Rusiyanın Təhlükəsizlik Şurası Şimali Qafqazda yenidən sui-qəsdçi hücumlar taktikasına qayıdılması tendensiyasının mümkünlüyünü bəyan edib. Təhlükəsizlik Şurası katibinin müavini Vladimir Bulavin "İzvestiya" qəzetinə bildirib ki, 2009-cu ildə qarşısı alınmış terror aktlarının dörddə biri məhz sui-qəsdçilər tərəfindən hazırlanıb.
   Məmur açıq bildirib ki, silahlı mübarizə aparan dəstələr yenilənir, bura yeni insanlar cəlb olunur. Onun zənnincə, bu işi "qidalandıran" amillər işsizlik, korrupsiya, mütəşəkkil cinayətkarlıqdır.
   Qeyd edək ki, bu məsələdə Rusiya tez-tez Gürcüstanı da ittiham edir. Məsələn, bundan əvvəl Rusiya daxili işlər nazirinin müavini Arkadi Yedelev bildirib ki, Gürcüstan ərazisindəki hərbi bazalarda əcnəbi təlimatçılar Rusiyada terror aktlarının həyata keçirilməsi üçün terrorçu hazırlayır. Nazir müavininin sözlərinə görə, Gürcüstanda hazırlanan terrorçular Şimali Osetiya, İnquşetiya, Dağıstan, Çeçenistan, Kabirdin-Balkar, Qaraçay-Çərkəs bölgələrində vəziyyəti gərginləşdirməyi planlaşdırır. O, Şimali Osetiyada keçirilən müşavirədə hüquq-mühafizə orqanlarını diqqətli olmağa çağırıb. Nazir müavini tövsiyə edib ki, radikal ideyaları təbliğ edən dini birləşmələrin artan fəallığına ciddi şəkildə nəzarət edilsin.
   Analoji ittihamlar Rusiya XİN tərəfindən də səsləndirilməkdədir. Gürcüstan isə öz növbəsində bəyan edir ki, Moskva hələ də Gürcüstanda xalqın seçdiyi hakimiyyəti devirməkdə israrlıdır və prezident Mixail Saakaşviliyə qarşı müxtəlif ssenarilər cızır. Maraqlıdır ki, belə bir vaxtda sabiq xarici işlər naziri Salome Zurabişvili diqqət cəlbedən açıqlama ilə çıxış edib. Belə ki, o, tezliklə Gürcüstan prezidentinə sui-qəsd oluna biləcəyini bəyan edib. Onun fikrincə, prezidentin yaxın çevrəsi onun siyasi perspektivinə inanmadığı üçün belə bir varianta əl ata bilər: "Hakimiyyət komandasında Saakaşvilinin siyasi gələcəyinin üstündən xətt çəkildiyini düşünənlər var.
   Hər halda bunu istisna etmək olmaz. Ona görə də Saakaşvilinin yaxın çevrəsi onun aradan götürülməsi prosesinə start verə bilər. Buraya prezidentin qətlə yetirilməsi variantı da daxildir".
   Zurabişvili dövlət başçısını ehtiyatlı olmağa da çağırıb: "Saakaşvilinin yerində olsaydım, ehtiyatlı hərəkət edərdim".
   İndi rəsmi Tiflis istisna etmir ki, Saakaşviliyə qarşı hər hansı hərəkət və ya təxribat Moskvanın xeyir-duası ilə həyata keçirilə bilər. Bu arada isə Gürcüstanın Rusiyanın əleyhinə informasiya müharibəsinə Moskvadan qəti əks-həmlə olunub. Söhbət Tiflisin nəzarətində olan "1-ci Qafqaz telekanalı" nın yayımının dayandırılmasından gedir. Bu kanalın verilişləri bütöv regiona, o cümlədən qeyri-sabit Çeçenistan və Dağıstana yayımlanırdı. Gürcüstan bəyan edib ki, yeni rusdilli telekanalın yayımı Rusiya hökümətinin təzyiqi altında dayandırılıb.
   

