Dünən Ağır Cinayətlərə Dair İşlər üzrə Məhkəmədə radikal dini təmayüllü dəstə yaradaraq, "Sumqayıt camaatı" adı altında beynəlxalq terrorçu şəbəkə ilə əlaqədə və digər bir sıra ağır cinayətlərdə ittiham olunan 31 Azərbaycan vətəndaşından ibarət mütəşəkkil dəstənin məhkəməsi davam etdirilib.
   APA-nın xəbərinə görə, hakim Azər Orucovun sədrliyilə keçirilən prosesdə təqsirləndirilən şəxslər ifadələrini davam etdirib.
   Sərbəst ifadəsində özünü qismən təqsirli bilən Namiq Məmmədov deyib ki, Şimali Qafqazda Rusiyaya qarşı çeçen hərbi birləşmələrinin tərkibində döyüşməyib. Lakin Azər Misirxanovun yanına - Gürcüstana gedib. Təqsirləndirilən Elşən Druskar isə ifadəsində İnquşetiyaya getdiyini və səfərinin məqsədinin Rusiya Silahlı Qüvvələrinə qarşı radikal dini qruplaşmalar tərəfindən aparılan hərbi əməliyyatlarda iştirak olduğunu bildirib.
   İttiham olunan Teymur Axundov sərbəst ifadəsində özünü qismən təqsirli bilib. O, dini qruplaşmaya yardım etməsini Allah yolunda mübarizə kimi dəyərləndirib: "Bakıda valyutadəyişmə məntəqəsinin işçilərinə hücum edib, əldə etdiyimiz pulu mücahidlərə verməliydik. Çünki həmin şəxslər bu pulu haram yolla qazanmışdılar".
   Təqsirləndirilən Arif İbrahimov Gürcüstanın Qori şəhərində silahla təmin olunduqlarını deyib: "Ancaq mən heç vaxt silahlı birləşmədə təmsil olunmamışam. Gürcüstana Namiq Məmmədovun dəvətilə getmişəm. Lakin vəziyyətdən xəbərim olmayıb".
   Prosesdə ifadə verən digər təqsirləndirilən şəxslər Elçin Canağayev, Ramil Fərzəliyev, Fuad Mövsümov və Rəşad Mahmudov özlərini qismən təqsirli bilib.
   Proses fevralın 10-da davam etdiriləcək.
   

Dünən Ağır Cinayətlərə Dair İşlər üzrə Məhkəmədə bacısını qətlə yetirməkdə təqsirləndirilən Neftçala rayon sakininin cinayət işi üzrə hazırlıq iclası keçirilib.
   APA-nın xəbərinə görə, hakim Şəkər Məmmədovanın sədrliyilə keçirilən prosesdə məhkəmə baxışı fevralın 9-na təyin edilib.
   Qeyd edək ki, 2009-cu il oktyabrın 21-də Neftçala rayon sakini, 29 yaşlı Vüsal Babayev qısqanclıq zəminində bacısı Təranəni iplə boğaraq öldürüb. Neftçala Rayon Polis Şöbəsi əməkdaşlarının keçirdiyi əməliyyat-axtarış tədbirləri nəticəsində Vüsal Babayev tutulub. Təqsirləndirilən Cinayət Məcəlləsinin 120-ci (qəsdən adam öldürmə) maddəsilə ittiham olunur.
   

