ABŞ-ın Azərbaycana yeni səfirinin təyin edilməsinin təxirə salınması üçün xüsusi səbəb yoxdur.

   Bunu jurnalistlərə ABŞ-ın Azərbaycandakı müvəqqəti işlər vəkili Donald Lu deyib. Onun sözlərinə görə, Birləşmiş Ştatların Bakıdakı səfirliyi tezliklə yeni səfiri iş başında görməyə ümid edir: "Mən ötən ayın əvvəllərində Vaşinqtonda olmuşam və təyinatla bağlı bir çox adamla söhbətlər aparmışam. Biz səfiri mümkün olduğu qədər tez görmək istəyirik. ABŞ-da bu proses uzun vaxt aparır və bu barədə qərarı yalnız prezident qəbul edə bilər". Dağlıq Qarabağ münaqişəsinə toxunan Donal Lu deyib ki, ATƏT-in Minsk Qrupunun həmsədrləri, eləcə də amerikalı həmsədr Robert Bradtke hazırda yüksək fəallıq nümayiş etdirir: "Hazırda Azərbaycan və Ermənistan prezidentləri, eləcə də həmsədrlər arasında fəallaşma dövrüdür. Mən gözləyirəm ki, bu davam edəcək".