Tovuzun "Turan" klubu ciddi problemlə üzləşib. Apasport.az saytının məlumatına görə, Qərb təmsilçisinin məşqçiləri "qarğışa keçib". Belə ki, AFFA-nın İntizam Komitəsi növbə ilə Tovuzun az qala bütün məşqçilərini cəzalandırmaqda davam edir.
   Unibank Premyer Liqasının XIX turunun "Qəbələ" ilə oyununda texniki zona qaydalarını pozduğu üçün 1 oyunluq cəzalandırılan Eltay Aslanov "Turan"ın 4-cü məşqçisidir ki, komitənin qəzəbinə tuş gəlir.
   Bir müddət əvvəl, komandanın baş məşqçisi Nizami Sadıqovun 2+2 oyunluq (yəni 2-si şərti olmaqla) cəzası başa çatdı. Düzdür, 4000 manatlıq cərimə vaxtında ödənmədiyindən o, 3 matçı kənardan izləməli oldu. Ötən il dekabrın 22-də cəzalanan Sadıqov "İnter"dən olan həmkarı Kaxaber Sxadadze ilə bir-birini təhqir etdiyi və bu səbəbdən texniki zonadan qovulduğu üçün cəzaya layiq görülmüşdü.
   Onun digər köməkçisi Eldəniz Hüseynov da komitənin sərt üzünü görüb. Cari mövsüm cəzalanan ilk tovuzlu məşqçi olan Hüseynov ötən il sentyabrın 15-də İntizam Komitəsinin siyahısına düşüb. O, 1 oyunluq kənarlaşdırılma və 2000 manat cərimə ilə canını qurtarıb.
   "Turan"ın hazırda məşqçiliklə məşğul olan daha bir veteranı Etimad Qurbanov isə U-15-in güdazına gedib. Yeniyetmələrlə çalışan çalışdırıcı hakimləri təhqir etdiyi üçün 4 matçlıq cəza alıb.
   Bütün bunlar azmış kimi, Sadıqov daha bir dəfə komandasını xərcə salıb. Onun mətbuat konfransına gəlməməsi komitənin ötən il dekabrın 7-dəki iclasında müzakirə olunub. Tovuzlular buna görə 1000 manat cərimələnib.
   Ümumilikdə, "Turan"ın 4 məşqçisi ilə bağlı 5 qərar çıxaran komitə onları 8+2 oyunluq cəzalandırıb. Çalışdırıcılarının klubuna verdiyi qazanc isə 9 min manatlıq cəriməyə çatıb.

UEFA dopinqdən istifadə etdiyi məlum olan İtaliyanın "Fiorentina" klubunun rumın futbolçusu Adrian Mutunu Çempionlar Liqası qarşılaşmalarında oynamaqdan məhrum edib.
   Futbolçu gələn həftə Çempionlar Liqası turniri çərçivəsində keçiriləcək Almaniyanın "Bavariya" klubu ilə oyunda komandasına kömək edə bilməyəcək. İtaliya Antidopinq Qurumunun da Rumıniya yığmasının üzvünə cəza verəcəyi gözlənilir.
   Xatırladaq ki, götürülən nümunələrdə Mutunun qanında istifadəsi qadağan olunmuş sibutramin preparatı aşkar edilmişdi.

"Arsenal"ın ispaniyalı kapitanı Fransesk Fabreqas komandasını tərk etmək fikrində olmadığını bildirib.
   "Sky Sports" xəbər verir ki, o, Kataloniya klubunun da məlumatları təkzib etdiyini xatırladıb: "İndi isə mən bəyan edirəm ki, bu haqda deyilənlər həqiqət deyil. Bizim aramızda heç bir şifahi razılaşma əldə edilməyib. Mən yalnız "Arsenal"ın oyunları haqda düşünürəm". Xatırladaq ki, son günlər idman KİV-nin gündəmini tutmuş əsas xəbərlərdən biri Fabreqasın yayda "Barselona"ya keçəcəyilə bağlı idi.

İspaniyanın "Barselona" futbol klubunun əsas heyətinin daha bir müdafiəçisi sıradan çıxıb. Ukraynalı Dmitri Çiqrinski məşq prosesi zamanı əzələsini dartaraq 1 həftə yaşıl meydanlardan kənarda qalmağa məcbur olub.
   Çiqrinski son günlər ərzində "Barselona"nın sıradan çıxmış sayca 6-cı müdafiəçisi olub.
   Bir qədər əvvəl zədə və diskvalifikasiya səbəbindən Erik Abidal, Xerard Pike, Rafael Markes, Daniel Alveş və Yaya Ture heyətdən çıxarılıb. "Barselona" klubunun baş məşqçisi Xose Qvardiolanın fevralın 14-də baş tutacaq "Atletiko" klubu ilə çempionat oyununda müdafiə xəttində kimi oynadacığını müəyyənləşdirməkdə çətinlik çəkdiyi bildirilir.
   Xatırladaq ki, futbol üzrə İspaniya çempionatına "Barselona" klubu başçılıq edir. "Real" 5 xallıq fərqlə 2-ci yerdə qərarlaşıb.

İtaliyanın "Yuventus" klubu "Bavariya"nın şərəfini qoruyan fransalı yarımmüdafiəçi Frank Riberini heyətinə qatmaq niyyətindədir. İtaliya mətbuatının yazdığına görə, bu məqsədlə Münhen klubunun rəhbərliyi ilə danışıqlar aparmaq üçün "Qoca sinyora"nın rəhbəri Con Elkann artıq Almaniyadadır. Onun səfərinin rəsmi səbəbi başqa olsa da, Riberinin keçidini də müzakirə edəcəyi dəqiqdir. Qeyd edək ki, "Bavariya" Riberini heyətinə qatmaq istəyən komandanın ən azı 40 milyon avrodan keçməli olduğunu bəyan edib.
   