Bilindiyi kimi, Türkiyə və Ermənistan arasında münasibətlərin inkişaf istiqaməti təkcə bu iki dövlətin yox, həm də regionda maraqlı olan digər qüvvələrin, o cümlədən ABŞ və Rusiyanın diqqət mərkəzindədir. Proseslərin
   real gedişi isə onu göstərir ki, Ermənistana kənar təzyiqlər olmasa, bu dövlətin türkiyə ilə münasibətlərini normallaşdırmasının mümkünlüyü sual altına düşəcək. Xüsusən də Ermənistan Konstitusiya Məhkəməsinin Sürix protokolları ilə bağlı məlum qərarından sonra Türkiyə İrəvanın mövqeyindən ciddi narahatlıq ifadə edərək, qarşı tərəfin protokolların şərtlərindən yayındığını bildirir. Türkiyədə dərc olunan "Referans" qəzetinin yazdığına görə, yaranmış vəziyyətdə Ermənistanı Sürix protokollarının şərtlərindən kənara çıxmamağa dəvət edən Ankara həm də ABŞ və İsveçdən yazılı təminat istəyir. Həmin təminat Ankara və İrəvan arasında yaxınlaşmada vasitəçi olan bu dövlətlərin Ermənistanın Sürix protokollarının şərtlərini pozmayacağını özündə ehtiva etməlidir.
   Hələlik isə həmin dövlətlər səviyyəsində bildirilir ki, Türkiyə və Ermənistan yaşanan ziddiyyətləər son qoymalı və protokolların parlamentlərdə ratifikasiyasını həyata keçirməlidir. ABŞ dövlət katibinin müavini Filip Qordon verdiyi açıqlamada hər iki dövləti irəliyə baxmağa və protokolları təsdiq etməyə çağırıb. Məsələyə 2001-2005-ci illər arasında Amerika dövlət katibinin müavini olmuş, yanvar ayından etibarən isə Türkiyə-Amerika Şurasının rəhbəri qismində fəaliyyətə başlayan səfir Riçard Armitac da münasibət bildirib.
   Dağlıq Qarabağ məsələsi və Ermənistan Konstitusiya Məhkəməsinin son qərarı üzündən Türkiyə ilə Ermənistan arasındakı yaxınlaşmanın pozulmasının mümkünlüyünə dair məsələni Riçard Armitac belə şərh edib: " Amerika rəhbərliyi bu yaxınlaşmanı çox dəstəkləyir. Türkiyə parlamentinin protokolları ratifikasiya edəcəyinə dair bəzi əndişələrim var. Ermənistanla münasibətlərin inkişafı kiçik məsələ deyil. Ancaq bunu da demək istəyirəm ki, bu məsələ Türkiyənin ənənəvi dostu Azərbaycanın zərərinə olacaqsa, Türkiyə burada diqqətli olmalıdır. Bu məsələnin sürətlə inkişaf etməsinin Azərbaycandakı dostlarımızda çaşqınlığa səbəb olduğunu bilirəm. Şəxsən Bakıdakı dostlarımızın bu məsələ barədə kifayət qədər məlumatlandırılmadığını düşünürəm. Zənnimcə, bu baxımdan Azərbaycanla əlaqələrin nizama salınması lazımdır".
   Amerikadakı erməni təşkilatlarının 1915-ci il aprel olaylarının soyqırım kimi tanınmasına çalışmasından narahatlıq keçirib-keçirmədiyinə dair sualı isə Riçard Armitac belə cavablandırıb: "Bəli, bir az qayğılıyam. Xüsusilə Kaliforniya ştatının cənubundakı erməni diasporu siyasi baxımdan çox güclüdür. Bu Amerikada siyasi reallıqdır. Soyqırım məsələsinin yenidən gündəmə gətirilməsindən narahatam. Amma ümid edirəm ki, erməni diasporu uzaqgörənlik sərgiləyərək, türk hökumətinin çox çətin bir işin öhdəsindən gələ bilmək üçün çalışdığını dəyərləndirəcək və türk hökumətinə nəfəs yeri verəcək".
   "Amerikanın Səsi" radiosunun türk xidmətinə müsahibə verən cənab Armitac Obama administrasiyasının birinci ilində Türkiyə-Amerika münasibətlərinin inkişafına da toxunub: "Prezident Barak Obamanın hakimiyyətinin ilk günlərində Türkiyəyə getməsi və baş nazir Ərdoğanın Vaşinqtona gəlişi yaxşı qarşılandı. Bu yaxşı başlanğıc idi. Ancaq bunu da qəbul etməyimiz gərəkdir: Amerika tərəfi olaraq, prezident Obamanın Türkiyəyə ziyarəti əsnasında götürülən öhdəliklərin yerinə yetirilməsi tam başa çatmayıb. Biznes dünyasını aktivləşdirməmiz gərəkdir. Ticari münasibətlərimizin səviyyəsini hərbi və diplomatik münasibətlərimizin səviyyəsinə çatdırmalıyıq. Yaxşı bir təməl qoymuşuq. Məncə, siz dediyiniz köhnə məsələləri artıq keçmişik. Hər iki tərəf birgə çalışsa lazımi mərhələyə çıxarıq. Mən də özümə bunu hədəf götürmüşəm".
   Son illərdə Türkiyənin bölgədə daha fəal xarici siyasət yürütdüyünü və bunun Vaşinqtonda necə qarşılandığını isə o belə şərh edib: "Əvvəla, Türkiyənin unikal coğrafi mövqeyi var - onun Şərqlə Qərb arasında ideal körpü olmaq potensialı var. Ən azı buna can atılmalıdır. Hökumətin açıqladığı məqsədlər - qonşularla sıfır problem siyasəti hamımızın arzuladığı bir nəticədir. Mən bunu Türkiyənin xarici siyasətində dəyişiklik kimi yozmuram, Bunu Türkiyənin maraqlarının və nüfuzunun genişlənməsi kimi qiymətləndirirəm. Bu da ümumən məmnunluqla qarşılanır".
   Riçard Armitac Türkiyə-Amerika Şurasının fəaliyyətinə də toxunub: "İlk öncə münasibətlərə zərər vurmamağı hədəfə almışam. Apreldə illik konfransımız keçiriləcək. İyunda isə enerji konfransı təşkil edəcəyik. Mən türk sənayesini Amerika iqtisadiyyatında mərkəzi rola yüksəltmək istəyirəm. Bundan əlavə, Amerika sənayesinin Türkiyədəki fəaliyyətini genişləndirmək istəyirəm. Tibbi və səhiyyə sahələri kimi.
   Silah sənayeləri arasında yaxşı münasibətlər var. Bunu genişləndirmək istəyirəm. Həm biz Türkiyədəki insan resurslarından yararlana bilərik, həm də Türkiyə Amerikadakı insan resurslarından yararlansın".
   

