Azərbaycanda 12450 nəfər narkotikə görə həbsdədir. Bunların 25 faizi, yəni təxminən 3100 nəfərə yaxını qadın cinsinin nümayəndələridir. Hər ötən il qadınların sayında artım müşahidə olunur. Bu da olduqca narahatedici bir məsələdir. Məsələ ondadır ki, əks cinsin nümayəndələrinin narkotik aludəsi olması cəmiyyətdə ciddi fəsadların baş verəcəyindən xəbər verir.

   Bu qorxunc bəladan qurtulmaq üçün bütün məsuliyyəti güc strukturlarının üzərinə qoymaq düzgün olmazdı. Cəmiyyətin bütün təbəqələri bu bəlaya qarşı aktiv olmalıdır.

   "Polisə Dəstək" İctimai Birliyinin sədri Şəmsəddin Əliyev hesab edir ki, bütövlükdə ölkədə narkotik vasitələrin yayılması narahatedici məsələdir: "Ona görə də bununla bağlı həyəcan təbili çoxdan çalınmalı idi. Hər hesabat dövründə cinayətkarlığın dinamikasında narkotik maddələrlə bağlı faktlar artımla müşahidə olunur. Azərbaycan strateji əhəmiyyətli coğrafi bölgədə yerləşdiyindən, bu tip cinayətlər üçün kifayət qədər cəlbedici görünür. Bu istiqamətdə daha çox mübarizə tədbirləri DİN tərəfindən aparılır. O cümlədən MTN və Dövlət Sərhəd Xidməti tərəfindən də mübarizə aparılır. Narkotik maddələrə görə həbs olunan qadınların sayında artımın müşahidə olunması çox narahatedici məsələdir. Bunun qarşısını almaq üçün kompleks tədbirlərin görülməsinə ehtiyac var. Bundan ötrü Səhiyyə və Təhsil nazirlikləri də fəal şəkildə iş aparmalıdır. Eyni zamanda, bu məsələdə dini qurumlar da yaxasını kənara çəkməməlidir. Məsələ ondadır ki, islami dəyərlər də narkotik və digər bihuşedici maddələrin qəbulunu qadağan edir. Rəbbimiz bu tipli insanları lənətləyir. Bəs nə etmək lazımdır ki, bu hallar olmasın? Bundan ötrü sərhəddə nəzarəti maksimum gücləndirmək lazımdır. Maşınların sərhəd zonasında fərdi qaydada yoxlanması maksimum artırılmalıdır. Bununla belə hüquqi cəhətdən maarifləndirmə yolu ilə insanların beynində inqilab etmək lazımdır. Bu işdə Təhsil Nazirliyinin üzərinə böyük iş düşür. Həmçinin, Səhiyyə Nazirliyi narkotik maddələrin insan orqanizminə nə qədər böyük zərər vurması barədə KİV vasitəsilə cəmiyyətə mütəmadi məlumat verməlidir. Dini qurumlar hər bir məclisdə bununla bağlı təbliğat işi aparmalıdır. Deməyim odur ki, narkotik və digər psixotrop maddələrə aludə olan insanların bu vərdişlərdən çəkilmələri üçün hər birimiz çalışmalıyıq. Bunun qarşısını almasaq, millətimizin genetik fondu çox ciddi faciələrlə üz-üzə qalacaq. Artıq sirr deyil ki, bir sıra orta və ali ümumitəhsil məktəblərində narkotik vasitələrə aludəlik artıb".