Türkiyə Kubokunun 1/4 final mərhələsində öz meydanında "Antalyaspor"u 3:2 hesabı ilə məğlub edən "Cim Bom" kubokdan kənarda qalıb.
   Milli.Az xəbər portalının "Qalatasaray"ın internet saytına istinadən verdiyi məlumata görə, qarşılaşmada hesabı İstanbul klubu açıb. Elanonun penaltidən vurduğu topa az sonra Necati qarşılıq verib. 48-ci dəqiqədə Emre Çolak, 87-ci dəqiqədə isə Canerin qollarına rəğmən, "Qalatasaray"ın yarımfinala adlamasına Necati imkan verməyib. Vaxtilə istanbulluların şərəfini qorumuş hücumçu dubl etməklə "Cib Bom"un kubok istəyinin üzərindən xətt çəkib. İlk qarşılaşmada səfərdə "Antalyaspor"a 2:1 hesabı ilə məğlub olmuş "Qalatasaray" ümumi hesaba əsasən kubok uğrunda yarışı dayandırıb. Yarımfinalda "Antalyaspor"un rəqibi "Trabzonspor" olacaq.
   

"Xəzər-Lənkəran"ın sahibi və fəxri prezidenti Mübariz Mənsimovun transfer siyahısı genişlənib. Apasport.az saytının məlumatına görə, mövsümün sonunda "Beşiktaş"a ulduz futbolçu gətirəcəyini söz verən azərbaycanlı iş adamının hədəfinə Deku, Maluda və Kalunun ("Çelsi") ardınca, Visente ("Valensiya") və Halk ("Porto") da düşüb.
   "Palmali" Şirkətlər Qrupuna rəhbərlik edən Mənsimovun "Beşiktaş"ın prezidenti Yıldırım Dəmirörənlə dost olduğu məlumdur. Həmyerlimizin işçisi olan Ələddin Aykaç isə eyni zamanda onun azarkeşi olduğu "Beşiktaş"da nümayəndəsidir. Mənsimovla Dəmirörənin göstərişindən sonra məhz Aykaç transfer işləri ilə fəal məşğul olaraq, həmin beş futbolçudan biri, yaxud ikisini komandaya gətirməyi planlaşdırır.
   Mənsimovun "Çelsi"nin rusiyalı sahibi Roman Abramoviçlə yaxın münasibətlərdə olduğundan əsas diqqət Dekuya yönəlmişdi. Portuqaliya yığmasının heyətində Bakıya da gələn 33 yaşlı yarımmüdafiəçi Londonda qalmaq istədiyindən transfer reallaşmadı.
   İndi əsas diqqət "Çelsi"nin digər iki legionerinə yönəlib ki, Maludanın transfer qiyməti 18, Kaluda 14 milyon avrodur. Ancaq Mənsimovun Abramoviçlə dostluğu ilə əlaqədar məbləğin endiriləcəyi gözlənilir. Hər halda, türklər həmyerlimizə qiymətin onun üçün problem olmadığını və yeni mövsümdə "Beşiktaş"da Mənsimov imzalı bir ulduzun mütləq olacağını xüsusilə qeyd edirlər.
   

İngiltərə çempionatının qarşılaşmasında "Arsenal" öz meydanında "Liverpul"a qalib gəlib. Oyunun taleyini "Arsenal"ın fransalı yarımmüdafiəçisi Abu Dabinin 72-ci dəqiqədə vurduğu qol həll edib.
   Bununla da turnir cədvəlində üçüncü yeri tutan "Arsenal" bir-birinin ardınca "Mançester Yunayted" və "Çelsi" qarşısında məğlubiyyətdən sonra ilk qələbəsini qazanmış olub.
   

"Qalatasaray"ın əsas futbolçularından biri olan Fil Dişi Sahili təmsilçisi Kader Keyta azarkeşləri şoka salacaq açıqlama verib.
   Milli.Az xəbər portalının məlumatına görə, "SkySports"a asıqlamasında o, gələn mövsümdən İngiltərə Premyer Liqasında çıxış etmək istədiyini bildirib. "Everton"un onu heyətində görmək istədiyini deyən Keytanın sözlərinə görə, mövsümün sonunda ingilis klubu ilə müzakirələrə başlayacaq. "Məni və "Qaralatasaray"ı qane edən təklif olsa, İngiltərəyə yollanaram", - deyə Keyta qeyd edib. O, İngiltərədə oynamağın hər bir futbolçunun arzusu olduğunu söyləyib: "Orada çoxlu sayda dostlarım da var. Premyer Liqada oynamaqda heç bir çətinlik çəkmərəm".
   

İtaliyanın "Yuventus" klubu yay transfer dönəmində bir sıra oyunçuları komandadan göndərəcək.
   İtaliya mətbuatının yazdığına görə, klubun baş menecerinin müavini Roberto Betteqa növbəti mövsüm üçün komandanın özəyini dəyişməyə qərar verib. Onun bu planına komandanın yaşlı oyunçuları uyğun gəlmir. Bu səbəbdən yayda David Trezeqe, Mauro Kamorenezi, həmçinin Fabio Qrosso, Tiaqu Mendeş, Kristian Molinaro kimi futbolçuların komandadan göndərilməsi nəzərdə tutulub.