"ABŞ bütün ölkələrin suverenliyini və ərazi bütövlüyünü dəstəkləyir". APA-nın Vaşinqton müxbirinin məlumatına görə, bu sözləri ABŞ dövlət katibinin Avropa və Avrasiya məsələləri üzrə köməkçisi Filip Qordon Vaşinqtonda xarici mətbuat mərkəzində keçirdiyi brifinqdə deyib.
   Regionun digər mübahisəli məsələsi Türkiyə-Ermənistan razılaşmasıdır ki, bu da Konqresdə "erməni soyqırımı" qətnaməsinin qəbulu üçün göstərilən cəhdləri yenidən canlandırıb. F.Qordonun sözlərinə görə, ABŞ hələ də inanır ki, hər iki ölkə bu məsələdə irəliləyiş əldə edərək imzalanan sənədləri ratifikasiya etməli və həyata keçirməlidir: "Biz inanırıq ki, bu, iki ölkə arasında tarixi narazılıqları həll edə biləcək bir imkandır. Bu yol hər iki tərəfin xeyrinədir. Münasibətlərin normallaşması və sərhədlərin açılması regionda sülhün və sabitliyin bərqərar olmasına kömək edəcək".
   

Azərbaycan Milli Məclisinin (MM) deputatlarından ibarət nümayəndə heyəti fevralın 7-də Ukraynada keçiriləcək prezident seçkilərinin ikinci turunu izləyəcək.
   Bu barədə APA-ya nümayəndə heyətinin üzvü, deputat Nizami İsgəndərov bildirib. N.İsgəndərovun sözlərinə görə, onunla yanaşı, millət vəkilləri Qənirə Paşayeva, Rüfət Quliyev və Sabir Hacıyev fevralın 5-də Ukraynaya yola düşəcək.
   N.İsgəndərov deyib ki, o seçkiləri MDB Parlament Assambleyasının müşahidəçisi qismində izləyəcək. Deputat həmçinin qeyd edib ki, onlar Ukraynanın müxtəlif bölgələrində seçki məntəqələrində olacaqlar. Deputatların səfəri fevralın 8-də başa çatacaq.
   

Roma Papası II İohann Pavelə qarşı sui-qəsd cəhdinə görə uzun illər həbsxanada yatmış türk Əli Ağcanın vəkili Şövkət Can Özbay maraqlı açıqlama ilə çıxış edib.
   Milli.Az xəbər portalının Türkiyə mətbuatına istinadən verdiyi məlumata görə, Ağca pontifikin öldürülməsi sifarişini Dövlət Təhlükəsizlik Komitəsindən (DTK) alıbmış. Vəkil Ağcanın 2001-ci ildə Sabina Kastelfranko adlı italiyalı xanıma ünvanladığı məktubu yerli televiziyalardan birinin efirində səsləndirib. Məktubda terrorçu yazıb: "Əzizim Sabina! Səni maraqlandıran suala cavab vermək istəyirəm: Roma Papasını nədən öldürmək istəyirdim? Bunu mənə DTK sifariş etmişdi. Sifarişi Bolqarıstanın xüsusi xidmət orqanları vasitəsilə almışdım. Bunun ardından Bolqarıstan xüsusi xidmət orqanlarının Romadakı qanadının nümayəndəsi cənab Donçevlə görüşdüm. O mənə Papanın ardınca Polşanın o zaman nüfuz toplamaqda olan prezidenti Lex Valensanı da öldürəcəklərini bildirdi. Odur ki, mən sadəcə, sifarişin icraçısı idim".

