22/11/2017 15:17
728 x 90

Əli İnsanovun məhkəməsi qeyri-müəyyən vaxtadək təxirə salındı...

img

Bu gün Ali Məhkəmədə həbsdə olan sabiq səhiyyə naziri Əli İnsanovun kassasiya şikayəti üzrə məhkəmə iclası keçirilib.

“Trend”-in məlumatına görə, hakim Fərhad Kərimovun sədrliyi ilə keçirilən iclasa Ə.İnsanov gətirilməyib. Dövlət ittihamçısı Rizvan Şəmmədov bildirib ki, işlə tanış ola bilmədiyi üçün ona vaxt verilsin. Prokurorun vəsatəti təmin edilib və proses qeyri-müəyyən vaxtadək təxirə salınıb.

Qeyd edək ki, Qaradağ rayon Məhkəməsinin hökmü ilə Ə.İnsanov 7 il 5 gün müddətinə azadlıqdan məhrum edilib. Hökmdən apelyasiya şikayəti verilib. Bakı Apelyasiya Məhkəməsininin qərarı ilə Ə.İnsanovun apelyasiya şikayəti təmin edilməyib və birinci instansiya məhkəməsinin çıxardığı hökm dəyişdirilmədən qüvvəsində saxlanıb. Sabiq nazir kassasiya şikayəti ilə Ali Məhkəməyə müraciət edib.

Ə.İnsanov Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama), 315.2 (Hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olmayan zor tətbiq etməklə müqavimət göstərmə, xidməti vəzifələrini yerinə yetirməsi ilə əlaqədar ona və ya onun yaxın qohumlarına qarşı belə zor tətbiq etmə və ya zor tətbiq etmə hədəsi ilə hədələmə, bu maddədə göstərilən şəxslərə qarşı həyat və sağlamlıq üçün təhlükəli olan zor tətbiq etmə) və 317-2.1-ci (Cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi, eyni əməllər təkrar törədildikdə) maddələri ilə ittiham olunub.

Ə.İnsanov 2005-ci ilin oktyabr ayında həbs olunub. O, dövlət vəsaitlərinin mənimsənilməsində və dövlət aktivlərinin qanunsuz özəlləşdirilməsinin təşkilində ittiham edilib. 2007-ci ilin aprel ayında o, əmlakı müsadirə olunmaqla 11 il müddətinə azadlıqdan məhrum olunub. Ə. İnsanovun cəza müddəti ötən ilin oktyabr ayında başa çatırdı.

 

Son xəbərlər