Dünən Ağır Cinayətlərə Dair İşlər üzrə Məhkəmədə kriminal aləmdə "Rövşən Lənkəranski" ləqəbilə tanınan Rövşən Canıyevin cinayət işi üzrə məhkəmə baxışı başlayıb.
   APA-nın məlumatına görə, hakim Kəramət Əliyevin sədrliyilə keçirilən proses təqsirləndirilən tərəfin vəsatətilə mətbuat nümayəndələri üçün qapalı keçirilib. Prosesdə R.Canıyev ifadə verib.
   Qeyd edək ki, R.Canıyev 2000-ci ilə qədər qüvvədə olan Azərbaycan Cinayət Məcəlləsinin 15, 94.6-cı (qəsdən adam öldürməyə cəhd) və hazırkı Cinayət Məcəlləsinin 228-ci (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddələrilə ittiham olunur.
   Xatırladaq ki, bu cinayət işilə bağlı Azərbaycan Daxili İşlər Nazirliyi 1975-ci il təvəllüdlü, "qanuni oğru" Rövşən Canıyev haqqında beynəlxalq axtarış elan edib.
   2008-ci ilin fevralında Ukrayna Daxili İşlər Nazirliyinin əməkdaşlarının keçirdiyi xüsusi əməliyyat zamanı "Rövşən Lənkəranski" ləqəbi ilə tanınan Rusiya vətəndaşı Rövşən Rafiq oğlu Canıyev həbs olunub.
   Şevçenko rayon məhkəməsi Rövşən Canıyev haqqında 40 günlük həbs qərarı çıxarsa da, Ukraynada qaçqın status aldığına görə həbsdən azad edilib. Daha sonra məhkəmə Rövşən Canıyevin qaçqın statusunu ləğv edib.
   Rövşən Canıyev 2009-cu il dekabrın 3-də Ukrayna DİN Mütəşəkkil Cinayətkarlığa Qarşı Mübarizə Baş İdarəsinin əməkdaşları tərəfindən Kiyevdə saxlanıb. Onunla birlikdə hazırda Kiyevdə yaşayan, paytaxt restoranlarından birinin sahibi olan Rusiya vətəndaşı və onun üç mühafizəçisi də saxlanıb. Onların üzərindən rezin güllələr üçün nəzərdə tutulmuş "Fort-12P" və "PMR-9" tapançaları və "Vulkan" markalı karabin götürülüb. Bundan başqa, maşında aparılan axtarış zamanı daha bir "Fort-12P" tapançası aşkarlanıb.
   Rövşən Canıyev 2009-cu il dekabrın 12-də Azərbaycana gətirilib.
   

Azərbaycanda zorlamada təqsirli bilinən mütəşəkkil dəstənin üzvlərinə hökm oxunub.
   Trend News-un məlumatına görə, dünən Ağır Cinayətlərə Dair İşlər üzrə Məhkəmənin hökmü ilə Gəncə şəhər sakinləri - Asif Hüseynov, Vüsal Əsgərov 5 il 6 ay müddətinə azadlıqdan məhrum edilib. Digər təqsirləndirilən Elşad Quliyevə isə 2 il icbari cəza təyin edilib. Təqsirləndirilən şəxslər 2009-cu il iyunun 22-də 18 yaşlı Samirəni (ad şərti verilib) zorlayıblar. Onlar daha sonra 14 yaşlı Elmanla (ad şərti verilib) qeyri-təbii yolla cinsi əlaqədə olublar. Zərərçəkmişlərin şikayəti əsasında təqsirləndirilən şəxsləri Gəncə Şəhər Polis İdarəsinin əməkdaşları tutub.
   

Ali məktəblərə qanunsuz yolla tələbə qəbul etdirməkdə ittiham olunan şəxsin barəsində cinayət işi başlayıb.
   Nizami Rayon Polis İdarəsindən Trend News-a verilən məlumata görə, Qaraçuxur qəsəbə sakini, 1968-ci il təvəllüdlü Mahmud İmamverdi oğlu Quliyev ali məktəbə düzlətmək adı ilə Astara rayon sakini, 1981-ci il təvəllüdlü Xaqani Söhbəttin oğlu Məmmədovdan 7700 ABŞ dolları alaraq mənimsəyib. Məmmədov pulunun mənimsənilməsi ilə bağlı polisə şikayət edib. Faktla bağlı araşdırmalar davam edir.
   