ABŞ-da İranla mümkün müharibə zamanı həyata keçiriləcək raket hücumlarından müdafiə məqsədilə təlimlər keçirilib. Bu məqsədlə Pentaqon İrandan raket hücumu ssenarisini hazırlayıb. Təlim çərçivəsində ilk olaraq Marşal adalarından raket buraxılıb. Həmin raketi zərərsizləşdirmək üçün Kaliforniyadakı hərbi hava bazasından müdafiə raketi atılıb.
   Lakin rəsmilər dənizdəki radar sistemində nöqsanlar ucbatından raketi vurub salmağın mümkün olmadığını bildirib. Bu isə, bəzi ekspertlərə görə, ABŞ-ın şərqi Avropada, eləcə də Fars körfəzində raket əleyhinə müdafiə sistemləri yerləşdirməsi prosesini tezləşdirəcək. Yeri gəlmişkən qeyd edək ki, sözügedən uğursuz sınaqdan əvvəl Amerikanın Fars körfəsində yeni müdafiə sistemlərinin yerləşdirilməsini sürətləndirmək planı barədə xəbərlər yayılıb. Amerika bəyan edir ki, İranın yaxın və ortamənzilli raketləri region üçün artan təhlükə deməkdir.
   Ümumilikdə isə Pentaqonun planlarına İran sahilləri ətrafında xüsusi hərbi gəmilərin yerləşdirilməsi və bir neçə Körfəz dövlətində "Patriot" raketdən müdafiə sistemlərinin quraşdırıması daxildir. Məsələ ilə bağlı Britaniyanın "Quardian" qəzeti tərəfindən yayılan məlumatda qeyd olunur ki, ABŞ raket hücumundan müdafiə komplekslərini Qətər, Bəhreyn, Küveyt və BƏƏ-də yerləşdirir. Bundan başqa, İran körfəzi sularında İran raketlərini məhv edə biləcək iki gəmi yerləşdirilib. Həmçinin, Vaşinqton Səudiyyə Ərəbistanı hökumətinə neft hasilatı platformasını müdafiə etmək üçün yardım göstərir.
   Adının çəkilməsini istəməyən Ağ Ev nümayəndəsinin sözlərinə görə, ABŞ-ın bu hərəkətlərində məqsəd, ona qarşı tətbiq edilən sanksiyalara cavab olaraq, İran tərəfdən Amerikanın regiondakı müttəfiqlərinə qarşı hücumlardan xəbərdarlıqdır. Vaşinqton, həmçinin İsraili də İranın hücumlarından qorumağa çalışır və bununla da İran təhlükəsini sərbəst şəkildə dəf edə bildiyini nümayiş etdirir.
   Amerikanın raketdən müdafiə sistemləri ərəb ölkələrində yerləşdiriləcək sistemlərlə əlaqəli şəkildə işləyəcək. Pentaqon və Ağ Evdəki mənbələrin bildirdiyinə görə, bu strategiya prezident Barak Obama tərəfindən təsdiqlənib. Amerika hərbi strateqlərinin hesablamalarına görə, regionda vəziyyət mürəkkəbləşəcəyi təqdirdə İran bölgədəki müttəfiq ərəb ölkələrinə raket zərbələri endirə bilər. Bununla yanaşı, bildirilir ki, Marşal adalarından buraxılan raketin dənizdəki radar sistemində nöqsanlar üzündən vaxtında zərərsizləşdirilməməsi ABŞ-ın Şərqi Avropada RƏMS yerləşdirilməsi siyasətinə yenidən qayıtmasına səbəb olacaq. Bir neçə gün əvvəl Polşa mətbuatında yayılan məlumatda bildirilir ki, ABŞ Rusiyanın Kalininqrad vilayətilə sərhədin 100 kilometr aralıda "Patriot" raketlərinin yerləşdirilməsini qərara alıb. Polşanın müdafiə naziri Boqdan Klix bildirib ki, əvvəlcə raketlərin Varşavanın yaxınlığında yerləşdirilməsi qərara alınıb. Lakin sonda polşalı ekspertlər belə nəticəyə gəliblər ki, "Patriot" raketlərinin yerləşdirilməsi üçün ən yaxşı yer Moronq yaşayış məntəqəsidir: "Bu halda strateji xarakterli məsələlər nəzərdən keçirilməyib. Sadəcə, Moronqda Amerika hərbçiləri və onların avadanlıqları üçün daha yaxşı şərait təqdim edə bilərik". Raketlərin Polşaya apreldə gətirilməsi gözlənir.
   Ekspertlər bildirir ki, qeyd edilənlər, əslində ABŞ-la İran arasında mümkün müharibəyə dair son bir neçə ildə dolaşan məlumatların artıq həqiqətə yaxınlaşdığını göstərir. İlk növbədə ona görə ki, artıq ABŞ İranın raket hücumlarından qorunmaq üçün regionda etibarlı müdafiə sistemi yaradır. Bu sistemin tam qurulmasından sonra isə ABŞ-ın razılığı ilə İsrail aviasiyasının İranın nüvə obyektlərinə zərbə endirəcəyi gözlənir. Lakin bu missiyanı ABŞ aviasiyasının özünün yerinə yetirməsi də istisna olunmur.
   İran isə, həmişəki kimi, mümkün müharibəyə hazır olduğunu bəyan etməkdədir. O da diqqtətçəkən faktdır ki, İrana qarşı beynəlxalq birliyin iqtisadi və hərbi xarakterli təzyiqlərinin güclənməsi fonunda bu ölkə daxilində də vəziyyət daha çox qeyri-sabitliyə doğru dəyişir. Bunun əsas səbəblərindən biri də İranda hakimiyyətin müxalifətçilərə qarşı daha da aqressivləşməsidir. Bu arada isə İranın keçmiş prezidenti Məhəmməd Xatəmi məhkəmələrdə müxaliflərə edam hökmünün çıxarılmasını pisləyib. M.Xatəmi deyib ki, sivil etirazların, təzyiq və zorakılıqlara etiraz edənlərin cavabı edam deyil: "Bu yalnız indiki böhranı dərinləşdirə, insanların müəyyən çərçivələrdən çıxmasını gücləndirə bilər".
   Daha sonra Xatəmi vurğulayıb: "Görün ölkədə necə vəziyyət yaranıb. Bir tərəfdən dinc müxaliflərə qarşı təzyiqlər, zorakılıqlar və böhtanlar baş alıb gedir, digər tərəfdən də başqalarına qarşı zorakılıq edənlər, yalan və böhtan atanlar tam və mütləq azadlığa malikdir. İctimai problemləri təzyiq və zorakılıq yolu ilə həll etmək mümkün olmadığı kimi, mövcud vəziyyətə etiraz edən hər bir kəsi də çevrilişçi adlandırıb ona qarşı zorakılıq nümayiş etdirmək düzgün deyil. Hesab edirəm ki, şəxs lap çevrilişçi olsa da, onunla belə davranmaq olmaz".
   "Media forum" saytının məlumatına görə, islahat tərəfdarlarının tələblərini açıqlayan M.Xatəmi dolayı yolla dini rəhbərə müraciət edib: "Bizim istəyimiz, İslamla yanaşı, konstitusiyanın tamamilə icra olunmasıdır. Biz konstitusiya çərçivəsində mühüm yeri və rolu olan dini rəhbərin bütün ölkənin və bütün vətəndaşların rəhbəri olmasını istəyirik. Halbuki, bu gün cəmiyyətdə belə bir fikir formalaşıb ki, rəhbər yalnız müəyyən bir qrup və siyasi qanadın rəhbəridir".
   Xatəmi İrandakı "yaşıl hərəkat" rəhbərlərinin xalqa arxa çevirməsi barədə yayılan şayiələri isə rədd edib: "Bunlar xalqı ümidsiz etmək üçün yayılan əsassız və səhv təbliğat və təxribatdır. Bu belə deyil. Mən bildirirəm ki, bizim bir vaxt arzuladığımız İslam və İslam respublikası bu deyildi. Biz xalqın nəzarətində olmayan bir hakimiyyət arzulamamışdıq. Müasir dövrdə öz xalqına arxalanmayan hakimiyyətlər gec-tez yabançılardan asılı vəziyyətə düşəcək".
   

