Ölkəmiz Yunan-Roma güləşi üzrə Ermənistanda keçiriləcək Dünya Kubokundan rəsmi şəkildə imtina edib. Bu haqda məlumatı "Novosti-Armeniya"ya turnirin mətbuat katibi Eduard Kələntəryan bildirib. Ermənistan Güləş Federasiyası Beynəlxalq Güləş Federasiyaları Assosiasiyasından (FİLA) məktub alıb.
   Sənəddə Azərbaycan yığmasını Dünya Kubokunda Özbəkistanın əvəzləyəcəyi göstərilib.
   Kələntəryanın sözlərinə görə, Azərbaycan tərəfi iki gün davam edəcək yarışdan imtinasına səbəb kimi 13 - 18 apreldə Bakıda keçiriləcək Avropa çempionatına daha yaxşı hazırlaşmaq istəyini göstərir. O, həmçinin FİLA-nın buna görə Azərbaycan Güləş Federasiyasına heç bir intizam sanksiyası tətbiq etməyəcəyini açıqlayıb.
   Xatırladaq ki, Dünya Kubokunda Türkiyə, İran, Rusiya, Gürcüstan, Ermənistan, Kuba və Macarıstan da mübarizə aparacaq.

"Qalatasaray" klubunun braziliyalı futbolçusu Elano Blumer yeni rekord vurub. Apasport.az saytının məlumatına görə, 28 yaşlı yarımmüdafiəçiyə əvəzlənmədə çatan yoxdur.
   O, hələ "Mançester Siti"də oynadığı vaxtlarda, tez-tez dəyişdirilməsi ilə tanınıb. 2007/08 mövsümündə bu göstəricidə İngiltərə Premyer Liqasında əlçatmaz olub.
   Belə ki, Elano start heyətində yer aldığı matçların 23-nü başa vura bilməyib. Başqa sözlə, komandanın çalışdırıcısı final fiti səslənməmiş braziliyalını dəyişib.
   Yarımmüdafiəçi bu adətindən indi "Qalatasaray"da da əl çəkməyib. O, "Cim Bom"un start heyətində yer aldığı oyunların 17-də əvəzlənib. Bu, Elanonun fiziki durumunun zəif olduğunu və onun 90 dəqiqə ərzində mübarizə aparmağa gücünün çatmadığını göstərir.

"Qalatasaray" rəhbərliyi komandanın üzvü Abdulkader Keytanı cəzalandıracaq. Apasport.az saytının məlumatına görə, buna səbəb Kot dTİvuar yığmasının şərəfini qoruyan futbolçunun "Cim Bom"un Antalyada keçirilən təlim-məşq toplanışına gec qatılmasıdır.
   Keyta milli komandanın heyətində Afrika Millətlər Kubokunda mübarizə aparıb. Yığmanın yanvarın 24-də 1/4 finalda Əlcəzairə uduzmasına baxmayaraq, Abdulkader "sarı-qırmızılılar"ın düşərgəsinə bir həftə sonra gəlib.
   Vətənində icazəsiz istirahət edən hücumçuya bu hərəkəti baha başa gələcək. İstanbul klubunun baş məşqçisi Frank Raykaard ciddi tədbirə əl atacaq. Hollandiyalı mütəxəssis onu uzun müddət ehtiyat oyunçular skamyasında oturtmaq fikrindədir. Əgər belə hal təkrarlansa, Keyta külli məbləğdə cərimələnəcək.

"Qış transfer pəncərəsi"nin bitməsinə bir gün qalmış İstanbulun "Qalatasaray" klubu heyətini daha bir futbolçu ilə gücləndirib. İzmirin "Altay" klubunda forma geyinən Musa Çağıran 1 milyon 250 min dollar müqabilində "Qalatasaray"la anlaşıb. İki klub arasında razılaşmaya əsasən 17 yaşlı Musa Çağıran mövsümün sonunadək "Altay"da çıxış edəcək. Futbolçu yeni mövsümdən etibarən isə İstanbulda məskunlaşacaq.

İtaliyanın "İnter" klubu braziliyalı futbolçusu Amantino Mançininin əzəli rəqibi "Milan"a icarə əsasında keçməsinə razılıq verib. Türkiyənin "Fənərbaxça" klubunun da maraq dairəsində olan Mançini mövsümün sonunadək "Milan"ın şərəfini qoruyacaq. Bu məlumatı "Gazetta dello Sport"a "Milan" klubu prezidentinin yardımçısı Adriano Qalliani verib.
   Qəzet həmçinin "Fiorentina" klubunun danimarkalı futbolçusu Martin Yorqensenin "Aarhus"a transfer edildiyini də iddia edir.

