Bakı şəhərində müxtəlif internet-forumlarda erməniləri müdafiə edən və onlarla yazışan şəxs saxlanıb. Həmin şəxs dünən saat 18.00 radələrində metronun "Nərimanov" stansiyasının yaxınlığındakı parkda hüquq-mühafizə orqanlarının əməkdaşları tərəfindən tutulub.

   Bu barədə Milli.Az xəbər portalına parkda olan sakinlər məlumat verib. Apardığımız araşdırmadan sonra məlum oldu ki, saxlanan şəxs 25 yaşlı Anar Mühit oğlu Heybətovdur. O, müxtəlif internet saytlarında ermənilərlə danışıqlar aparırmış. Son dəfə də internet-forumda müzakirələr zamanı erməniləri söyən azərbaycanlılara etiraz edib və onlardan birini "Nərimanov" metrosunun yaxınlığındakı parka çağırıb. Hüquq-mühafizə orqanlarının əməkdaşları həmin şəxsi yaxalayaraq MTN-ə təhvil verib. Həmin qurumun ictimaiyyətlə əlaqələr mərkəzinin rəhbəri Arif Babayev MTN tərəfindən belə bir şəxsin saxlandığını təsdiq etmədi.