Kiyev Dairəsi İnzibati Məhkəməsi Ukrayna paytaxtının mərkəzində yerləşən Maydanda fevral ayının 1-nə qədər kütləvi aksiyaların keçirilməsinin qadağan edilməsi barədə qərar qəbul edib.
   APA-nın İTAR-TASS-a istinadən verdiyi məlumata görə, "kütləvi tədbirlərin" keçirilməsi üçün Yuliya Timoşenkonun Bloku (YTB) və Regionlar Partiyasının Gənclər təşkilatı müraciət edib.
   Kiyev meriyası mətbuat xidmətinin məlumatına görə, məhkəmə bu barədə hələ prezident seçkilərinin birinci turundan əvvəl də qərar qəbul edib. Qərara əsasən, kiyevlilərin Maydan adlandırdığı Müstəqillik meydanında yanvarın 9-dan fevralın 5-nə qədər kütləvi aksiyaların keçirilməsi qadağan olunub.
   Xatırladaq ki, Ukraynada prezident seçkilərinin ikinci turu fevralın 7-də keçiriləcək. İkinci turda prezident kürsüsü uğrunda hazırkı baş nazir Yuliya Timoşenko və Regionlar partiyasının lideri Viktor Yanukoviç mübarizə aparacaq.

Ukrayna Təhlükəsizlik Xidməti (SBU) Rusiya Federal Təhlükəsizlik Xidmətinin (FSB) 5 zabitini ifşa edib. APA-nın "UNİAN"a istinadən verdiyi məlumata görə, bu faktı Ukrayna Təhlükəsizlik Xidmətinin sədri Valentin Nalivayçenko Kiyevdə keçirdiyi mətbuat konfransında açıqlayıb.
   O bildirib ki, FSB əməkdaşlarından biri Ukrayna vətəndaşından dövlət sirri xarakteri daşıyan məlumatları alaraq ona 2 min dollar verərkən cinayət başında yaxalanıb: "FSB zabitləri ilə ukraynalı agentin görüşü dövlət sərhədindən 14 km aralıda olub. Moldovanın Dnestryanı regionundakı Rusiya qoşunlarının operativ qrupunda xidmət edən daha 3 FSB zabiti ikinci avtomobildə pərdələmə, maskalama funksiyası yerinə yetirib. Casus aksiyasına "örtük" olan və kəşfiyyatçının təhlükəsizliyini təmin edən bu şəxslərin fəaliyyətini onların rəhbəri, FSB-nin Rusiya qoşunlarının Dnestryanı regiondakı operativ qrupunun hərbi əks-kəşfiyyat bölməsinin podpolkovnik rütbəli rəisi uzaqdan izləyib. O, tabeliyindəki əməkdaşları hadisə yerində qoyaraq qaçıb. Yaxalananların üzərinə baxış keçirilərkən casus fəaliyyətində istifadə olunan avadanlıqlar - rəqəmsal diktofonlar, qələm şəklində videokamera, rəqəmsal məlumatların saxlanıldığı brelok formasında konteyner, agent üçün təlimatlar, noutbuk aşkarlanıb".
   V.Nalivayçenko bildirib ki, aksiyanı FSB zabitlərinin həyata keçirdiyini sübut edən faktlardan biri onların mobil telefonunda FSB-nin agentura fəaliyyətini tənzimləyən gizli təlimatın tapılmasıdır. Ən yüksək rütbəli zabitin Moskvadan gəldiyi müəyyənləşib. Bütün saxlananlar Dnestryanı ərazidən Ukrayna ərazisinə keçib. Məlum olub ki, onlar bir neçə ay əvvəl Dnestryanı ərazidə Ukrayna vətəndaşını oğurlayaraq onu hərbi bazaya aparıblar, orada hədə-qorxu gələrək əməkdaşlığa cəlb ediblər. Yüksək rütbəli zabit haqqında Kiyevin Şevçenko rayon Məhkəməsinin qərarı ilə həbs qətimkan tədbiri seçilib. Digərləri isə dindirildikdən sonra Ukraynadan qovulub və bu şəxslərin 5 il müddətində Ukraynaya gəlişinə qadağa qoyulub.
   

