Mətbuatın verdiyi məlumata görə, metronun "20 Yanvar" stansiyası qarşısında fəaliyyət göstərən "Velotrek" Ticarət Mərkəzi bu yaxınlarda söküləcək. Verilən informasiyaya görə, artıq sözügedən ticarət mərkəzinin sökülməsinə razılıq alınıb. Bildirildiyinə görə, şəhərin görkəmli yerlərindən birində fəaliyyət göstərən ticarət mərkəzində artıq söküntü işlərinə start verilib.

   Fevralın 1-dən ticarət mərkəzinin fəaliyyəti tam dayandırılıb və sahibkarlar başqa ərazilərə köçüb. Həmin gündən etibarən ticarət mərkəzi hasara alınıb və söküntü işlərinə başlanıb. Deyilənə görə, artıq mərkəzin bir hissəsi ekskovatorlarla dağıdılıb. "Velotrek" Ticarət Mərkəzinin hara köçürüldüyü isə hələlik məlum deyil. Mətbuatın yazdığına görə, ticarət mərkəzinin yerində yeni yaşayış kompleksi inşa olunacaq. Qeyd edək ki, "Velotrek"in söküləcəyi barədə məlumatlar artıq çoxdan dolaşırdı. Hələ yeni avtovağzal kompleksi istifadəyə verilən ərəfədə belə informasiyalar yayılmışdı ki, "Velotrek" Ticarət Mərkəzi bağlanacaq və oradakı obyektlər avtovağzaldakı mərkəzə köçürüləcək. Artıq bununla bağlı dövlət səviyyəsində qərarların qəbul edildiyi də bildirilir. O zaman Ticarət Mərkəzinin 2010-cu ilin yanvarından etibarən söküləcəyini deyənlər də vardı. Həmin vaxt yayılan başqa bir məlumatda isə "Velotrek"də çalışanlara "AMAY" Ticarət Mərkəzinin yeni binasına köçmək təklif edildiyi söylənilirdi.

   "Velotrek" ətrafında dolaşan məlumatların nə dərəcədə doğru olduğunu aydınlaşdırmaq üçün həmin məkana yollandıq. İlkin müşahidələr burada alış-verişin əvvəlki səviyyədə getdiyini göstərirdi. Yəni Ticarət Mərkəzində və onun ətrafındakı kiçik satış obyektlərində heç bir yenilik baş verməmişdi. Bütün obyektlər öz iş rejimində işləməkdə davam edirdi. Heç bir söküntü halına rast gəlmədik. Bu isə bizə fevralın 1-dən ticarət obyektinin fəaliyyətinin tam dayandırıldığı və sahibkarların başqa ərazilərə köçürüldüyü barədə yayılan informasiyanın reallığı əks etdirmədiyini deməyə əsas verir. Burada olarkən satıcılarla da söhbət etməyə çalışdıq. Bizimlə söhbətdə dönər satmaqla məşğul olan şəxs Avtovağzal istiqamətində hərəkət edən 284 saylı marşurut avtobusunun dayandığı ərazinin yaxın zamanlarda boşaldılacağını diqqətimizə çatdırdı. Onun sözlərinə görə, avtobusun dayandığı ərazi kiçik olduğundan, insanların bura toplaşması ilə yolda hərəkət müşkül məsələyə çevrilir: "Eşitdiyimə görə, bu səbəbdən ərazidəki satış obyektlərini yığışdırmaq istəyirlər. Adını da qoyublar ki, yolun genişləndirilməsi üçün ətrafdakı dükanlar yığışdırılmalıdır. Hələlik düzdür, öz işimizlə məşğul olmaqda davam edirik, amma buna baxmayaraq, sabah necə olacağını bilmirik. Heç bizə hər hansı başqa yer də təklif etməyiblər". Ticarət Mərkəzində müxtəlif növ paltar satmaqla gününü keçirən digər bir satıcı isə obyektlərin sökülməsinin arxasında başqa məqsədlərin durduğunu dedi: "Bildiyimə görə, "Velotrek" Ticarət Mərkəzini həm genişləndirmək, həm də müasir üslubda yenidən qurmaq istəyirlər. Deyilənə görə, burada üç mərtəbəli yaraşıqlı bir ticarət obyekti inşa edəcəklər. Qaldırılan bütün hay-küylər də bununla bağlıdır. Çünki alver üstündə rəqabət getdiyindən, hamı bir-birinə badalaq vurmaq istəyir ki, başqası ondan irəli çıxa bilməsin. Ona görə də şayiə yayırlar ki, guya "Velotrek" sökülür. Gördüyünüz kimi bu baş verməyib. Hamı öz işindədir. Düzdür, son zamanlar alver səngiyib. Bu da avtovağzalın başqa yerə köçürülməsilə bağlıdır. Amma bütün hallarda buradakı ticarət mərkəzinin köçürüləcəyilə bağlı deyilənlər əsassızdır. Sadəcə olaraq, eşitdiyimə görə, rəhbərlik kompleksi genişləndirmək və müasir üslubda yenidən qurmağı düşünür. Məndə olan digər məlumata görə, avtovağzalın keçmiş ərazisini hansısa bir şirkət alıb. Onu almaqda da məqsədləri burada yaşayış evləri tikməkdir. Düzdür, hələlik böhran olduğundan, hər hansı bir iş aparılmayıb. Amma çox güman ki, böhran bitdikdən sonra burada yeni yaşayış binalarının tikintisinin şahidi olacağıq. Görünür, adını bilmədiyim həmin tikinti şirkəti "Velotrek"in yerləşdiyi əraziyə də göz dikib. Bu səbəbdən də belə şayiələr yayırlar".

   Bütün bunlar onu deməyə əsas verir ki, "Velotrek"in yaxın zamanlarda köçürüləcəyi barədə deyilənlər hələlik dəqiq deyil. Belə olsaydı, ən azından satıcılar arasında bir təşviş, narahatlıq hiss olunardı. Amma hələlik bunun şahidi olmadıq. Əksinə, ticarət mərkəzinin genişlənəcəyi və müasirləşəcəyi vurğulanır.