"Qalatasaray" daha bir legionerlə yollarını ayırıb. Apasport.az saytının məlumatına görə, "Cim Bom" danimarkalı yarımmüdafiəçisi Tobias Linderotun ardınca konqolu hücumçu Şabani Nonda ilə də vidalaşıb.
   33 yaşlı afrikalı legionerlə müqavilə birtərəfli qaydada pozulub. Qış fasiləsində iki əcnəbi hücumçu - braziliyalı Jo və meksikalı Covani Dos Santosu icarəyə götürəndən sonra "Qalatasaray"ın legioner limiti dolub. Belə olan halda, baş məşqçi Frank Raykaard sərəncamında olan əcnəbilərdən biri ilə vidalaşmalı idi.
   Zədə üzündən uzun müddətə sıradan çıxan avstraliyalı yarımmüdafiəçi Harri Kyuellə Nonda arasında seçim etmək lazım gəlib. Harriyə üstünlük verən istanbullular yeni transferlərin hücumçu olduğunu da nəzərə alaraq, Şabanini komandadan çıxarıb.
   "Qalatasaray"ın vitse-prezidenti Haldun Üstünəl Kyuellin göndərilməsinin heç gündəmdə olmadığını bildirib: "Nondanın gedişi baş məşqçinin qərarı ilə oldu. Onu sərbəst buraxdıq. Şabani ilə anlaşmanın xitam edilməsi yönündə aldığımız qərar məşqçilər korpusundan aldığımız raport nəticəsində verilib".
   Qeyd edək ki, 33 yaşlı Nonda "Qalatasaray"a çexiyalı hücumçu Milan Baroşun keçidindən sonra daha çox ehtiyatda qalırdı. O, komandada keçirdiyi iki ildə 97 oyuna 37 qol vurub. Şabaninin azad agent statusuna malik olmasından "Qalatasaray"ın əzəli rəqibi "Fənərbaxça" istifadə etmək fikrindədir. Ancaq konqolu uzun illər çıxış etdiyi Fransaya qayıtmağı qərar alıb. Nondanın "Fənərbaxça"dan Kazım Kazımı icarəyə götürən "Tuluza" klubu ilə anlaşdığı bildirilir.

Madridin "Real" futbol klubu 19 il ərzində ilk dəfə La-Karunyoda ilk qələbəsini qazanıb. Manuel Pelleqrininin yetirmələri "Deportivo"nu 3:1 hesabı ilə məğlub ediblər.
   Birinci hissədə Esteban Qranero və Kərin Benzema qonaqları hesabda irəli çıxarıblar. Oyunun 87-ci dəqiqəsində meydan sahibləri hesab arasındakı fərqi azaltsalar da, Kərim Benzemanın dublu qarşılaşmanın taleyini həll edib.
   "Real" özü üçün uğursuz "Riasor" stadionundakı qarşılaşmaya yeddi zədəli oyunçusu (bombardir Qonsalo İquain və müdafiəçi Pepe də daxil olmaqla) və cəzalı Kriştianu Ronaldusuz çıxıb. La-Karunyodakı qələbə "Real"a lider "Barselona" ilə arasındakı xalq fərqini 5-ə endirmək imkanı verib.

Azərbaycan futzal yığmasının üzvü Nilson Maşado (Biro Jade) yanvarın 19-dan 30-dək Macarıstanda keçirilmiş Avropa çempionatının ən məhsuldar oyunçularından olub. Apasport.az saytının məlumatına görə, 37 yaşlı braziliyalı iştirak etdiyi matçlarda rəqib qapılarına 5 dəfə yol tapıb. Biro ilə yanaşı, daha 3 futzalçı 5 qol vurub. Bunlar Saad Assis (İtaliya), Xavi Rodriges (İspaniya) və Joel Keyruşdur (Portuqaliya). Hər 4 oyunçu "Qızıl buts" mükafatının sahibi olub.

Macarıstanda keçirilən futzal üzrə növbəti Avropa çempionatına yekun vurulub. Apasport.az saytının məlumatına görə, sayca 7-ci dəfə təşkil olunan yarışın qalibi İspaniya yığması olub.
   İspanlar finalda Pireney yarımadasının digər təmsilçisi Portuqaliyanı üstələyiblər - 4:2. Bununla da, İspaniya komandası beşqat qitə çempionuna çevrilib. Bürünc medal Azərbaycan yığmasını 5:3 hesabı ilə üstələmiş Çexiyaya nəsib olub. Azərbaycan yığması isə Macarıstanda keçirilən Avropa çempionatında üçüncü yer uğrunda görüşdə Çexiya millisinə məğlub olub. APA-nın məlumatına görə, birinci hissədən sonra Borisov və Serjionun qollarıyla 2:1 irəlidə olan millimiz ikinci hissədə hesabı qoruya bilməyib və öz qapısından 3 top buraxaraq 2:4 hesabı ilə geriyə düşüb. Oyunun sonuna 3 dəqiqə qalmış Fərəczadə hesab arasındakı fərqi azaltsa da, son dəqiqədə çexlər daha bir top vurublar - 3:5.