İran-Azərbaycan sərhəd keçid məntəqələrində İrana səfər etmək istəyən Azərbaycan vətəndaşlarına sağlamlıq haqqında arayış verilməsi məsələsi müzakirə olunur.
   APA-nın xəbərinə görə, bunu Bakıda səfərdə olan İran xarici işlər nazirinin müavini Həsən Qaşqavi deyib.
   Fevralın 1-dən İrana səfər edən Azərbaycan vətəndaşlarına vizasız rejim tətbiq edildiyini bildirən nazir müavini bununla bağlı sərhəd keçid məntəqələrində müəyyən problemlərin yarandığını deyib. H.Qaşqavi xatırladıb ki, İrana getmək istəyən Azərbaycan vətəndaşları Bakı, Gəncə və Lənkəran şəhərlərində sağlamlıq haqqında arayış ala bilər. Nazir müavini bu tibb mərkəzlərinin sayının artırılması üçün Azərbaycan Səhiyyə Nazirliyi tərəfindən də səylər göstəriləcəyinə ümid etdiyini deyib. H.Qaşqavi Naxçıvan Muxtar Respublikası sakinlərinin, artıq iki ildir, İrana vizasız, sağlamlıq haqqında arayışlar almaqla getdiklərini də qeyd edib.
   

İranın Tehran şəhərində fevralın 1-də axşam saatlarında "Evin" həbsxanasının qarşısında etiraz aksiyası keçirilib.
   APA-nın "Emrooz"a istinadən verdiyi məlumata görə, Tehranda baş verən son aksiyalar və 27 dekabr 2009-cu il Aşura günü həbs edilənlərin yaxınlarının iştirak etdiyi aksiya saat 18.00 radələrində baş tutub.
   Aksiya iştirakçıları İran İslam İnqilabının banisi İmam Xomeyninin Parisdən İrana dönməsinin 31-ci ildönümü günündə edam hökmünün ləğvini, yaxınlarının tezliklə azadlığa buraxılmasını və məhkəmə proseslərinə son qoyulmasını tələb edib. Təqribən 600-800 nəfərin iştirak etdiyi aksiyaya polis müdaxilə etməyib.
   
   

Azərbaycan Liberal Partiyasının (ALP) lideri Lalə Şövkət APA-ya müsahibəsində "Müsavat Partiyasının başqanı İsa Qəmbərin müxalifətdə olan bəzi partiyaların İrana, Rusiyaya və hakimiyyətə işləməsi barədə ittihamlarını necə dəyərləndirirsiniz" sualına cavab olaraq deyib:
   "Bu söhbətlər qeyri-ciddidir. Bu məsələ ilə əlaqədar hər hansı şəxsdə sübut və sənəd varsa, onu dərhal Milli Təhlükəsizlik Nazirliyinə təqdim etmək onun borcudur. Əks təqdirdə, bunun özü ağır dövləti cinayətdir.
   Bu gün Müsavat rəhbərliyi tərəfindən bolşevik təfəkkürlü üslubdan istifadə etmək məhz Müsavatın tarixinə xəyanətdir. Mən burada xüsusilə qeyd etmək istəyirəm ki, Müsavat sıralarında çoxlu sayda alicənab, fədakar insan var.
   Bu insanlar məhz bu tarixi ada görə bu partiyaya üzv olublar. Mənim onlara çox böyük hörmətim var və onların çoxu bu işlərdən narazıdır.
   Yanvarın 7-də mən müxalifətin birliyi haqqında təkliflə çıxış etdim. Təklifimin məğzi ondan ibarət idi ki, müxalifət indiki çətin vaxtda geniş koalisiya yaratsın və parlament seçkilərində alternativsiz namizədlər siyahısı ilə çıxış etsin" deyən Lalə Şövkət davam edir: "Amma çox təəssüf ki, Müsavat Partiyasının sədri bunun müqabilində öz çıxışı ilə ayrıseçkilik və qarışıqlıq salaraq, bu birliyə böyük zərbə vurdu".
   

