Mobil telefon başımızın bəlasına çevrilib. Özü də çeşidləri artdıqca, cib telefonlarının yeni məziyyətləri üzə çıxır. Əvvəllər bu bizim işimizə yalnız zəng vurub zəng qəbul etmək üçün yarayırdısa, indi bir çox əməliyyatları mobil telefon vasitəsilə həyata keçiririk.
   İstədiyimiz musiqini, görüntünü, səsi mobil telefonda canlandırır, onu başqalarına da ötürürük. Məlumdur ki, mobil telefondan müxtəlif məqsədlər, məsələn, kimlərisə şantaj eləmək məqsədilə də istifadə edənlər çoxdur. Bu da çox ailələrin dağılmasına, insanların faciəsinə səbəb olur. İndi bir adam digərilə gizli bir söhbət eləməyə çəkinir. Ona elə gəlir ki, qarşı tərəf söhbəti mobil telefonun yaddaşına köçürəcək.
   Mobil telefonun insanlara gətirdiyi bəla bununla bitmir. Son vaxtlar yeni bir xoşagəlməz hal da yaranıb. Daha doğrusu, mobil telefonlarda günümüzün populyar musiqiçi və meyxanaçıları sayılan insanların görüntüləri yayılıb. Yəni bu insanlar efirdə olarkən, həyatda, küçədə gedərkən, toylarda iştirak edərkən gizli çəkilən görüntüləri telefonun yaddaşına köçürülür, sonra isə ondan müxtəlif məqsədlər üçün istifadə edilir. Məsələn, bu günlərdə tanınmış meyxanaçı Aqşin Fatehin ilginc bir görüntüsü mobil telefonlarda geniş yayılıb. Hadisə belə baş verir ki, Aqşin Fateh küçədə avtomobillə gedir və qarşısına çıxan bütün insanlara, maneələrə nalayiq söyüş və təhqirlər yağdırır. Əslində, səs Aqşinə məxsus deyil, hansısa bir naməlum aktyor onun dilindən söyüş söyür, əxlaqsız sözlər danışır. Bir sözlə, başdan-ayağa söyüş olan bu görüntüdən Aqşinin özünün xəbərinin olub-olmadığını bilmirik.
   Əldə etdiyimiz məlumata görə, yalnız Aqşinin deyil, Bizim Şaban adlandırılan aktyorun, Elariz Məmmədoğlu və başqalarının da bu cür görüntüləri var. Nüfuzlu səsyazma studiyalarından birində çalışan tanışımızın sözlərinə görə, populyar insanların əslində yalnız görüntüləri əldə edilir, səsləri isə kompüter vasitəsilə bu görüntülərə "calaq olunur". Müsahibimiz bu studiyaların həmin görüntüləri yaymaqda əsas məqsədinin o sənətçiləri gözdən salmaq, onlar haqda əxlaqsız adam imici yaratmaq olduğunu dedi: "Elə studiyalar var ki, yalnız belə şeylərdən gəlir götürür. Aqşin Fatehin o görüntüsü doğrudan da başdan-ayağa əxlaqsızlıqdır. O maşını idarə edə-edə hər şeyin adını tərbiyəsizliklə ifadə edir, söyüş işlədir. Aqşin o studiyanı tapdırıb onları məhkəməyə də verə bilər. Belə studiyalar təxribatla, gənclərin əxlaqını pozmaqla məşğuldur.
   Başqa bir görüntü var. Restoranda Bizim Şabanı (aktyorun adını unutmuşam) döyüb təhqir edirlər. Mən montaj işini çox gözəl bilirəm və mənə yaxşı məlumdur ki, o aktyorun döyülməsini montaj vasitəsilə qurublar. Belə şeylər çoxdur. Hətta xarici müğənni və aktyorların da dilindən Azərbaycan dilində söyüşlər telefonlardadır.
   Özünə hörmət edən studiyalar başqaların fitnəsinə uyub gənclərimizin beynini zəhərləməməlidir. Bu studiyalar pornoqrafik görüntüləri də cilalayıb mini film halına salır. Şantaj xarakterli süjetlər çəkib telefonlara ötürürlər. Mənə elə gəlir ki, hüquq-mühafizə orqanları bu studiyaların yerini müəyyən etməli və bu təxribatın qarşısını almalıdır. Onu da deyim ki, bu mini studiyalar, əsasən evlərdə və binaların zirzəmisində fəaliyyət göstərir. Qanunsuz işləyir, vergidən yayınır və piratçılıqla məşğul olurlar".
   

Akademik Milli Dram Teatrının aktyoru, xalq artisti, görkəmli gülüş ustası Yaşar Nuri bu dəfə Musiqili Komediya Teatrının səhnəsində görünəcək. Aktyor adıçəkilən teatrın bir tamaşasında iştirak etmək üçün ünvanlanan müraciəti cavabsız qoymayıb.
   Musiqili Komediya Teatrında yenicə məşqlərinə başlanan dahi Üzeyir Hacıbəylinin "Ər və arvad" komediyasında Kərbəlayi Qubad rolu ona həvalə olunub. Bu tamaşada sevilən gülüş ustalarından təkcə Yaşar Nurini görməyəcəyik. Teatrın baş rejissoru Yusif Əkbərovun quruluşunda hazırlanan bu operettada xalq artistləri Afaq Bəşirqızı, İlham Əhmədov, Arif Quliyev, Fatma Mahmudova, əməkdar artistlər Elçin Həmidov, Əkbər Əlizadə, aktyorlardan Ülviyyə Əliyeva, Ema Məlikova çıxış edəcək. Tamaşa teatrın 100 illik yubileyi münasibətilə hazırlandığından, məşhur aktyorlar cəlb olunub. Y.Nuri böyük məmnuniyyətlə bu əsərdə oynamağa razılıq verdiyini deyib: "Mən çox böyük məmnuniyyətlə bu əsərdə oynamağa razılıq verdim. Son vaxtlar Musiqili Komediya Teatrında oynanılan uğurlu tamaşalar sübut edir ki, teatr bir əsrlik yubileyə ciddi hazırlaşır. Teatrın tarixi isə bu əsərlə başlanır. Deməli, 100 ildən sonra bu əsəri yenidən səhnəyə gətirmək də sevindirici haldır. Şadam ki, bu tarixi sənət dostlarım Afaq Bəşirqızı, İlham Namiq Kamal, Arif Quliyev kimi sənətkarlarla birgə yazacağıq. Ümumiyyətlə, bu teatr mənə doğma olan bir kollektivdir". Y.Nuri bu teatra bağlılığından da danışıb: "Atam bu teatrın sevilən aktyorlarından olub. Hər dəfə bu teatra gələndə elə bilirəm ki, öz doğma evimə gəlirəm. Çünki burada mənə doğma olan çoxlu xatirələrim var. Kərbəlayi Qubad roluna dəvət olunmağım ürəyimdəndir". ("OLAYLAR"İA) Qeyd edək ki, əsərin musiqi direktoru əməkdar incəsənət xadimi, bəstəkar Sərdar Fərəcovdur. Tamaşanın quruluşçu dirijoru əməkdar incəsənət xadimi Nazim Hacıəlibəyov, bədii tərtibatçısı əməkdar rəssam Eldar Qurbanov, quruluşçu xormeyster Vaqif Məstanov, quruluşçu baletmeysterlər isə Zakir Ağayev və Yelena Ağayevadır.