   

Azərbaycanda ali məktəblərə qanunsuz tələbə qəbul etdirməkdə ittiham olunan şəxslərin apelyasiya şikayəti üzrə məhkəmə prosesi keçirilib.
   Trend News-un məlumatına görə, dünən Bakı Apelyasiya Məhkəməsində Azərbaycan Beynəlxalq Unversitetinə (ABU) və digər ali məktəblərə qanunsuz yolla tələbə qəbul etdirməkdə ittiham olunan Binəqədi Rayon Polis İdarəsinin keçmiş əməliyyat müvəkkili Müşfiq Muradovun və ABU-nun rektoru Elşad Abdullayevin qardaşı Mahir Abdullayevin katibəsi olmuş Bənövşə Hacıyevanın cinayət işi üzrə keçirilən prosesdə qərar elan edilib.
   Təqsirləndirilən şəxs Muradov apelyasiya şikayətindən imtina edilməsi barədə məhkəməyə məktub göndərib. Həmin məktuba əsasən də hakimlər apelyasiya şikayətinin baxılmasına xitam veriblər. Digər təqsirləndirilən Hacıyeva isə məhkəmənin hökmü ilə razılaşıb.
   Təqsirləndirilən şəxslər 2005-cü ildə bir qrup şəxslə cinayət əlaqəsinə girərək, ABU-ya Tələbə Qəbulu üzrə Dövlət Komissiyasından kənar tələbələr götürülməsinə başlayıblar. Onlar əvvəlcə tələbələri Dağıstanda olan universitetlərdən birinə qəbul etdirməyi, sonra isə ABU-ya köçürməyi vəd ediblər.
   Təqsirləndirilən şəxslər 2005-2007-ci illər ərzində 100-dən çox vətəndaşı aldadaraq pullarını mənimsəyiblər. Zərərçəkmişlərin şikayətindən sonra təqsirləndirilən şəxslər Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən tutulub.
   Ağır Cinayətlərə Dair İşlər üzrə Məhkəmədə Cinayət Məcəlləsinin 178.3.1-ci (mütəşəkkil dəstə tərəfindən dələduzluq etmək) maddəsilə ittiham olunan Muradovun 4 il müddətinə azadlıqdan məhrum etmə, Hacıyevanın isə 3 il şərti cəza alması barədə hökm çıxarılıb. Hacıyeva məhkəmə zalından azadlığa buraxılıb. Həmin hökmdən narazı qalan təqsirləndirilən şəxslər apelyasiya şikayəti verib.
   Bir müddət əvvəl Bakı Apelyasiya Məhkəməsində təqsirləndirilən şəxslərin apelyasiya şikayətinə baxılıb. Məhkəmə Muradovun barəsində çıxarılmış hökmü dəyişdirib və ona 2 il 6 ay müddətinə azadlıqdan məhrum etmə cəzası təyin edilib. Hökmün digər hissəsi isə qüvvədə saxlanıb. Lakin Muradov həmin qərardan Ali Məhkəməyə kassasiya şikayəti edib. Ali Məhkəmə onun şikayətini təmin edib və işin yenidən apelyasiya instansiyasında baxılması barədə qərar qəbul edib.
   

Bakıda iki qardaşdan 7 kiloqramdan çox narkotik götürülüb. Bu barədə APA-ya Bakı Şəhər Baş Polis İdarəsindən məlumat verilib.
   Məlumatda bildirilir ki, Binəqədi Rayon Polis İdarəsinin Narkotiklərlə Mübarizə Bölməsi əməkdaşlarının keçirdiyi əməliyyat tədbirləri nəticəsində Biləcəri qəsəbə sakinləri Aslan Salamovdan 0,261 qram, onun qardaşı Zahiddən isə 0,344 qram narkotik vasitə olan heroin aşkar edilərək götürülüb.
   Onların yaşadığı mənzilə baxış keçirən əməliyyatçılar əlavə olaraq 6 kiloqram 235 qram qurudulmuş marixuana və 1 kiloqram 130 qram heroin aşkar edib. Faktla bağlı cinayət işi başlanıb, istintaq tədbirləri davam etdirilir.