Dünən Sabunçu rayonunda bıçaqlanma hadisəsi baş verib. Bu barədə ANS PRESS-ə Sabunçu Rayon Polis İdarəsinin 14-cü Polis Bölməsinin rəisi Zaur Bədəlov məlumat verib.

   Məlumata görə, Sabunçu rayonu Bilgəh qəsəbəsi ərazisində 52 yaşlı Vaqif Yusifova məxsus evdə fəhlə işləyən Şağan qəsəbə sakini, 60 yaşlı Rövşən İsmayılov aralarında yaranmış münaqişə zəmnində ev sahibini bıçaqlayıb. Bir neçə bıçaq yarası alan Vaqif Yusifov təcili olaraq 3 saylı xəstəxanaya yerləşdirilib, hazırda vəziyyəti normaldır. Hadisənin səbəblərinə gəldikdə isə, Rövşən İsmayılov ilkin ifadəsində ev sahibini borc üstündə bıçaqladığını və hadisəni törədərkən sərxoş vəziyyətdə olduğunu etiraf edib. Bölmə rəisinin verdiyi məlumata görə, o, mənzildə fəhlə işləyib və ona olan 20 manat borc ödənilmədiyinə görə belə bir əməl etdiyini etiraf edib. Faktla bağlı Cinayət Məcəlləsinin 126.1-ci (qəsdən sağlamlığa ağır zərər vurma) maddəsilə cinayət işi başlanıb, araşdırma aparılır.