvəllüdlü Qəmbərov Sabiq Telman oğlu həyat yoldaşı, 1986-cı il təvəllüdlü Qasımova Eleonara Əlövsət qızını qayınatasının evində "Vinçester" markalı tüfənglə vuraraq qətlə yetirib. Qətlin münaqişə zəminində baş verdiyi bildirilir. S.Qəmbərov hadisədən dərhal sonra tutulub. Faktla bağlı Gəncə Şəhər Prokurorluğunda araşdırma aparılır.
   
   

Ermənistan Silahlı Qüvvələri dünən günorta saatlarından başlayaraq Azərbaycan Ordusunun bir neçə istiqamətdə mövqelərini atəşə tutmağa başlayıb.
   APA-nın Qarabağ bürosunun xəbərinə görə, Tərtər rayonunun Borsunlu, Qapanlı, Goranboyun Tapqaraqoyunlu, Ağdamın keçmiş Gülçülük sovxozu adlanan istiqamətində atışma davam edir.
   Ermənilərin Goranboy rayonunun Tapqaraqoyunlu kəndi istiqamətində atəşkəsi pozması nəticəsində Azərbaycan Ordusunun əsgəri Sahil Məmmədovun yaralandığı bildirilir. Məlumata görə, yaralanan əsgər hərbi hospitala yerləşdirilib.
   Dünən Ermənistan Silahlı Qüvvələrinin Ağdam rayonu istiqamətində atəşkəs pozması nəticəsində Azərbaycan Ordusunun əsgəri Fərəcov Xəyal Bəşər oğlu şəhid olub.
   APA-nın Qarabağ bürosunun xəbərinə görə, Masallı rayon Hərbi Komissarlığından həqiqi hərbi xidmətə çağırılmış Fərəcov Xəyal Bəşər oğlu hərbi hospitala çatdırılsa da, onun həyatını xilas etmək mümkün olmayıb.
   Ermənilərin Goranboy rayonunun Tapqaraqoyunlu kəndi istiqamətində atəşkəsi pozması nəticəsində yaralanmış əsgər Sahil Novruz oğlu Məmmədov da dünən dünyasını dəyişib.
   APA-nın Qarabağ bürosunun digər məlumatına görə, Beyləqan istiqamətində ermənilərin atəşkəsi pozması nəticəsində Azərbaycan Ordusunun daha 4 əsgəri yaralanıb. Cümə axşamı qoşunların təmas xəttində atəşkəs rejiminin pozulması nəticəsində Azərbaycan Ordusunun 3 hərbi qulluqçusu həlak olub, ikisi isə yaralanıb. Bu barədə isə hərbi mənbə Trend News-a məlumat verib. Azərbaycanın Müdafiə Nazirliyindən məlumat almaq mümkün olmayıb.
   Azərbaycan Ordusunun şəhid olan daha bir əsgərinin adı dəqiqləşib. APA-nın Qarabağ bürosunun xəbərinə görə, Ermənistan Silahlı Qüvvələrinin Tərtər rayonunun Qapanlı kəndi istiqamətində atəşkəsi pozması nəticəsində şəhid olan əsgər Xaçmaz rayon Hərbi Komissarlığından hərbi xidmətə çağırılan Rüstəmov Davud Rüstəmmuradoviçdir.
   Ziddiyyətli xəbərlər deməyə əsas verir ki, dünən sərhədlərdə əsl müharibə səhnələri yaşanıb, 3 əsgərimiz ölüb, azı 4-ü yaralanıb.
   "Bu gün cəbhənin müxtəlif istiqamətlərində Ermənistan Silahlı Qüvvələri atəşkəs rejimini pozub və nəticədə bəzi yerlərdə atışmalar baş verib". Bunu APA-ya açıqlamasında Azərbaycan Müdafiə Nazirliyinin mətbuat xidmətinin rəhbəri Eldar Sabiroğlu deyib.
   Mətbuat xidmətinin rəhbərinin sözlərinə görə, atışmalar nəticəsində Azərbaycan Ordusu 3 şəhid verib, 1 əsgər isə yaralanıb: "Qarşı tərəf də bizdən az itki verməyərək, geri çəkilib".