Heyətində olan futbolçuların ümumi dəyərinə görə, dünyanın ən bahalı klubları müəyyənləşdirilib. Heyətinə görə ən bahalı komanda "Barselona" seçilib. Rəhbərlik Kataloniya klubunu futbolçuları ilə birlikdə satmağa qərar versə, o zaman 514 milyon avro gəlir əldə edə bilər. "Barselona"nın heyətində ən bahalı futbolçu argentinalı Lionel Messidir. Messinin transfer dəyəri 80 milyon avro dəyərindədir.
   Heyətində futbolçuların dəyərinə görə ikinci ən varlı klub "Real"dır. "Kral klubu"nun ümumi dəyəri 473,5 milyon avrodur. Dünyanın üçüncü ən varlı klubu isə "Çelsi"dir. "Çelsi"nin dəyəri 436,2 milyon avrodur.
   

Dünən futbol üzrə Unibank Premyer Liqasında XVIII turun startı verilib. Lent.az-ın məlumatına görə, mövsümün ikinci yarısı Bakıda keçirilən 2 oyunla başlanıb.
   "Olimpik-Şüvəlan" "Şəfa" stadionunda "Qəbələ"ni qəbul edib. Bu oyun meydan sahibləri üçün ilk "6-lığ"a düşmək baxımından sonuncu şans sayılırdı. Məğlubiyyət təqdirində, "Olimpik-Şüvəlan" ən güclülər sırasına daxil olmaq şanslarını daha da çətinləşdirəcəkdi. "Qəbələ" də ilk "6-lıq"dakı yerini qorumaq üçün ən azı uduzmamalı idi. Oyun isə qonaqların qələbəsi ilə başa çatıb - 2:0. Bü gün "Neftçi" "Qarabağ"la ən azı heç-heçə edəcəyi halda, "Olimpik-Şüvəlan"ın ilk "6-lığ"a düşmək şansları tamamilə itəcək.
   "Bakı" isə Tofiq Bəhramov adına Respublika stadionunda qəbul etdiyi "Turan"ı məğlub edərək, ən güclülər sırasında mövqeyini möhkəmlədib.
   02 fevral
   "Bakı" - "Turan" (Tovuz) - 2:1
   "Olimpik-Şüvəlan" (Bakı) - "Qəbələ" - 0:2
   03 fevral
   14:00. "Karvan" (Yevlax) - "Simurq" (Zaqatala)
   15:00. "Neftçi" (Bakı) - "Qarabağ" (Ağdam)
   16:00. "Xəzər Lənkəran" - "Standard" (Sumqayıt)
   16:00. "İnter" (Bakı) - "Muğan" (Salyan)
   

"Xəzər Lənkəran" futbol klubu daha bir futbolçunu heyətinə qatıb. Müdafiəçilər Elvin Beqiri və Tihhon Şişovun ardından braziliyalı Kristian Martins Kabralla razılıq əldə edilib.
   Klubun mətbuat xidmətinin verdiyi məlumata görə, 30 yaşlı braziliyalı futbolçu ilə cənub klubu arasında 2 illik müqavilə imzalanıb.
   Xatırıladaq ki, pleymeyker olan Kristian Kabral Braziliya çempionatının A Seriyasında çıxış edən məşhur "Palmeyras" klubunun şərəfini qoruyub.
   O, karyerası ərzində "Parana", "Nautiko", "Vitoria" və "Fortaleza" kollektivlərinin formasını geyinib.
   

"Olimpik-Şüvəlan" futbol klubu II dövrənin hazırlıqlarını sona çatdırıb. Klub Unibank Premyer Liqasında yaranan fasilədə bir çox futbolçularla yollarını ayırıb.
   "Olimpik-Şüvəlan"ın mətbuat xidmətindən ANS PRESS-ə verilən məlumata görə, qış fasiləsində komandadan Ramaz Cabnidze, Ramin Nəsibov, Füzuli Məmmədov, Vasif Haqverdiyev, Nikolay Kozaçuk, Artyom Vaskov, Ender Günlü və Abdel Kader Kamara kimi futbolçular uzaqlaşdırılıblar.
   Bu oyunçuların yerinə isə Samir Abdulov, Vüsal Qarayev, Mirko Bunyevçeviç və braziliyalı İsmael Fransisko da Silva ilə müqavilə imzalanıb.
   

İngiltərənin "Vest Hem Yunayted" klubu hücum xəttində olan problemlərini yeni futbolçu transfer etməklə aradan qaldırıb.
   London klubu Fransanın "Sent Etien" klubunun brazilyalı forvardı İlanı heyətinə qatıb. "Dünyanın ən güclü futbol çempionatında forma geyinəcəyim üçün çox xoşbəxtəm. Əsas heyətə düşmək üçün əlimdən gələni edəcəm" - deyə İlan bildirib.
   Futbolçu "Vest Hem"in əsas heyətinə düşmək üçün Mido və Benni Makkarti kimi futbolçularla rəqabət aparmalı olacaq.