Son zamanlar Azərbaycan müxalifəti daxilində yeni bir tendensiya ortalığa atılıb. Artıq bir sıra aparıcı müxalifət partiyaları iddia etməyə başlayıb ki, onların olmadığı heç bir blok və ya birlik güclü ola bilməz. Belə fikirlər Müsavat Partiyası ilə Azərbaycan Xalq Cəbhəsi Partiyası daxilində eşidilməkdədir.
   Məsələn, bu günlərdə Müsavatın Mərkəzi İcra Aparatının rəhbəri Arif Hacılı mətbuata açıqlamasında açıqca bildirib ki, Müsavatın və AXCP-nin olmadığı hər hansı birliyin müxalifət birliyi adlandırılması mümkünsüzdür: "Kimlərsə hansısa birliklər yaratmaq istəyirsə, yaratsınlar. Nəinki Müsavatla AXCP-nin ikisinin birlikdə, hətta bu təşkilatlardan hər hansı birinin olmadığı birliyi, bloku, hərəkatı ümummüxalifət birliyi adlandırmaq qeyri-mümkündür". Onların nəzərində birliyin yaranmasının açarı Müsavat və AXCP-dədir. Bu qüvvələr olmadan müxalifətin birliyi tam olmaz. Hətta bu iki partiyada müxalifətin birliyinin yalnız onlar arasında mümkünlüyündən danışmağa başlayanlar da var. Yəni bu cür düşünənlərə görə, əsas məqsəd Müsavatla AXCP-nin vahid birliyinə nail olmaqdır. Yerdə qalan müxalifətçiləri kənara atmaqla isə, onları ümumiyyətlə yaxına buraxmaq istəmirlər. Məsələn, Müsavatda hələ də düşünürlər ki, "Azadlıq" bloku olmadan tək AXCP ilə yaxınlaşmaq kursu götürülməlidir. Bundan başqa, onlar Ümid Partiyasını da müxalifətçi kimi yaxına buraxmaq istəmirlər. Yadınızdadırsa, "Qarabağ və Respublika Uğrunda Hərəkat"ın dağılmasının kökündə də məhz Ümidlə Müsavat partiyaları arasında yaşanan gərginlik, ziddiyyətlər dururdu. Həmin vaxt Müsavat ümidçilərin seçki komissiyalarından geri çağırılmasını tələb edirdi. Bunun müqabilində Ümid də Müsavat Deputat Qrupunun parlamentdən geri çağırılmasında israrlı idi. Sonda hər iki partiya arasında vahid rəyə gəlinmədiyindən, "Qarabağ və Respublika Uğrunda Hərəkat"ın taleyi də müxalifətin bundan əvvəlki bloklarının taleyilə eyni oldu. O vaxtdan bəri müxalifət düşərgəsində ziddiyyətlər səngimək bilmir. İndi də mətbuatda ALP-in sədr əvəzi Əvəz Temirxanla Müsavat arasında kimin xarici kəşfiyyata işləməsi barədə sərsəm fikirlər dolaşmaqdadır. Belə fikirlərin ortaya atılması, bəzilərinin özlərini böyük sayması isə müxalifətdəki kiçik partiyaların narazılığına gətirib çıxarmalı idi, necə ki, artıq gətirib çıxarıb. Belə ki, əldə etdiyimiz məlumatlara görə, Müsavatla cəbhəçilərin özlərini "göylə" aparmalarından, saymazyana münasibətlərindən təngə gələn digər müxalifətçilər onlara əks qütbdə bloklaşmağa doğru istiqamət götürməyə meyllənib. Məlumatlara görə, müxalifətdəki bəzi funksionerlərin siyasi eqoizminə qarşı kiçik partiyalar yaxın zamanlarda məhz bu istiqamətdə fəaliyyətə başlaya bilər. Əks qütbdə bloklaşanlar arasında Vətəndaş və İnkişaf Partiyasının (VİP), Azərbaycan Liberal Partiyasının (ALP) və DUİ-də təmsil olunan bəzi cırtdan partiyaların olacağı istisna deyil.
   Ümumiyyətlə, son zamanlar Müsavatın apardığı siyasət ona dəlalət edir ki, bu təşkilat kiçik partiyalarla əməkdaşlıqdan birdəfəlik yaxa qurtarmağa çalışır. Fikir verirsinizsə, Müsavatın son dövrlər ziddiyyətdə olduğu müxalifət partiyaları arasında məhz kiçik adlanan siyasi təşkilatlar üstünlük təşkil edir.
   Belə ki, Müsavat, yuxarıda da qeyd etdiyimiz kimi, əvvəlcə Ümid, ardınca isə VİP və ALP ilə top atəşinə çıxıb. Bunların da kökündə Müsavatın, digər müxalifətçilərdən kənar, yalnız AXCP ilə birliyə can atması durur. Bu halın isə həmin kiçik adlanan müxaliflərin narazılığı ilə qarşılacanağı gözləniləndir. Görünür, bu səbəbdəndir ki, onlar özlərinin ayrıca birliyini formalaşdırmaq istiqamətində müzakirələrə girişiblər.
   Belə ki, verilən bilgiyə görə, artıq bununla bağlı VİP-in qərargahında ilkin fikir mübadiləsi də aparılıb. Bu diskussiyada hələlik VİP, ALP, Ümid və Azadlıq Partiyası iştirak edib və konkret qərara gəlinməyib. Mənbə bildirir ki, onlar hələlik gözləmə mövqeyi tutublar. Müsavatla AXCP öz mövqeyindən çəkilmədiyi halda isə, istəklərini reallaşdırmaq istiqamətində konkret hərəkətlərə keçəcəklər.
   Belə vəziyyət sonda ona gətirib çıxara bilər ki, yaxın zamanlarda biz müxalifətdəki kiçik partiyaların bir yerə cəmləşdiyi yeni bir birliyin şahidi ola bilərik. Hələlik düzdür, bu birliyin blok şəklində və ya başqa cür olacağı bilinmir.
   Amma bütün hallarda açıq-aydın bəllidir ki, parlament seçkiləri ərəfəsi müxalifət daxilində ziddiyyətlər, səngimək əvəzinə, daha da kəskinləşməyə doğru gedir. Hazırda isə görünən odur ki, bəzi müxaliflərin özlərini "göylə" aparması kiçik partiyaları əməlli-başlı incik salıb...
   