Premyer Liqada çıxış edən komandaların əvəzedici heyətləri arasında keçirilən Azərbaycan çempionatında fasilə başa çatıb. Fanat.az xəbər verir ki, dünən XVIII turun oyunlarına start verilib.
   İlk oyun günündə bir qarşılaşma baş tutub. Turnir cədvəlinin lideri olan "Qarabağ" "Neftçi" ilə qarşılaşıb. Gərgin mübarizə şəraitində keçən oyunda Ağdam klubu qələbə qazanıb - 1:2.
   Turun iki oyunu bu gün keçiriləcək. XVIII tura fevralın ikisində yekun vurulacaq.
   

Türkiyənin "Fənərbaxça" klubu "qış transfer pəncərəsi"nin bitməsinə 2 gün qalmış heyətini yeni futbolçu ilə gücləndirmək niyyətindədir. Türkiyə mətbuatı "Fənərbaxça"nın bu məqsədlə "Mançester Yunayted" futbol klubunun fransız oyunçusu Qabriel Obertanla maraqlandığını iddia edir.
   Obertanın İstanbul klubundan ayrılan Kolin Kazımın mövqeyi üçün alınacağı bildirilir.
   "Fənərbaxça" klubu rəhbərliyi "Mançester Yunayted"in əsas heyətində nadir hallarda meydana çıxan Qabriel Obertanı mövsümün sonunadək icarə əsasında Türkiyəyə gətirtmək üçün səylərini davam etdirir.
   

Tovuzun "Turan" klubunun prezidenti Musa Süleymanov istefaya gedib. Bu barədə apasport.az saytına açıqlamasında Süleymanovun özü məlumat verib.
   O, komandadan ayrılmasına qısa olaraq belə şərh verib: "Komandaya baxmağa gücüm çatmır".
   "Turan"ın yeni prezidentinin adı isə yaxın günlərdə açıqlanacaq. Çox güman ki, bu posta Tovuz İcra Hakimiyyətinin başçısı Tofiq Zeynalovun yaxın adamlarından biri gətiriləcək.
   Qeyd edək ki, son vaxtlar Zeynalovla Süleymanov arasında narazılıq hökm sürürdü.
   

"Barselona" İspaniya çempionatının növbəti turunda "Sportunq"ə qalib gəlib. Qarşılaşmanın taleyini Pedronun yeganə qolu həll edib.
   Bu qələbə İspaniya çempionatının lideri "Barselona"ya ən yaxın rəqibi "Real"la arasındakı xal fərqini 8-ə çatdırmaq imkanı verib. Kataloniyalılar çempionatdakı 20 oyundan heç birində məğlub olmayıblar.
   
   

İtaliyanın "Yuventus" futbol klubunun baş məşqçisi Çiro Ferrara istefaya göndərilib. Lent.az-ın klubun mətbuat xidmətinə istinadən verdiyi məlumata görə, onu Alberto Zakkeroni əvəzləyib.
   Zakkeroni ilə mövsümün sonunadək müqavilə bağlanılıb. Yeni baş məşqçi artıq kollektivə təqdim olunub.
   Çiro Ferrara qeyri-qənaətbəxş nəticələri ilə əlaqədar postundan kənarlaşdırılıb. "Yuve" son 12 matçının 9-da uduzub. 56 yaşlı Alberto Zakkeroni isə indiyədək İtaliya çempionatında "Milan", "Latsio", "İnter" və "Torino" komandalarına rəhbərlik edib.
   

Almaniya Bundesliqasında XX tura start verilib. Fanat.az xəbər verir ki, "Bavariya" darmadağınla qələbə qazanıb.
   Münhen klubu evdə "Maynts 05"in qapısına üç cavabsız qol vurub. Bu qələbə sayəsində "Bavariya" ən azı bir günlük lider olub.
   Son çempion "Volfsburq" "Hamburq"la səfər oyununda xal itirib - 1:1. Liderlər qrupunda qərarlaşan "Şalke 04" evdə "Hoffenhaym"ı 2:0 hesabı ilə məğlub edib.
   Həftənin ən maraqlı qarşılaşması Münhenqlabaxda baş tutub. Yeddi qolun vurulduğu "Borussiya" - "Verder" matçında meydan sahibləri 4:3 hesablı qələbə qazanıb.