Deputat Elmira Axundova həmkarı Qüdrət Həsənquliyevin Milli Məclisin fevralın 1-də keçirilən iclasında onun barəsində dediklərinə münasibət bildirib.

   Q.Həsənquliyev Prezident yanında Əfv Komissiyasının üzvü olan həmkarını qardaşı Nadir Həsənquliyevin qatilini azadlığa buraxdırmaq istiqamətində çalışmaqda günahlandırmışdı: "Mənim qardaşımı sifarişlə qətlə yetiriblər. Elmira Axundova Əfv Komssiyasının hər iclasında məsələ qaldırır ki, qardaşımı qətlə yetirən killer azadlığa buraxılmalıdır. Bu iş onun ailəsinin başına gəlsə, belə edərdimi? Axı o da anadır. Mən bilirəm ki, Elmira xanım nəyin müqabilində bunu edir. Bu adam nə Əfv Komissiyasına üzv olmağa, nə də Milli Məclisdə oturmağa layiqdir".

   "Media forum"a açıqlamasında E.Axundova deyib: "Qüdrət Həsənquliyevin qardaşını öldürən cinayətkar haqqında məsələ Əfv Komissiyasının iclasında üç-dörd il əvvəl bir dəfə gündəmə gətirilib. Biz o iclasda ömürlük həbs cəzası almış məhbuslar haqda müzakirələr aparırdıq və siyahını təhlil edirdik. Mənə həmin qatilin bacısı ərizə ilə müraciət etmişdi ki, qardışının ömürlük həbs cəzası alması ədalətsizdir, çünki heç vaxt killer olmayıb, cinayəti birinci dəfə törədib, Qüdrət Həsənquliyevin qardaşını ekstremal şəraitdə, Nadir Həsənquliyevin dostunu döydüyünü görərək öldürüb, sonra isə polisə könüllü təslim olub. Bacısı qeyd etmişdi ki, qardaşına ən çoxu 15 il düşürdü, lakin Qüdrət Həsənquliyev həm istintaqa, həm də məhkəməyə ciddi təsir göstərərək onun ömürlük həbs cəzası almasına nail olub.

   İşin materialları ilə tanış olandan sonra belə qənaətə gəldim ki, qatilin bacısının sözlərində müəyyən məntiq var. Ona görə də Əfv Komissiyasının iclasında bu cinayətkarın ömürlük həbs cəzasını 15-20 il azadlıqdan məhrumetmə ilə əvəzlənməsi mümkünlüyü ilə bağlı fikir söylədim. Söhbət cinayətkarın azadlığa buraxılmasından getmirdi, çünki qatil öz cəzasını çəkməlidir. Komissiyanın tərkibində olan yüksək vəzifəli məmurların bir neçəsi mənimlə razılaşdı və cavab verdilər ki, cinayətkar 10 il cəzasını çəkəndən sonra bu məsələyə qayıtmaq olar. Bu müzakirədən sonra nə mən, nə də komissiyanın başqa üzvləri həmin hadisəyə toxunduq.

   Qüdrət Həsənquliyev istehza ilə soruşur ki, bu iş onun ailəsinin başına gəlsə, belə edərdimi? Təəssüflər olsun ki, bu iş ailəmin başına gəlib. 1979-cu ildə mən cavan, çox istedadlı insan olan yazıçı, kinodramaturq qardaşımı itirmişəm. O, müəmmalı şəkildə Bakıda qətlə yetirilmişdi. Qatil tapılmadı və işi bağladılar. Ona görə də mən Qüdrət Həsənquliyevin ağrısını çox gözəl başa düşə bilirəm, lakin onun ədalətsiz, qərəzli hərəkətlərini heç bir halda bağışlamıram.

   O ki qaldı mənim Milli Məclisdə oturmağa layiq olmağıma, mənə olan qiyməti 1996-cı ildə Azərbaycan yazıçılarının qurultayında dahi Heydər Əliyev "Elmira xanım çox dəyərli bir insandır" deməklə, 2003-cü ildə isə məni "Şöhrət" ordenilə təltif edərkən vermişdi. Hesab edirəm ki, Qüdrət Həsənquliyev özü Milli Məclisdə oturmağa layiq deyil".

   Qüdrət Həsənquliyev BAXCP-nin mətbuat xidmətinə açıqlamasında Elmira Axundovanın fikirlərinin tamamilə qeyri-səmimi olduğunu bildirib. BAXCP sədri qeyd edib ki, muzdlu qatilin bacısının Əfv Komissiyasına müraciətilə bağlı Elmira Axundova deputat həmkarı kimi ona müraciət edə və baş verənlər haqqında ətraflı, dolğun məlumat ala bilərdi: "Elə bu faktın özü bu qadının nə qədər qeyri-səmimi olduğunu sübuta yetirir".

   Qüdrət Həsənquliyev sifarişli qətl hadisəsilə bağlı Azərbaycan mətbuatında saysız-hesabsız yazıların getdiyini, məhkəmə prosesinin mətbuat səhifələrində işıqlandırıldığını vurğuladı və Elmira Axundovanın da həmin dövrdə jurnalist olduğunu xatırlatdı: "Nadir barmağının ucu ilə də bir kimsəyə toxunmayıb. Sadəcə doğma bacısının həyat yoldaşının haqqını tələb edib. Bu barədə Azərbaycan mətbuatında kifayət qədər yazılıb və ictimai-siyasi proseslərlə azacıq da olsa maraqlanan hər kəsin hadisənin təfərrüatından məlumatı var". BAXCP sədri bildirdi ki, muzdlu qatil həbsxanadan ona ünvanladığı məktublarda qətli Müslüm İmanovun oğlu Kamalın və kürəkəni Sabirin sifarişilə həyata keçirdiyini etiraf edib: "Mən bu barədə elə həmin qadının da iştirak etdiyi parlamentin toplantısında danışmışam. Həmin məktublar az qala bütün Azərbaycan mətbuatında dərc olunub".

   Qüdrət Həsənquliyev Elmira Axundovanın muzdlu qatilin birinci dəfə cinayət törətməsi barədə söylədiklərinə də münasibət bildirdi: "Axı o bunu haradan bilir? Bəlkə bu onun üzə çıxan cinayətlərindən yalnız biridir, digərlərinin üstü hələ açılmayıb? Bəlkə bu qadının qardaşını da vaxtilə həmin cinayətkar dəstənin üzvləri qətlə yetirib?"

   BAXCP sədri vurğuladı ki, Elmira Axundovanın Əfv Komissiyasındakı məlum fəaliyyəti haqqında adıçəkilən deputatın parlamentdəki çıxışından sonra danışmaq məcburiyyətində qalıb: "O məni "ədalətsizlikdə" ittiham etdikdən sonra vaxtilə bu qadının özünə dediklərimi bütün millət vəkillərinin, ictimaiyyətin qarşısında bir daha təkrarlamalı oldum".