Yeni Zaman Partiyası bu ilin sonunda keçiriləcək parlament seçkilərində iştirak edib-etməyəcəyini hələlik qərarlaşdırmayıb.
   Bu barədə məlumatı "OLAYLAR"İA-ya partiyanın sədri Musa Ağayev verib. Bildirib ki, buna səbəb partiyanın dövlət qeydiyyatından keçməməsidir: "Hələlik gözləməyi üstün tuturuq. Ona görə də parlament seçkilərinə hazırlıq istiqamətində partiyada heç bir iş görülmür və YZP-nin seçkilərlə bağlı hər hansı qərarı yoxdur. Seçkilərə qədər Yeni Zaman Partiyası dövlət qeydiyyatına alınsa, o halda biz də parlament seçkilərində iştirak edəcəyik".

"Eks-prezidentlərin statusu haqqında" qanun layihəsi parlamentin yaz sessiyasında müzakirə oluna bilər. APA-nın məlumatına görə, bu barədə millət vəkili Siyavuş Novruzov bildirib.
   Onun sözlərinə görə, qanunun qəbulu ilə bağlı Yeni Azərbaycan Partiyası (YAP) müəyyən təkliflərlə çıxış edib və bu təkliflər parlamentin müvafiq komissiyasına təqdim olunub. Sənəddə eks-prezident statusunun kimlərə şamil olunması barədə təkliflər əksini tapıb: "Başlıca tezis ondan ibarətdir ki, eks-prezident statusu o adama verilə bilər ki, vəzifə səlahiyyətlərini axıra kimi başa çatdırır, yaxud digər səbəblərdən - səhhəti, dünyasını dəyişməsilə əlaqədar vəzifəsini axıra kimi icra edə bilmir. Qalan hallarda - vəzifə başında cinayətlər törətməklə, vəzifə səlahiyyətlərini aşmaqla, yaxud başqa hallarda bu status verilə bilməz. Bu, dünya praktikasından irəli gəlir. İstənilən titul istənilən insanın əlindən alına bilir. Eks-prezidentlik statusu da belədir. Prezident vətəninə, millətinə, and içdiyi Konstitusiyaya uyğun olaraq qarşısına qoyulan vəzifələrin hamısını yerinə yetirməlidir. Yerinə yetirmirsə, bu yalnız səhhəti, istefası ilə bağlı ola bilər".

MM-in komitə sədri diffamasiya ilə bağlı qanunun bu il qəbulunu mümkün hesab etmir.
   "Biz 2010-cu ildə "Diffamasiya Haqqında" Qanun layihəsilə bağlı müzakirələrə başlasaq da, parlamentdə qəbul olunacağını güman etmirəm". Bu barədə çərşənbə axşamı Trend News-a Milli Məclisin Mədəniyyət komitəsinin sədri Nizami Cəfərov bildirib.
   Azərbaycan Mətbuat Şurası 2010-cu ili "Diffamasiya ili" elan edib.
   "Diffamasiya haqqında" qanun layihəsi 2005-ci ildə ATƏT-in Bakı ofisinin dəstəyilə hazırlanıb. Onu hazırlayan işçi qrupa millət vəkilləri Qənirə Paşayeva, Azay Quliyev, jurnalist təşkilatlarının nümayəndələri, hüquqşünaslar daxildir.
   Beynəlxalq təşkilatlar hesab edir ki, təhqirə və böhtana görə cinayət məsuliyyəti nəzərdə tutulan 147-ci (böhtan) və 148-ci (təhqir) maddələri Cinayət Məcəlləsindən çıxarılmalıdır. "Diffamasiya haqqında" qanun layihəsinin qəbulu ilə bağlı 2009-cu ilin mayında 6 jurnalist təşkilatı - Azərbaycan Jurnalistlər Birliyi, Nəcəf Nəcəfov Fondu, Jurnalistika və İnkişaf Mərkəzi, "Yeni Nəsil" Jurnalistlər Birliyi, Azərbaycan Media Mərkəzi və Demokratik Jurnalistlər Liqası parlamentə müraciət etmişdi. Sonradan həmin müraciətə 400-ə yaxın KİV nümayəndəsi, jurnalist təşkilatlarının üzvləri də qoşulub. Qanun layihəsi ATƏT-in ekspertizasından keçib Cəfərovun sözlərinə görə, Milli Məclis Aparatına təqdim olunan qanun layihələri müzakirə üçün, hələ ki, komitəyə göndərilməyib. "Biz bundan sonra qanunvericilik proseduruna uyğun olaraq layihələri müzakirə etməliyik. Mənə elə gəlir ki, diffamasiya ilə bağlı müzakirələrə başlamaq olar", - millət vəkili əlavə edib. Onun fikrincə, layihələrin komitədə müzakirəsi başa çatdırılsa belə, parlamentdə qəbulu real deyil. "Çünki bu elə bir qanundur ki, geniş müzakirəyə ehtiyac var. Bəzən mətbuatla bağlı tələsik qəbul olunan qanunlar sonradan özünü doğrultmur. Bunu nəzərə alaraq, bütün məsələləri hərtərəfli müzakirə edib konkret qərara gəlmək lazımdır", - Cəfərov vurğulayıb. Komitə sədri deyib ki, diffamasiya haqqında qanunun qəbulu cəmiyyətin, xüsusən mətbuatın onun icrasına nə dərəcədə hazır olmasından da çox asılıdır.